សឿន សំណាង - La Reine Media

សព្វាវុធក្នុងកញ្ចប់ជំនួយថ្មីដែល អាម៉េរិក នឹងផ្ដល់ឱ្យ អ៊ុយក្រែន ដើម្បីប្រឆាំង រុស្ស៊ី នាពេលឆាប់ៗនេះ

សហរដ្ឋអាម៉េរិក នឹងដឹកជញ្ជូនឱ្យ អ៊ុយក្រែន នូវប្រព័ន្ធបាញ់មីស៊ីលទំនើប និងមីស៊ីល Javelin ចំនួន ១,០០០ គ្រាប់ នៅក្នុងកិច្ចប្រឹងប្រែងថ្មីបំផុតក្នុងការបំពាក់អាវុធដល់ ទាហានអ៊ុយក្រែន ដើម្បីទប់ទល់នឹង រុស្ស៊ី។

យោងតាម CNBC សហរដ្ឋអាម៉េរិក បានឱ្យដឹងថា កញ្ចប់ជំនួយថ្មីខាងលើនេះមានតម្លៃ ៧០០ លានដុល្លារអាម៉េរិក។ នេះគឺជាកញ្ចប់ជំនួយទី ១១ ដែល សហរដ្ឋអាម៉េរិក ផ្ដល់ឱ្យ អ៊ុយក្រែន និងជាខ្ទង់ជំនួយដំបូងនៃកញ្ចប់ជំនួយតម្លៃប្រហែល ៤០ ពាន់លានដុល្លារ ដែល សភាអាម៉េរិក បានបែងចែកឱ្យ អ៊ុយក្រែន កាលពីខែឧសភាកន្លងទៅ។

កញ្ចប់ជំនួយជាអាវុធថ្មីនេះរួមមាន៖ ប្រព័ន្ធបាញ់កាំជ្រួចហ្វូង HIMARS ចំនួន ៤ និងគ្រាប់រំសេវ, រ៉ាដាប្រឆាំងកាំភ្លើងធំ ២ គ្រឿង, រាដាគ្រប់គ្រងដែនអាកាស ២ គ្រឿង, មីស៊ីល Javelin ១,០០០ គ្រាប់ និងទម្រ ៥០ គ្រឿង, អាវុធប្រឆាំងរថក្រោះ ៦,០០០ គ្រាប់, គ្រាប់កាំភ្លើងធំ ១៥៥ មម ១៥,០០០ គ្រាប់, ឧទ្ធម្ភាគចក្រ Mi-១៧ ៤ គ្រឿង, យានយោធាយុទ្ធសាស្ត្រ ១៥ គ្រឿង រួមនឹងឧបករណ៍ និងគ្រឿងបន្លាស់ជាច្រើនទៀត។

អ្នកនាំពាក្យរបស់ មន្ទីរបញ្ចកោណ Todd Breasseale ឱ្យដឹងថា កញ្ចប់ជំនួយថ្មីនេះបានជួយឱ្យជំនួយសរុបដែលរដ្ឋាភិបាលរបស់លោក បៃដិន ផ្ដល់ឱ្យ អ៊ុយក្រែន ឡើងដល់ប្រមាណ ៤.៦ ពាន់លានដុល្លារ រាប់ចាប់តាំងពី រុស្ស៊ី បានបើកយុទ្ធនាការយោធានៅ អ៊ុយក្រែន កាលពីថ្ងៃទី ២៤ កុម្ភៈ ២០២២។

June 2, 2022

មានមនុស្សស្លាប់ និងរបួសយ៉ាងតិច ៧ នាក់ នៅក្នុងហេតុការណ៍រញ្ជួយដី ២ លើកផ្ទួនគ្នា នៅ ប្រទេសចិន

យោងតាម AFP ទូរទស្សន៍ CCTV របស់ ចិន កាលពីថ្ងៃទី ០១ មិថុនា បានរាយការណ៍ថា មនុស្សយ៉ាងតិចម្នាក់បានបាត់បង់ជីវិត និង ៦ នាក់ទៀតរងរបួស បន្ទាប់ពីមានគ្រោះរញ្ជួយដី ២ លើកក្នុងថ្ងៃតែមួយ នៅតំបន់ភាគនិរតីនៃប្រទេសចិន។

