Author: សឿន សំណាង

ណាតូ នឹងសម្រេចចិត្តឆាប់រហ័សបំផុតចំពោះ ស៊ុយអែត និង ហ្វាំងឡង់ ទាក់ទិននឹងរឿងសុំចូលជាសមាជិក
អគ្គលេខាធិការនៃ អង្គការណាតូ Jens Stoltenberg ឱ្យដឹងថា លោកសង្ឃឹមថា ដំណើរការនៃអនុម័តលើឋានៈជាបេក្ខភាពរបស់ ហ្វាំងឡង់ និង ស៊ុយអែត នឹងត្រូវបានធ្វើឡើងយ៉ាងរហ័សបំផុត។
«យើងនឹងធ្វើការសម្រេចចិត្តនៅក្នុងសន្និសីទកំពូល ស្ដីពី ការអញ្ជើញ ប្រទេសហ្វាំងឡង់ និង ស៊ុយអែត ឱ្យធ្វើជាបេក្ខភាព។ នោះគឺជាការសម្រេចចិត្តឆាប់រហ័សមិនធ្លាប់មានពីមុនមក» លោក Jens Stoltenberg អះអាងប្រាប់អ្នកយកព័ត៌មានដូច្នេះនៅក្នុងថ្ងៃទីពីរនៃកិច្ចប្រជុំកំពូលណាតូ នៅ Madrid ប្រទេសអេស្ប៉ាញ។
ប្រទេសហ្វាំងឡង់ និង ស៊ុយអែត បានដាក់ពាក្យសុំចូលជាសមាជិករបស់ ណាតូ កាលពីពាក់កណ្ដាលខែឧសភា ឆ្នាំ ២០២២។
Reuters ដកស្រង់សម្ដីរបស់លោក Jens ឱ្យដឹងថា «ក្រោយពីលើកឡើងនូវការអញ្ជើញ យើងត្រូវការដំណើរការអនុម័តនៅក្នុងសភាទាំង ៣។ ដំណាក់កាលនេះនឹងត្រូវចំណាយពេលយូរ ប៉ុន្តែខ្ញុំសង្ឃឹមថា នឹងកើតឡើងយ៉ាងឆាប់រហ័ស ព្រោះថា ប្រទេសជាសមាជិកទាំងអស់បានត្រៀមខ្លួនរួចហើយដើម្បីជួយឱ្យដំណើរការអនុម័តនេះកើតឡើងបានឆាប់រហ័សបំផុតតាមដែលអាចធ្វើទៅបាន»។
«យើងបានប្រកាសយ៉ាងច្បាស់ហើយថា រុស្ស៊ី បង្កការគំរាមកំហែងផ្ទាល់ដល់សន្តិសុខរបស់យើង» អគ្គលេខាធិការរបស់ ណាតូ បញ្ជាក់ដូច្នេះ។
មុននោះ ក្រោយមានភាពតានតឹង និងទាល់ច្រកអស់ជាច្រើនសប្ដាហ៍ កិច្ចចរចារវាង ហ្វាំងឡង់ ស៊ុយអែត ជាមួយនឹង តួកគី ក៏បានបញ្ចប់កាលពីព្រលប់ថ្ងៃទី ២៨ មិថុនា បន្ទាប់ពីភាគីនានាបានដោះស្រាយបញ្ហាខ្វែងគំនិតគ្នា និងចុះហត្ថលេខាលើកិច្ចព្រមព្រៀងជាមួយគ្នា។ តាមកិច្ចព្រមព្រៀងនេះ តួកគី នឹងមិនជំទាស់ការចូលជាសមាជិកណាតូ របស់ ហ្វាំងឡង់ និង ស៊ុយអែត ប៉ុន្តែ ប្រទេសទាំងពីរនេះត្រូវតែធ្វើសម្បទានមួយចំនួនទាក់ទិននឹងបញ្ហាសន្តិសុខ និងផ្លូវច្បាប់សម្រាប់ តួកគី៕
June 29, 2022
សហរដ្ឋអាម៉េរិក ចរចាលើបញ្ហាកំណត់តម្លៃពិតានចំពោះថាមពលនាំចូលពី រុស្ស៊ី
កាលពីថ្ងៃទី ២៨ មិថុនា ក្រុមមន្ត្រីអាម៉េរិក បានឱ្យដឹងថា ប្រទេសនេះបានចាប់ផ្ដើមពិភាក្សាជាមួយបណ្ដាប្រទេសដែលប្រើប្រាស់ប្រេងហ្វូស៊ីលច្រើន ក្នុងនោះមាន ឥណ្ឌា ជាដើម អំពីការកំណត់តម្លៃពិតាន (តម្លៃអតិបរមា) ចំពោះប្រេងហ្វូស៊ីលដែលនាំចូលពី រុស្ស៊ី។
យោងតាមទីប្រឹក្សាសន្តិសុខជាតិអាម៉េរិក Jake Sullivan សហរដ្ឋអាម៉េរិក បានចាប់ផ្ដើមចរចាជាមួយ ឥណ្ឌា ស្ដីពីយន្តការកំណត់តម្លៃពិតានចំពោះប្រេងដែលនាំចូលពី ប្រទេសរុស្ស៊ី ក៏ដូចជាផលប៉ះពាល់ដែលកើតឡើងពីវិធានការនេះ។ មន្ត្រីជាន់ខ្ពស់អាម៉េរិក មួយរូប សុំមិនបញ្ចេញឈ្មោះ បានបង្ហើបឱ្យដឹងថា ការចរចាអំពីការកំណត់តម្លៃពិតានចំពោះប្រេងរបស់ រុស្ស៊ី នេះ នឹងត្រូវបានធ្វើឡើងជាមួយបណ្ដាប្រទេសដែលប្រើប្រាស់ប្រេងតិចជាង នៅ អាហ្វ្រិក និង អាម៉េរិកឡាទីន រួមនឹងបណ្ដាក្រុមហ៊ុនថាមពលនានានៅលើពិភពលោកផងដែរ នាពេលខាងមុខ។
