សឿន សំណាង - La Reine Media

ប្រទេសបារាំង ៖ ផ្ទុះធំក្នុងរោងចក្រឧស្សាហកម្ម មនុស្សរាប់សិបនាក់រងផលប៉ះពាល់

រោងចក្រឧស្សាហកម្មដែលកើតមានករណីផ្ទុះនេះ គឺជាប្រភេទដែលត្រូវបានបញ្ចូលទៅក្នុងបញ្ជីឈ្មោះស្ដីពីបណ្ដារោងចក្រដែល «មានហានិភ័យបង្កមហន្តរាយ Seveso កម្រិតខ្ពស់»។

កាលពីរសៀលថ្ងៃទី ០៣ សីហា នៅឯរោងចក្រឧស្សាហកម្មមួយនៅក្នុងទីក្រុង Bergerac ភាគអាគ្នេយ៍នៃ ប្រទេសបារាំង បានកើតមានហេតុការណ៍ផ្ទុះធំមួយ បណ្ដាលឱ្យមនុស្ស ៨ នាក់រងរបួស ក្នុងនោះមានម្នាក់ស្ថិតក្នុងស្ថានភាពធ្ងន់ធ្ងរ។

យោងតាមក្រុមមន្ត្រីក្នុងតំបន់ ករណីផ្ទុះនៅឯរោងចក្រ Manuco ខាងលើនេះ ក៏បានបណ្ដាលឱ្យមនុស្ស ៣៥ នាក់ផ្សេងទៀត មានអាការពុលដោយសារផ្សែងគីមី។ បុគ្គលិកពន្លត់អគ្គិភ័យ និងប៉ូលិសចំនួន ៨០ នាក់ និងឧទ្ធម្ភាគចក្រ ២ គ្រឿង រួមនឹងរថយន្តពន្លត់អគ្គិភ័យច្រើនគ្រឿង ត្រូវបានបញ្ជូនទៅកាន់កន្លែងកើតហេតុ។

រោងចក្រ Manuco ជាកម្មសិទ្ធិរបស់ក្រុមហ៊ុន Eurenco ដែលរកស៊ីក្នុងវិស័យចាត់ចែង ផលិត ប្រើប្រាស់ និងរក្សាទុកវត្ថុធាតុគីមីគ្រោះថ្នាក់។ រោងចក្រនេះត្រូវបានបញ្ចូលទៅក្នុងបញ្ជីឈ្មោះស្ដីពីបណ្ដារោងចក្រដែល «មានហានិភ័យបង្កមហន្តរាយ Seveso កម្រិតខ្ពស់»។

គ្រោះមហន្តរាយ Seveso គឺជាគ្រោះថ្នាក់ដែលកើតឡើងនៅក្នុងរោងចក្រគីមី នៅ ប្រទេសអ៊ីតាលី កាលពីឆ្នាំ ១៩៧៦ ដែលបណ្ដាលឱ្យគីមីពុល ៦ តោន ត្រូវបែកធ្លាយ និងភាយទៅក្នុងបរិស្ថាន បង្កផលប៉ះពាល់យ៉ាងធ្ងន់ធ្ងរដល់សុខភាពប្រជាជនក្នុងតំបន់។

នៅ ប្រទេសបារាំង បច្ចុប្បន្នមានរោងចក្រឧស្សាហកម្មចំនួន ៧០៥ កន្លែង ស្ថិតក្នុង «ហានិភ័យបង្កមហន្តរាយ Seveso កម្រិតខ្ពស់» ខណៈដែលរោងចក្រ ៦០៧ កន្លែងផ្សេងទៀត ស្ថិតក្នុងហានិភ័យទាប។

កាលពីឆ្នាំ ២០១៩ ករណីអគ្គិភ័យមួយបានកើតឡើងនៅឯរោងចក្រ Lubrizol (ស្ថិតក្នុងប្រភេទ Seveso ខ្ពស់) នៅទីក្រុង Rouen ប្រទេសបារាំង បានបណ្ដាលឱ្យមនុស្សច្រើននាក់រងរបួស ក្នុងនោះមាន ៨ នាក់ ត្រូវចូលពេទ្យ៕

