សឿន សំណាង - La Reine Media

មហាសេដ្ឋី ប៊ីលហ្វេត (Bill Gates) ទទួលស្គាល់ថា បានបង្កការឈឺចាប់ដល់គ្រួសារ

មួយឆ្នាំ បន្ទាប់ពីបានលែងលះ មហាសេដ្ឋីអាម៉េរិក លោក ប៊ីលហ្គេត បានសារភាពថា បានបង្កកំហុសឆ្គងធ្ងន់ធ្ងរនៅក្នុងទំនាក់ទំនងអាពាហ៍ពិពាហ៍ និងបាន «ធ្វើឱ្យគ្រួសារឈឺចាប់»។

«ខ្ញុំប្រាកដណាស់ថា បានធ្វើឱ្យមានកំហុសឆ្គង ហើយខ្ញុំសុំទទួលខុសត្រូវ» មហាសេដ្ឋី ប៊ីលហ្គេត បានប្រាប់ សារព័ត៌មាន Today កាលពីថ្ងៃទី ៣ ឧសភា នៅពេលត្រូវបានសួរថា តើមានពេលខ្លះលោកមិនស្មោះនឹងអាពាហ៍ពិពាហ៍ ២៧ ឆ្នាំ ជាមួយអតីតភរិយា គឺលោកស្រី មេលីនដា ហ្វ្រែន ហ្គេត (Melinda French Gates) ឬទេ។

កិច្ចសម្ភាសខាងលើត្រូវបានធ្វើឡើងចំថ្ងៃគម្រប់ ១ ឆ្នាំ បន្ទាប់ពីលោក និងលោកស្រី ហ្វ្រែន ហ្គេត បានចេញប្រកាសរួមថា បានសម្រេចចិត្តលែងលះ។

លោកប៊ីល ហ្គេត និងលោកស្រី មេលីនដា ហ្គេត កាលពីនៅជាគូនឹងគ្នា

មហាសេដ្ឋីវ័យ ៦៦ ឆ្នាំរូបនេះ ឱ្យដឹងថា ទីបញ្ចប់នៃអាពាហ៍ពិពាហ៍ «ពិតជាគួរឱ្យសោកស្ដាយ» ប៉ុន្តែ បានបញ្ជាក់ថា លោក និងអតីតភរិយា នៅតែធ្វើការជាមួយគ្នានៅក្នុងមូលនិធិមនុស្សធម៌។

និយាយដល់រឿងដែលលោកស្រី ហ្វ្រែន ហ្គេត រៀបរាប់ជាមួយ CBS News កាលពីខែមីនា ដែលក្នុងនោះលោកស្រីបាននិយាយថា លោកស្រី «ពេលខ្លះដេកយំនៅលើកម្រាលឥដ្ឋ» ហើយថា «មិនអាចជឿបានចំពោះទំនាក់ទំនងនេះ» លោក ប៊ីល ហ្គេត ថ្លែងថា «នោះគឺជារឿងដ៏លំបាក» ប៉ុន្តែ បានអះអាងថា ពួកគាត់បានសាងនូវ «ប្រការដ៏អស្ចារ្យជាច្រើន» ក្នុងជីវិតអាពាហ៍ពិពាហ៍។

ទោះជាយ៉ាងណាក៏ដោយ មហាសេដ្ឋីរូបនេះ នៅតែមិនបង្ហើបឱ្យដឹងអំពីមូលហេតុដែលនាំឱ្យគ្រួសារនេះបែកបាក់។ «ខ្ញុំមិនគិតថា ការនិយាយលម្អិតក្នុងពេលនេះគឺជារឿងស្ថាបនានោះទេ ប៉ុន្តែ ត្រូវហើយ ខ្ញុំគឺជាអ្នកដែលបានបង្កឱ្យមានការឈឺចាប់ និងមានអារម្មណ៍ថា អន់ខ្លាំងណាស់ព្រោះតែបញ្ហានោះ» លោក ប៊ីល ហ្គេត បញ្ជាក់ដូច្នេះ។

May 5, 2022

(វីដេអូ)-យន្តហោះធំជាងគេបង្អស់ក្នុងពិភពលោក ហោះហើរសាកល្បងលើកទី ៥

(សហរដ្ឋអាម៉េរិក)-យន្តហោះរបស់ Stratolaunch បន្តធ្វើការហោះហើរសាកល្បងលើកទី ៥ មុនពេលដឹកយានល្បឿនលឿនជាងសំឡេងច្រើនដង នៅចុងឆ្នាំក្រោយ។

Roc ដែលផលិតដោយក្រុមហ៊ុន Stratolaunch គឺជាយន្តហោះធំជាងគេបង្អស់ក្នុងពិភពលោក ដោយមានស្លាបប្រវែង ១១៧ ម៉ែត្រ។ យន្តហោះមានទម្ងន់ប្រហែល ២២៧,០០០ គីឡូក្រាមនេះ ត្រូវបានផលិតឡើងដើម្បីដឹកយានដែលអាចហោះហើរលឿនជាងល្បឿនសំឡេងច្រើនដង ទៅកាន់អាកាស។ កាលពីថ្ងៃទី ៤ ឧសភា Roc បានហោះហើរសាកល្បងដោយជោគជ័យជាលើកទី ៥ បន្ទាប់ពីជើងហោះហើរសាកល្បងលើកចុងក្រោយកាលពីខែកុម្ភៈ។ ជើងហោះហើរសាកល្បងទាំងនេះនឹងជួយឱ្យ Roc ត្រៀមខ្លួនរួចរាល់សម្រាប់បំពេញបេសកកម្ម។