សហរដ្ឋអាម៉េរិក គឺជាប្រទេសដំបូងគេដែលស្នើឱ្យមានយន្តការកំណត់តម្លៃពិតានចំពោះប្រេងដែលនាំចូលពី ប្រទេសរុស្ស៊ី។ យន្តការកំណត់តម្លៃពិតាននេះនឹងត្រូវបានភ្ជាប់ជាមួយនឹងសេវាហិរញ្ញវត្ថុ ធានារ៉ាប់រង និងការដឹកជញ្ជូនប្រេងតាមសមុទ្រ។
ក្នុងគ្រានេះដែរ ក្រុមប្រទេសឧស្សាហកម្មរីកចម្រើនលំដាប់កំពូល (G៧) បានពិភាក្សាគ្នាអំពីការកំណត់តម្លៃពិតាននៅទូទាំងសកលលោកចំពោះប្រេងនាំចូលពី រុស្ស៊ី ដោយសារតែការលុកលុយរបស់ ទីក្រុងមូស្គូ នៅ អ៊ុយក្រែន បានធ្វើឱ្យប្រេងឡើងថ្លៃខ្ពស់។
ក្រុមមន្ត្រីនៅ G៧ កាលពីថ្ងៃទី ២៨ មិថុនា បានឱ្យដឹងថា ពួកគេបានឯកភាពគ្នាក្នុងការស្រាវជ្រាវរកវិធីសាស្ត្រកំណត់តម្លៃពិតានរបស់ប្រេងដែលនាំចូលពី ប្រទេសរុស្ស៊ី។ ចំណែក សហភាពអឺរ៉ុប រួមនឹងដៃគូសហការ ក៏នឹងពិនិត្យមើលលទ្ធភាពនៃវិធានការនានាដើម្បីគ្រប់គ្រងតម្លៃប្រេង ពិសេសគឺវិធីសាស្ត្របណ្ដោះអាសន្នដើម្បីកំណត់តម្លៃពិតានចំពោះប្រេង និងឧស្ម័នដែលនាំចូលពី រុស្ស៊ី នេះតែម្ដង៕
June 29, 2022
ណាសា បាញ់បង្ហោះផ្កាយរណបដំបូង ត្រៀមសម្រាប់បេសកកម្មត្រលប់ទៅជាន់ដីព្រះចន្ទ
ផ្កាយរណបខ្នាតតូចមួយគ្រឿង ត្រូវបានបាញ់បង្ហោះទៅកាន់ទីអវកាសកាលពីម្សិលមិញ ដើម្បីជាការចាប់ផ្ដើមជំហានដំបូងសម្រាប់កម្មវិធីព្រះចន្ទ Artemis។
យានអវកាស Photon នាំយកផ្កាយរណប CAPSTONE ដែលត្រូវបានបាញ់បង្ហោះដោយរ៉ុក្កែត Electron របស់ក្រុមហ៊ុន Rocket Lab ពីឧបទ្វីប Mahia របស់ នូវែលសេឡង់ កាលពីវេលាម៉ោងជិត ២២ ថ្ងៃទី ២៨ មិថុនា (ម៉ោងជិត ១៧ នៅ ភ្នំពេញ)។
ក្នុងរយៈពេល ៥ ថ្ងៃទៀត បើសិនជាអ្វីៗដំណើរការល្អ Photon នឹងបញ្ឆេះម៉ាស៊ីនលើកចុងក្រោយរបស់វាក្នុងបំណងបង្កើនល្បឿនឱ្យដល់ ៣៩,៥០០ គីឡូម៉ែត្រ/ម៉ោង ដើម្បីអាចហោះផុតពីទំនាញផែនដី និងឆ្ពោះទៅកាន់ឋានព្រះចន្ទ។ ក្នុងអំឡុង ២០ នាទី រាប់ចាប់ពីពេលបញ្ឆេះម៉ាស៊ីននោះ Photon នឹងបញ្ចេញផ្កាយរណប CAPSTONE។
ក្នុងរយៈពេលប៉ុន្មានខែខាងមុខ យូរៗម្ដង CAPSTONE នឹងបញ្ឆេះម៉ាស៊ីនរបស់វា ហើយចុងក្រោយនឹងហោះចូលដល់គន្លងគោចរ NRHO ដែលនៅជុំវិញព្រះចន្ទ ជាទីដែលផ្កាយរណបនេះមានភារកិច្ចត្រួតពិនិត្យស្ថិរភាពរបស់គន្លងគោចរដែល ណាសា គ្រោងនឹងដាក់ស្ថានីយអវកាស Gateway។
Gateway នឹងដើរតួនាទីជាទីតាំងសំចតសម្រាប់យានមានមនុស្សបើក និងយានគ្មានមនុស្សបើក ត្រៀមខ្លួនដើម្បីចុះចតលើដីឋានព្រះចន្ទ។ ណាសា បានកំណត់គោលដៅបាញ់បង្ហោះបន្ទប់ស្នូលរបស់ស្ថានីយអវកាស Gateway នៅចុងឆ្នាំ ២០២៤។
CAPSTONE មានទម្ងន់តែ ២៥ គីឡូក្រាម និងមានទំហំប៉ុនចង្ក្រាមមីក្រូវ៉េវមួយគ្រឿង។ នេះគឺជាឧបករណ៍ស្វែងរកផ្លូវ ឬទិស មានសមត្ថភាពកែប្រែទិសដោយស្វ័យប្រវត្តដើម្បីរក្សាគន្លងគោចរ៕
June 29, 2022
សហភាពអឺរ៉ុប ហាមលក់រថយន្តដើរដោយឥន្ធនៈហ្វូស៊ីល ចាប់ពីឆ្នាំ ២០៣៥
ក្រោយការជជែកពិភាក្សាគ្នាអស់រយៈពេល ១៦ ម៉ោង ក្រុមរដ្ឋមន្ត្រីក្រសួងបរិស្ថានរបស់ សហភាពអឺរ៉ុប (EU) ក៏បានឯកភាពគ្នាលើសំណើមួយចំនួនដែលនិយាយអំពីវិធានការទប់ទល់នឹងបម្រែបម្រួលអាកាសធាតុ។
