សឿន សំណាង - La Reine Media

ម្ចាស់ Tesla ថា «ថ្មផ្ទុកថាមពលប្រភេទ Lithium ប្រៀបបានទៅនឹងប្រេងសាំងបែបថ្មី»! តើប្រទេសណាកំពុងគ្រប់គ្រងបច្ចេកវិទ្យានេះ?

មហាសេដ្ឋីអាម៉េរិក Elon Musk យល់ថា សន្តិសុខថាមពលដើរតួនាទីសំខាន់សម្រាប់ប្រទេសជាតិ ហើយថ្មប្រភេទ Lithium អាចត្រូវបានចាត់ទុកជាប្រេងសាំងមួយប្រភេទ។

កាលពីថ្ងៃពុធសប្ដាហ៍នេះ David Sacks ដែលជាស្ថាបនិកបណ្ដាញសង្គមធុរកិច្ច Yammer និងជាអតីត COO របស់ Paypal បានសរសេរលើ Twitter ថា «ប្រការដែលអាចមើលឃើញច្បាស់នៅក្នុងឆ្នាំនេះ នោះគឺថា នឹងមិនមានសុវត្ថិភាព បើសិនមិនមានម្ចាស់ការលើបញ្ហាថាមពល»។ Sacks ចង់និយាយអំពីបញ្ហាទាំងឡាយ ទាក់ទិននឹងថាមពលដែលប្រទេសជាច្រើនក្នុងពិភពលោកកំពុងជួបប្រទះ។

មហាសេដ្ឋី Elon Musk ដែលជាកំពូលអ្នកលេង Twitter មួយរូបដែរនោះ បានឆ្លើយតបវិញថា «ប្រាកដជាដូច្នោះមែនហើយ។ ថ្ម lithium គឺជាប្រេងសាំងបែបថ្មី»។

មតិរបស់ម្ចាស់ក្រុមហ៊ុនផលិតរថយន្តអគ្គិសនី Tesla ទទួលបានការគាំទ្រច្រើនពីអ្នកលេងបណ្ដាញសង្គម ដោយទាក់ទាញបានអ្នកចុចចូលចិត្តជាង ២៦,៥០០ លើក និងចែករំលែកបន្តជិត ២ ពាន់លើក។

កាលពីខែមេសា លោក Musk ក៏ធ្លាប់បាននិយាយអំពីសារសំខាន់របស់បច្ចេកវិទ្យាថ្មផ្ទុកថាមពលប្រភេទ lithium នេះដែរ ដោយបានសរសេរលើ Twitter ថា «Tesla អាចចូលរួមក្នុងវិស័យចម្រាញ់កែច្នៃ និងប្រើប្រាស់ថ្ម lithium ព្រោះថា តម្លៃរបស់វាកំពុងកើនឡើងដល់ថ្នាក់សាហាវ»។

ពាក់កណ្ដាលនៃចំនួនរថយន្តអគ្គិសនីដែលក្រុមហ៊ុន Tesla ផលិត ត្រូវបានបំពាក់ថ្មផ្ទុកថាមពលប្រភេទ lithium

កាលពីចុងខែមេសា Reuters បានផ្សាយថា ពាក់កណ្ដាលនៃចំនួនរថយន្តអគ្គិសនីដែល Tesla ផលិត ត្រូវបានបំពាក់ថ្មផ្ទុកថាមពលប្រភេទ lithium ជំនួសឱ្យថ្មប្រភេទ niken និង coban ដែលលោកខាងលិចចូលចិត្តប្រើប្រាស់។

យោងតាមក្រុមអ្នកជំនាញ ការរីកចម្រើននៃបច្ចេកវិទ្យា ថ្ម lithium កាន់តែមានសុវត្ថិភាព កាត់បន្ថយហានិភ័យផ្ទុះ និងមានអាយុកាលវែង។ ឧបសគ្គធំតែមួយគត់ នោះគឺ តម្លៃរបស់ថ្ម lithium ចេះតែកើនឡើងជាបន្តបន្ទាប់ក្នុងប៉ុន្មានឆ្នាំមកនេះ។

Reuters បានឱ្យដឹងថា ប្រទេសចិន កំពុងកាន់កាប់ប្រហែល ៩០% នៃបរិមាណផលិតផលថ្ម lithium នៅទូទាំងសកលលោក។ បណ្ដាក្រុមហ៊ុនលោកខាងលិចកំពុងតែប្រឹងប្រែងសាងសង់រោងចក្រផលិតថ្មប្រភេទនេះដើម្បីចៀសវាងការពឹងផ្អែកលើ ចិន ក្នុងពេលអនាគត។ ក៏ប៉ុន្តែ បណ្ដាក្រុមហ៊ុនចិន កំពុងមានប្រៀបជាងទាក់ទងនឹងបច្ចេកវិទ្យា វត្ថុធាតុដើម និងទីផ្សារ៕