Stratolaunch ឱ្យដឹងថា Roc ហោះឡើង និងចុះចតជោគជ័យនៅឯព្រលានយន្តហោះ និងអវកាស Mojave ក្នុងរដ្ឋ Florida ដោយមានយន្តហោះ Cessna ៥៥០ Citation Bravo ហោះតាមពីក្រោយ។ បច្ចុប្បន្ន ក្រុមអ្នកជំនាញរបស់ក្រុមហ៊ុន Stratolaunch កំពុងមមាញឹក វិភាគទិន្នន័យដែលបានមកពីជើងហោះហើរសាកល្បងនេះ។

ក្រុមហ៊ុន Stratolaunch ត្រូវបានបង្កើតឡើងកាលពីឆ្នាំ ២០១១ ដោយ Paul Allen សហស្ថាបនិករបស់ Microsoft ក្នុងបំណងអភិវឌ្ឍយានសម្រាប់បាញ់បង្ហោះផ្កាយរណបថ្មី។ លោក Paul Allen បានទទួលមរណភាពកាលពីឆ្នាំ ២០១៨ មុនពេល Roc ហោះហើរសាកល្បងដំបូងកាលពីឆ្នាំ ២០១៩។ បច្ចុប្បន្ន Stratolaunch កំពុងឆ្ពោះទៅរកការដឹកយានដែលហោះក្នុងល្បឿនលឿនជាងសំឡេង ៥ ដង ឬកម្រិត Mach ៥ (៦,១៧៤ គីឡូម៉ែត្រ/ម៉ោង)។

កាលពីឆ្នាំ ២០២០ Stratolaunch បានចាប់ផ្ដើមអភិវឌ្ឍ Talon-A ដែលជាយានល្បឿនលឿនជាងសំឡេង សម្រាប់បាញ់បង្ហោះពី Roc។ Talon-A មានប្រវែង ៨.៥ ម៉ែត្រ និងទម្ងន់ ២,៧០០ គីឡូក្រាម អាចហោះក្នុងល្បឿនកម្រិត Mach ៦ (៧,៤០៨ គីឡូម៉ែត្រ/ម៉ោង)។ បច្ចុប្បន្ន ក្រុមហ៊ុននេះកំពុងត្រៀមដើម្បីឱ្យយានទាំង ២ នេះអាចដំណើរការបានពេញលេញនៅចុងឆ្នាំ ២០២៣៕

May 5, 2022

(វីដេអូ)-បណ្ដាញផ្លូវរូងក្រោមដីសម្រាប់រថភ្លើងអគ្គិសនីធំបំផុតនៅ ទ្វីបអឺរ៉ុប ជិតសម្ពោធខ្សែថ្មីមួយទៀត

(អង់គ្លេស)-ផ្លូវរូងក្រោមដី Crossrail ដែលតភ្ជាប់ តំបន់ភាគខាងលិច ទៅនឹងតំបន់ភាគខាងកើតរបស់ ទីក្រុងឡុងដ៍ ប្រវែងជិត ១០០ គីឡូម៉ែត្រ នឹងដាក់ឱ្យដំណើរការចាប់ពីចុងខែឧសភា ២០២២។

ចាប់ពីថ្ងៃទី ២៤ ឧសភា ផ្លូវរូងសម្រាប់រថភ្លើងអគ្គិសនីក្រោមដីថ្មីមួយខែទៀត ដែលតភ្ជាប់រវាងតំបន់ខាងកើត និងខាងលិចនៃ ទីក្រុងឡុងដ៍ នឹងក្លាយជាបដិវត្តន៍លើការផ្លាស់ទីក្នុងទីក្រុងនេះ។ ថ្ងៃបើកសម្ពោធដាក់ឱ្យប្រើប្រាស់ដំណាក់កាលទីមួយនៃផ្លូវរថភ្លើង Elizabeth ថ្មី ឬហៅថា Crossrail ត្រូវបានប្រកាសនៅលើទំព័រ Twitter របស់គម្រោង។

នៅពេលដំណើរការពេញលេញ ផ្លូវរថភ្លើង ១ ខ្សែថ្មីបំផុតរបស់ ទីក្រុងឡុងដ៍ នឹងជួយកាត់បន្ថយពេលវេលានៃការធ្វើដំណើរចុះមកនៅត្រឹម ៣៨ នាទី លឿនជាងជិតពាក់កណ្ដាលធៀបនឹងការប្រើប្រាស់ប្រព័ន្ធរថភ្លើងអគ្គិសនីក្រោមដីនាបច្ចុប្បន្ន ឬ ២ ម៉ោង ធៀបនឹងការជិះរថយន្តតាក់ស៊ីក្នុងពេលចរាចរណ៍ចង្អៀត។