យោងតាមសារព័ត៌មាន DW របស់ អាល្លឺម៉ង់ នៅព្រឹកថ្ងៃទី ២៩ មិថុនា ក្រុមរដ្ឋមន្ត្រីបរិស្ថាននៃ ប្រទេសទាំង ២៧ ដែលជាសមាជិករបស់ EU បានអនុម័តវិធានការមួយចំនួនដើម្បីប្រឆាំងនឹងបញ្ហាបម្រែបម្រួលអាកាសធាតុ។ ការសម្រេចចិត្តនេះរួមមាន ចាប់ពីឆ្នាំ ២០៣៥ EU នឹងលុបបំបាត់ជាបណ្ដើរៗនូវការផលិត និងលក់រថយន្តថ្មីដែលដើរដោយឥន្ធនៈហ្វូស៊ីល (មានប្រេងសាំងជាដើម) និងជំនួសដោយរថយន្តប្រភេទមិនបញ្ជេញឧស្ម័នកាបូន។
នៅពេលចូលជាធរមាន កិច្ចព្រមព្រៀងខាងលើនឹងមានន័យស្មើនឹងការហាមឃាត់រាល់រថយន្តថ្មីដែលមានម៉ាស៊ីនចំហេះក្នុង នៅ អឺរ៉ុប ដែលចាប់ផ្ដើមពីឆ្នាំ ២០៣៥ ដើម្បីងាកទៅប្រើប្រាស់រថយន្តអគ្គិសនី។
ក្រុមរដ្ឋមន្ត្រីបរិស្ថានរបស់ EU បានឯកភាពទៅលើសេចក្ដីព្រាងច្បាប់ចំនួន ៥ ដែលត្រូវបាន គណៈកម្មអឺរ៉ុប (EC) ស្នើឡើងកាលពីឆ្នាំកន្លង។
«វិបត្តិអាកាសធាតុ និងផលវិបាករបស់វាគឺមានយ៉ាងច្បាស់ ដូច្នេះ យើងមិនអាចមិនលើកឡើងនូវគោលនយោបាយថ្មីឡើយ» Frans Timmermans ប្រធានគោលនយោបាយអាកាសធាតុរបស់ EU បញ្ជាក់ដូច្នេះ។
សភាអឺរ៉ុប នឹងបន្តពិភាក្សាអំពីខ្លឹមសារចុងក្រោយរបស់សេចក្ដីព្រាងច្បាប់ខាងលើ។ សភាអឺរ៉ុប គឺជាស្ថាប័នមួយដែលកន្លងមកបានគាំទ្រចំពោះច្បាប់ហាមឃាត់ទាំងស្រុងចំពោះការលក់យានយន្តដែលប្រើប្រាស់ម៉ាស៊ីចំហេះក្នុង ចាប់ពីឆ្នាំ ២០៣៥។
វិធានការហាមឃាត់ការលក់ និងប្រើប្រាស់យានយន្តប្រើប្រាស់ម៉ាស៊ីនចំហេះក្នុង និងផ្នែកដែលនៅសល់នៃសេចក្ដីព្រាងច្បាប់ខាងលើគឺសុទ្ធតែមានសារសំខាន់ដើម្បីឱ្យ EU អាចសម្រេចបានគោលដៅបន្សាបឧស្ម័នផ្ទះកញ្ចក់នៅក្នុងបរិយាកាស នៅឆ្នាំ ២០៥០៕
June 29, 2022
សមត្ថកិច្ចរបស់ សហរដ្ឋអាម៉េរិក ចាប់ឃាត់កប៉ាល់ដឹកប្រេងរបស់ រុស្ស៊ី
កងកម្លាំងគយ និងការពារព្រំដែន (CBP) របស់ សហរដ្ឋអាម៉េរិក បានឃាត់ និងត្រួតពិនិត្យកប៉ាល់ដឹកប្រេងឥន្ធនៈ និងឧស្ម័នមួយគ្រឿង ដែលកំពុងបើកបរនៅលើផ្លូវទឹកពី ប្រទេសរុស្ស៊ី ទៅកាន់រដ្ឋ Louisiana សហរដ្ឋអាម៉េរិក។
យោងតាមបណ្ដាញសារព័ត៌មាន RT (រុស្ស៊ី) កប៉ាល់ដែលមានឈ្មោះថា Daytona គឺជាកម្មសិទ្ធិរបស់ក្រុមហ៊ុន TMS Tankers នៃ ប្រទេសក្រិក ត្រូវបានជួលដោយក្រុមហ៊ុន Vitol ដែលមានទីស្នាក់ការកណ្ដាលនៅ ប្រទេសស្វ៊ីស។ ប្រភពព័ត៌មានបានឱ្យដឹងថា កប៉ាល់ Daytona នេះនឹងចូលចតនៅកំពង់ផែ New Orleans។ Daytona ដឹកប្រេងដែលយកពីកំពង់ផែនានានៅឯឧបទ្វីប Taman របស់ រុស្ស៊ី កាលពីដើមខែមិថុនា។
មន្ត្រីប៉ូលិសម្នាក់បានប្រាប់ Wall Street Journal ថា អាជ្ញាធរគយ និងការពារព្រំដែនរបស់ សហរដ្ឋអាម៉េរិក កំពុងធ្វើការត្រួតពិនិត្យកប៉ាល់ Daytona។ ក្រុមហ៊ុន TMS Tankers មិនទាន់មានប្រតិកម្មអ្វីទៅនឹងបញ្ហានេះ ខណៈដែលក្រុមហ៊ុន Vitol ឱ្យដឹងថា សកម្មភាពដឹកជញ្ជូនរបស់កប៉ាល់ Daytona គឺ «គោរពទៅតាមច្បាប់ និងការកំណត់ដែលទាក់ទង រួមទាំងបទបញ្ជាដាក់ទណ្ឌកម្មផងដែរ»។
Daytona គឺជាកម្មសិទ្ធិរបស់ក្រុមហ៊ុន TMS Tankers នៃ ប្រទេសក្រិក ត្រូវបានជួលដោយក្រុមហ៊ុន Vitol ដែលមានទីស្នាក់ការកណ្ដាលនៅ ប្រទេសស្វ៊ីស