July 16, 2022

សហភាពអឺរ៉ុប អនុម័តគម្រោងថាមពលអ៊ីដ្រូសែន តម្លៃច្រើនពាន់លានអឺរ៉ូ

គម្រោងផលិតថាមពលអ៊ីដ្រូសែន ថ្មផ្ទុកថាមពល និងឃ្លាំងផ្ទុកថាមពលជាដើម ទើបតែទទួលបានការអនុញ្ញាតជាផ្លូវការពី គណៈកម្មាធិការអឺរ៉ុប។

គណៈកម្មាធិការអឺរ៉ុប (EC) បានផ្ដល់ការអនុញ្ញាតសម្រាប់គម្រោងផលិតថាមពលអ៊ីដ្រូសែន តម្លៃប្រហែល ៥.៤ ពាន់លានអឺរ៉ូ (៥.៤ ពាន់លានដុល្លារអាម៉េរិក) ដែលត្រូវបានគាំទ្រ និងឧបត្ថម្ភដោយ សមាជិកសហភាពអឺរ៉ុប (EU) និងក្រុមហ៊ុនចំនួន ៣៥ ក្នុងពិភពលោក។

គម្រោងនេះត្រូវបានបង្កើតឡើងក្នុងបំណងជំរុញសមត្ថភាពប្រកួតប្រជែងក្នុងការផលិតថាមពល ហើយសេដ្ឋកិច្ចរបស់ EU ក៏ត្រូវបានរំពឹងថា នឹងទាក់ទាញបានទុនវិនិយោគពីឯកជនប្រមាណ ៨.៨ ពាន់លានអឺរ៉ូផងដែរ។

ច្រើនឆ្នាំកន្លងមកនេះ EU បាន «បើកភ្លើងខៀវ» សម្រាប់គម្រោងដែលមានការឧបត្ថម្ភរួមដើម្បីអភិវឌ្ឍប្រភេទថ្មផ្ទុកថាមពល ហេដ្ឋារចនាសម្ព័ន្ធទាក់ទងនឹងថាមពលបៃតងជាដើម ដោយបញ្ចូលវិស័យទាំងនេះទៅក្នុងបញ្ជីគម្រោងសំខាន់ដើម្បីផលប្រយោជន៍រួមរបស់ អឺរ៉ុប (IPCEI)។ បណ្ដាគម្រោងនេះក៏ទទួលបានអត្ថប្រយោជន៍ទាក់ទងនឹងបញ្ហាផ្ដល់ជំនួយរបស់រដ្ឋាភិបាល។

គម្រោងនេះគ្រប់គ្រងសកម្មភាពផលិតថាមពលអ៊ីដ្រូសែន ថ្មផ្ទុកថាមពល ឃ្លាំងផ្ទុកថាមពល ការដឹកជញ្ជូន និងចែកចាយថាមពលអ៊ីដ្រូសែន រួមនឹងផលិតផលសម្រាប់អ្នកប្រើប្រាស់ ពិសេសក្នុងវិស័យចល័តជាដើម។ល។

July 16, 2022

ឥណ្ឌូណេស៊ី ព្រមានថា ៦០% នៃបណ្ដាប្រទេសក្រីក្រ មានហានិភ័យក្ស័យធន

រដ្ឋមន្ត្រីក្រសួងហិរញ្ញវត្ថុឥណ្ឌូណេស៊ី យល់ថា ផលប៉ះពាល់នៃសង្គ្រាមរវាង រុស្ស៊ី-អ៊ុយក្រែន វិបត្តិទំនិញ និងបញ្ហាអតិផរណាទូទាំងពិភពលោកដែលកើនឡើងគឺជាមូលហេតុនាំឱ្យបំណុលត្រូវកកស្ទះ។

កាលពីថ្ងៃទី ១៥ កក្កដា រដ្ឋមន្ត្រីក្រសួងហិរញ្ញវត្ថុឥណ្ឌូណេស៊ី លោកស្រី Sri Mulyani បានព្រមានថា ប្រហែល ៦០% ក្នុងចំណោមបណ្ដាប្រទេសក្រីក្រ កំពុងប្រឈមនឹងហានិភ័យធ្លាក់ទៅក្នុងស្ថានភាពក្ស័យធន ក្នុងគ្រាដែលអតិផរណាកើនឡើងខ្ពស់ និងបណ្ដាញផ្គត់ផ្គង់ស្បៀងទូទាំងសកលលោកត្រូវដាច់។