August 4, 2022

ប្រេងរ៉ែពិភពលោកធ្លាក់ថ្លៃភ្លាមៗ បន្ទាប់ពី OPEC+ សម្រេចចិត្តបង្កើនការផលិត

កាលពីថ្ងៃទី ០៣ សីហា តម្លៃប្រេងពិភពលោកបានធ្លាក់ថ្លៃ ក្រោយពីទិន្នន័យបានបង្ហាញថា បរិមាណប្រេងឆៅដែលសល់ក្នុងឃ្លាំងរបស់ សហរដ្ឋអាម៉េរិក កើនឡើង និងអង្គការនៃក្រុមប្រទេសផលិតប្រេងរ៉ែ និងដៃគូសហការ (OPEC+) បានឯកភាពគ្នា បង្កើនបរិមាណប្រេងក្នុងខែកញ្ញាខាងមុខ។

ជាក់ស្ដែង ប្រេងឆៅ WTI ប្រគល់ក្នុងខែកញ្ញា បានធ្លាក់ថ្លៃ ៣.៧៦ ដុល្លារ (៤%) មកនៅត្រឹម ៩០.៦៦ ដុល្លារ/ធុង នៅលើផ្សារជួញដូរទំនិញ New York។ តម្លៃប្រេងឆៅ Brent ប្រគល់ក្នុងខែតុលា ក៏ថយចុះ ៣.៧៦ ដុល្លារ (៣.៧%) មកនៅត្រឹម ៩៦.៧៨ ដុល្លារ/ធុង នៅក្នុងផ្សារអន្តរទ្វីប។

ប្រេងធ្លាក់ថ្លៃ បន្ទាប់ពី រដ្ឋបាលព័ត៌មានថាមពលអាម៉េរិក (EIA) បានឱ្យដឹងថា បរិមាណប្រេងឆៅដែលសល់នៅក្នុងឃ្លាំងរបស់ប្រទេសនេះ បានកើនឡើង ៤.៥ លានធុងនៅក្នុងសប្ដាហ៍ដែលបញ្ចប់កាលពីថ្ងៃទី ២៩ កក្កដា។ ទិន្នន័យរបស់ EIA ក៏បានបង្ហាញថា បរិមាណប្រេងសាំងដែលសល់សរុបនៅក្នុងសប្ដាហ៍កន្លងរបស់ សហរដ្ឋអាម៉េរិក បានកើន ២០០,០០០ ធុង។

នៅក្នុងកិច្ចប្រជុំចុងក្រោយបំផុត អង្គការ OPEC+ បានសម្រេចចិត្តបង្កើនការផលិតប្រេងបន្ថែម ១០០,០០០ ធុង/ថ្ងៃ សម្រាប់ខែកញ្ញា ២០២២ ដើម្បីជួយទប់ទល់នឹងតម្លៃប្រេងដែលចេះតែកើនឡើងពីមួយថ្ងៃទៅមួយថ្ងៃ៕

August 4, 2022

សភាជាន់ខ្ពស់សហរដ្ឋអាម៉េរិក អនុម័តបញ្ចូល ហ្វាំងឡង់ និង ស៊ុយអែត ជាសមាជិកណាតូ

សភាជាន់ខ្ពស់របស់ សហរដ្ឋអាម៉រិក អនុម័តឱ្យ ហ្វាំងឡង់ និង ស៊ុយអែត ចូលជាសមាជិករបស់ ណាតូ ព្រមទាំងគាំទ្រឱ្យពង្រីកសម្ព័ន្ធមិត្តយោធានេះ។

កាលពីថ្ងៃទី ០៣ សីហា សភាជាន់ខ្ពស់អាម៉េរិក បានអនុម័តលើពាក្យសុំចូលជាសមាជិកណាតូ របស់ ប្រទេសហ្វាំងឡង់ និង ប្រទេសស៊ុយអែត ក្នុងនោះមានសន្លឹកឆ្នោតគាំទ្រចំនួន ៩៥ សំឡេង និងប្រឆាំង ១ សំឡេង។

សំឡេងឆ្នោតប្រឆាំងតែមួយគត់នេះគឺរបស់ តំណាងរាស្ត្រ Josh Hawley មកពីបក្សសាធារណរដ្ឋ ជាអ្នកដែលយល់ថា សហរដ្ឋអាម៉េរិក ត្រូវការការផ្ដោតទៅលើឧបសគ្គពី ប្រទេសចិន ជាជាង អឺរ៉ុប។ ចំណែកតំណាងរាស្ត្រ ១ រូបដែលបានបោះឆ្នោតអនុបវាទ គឺ Rand Paul មកពីបក្សសាធារណរដ្ឋ។