កាលពីខែមីនា សហរដ្ឋអាម៉េរិក បានហាមឃាត់រាល់សកម្មភាពនាំចូលប្រេងហ្វូស៊ីល ធ្យូងថ្ម និងឧស្ម័នធម្មជាតិរាវរបស់ រុស្ស៊ី ដើម្បីឆ្លើយតបនឹងសង្គ្រាមដែល ទីក្រុងម៉ូស្គូ បាន និងកំពុងធ្វើឡើងនៅ អ៊ុយក្រែន។ ទណ្ឌកម្មនេះមិនអនុវត្តចំពោះបណ្ដាផលិតផលដែលដឹកពីបណ្ដាប្រទេសឆ្លងកាត់តាម ប្រទេសរុស្ស៊ី ក្នុងនោះមានផលិតផលពី កាហ្សាក់ស្ថាន ជាដើម។ ក៏ប៉ុន្តែ យោងតាមប្រភពព័ត៌មាន ក្រុមហ៊ុនវិភាគទិន្នន័យ Kpler បានបង្ហាញថា ទំនិញដែលកប៉ាល់ Daytona កំពុងដឹកនោះ មានប្រភពពី ប្រទេសរុស្ស៊ី៕
June 29, 2022
ប្រេងឧស្ម័នរបស់ ប្រទេសរុស្ស៊ី ឡើងថ្លៃពីមួយថ្ងៃ ទៅមួយថ្ងៃ
ក្នុងរយៈពេលតែមួយខែសោះ តម្លៃប្រេង Urals របស់ រុស្ស៊ី បានកើនឡើង ២០% ដោយសារតែតម្រូវការខ្ពស់នៅក្នុង ទ្វីបអាស៊ី។
កាលពីថ្ងៃទី ២៨ មិថុនា មេដឹកនាំនៃក្រុមប្រទេស G៧ បានឯកភាពគ្នាលើការស្វែងរកវិធីដើម្បីកំណត់តម្លៃពិតានចំពោះប្រេងរបស់ រុស្ស៊ី ក្នុងបំណងកាត់បន្ថយប្រភពចំណូលដែល វិមានក្រឹមឡាំង ប្រើប្រាស់សម្រាប់សង្គ្រាមនៅ អ៊ុយក្រែន។ គំនិតនេះនឹងត្រូវបានពិភាក្សាលម្អិតនៅក្នុងសប្ដាហ៍នេះ។
ក៏ប៉ុន្តែ ទិន្នន័យពី រដ្ឋាភិបាលរុស្ស៊ី បានបង្ហាញថា តម្លៃប្រេង Urals របស់ប្រទេសនេះកំពុងតែកើនឡើងនៅឡើយ។ ប្រការនេះបញ្ជាក់ថា តម្រូវការប្រេងរុស្ស៊ី ពិតជាមានកម្រិតខ្ពស់។ ក្នុងអំឡុងពេលពីពាក់កណ្ដាលខែឧសភា និងពាក់កណ្ដាលខែមិថុនា តម្លៃមធ្យមរបស់ប្រេង Urals គឺ ៨៧.៤៩ ដុល្លារ/ធុង។ តួលេខនេះកើន ២០% ធៀបនឹងមួយខែមុននោះ នេះបើតាម ក្រសួងហិរញ្ញវត្ថុរុស្ស៊ី។
បើទោះជាប្រេង Urals នៅតែមានតម្លៃថោកជាងប្រេង Brent ប៉ុន្តែគន្លាតរវាងតម្លៃប្រេងទាំងពីរនេះកាន់តែត្រូវបានកាត់បន្ថយ។
ប្រេង Urals ថ្លៃជាងមុន បើទោះជា កាលពីថ្ងៃទី ១៥ ឧសភា សហភាពអឺរ៉ុប បានហាមជួញដូរជាមួយបណ្ដា ក្រុមហ៊ុនរដ្ឋរុស្ស៊ី ក៏ដោយ។ ថ្វីបើបទបញ្ជារបស់ សហភាពអឺរ៉ុប នៅតែអនុញ្ញាតឱ្យទិញប្រេងឧស្ម័នរបស់ រុស្ស៊ី ប៉ុន្តែ ក្រុមអ្នកជំនួញបានចាត់ទុកថា នេះគឺជាការហាមឃាត់ទាំងស្រុងនូវការរកស៊ីជាមួយបណ្ដាក្រុមហ៊ុនថាមពលរបស់ រុស្ស៊ី។
ក៏ប៉ុន្តែ ដោយសារតែបានផ្ដោតទៅលើទីផ្សារនៅ អាស៊ី បូករួមនឹងការដែលបណ្ដាក្រុមហ៊ុនតូចៗ ហ៊ានរកស៊ីជាមួយ រុស្ស៊ី ដូច្នេះ លំហូរប្រេងឧស្ម័នរបស់ រុស្ស៊ី នៅតែត្រូវបានរក្សា។ ក្នុងរយៈពេល ១៣ ថ្ងៃដើមខែមិថុនា ការនាំចេញប្រេងតាមរយៈបំពង់បង្ហូរ និងកំពង់ផែនានារបស់ រុស្ស៊ី សម្រេចបានជាមធ្យម ៤.៦២ លានធុង/ថ្ងៃ នេះបើតាម Bloomberg។ តួលេខនេះគ្រាន់តែទាបបន្តិចប៉ុណ្ណោះ បើធៀបនឹងមួយខែមុននោះ៕
June 29, 2022
កូវីដ-១៩ នៅ កម្ពុជា៖ រកឃើញអ្នកឆ្លងថ្មី ១០ នាក់ ភាគច្រើនជាករណីក្នុងសហគមន៍
ក្នុងអំឡុង ២៤ ម៉ោង នៃថ្ងៃទី ២៨ ខែមិថុនា ២០២២ កម្ពុជា បានរកឃើញអ្នកឆ្លងកូវីដ-១៩ ថ្មី ចំនួន ១០នាក់ ដែលក្នុងនោះមាន ៨ នាក់ជាករណីឆ្លងក្នុងសហគមន៍ នេះបើតាម ក្រសួងសុខាភិបាល។
អ្នកដែលត្រូវបានរកឃើញថាមានផ្ទុកវីរុសបង្កជំងឺកូវីដ-១៩ ដែលទើបត្រូវបានប្រកាសនេះ សុទ្ធតែវិមាននឹងវ៉ារ្យ៉ង់ អូមីក្រុង។
នៅក្នុងសារជាសំឡេងដែលបានផ្សព្វផ្សាយកាលពីយប់ម្សិលមិញ (២៨ មិថុនា) សម្ដេច ហ៊ុន សែន បានមានប្រសាសន៍ថា ក្នុងករណីវិជ្ជមាននឹង កូវីដ-១៩ ដែលទើបត្រូវបានរកឃើញដោយការធ្វើតេស្ត PCR បានកើតឡើងចំពោះពលរដ្ឋដែលត្រៀមចាកចេញពី កម្ពុជា និងអ្នកដំណើរដែលទើបចូលមកកាន់ កម្ពុជា។ ជាងនេះ ក៏មានករណីខ្លះត្រូវបានរកឃើញដោយការធ្វើតេស្តរហ័សផងដែរ។