ប្រសាសន៍របស់ រដ្ឋមន្ត្រីក្រសួងហិរញ្ញវត្ថុឥណ្ឌូណេស៊ី ត្រូវបានលើកឡើងនៅក្នុងពិធីបើកមហាសន្និបាតរដ្ឋមន្ត្រីហិរញ្ញវត្ថុ និងទេសាភិបាលធនាគារកណ្ដាល នៃបណ្ដាប្រទេសជាសមាជិករបស់ G20 (FMCBG) លើកទីបីនៅកោះ Bali ប្រទេសឥណ្ឌូណេស៊ី។

មហាសន្និបាតរដ្ឋមន្ត្រីហិរញ្ញវត្ថុ និងទេសាភិបាលធនាគារកណ្ដាល នៃបណ្ដាប្រទេសជាសមាជិករបស់ G20 (FMCBG) លើកទីបីនៅកោះ Bali ប្រទេសឥណ្ឌូណេស៊ី។

មុននោះ ប្រធានធនាគារពិភពលោក (WB) David Malpass បានព្រមានថា ប្រទេសមួយចំនួននឹងក្ស័យធនដោយសារផលប៉ះពាល់ពីសង្គ្រាមរវាង រុស្ស៊ី-អ៊ុយក្រែន និងបញ្ហាដាច់បណ្ដាញផ្គត់ផ្គង់ទូទាំងសកលលោក។ លោក Malpass បានឱ្យដឹងថា សម្រាប់ប្រទេសជាច្រើន បញ្ហាឱនភាពសេដ្ឋកិច្ចនឹងពិបាកចៀសផុត។ សេដ្ឋកិច្ចរបស់ប្រទេសមួយដែលនឹងត្រូវបានចាត់ទុកថាឱនភាព ឬវិបត្តិ គឺនៅពេលសេដ្ឋកិច្ចប្រទេសនោះមានកំណើនអវិជ្ជមាន ក្នុង ២ ត្រីមាសបន្តបន្ទាប់។

មហាសន្និបាត FMCBG លើកទីបី មានការចូលរួមរបស់តំណាងជាង ៤០០ រូប មកពីបណ្ដាប្រទេសជាសមាជិក G20 និងបណ្ដាអង្គការអន្តរជាតិ ក្នុងនោះមានរដ្ឋមន្ត្រីហិរញ្ញវត្ថុ ១៧ រូប និង ប្រធានធនាគារកណ្ដាល ១០ រូប។

ឥណ្ឌូណេស៊ី ដែលជាប្រធានប្ដូរវេនរបស់ FMCBG ក៏បានអញ្ជើញរដ្ឋមន្ត្រីហិរញ្ញវត្ថុអ៊ុយក្រែន ចូលរួមព្រឹត្តិការណ៍នេះផងដែរ៕

July 16, 2022

Tesla អាចបញ្ចុះតម្លៃរថយន្ត បើសិនអតិផរណាត្រូវបានគ្រប់គ្រង

បន្ទាប់ពីបានដំឡើងថ្លៃដើម្បីទប់ទល់នឹងឥទ្ធិពលរបស់កូវីដ-១៩ និងវិបត្តិបណ្ដាញផ្គត់ផ្គង់ មហាសេដ្ឋី Elon Musk បានអះអាងថា ការបញ្ចុះតម្លៃរថយន្តអគ្គិសនី នឹងត្រូវបានអនុវត្ត បើសិនស្ថានភាពអតិផរណាត្រូវបានកែលម្អ។

កាលពីថ្ងៃទី ១៥ កក្កដា នាយកប្រតិបត្តិរបស់ក្រុមហ៊ុនផលិតរថយន្តអគ្គិសនី Tesla លោក Elon Musk បានប្រកាសថា អាចនឹងមានការបញ្ចុះតម្លៃរថយន្ត នៅពេលអតិផរណាត្រូវបានគ្រប់គ្រង។ នេះគឺជាការឆ្លើយតបរបស់លោក Musk នៅពេលមានគេសួរនៅលើបណ្ដាញសង្គម Twitter ថា តើ Tesla មានផែនការបញ្ចុះតម្លៃរថយន្តហើយ ឬនៅ ក្រោយពីក្រុមហ៊ុននេះសម្រេចចិត្តដំឡើងថ្លៃដើម្បីទប់ទល់នឹងឥទ្ធិពលរបស់កូវីដ-១៩ និងវិបត្តិបណ្ដាញផ្គត់ផ្គង់។

