ក្នុងអំឡុង ២៤ ម៉ោង នៃថ្ងៃទី ០៩ ខែមិថុនា ២០២២ កម្ពុជា មិនមានករណីជាសះស្បើយថ្មី, មិនមានករណីវិជ្ជមានថ្មី និងមិនមានករណីស្លាប់ថ្មី ដោយសារកូវីដ-១៩ នោះទេ។
Author: សឿន សំណាង
អ៊ុយក្រែន ដាក់ពង្រាយមីស៊ីលប្រឆាំងនាវាចម្បាំង ផលិតដោយ សហរដ្ឋអាម៉េរិក
រដ្ឋមន្ត្រីក្រសួងការពារជាតិអ៊ុយក្រែន Alexey Reznikov កាលពីម្សិលមិញបានប្រកាសថា កងកម្លាំងប្រដាប់អាវុធរបស់ប្រទេសនេះបានដាក់ពង្រាយមីស៊ីលប្រឆាំងនាវាចម្បាំង Harpoon ដែលផលិតដោយ សហរដ្ឋអាម៉េរិក។
ទីភ្នាក់ងារសារព័ត៌មាន RT បានឱ្យដឹងថា មុននោះ ប្រទេសដាណឺម៉ាក បានប្រកាសថា បានបញ្ជូនអាវុធខាងលើទៅឱ្យ ទីក្រុងកៀវ កាលពីខែឧសភាកន្លងទៅ។ យោងតាមលោក Alexey Reznikov សមត្ថភាពនៃការការពារឆ្នេរសមុទ្ររបស់ អ៊ុយក្រែន បានកើនឡើងមួយកម្រិតទៀតដោយសារប្រព័ន្ធ Harpoon ដ៏មានប្រសិទ្ធភាព។ ប្រព័ន្ធទាំងនេះ បូករួមនឹងមីស៊ីល Neptune ដែលផលិតដោយ អ៊ុយក្រែន បានបង្ខំឱ្យ «ក្រុមនាវាចម្បាំងរបស់សត្រូវ រក្សាគម្លាតដើម្បីជៀសវាងការទទួលលទ្ធផលអាក្រក់ដូចទៅនឹងកំពូលនាវាចម្បាំង Moskva នៃក្រុមនាវាចម្បាំងសមុទ្រខ្មៅរបស់ រុស្ស៊ី»។
គួររំលឹកថា កាលពីពាក់កណ្ដាលខែមេសាកន្លងទៅ អ៊ុយក្រែន ប្រកាសថា នាវាល្បាតសមុទ្រ Moskva របស់ រុស្ស៊ី ត្រូវបានកងកម្លាំងរបស់ អ៊ុយក្រែន បាញ់ពន្លិចដោយប្រើប្រាស់មីស៊ីល Neptune។ ប៉ុន្តែ ភាគីខាង រុស្ស៊ី អះអាងថា នាវាចម្បាំងរបស់ខ្លួនត្រូវលិចដោយសារមានអគ្គិភ័យ និងខ្យល់ព្យុះ។
លោក Alexey Reznikov ធ្លាប់បានវាយតម្លៃខ្ពស់ចំពោះការរួមផ្សំរវាងមីស៊ីល Harpoon និង Neptune ដោយយល់ថា ពួកវានឹងគាំទ្រដល់ អ៊ុយក្រែន ក្នុងការ «រំដោះ និងជួយឱ្យ សមុទ្រខ្មៅ មានសុវត្ថិភាពឡើងវិញ»។
មីស៊ីល Harpoon ដែលអភិវឌ្ឍដោយក្រុមហ៊ុន McDonnell Douglas អាចបាញ់ចេញពីទម្រច្រើនប្រភេទ។ ដាណឺម៉ាក កំពុងប្រើប្រាស់មីស៊ីល RGM-៨៤L-4 Harpoon Block II អាចបាញ់បានរយៈចម្ងាយ ១៣០ គីឡូម៉ែត្រ។ ចំណែក Neptune វិញគឺជាកំណែថ្មីនៃ មីស៊ីល Kh-៣៥ របស់ អ៊ុយក្រែន ដែលមានតាំងពីសម័យ សូវៀត និងអាចបាញ់បានរយៈចម្ងាយ ២៨០ គីឡូម៉ែត្រ៕