ប្រភពព័ត៌មានខាងលើឱ្យដឹងថា ហេតុការណ៍រញ្ជីដីមួយដែលមានកម្លាំង ៦.១ រិចទ័រ បានកើតឡើងនៅតំបន់មិនសូវមានមនុស្សរស់នៅ នៃខេត្ត Sichuan។ ៣ នាទីក្រោយពីហេតុការណ៍នេះបានកើតឡើង ក៏ស្រាប់តែមានហេតុការណ៍គ្រោះរញ្ជួយដីកម្លាំង ៤.៥ រិចទ័រមួយផ្សេងទៀតកើតឡើងនៅក្បែរនោះ។

បច្ចុប្បន្ន អាជ្ញាធរកំពុងញាប់ដៃញាប់ជើងជួយសង្គ្រោះជនរងគ្រោះក្នុងហេតុការណ៍នេះ។ អាជ្ញាធរខេត្ត Sichuan ឱ្យដឹងថា អគារស្នាក់នៅមួយចំនួនបានរងការខូចខាតដោយសារតែគ្រោះធម្មជាតិទាំងនេះ។

June 2, 2022

ប្រេងពិភពលោកឡើងថ្លៃក្នុងការជួញដូរថ្ងៃទី ០១ មិថុនា ២០២២

តម្លៃប្រេងពិភពលោកក្នុងថ្ងៃទី ០១ មិថុនា បានកើនឡើង បន្ទាប់ពីក្រុមមេដឹកនាំរបស់ សហភាពអឺរ៉ុប (EU) ឯកភាពលើការដាក់ទណ្ឌកម្មតាមដំណាក់កាលទៅលើប្រេងនាំចូលពី រុស្ស៊ី។

ក្រៅពីកត្តាខាងលើនេះ ការដែល ប្រទេសចិន បញ្ចប់ការបិទខ្ទប់ដោយសារ កូវីដ-១៩ នៅ សៀងហៃ ក៏អាចជំរុញឱ្យតម្រូវការប្រេងកើនឡើងផងដែរ។

ក្នុងថ្ងៃទី ០១ មិថុនា តម្លៃប្រេង Brent មានលំនឹងក្នុងរង្វង់ ១១៦.២៩ ដុល្លារ/ធុង កើន ៦៩ សេន (ប្រហែល ០.៦%)។ តម្លៃប្រេង WTI ក៏ឡើងថ្លៃ ៥៩ សេន (០.៥%) ឡើងដល់ ១១៥.២៦ ដុល្លារ/ធុង។

សហភាពអឺរ៉ុប កាលពីថ្ងៃចន្ទកន្លងទៅ បានឯកភាពគ្នាលើគោលការណ៍កាត់បន្ថយ ៩០% នៃបរិមាណប្រេងនាំចូលពី រុស្ស៊ី នៅចុងឆ្នាំនេះ។ នេះគឺជាទណ្ឌកម្មធ្ងន់ធ្ងរបំផុតរបស់ EU ក្រោយពី រុស្ស៊ី បានចូលឈ្លានពាន អ៊ុយក្រែន។

លោក Bill Farren-Price ប្រធានក្រុមហ៊ុនស្រាវជ្រាវទីផ្សារថាមពល Enverus (សហរដ្ឋអាម៉េរិក) ឱ្យដឹងថា ទណ្ឌកម្មថ្មីរបស់ EU នេះ អាចនឹងធ្វើឱ្យ រុស្ស៊ី ខាតបង់ប្រេងនាំចេញប្រហែល ៣ លានធុង/ថ្ងៃ ហើយ រុស្ស៊ី ក៏មិនងាយនឹងបង្វែរបរិមាណប្រេងទាំងនេះទៅកាន់ទីផ្សារដទៃ។

June 2, 2022

តំណាងរាស្ត្រលំដាប់កំពូលរបស់ រុស្ស៊ី លើកឡើងលក្ខខណ្ឌបញ្ចប់សង្គ្រាមនៅ អ៊ុយក្រែន

កាលពីថ្ងៃទី ១ មិថុនា ប្រធានគណៈកម្មការការពារជាតិនៃសភាជាន់ទាបរុស្ស៊ី Andrey Kartapolov ប្រកាសថា យុទ្ធនាការយោធារបស់ មូស្គូ នៅ អ៊ុយក្រែន អាចត្រូវបានបញ្ចប់ បើសិន ទីក្រុងកៀវ យល់ព្រមចរចា។

