សឿន សំណាង - La Reine Media

ឥណ្ឌូណេស៊ី នឹងតម្រូវឱ្យទេសចរចាក់វ៉ាក់សាំងបង្ការកូវីដ-១៩ ដូសជំរុញ

ប្រភពព័ត៌មានពី ទីក្រុងហ្សាការតា ឱ្យដឹងថា អ្នកនាំពាក្យរបស់ ក្រសួងសុខាភិបាលឥណ្ឌូណេស៊ី កាលពីថ្ងៃទី ៥ កក្កដា បានបញ្ជាក់ថា រដ្ឋាភិបាលប្រទេសនេះមានផែនការស្នើឱ្យចាក់វ៉ាក់សាំងបង្ការកូវីដ-១៩ ដូសជំរុញ ចំពោះទេសចរ ក្នុងគ្រាដែលតួលេខនៃករណីឆ្លងជំងឺនេះកំពុងកើនឡើងនៅក្នុងតំបន់មួយចំនួន។

អ្នកនាំពាក្យរបស់ ក្រសួងសុខាភិបាលឥណ្ឌូណេស៊ី លោក Mohammad Syahril បានឱ្យដឹងថា ប្រធានាធិបតី Joko Widodo បានកំណត់ថា ការចាក់វ៉ាក់សាំងដូសជំរុញគឺជាការតម្រូវមួយនៅក្នុងការធ្វើដំណើរ ហើយមេដឹកនាំប្រទេសនេះមិនចង់ឃើញរលកនៃការឆ្លងរាលដាលថ្មីនៃជំងឺកូវីដ-១៩។

យោងតាមមន្ត្រីខាងលើ ស្ថានភាពកូវីដ-១៩ ត្រូវបានគ្រប់គ្រងនៅទូទាំងប្រទេសក្នុងខែមិថុនា ២០២២ ដោយអត្រានៃការធ្វើតេស្តរកឃើញករណីវិជ្ជមានក្រោម ១.១៥% និងអត្រាឆ្លងស្ថិតក្នុងកម្រិត ១.០៣ ករណីលើ ១០០,០០០ នាក់ នៅក្នុង ១ សប្ដាហ៍។

រលកនៃការឆ្លងរាលដាលបានកើតឡើងជាថ្មីនៅប្រទេសនេះ ក្នុងនោះ កាលពីថ្ងៃទី ៣០ មិថុនា តួលេខអ្នកឆ្លងថ្មីបានកើនដល់ ២,២០០ នាក់ ប៉ុន្តែ បានថយចុះជាបន្តបន្ទាប់ក្នុងរយៈពេល ៤ ថ្ងៃ មកនៅត្រឹម ១,៤៣៤ ករណី ក្នុងថ្ងៃទី ៤ កក្កដា។ ទោះជាយ៉ាងណាក៏ដោយ តួលេខនេះបានព្រមានអំពីរលកនៃការឆ្លងរាលដាលធំថ្មីដែលអាចកើតឡើងគ្រប់ពេល។

លោក Syahril សង្កត់ធ្ងន់ថា ការផ្ទុះឆ្លងរាលដាលថ្មីគឺចាប់ផ្ដើមពីការមិនគោរពវិធានការសុខាភិបាល និងយុទ្ធនាការចាក់វ៉ាក់សាំងមានការយឺតយ៉ាវ៕

July 6, 2022

អ៊ីរ៉ង់ បញ្ចុះតម្លៃប្រេង ដើម្បីទប់ស្កាត់ រុស្ស៊ី ក្ដៅក្ដាប់ទីផ្សារចិន ពេញទំហឹង

ទីក្រុងប៉េកាំង កំពុងទទួលបានផលចំណេញច្រើននៅពេល ទីក្រុងតេហេរ៉ង់ បញ្ចុះតម្លៃប្រេងឆៅដើម្បីប្រកួតប្រជែងនឹងប្រេងរបស់ រុស្ស៊ី នៅក្នុងទីផ្សារចិន។