ខ្សែរថភ្លើងអគ្គិសនីក្រោមដីថ្មីនេះ អាចដឹកមនុស្សបាន ១,៥០០ នាក់ និងធ្វើដំណើរក្នុងល្បឿន ១៤៥ គីឡូម៉ែត្រ/ម៉ោង។ វានឹងរត់ឆ្លងកាត់ខាងក្រោមតំបន់កណ្ដាលក្រុងឡុងដ៍, Docklands, តំបន់ហិរញ្ញវត្ថុនានា, មជ្ឈមណ្ឌលពាណិជ្ជកម្ម និងសាលមហោស្រពនៅ West End រួមនឹង Healthrow ក៏ដូចជាបណ្ដាតំបន់ក្រវាត់ក្រុង Essex, Kent និងជ្រលងភ្នំ Thames។

ក្រុមកម្មករសំណង់ត្រូវចំណាយពេលអស់ ៣ ឆ្នាំ ដើម្បីជីករូងផ្លូវក្រោមដី (ពីឆ្នាំ ២០១២ ដល់ ២០១៥) ដោយប្រើប្រាស់ម៉ាស៊ីនជីករូងក្រោមដីខ្នាតយក្ស (TBM) ចំនួន ៨ គ្រឿង

បណ្ដាញផ្លូវរូងក្រោមដីប្រវែងជិត ១០០ គីឡូម៉ែត្រ ត្រូវបានសាងសង់ជុំវិញតំបន់ពាណិជ្ជកម្ម រួមមាន ៤២ គីឡូម៉ែត្រថ្មីទាំងស្រុង ដែលឆ្លងកាត់មជ្ឈមណ្ឌលក្រុងឡុងដ៍។ ផ្លូវក្រោមដីនេះត្រូវបានជីករូងដោយប្រើប្រាស់បច្ចេកទេស និងបច្ចេកវិទ្យាខ្ពស់ និងស្ថិតនៅខាងក្រោមទីក្រុងមួយក្នុងចំណោមទីក្រុងដែលមមាញឹកជាងគេក្នុងពិភពលោក។ បណ្ដាផ្លូវរូងភ្លោះ មានអង្កត់ផ្ចិត ៦ ម៉ែត្រ និងជម្រៅរហូតដល់ ៤០ ម៉ែត្រ ដែលរត់កាត់ខាងក្រោមអគារ និងសំណង់រាប់មិនអស់។ ក្រុមកម្មករសំណង់ត្រូវចំណាយពេលអស់ ៣ ឆ្នាំ ដើម្បីជីករូងផ្លូវក្រោមដី (ពីឆ្នាំ ២០១២ ដល់ ២០១៥) ដោយប្រើប្រាស់ម៉ាស៊ីនជីករូងក្រោមដីខ្នាតយក្ស (TBM) ចំនួន ៨ គ្រឿង ដែលមានទម្ងន់ ១,០០០ តោន/គ្រឿង។ Crossrail គឺជាគម្រោងបច្ចេកទេសធំបំផុតនៅ ទ្វីបអឺរ៉ុប។

ក្នុងខែឧសភា មានរថភ្លើង ១២ ខ្សែ/ម៉ោង ធ្វើដំណើរទៅគ្រប់ទិស តាមរយៈផ្លូវក្រោមដីនៅកណ្ដាលតំបន់ Abbey Wood ស្ថិតក្នុងភាគខាងត្បូងនៃ ទីក្រុងឡុងដ៍ និង Paddington ដែលជាចំណត់រថភ្លើងសំខាន់ជាងគេមួយរបស់ទីក្រុង។

ខ្សែរងភ្លើងដែលដំណើរការពេញលេញនៅ Crossrail នឹងចាប់ផ្ដើមយ៉ាងយូរត្រឹមខែឧសភា ២០២៣ ដោយមានរថភ្លើងធ្វើដំណោះរ ២៤ ខ្សែ/ម៉ោង។

គម្រោងខាងលើនេះត្រូវបានអនុម័តកាលពីឆ្នាំ ២០០៧ និងចាប់ផ្ដើមស្ថាបនាកាលពីឆ្នាំ ២០០៩។ Crossrail បើកដំណើរការយឺតជាង ៤ ឆ្នាំ ធៀបនឹងកាលគម្រោងដំបូង និងចំណាយប្រាក់អស់ ២៥ ពាន់លានដុល្លារអាម៉េរិក។ ពេលដំណើរការពេញលេញ ហេដ្ឋារចនាសម្ព័ន្ធនេះនឹងជួយឱ្យការដឹកជញ្ជូនតាមរថភ្លើងអគ្គិសនីក្រោមដីរបស់ ទីក្រុងឡុងដ៍ កើនឡើង ១០% បន្ថែមទៀត។ ក្រុមមន្ត្រីជំនាញគណនាឃើញថា អ្នកដំណើរប្រហែល ២០០ លាននាក់ នឹងប្រើប្រាស់ខ្សែរថភ្លើង Crossail ក្នុង ១ ឆ្នាំ៕

May 5, 2022

ចារកម្មអាម៉េរិក បាន និងកំពុងជួយ អ៊ុយក្រែន កម្ចាត់មេបញ្ជាការកងទ័ពរបស់ រុស្ស៊ី

សហរដ្ឋអាម៉េរិក ផ្ដល់ព័ត៌មានស៊ើបការណ៍សម្ងាត់ដើម្បីជួយឱ្យកងទ័ពរបស់ អ៊ុយក្រែន កំណត់គោលដៅលើមេបញ្ជាការជាច្រើនរូបរបស់ កងទ័ពរុស្ស៊ី នេះបើតាមមន្ត្រីជាន់ខ្ពស់នៅ វ៉ាស៊ីងតោន។