ប្រទេសចិន ជំទាស់ដាច់ខាត រឿងដែល អាម៉េរិក លក់អាវុធឱ្យ កោះតៃវ៉ាន់
អ្នកនាំពាក្យនៃ ក្រសួងការបរទេសចិន Zhao Lijian បានឱ្យដឹងថា ប្រទេសចិន ប្ដេជ្ញាប្រឆាំងនឹងការដែល សហរដ្ឋអាម៉េរិក លក់អាវុធឱ្យ កោះតៃវ៉ាន់ និងបន្តចាត់វិធានការខ្លាំងក្លាដើម្បីការពារអធិបតេយ្យ បូរណភាពទឹកដី និងផលប្រយោជន៍ជាតិ។
យោងតាមអ្នកនាំពាក្យរបស់ ក្រសួងការបរទេសចិន Zhao Lijian ការដែល អាម៉េរិក លក់អាវុធឱ្យ កោះតៃវ៉ាន់ បានរំលោភលើគោលការណ៍ «ប្រទេសចិនតែមួយ» និងសេចក្ដីប្រកាសរួមចំនួន ៣ រវាង ចិន-អាម៉េរិក បង្កការខាតបង់ធ្ងន់ធ្ងរដល់អធិបតេយ្យភាព ប្រយោជន៍របស់ ប្រទេសចិន និងទំនាក់ទំនងចិន-អាម៉េរិក ក៏ដូចជាសន្តិភាព និងស្ថិរភាពនៅ ច្រកសមុទ្រតៃវ៉ាន់។
លោក Zhao Lijian បានស្នើឱ្យ សហរដ្ឋអាម៉េរិក លុបចោលគម្រោងលក់អាវុធខាងលើ ក៏ដូចជាបញ្ឈប់ទំនាក់ទំនងយោធារវាង អាម៉េរិក និង កោះតៃវ៉ាន់។ ប្រទេសចិន នឹងបន្តចាត់វិធានការខ្លាំងក្លាដើម្បីការពារអធិបតេយ្យភាព និងផលប្រយោជន៍របស់ខ្លួន។
ចំណែកអ្នកនាំពាក្យរបស់ ក្រសួងការពារជាតិចិន លោក Tan Kefei យល់ថា តៃវ៉ាន់ គឺជាផ្នែកមួយនៃទឹកដីដែលមិនអាចកាត់ផ្ដាច់បានរបស់ ប្រទេសចិន។ ការដែល អាម៉េរិក លក់អាវុធ និងផ្ដល់ជំនួយបច្ចេកទេសដល់ កោះតៃវ៉ាន់ គឺជាសកម្មភាពគ្រោះថ្នាក់ធ្ងន់ធ្ងរចំពោះសន្តិភាព និងស្ថិរភាពរបស់ច្រកសមុទ្រនេះ និងបានអំពាវឱ្យបញ្ឈប់ទង្វើបែបនេះ។
ប្រតិកម្មរបស់អ្នកនាំពាក្យរបស់ ក្រសួងការបរទេសចិន និង ក្រសួងការពារជាតិចិន ខាងលើ ត្រូវបានលើកឡើងបន្ទាប់ពីមានព័ត៌មានថា សហរដ្ឋអាម៉េរិក បានអនុម័តលក់គ្រឿងបន្លាស់សម្រាប់ជួសជុលនាវាចម្បាំង និងផ្ដល់ជំនួយផ្នែកបច្ចេកទេស ដែលមានតម្លៃ ១២០ លានដុល្លារអាម៉េរិក ដល់ កោះតៃវ៉ាន់៕
មនុស្សជាង ៤០ នាក់បានស្លាប់នៅក្នុងករណីបាក់ស្រុតអណ្ដូងរ៉ែត្បូងពេជ្រនៅ កុងហ្គោ
អាជ្ញាធរមូលដ្ឋានរបស់ ប្រទេសកុងហ្គោ បានបញ្ជាក់ថា មនុស្សជាង ៤០ នាក់បានស្លាប់នៅក្នុងករណីបាក់ស្រុតអណ្ដូងរ៉ែត្បូងពេជ្រនៅភាគកណ្ដាលប្រទេសនេះកាលពីថ្ងៃទី ៧ មិថុនា។