ក្នុងប៉ុន្មានខែថ្មីៗនេះ រថយន្ត Tesla ត្រូវបានដំឡើងថ្លៃជាបន្តបន្ទាប់ដើម្បីប៉ះប៉ូវលើថ្លៃវត្ថុធាតុដើមដែលកើនឡើងខ្ពស់ រួមនឹងបញ្ហាកង្វះប្រភពផ្គត់ផ្គង់ឈីបជាដើម ធ្វើឱ្យតម្លៃរថយន្ត Tesla ឡើងខ្ពស់ជាងមុនច្រើនពាន់ដុល្លារ។

បញ្ហាទំនិញឡើងថ្លៃបានបណ្ដាលឱ្យក្រុមហ៊ុនជាច្រើនត្រូវរកវិធីដោះស្រាយ ក្នុងនោះមានទាំងការកាត់បន្ថយចំណាយ ការផ្លាស់ប្ដូរគម្រោងប្រើប្រាស់កម្លាំងពលកម្ម និងការដំឡើងថ្លៃផលិតផលជាដើម។ល។

July 16, 2022

តុលាការកំពូលស្រីលង្កា ហាមការចាកចេញពីប្រទេសចំពោះសមាជិកគ្រួសារលោក Rajapaksa

តុលាការកំពូលស្រីលង្កា កាលពីថ្ងៃទី ១៥ កក្កដា បានចេញបញ្ជាបណ្ដោះអាសន្នដើម្បីរារាំងការចាកចេញពីប្រទេសចំពោះ អតីតនាយករដ្ឋមន្ត្រី Mahinda Rajapaksa និង អតីតរដ្ឋមន្ត្រីហិរញ្ញវត្ថុ Basil Rajapaksa។

បទបញ្ជាដែលមានសុពលភាពរហូតដល់ថ្ងៃទី ២៨ កក្កដានោះ តម្រូវឱ្យអតីតមន្ត្រីជាន់ខ្ពស់ខាងលើសុំច្បាប់តុលាការ បើសិនចង់ធ្វើដំណើរទៅក្រៅប្រទេស។ លោក Mahinda គឺជាបងបង្កើត ចំណែកលោក Basil គឺជាប្អូនបង្កើតរបស់ អតីតប្រធានាធិបតី Gotabaya Rajapaksa។ លោក Gotabaya Rajapaksa បានរត់ចោលប្រទេសកាលពីប៉ុន្មានថ្ងៃមុន ដោយសារត្រូវបាតុករប្រឆាំងតវ៉ាខ្លាំងក្លា និងចោទថា លោក Gotabaya Rajapaksa និងគ្រួសារ ដឹកនាំប្រទេសឱ្យធ្លាក់ទៅក្នុងវិបត្តិហិរញ្ញវត្ថុ និងសង្គម ក្រោយរដ្ឋាភិបាលប្រកាសក្ស័យធន។

ក្នុងថ្ងៃដដែល នាយករដ្ឋមន្ត្រី Ranil Wickremesinghe បានស្បថចូលកាន់តំណែងប្រធានាធិបតីស្ដីទីរបស់ ស្រីលង្កា ក្រោយពីប្រធានសភា Mahinda Yapa Abeywardena យល់ព្រមទទួលសំណើសុំលាលែងពីតំណែងរបស់លោក Gotabaya។ បក្ស SLPP ដែលកំពុងកាន់អំណាច ក្នុងថ្ងៃជាមួយគ្នានោះក៏បានជ្រើសតាំងប្រធានាធិបតីស្ដីទី Ranil Wickremesinghe សម្រាប់តំណែងប្រធានាធិបតីនៅក្នុងការបោះឆ្នោតសភានាថ្ងៃទី ២០ កក្កដាខាងមុខ។

តាមគម្រោង តំណាងរាស្ត្រស្រីលង្កាចំនួន ២២៥ នាក់ នឹងបោះឆ្នោតសម្ងាត់ដើម្បីជ្រើសរើសប្រធានាធិបតីថ្មី។ នេះគឺជាបញ្ហាដែលមិនធ្លាប់កើតមានពីមុនមក ព្រោះថា ការបោះឆ្នោតជ្រើសរើសប្រធានាធិបតីទាំង ៨ លើកកន្លង សុទ្ធតែធ្វើឡើងតាមបែបសកល៕

July 16, 2022

កែវយឹតអវកាស James Webb ចាប់ផ្ដើមស្វែងរកភាវៈរស់នៅក្នុងចក្រវាល

បណ្ដារូបភាពដំបូងៗដែលបានមកពីតេឡេស្កូបអវកាស James Webb ត្រូវបាន សហរដ្ឋអាម៉េរិក បង្ហាញកាលពីពេលថ្មីៗនេះ ប៉ុន្តែ គោលដៅចុងក្រោយរបស់កែវយឹតនេះ គឺការស្វែងរកភាវៈរស់នៅខាងក្រៅប្រព័ន្ធព្រះអាទិត្យ។