ប្រធានាធិបតីអាម៉េរិក ចូ បៃដិន បានឱ្យដឹងថា កំពុងទន្ទឹងរង់ចាំចុះហត្ថលេខាអនុម័តលើឯកសារ ដែលជាការសម្រេចមួយនាំឱ្យ សហរដ្ឋអាម៉េរិក ក្លាយជាសមាជិកទី ២៣ ដែលយល់ព្រមឱ្យ ស៊ុយអែត និង ហ្វាំងឡង់ ចូល «រួមរស់» ជាមួយ ណាតូ នៅក្នុងចំណោមសមាជិកទាំង ៣០ ប្រទេសរបស់សម្ព័ន្ធយោធានេះ។

ប្រទេសហ្វាំងឡង់ និង ស៊ុយអែត នឹងក្លាយជាសមាជិក បន្ទាប់ពីប្រទេសទាំងអស់នៅក្នុង អង្គការណាតូ បានបោះឆ្នោតអនុម័តយល់ព្រម។ ប្រទេសដែលមិនទាន់អនុម័តលើពាក្យស្នើសុំនេះ រួមមាន សាធារណរដ្ឋឆែក, ប្រទេសក្រិក, ហុងគ្រី, ព័រទុយហ្កាល, ស្លូវ៉ាគី, អេស្ប៉ាញ និងតួកគឺ៕

August 4, 2022

ប្រព័ន្ធផ្លូវទម្រង់លូរបស់ TransPod អាចឱ្យរថភ្លើងធ្វើដំណើរក្នុងល្បឿន ១,២០០ គីឡូម៉ែត្រ/ម៉ោង

(កាណាដា)-ក្រុមហ៊ុន TransPod បានឱ្យដឹងថា ពួកគេចាប់ផ្ដើមការសាងសង់ប្រព័ន្ធផ្លូវដែលមានរូបរាងជាបំពង់លូ អាចឱ្យរថភ្លើងដឹកអ្នកដំណើរពី Calgary ទៅកាន់ Edmonton ដែលមានចម្ងាយផ្លូវ ៣០០ គីឡូម៉ែត្រ ប្រើប្រាស់ពីតែ ៤៥ នាទី។

ប្រព័ន្ធដឹកជញ្ជូនល្បឿនមហាលឿន TransPod FluxJet ដែលត្រូវបានបង្ហាញកាលពីសប្ដាហ៍កន្លងនៅទីក្រុងតូរ៉ុនតូ ប្រទេសកាណដា ត្រូវបានគេរំពឹងថា នឹងប្រើប្រាស់បច្ចេកវិទ្យាទំនើបចុងក្រោយទាក់ទងនឹងកម្លាំងរុញច្រាន ថាមពលស្អាត និងបច្ចេកវិទ្យាបញ្ជូនអគ្គិសនីមិនប្រើខ្សែជាដើម។ ប្រព័ន្ធនេះនឹងកាត់បន្ថយកម្លាំងកកឹតរបស់ខ្យល់ ដោយសារតែរថភ្លើងនឹងបរនៅក្នុងបំពង់ នៅក្នុងការដឹកជញ្ជូនអ្នកដំណើរ និងទំនិញនៅក្នុងប្រទេស ជាមួយនឹងល្បឿនមហាលឿន។

ដូចទៅនឹងគម្រោងដទៃដូចជា Hyperloop, Hyperloop TT, Hyperloop One, ET3, HyperPort ជាដើម គម្រោង FluxJet នឹងលុបបំបាត់ស្ថានភាពកកឹតដែលកើតឡើងដោយទម្ងន់ ព្រោះតែវាប្រើប្រាស់បច្ចេកវិទ្យា Maglev (Magnetic levitation)។ ផ្នែកនានាដែលប៉ះនឹងដីរបស់រថភ្លើង នឹងត្រូវបានដកចូលខ្លីនៅពេលរថភ្លើងធ្វើដំណើរក្នុងល្បឿនយ៉ាងតិច ៣០០ គីឡូម៉ែត្រ/ម៉ោង និងអាចបង្កើនល្បឿនដល់ ១,០០០ គីឡូម៉ែត្រ/ម៉ោង ឬលឿនបំផុតត្រឹម ១,២០០ ម៉ែត្រ/ម៉ោង។