Bloomberg ដកស្រង់ប្រភពព័ត៌មានពីក្រុមអ្នកជំនួញបានឱ្យដឹងថា ប្រេងឆៅរបស់ អ៊ីរ៉ង់ កំពុងត្រូវបានកំណត់តម្លៃទាបជាង ១០ ដុល្លារ ធៀបនឹងប្រេង Brent។ ប្រការនេះជួយឱ្យផលិតផលរបស់ អ៊ីរ៉ង់ មានតម្លៃប្រហាក់ប្រហែលនឹងប្រេង Urals របស់ រុស្ស៊ី ដែលគ្រោងនឹងប្រគល់ឱ្យ ប្រទេសចិន នៅក្នុងខែសីហាខាងមុខ។

ធៀបនឹងមុនវិបត្តិនៅ អ៊ុយក្រែន ប្រេងឆៅរបស់ អ៊ីរ៉ង់ បច្ចុប្បន្នត្រូវបានបញ្ចុះតម្លៃបន្ថែមពី ៤-៥ ដុល្លារ/ធុង។ អ៊ីរ៉ង់ ត្រូវបញ្ចុះតម្លៃប្រេង ក្នុងគ្រាដែលប្រេងរបស់ រុស្ស៊ី កំពុងបង្កើនចំណែកទីផ្សាររបស់ខ្លួននៅ ប្រទេសចិន។ ទីផ្សារចិន បានក្លាយជាទិសដៅសំខាន់របស់ ប្រេងរុស្ស៊ី នៅពេល វិមានក្រឹមឡាំង ស្វែងរកវិធីទប់ទល់នឹងទណ្ឌកម្មរបស់ បស្ចិមលោក។

July 5, 2022

ថ្មរក្សាថាមពលធ្វើអំពីខ្សាច់ដំបូងគេក្នុងពិភពលោក ជួយផ្គត់ផ្គង់កម្ដៅនៅ ហ្វាំងឡង់

ក្រុមហ៊ុនមួយរបស់ ប្រទេសហ្វាំងឡង់ បានដំឡើងប្រព័ន្ធថ្មដែលមានធាតុផ្សំពីខ្សាច់ប្រហែល ១០០ តោន ជួយរក្សាថាមពលបៃតងក្នុងទម្រង់កម្ដៅក្នុងរយៈពេលជាច្រើនខែ និងអាចប្រើប្រាស់ជំនួសអគ្គិសនីបានច្រើនករណី។

ក្រុមវិស្វករវ័យក្មេងរបស់ក្រុមហ៊ុន Polar Night Energy បានដំឡើងរួចរាល់នូវ «ថ្មខ្សាច់» ដែលដំណើរការមុខងារពេញលេញដំបូងក្នុងពិភពលោក នៅទីរួមស្រុក Kankaanpaa នៃ ប្រទេសហ្វាំងឡង់ នេះបើតាម BBC ចុះផ្សាយកាលពីម្សិលមិញ។ ឧបករណ៍ថ្មីនេះត្រូវបានដាក់នៅក្នុងរោងចក្រអគ្គិសនី Vatajankoski។

តម្រូវការថាមពលក្នុងពិភពលោក បូករួមនឹងបញ្ហាប្រេងឡើងថ្លៃ បាននាំឱ្យក្រុមហ៊ុនជាច្រើនវិនិយោគទៅលើវិស័យថាមពលកកើតឡើងវិញ។ ក៏ប៉ុន្តែ ថ្មរក្សាថាមពលអគ្គិសនីទំនើប ផ្ទាំងសូឡា ឧបករណ៍ប្រើប្រាស់ថាមពលខ្យល់ជាដើមនៅមានតម្លៃខ្ពស់នៅពេលប្រើប្រាស់ទ្រង់ទ្រាយធំ។

ចំណែកថ្មដែលធ្វើអំពីខ្សាច់វិញ អាចរក្សាទុកថាមពលបៃតងក្នុងរយៈពេលច្រើនខែ។ វត្ថុធាតុសំខាន់របស់ឧបករណ៍នេះគឺខ្សាច់ប្រហែល ១០០ តោន ដែលផ្ទុកនៅក្នុងជង្រុកធំ និងខ្ពស់។