«យុទ្ធនាការកំពុងប្រព្រឹត្តទៅតាមផែនការ។ តាមខ្ញុំ យុទ្ធនាការនេះនឹងបញ្ចប់នៅពេលមេដឹកនាំអ៊ុយក្រែន សម្រេចចិត្តចរចា» ទូរទស្សន៍រុស្ស៊ី RT ដកស្រង់សម្ដីរបស់លោក Kartapolov ដែលបានប្រាប់ទីភ្នាក់ងារសារព័ត៌មាន RIA Novosti កាលពីថ្ងៃទី ១ មិថុនា។ មន្ត្រីខាងលើឱ្យដឹងថា ស្ថានការណ៍ជាក់ស្ដែងបានប្ដូរផ្លាស់ ហើយកងកម្លាំងរបស់ ទីក្រុងកៀវ កំពុងចាប់ផ្ដើមបែកបាក់។

ប្រកាសខាងលើត្រូវបានលើកឡើងមួយថ្ងៃបន្ទាប់ពី ប្រធានសភាជាន់ខ្ពស់រុស្ស៊ី Valentina Matviyenko ឱ្យដឹងថា ប្រទេសនេះត្រៀមខ្លួនរួចរាល់ហើយដើម្បីចរចា និងចុះហត្ថលេខាលើកិច្ចព្រមព្រៀងមួយចំនួនដែលឆ្ពោះទៅរកសន្តិភាពជាមួយ អ៊ុយក្រែន។

ចំណែកខាង អ៊ុយក្រែន វិញ បានប្រកាសថា ប្រទេសនេះនឹងមិនឯកភាពលើបទឈប់បាញ់ជាមួយ រុស្ស៊ី ឡើយ បើសិន មូស្គូ មិនដកទ័ព ព្រោះថា រុស្ស៊ី នឹងកាន់កាប់ទឹកដីមួយផ្នែករបស់ អ៊ុយក្រែន។ ប្រធានាធិបតី ហ្សេឡែនស្គី នឹងភ្ជាប់ការចរចាឡើងវិញដើម្បីបញ្ចប់សង្គ្រាម នៅពេល រុស្ស៊ី ដកកម្លាំងត្រលប់ទៅកាន់ទីតាំងដើមនៅមុនថ្ងៃទី ២៤ កុម្ភៈ ២០២២ ជាថ្ងៃដែល រុស្ស៊ី បានចាប់ផ្ដើមចូលឈ្លានពាន អ៊ុយក្រែន។

June 2, 2022

បាញ់ប្រហារនៅឯមន្ទីរពេទ្យរបស់ អាម៉េរិក សម្លាប់មនុស្សយ៉ាងតិច ៣ នាក់

ខ្មាន់កាំភ្លើងបានបាញ់ប្រហារនៅក្នុងមន្ទីរពេទ្យមួយនៃទីក្រុង Tulsa រដ្ឋ Oklahoma សហរដ្ឋអាម៉េរិក បណ្ដាលឱ្យមានមនុស្សស្លាប់យ៉ាងតិច ៣ នាក់។

ករណីបាញ់ប្រហារនៅមន្ទីរពេទ្យ St. Francis ក្នុងទីក្រុង Tulsa ដែលកើតឡើងកាលពីល្ងាចថ្ងៃទី ១ មិថុនា (ទៀបភ្លឺនៃថ្ងៃទី ២ មិថុនា នៅ កម្ពុជា) នៅពេលបុរសម្នាក់កាន់កាំភ្លើងវែងបង្ហាញខ្លួននៅក្នុងទីលានរបស់មន្ទីរពេទ្យ។

«យើងអាចបញ្ជាក់ថា ជនសង្ស័យបានស្លាប់ទៅហើយ។ សមត្ថកិច្ចកំពុងស្វែងរកតាមបន្ទប់ក្នុងមន្ទីរពេទ្យដើម្បីបង្ការទប់ទល់នឹងការគំរាមកំហែងផ្សេងទៀត» ស្នងការដ្ឋាននគរបាលក្រុង Tulsa បង្ហោះសារលើបណ្ដាញសង្គមដូច្នេះ និងបន្ថែមថា យ៉ាងតិចក៏មានជនរងគ្រោះ ៣ នាក់បានបាត់បង់ជីវិត និងច្រើននាក់ទៀតរងរបួសនៅក្នុងហេតុការណ៍បាញ់ប្រហារនេះ។