James Webb បានត្រៀមខ្លួនរួចរាល់ហើយសម្រាប់ការរុករកគោលដៅក្នុងចក្រវាល ហើយ ២ ក្នុងចំណោមបេសកកម្មដំបូងរបស់វាគឺការស្វែងរកផ្កាយដែលស្ថិតនៅឆ្ងាយៗបំផុត និងបណ្ដាពិភពដែលអាចទ្រទ្រង់ជីវិត។

ដោយមានកម្លាំងខ្លាំងជាង ១០០ ដង ធៀបនឹង Hubble កែវយឹតអវកាស James Webb អាចមើលឃើញទិដ្ឋភាពក្នុងដំណាក់កាលដំបូងៗបំផុតនៃការកកើតចក្រវាល បន្ទាប់ពីករណីផ្ទុះ Big Bang កាលពី ១៣.៨ ពាន់លានឆ្នាំមុន។ វត្ថុអវកាសដែលស្ថិតនៅកាន់តែឆ្ងាយ ពន្លឺរបស់វាក៏ត្រូវចំណាយពេលកាន់តែយូរដើម្បីមកដល់ផែនដី។ ដូច្នេះ ការសង្កេតមើលជ្រៅទៅក្នុងចក្រវាល គឺជាការសង្កេតមើលអតីតកាល។ នោះគឺជាមូលហេតុដែល James Webb ត្រូវបានគេហៅថា «ឧបករណ៍ឆ្លុះមើលអតីតកាល»។

បច្ចុប្បន្ន ក្រុមអ្នកវិទ្យាសាស្ត្របានដើរត្រលប់ទៅកាន់អតីតកាលបាន ៩៧% ហើយ ធៀបនឹងករណីផ្ទុះ Big Bang ប៉ុន្តែ ពួកគេមើលឃើញតែចំណុចក្រហមដ៏តូចៗ នៅពេលសង្កេតទៅកាន់បណ្ដាកាឡាក់ស៊ីដែលនៅសែនឆ្ងាយ។

តារាវិទូ Dan Coe មកពីវិទ្យាស្ថានវិទ្យាសាស្ត្រតេឡេស្កូបអវកាស បានឱ្យដឹងថា «យើងនឹងមើលត្រលប់ទៅកាន់ពេលវេលាដំបូងៗបំផុត ដើម្បីសង្កេតទៅលើការកកើតរបស់កាឡាក់ស៊ីដំបូងៗក្នុងប្រវត្តិសាស្ត្រចក្រវាល»។

តារាវិទូ Dan Coe ឆាប់ៗនេះនឹងអនុវត្តគម្រោងចំនួន ២ ជាមួយ James Webb នោះគឺ ការសង្កេតមើលកាឡាក់ស៊ីមួយក្នុងចំណោមកាឡាក់ស៊ីនៅឆ្ងាយជាងគេបង្អស់ ដែលត្រូវបានដាក់ឈ្មោះថា MACS0647-JD ដែលលោកបានរកឃើញកាលពីឆ្នាំ ២០១៣ និងផ្កាយនៅឆ្ងាយបំផុតគឺ Earendel ដែលត្រូវបានរកឃើញកាលពីខែមីនាឆ្នាំនេះ៕

ផ្កាយនៅឆ្ងាយបំផុតគឺ Earendel ត្រូវបានថតដោយកែវយឹតអវកាស Hubble

July 15, 2022

នាយករដ្ឋមន្ត្រីស្រីលង្កា ស្បថចូលកាន់តំណែងប្រធានាធិបតី ក្រោយលោក Rajapaksa រត់ចោលស្រុក

នាយករដ្ឋមន្ត្រី Wickremesinghe ស្បថចូលកាន់តំណែងប្រធានាធិបតីស្ដីទី ជំនួសលោក Gotabaya Rajapaksa ដែលបានរត់ចោលប្រទេសដោយសារវិបត្តិសេដ្ឋកិច្ច និងនយោបាយ។

ពិធីស្បថចូលកាន់តំណែងរបស់លោក Ranil Wickremesinghe អាយុ ៧៣ ឆ្នាំ ត្រូវបានធ្វើឡើងនៅថ្ងៃនេះ ក្រោមវត្តមានរបស់ប្រធានតុលាការ Jayantha Jayasuriya។ ការនាយករដ្ឋមន្ត្រី Wickremesinghe ត្រូវឡើងកាន់អំណាចជំនួសបណ្ដោះអាសន្ន បន្ទាប់ពីប្រធានាធិបតី Rajapaksa បានរត់ចោលប្រទេសស្រុកនេះ គឺធ្វើឡើងទៅតាមរដ្ឋធម្មនុញ្ញរបស់ ស្រីលង្កា។