ដំណើរការនៃថ្មខ្សាច់នេះមានដូចតទៅ៖ អគ្គិសនីសល់ដែលមានតម្លៃទាប ត្រូវបានគេយកមកកម្ដៅខ្សាច់ឱ្យឡើងដល់ ៥០០ អង្សាសេ តាមរយៈឧបករណ៍ជំនួយកម្ដៅរបស់ Polar Night Energy។ ដំណើរការនេះធ្វើឱ្យបរិយាកាសក្នុងខ្សាច់ឡើងក្ដៅខ្លាំង។ ខ្សាច់គឺជាវត្ថុធាតុដែលរក្សាកម្ដៅបានយ៉ាងមានប្រសិទ្ធភាព និងមិនសូវបាត់បង់កម្ដៅទៅតាមពេលវេលា។ ក្រុមអ្នកអភិវឌ្ឍបានឱ្យដឹងថា ឧបករណ៍របស់ពួកគេអាចរក្សាខ្សាច់ឱ្យនៅក្ដៅត្រឹម ៥០០ អង្សាសេ ក្នុងរយៈពេលច្រើនខែ។

នៅពេលត្រូវការប្រើប្រាស់ គេអាចបញ្ចេញថាមពលពីថ្មខ្សាច់នេះ ដើម្បីធ្វើឱ្យទឹកឡើងក្ដៅសម្រាប់បូមចូលក្នុងប្រព័ន្ធទឹកក្ដៅរបស់តំបន់។ ក្រោយមក ទឹកដែលក្ដៅនេះត្រូវបានបូមទៅក្នុងប្រព័ន្ធបំពង់បង្ហូរទឹករបស់គ្រួសារ ការិយាល័យ ឬអាងហែលទឹកនានា។ វិធីនេះជួយដោះស្រាយបញ្ហាខ្វះកម្ដៅនៅក្នុងរដូវត្រជាក់ដ៏សែនរងាដែលអូសបន្លាយពេលយូរនៅ ហ្វាំងឡង់៕

July 5, 2022

កំណើននៃអតិផរណានៅ ប្រទេសតួកគី កើនឡើងជិតដល់ ៨០%

អតិផរណាក្នុងរយៈពេល ៦ ខែកន្លង នៅ ប្រទេសតួកគឺ បានហក់ឡើងខ្ពស់បំផុតក្នុងអំឡុងពេល ២០ ឆ្នាំមកនេះ ចំណែកតម្លៃអាហារក៏កើនឡើងទ្វេដងក្នុង ១ ឆ្នាំកន្លងទៅ។

យោងតាមទិន្នន័យពី វិទ្យាស្ថានស្ថិតិតួកគី អត្រាតម្លៃទំនិញ (CPI) របស់ប្រទេសតួកគី កើនឡើងដល់ ៧៨.៦% ក្នុងរយៈពេល ៦ ខែដើមឆ្នាំនេះ បើធៀបនឹងដំណាក់កាលដូចគ្នាកាលពីឆ្នាំកន្លង ក្នុងនោះ ភាគច្រើនកើតឡើងដោយសារតម្លៃអាហារ ភេសជ្ជៈ និងការដឹកជញ្ជូន។ តម្លៃអាហារបានកើនឡើងជិត ២ ដង ក្នុង ១ ឆ្នាំមកនេះ។ ការចំណាយទៅលើការដឹកជញ្ជូនក៏បានកើនឡើង ១២៣%។

ប្រទេសតួកគី បានធ្លាក់ទៅក្នុងវិបត្តិអតិផរណាអស់រយៈពេលជាច្រើនខែមកហើយ។ រូបិយប័ណ្ណ លីរ៉ាតួកគី បានបាត់បង់តម្លៃអស់ជាង ២០% ធៀបនឹងប្រាក់ដុល្លារអាម៉េរិក នៅក្នុងឆ្នាំនេះ។

សេដ្ឋកិច្ចរបស់ តួកគី ក៏បានរងផលប៉ះពាល់ពីបញ្ហាអតិផរណាដូចបណ្ដាប្រទេសក្នុងពិភពលោក។ ប៉ុន្តែ គោលនយោបាយរបស់មេដឹកនាំ Tayyip Erdogan បានធ្វើឱ្យវិបត្តិកាន់តែមានសភាពធ្ងន់ធ្ងន់។ ប្រាក់ លីរ៉ា ដែលបានធ្លាក់ថ្លៃ កាន់តែធ្វើឱ្យទំនិញនាំចូលមានតម្លៃកាន់តែខ្ពស់។