បច្ចុប្បន្ន មិនទាន់ដឹងច្បាស់នៅឡើយថា ជនសង្ស័យបានធ្វើអត្តឃាត ឬត្រូវប៉ូលិសបាញ់សម្លាប់។ អាជ្ញាធរក៏មិនទាន់ប្រកាសអំពីអត្តសញ្ញាណរបស់ជនសង្ស័យនៅឡើយដែរ។

ហេតុការណ៍នេះបានកើតឡើងមួយសប្ដាហ៍បន្ទាប់ពីករណីជនសង្ស័យឈ្មោះ Salvador Ramos អាយុ ១៨ ឆ្នាំ បានបាញ់ប្រហារនៅក្នុងសាលាបឋមសិក្សា Robb នៅទីក្រុង Uvalde រដ្ឋ Texas សហរដ្ឋអាម៉េរិក ដែលបានបណ្ដាលឱ្យមានមនុស្សស្លាប់ ២១ នាក់។

June 2, 2022

ប្រទេសចិន អាចនឹងបញ្ចេញកំពូលនាវាផ្ទុកយន្តហោះចម្បាំងថ្មីនៅក្នុងសប្ដាហ៍នេះ

ក្រោយពីសមយុទ្ធយោធានានាក្នុងពេលថ្មីៗនេះដើម្បីបង្កើនអំណាចសម្រាប់ក្រុមប្រយុទ្ធរបស់នាវាផ្ទុកយន្តហោះ ទ័ពជើងទឹកចិន កំពុងតែត្រៀមខ្លួនបញ្ចេញកំពូលនាវាផ្ទុកយន្តហោះថ្មី Type ០០៣។

យោងតាមប្រភពព័ត៌មានយោធារបស់ SCMP នាវាផ្ទុកយន្តហោះ Type ០០៣ ថ្មីរបស់ ចិន អាចត្រូវបានបង្ហាញខ្លួនជាលើកដំបូងនៅក្នុងពិធីបុណ្យទូកនាគដែលនឹងត្រូវប្រារព្ធឡើងនៅថ្ងៃទី ៤ មិថុនាខាងមុខ។

មានសញ្ញាជាច្រើនបង្ហាញថា កំពូលនាវាផ្ទុកយន្តហោះ Type ០០៣ នឹងត្រូវបានបង្ហាញខ្លួននៅចុងសប្ដាហ៍នេះ ក្នុងនោះរួមមានទាំងការជូនដំណឹងរបស់នាយកដ្ឋានសន្តិសុខចរាចរណ៍ដែនសមុទ្រ ចំពោះតំបន់សមុទ្រដែលនៅខាងក្រៅកំពង់ផែរបស់រោងចក្រផលិតកប៉ាល់ Jiangnan ជាទីដែលកំពុងសាងសង់នាវា Type ០០៣ ផងដែរ។

រូបភាពពីផ្សាយរណបកាលពីដើមឆ្នាំ ២០២២ បង្ហាញថា Type ០០៣ សាងសង់ជិតរួចរាល់ហើយ

ពិធីបុណ្យទូកនាគប្រចាំឆ្នាំនៅ ប្រទេសចិន គឺជាឱកាសល្អសម្រាប់នាវា Type ០០៣ ដែលមានទម្ងន់ displacement ៨៥,០០០ តោននេះ ចេញគោចរជាលើកដំបូង។

Type ០០៣ ត្រូវបានចាប់ផ្ដើមស្ថាបនាកាលពីឆ្នាំ ២០១៨ ខណៈ Shandong ដែលជានាវាផ្ទុកយន្តហោះដំបូងគេស្ថាបនានៅ ប្រទេសចិន មិនទាន់ត្រូវបានដាក់ឱ្យប្រើប្រាស់នៅឡើយ។

June 1, 2022

ទ្រព្យសកម្មរបស់កំពូលមហាសេដ្ឋី ៣ រូបរបស់ពិភពលោក ថយចុះ ជាង ១០០ ពាន់លានដុល្លារ ចាប់ពីដើមឆ្នាំ ២០២២