June 29, 2022
ស្ថានទូតអាហ្វហ្គានីស្ថាន នៅ ឥណ្ឌា ឯករាជ្យពី តាលីបង់ និងនៅតែដំណើរការធម្មតា
ក្រោយពី ក្រុមតាលីបង់ បានផ្ដួលរំលំរបបរបស់ ប្រធានាធិបតី Ghani ឯកអគ្គរដ្ឋទូតអាហ្វហ្គានីស្ថាន នៅ ឥណ្ឌា នៅតែគាំទ្ររបបចាស់ និងនៅតែធ្វើសកម្មភាពជាធម្មតា ដូចជាការផ្ដល់ទិដ្ឋាការ និងលិខិតឆ្លងដែនជាដើម។
របបតាលីបង់ នៅ អាហ្វហ្គានីស្ថាន កំពុងព្យាយាមគ្រប់គ្រងស្ថាប័ននានារបស់ អាហ្វហ្គានីស្ថាន នៅបរទេស ប៉ុន្តែត្រូវជួបឧបសគ្គមួយចំនួនធំ។ ស្ទើរតែទាំងអស់នៃស្ថាប័នការទូតចំនួន ៧០ របស់ អាហ្វហ្គានីស្ថាន នៅបរទេស នៅតែដំណើរការដោយឯករាជ្យពីរបបអ៊ីស្លាមប្រកាន់តឹង តាលីបង់។ របបតាលីបង់ បច្ចុប្បន្នមិនត្រូវបានអន្តរជាតិទទួលស្គាល់ ខណៈដែលភាគច្រើននៃស្ថាប័នការទូតរបស់ អាហ្វហ្កានីស្ថាន នៅបរទេស មិនទទួលថវិកាផ្ទាល់ពី ទីក្រុងកាប៊ុល។
ស្ថានទូតនៅតែមានស្វាមីភក្ដិចំពោះរបបចាស់
ភ្ញៀវដែលអញ្ជើញទៅធ្វើទស្សនកិច្ចស្ថានទូតរបស់ អាហ្វហ្គានីស្ថាន នៅ ទីក្រុងញូវដែលី របស់ ឥណ្ឌា ត្រូវបានទទួលស្វាគមន៍ដោយរូបថតនៃអតីតប្រធានាធិបតី Ashraf Ghani នៅពេលពួកគេបានឈានជើងចូលដល់អគារនេះ។ លោក Ashraf Ghani បានភៀសខ្លួនពី អាហ្វហ្គានីស្ថាន កាលពីខែសីហា ២០២១ នៅពេល តាលីបង់ កំពុងឡោមព័ទ្ធ រដ្ឋធានីកាប៊ុល មុនពេលរដ្ឋាភិបាលគាំទ្រដោយលោកខាងលិចរបស់លោក បានដួលរលំ។
រូបថតរបស់ អតីតប្រធានាធិបតី Ashraf Ghani ក៏ត្រូវបានព្យួរនៅលើជញ្ជាំងនៃការិយាល័យរបស់ ឯកអគ្គរដ្ឋទូត Farid Mamundzay ដែលបច្ចុប្បន្ននៅតែមានទង់ ៣ ពណ៌ គឺ ខ្មៅ ក្រហម និងខៀវ ដែលជាទង់របស់ សាធារណរដ្ឋអាហ្វហ្គានីស្ថាន មុននោះ។
លោក Mamundzay ថ្លែងថា «យើងកម្រនឹងមានការចាត់ចែងជាមួយ តាលីបង់»។ បុគ្គលិករបស់មន្ត្រីការទូតរូបនេះ នៅតែបន្តផ្ដល់ទិដ្ឋាកា និងលិខិតឆ្លងដែនក្នុងនាមជា សាធារណរដ្ឋអ៊ីស្លាមអាហ្វហ្គានីស្ថាន ដដែល។
ក្នុងអំឡុងពេល ១០ ខែ រាប់ចាប់តាំងពី តាលីបង់ ដណ្ដើមបានអំណាចនៅ អាហ្វហ្គានីស្ថាន របបនេះបានបញ្ជូនរដ្ឋទូតទៅកាន់ប្រទេសចំនួនតែ ៤ គត់ គឺ រុស្ស៊ី ប៉ាគីស្ថាន ចិន និង តួកម៉េនីស្ថាន។ ក៏ប៉ុន្តែ សូម្បីតែប្រទេសទាំង ៤ នេះ ក៏មិនទាន់ទទួលស្គាល់ស្ថាប័នការបរទេសថ្មីរបស់ តាលីបង់ នៅឡើយ។
រដ្ឋាភិបាលឥណ្ឌា បានអនុញ្ញាតឱ្យ ស្ថានទូតអាហ្វហ្គានីស្ថាន នៅ ញូវដែលី ធ្វើសកម្មភាពក្នុងនាមជាអ្នកតំណាងរដ្ឋាភិបាលចាស់របស់ អាហ្វហ្គានីស្ថាន ដូចទៅនឹងអ្វីដែល ឥណ្ឌា បានធ្វើនៅពេល តាលីបង់ បានឡើងកាន់អំណាចក្នុងអំឡុងពីឆ្នាំ ១៩៩៦ ដល់ ២០០១ នៅពេលស្ថានទូតនេះតំណាងឱ្យរដ្ឋាភិបាលចាស់របស់ អតីតប្រធានាធិបតី Burhanuddin Rabbani។
បើទោះជា តាលីបង់ ចង់គ្រប់គ្រងស្ថាប័នការទូតរបស់ អាហ្វហ្គានីស្ថាន នៅទូទាំងពិភពលោក ប៉ុន្តែ ពួកគេមិនមានប្រាក់គ្រប់គ្រាន់ដើម្បីធ្វើដូច្នេះ។ សេដ្ឋកិច្ចរបស់ អាហ្វហ្គានីស្ថាន ដាំក្បាលចុះ «យ៉ាងរលូន» រាប់ចាប់តាំងពី តាលីបង់ ដណ្ដើមបានអំណាច។