កាលពីខែកញ្ញា ២០២១ លោក Erdogan បានស្នើឱ្យធនាគារកណ្ដាលរបស់ តួកគី បញ្ចុះអត្រាការប្រាក់ នៅពេលតម្លៃទំនិញកើនឡើងជាបន្តបន្ទាប់។ ក្នុងគ្រាដែលធនាគារជាតិរបស់ប្រទេសនានាដំឡើងអត្រាការប្រាក់ដើម្បីបន្ថយកំណើនអតិផរណា ប្រទេសតួកគី បែរជាធ្វើផ្ទុយពីនេះ។ ការប្រាក់នៅប្រទេសនេះនៅតែរក្សាអត្រា ១៤% ចាប់ពីខែធ្នូ ២០២១។

ទោះជាយ៉ាងនេះក៏ដោយ លោក Erdogan នៅតែការពារគោលនយោបាយរបស់ខ្លួន ដោយអះអាងថា ការបន្ថយអត្រាការប្រាក់នឹងអូសទម្លាក់កំណើនអតិផរណា និងបង្កើនការនាំចេញ។ លោក Erdogan យល់ថា បញ្ហាសេដ្ឋកិច្ចរបស់ ប្រទេសតួកគី កើតឡើងដោយសារឥទ្ធិពលពីខាងក្រៅ៕

July 5, 2022

បន្ទាន់! មានករណីផ្ទុះអាវុធមួយទៀតហើយនៅក្នុងទិវាបុណ្យឯករាជ្យរបស់ សហរដ្ឋអាម៉េរិក

ករណីផ្ទុះអាវុធថ្មីនេះកើតឡើងនៅក្បែរឧទ្យាន Benjamin Franklin ក្នុងទីក្រុង Philadelphia កាលពីថ្ងៃទី ៤ កក្កដា បណ្ដាលឱ្យសមត្ថកិច្ច ២ នាក់ រងរបួស និងធ្វើឱ្យហ្វូងមនុស្សភ័យស្លន់ស្លោ រត់យករួចខ្លួន។

មន្ត្រីប៉ូលិស ២ រូប នៅ Philadelphia ត្រូវបានគេបាញ់នៅក្បែរឧទ្យាន Benjamin Franklin កាលពីព្រលប់ថ្ងៃទី ៤ កក្កដា (៥ កក្កដា នៅ កម្ពុជា) នៅពេលមនុស្សរាប់ពាន់នាក់កំពុងប្រមូលផ្ដុំគ្នាចូលរួមពិធីប្រគំតន្ត្រី និងមើលគេបាញ់កាំជ្រួចក្នុងទិវាបុណ្យឯករាជ្យជាតិរបស់ សហរដ្ឋអាម៉េរិក។

មនុស្សរាប់រយនាក់នាំគ្នារត់គេចខ្លួនពីឧទ្យាន Benjamin Franklin បន្ទាប់ពីស្នូរគ្រាប់កាំភ្លើងដំបូងបានផ្ទុះឡើង។ ប៉ូលិសបានណែនាំឱ្យប្រជាជនរកកន្លែងសុវត្ថិភាព។ «ខ្ញុំមិនបានឮសំឡេងគ្រាប់កាំភ្លើងទេ ប៉ុន្តែ បានឮប៉ូលិសស្រែកថា «រត់ រត់ រត់»» សាក្សីម្នាក់រៀបរាប់ដូច្នេះ។

អភិបាលក្រុង Philadelphia លោក Jim Kenney បានឱ្យដឹងថា មន្ត្រីប៉ូលិស ២ រូប ដែលបានរងរបួស ត្រូវបានអនុញ្ញាតឱ្យចេញពីពេទ្យ ដោយសារតែរបួសមិនប៉ះពាល់ធ្ងន់ធ្ងន់ដល់សុខភាព។

