សកម្មភាពទាំងឡាយរបស់ សហភាពអឺរ៉ុប (EU) និង ណាតូ (NATO) មិនខុសអ្វីទៅនឹងការបង្កើត «សម្ព័ន្ធមិត្តថ្មី» ដើម្បីប្រឆាំង រុស្ស៊ី ឡើយ នេះបើតាម រដ្ឋមន្ត្រីក្រសួងការបរទេសរុស្ស៊ី លោក Sergey Lavrov ដែលបានប្រាប់ក្រុមអ្នកយកព័ត៌មានកាលពីថ្ងៃទី ២៤ មិថុនា។
លោក Lavrov និយាយថា ទីក្រុងមូស្គូ មិន «ស្រមៃ» ថា «អារម្មណ៍ប្រឆាំង រុស្ស៊ី» នៅ EU នឹងឆាប់បាត់ទៅវិញទេ។ រុស្ស៊ី នឹងតាមដានរាល់ «ជំហានជាក់ស្ដែង» របស់សម្ព័ន្ធមិត្តនេះ និងបណ្ដាប្រទេសដែលជាបេក្ខភាព នេះទំនងជាចង់និយាយដល់ អ៊ុយក្រែន ជាប្រទេសដែលទើបបានក្លាយជាបេក្ខភាពសមាជិកនៃ សហភាពអឺរ៉ុបកាលពីថ្ងៃទី ២៣ មិថុនា។
«បច្ចុប្បន្ន EU និង NATO កំពុងបង្កើតសម្ព័ន្ធមិត្តថ្មីមួយទៀតសម្រាប់សង្គ្រាមប្រឆាំង រុស្ស៊ី» លោក Lovrov បញ្ជាក់ដូច្នេះ។
ការអធិប្បាយរបស់ រដ្ឋមន្ត្រីការបរទេសរុស្ស៊ី ត្រូវបានលើកឡើង ១ ថ្ងៃក្រោយពីលោកបានហៅសំណើមួយដែលមានបំណងប្រមូលផ្ដុំសម្ព័ន្ធមិត្តផ្លូវទឹកអន្តរជាតិ ដើម្បីការពារកប៉ាល់ដឹកធញ្ញជាតិរបស់ អ៊ុយក្រែន ឆ្លងកាត់សមុទ្រខ្មៅ ថា ជាការប្រឹងប្រែងដើម្បីធ្វើអន្តរាគមន៍ទៅក្នុងតំបន់ ក្រោមឆត្ររបស់ អង្គការសហប្រជាជាតិ។ លោក Lavrov យល់ថា គម្រោងទាំងនេះមិនចាំបាច់នោះទេនៅក្នុងការបង្កលក្ខណៈងាយស្រួលសម្រាប់ការនាំចេញធញ្ញជាតិរបស់ អ៊ុយក្រែន និងអះអាងថា ទីក្រុងមូស្គូ នឹងធានាសន្តិសុខសម្រាប់បណ្ដាកប៉ាល់ដែលឆ្លងកាត់ច្រកសមុទ្រ Bosphorus។
កាលពីដើមខែនេះ រដ្ឋមន្ត្រីការបរទេសរុស្ស៊ី បានវាយតម្លៃថា ទីក្រុងវ៉ាស៊ីងតោន កំពុងស្វែងរកវិធីប្រើប្រាស់សង្គ្រាមនៅ អ៊ុយក្រែន ដើម្បីដកហូតស្ថានភាពឯករាជ្យរបស់ រុស្ស៊ី នៅលើឆាកអន្តរជាតិ និងបង្ខំឱ្យ ទីក្រុងមូស្គូ «លេងល្បែងតាមច្បាប់របស់ វ៉ាស៊ីងតោន»។ លោក Lavrov ក៏បានព្រមានថា ការប្រឹងប្រែងទាំងនេះរបស់ សហរដ្ឋអាម៉េរិក និងសម្ព័ន្ធមិត្ត នឹងមិនទទួលបានជោគជ័យឡើយ៕