តម្លៃសុទ្ធនៃទ្រព្យសកម្ម (Net Worth) របស់ Elon Musk, Jeff Bezos និង Bill Gates បានថយចុះសរុប ១១៥ ពាន់លានដុល្លារអាម៉េរិក ក្នុងខែឧសភាកន្លងទៅ ព្រោះតែភាគហ៊ុនរបស់បណ្ដាក្រុមហ៊ុនបច្ចេកវិទ្យាបានធ្លាក់ថ្លៃខ្លាំង។

យោងតាមសន្ទស្សន៍របស់ Bloomberg (Bloomberg Billionaires Index) ទ្រព្យសម្បត្តិរបស់មហាសេដ្ឋី Bill Gates ប្រធានក្រុមហ៊ុន Microsoft បានថយចុះអស់ ១៥.១ ពាន់លានដុល្លារ។ ទ្រព្យរបស់លោក Jeff Bezos ស្ថាបនិករបស់ក្រុមហ៊ុន Amazon បាត់បង់អស់ ៥៣.២ ពាន់លានដុល្លារ។ ចំណែកទ្រព្យសម្បត្តិរបស់មហាសេដ្ឋី Elon Musk ដែលជាសហស្ថាបនិករបស់ Tesla វិញ ក៏បានបាត់បង់អស់ ៤៦.៤ ពាន់លានដុល្លារ។

គិតត្រឹមថ្ងៃទី ២៧ ឧសភា លោក Elon Musk នៅតែជាមហាសេដ្ឋីលំដាប់លេខ ១ ក្នុងពិភពលោក ដោយមានទ្រព្យ ២២៤ ពាន់លានដុល្លារ។ បន្ទាប់មកគឺ Jeff Bezos ដោយមានទ្រព្យ ១៣៩ ពាន់លានដុល្លារ និង Bill Gates មានទ្រព្យ ១២៣ ពាន់លានដុល្លារ។

ទ្រព្យភាគច្រើនរបស់ Elon Musk និង Jeff Bezos ស្ថិតក្នុងទម្រង់ភាគហ៊ុនរបស់ Tesla និង Amazon។បច្ចុប្បន្ន Musk កាន់កាប់ភាគហ៊ុន ១៥.៦% ស្មើនឹង ១២២ ពាន់លានដុល្លារ នៅក្នុងក្រុមហ៊ុន Tesla។ គិតចាប់ពីដើមឆ្នាំមកនេះ ភាគហ៊ុនរបស់ Tesla បានថយចុះអស់ជិត ៣៧% ក្នុងនោះ ការសម្រេចចិត្តទិញ Twitter របស់លោក Musk ត្រូវបានគេចាត់ទុកថាជាមូលហេតុសំខាន់ដែលនាំឱ្យភាគហ៊ុនិកជាច្រើននាំគ្នាលក់ចោលភាគហ៊ុននេះ។

រីឯ Jeff Bezos ដែលជាអ្នកមានជាងគេលំដាប់ទីពីរវិញ ក៏ជួបបញ្ហាស្រដៀងលោក Musk ដោយភាគហ៊ុន ៥០ លានហ៊ុន (តម្លៃប្រហែល ១១៥ ពាន់លានដុល្លារ) របស់លោកនៅក្នុងក្រុមហ៊ុន Amazon បានធ្លាក់ថ្លៃ ព្រោះតែភាគហ៊ុនថយចុះជិត ១/៣ រាប់ចាប់ពីដើមឆ្នាំនេះ។

លោក Bill Gates មានតារាងមុខជំនួញសម្បូរបែប ដូច្នេះគាត់ក៏បានរួចខ្លួនខ្លះពីការដែលភាគហ៊ុនត្រូវគេលក់ចោលច្រើន។ មូលនិធិមនុស្សធម៌ Bill និង Melinda Gates បានចំណាយប្រាក់យ៉ាងច្រើនក្នុងការវិនិយោគទៅលើក្រុមហ៊ុន Berkshire Hathaway របស់មហាសេដ្ឋី Warren Buffett។ ខ្ទង់វិនិយោគនេះបានកើនជាង ៥% ក្នុងឆ្នាំនេះ។ ប៉ុន្តែ ខ្ទង់វិនិយោគរបស់លោក Gates ទៅលើ Cascade Investment បានជួបនឹងបញ្ហាធ្លាក់ថ្លៃជាបន្តបន្ទាប់។