អភិបាលក្រុង Kenney បន្ថែមថា អាជ្ញាធររបស់លោក កំពុងតែ «ស្នើសុំតំណាងរាស្ត្រ» ទប់ស្កាត់អាវុធដែលនាំចូលកាន់ទីក្រុង។ «ប្រពៃណីរបស់យើងមិនគួរត្រូវបានបំផ្លាញដោយអំពើហិង្សានៃការប្រើប្រាស់កាំភ្លើងឡើយ» លោក Kenney ថ្លែងដូច្នេះ។

ករណីបាញ់ប្រហារថ្មីនេះកើតឡើងតែប៉ុន្មានម៉ោងប៉ុណ្ណោះបន្ទាប់ពីករណីបាញ់ប្រហារនៅលើដងផ្លូវក្នុងតំបន់ Highland Park ជាយក្រុង Chicago នៅពេលហ្វូងមនុស្សកំពុងចូលរួមហែក្បួនដើម្បីអបអរទិវាបុណ្យឯករាជ្យ បណ្ដាលឱ្យមនុស្សយ៉ាងតិច ៦ នាក់ ត្រូវបាត់បង់ជីវិត និងជាង ៣០ នាក់រងរបួស។

https://twitter.com/Doudrick/status/1544148907055357952?s=20&t=fSyhDjRqiylHNF-X41n3QQ

…

July 5, 2022

អាជ្ញាធរចិន ប្រកាសផ្អាកសកម្មភាពនាំចេញ-នាំចូលតាមច្រកព្រំដែនគោកជាប់ជាមួយ វៀតណាម

ភាគីខាងប្រទេសចិន ប្រកាសផ្អាកសកម្មភាពនាំចេញ-នាំចូលទំនិញដែលឆ្លងកាត់ច្រកទ្វារព្រំដែនអន្តរជាតិផ្លូវគោកចិន-វៀតណាម Beishan-Kim Thanh ដោយសារតែរកឃើញបញ្ហាមិនប្រក្រតីនៅលើទំនិញ។

បញ្ហាមិនប្រក្រតីនៅទីនេះគឺទាក់ទងនឹងវីរុស SARS-CoV-2 (កូវីដ-១៩) ដែលត្រូវបានរកឃើញនៅលើទំនិញដែលនាំចូលពី វៀតណាម ទៅកាន់ ប្រទេសចិន។

មុននោះ កាលពីថ្ងៃទី ២៥ មិថុនា ក្រោយពីបានផ្អាកជាង ៤ ខែ ភាគីខាងប្រទេសចិន ក៏បានយល់ព្រមបើកច្រកទ្វារព្រំដែន Beishan-Kim Thanh ដោយអនុញ្ញាតឱ្យសាកល្បងនាំចូលទំនិញជាផ្លែឈើមួយចំនួនពី ប្រទេសវៀតណាម។

ច្រកទ្វារព្រំដែន Beishan-Kim Thanh ស្ថិតក្នុងស្រុក Hekou, ខេត្ត Yunnan, ប្រទេសចិន និងក្នុងក្រុង Lao Cai, ខេត្ត Lao Cai, ប្រទេសវៀតណាម។

ការប្រកាសបិទច្រកព្រំដែនបណ្ដោះអាសន្នជាឯកតោភាគីរបស់ អាជ្ញាធរចិន មិនបានកំណត់ពេលវេលាដែលនឹងបើកដំណើរការឡើងវិញនោះទេ៕

July 5, 2022

ស្ថានភាពជំងឺកូវីដ-១៩ នៅ កម្ពុជា គិតត្រឹមវេលាទៀបភ្លឺ ថ្ងៃទី ០៥ ខែកក្កដា ២០២២

កម្ពុជា រកឃើញអ្នកឆ្លងកូវីដ-១៩ ករណីថ្មី ចំនួន ០៣ នាក់ ដែលសុទ្ធតែជាករណីឆ្លងក្នុងសហគមន៍ ខណៈដែលអ្នកជាសះស្បើយ និងករណីស្លាប់មិនមាន។

July 5, 2022

ថ្ងៃនេះ ណាតូ ចាប់ផ្ដើមអនុម័តផ្លូវការលើសំណើសុំចូលជាសមាជិករបស់ ហ្វាំងឡង់ និង ស៊ុយអែត