លោក Wickremesinghe នឹងកាន់តំណែងនេះរហូតដល់សភារបស់ ស្រីលង្កា បោះឆ្នោតជ្រើសតាំងប្រធានាធិបតីថ្មីនៅថ្ងៃទី ២០ កក្កដាខាងមុខ។

ប្រធានាធិបតីស្រីលង្កា លោក Gotabaya Rajapaksa បានផ្ញើសារអេឡិកត្រូនិកលាលែងពីតំណែងទៅកាន់ប្រធានសភាកាលពីថ្ងៃទី ១៤ កក្កដា ប៉ុន្មានម៉ោងប៉ុណ្ណោះបន្ទាប់ពីលោកបានធ្វើដំណើរដល់ សិង្ហបុរី។

ប្រធានសភាស្រីលង្កា មុននោះបានឱ្យដឹងថា ពាក្យសុំលាលែងពីតំណែងរបស់លោក Gotabaya Rajapaksa ត្រូវបានយល់ព្រម បន្ទាប់ពីស្ថាប័នយុត្តិធម៌ពិនិត្យភាពស្របច្បាប់រួចរាល់។

នៅ ស្រីលង្កា បាតុករបានចោទលោក Rajapaksa និងត្រកូលរបស់លោកថា បានប្រមូលយកថវិកាជាតិជាច្រើនឆ្នាំមកហើយ និងអនុវត្តគោលនយោបាយសេដ្ឋកិច្ចមិនបានល្អ ធ្វើឱ្យប្រទេសជាតិធ្លាក់ទៅក្នុងភាពហិនហោច។

លោក Rajapaksa បានច្រានចោលការចោទប្រកាន់មួយចំនួន ប៉ុន្តែបានទទួលស្គាល់ថា គោលនយោបាយខ្លះរបស់លោក បានរួមចំណែកបង្កឱ្យមានវិបត្តិ៕

July 15, 2022

ក្រុមហ៊ុនផលិតរថយន្តអគ្គិសនីរបស់ វៀតណាម បើកមជ្ឈមណ្ឌលលក់ ៦ កន្លែង ដំណាលគ្នានៅ សហរដ្ឋអាម៉េរិក

ក្នុងឆ្នាំនេះ VinFast នឹងបន្តបើកមជ្ឈមណ្ឌលលក់រាប់សិនកន្លែងទៀតនៅក្នុងរដ្ឋ California និងកំពុងស្រាវជ្រាវដើម្បីបន្តបើកនៅក្នុងរដ្ឋដទៃទៀតនៅ សហរដ្ឋអាម៉េរិក។

ក្នុងថ្ងៃទី ១៥ កក្កដា (ម៉ោងនៅ កម្ពុជា) ក្រុមហ៊ុន VinFast បានសម្ពោធបើកមជ្ឈមណ្ឌលលក់ VinFast Store ចំនួន ៦ កន្លែងដំបូងក្នុងពេលដំណាលគ្នា នៅក្នុងរដ្ឋ California សហរដ្ឋអាម៉េរិក។

ក្នុងឆ្នាំ ២០២២ VinFast នឹងបន្តបើកមជ្ឈមណ្ឌល VinFast Store ជាង ៣០ កន្លែងទៀតនៅក្នុងរដ្ឋ California និងកំពុងស្រាវជ្រាវដើម្បីបន្តបើកនៅក្នុងរដ្ឋដទៃទៀតនៅ សហរដ្ឋអាម៉េរិក។

VinFast Store មិនត្រឹមតែជាកន្លែងដាក់តាំង និងលក់រថយន្តអគ្គិសនីគុណភាពលំដាប់ខ្ពស់នោះទេ តែក៏ជាកន្លែងដែលអតិថិជនអាចទទួលបានបទពិសេសធ៍ក្នុងការប្រើប្រាស់សេវាកម្មរបស់ក្រុមហ៊ុន VinFast ហើយពួកវាមានទីតាំងនៅក្នុងតំបន់កណ្ដាលក្រុង។

នេះគឺជាយុទ្ធសាស្ត្រទីផ្សាររបស់ក្រុមហ៊ុន VinFast ក្នុងការពង្រីកបណ្ដាញចែកចាយរបស់ខ្លួន ដើម្បីកសាងទំនាក់ទំនងជាមួយអតិថិជន ធានានូវភាពស្និទ្ធស្នាល ទំនុកចិត្តក្នុងពេលប្រើប្រាស់រថយន្តរបស់ក្រុមហ៊ុននេះ៕