ប្រធានមន្ទីរមហាផ្ទៃនៃខេត្ត Kasai បានថ្លែងថា ករណីបាក់អណ្ដូងរ៉ែពេជ្រនៅក្នុងទីរួមស្រុក Samba ដែលដំបូងឡើងមានការបញ្ជាក់ថា មានមនុស្សជាង ៤០ នាក់បាត់បង់ជីវិតនោះ ពេលនេះបានរកឃើញសាកសពចំនួន ៦ នាក់ហើយ។
បច្ចុប្បន្ន ក្រុមមន្ត្រីមានសមត្ថកិច្ចក្នុងតំបន់កំពុងតែញាប់ដៃញាប់ជើងក្នុងការជួយសង្គ្រោះ។ ជនរងគ្រោះស្ទើរតែទាំងអស់គឺជាកម្មករជីករកត្បូងដោយដៃ ដែលធ្វើការក្នុងអណ្ដូងក្រោមដី។
ប្រធានាធិបតីប្រទេសអ៊ុយក្រែន ចុះហត្ថលេខា «ដាក់ទណ្ឌកម្ម» ប្រឆាំងនឹង ប្រធានាធិបតីរុស្ស៊ី
លោក ហ្សេឡែនស្គី បានចុះហត្ថលេខាលើបទបញ្ជាដាក់ទណ្ឌកម្ម ក្នុងនោះមានទាំងការបង្កកទ្រព្យសម្បត្តិ និងហាមចេញចូលចំពោះលោក ពូទីន និងក្រុមមន្ត្រីរុស្ស៊ី ជាច្រើននាក់ទៀត។
យោងតាមប្រកាសរបស់ ការិយាល័យប្រធានាធិបតីអ៊ុយក្រែន កាលពីថ្ងៃទី ៩ មិថុនា ក្រៅពី ប្រធានាធិបតីរុស្ស៊ី លោក ពូទីន ទណ្ឌកម្មរបស់ អ៊ុយក្រែន ក៏នឹងត្រូវបានធ្វើឡើងចំពោះអ្នកនាំពាក្យរបស់ វិមានក្រឹមឡាំង នាយករដ្ឋមន្ត្រីរុស្ស៊ី រដ្ឋមន្ត្រីការបរទេសរុស្ស៊ី និង រដ្ឋមន្ត្រីការពារជាតិរុស្ស៊ី ផងដែរ។
វិធានការដាក់ទណ្ឌកម្មដែលត្រូវបានដាក់ចេញនៅក្នុងខែទី ៤ នៃយុទ្ធនាការយោធារបស់ រុស្ស៊ី នៅ អ៊ុយក្រែន នេះ ទំនងជាមិនមានឥទ្ធិពលជាក់ស្ដែងចំពោះក្រុមមន្ត្រីកំពូលៗរបស់ រុស្ស៊ី ឡើយ។
«រុស្ស៊ី ហាក់បានដាក់គោលដៅធ្វើសង្គ្រាមនៅ អ៊ុយក្រែន រហូតដល់ទីបញ្ចប់ ដូច្នេះត្រូវតែដាក់ទណ្ឌកម្មបន្ថែម» រដ្ឋមន្ត្រីការបរទេសអ៊ុយក្រែន Dmytro Kuleba និយាយដូច្នេះកាលពីថ្ងៃទី ៨ មិថុនា។
បាញ់រះនៅឯរោងចក្រអាម៉េរិក បណ្ដាលឱ្យច្រើននាក់បាត់បង់ជីវិត
មនុស្សយ៉ាងតិច ៣ នាក់បានស្លាប់ និង ២ នាក់រងរបួសនៅពេលជនសង្ស័យជាខ្មាន់កាំភ្លើងម្នាក់បានបាញ់រះនៅក្នុងរោងចក្រមួយក្នុងរដ្ឋ Maryland ហើយក្រោយមកក៏បានប្រយុទ្ធជាមួយសមត្ថកិច្ច។
ហេតុការណ៍បាញ់រះនេះបានកើតឡើងកាលពីវេលាម៉ោងប្រហែល ១៤កន្លះ ថ្ងៃទី ៩ មិថុនា (ម៉ោង ១កន្លះ ថ្ងៃទី ១០ មិថុនា នៅ ភ្នំពេញ) នៅឯរោងចក្រផលិតឧបករណ៍បេតុង Columbia Machine ក្នុងទីរួមស្រុក Smithsburg នៃស្រុកវ៉ាស៊ីងតោន។