ដំណើរការនៃការអនុម័តឱ្យ ហ្វាំងឡង់ និង ស៊ុយអែត ចូលជាសមាជិករបស់ សម្ព័ន្ធយោធាណាតូ នឹងអាស្រ័យលើប្រទេសនីមួយៗដែលជាសមាជិក ប៉ុន្តែ វាតែងស៊ីពេលពី ៨ ដល់ ១២ ខែ។

ប្រទេសចំនួន ៣០ ដែលជាសមាជិករបស់ណាតូ (អង្គការសន្ធឹសញ្ញាអាត្លង់ទិកខាងជើង-NATO) ថ្ងៃនេះ (៥ កក្កដា) នឹងចុះហត្ថលេខាលើពិធីសារស្ដីពីការបញ្ចូល ហ្វាំងឡង់ និង ស៊ុយអែត ទៅក្នុងសម្ព័ន្ធយោធាណាតូ ដើម្បីបើកផ្លូវឱ្យមានការចាប់ផ្ដើមដំណើរការអនុម័តលើពាក្យស្នើសុំចូលជាសមាជិករបស់ប្រទេសអឺរ៉ុបខាងជើងទាំងពីរនេះ។

ដើម្បីបានក្លាយជាសមាជិករបស់ ណូតូ ប្រទេសហ្វាំងឡង់ និង ស៊ុយអែត ត្រូវការការយល់ព្រមពីសភារបស់ប្រទេសទាំង ៣០ ដែលជាសមាជិកបច្ចុប្បន្នរបស់ ណាតូ។

ការដែល ហ្វាំងឡង់ និង ស៊ុយអែត ចូលជាសមាជិកណាតូ នឹងក្លាយជាព្រឹត្តិការណ៍សំខាន់ បង្កើតបានជាការផ្លាស់ប្ដូររចនាសម្ព័ន្ធសន្តិសុខធំបំផុតនៅ អឺរ៉ុប រាប់ចាប់តាំងពីសង្គ្រាមត្រជាក់បានបញ្ចប់ និងត្រូវបានចាត់ទុកថាជាលទ្ធផលដែលកើតឡើងដោយសារសង្គ្រាមរវាង រុស្ស៊ី និង អ៊ុយក្រែន។

ដំណើរការនៃការអនុម័តឱ្យ ហ្វាំងឡង់ និង ស៊ុយអែត ចូលជាសមាជិករបស់ សម្ព័ន្ធយោធាណាតូ នឹងអាស្រ័យលើប្រទេសនីមួយៗដែលជាសមាជិក ប៉ុន្តែ វាតែងស៊ីពេលពី ៨ ដល់ ១២ ខែ។ ទោះជាយ៉ាងណាក៏ដោយ នៅក្នុងសន្និបាតកំពូលកាលពីសប្ដាហ៍កន្លង សមាជិកទាំងអស់របស់ ណាតូ សុទ្ធតែបានសន្យាថា នឹងពន្លឿនដំណើរការនេះ។

July 5, 2022

កម្មវិធីទូរស័ព្ទដៃ CamDigiKey ជំនាន់ចុងក្រោយ ២.០ មានមុខងារពិសេសចំនួន ៤

ក្រសួងសេដ្ឋកិច្ច និងហិរញ្ញវត្ថុ និង ធនាគារជាតិកម្ពុជា (NBC) បានដាក់ឱ្យដំណើរការ KHQR ដើម្បីធ្វើឱ្យមានស្ដង់ដា ចំពោះ QR codes ធនាគារក្នុងប្រទេស និងកម្មវិធីទូរស័ព្ទ CamDigiKey ជំនាន់ទីពីរ កាលពីថ្ងៃទី ៤ កក្កដា។

តាមរយៈទំព័រ Facebook ក្រសួងសេដ្ឋកិច្ច និងហិរញ្ញវត្ថុ បានឱ្យដឹងថា កម្មវិធីទូរស័ព្ទដៃ CamDigiKey ជំនាន់ទីពីរ (២.០) នេះ មានមុខងារពិសេសចំនួន ៤ រួមមានដូចខាងក្រោម៖