ជំនួយពីបរទេសបានឈានដល់របត់ «ខ្សោះ» ខណៈដែលទ្រព្យរបស់ប្រទេសនេះនៅបរទេសក៏ត្រូវបានបង្កក ចំណែកសហគមន៍អន្តរជាតិព្យាយាមភ្ជាប់ជំនួយហិរញ្ញវត្ថុរបស់ពួកគេទៅនឹងការប្រសើរឡើងនៃស្ថានភាពសិទ្ធិមនុស្ស និងការប្រព្រឹត្តរបស់ តាលីបង់ ចំពោះស្ត្រី។
បញ្ហាតែមួយគត់ដែលស្ថានទូតនានារបស់ អាហ្វហ្គានីស្ថាន ត្រូវសហការជាមួយ តាលីបង់ នោះគឺជំនួយមនុស្សធម៌
ឯកអគ្គរដ្ឋទូត Mamundzay ឱ្យដឹងថា «ឥណ្ឌា បានផ្ដល់ជំនួយដល់ ទីក្រុងកាប៊ុល បន្ទាប់ពីមានគ្រោះរញ្ជួយដីកាលពីប៉ុន្មានថ្ងៃមុន។ យើងត្រូវបានស្នើឱ្យសហការជាមួយ ក្រសួងការបរទេសនៅ កាប៊ុល»។
លក្ខខណ្ឌដែលស្ថានទូតនានារបស់ អាហ្វហ្គានីស្ថាន អាចទទួលយកការគ្រប់គ្រងរបស់ តាលីបង់
មន្ត្រីការទូត Mamundzay ប្រកាសថា ស្ថានទូតអាហ្វហ្គានីស្ថាន នៅ ឥណ្ឌា និងស្ទើរតែទាំងអស់នៃស្ថាប័ននេះនៅតាមបណ្ដាប្រទេស បានអះអាងថា នឹងអាចទទួលយកការគ្រប់គ្រងរបស់ របបតាលីបង់ ដោយមានលក្ខខណ្ឌ ៖ «ដំបូង តាលីបង់ ត្រូវបង្កើតរដ្ឋាភិបាលប្រជាជាតិដែលមានលក្ខណៈរួបរួម សម្បូរបែប និងប្រគល់សិទ្ធិមូលដ្ឋាននានាដល់ស្ត្រី។
ពេលដណ្ដើមបានអំណាចភ្លាម ក្រុមតាលីបង់ បានប្រកាសថា នឹងមានការបន្ធូរបន្ថយការរឹតត្បិតលើសិទ្ធិសេរីភាពរបស់ស្ត្រី។ ក៏ប៉ុន្តែ កន្លងមក ពួកគេមិនបានគោរពតាមការសន្យាឡើយ។ តាលីបង់ បានអនុវត្តវិធានការតឹងរឹង ដូចជា បង្គាប់ឱ្យស្ត្រីបិទបាំងមុខ។ល។
June 29, 2022
ការទូទាត់ប្រាក់តាមរយៈឌីជីថល មានកំណើនសន្ទុះកាន់តែខ្លាំងនៅក្នុងប្រទេសកម្ពុជា
«សេចក្តីប្រកាសព័ត៌មាន»
ភ្នំពេញ ថ្ងៃទី ២៩ ខែមិថុនា ឆ្នាំ ២០២២ – តាមការសិក្សា[1] របស់ក្រុមហ៊ុន Visa ស្តីពីឥរិយាបថទូទាត់ប្រាក់របស់អតិថិជន ឆ្នាំ ២០២១ បានបង្ហាញពីទិដ្ឋភាពជារួមនៃការទូទាត់ដែលកំពុងតែមានការផ្លាស់ប្តូរយ៉ាងលឿននៅក្នុងប្រទេសកម្ពុជា ពីការប្រើប្រាស់សាច់ប្រាក់សុទ្ធ ទៅជាការទូទាត់តាមរយៈឌីជីថល។ បច្ចុប្បន្ន ១៤% (ដប់បួនភាគរយ) នៃអ្នកប្រើប្រាស់នៅក្នុងតំបន់អាស៊ីអាគ្នេយ៍ មិនបានប្រើប្រាស់សាច់ប្រាក់សុទ្ធទេ ហើយនិន្នាការនេះត្រូវបានគេសង្កេតឃើញថាអ្នកប្រើប្រាស់នៅក្នុងប្រទេសកម្ពុជាមានភាពឈានមុខគេ នេះបើយោងតាមតួលេខបង្ហាញ (ដែលមានប្រមាណរហូតដល់ ៣៦%)។
បើមើលទៅតាមប្រភេទដែលអ្នកប្រើប្រាស់និយម ការប្រើប្រាស់កាបូបអេឡិចត្រូនិក (e-Wallet) និង កាត គឺជាជម្រើសលេចធ្លោនៅក្នុងទីផ្សារ។ បច្ចុប្បន្នការទូទាត់ទាំងពីរប្រភេទនេះត្រូវបានប្រើប្រាស់ដោយប្រជាជនកម្ពុជាប្រមាណ ២៥% ពោលគឺយ៉ាងហោចណាស់ ៤នាក់ ក្នុងចំណោម ១០នាក់នឹងប្រើប្រាស់ជម្រើសមួយក្នុងចំណោមជម្រើស២ប្រភេទនេះ។ ក្នុងនោះដែរប្រមាណ ១៤ ភាគរយ ប្រើទាំងកាបូបអេឡិចត្រូនិច និងកាត។ បន្ថែមលើសពីនេះ ការទូទាត់តាមរយៈ QR កូដ និង ការឆូត ឬ បញ្ចូលកាត ត្រូវបានគេមើលឃើញថាមានការកើនឡើងពីមួយឆ្នាំទៅមួយឆ្នាំ ព្រមទាំងត្រូវបានប្រជាប្រិយភាពនៅក្នុងទីផ្សារច្រើនជាងមធ្យោបាយនៃការទូទាត់ដោយមិនប្រើសាច់ប្រាក់សុទ្ធផ្សេងៗទៀត។