ការិយាល័យប៉ូលិសស្រុកវ៉ាស៊ីងតោន ឱ្យដឹងថា ក្នុងករណីផ្ទុះអាវុធនេះមានមនុស្ស ៤ នាក់ត្រូវគ្រាប់កាំភ្លើងនៅក្នុងរោងចក្រ ក្នុងនោះមាន ៣ នាក់បានស្លាប់ និងម្នាក់រងរបួសធ្ងន់។ ជនសង្ស័យបានចាកចេញពីកន្លែងកើតហេតុ ប៉ុន្តែត្រូវប៉ូលិសដេញតាម។
ប្រកាសរបស់ការិយាល័យប៉ូលិសខាងលើបានឱ្យដឹងថា «ការប្រយុទ្ធគ្នារវាងក្រុមប៉ូលិស និងជនសង្ស័យ បានបណ្ដាលឱ្យមានករណីរងរបួសទាំងសងខាង និងត្រូវបានបញ្ជូនទៅកាន់មន្ទីរពេទ្យ»។
ប៉ូលិស Carly Hose និយាយថា ជនសង្ស័យជាមនុស្សប្រុស ប៉ុន្តែមិនទាន់បង្ហាញព័ត៌មានលម្អិតជាងនេះ។ រថយន្តរបស់ជនសង្ស័យត្រូវបានរកឃើញនៅកន្លែងមួយដែលមានចម្ងាយច្រើនគីឡូម៉ែត្រពីកន្លែងកើតហេតុ។
នាយកដ្ឋានគ្រប់គ្រងគ្រឿងស្រវឹង ថ្នាំជក់ កាំភ្លើង និងគ្រឿងផ្ទុះ របស់រដ្ឋ Maryland និង ការិយាល័យសហព័ន្ធស៊ើបអង្កេត (FBI) ឱ្យដឹងថា កម្លាំងពិសេសរបស់ពួកគេកំពុងប្រឹងប្រែងជួយដល់ការិយាល័យប៉ូលិសដើម្បីស៊ើបអង្កេតលើករណីបាញ់ប្រហារនេះ។
នេះគឺជាករណីបាញ់រះលើកទី ២៥៤ នៅ សហរដ្ឋអាម៉េរិក ក្នុងឆ្នាំ ២០២២ ដែលតួលេខនេះជិតស្មើនឹងករណីបាញ់រះសរុបក្នុងឆ្នាំ ២០២១ នេះបើតាមអង្គការកត់ត្រាករណីហិង្សាពាក់ព័ន្ធនឹងកាំភ្លើង។
កាលពីខែឧសភាកន្លងទៅ មានករណីផ្ទុះអាវុធមួយនៅឯសាលាបឋមសិក្សាមួយក្នុងទីក្រុង Uvalde រដ្ឋ Texas បានបណ្ដាលឱ្យសិស្ស និងគ្រូបង្រៀនចំនួន ១៩ នាក់បាត់បង់ជីវិត។ ជនសង្ស័យ Salvador Ramos ត្រូវបានប៉ូលិសបាញ់សម្លាប់នៅនឹងកន្លែងកើតហេតុ៕
អគ្គិភ័យឆេះយ៉ាងសន្ធោសន្ធៅនៅផ្ដុំបឹងត្របែក ចំពេលចរាចរណ៍កំពុងស្ទះខ្លាំង
នៅពេលនេះ មានអគ្គិភ័យដ៏រន្ធត់មួយកំពុងតែកើតឡើងនៅត្រង់ផ្ដុំបឹងត្របែក សង្កាត់ទួលទំពូងទី ១ ខណ្ឌចំការមន រាជធានីភ្នំពេញ។
អគ្គិភ័យដែលស្ថិតនៅលើដងផ្លូវ ៤៥០ នេះ ចាប់ផ្ដើមឆាបឆេះប្រហែលពីម៉ោង ៥ ល្ងាច ថ្ងៃទី ៩ មិថុនា ២០២២។ កងកម្លាំងពន្លត់អគ្គិភ័យ និងសមត្ថកិច្ចកំពុងញាប់ដៃញាប់ជើងចូលរួមពន្លត់អគ្គិភ័យនេះ។
មូលហេតុដែលបណ្ដាលឱ្យកើតមានហេតុការណ៍អគ្គិភ័យនេះមិនទាន់ត្រូវបានគេដឹងនៅឡើយ។
(វីដេអូ)-រូបចម្លាក់ព្រះពុទ្ធជាប់ជើងភ្នំអាយុកាលពាន់ឆ្នាំ ស្រោបមាស និងប្រាក់