ក្រុមមន្ត្រីជាន់ខ្ពស់អាម៉េរិក សុំមិនបញ្ចេញឈ្មោះ កាលពីថ្ងៃទី ៤ ឧសភា បានប្រាប់សារព័ត៌មាន NY Times ថា ការកំណត់គោលដៅគឺជាផ្នែកមួយនៃការប្រឹងប្រែងយ៉ាងសម្ងាត់នៃរដ្ឋាភិបាលរបស់លោក ចូ បៃដិន ដើម្បីផ្ដល់ព័ត៌មានចារកម្មទាន់ហេតុការណ៍ ឱ្យ អ៊ុយក្រែន។

ចារកម្មអាម៉េរិក មិនត្រឹមតែផ្ដល់ព័ត៌មានស្ដីពីទីតាំងរបស់មេបញ្ជាការនានានោះទេ ប៉ុន្តែក៏អាចសន្និដ្ឋានបានអំពីការចល័តទ័ពរបស់ រុស្ស៊ី ផងដែរ ដោយយោងទៅលើការវាយតម្លៃចុងក្រោយទាក់ទិននឹងផែនការប្រយុទ្ធរបស់ ទីក្រុងមូស្គូ នៅ Donbass ភាគខាងកើតរបស់ អ៊ុយក្រែន។

ក្រុមមន្ត្រីអ៊ុយក្រែន និយាយថា កងទ័ពរបស់ប្រទេសនេះបានកម្ចាត់ឧត្តមសេនីយ៍យោធារុស្ស៊ី ១២ នាក់រួចមកហើយ ចាប់តាំងពី មូស្គូ បានបើកការឈ្លានពានកាលពីចុងខែកុម្ភៈ។

ឧត្តមសេនីយ៍ Vladimir Frolov ស្លាប់នៅ អ៊ុយក្រែន កាលពីខែមីនា

វិមានក្រឹមឡាំង មិនទាន់បញ្ចេញប្រតិកម្មអ្វីទៅនឹងការលើកឡើងខាងលើ ប៉ុន្តែ លោក Alexander Beglov អភិបាលក្រុង Saint Petersburg បានទទួលស្គាល់ថា ឧត្តមសេនីយ៍ Vladimir Frolov មេបញ្ជាការរងនៃកងពលលេខ ៨ របស់ រុស្ស៊ី បានបាត់បង់ជីវិតនៅក្នុងយុទ្ធនាការយោធានៅ អ៊ុយក្រែន។

ចារកម្មអាម៉េរិក ផ្ដោតលើការផ្ដល់ព័ត៌មានស្ដីពីទីតាំង និងព័ត៌មានលម្អិតផ្សេងទៀតទាក់ទងនឹងបញ្ជាការដ្ឋានកងទ័ពរបស់ រុស្ស៊ី។ ក្រុមមន្ត្រីអ៊ុយក្រែន ប្រើប្រាស់ទិន្នន័យរបស់ចារកម្មអាម៉េរិក បូកនឹងទិន្នន័យដែលពួកគេប្រមូលបានដោយផ្ទាល់ខ្លួន ដើម្បីកងទ័ពអាចបើកការវាយប្រហារទៅលើមន្ត្រីយោធាជាន់ខ្ពស់ទាំងឡាយរបស់ រុស្ស៊ី នេះបើតាមប្រភពព័ត៌មានពី សហរដ្ឋអាម៉េរិក។

អាម៉េរិក មិនផ្ដល់ព័ត៌មានចារកម្មស្ដីពីក្រុមមេបញ្ជាការយោធាជាន់ខ្ពស់របស់ រុស្ស៊ី ឱ្យ អ៊ុយក្រែន ឡើយ ព្រោះមិនចង់បង្កភាពតានតឹងបន្ថែមជាមួយ ទីក្រុងមូស្គូ។

ក្រៅពី សហរដ្ឋអាម៉េរិក ទីក្រុងកៀវ ក៏ទទួលបានព័ត៌មានចារកម្មស្ដីពីក្រុមមន្ត្រីយោធារបស់ រុស្ស៊ី នៅ អ៊ុយក្រែន ផងដែរ នោះគឺ ណាតូ (NATO)។

May 5, 2022

កូវីដ-១៩ នៅ កម្ពុជា! រកឃើញអ្នកឆ្លងថ្មី ០១ នាក់ទៀត ក្នុងថ្ងៃទី ០៤ ឧសភា ឆ្នាំ ២០២២

អ្នកវិជ្ជមាននឹង កូវីដ-១៩ ចំនួន ០១ នាក់ ដែលទើបតែបានរកឃើញក្នុងអំឡុង ២៤ ម៉ោងនៃថ្ងៃទី ០៤ ឧសភា គឺជាករណី អូមីក្រុង និងជាករណីឆ្លងក្នុងសហគមន៍។

May 5, 2022

រដ្ឋមន្ត្រីកម្ពុជា ថា គម្រោងកំពង់ផែពហុបំណង នៅ កំពត ជួយឱ្យ កម្ពុជា ចំណេញច្រើន ធៀបនឹងការនាំចេញទៅតាមកំពង់ផែនៅ វៀតណាម