ដោយសារតែសម្ពាធពីបញ្ហាអតិផរណា និងជំនឿរបស់អ្នកប្រើប្រាស់ថយចុះ តម្លៃភាគហ៊ុនក្នុងវិស័យបច្ចេកវិទ្យាបានឆ្លងកាត់ការប្រែប្រួលច្រើនក្នុងមួយរយៈចុងក្រោយនេះ៕

June 1, 2022

រុស្ស៊ី កំពុងពិចារណាលើការប្រើប្រាស់រូបិយវត្ថុឌីជីថលគ្រីបតូ ក្នុងការទូទាត់អន្តរជាតិ

ថ្ងៃទី ៣១ ឧសភា អគ្គនាយករងទីមួយនៃធនាគារជាតិរុស្ស៊ី លោកស្រី Ksenia Yudaeva បានឱ្យដឹងថា ធនាគារនេះអាចអនុញ្ញាតឱ្យប្រើប្រាស់ប្រាក់ឌីជីថលគ្រីបតូ (Cryptocurrency) នៅក្នុងការជួញដូរអន្តរជាតិ បើទោះការជួញដូរដោយប្រាក់ឌីជីថលនេះនៅ រុស្ស៊ី មានហានិភ័យខ្ពស់។

ព័ត៌មានពី មូស្គូ ឱ្យដឹងថា លោកស្រី Yudaeva ថ្លែងថា ធនាគារជាតិរុស្ស៊ី មិនជំទាស់នឹងការប្រើប្រាស់ប្រាក់ឌីជីថលគ្រីបតូនៅក្នុងការជួញដូរអន្តរជាតិ និងក្នុងហេដ្ឋារចនាសម្ព័ន្ធហិរញ្ញវត្ថុអន្តរជាតិ។ ប៉ុន្តែ លោកស្រីអះអាងថា ការប្រើប្រាស់រូបិយវត្ថុឌីជីថលប្រភេទគ្រីបតូ នៅក្នុងប្រទេស ពិសេសគឺនៅក្នុងប្រព័ន្ធហិរញ្ញវត្ថុរបស់ រុស្ស៊ី គឺអាចបង្កហានិភ័យ។

កាលពីខែមេសា ក្រសួងហិរញ្ញវត្ថុរុស្ស៊ី ក៏បានលើកឡើងនូវសេចក្ដីព្រាងនៃការកំណត់ស្ដីពីទីផ្សារប្រាក់ឌីជីថលគ្រីបតូ ដោយស្នើឱ្យមានការអនុញ្ញាតឱ្យបុគ្គល និង នីតិបុគ្គល ជួញដូរដោយប្រាក់ឌីជីថលគ្រីបតូ។ ប៉ុន្តែ ត្រូវគោរពតាមគោលការណ៍ប្រឆាំងនឹងការលាងលុយ និងការគាំទ្រដល់ភេរវកម្ម។ ក្រសួងហិរញ្ញវត្ថុរុស្ស៊ី ក៏មិនបានហាមឃាត់ការប្រើប្រាស់រូបិយវត្ថុប្រភេទនេះ ចំពោះអ្នកដែលមិនមានទីលំនៅក្នុង ប្រទេសរុស្ស៊ី នោះដែរ។

កាលពីខែមករា ២០២១ ច្បាប់ស្ដីពីទ្រព្យឌីជីថល និងប្រាក់ឌីជីថលគ្រីបតូនៅ រុស្ស៊ី បានចូលជាធរមាន អនុញ្ញាតឱ្យប្រជាជនវិនិយោគ និងរក្សាទុក។ បទបញ្ជាដែលបានហាមប្រាមកន្លងមក ត្រូវបានទុកជាមោឃ។