១-មុខងារស្គែនមុខយ៉ាងរស់រវើក, ២-ការស្គែតកូដដែលអាចអានបានដោយម៉ាស៊ីន (MRZ) លើអត្តសញ្ញាណប័ណ្ណខ្មែរ និងលិខិតឆ្លងដែនបរទេស, ៣-សន្ធានកម្មកម្មវិធីទូរស័ព្ទដៃ និងកម្មវិធីទូរស័ព្ទដៃ (App-to-app Integration), ៤-សន្ធានកម្មគេហទំព័រ និងគេហទំព័រ (Web-to-web integration)។

CamDigiKey គឺជាកម្មវិធីទូរស័ព្ទដៃដែលមានសុវត្ថិភាព និងងាយស្រួល ដែលត្រូវបានប្រើប្រាស់សម្រាប់ផ្ទៀងផ្ទាត់ អត្តសញ្ញាណរបស់លោកអ្នកតាមមធ្យោបាយឌីជីថល។ តាមរយៈការចុះឈ្មោះលើ CamDigiKey អ្នកនឹងទទួលបានអត្តសញ្ញាណឌីជីថលមួយដែលមានសុពលភាព ហើយអាចប្រើប្រាស់សម្រាប់ login ចូលទៅកាន់ portal រដ្ឋាភិបាលកម្ពុជាណាមួយក៏បាន។ ដើម្បីធ្វើការ login លោកអ្នកគ្រាន់តែធ្វើការស្កេនកូដ QR ដែលមាននៅលើ portal នោះជាមួយកម្មវិធីទូរស័ព្ទ CamDigiKey ជាការស្រេច។

ព័ត៌មានបន្ថែម សូមចូលទៅកាន់គេហទំព័រ www.registrationservices.gov.kh ។

July 5, 2022

រដ្ឋមន្ត្រីការបរទេសរបស់ ប្រទេសរុស្ស៊ី ធ្វើទស្សនកិច្ចនៅ វៀតណាម

រដ្ឋមន្ត្រីក្រសួងការបរទេសរុស្ស៊ី លោក Sergey Lavrov គ្រោងនឹងបំពេញទស្សនកិច្ចរយៈពេល ២ ថ្ងៃ នៅ ប្រទេសវៀតណាម តបតាមការអញ្ជើញរបស់ រដ្ឋមន្ត្រីការបរទេសវៀតណាម Bui Thanh Son។

លោក Sergey Lavrov នឹងធ្វើទស្សនកិច្ចនៅ វៀតណាម ចាប់ពីថ្ងៃទី ៥ ដល់ទី ៦ កក្កដា ក្នុងគ្រាដែល ប្រទេសរុស្ស៊ី និង វៀតណាម ឈានដល់របត់ ១០ ឆ្នាំនៃការបង្កើតទំនាក់ទំនងជាដៃគូយុទ្ធសាស្ត្រពេញលេញ។

រុស្ស៊ី និង វៀតណាម បានបង្កើតទំនាក់ទំនងការទូតកាលពីឆ្នាំ ១៩៥០ និងបានផ្ដើមកែលម្អទំនាក់ទំនងទ្វេភាគីចាប់ពីឆ្នាំ ២០០១។ ១១ ឆ្នាំក្រោយមក ប្រទេសទាំងពីរក៏បានក្លាយជាដៃគូសហការយុទ្ធសាស្ត្រគ្រប់ជ្រុងជ្រោយ។

ពាណិជ្ជកម្មទ្វេភាគីក្នុងឆ្នាំ ២០២០ រវាង រុស្ស៊ី និង វៀតណាម បានឡើងដល់ ៤.៨៥ ពាន់លានដុល្លារអាម៉េរិក កើន ៩% ធៀបនឹងឆ្នាំ ២០១៩។ ក្នុងឆ្នាំ ២០២១ ការដោះដូរទំនិញទៅមក បានឡើងដល់ ៧.១ ពាន់លានដុល្លារ កើនជាង ២៥% ធៀបនឹងឆ្នាំ ២០២០។ នៅក្នុង ទឹកដីវៀតណាម រុស្ស៊ី មានគម្រោងរកស៊ីចំនួន ១៥១ គម្រោង ដែលមានទុនវិនិយោគសរុបជាង ៩៥០ លានដុល្លារអាម៉េរិក។

July 5, 2022

Author: សឿន សំណាង