សកម្មភាពនេះកើតឡើងក្នុងកាលៈទេសៈដែលទ្រព្យសម្បត្តិជាង ៣០០ ពាន់លានដុល្លារ របស់ ធនាគារជាតិរុស្ស៊ី ដែលស្ថិតនៅក្នុងបណ្ដាធនាគារបរទេស ត្រូវបាន សហរដ្ឋអាម៉េរិក និង សម្ព័ន្ធមិត្តបង្កក ឬគំរាមរឹបអូស។
ទីភ្នាក់ងារសារព័ត៌មាន Financial Times ដកស្រង់ដំណឹងពីប្រភពព័ត៌មានច្បាស់ការណ៍ឱ្យដឹងថា ក្រុមអ្នកតាក់តែងច្បាប់របស់ ចិន បានកោះប្រជុំបន្ទាន់ជាមួយបណ្ដាធនាគារធំៗក្នុងស្រុក និងបរទេស ដើម្បីពិភាក្សាអំពីវិធានការការពារទ្រព្យសម្បត្តិ បើសិន អាម៉េរិក ដាក់ទណ្ឌកម្មលើ ចិន ដូចទៅនឹងអ្វីដែល រុស្ស៊ី បានរងកាលពីខែកុម្ភៈ។
កិច្ចប្រជុំខាងលើត្រូវបានធ្វើឡើងកាលពីថ្ងៃទី ២២ មេសា និងមានការចូលរួមពីក្រុមមន្ត្រីរបស់ ធនាគារប្រជាជន និងក្រសួងហិរញ្ញវត្ថុចិន រួមនឹងធនាគាររដ្ឋចិន ទាំងអស់ និងបណ្ដាធនាគារបរទេសធំៗដែលកំពុងរកស៊ីនៅប្រទេសនេះ។
មន្ត្រីជាន់ខ្ពស់ ១ រួប របស់ ក្រសួងហិរញ្ញវត្ថុចិន នៅក្នុងកិច្ចប្រជុំនោះ និយាយថា ទីក្រុងប៉េកាំង បានដាក់លទ្ធភាពនៃការបង្កកទ្រព្យរបស់បរទេស ពីសំណាក់ លោកខាងលិច ទៅក្នុងស្ថានភាពប្រកាសអាសន្ន នៅពេលពិនិត្យមើលនូវអ្វីដែល សហរដ្ឋអាម៉េរិក និង សម្ព័ន្ធមិត្ត បានធ្វើចំពោះ រុស្ស៊ី។
ក្នុងរយៈពេល ៣ ខែកន្លង រុស្ស៊ី ឱ្យដឹងថា អាម៉េរិក និងបណ្ដាប្រទេសជាសម្ព័ន្ធមិត្តរបស់ អាម៉េរិក បានបង្កកទ្រព្យប្រហែល ៣០០ ពាន់លានដុល្លារ ក្នុងចំណោមទ្រព្យសម្បត្តិប្រហែល ៦៤២ ពាន់លានដុល្លារ របស់ រុស្ស៊ី នៅបរទេស។ ថ្មីៗនេះ អាម៉េរិក និង បស្ចិមលោក បានគំរាមថា នឹងរឹបអូសទ្រព្យខាងលើ ឬផ្ទេរវាទៅឱ្យ អ៊ុយក្រែន ដើម្បីចាត់ចែងតាមចិត្តចង់។
បុគ្គល ១ រូប ដែលបានចូលរួមកិច្ចប្រជុំខាងលើ ឱ្យដឹងថា ខ្លឹមសារនៃកិច្ចប្រជុំមិនបាននិយាយដល់សេណារីយោទាក់ទិននឹងការបង្កកទ្រព្យសម្បត្តិនោះទេ។ បុគ្គលនេះអះអាងថា ការកាត់ផ្ដាច់រវាងសេដ្ឋកិច្ចចិន និងលោកខាងលិច នឹងធ្ងន់ធ្ងរជាង បើធៀបនឹង រុស្ស៊ី ព្រោះថា វត្តមាននៃសេដ្ឋកិច្ចរបស់ ទីក្រុងប៉េកាំង គ្របដណ្ដប់ពាសពេញពិភពលោក។
បច្ចុប្បន្ន ប្រទេសចិន មានទ្រព្យជាង ១.៥ ទ្រីលាន (១.៥ លានលាន/១,៥០០,០០០,០០០,០០០) ដុល្លារ នៅ សហរដ្ឋអាម៉េរិក ក្នុងនោះមានភាគហ៊ុនប្រមាណ ១ ទ្រីលានដុល្លារ នៅក្នុងរតនាគារអាម៉េរិក នាទីក្រុង New York។ រដ្ឋាភិបាលចិន និងបណ្ដាក្រុមហ៊ុនរដ្ឋចិន ក៏មានទ្រព្យរាប់សែនលានដុល្លារ នៅលើ ទឹកដីអាម៉េរិក ផងដែរ ក្នុងនោះរួមមានទាំងក្រុមហ៊ុន អចលនទ្រព្យ ភាគហ៊ុន និងសេវាកម្ម។ល។
នេះមិនមែនជាលើកទីមួយទេ ដែល អាម៉េរិក និងលោកខាងលិច បានបង្កកទ្រព្យសម្បត្តិរបស់បរទេស។ កាលពីឆ្នាំ ២០២១ ទីក្រុងវ៉ាស៊ីងតោន ក៏បានរឹបអូសយកទ្រព្យប្រហែល ៧ ពាន់លានដុល្លារ របស់ អាហ្វហ្គានីស្ថាន បន្ទាប់ពី ទីក្រុងកាប៊ុល បានធ្លាក់ទៅលើដៃរបស់ក្រុម តាលីបង់។
មុននោះ រដ្ឋាភិបាល និងបណ្ដាធនាគាររបស់លោកខាងលិច ក៏ធ្លាប់បានបង្កក រឹបអូសទ្រព្យរាប់សិបពាន់លានដុល្លាររបស់ វ៉េណេស៊ុយអេឡា, លីប៊ី និង អ៊ីរ៉ង់ ផងដែរ។