យោងតាមក្រុមហ៊ុនផ្គត់ផ្គង់សេវាកម្មទូទាត់ដោយប្រាក់ឌីជីថលគ្រីបតូ TripleA របស់ សិង្ហបុរី បច្ចុប្បន្នមានប្រជាជនជាង ១៧ លាននាក់នៅ រុស្ស៊ី កំពុងកាន់កាប់ប្រាក់ឌីជីថលគ្រីបតូ និង ៦០% ក្នុងចំណោមពួកគេគឺមានអាយុពី ២៥ ដល់ ៤៤ ឆ្នាំ។ ទិន្នន័យរបស់ សាកលវិទ្យាល័យ Cambridge (អង់គ្លេស) ឱ្យដឹងថា ឆ្នាំ ២០២១ រុស្ស៊ី ជាប់ចំណាត់ថ្នាក់ទីបីលើពិភពលោកស្ដីពីការរកប្រាក់ឌីជីថលគ្រីបតូ បន្ទាប់ពី សហរដ្ឋអាម៉េរិក និង កាហ្សាក់ស្ថាន៕

June 1, 2022

រោងចក្រអគ្គិសនីកូនកាត់ ប្រើប្រាស់ថាមពល «ជំនោរ-លំនាចទឹកសមុទ្រ និងព្រះអាទិត្យ» ទំហំ ១៣៣ ហិកតា ត្រូវបានដាក់ឱ្យដំណើរការ

រោងចក្រអគ្គិសនីប្រើប្រាស់កម្លាំងនៃជំនោរ និងលំនាចរបស់ទឹកសមុទ្រ បូករួមនឹងកម្ដៅព្រះអាទិត្យ របស់ ប្រទេសចិន ដែលត្រូវបានដាក់ឱ្យដំណើរការជាផ្លូវការកាលពីថ្ងៃទី ៣០ ឧសភា។

ផ្ទាំងសូឡាគ្របដណ្ដប់លើផ្ទៃទឹកទំហំ ១៣៣ ហិកតា ត្រូវបានរចនាឡើងដើម្បីបំពេញបន្ថែមទៅលើការផលិតអគ្គិសនីដែលដើរដោយកម្លាំងជំនោរ និងកម្លាំងលំនាចនៃទឹកសមុទ្រ។ នេះគឺជាគម្រោងរោងចក្រផលិតអគ្គិសនីបែបចម្រុះដោយប្រើកម្លាំងទឹកជោរនាច និងថាមពលព្រះអាទិត្យដំបូងបង្អស់របស់ ប្រទេសចិន។

គម្រោងនេះជួយឱ្យប្រភពផ្គត់ផ្គង់អគ្គិសនីដំណើរការបានដោយរលូត ព្រោះអាចដោះស្រាយបញ្ហារអាក់រអួលនៅពេលគ្មានពន្លឺព្រះអាទិត្យ។ ផលិតភាពរបស់រោងចក្រចម្រុះនេះនឹងបង្កើតបានអគ្គិសនីលើសពី ១០០ លានគីឡូវ៉ាត់ម៉ោង នៅក្នុង ១ ឆ្នាំ ដែលអាចផ្គត់ផ្គង់តម្រូវការប្រចាំឆ្នាំរបស់គ្រួសារនៅទីក្រុងប្រហែល ៣០,០០០ គ្រួ។

គ្រោងដែលមានទីតាំងនៅក្នុងតំបន់ Wugen នៃទីក្រុង Wenling របស់ខេត្ត Zhejiang ភាគខាងកើតនៃ ប្រទេសចិន នេះ ត្រូវបានគេរំពឹងថា នឹងជួយកាត់បន្ថយការប្រើប្រាស់ធ្យូងថ្មក្នុងវិស័យផលិតអគ្គិសនីបានប្រមាណជាង ៣១,០០០ តោន/ឆ្នាំ។

June 1, 2022

WHO ថា ជំងឺអុតស្វា (Monkeypox) បានឆ្លងដល់ ៣០ ប្រទេសហើយ!

កាលពីថ្ងៃទី ៣១ ឧសភា អង្គការសុខភាពពិភពលោក (WHO) បានឱ្យដឹងថា វីរុសបង្កជំងឺអុតស្វាបានឆ្លងរាលដាលដល់ប្រទេសចំនួន ៣០ ក្នុងពិភពលោក ដោយមានអ្នកឆ្លងសរុបជាង ៥៥០ នាក់។

នៅចំពោះមុខក្រុមអ្នកកាសែត វេជ្ជបណ្ឌិត Rosamund Lewis អ្នកជំនាញខាងជំងឺអុតស្វានៅក្នុងកម្មវិធីបន្ទាន់របស់ WHO បានឱ្យដឹងថា «បច្ចុប្បន្ន មានករណីឆ្លងជំងឺអុតស្វាជាង ៥៥០ នាក់ ត្រូវបានរកឃើញនៅក្នុងប្រទេសចំនួន ៣០ ក្នុង ៤ តំបន់ ក្នុងចំណោម ៦ តំបន់របស់ WHO»។