ពិធីបញ្ចុះបឋមសិលាបើកការដ្ឋានសាងសង់គម្រោងវិនិយោគមជ្ឈមណ្ឌលភស្តុភារកម្ម និងកំពង់ផែពហុបំណង របស់ក្រុមហ៊ុន កំពត ឡូជីស្ទីក អេន ផត ឯ.ក ត្រូវបានប្រារព្ធឡើងក្រោមអធិបតីភាពលោក ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ តំណាងដ៏ខ្ពង់ខ្ពស់របស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា។

ក្នុងកម្មវិធីបញ្ចុះបឋមសិលាបើកការដ្ឋានសាងសង់គម្រោងនេះក៏មានវត្តមានរបស់ លោក ស៊ុន ចានថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន ផងដែរ។ លោក ស៊ុន ចានថុល បានមានប្រសាសន៍អំពីចំណុចសំខាន់ៗដែលគម្រោងនេះនឹងបង្កើតឡើង នៅក្នុងកិច្ចសម្ភាសជាមួយក្រុមអ្នកយកព័ត៌មាន។

លោក ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់

លោកទេសរដ្ឋមន្ត្រីថ្លែងថា កំពង់ផែពហុបំណងនេះនឹងដើរតួនាទីសំខាន់ក្នុងការជួយរៀបចំឱ្យមានឃ្លាំងភស្ដុភារកម្ម តំបន់សេដ្ឋកិច្ចពិសេស និងមជ្ឈមណ្ឌលឥន្ធនៈ នៅ កម្ពុជា។ លោកថា កំពង់ផែនេះនឹងបំពេញបន្ថែមនូវការងាររបស់ កំពង់ផែស្វយ័តក្រុងព្រះសីហនុ និង កំពង់ផែស្វយ័តភ្នំពេញ។ កំពង់ផែនេះអាចទទួលនាវាប្រភេទ ១០០,០០០ តោនបាន និងផ្ដល់ការងារចំនួន ១០,០០០ កន្លែង ដល់ប្រជាជនកម្ពុជា ផងដែរ។

ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន

គម្រោងវិនិយោគខាងលើនឹងជួយឱ្យ កម្ពុជា រកបានចំណូលខ្ពស់ចាប់ពីឆ្នាំ ២០៥០ នេះបើតាម រដ្ឋមន្ត្រីក្រសួងសាធារណការ និងដឹកជញ្ជូន។ លោកបន្តថា កំពង់ផែនេះក៏នឹងដើរតួនាទីយ៉ាងសំខាន់ក្នុងការដឹកទំនិញក្នុងស្រុកទៅលក់នៅបរទេស សម្រាប់ការដឹកជញ្ជូនតាមដងទន្លេបាសក់មកកាន់សមុទ្រ។ ធៀបនឹងការដឹកជញ្ជូនតាមផ្លូវទឹកលើទន្លេមេគង្គទៅកាន់កំពង់ផែ នៅ វៀតណាម ការដឹកទំនិញតាមទន្លេបាសាក់មកកាន់កំពង់ផែនពហុបំណង នៅ កំពត របស់ កម្ពុជា នឹងជួយឱ្យយើងចំណេញពេលវេលា ប្រាក់កាស និងកម្លាំងបានច្រើនជាង។

ចំណែកការស្ថាបនាកំពង់ផែនេះ លោករដ្ឋមន្ត្រីបញ្ជាក់ថា ក្នុងជំហានទីមួយនឹងត្រូវចំណាយ ២០០ លានដុល្លារសហរដ្ឋអាម៉េរិក ខណៈដែលខ្ទង់វិនិយោគសរុបឡើងដល់ ១,៥០០ លានដុល្លារអាម៉េរិក៕

May 5, 2022

បណ្ដាប្រទេសនៅ ទ្វីបអាស៊ី ដែលកំពុងសាកល្បង «ធ្វើការ ៤ ថ្ងៃ ក្នុង ១ សប្ដាហ៍»

ប្រទេសមួយចំនួននៅ ទ្វីបអាស៊ី កំពុងសាកល្បងឱ្យធ្វើការ ៤ ថ្ងៃ/សប្ដាហ៍ នៅពេលម៉ោងធ្វើការផ្លូវការអូសបន្លាយពេលយូរបង្កឱ្យអស់កម្លាំង និងមិនស៊ីគ្នាទៅនឹងផលិតភាពនៃកម្លាំងពលកម្ម។

ជប៉ុន ដែលជាប្រទេសល្បីឈ្មោះខាងធ្វើការតឹងតែងជាងគេ បច្ចុប្បន្នបែរជានាំមុខគេក្នុងនិន្នាការនៃការធ្វើការបែបថ្មីនៅ អាស៊ី។ ក្រុមហ៊ុនធំៗមួយចំនួននៅប្រទេសនេះ បានតាមទាន់និន្នាការថ្មីនេះ ដោយការប្រកាសគម្រោងកាត់បន្ថយថ្ងៃធ្វើការក្នុងសប្ដាហ៍។

កាលពីខែមេសា ២០២២ ក្រុមហ៊ុន Hitachi ប្រកាសអនុវត្តសាកល្បងលើការធ្វើការ ៤ ថ្ងៃ/សប្ដាហ៍ សម្រាប់បុគ្គលិកជាង ១៥,០០០ នាក់ ហើយតាមផែនការ ការសាកល្បងនេះនឹងបញ្ចប់នៅខែមីនាឆ្នាំក្រោយ។ ក្នុងខែដដែល ក្រុមហ៊ុន Gaem Freak ដែលជាម្ចាស់ហ្គេម Pokemon ក៏បានសាកល្បងកាត់បន្ថយថ្ងៃធ្វើការចំពោះបុគ្គលិកមួយចំនួន។ ចំណែកបណ្ដាក្រុមហ៊ុនល្បីៗផ្សេងទៀត ដូចជា Panasonic Holdings និង NEC ជាដើម ក៏កំពុងពិចារណាលើលទ្ធភាពនេះដែរ។