ក្រុមហ៊ុន TransPod មិនបានបង្ហើបឱ្យដឹងច្រើនអំពីបច្ចេកវិទ្យាសំខាន់ៗ ប៉ុន្តែ ពួកគេនឹងប្រើប្រាស់ veillance flux ដែលជាប្រព័ន្ធកំណត់ទិស អនុញ្ញាតឱ្យស្កេនផ្លូវក្នុងប្រព័ន្ធបំពង់ និងសម្រួលទីតាំងរបស់រថភ្លើង។ រថភ្លើងមួយខ្សែៗ មានប្រវែង ២៥ ម៉ែត្រ អាចដាក់មនុស្សបាន ៥៤ នាក់ និងបំពាក់ម៉ាស៊ីនរុញច្រានចំនួន ៤ គ្រឿង។ បន្ទប់ទាំងនេះក៏មានបំពាក់ថ្មផ្ទុកថាមពលអគ្គិសនី និងអាចទាញយកថាមពលអគ្គិសនីដោយមិនប្រើខ្សែពីផ្លូវប្រភេទបំពង់នេះ។

TransPod ឱ្យដឹងថា ក្រុមហ៊ុនទទួលបានប្រាក់វិនិយោគ ៥៥០ លានដុល្លារអាម៉េរិក និងកំពុងឈានដល់ដំណាក់កាលបន្ទាប់របស់គម្រោង គឺការបើកការដ្ឋានសាងសង់ផ្លូវប្រវែងជាង ៣០០ គីឡូម៉ែត្រ រវាង Calgary និង Edmonton។

ប្រព័ន្ធផ្លូវទម្រង់បំពង់លូតម្លៃ ១៨ ពាន់លានដុល្លារនេះ នឹងជួយឱ្យពេលវេលានៃការធ្វើដំណើររវាងទីក្រុង Calgary និង Edmonton ចុះមកនៅត្រឹម ៤៥ នាទី ជំនួសឱ្យជាង ៣ ម៉ោង ដែលត្រូវចំណាយនាបច្ចុប្បន្ន។ ផ្លូវនេះក៏ជួយកាត់បន្ថយបាន ១/៣ នៃចំនួនយានយន្តដែលធ្វើចរាចរណ៍លើដងផ្លូវល្បឿនលឿនពីទីក្រុង Calgary ទៅកាន់ទីក្រុង Edmonton។ ហើយជាងនេះ វាក៏នឹងកាត់បន្ថយឧស្ម័នកាបូនបាន ៦៣៦,០០០ តោន ជារៀងរាល់ឆ្នាំផងដែរ ដោយសារតែប្រើប្រាស់ថាមពលស្អាត៕

August 3, 2022

ដែនដីដែលមានកូនភ្នំជាង ១,៧០០ នៅតំបន់អាស៊ីអាគ្នេយ៍ (វីដេអូ)

ocolate Hills គឺជាតំបន់អច្ឆរិយធម្មជាតិដែលមានអាយុកាលរាប់លានឆ្នាំមកហើយ និងត្រូវបានស្នើដាក់បញ្ចូលទៅក្នុងបញ្ជីបេតិកភណ្ឌពិភពលោករបស់ UNESCO។

បណ្ដាកូនភ្នំដែលស្ថិតនៅជាក្រុម និងលាតសន្ធឹងដាច់កន្ទុយភ្នែកនេះ ត្រូវបានគេហៅថា ប្រជុំកូនភ្នំសូកូឡា (Chocolate Hills)។ ឈ្មោះនេះមានប្រភពចេញពីពណ៌ស្មៅដែលប្ដូរពីបៃតងទៅជាប្រផេះនៅក្នុងរដូវក្ដៅ។

ប្រជុំកូនភ្នំសូកូឡា មានកូនភ្នំសរុបចំនួន ១,៧៧៦ និងមានទ្រង់ទ្រាយស្ទើរតែដូចគ្នាទាំងស្រុង ស្ថិតនៅលើផ្ទៃដីប្រមាណ ៥០ គីឡូម៉ែត្រក្រឡា។ តំបន់ភ្នំអច្ឆរិយនេះស្ថិតនៅលើកោះ Bohol របស់ ប្រទេសហ្វ៊ីលីពីន។