អ្នកស្រី ជុំ ម៉ូនីកា នាយិកាគ្រប់គ្រងក្រុមហ៊ុន Visa ប្រចាំប្រទេសកម្ពុជា បានមានប្រសាសន៍ថា៖ «ប្រជាជនកម្ពុជាទទួលយកការទូទាត់តាមរយៈឌីជីថលយ៉ាងឆាប់រហ័ស នេះគឺដោយសារតែការពេញចិត្តនឹងភាពងាយស្រួល និងសុវត្ថិភាព។ ក្រុមហ៊ុន Visa កំពុងផ្តល់ជូនភាគីពាក់ព័ន្ធទាំងអស់នូវដំណោះស្រាយ និងការប្រើប្រាស់ព័ត៌មានទីផ្សារ ដើម្បីអាចឲ្យយើងទាំងអស់គ្នាអាចបោះជំហានទៅមុខប្រកបដោយផាសុកភាពនៅក្នុងស្ថានភាពនៃសេដ្ឋកិច្ចឌីជីថលដែលកំពុងតែរីកចម្រើនរបស់កម្ពុជា»។
ជាមួយការបែងចែកយ៉ាងច្បាស់លាស់នៃអាយុអ្នកប្រើប្រាស់នៅក្នុងការសិក្សានៃការទូទាត់ ភាគច្រើននៃអ្នកដែលចូលចិត្តប្រើប្រាស់សាច់ប្រាក់សុទ្ធ (ដែលមានប្រមាណ ៧៨%) គឺជាមនុស្សចាស់។ ទន្ទឹមនឹងនេះ ជម្រើសទូទាត់តាមរយៈការមិនប្រើប្រាស់សាច់ប្រាក់សុទ្ធ គឺមានប្រជាប្រិយភាពបំផុតក្នុងចំណោមក្រុមមនុស្សអាយុ ចន្លោះពី ២៥ឆ្នាំ ដល់ ៤០ឆ្នាំ (មនុស្សជំនាន់ Z និង ជំនាន់ Y) មានប្រមាណជា ២១ ភាគរយ ដែលចូលចិត្តរបស់ពួកគាត់គឺការទូទាត់តាមរយៈ QR កូដ។ ការទូទាត់ប្រាក់តាមរយៈការប្រើ កាត ក៏មានការពេញនិយមប្រហាក់ប្រហែលគ្នាផងដែរក្នុងចំណោមក្រុមមនុស្សវ័យនេះ។
វិធីសាស្ត្រទូទាត់របស់អ្នកប្រើប្រាស់ប្រើជាប្រចាំ – គឺសំដៅទៅលើវិធីសាស្ត្រទូទាត់ដែលអ្នកប្រើប្រាស់ជ្រើសប្រើញ៉ឹកញ៉ាប់បំផុត យ៉ាងហោចណាស់ ៤ ដងក្នុងមួយសប្តាហ៍។ អ្នកប្រើប្រាស់ប្រភេទនេះ មានយ៉ាងហោចម្នាក់ក្នុងចំណោម ៥ នាក់ បាននឹងកំពុងប្រើប្រាស់វា ហើយជានិច្ចកាលនិយមប្រើប្រាស់ការទូទាត់តាមរយៈបច្ចេកវិទ្យា QR កូដ និង កាតអនឡាញ។ សម្រាប់ការប្រើប្រាស់កាត ស្ទើរតែពាក់កណ្តាលនៃចំនួនកាតដែលមានផ្ទុកបច្ចេកវិទ្យា Contactless និងត្រូវបានប្រើយ៉ាងហោចណាស់ម្តងក្នុងមួយសប្តាហ៍។ លើសពីនេះ ប្រទេសកម្ពុជា បាននាំមុខគេនៅក្នុងតំបន់អាស៊ីអាគ្នេយ៍ ទៅលើអ្នកប្រើប្រាស់កម្មវិធីធនាគារចល័តជាលើកដំបូងច្រើនជាងគេបំផុតក្នុងអំឡុងពេលមានជំងឺរាតត្បាត (ប្រមាណជា ២៩%) ។
ជាការពិតណាស់ វិធីសាស្ត្រទូទាត់តាមរយៈការឆូត ឬ បញ្ចូល កាត បានកើនឡើងដល់ ២៣ភាគរយ នៅក្នុងទីផ្សារ ដែលច្រើនជាងកាលពីឆ្នាំមុនពីរដង។ ទន្ទឹមនឹងនេះ មានអ្នកប្រើប្រាស់រហូតដល់ ៤ នាក់ក្នុងចំណោម ១០នាក់ ចាប់អារម្មណ៍ក្នុងការសាកល្បងប្រើប្រាស់កាតដែលមានផ្ទុកបច្ចេកវិទ្យា contactless ។ អ្នកប្រើប្រាស់ដែលមានអាយុចន្លោះពី ២៥ឆ្នាំ ដល់ ៤០ឆ្នាំ មានចំណាប់អារម្មណ៍ខ្លាំងបំផុត ដែលប្រហែលជាងមួយភាគបី គឺចង់ប្រើប្រាស់វិធីសាស្ត្រទូទាត់មួយនេះ។
អ្នកស្រី ជុំ ម៉ូនីកា បានបន្ថែមទៀតថា៖ «កាតដែលមានផ្ទុកបច្ចេកវិទ្យា Contactless គឺជាវិធីសាស្ត្រទូទាត់មានការច្នៃប្រឌិតចុងក្រោយបំផុតដែលកំពុងពេញនិយមនៅក្នុងប្រទេសកម្ពុជា ដោយផ្តល់ជូនបទពិសោធន៍ប្រតិបត្តិការដែលកាន់តែរហ័ស មានសុវត្ថិភាព និងងាយស្រួលជាងមុន។ អ្នកប្រើប្រាស់ ជាពិសេសក្មេងៗជំនាន់ក្រោយ ចង់ឃើញដំណោះស្រាយ និងការទទួលយកវិធីសាស្ត្រទូទាត់តាមរយៈបច្ចេកវិទ្យា contactless ឲ្យកាន់តែទូលំទូលាយ។ ក្នុងនាមជាប្រព័ន្ធពាណិជ្ជកម្មដែលគួរឱ្យទុកចិត្តមួយ ក្រុមហ៊ុន Visa ចង់ប្រើសមត្ថភាពចម្រុះនៃបណ្តាញរបស់យើង ដើម្បីជួយដល់ការអភិវឌ្ឍ រូបវន្តបុគ្គល អាជីវកម្ម និងសេដ្ឋកិច្ចឲ្យមានការរីកចម្រើន»។
###
អំពីក្រុមហ៊ុន Visa Inc.