នៅ ឥណ្ឌូណេស៊ី ក្រុមហ៊ុនហិរញ្ញវត្ថុ Alami បានបង្ហាញគោលការណ៍ធ្វើការ ៤ ថ្ងៃ/សប្ដាហ៍ ចាប់ពីឆ្នាំ ២០២១ ក្នុងបំណងកែលម្អសុខភាពស្មារតី និងផលិតភាពសម្រាប់បុគ្គលិក។

កាលពីឆ្នាំ ២០១៩ ក្រុមហ៊ុនអប់រំ Eduwill បានក្លាយជាស្ថាប័នដំបូងគេនៅ កូរ៉េខាងត្បូង ដែលអនុវត្តគោលការណ៍ ធ្វើការ ៤ ថ្ងៃ ក្នុង ១ សប្ដាហ៍។ គំនិតរបស់ Eduwill បានធ្វើឱ្យអ្នកនយោបាយ ពិសេសគឺបេក្ខភាពប្រធានាធិបតីរបស់ប្រទេសនេះ មានការចាប់អារម្មណ៍ខ្លាំង។

នៅ ប្រទេសឥណ្ឌា យោងតាមការកំណត់ដែលនឹងត្រូវបានអនុវត្តចាប់ពីឆ្នាំនេះ និយោជិតអាចជ្រើសរើសការធ្វើការ ៤ ថ្ងៃ/សប្ដាហ៍ បើទោះជាម៉ោងធ្វើការសរុបប្រហែល ៤៨ ម៉ោង/សប្ដាហ៍ នឹងមិនប្ដូរផ្លាស់។

ទិន្នាការថ្មីនេះ បាន និងកំពុងកើតឡើងនៅក្នុងស្ថានភាពដែល កូវីដ-១៩ ធ្វើឱ្យម្ចាស់ក្រុមហ៊ុន និងនិយោជិតទាំងឡាយ ពិចារណាឡើងវិញអំពីវិធីធ្វើការ។ ការស្ទង់មតិនានានៅក្នុងប្រទេសជាច្រើននៅ ទ្វីបអាស៊ី បានបង្ហាញថា សប្ដាហ៍ដែលមានថ្ងៃធ្វើការតិចជាងមុន គឺជាគោលការណ៍មួយត្រូវបាននិយោជិតគាំទ្រច្រើនបំផុត។

Persol Holdings ក្រុមហ៊ុនខ្នាតយក្សក្នុងវិស័យធនធានមនុស្សនៅ ជប៉ុន ថ្មីៗនេះបានធ្វើការស្ទង់មតិលើបុគ្គលិក និយោជិតជាង ១,០០០ នាក់ ទាក់ទងនឹងគោលការណ៍ដែលពួកគេចង់ឱ្យក្រុមហ៊ុនអនុវត្ត។ បុគ្គលិក ២៣.៥% ដែលជាអត្រាខ្ពស់ជាងគេ គាំទ្រឱ្យមានថ្ងៃធ្វើការពី ៣ ទៅ ៤ ថ្ងៃ ក្នុង ១ សប្ដាហ៍។

ចំណែក ប្រទេសចិន វិញ ក្រសួងធនធានមនុស្ស បាននិយាយថា «ពុំមានមូលដ្ឋានជាក់ស្ដែងណាមួយដើម្បីអាចកាត់បន្ថយថ្ងៃធ្វើការបន្ថែមទៀតឡើយ ព្រោះប្រការនេះនឹងជាអម្រែកហិរញ្ញវត្ថុធ្ងន់សម្រាប់ក្រុមហ៊ុន និយោជក។ អ្នកប្រើប្រាស់កម្លាំងពលកម្មនឹងត្រូវចំណាយបន្ថែមពី ១៥០% ដល់ ៣០០% នៃប្រាក់ខែគោល សម្រាប់បុគ្គលិក និយោជិតដែលធ្វើការថែមម៉ោង»៕

May 5, 2022

សង្គ្រាមនៅ អ៊ុយក្រែន ថ្ងៃទី ៧០៖ រុស្ស៊ី វាយប្រហារតាមផ្លូវអាកាស ពាសពេញទឹកដីអ៊ុយក្រែន

កងទ័ពរុស្ស៊ី បានប្រើប្រាស់កម្លាំងអាកាស វាយប្រហារគោលដៅជាច្រើននៅពាសពេញទឹកដីរបស់ អ៊ុយក្រែន ខណៈដែល សហភាពអឺរ៉ុប លើកសំណើហាមឃាត់ប្រេងចំពោះ រុស្ស៊ី។