July 15, 2022

កំណែពេញលេញនៃយន្តហោះបែបឯកជនតម្លៃ ១៥០,០០០ ដុល្លារ ចាប់ផ្ដើមហោះហើរសាកល្បង

(អ៊ីស្រាអែល)-កំណែគំរូ Air One ដែលជាយន្តហោះមានកង្ហារចំនួន ៨ គ្រឿង និងអាចហោះហើរបាន ២៥០ គីឡូម៉ែត្រ/ម៉ោង បានសាកល្បងហោះហើរបណ្ដែតខ្លួនជាច្រើនលើកដោយជោគជ័យ។

កំណែគំរូពេញលេញដំបូងរបស់ Air One ដែលហោះឡើង និងចុះចតដោយត្រង់ ដំណើរការដោយអគ្គិសនី បានចាប់ផ្ដើមធ្វើការសាកល្បង នេះបើតាម New Atlas ចុះផ្សាយកាលពីថ្ងៃទី ១៣ កក្កដា។ Air One ដែលត្រូវបានអភិវឌ្ឍដោយក្រុមហ៊ុនធុរកិច្ចថ្មី Israel Air របស់ អ៊ីស្រាអែល គឺជាយន្តហោះ ២ កៅអី មានមនុស្សបើកបរ មានតម្លៃប្រហែល ១៥០,០០០ ដុល្លារអាម៉េរិក។ មុននោះ ក្រុមហ៊ុននេះបានសាកល្បងការហោះហើរចំពោះកំណែដែលមានទំហំតូចជាងនេះ។

Air One មានស្លាបវែងចំនួន ២ និងមានបំពាក់កង្ហារតូចៗចំនួន ៨ គ្រឿង។ ដោយពុំមានប្រព័ន្ធរុញច្រានទៅមុខ យន្តហោះនេះត្រូវទេរខ្លួនដូចទៅនឹងយន្តហោះដែលមានកង្ហារច្រើនដទៃទៀត។ Air One អាចហោះបានលឿនបំផុតត្រឹម ២៥០ គីឡូម៉ែត្រ/ម៉ោង និងហោះធម្មតាត្រឹម ១៦០ គីឡូម៉ែត្រ/ម៉ោង។ កម្លាំងអតិបរមារបស់យន្តហោះនេះគឺ ៧៧១ សេះ ខណៈដែលផ្ទុកទម្ងន់បាន ២៥០ គីឡូក្រាម និងហោះបាន ១ ម៉ោង បន្ទាប់ពីបញ្ចូលថាមពលពេញ ហើយហោះបានរយៈចម្ងាយប្រហែល ១៧៧ គីឡូម៉ែត្រ។

កំណែពេញលេញរបស់ Air One ដែលមានទម្ងន់ ៨៦៨ គីឡូក្រាម បានហោះហើរសាកល្បងដំបូងនៅលើវាលស្រែមួយកន្លែងនៅ Megiddo ភាគខាងជើងប្រទេសអ៊ីស្រាអែល កាលពីថ្ងៃទី ២១ មិថុនា។ នេះគឺជាការសាកល្បងហោះហើរបណ្ដែតខ្លួនដោយមានចងខ្សែ ហើយ Air One ក៏បានសាកល្បងហោះហើរបែបនេះជាច្រើនដងមកហើយក្នុងប៉ុន្មានសប្ដាហ៍ចុងក្រោយនេះ។

ដោយមានតម្លៃ ១៥០,០០០ ដុល្លារ Air One ថ្លៃជាងប្រហែលពាក់កណ្ដាល ធៀបនឹងយន្តហោះ Jetson One របស់ ក្រុមហ៊ុនស៊ុយអែត Jetson។ ប៉ុន្តែ Air One មានកៅអីចំនួន ២ ចំណែក Jetson One មានតែ ១ កៅអី។ Air One ហោះបានឆ្ងាយជាង ៣ ដង ធៀបនឹង Jetson One។

ក្រុមហ៊ុន Israel Air បានឱ្យដឹងថា ពួកគេលក់ Air One បានជាង ១៥០ គ្រឿង ហើយគ្រោងនឹងប្រគល់ដល់ដៃអតិថិជនដំបូងៗនៅឆ្នាំ ២០២៤៕

July 15, 2022

កងការពារអតីតនាយករដ្ឋមន្ត្រីជប៉ុន ត្រូវគេរំខានការផ្ដោតអារម្មណ៍ មុនពេលឃាតកម្មកើតឡើង