(ប្រទេសចិន)-ក្រុមបុរាណវត្ថុវិទូបានរកឃើញថា រូបចម្លាក់ព្រះពុទ្ធដ៏ធំនៅក្នុងរូងភ្នំ Longmen Grottoes នៅ ខេត្ត Henan ទំនងជាធ្លាប់ត្រូវបានស្រោបមាស ប្រាក់ និងដាំកញ្ចក់ពណ៌។
ក្រុមស្រាវជ្រាវខាងលើប្រមូលបានភស្ដុតាងថ្មីជាច្រើននៅក្នុងគម្រោងអភិរក្សល្អាងថ្ម Longmen។ ដោយប្រើប្រាស់បច្ចេកវិទ្យាទំនើប ពួកគេបានរកឃើញដានមាស និងប្រាក់នៅលើព្រះភក្ត្ររបស់ព្រះពុទ្ធរូប Lu She Na Buddha ដែលត្រូវបានកសាងកាលពីសម័យរាជវង្សតាង (Tang dynasty) ចន្លោះពីឆ្នាំ ៦១៨ ដល់ ៩០៧។ «ប្រការនេះបង្ហាញថា បច្ចេកទេសស្រោបលោហធាតុអាចត្រូវបានប្រើប្រាស់ក្នុងការសាងសង់រូបចម្លាក់ព្រះពុទ្ធខាងលើ» Shi Jiazhen ប្រធានវិទ្យាស្ថានស្រាវជ្រាវចិន ឱ្យដឹងដូច្នេះ។
នៅលើផ្ទៃព្រះភក្ត្ររបស់រូបចម្លាក់ ក្រុមស្រាវជ្រាវបានរកឃើញស្នាមថ្នាំលាបដែលមានពណ៌បៃតង ក្រហម ខ្មៅ និងពណ៌ផ្សេងៗជាច្រើនទៀត ដែលនេះអាចឱ្យយើងជឿបានថា រូបចម្លាក់នេះ ទំនងជា «គ្រងចីវរយ៉ាងស្រស់ឆើត» នៅសម័យនោះ។
ក្រៅពីការរកឃើញខាងលើ ក្រុមអ្នកស្រាវជ្រាវក៏បានរកឃើញគ្រាប់ព្រះនេត្រដែលធ្វើអំពីកញ្ចក់ពណ៌ និងសំណ នៅលើរូបចម្លាក់ព្រះពោធិសត្វដែលនៅខាងស្ដាំនៃរូបចម្លាក់ព្រះពុទ្ធ Lu She Na Buddha ផងដែរ។ គ្រាប់ព្រះនេត្រនេះមានរាងជាដងធ្នូ និងប្រវែងប្រហែល ០.៥ ស.ម។
សហរដ្ឋអាម៉េរិក អនុម័តលក់គ្រឿងបន្លាស់នាវាចម្បាំង តម្លៃជាង ១០០ លានដុល្លារ ឱ្យ កោះតៃវ៉ាន់
សហរដ្ឋអាម៉េរិក អនុម័តលក់គ្រឿងបន្លាស់ ឧបករណ៍ជុសជុលតម្លៃ ១២០ លានដុល្លារ ដើម្បីកងកម្លាំងការពារកោះតៃវ៉ាន់ រក្សាសកម្មភាពរបស់នាវាចម្បាំងលើផ្ទៃទឹក។
អង្គភាពសហប្រតិបត្តិការសន្តិសុខជាតិ (DSCA) របស់ មន្ទីរបញ្ចកោណ កាលពីថ្ងៃទី ៨ មិថុនា បានប្រកាសថា ក្រសួងការបរទេសអាម៉េរិក បានអនុម័តលើកិច្ចព្រមព្រៀងដែលមានសក្ដានុពលដើម្បីផ្ដល់គ្រឿងបន្លាស់ ឧបករណ៍ និងបច្ចេកទេសសម្រាប់ជួសជុលនាវាចម្បាំងរបស់ កោះតៃវ៉ាន់។ គ្រឿងបន្លាស់ដែលមានតម្លៃសរុប ១២០ លានដុល្លារនេះ នឹងត្រូវបានយកពីក្រុមហ៊ុនផលិតដែល ទីក្រុងវ៉ាស៊ីងតោន បានអនុម័ត ឬយកពីឃ្លាំងរបស់ កងទ័ពជើងទឹកអាម៉េរិក។