លោកស្រី Lewis អះអាងថា ជំងឺអុតស្វាកំពុងតែផ្ទុះឆ្លងរាលដាលខ្លាំងក្នុងពេលតែមួយ ក្នុងរយៈពេលដ៏ខ្លួន។ នេះគឺជាប្រការដែលមិនធ្លាប់មានពីមុនមក។

វេជ្ជបណ្ឌិត Lewis ឱ្យដឹងថា នាបច្ចុប្បន្ន WHO មិនជឿថា ការផ្ទុះឆ្លងរាលដាលជំងឺអុតស្វានៅខាងក្រៅ ទ្វីបអាហ្វ្រិក នឹងនាំទៅរកជំងឺរាតត្បាតសកលឡើយ។ ពេលនេះ WHO កំពុងពិនិត្យមើលការផ្ទុះឆ្លងរាលដាល ដើម្បីឱ្យដឹងថា វាអាចក្លាយជាជំងឺអាសន្នរោគសកលដូចទៅនឹង កូវីដ-១៩ ឬ អេបូឡា ដែរ ឬយ៉ាងណា បន្ទាប់មកនឹងមានដំណោះស្រាយ ជួយជំរុញការស្រាវជ្រាវ និងគាំទ្រដល់ការប្រយុទ្ធប្រឆាំងជំងឺនេះ។

ជំងឺអុតស្វាត្រូវបានរកឃើញជាលើកដំបូងលើមនុស្សកាលពីឆ្នាំ ១៩៧០ នៅ ទ្វីបអាហ្វ្រិក ហើយចាប់ពីពេលនោះមក ករណីឆ្លងស្ទើរតែទាំងអស់ត្រូវបានរកឃើញនៅតំបន់ជនបទ និងព្រៃត្រូពិក។ ប៉ុន្មានទសវត្សរ៍កន្លងមក មានតែប៉ុន្មានករណីប៉ុណ្ណោះដែលត្រូវបានរកឃើញ។ ក្រោយមក ក្នុងឆ្នាំ ២០១៧ មានជាង ២,៨០០ ករណីត្រូវបានសង្ស័យថាបានឆ្លងជំងឺនេះ នៅក្នុងប្រទេសចំនួន ។ ឆ្នាំ ២០២០ ចំនួនករណីសង្ស័យឆ្លងជំងឺអុតស្វាបានកើនដល់ជាង ៦,៣០០ នាក់ ក្នុងនោះ សាធារណរដ្ឋប្រជាធិបតេយ្យកុងហ្គោ មានរហូតដល់ ៩៥%។ តួលេខនៃករណីសង្ស័យនេះ ក្រោយមកបានថយចុះមកនៅត្រឹមប្រហែល ៣,២០០ នាក់ ក្នុងឆ្នាំ ២០២១។

យោងតាម អង្គការសុខភាពពិភពលោក (WHO) ជំងឺអុតស្វា មិនងាយឆ្លងពីមនុស្សទៅមនុស្ស។ វីរុសនេះឆ្លងនៅពេលមនុស្សប៉ះពាល់គ្នាយូរជាមួយនឹងរបួស ធាតុរាវរបស់រាងកាយ តំណក់ទឹកផ្លូវដង្ហើម ឬសម្ភរដែលមានផ្ទុកវីរុស ដូចជា ភួយខ្នើយជាដើម។ អាការដំបូងនៃជំងឺអុតស្វា គឺ ក្ដៅខ្លួន ឈឺក្បាល ហើមកូនកណ្ដុរ ឈឺខ្នង និងសាច់ដុំ ក្រោយមកក៏ចេញពងមានខ្ទុះលើស្បែកនៅត្រង់មុខ ដៃ និងកន្លែងជាច្រើនទៀតរបស់រាងកាយ។ រោងសញ្ញាចាប់ផ្ដើមបង្ហាញខ្លួនក្នុងរង្វង់ពី ១ ទៅ ២ សប្ដាហ៍ រាប់ចាប់ពីពេលឆ្លងវីរុស។

June 1, 2022

Author: សឿន សំណាង