ក្រុមមន្ត្រីស៊ើបអង្កេតបានឱ្យដឹងថា ប៉ូលិសមួយរូបដែលការពារសុវត្ថិភាពជូនលោក ស្ហ៊ីនហ្សូ អាបេ ត្រូវបានរំខានដោយអ្នកដើរឆ្លងផ្លូវ និងមិនបានឃើញជនសង្ស័យដែលកំពុងចូលទៅក្បែរលោក អាបេ។

កាលពីថ្ងៃទី ១៤ កក្កដា ក្រុមមន្ត្រីស៊ើបអង្កេតជប៉ុន បានឱ្យដឹងថា ប៉ូលិស ៤ នាក់ រួមមានមន្ត្រីពិសេសម្នាក់ ដែលត្រូវបានបញ្ជូនពី ស្នងការដ្ឋាននគរបាលរាជធានីតូក្យូ បានការពារក្បែរ អតីតនាយករដ្ឋមន្ត្រី អាបេ នៅពេលលោកថ្លែងការណ៍នៅក្នុងទីក្រុង Nara នៃខេត្ត Nara កាលពីថ្ងៃទី ៨ កក្កដា។

ម្នាក់ក្នុងចំណោមប៉ូលិស ៤ នាក់ ទទួលខុសត្រូវសុវត្ថិភាពពីខាងក្រោយលោក អាបេ។ ប៉ុន្តែ ភ្លាមៗមុនពេលហេតុការណ៍កើតឡើង មន្ត្រីរូបនេះត្រូវបានរំខានដោយបុរសម្នាក់ដែលរុញយានដឹកទំនិញឆ្លងកាត់ខាងក្រោយលោក អាបេ បណ្ដាលឱ្យមន្ត្រីរូបនេះ មើលមិនឃើញជនសង្ស័យកំពុងចូលមកជិតលោក អាបេ តាមផ្លូវបញ្ឆិតពីខាងក្រោយ។

មន្ត្រីប៉ូលិសម្នាក់ទៀត ទទួលខុសត្រូវលើចិញ្ចើមផ្លូវ ជាទីដែលជនសង្ស័យឈរពេលដំបូង។ មន្ត្រីរូបនេះទទួលភារកិច្ចឃ្លាំមើល តាមដានទីតាំងទាំងមូល ប៉ុន្តែបាននិយាយថា មិនឃើញជនសង្ស័យឈានជើងចុះពីចិញ្ចើមផ្លូវ។

ស្ថាប័នប៉ូលិសជាតិកំពុងតែស្រាវជ្រាវ និងកំណត់ចំណុចខ្វះចន្លោះនៅក្នុងការដាក់កម្លាំងការពារសម្រាប់លោក អាបេ ក្នុងនោះមានដូចជា បញ្ហាខ្វះបុគ្គលិកសន្តិសុខនៅពីក្រោយលោកជាដើម។ ស្ថាប័ននេះមានគម្រោងកែប្រែវិធានការសន្តិសុខសម្រាប់ក្រុមមន្ត្រីរដ្ឋាភិបាល ដោយយោងទៅតាមលទ្ធផលនៃការស៊ើបអង្កេតករណីឃាតកម្មលើលោក អាបេ។

អតីតនាយករដ្ឋមន្ត្រីជប៉ុន លោក ស្ហ៊ីហ្សូ អាបេ វ័យ ៦៧ ឆ្នាំ ត្រូវបានជនសង្ស័យបាញ់ពីក្រោយនៅពេលលោកកំពុងថ្លែងឃោសនារកសំឡេងឆ្នោតនៅក្នុងទីក្រុង Nara នៃខេត្ត Nara។ នៅពេលបាញ់ប្រហារ ជនសង្ស័យ Yamagami ស្ថិតនៅចម្ងាយប្រហែល ៥ ម៉ែត្រ ពីលោក អាបេ។

លោក អាបេ ត្រូវបានបញ្ជូនទៅកាន់មន្ទីរពេទ្យតាមឧទ្ធម្ភាគចក្រក្នុងស្ថានភាពបាត់បង់ស្មារតី។ វេជ្ជបណ្ឌិត ២០ នាក់ បានចូលរួមជួយសង្គ្រោះលោក Abe ប៉ុន្តែមិនអាចឃាត់ឈាមបាន។ អតីតនាយករដ្ឋមន្ត្រីជប៉ុន ត្រូវបានប្រកាសថា បានទទួលមរណភាពដោយសារបាត់បង់ឈាមច្រើនពេក៕

July 15, 2022

Author: សឿន សំណាង