កម្លាំងរុស្ស៊ី កាលពីថ្ងៃទី ៤ ឧសភា បានបើកការវាយប្រហារតាមផ្លូវអាកាសលើ អ៊ុយក្រែន តាំងពីតំបន់ភាគឦសាន រហូតដល់ភាគខាងលិច និងខាងត្បូង ក្នុងនោះមានទាំងតំបន់ជុំវិញទីក្រុង Lviv ដែលនៅក្បែរព្រំដែនជាប់ជាមួយ ប្រទេសប៉ូឡូញ ដែលបច្ចុប្បន្នគឺជាច្រកចេញចូលដែល ណាតូ ប្រើប្រាស់សម្រាប់ដឹកអាវុធមកកាន់ អ៊ុយក្រែន។

រដ្ឋមន្ត្រីក្រសួងការពារជាតិរុស្ស៊ី Sergei Shoigu បានចោទថា បស្ចិមលោក កំពុងតែ «ញាត់អាវុធឱ្យ អ៊ុយក្រែន»។

អាល្លឺម៉ង់ កាលពីថ្ងៃទី ៤ ឧសភា បានប្រកាសថា កំពុងពិនិត្យមើលលទ្ធភាពផ្ដល់អាវុធធុនធ្ងន់មួយចំនួនទៀតឱ្យ ទីក្រុងកៀវ ក្នុងនោះមានរថក្រោះលំដាប់កំពូលរបស់ពិភពលោក Panzerhaubitze ២០០០ (PzH ២០០០) ផងដែរ។

រុស្ស៊ី កំពុងតែរកវិធីដើម្បីធ្វើឱ្យកងកម្លាំងរបស់ អ៊ុយក្រែន នៅភាគខាងកើតប្រទេស ស្ថិតក្នុងភាពឯកា ប៉ុន្តែ ក្រុមមន្ត្រីអង់គ្លេស និយាយថា ការប្រឹងប្រែងរបស់ រុស្ស៊ី កំពុងកើតឡើងយឺតៗ នៅពេល អ៊ុយក្រែន ប្រើប្រាស់យន្តហោះចម្បាំង និងអាវុធរយៈចម្ងាយឆ្ងាយ ដើម្បីវាយប្រហារគោលដៅសត្រូវ។

សហភាពអឺរ៉ុប (EU) ត្រូវបានគេជឿថា បានធ្វើសេចក្ដីព្រាងស្ដីពីកញ្ចប់ទណ្ឌកម្មសំដៅលើប្រេងឆៅរបស់ រុស្ស៊ី ប៉ុន្តែ ប្រទេសមួយចំនួនក្នុងសហភាពនេះ កំពុងរកវិធីមិនចូលរួមក្នុងការដាក់ទណ្ឌកម្ម។ យោងតាមសំណើ EU នឹងហាមឃាត់ការនាំចូលប្រេងរបស់ រុស្ស៊ី តាមដំណាក់កាលចាប់ពី ៦ ខែ ដល់ ៨ ខែ ខណៈដែល ប្រទេសហុងគ្រី និង ស្លូវ៉ាគី ដែលជាប្រទេសពឹងផ្អែកច្រើនលើប្រេងរបស់ រុស្ស៊ី ត្រូវបានអនុញ្ញាតឱ្យអូសបន្លាយពេលយូរជាងនេះ។

ប្រទេសហុងគ្រី កាលពីថ្ងៃទី ៤ ឧសភា បានឱ្យដឹងថា មិនគាំទ្រចំពោះសំណើរបស់ EU ព្រោះយល់ថា វិធីនេះអាចបំផ្លាញសន្តិសុខថាមពលរបស់ខ្លួន។ កញ្ចប់ទណ្ឌកម្មត្រូវការការឯកភាពពីគ្រប់សមាជិក (២៧ ប្រទេស) ក្នុងនោះមាន ហុងគ្រី ផងដែរ មុននឹងវាមានសុពលភាព។

ឧត្តមស្នងការនៃអង្គការសហប្រជាជាតិទទួលបន្ទុកសិទ្ធិមនុស្ស (OHCHR) កាលពីម្សិលមិញ បានរាយការណ៍ថា សង្គ្រាមនៅ អ៊ុយក្រែន បានបណ្ដាលឱ្យប្រជាជនស៊ីវិលសរុប ៦,៦៣៥ នាក់ បានរងគ្រោះថ្នាក់ ក្នុងនោះមាន ៣,២៣៨ នាក់ បានស្លាប់ និង ៣,៣៩៧ នាក់ រងរបួស។ ស្ថាប័ននេះបានបញ្ជាក់ថា តួលេខជាក់ស្ដែងអាចខ្ពស់ជាងនេះឆ្ងាយ៕

May 5, 2022

អាជ្ញាធរចិន ជិត «ដោះច្រវាក់» ឱ្យបណ្ដាក្រុមហ៊ុនអ៊ីនធើណិតក្នុងស្រុក

ក្រោយការរឹតបន្តឹងរយៈពេលជិត ២ ឆ្នាំ ចំពោះសកម្មភាពរបស់ក្រុមហ៊ុនបច្ចេកវិទ្យាធំៗជាងច្រើន ទីក្រុងប៉េកាំង កំពុងរកវិធីជំរុញវិស័យអនឡាញ ដើម្បីស្ដារសេដ្ឋកិច្ចជាតិ។