«ករណីទិញដូរនេះនឹងរួមចំណែកក្នុងការរក្សាវត្តមាននាវាលើផ្ទៃទឹករបស់ភាគីទទួល ជួយឱ្យពួកគេស្ដារសមត្ថភាពទប់ទល់នឹងការគំរាមកំហែងបច្ចុប្បន្ន និងអនាគត។ កិច្ចព្រមព្រៀងនេះក៏ធានានូវអំណាចយោធារបស់អ្នកទទួល និងបង្កើនសមត្ថភាពក្នុងការផ្គុំកម្លាំងជាមួយ សហរដ្ឋអាម៉េរិក និង សម្ព័ន្ធមិត្ត» ប្រកាសរបស់ DSCA មានឃ្លាសរសេរដូច្នេះ។
ការសម្រេចអនុម័តរបស់ ក្រសួងការបរទេសអាម៉េរិក ខាងលើ ត្រូវបានប្រកាសជូនដំណឹងដល់ សភាអាម៉េរិក រួចហើយ ដូច្នេះ ស្ថាប័ននេះមានពេល ៣០ ថ្ងៃ ដើម្បីធ្វើការសម្រេចថា គួររារាំង ឬអត់។
បើមិនមានអ្វីផ្លាស់ប្ដូរ ការសម្រេចនេះនឹងត្រូវបានបញ្ជូនឡើងទៅកាន់ប្រធានាធិបតី ដើម្បីចុះហត្ថលេខាអនុម័តចុងក្រោយ។
ភាគីខាង តៃវ៉ាន់ ឱ្យដឹងថា កិច្ចព្រមព្រៀងនេះអាចត្រូវបានធ្វើឡើងក្នុងរយៈពេល ១ ខែ ហើយអរគុណចំពោះ ទីក្រុងវ៉ាស៊ីងតោន ដែលបានជួយការពារកោះនេះ។
ប្រទេសចិន (ចិនដីគោក) ចាត់ទុក កោះតៃវ៉ាន់ ជាផ្នែកមួយនៃទឹកដីរបស់ខ្លួនដែលមិនអាចកាត់ផ្ដាច់បាន និងរង់ចាំតែការបង្រួបបង្រួមប៉ុណ្ណោះ បើទោះជាត្រូវប្រើកម្លាំងបាយក៏ដោយ។
ប្រទេសចិន «បិទខ្ទប់ជាថ្មី» ចំពោះខណ្ឌមួយដែលមានប្រជាជនជិត ៣ លាននាក់ ដោយសារកូវីដ-១៩
ក្រុមមន្ត្រីនៃ ទីក្រុងសៀងហៃ ឱ្យដឹងថា នឹងបិទខ្ទប់ជាថ្មីចំពោះខណ្ឌមួយដែលមានប្រជាជនរស់នៅប្រមាណ ២.៧ លាននាក់ ដើម្បីធ្វើតេស្តរកកូវីដ-១៩ ក្នុងទ្រង់ទ្រាយធំ បន្ទាប់ពីការដករាល់វិធានការទប់ស្កាត់បានមួយសប្ដាហ៍។
ខណ្ឌ Minhang ដែលស្ថិតនៅភាគនិរតីនៃ ទីក្រុងសៀងហៃ នឹងត្រូវបិទខ្ទប់ចាប់ពីព្រឹកថ្ងៃទី ១១ មិថុនា ហើយប្រជាជនទាំងអស់នឹងត្រូវបានធ្វើតេស្តសំណាក នេះបើតាមក្រុមមន្ត្រីខណ្ឌដែលបានឱ្យដឹងនៅថ្ងៃនេះ។
«បទបញ្ជាបិទខ្ទប់នឹងត្រូវបានដកមកវិញបន្ទាប់ពីសំណាកសម្រាប់ធ្វើតេស្តត្រូវបានប្រមូលរួចរាល់» ប្រកាសរបស់អាជ្ញាធរក្រុងសៀងហៃ ឱ្យដឹងដូច្នេះ ប៉ុន្តែ មិនបានលើកឡើងអំពីពេលវេលាជាក់លាក់ក្នុងការដកបទបញ្ជាបិទខ្ទប់ និងមិនបានឱ្យដឹងអំពីវិធានការអ្វីខ្លះដែលនឹងត្រូវអនុវត្ត បើសិនបានរកឃើញករណីវិជ្ជមាន។