Visa Inc. (NYSE: V) គឺជាក្រុមហ៊ុននាំមុខគេក្នុងបច្ចេកវិទ្យាទូទាត់សាច់ប្រាក់តាមរយៈឌីជីថល ដែលជួយសម្រួលដល់ប្រតិបត្តិការរវាងអ្នកប្រើប្រាស់ ពាណិជ្ជករ ស្ថាប័នហិរញ្ញវត្ថុ និងស្ថាប័នរដ្ឋាភិបាលដែលពាក់ព័ន្ធ ច្រើនជាង 200 ប្រទេស និង តំបន់ ជារៀងរាល់ឆ្នាំ។ បេសកកម្មរបស់យើងគឺផ្សាភ្ជាប់ពិភពលោកទាំងមូល តាមរយៈការតភ្ជាប់បណ្តាញទូទាត់ប្រាក់ប្រកបដោយភាពច្នៃប្រឌិតថ្មី ងាយស្រួល អាចទុកចិត្តបាន និងមានសុវត្ថិភាពបំផុត ដែលអនុញ្ញាតឲ្យអ្នកប្រើប្រាស់ អាជីវករ និងសេដ្ឋកិច្ចមានការរីកចម្រើន។ យើងជឿជាក់ថាសេដ្ឋកិច្ចដែលរួមបញ្ចូលមនុស្សគ្រប់រូប នៅគ្រប់តំបន់ នឹងជួយដល់ការអភិវឌ្ឍនៅគ្រប់ទីកន្លែង ហើយយើងមើលឃើញថា នេះគឺជាមូលដ្ឋានគ្រឹះនៃចរន្តសាច់ប្រាក់។ ស្វែងយល់បន្ថែមតាមរយៈ Visa.com ៕
[1] The Visa Consumer Payment Attitudes Study was prepared by CLEAR in Aug-Sep 2021, surveyed amongst 6,520 consumers in Singapore, Philippines, Malaysia, Indonesia, Thailand, Vietnam, and Cambodia. The study conducted face-to-face interviews with 520 Cambodian consumers across the country who are working part or full time with a demographic mix that sought to create a representative mix of ages and genders.
June 29, 2022
ប្រមុខរាជរដ្ឋាភិបាលកម្ពុជា ប្រកាសថា កូវីដ-១៩ នៅ កម្ពុជា ចាប់ផ្ដើមឆ្លងជាថ្មី
សម្ដេចតេជោ ហ៊ុន សែន ប្រមុខរាជរដ្ឋាភិបាលកម្ពុជា បានប្រកាសថា បានរកឃើញករណីឆ្លងកូវីដ-១៩ ថ្មី មួយចំនួនក្នុងសហគមន៍ ដែលនេះបានបញ្ចប់រយៈពេល ៥២ ថ្ងៃ ដែល កម្ពុជា មិនមានករណីវិជ្ជមានថ្មី។
ក្នុងសារជាសំឡេងដែលបានផ្សព្វផ្សាយកាលពីយប់ម្សិលមិញ (២៨ មិថុនា) សម្ដេច ហ៊ុន សែន បានមានប្រសាសន៍ថា ក្នុងករណីវិជ្ជមាននឹង កូវីដ-១៩ ដែលទើបត្រូវបានរកឃើញដោយការធ្វើតេស្ត PCR បានកើតឡើងចំពោះពលរដ្ឋដែលត្រៀមចាកចេញពី កម្ពុជា និងអ្នកដំណើរដែលទើបចូលមកកាន់ កម្ពុជា។ ជាងនេះ ក៏មានករណីខ្លះត្រូវបានរកឃើញដោយការធ្វើតេស្តរហ័សផងដែរ។
ប្រមុខរាជរដ្ឋាភិបាលកម្ពុជា យល់ថា បើទោះជាតួលេខនៃករណីឆ្លងថ្មីនៅទាប ប៉ុន្តែ ការធ្វេសប្រហែសនឹងនាំ កម្ពុជា ទៅរកស្ថានការណ៍អាសន្ន។ ដូច្នេះ សម្ដេចតេជោ អំពាវនាវឱ្យគ្រប់គ្នាអនុវត្តវិធានការទប់ស្កាត់កូវីដ-១៩ ឱ្យបានត្រឹមត្រូវ។
June 29, 2022