យោងតាមទំព័រ Nikkei Asia រដ្ឋាភិបាលចិន គ្រោងនឹងប្ដូរផ្លាស់គោលនយោបាយទាក់ទិននឹងការគ្រប់គ្រងបណ្ដាក្រុមហ៊ុនបច្ចេកវិទ្យាធំៗដូចជា Alibaba, Tencent ។ល។ ប្រភពព័ត៌មានឱ្យដឹងថា រដ្ឋាភិបាលនឹងជំរុញលើការកំណត់ស្ដីពីការបង្កើនចំនួនអ្នកប្រើប្រាស់ និងលើកឡើងនូវវិធានការគាំទ្រជាក់លាក់ បំណងធានាការរីកចម្រើនស្របច្បាប់នៅក្នុងបរិស្ថានអ៊ីនធើណិត។

ដើមខែឧសភានេះ កិច្ចប្រជុំរវាងក្រុមមេដឹកនាំរបស់ក្រុមហ៊ុនបច្ចេកវិទ្យាធំៗនៅ ប្រទេសចិន គ្រោងនឹងធ្វើឡើងដើម្បីឆ្លើយតបទៅនឹងទស្សនវិស័យថ្មីរបស់រដ្ឋាភិបាល។

ទីភ្នាក់ងារសារព័ត៌មាន Nikkei Asia អធិប្បាយថា «បើទោះជាយុទ្ធនាការបង្ក្រាបលើបណ្ដាក្រុមហ៊ុនបច្ចេកវិទ្យាធំៗតាំងពីឆ្នាំ ២០២០ បាននាំមកនូវប្រសិទ្ធភាព ប៉ុន្តែ ចំណុចស្នូលនៃការរីកចម្រើនរបស់សេដ្ឋកិច្ចបានថយចុះច្រើន។ មេដឹកនាំចិន បានដឹងអំពីប្រការនេះ ហើយកំពុងស្វែងរកវិធីដើម្បីបង្កើនអំណាចដល់បណ្ដាក្រុមហ៊ុនអ៊ីនធើណិត នាពេលខាងមុខ»៕

May 4, 2022

(វីដេអូ)-«មនុស្សពីងពាង» តោងឡើងអគារកម្ពស់ ៦០ ជាន់ដោយដៃទទេ ដើម្បីប្រឆាំងនឹងការរំលូតកូន

(សហរដ្ឋអាម៉េរិក)-បុរសម្នាក់ត្រូវបានចាប់ខ្លួននៅ San Francisco បន្ទាប់ពីបានតោងឡើងអគារខ្ពស់ Salesforce ដោយពុំមានខ្សែការពារសុវត្ថិភាពអ្វីទាំងអស់។ បុរសនេះថែមទាំងសើចយ៉ាងស្រស់ និងលើកដៃស្វាគមន៍មនុស្សទាំងឡាយដែលនៅក្នុងអគារទៀតផង។

នាយកដ្ឋានគ្រប់គ្រងអគ្គិភ័យរបស់ទីក្រុង San Francisco បានបញ្ជាក់ថា ពិតជាមានហេតុការណ៍នេះ និងបានអំពាវនាវឱ្យសាធារណជន «រួមគ្នាថ្កោលទោសចំពោះសកម្មភាពនេះ»។

អគារ Salesforce ដែលមានកម្ពស់ ៣២៦ ម៉ែត្រ គឺជាអគារខ្ពស់ជាងគេលំដាប់ទី ២ នៅតំបន់ភាគខាងលិច Mississippi និងឈរលំដាប់ទី ១៧ នៅ សហរដ្ឋអាម៉េរិក។

នៅលើទំព័រ Instagram របស់ខ្លួន «មនុស្សពីងពាង» នេះ បានឱ្យដឹងថា គាត់តោងឡើងអគារនេះគឺដើម្បីប្រឆាំងនឹងស្ថាប័នមួយដែលបម្រើសេវាកម្មរំលូតកូន។

បុរសនេះកន្លងមក ធ្លាប់បានតោងឡើងអគារកម្ពស់ជាង ១៨០ ម៉ែត្រ កាលពីខែសីហា ២០២១ ផងដែរ ដើម្បីជំទាស់នឹងវិធានការរឹតបន្តឹងនានាក្នុងបំណងទប់ស្កាត់កូវីដ-១៩។

ហេតុការណ៍ខាងលើនេះបានកើតឡើង ១ ថ្ងៃ បន្ទាប់ពី សេចក្ដីព្រាងមតិកម្រាស់ ៩៨ ទំព័រ របស់ចៅក្រមតុលាការកំពូលអាម៉េរិក ត្រូវបានគេធ្វើឱ្យលេចធ្លាយ ដែលបង្ហាញថា ស្ថាប័នយុត្តិធម៌របស់ អាម៉េរិក អាចនឹងធ្វើឱ្យសេចក្ដីសម្រេចលើបញ្ហារំលូតកូន កាលពីឆ្នាំ ១៩៧៣ ក្លាយជាស្របច្បាប់វិញ។

ការលេចធ្លាយនេះ ធ្វើឱ្យមានបាតុកម្មពាសពេញទឹកដីអាម៉េរិក។ ក្រុមអ្នកគាំទ្រសិទ្ធិរំលូតកូន និងក្រុមមិនគាំទ្រ បានប្រមូលផ្ដុំគ្នានៅខាងមុខតុលាការកំពូល ក្នុង រដ្ឋធានីវ៉ាស៊ីងតោន និងនៅក្នុងបណ្ដាទីក្រុង ដើម្បីសម្ដែងមតិផ្ទាល់ខ្លួនចំពោះបញ្ហានេះ។

May 4, 2022

Author: សឿន សំណាង