យោងតាមការស្រាវជ្រាវផ្នែកវិទ្យាសាស្ត្រ ប្រភពដែលនាំឱ្យកកើតជាប្រជុំកូនភ្នំនេះគឺដោយសារសមុទ្រ។ ប្រមាណ ២ លានឆ្នាំមុន ទឹកសមុទ្របានគ្របដណ្ដប់តំបន់ Bohol ទាំងមូល ប៉ុន្តែ ដោយសារតែការផ្លាស់ទីរបស់ស្រទាប់តិចតូនិច (Tectonic Plate) នៃសម្បកផែនដី ទឹកសមុទ្រក៏បាននាចទៅអស់ បន្សល់ទុកនូវបណ្ដុំនៃសិលាកម្ទេចកំណ (sedimentary rock), ផ្កាថ្ម និងសំបកគ្រំ គ្រែងជាដើម។ល។

ក្រោយរយៈពេលច្រើនសតវត្សរ៍ ឬយូរជាងនេះ ធម្មជាតិក៏បានធ្វើឱ្យបណ្ដុំវត្ថុធាតុទាំងឡាយខាងលើ ក្លាយជាកូនភ្នំដែលមានសណ្ឋានដូចទៅនឹងរូបរាងដួន និងមានកម្ពស់ចាប់ពី ៣០ ទៅ ៥០ ម៉ែត្រ។

Chocolate Hills ត្រូវបានប្រកាសចាត់ទុកជា បេតិកភណ្ឌភូមិសាស្ត្រជាតិលំដាប់ទីបីរបស់ ប្រទេសហ្វ៊ីលីពីន និងត្រូវបានស្នើដាក់បញ្ចូលទៅក្នុងបញ្ជីបេតិកភណ្ឌពិភពលោករបស់អង្គការ UNESCO ផងដែរ៕

August 3, 2022

ក្រុមហ៊ុនអាម៉េរិក វិនិយោគ ១៣ ពាន់លានដុល្លារ សម្រាប់គម្រោងផលិតអគ្គិសនីដើរដោយថាមពលខ្យល់នៅ វៀតណាម

បន្ទាប់ពីគម្រោងថាមពល Mong Duong 2 និងរោងចក្រអគ្គិសនីដើរដោយឧស្ម័ន Son My 2 សាជីវកម្ម AES របស់ សហរដ្ឋអាម៉េរិក បន្តជំរុញការវិនិយោគលើវិស័យថាមពលនៅ វៀតណាម ជាមួយនឹងផែនការបណ្ដាក់ទុន ១៣ ពាន់លានដុល្លារសម្រាប់គម្រោងផលិតអគ្គិសនីដើរដោយថាមពលខ្យល់នៅភាគអាគ្នេយ៍ប្រទេសនេះ។

ក្នុងក្របខណ្ឌនៃកិច្ចពិភាក្សាប្រចាំឆ្នាំស្ដីពីសន្តិសុខថាមពលរវាង សហរដ្ឋអាម៉េរិក និង វៀតណាម នាពេលថ្មីៗនេះ ក្រុមហ៊ុន AES បានបង្ហាញអំពីបំណងអនុវត្តគម្រោងអគ្គិសនីដើរដោយថាមពលខ្យល់នៅលើលម្ហសមុទ្រនៃខេត្ត Binh Thuan ប្រទេសវៀតណាម ជាមួយនឹងទុនវិនិយោគ ១៣ ពាន់លានដុល្លារ និងអាចផលិតអគ្គិសនីបាន ៤,០០០ MW។

សាជីវកម្ម AES របស់ សហរដ្ឋអាម៉េរិក បាន និងកំពុងវិនិយោគលើវិស័យថាមពលមួយចំនួននៅ វៀតណាម មានដូចជា រោងចក្រអគ្គិសនី BOT Mong Duong 2 នៅភាគឦសាននៃប្រទេសនេះ ដោយប្រើប្រាស់ទុនជាង ២ ពាន់លានដុល្លារ។

គម្រោង Mong Duong 2 ត្រូវបានអភិវឌ្ឍដោយសាជីវកម្ម AES (សហរដ្ឋអាម៉េរិក), Posco (កូរ៉េខងត្បូង) និង CIC (ចិនដីគោក)។ ឆ្នាំ ២០០៨ គម្រោងបណ្ដាក់ទុនរួមគ្នានេះបានបង្កើតក្រុមហ៊ុនសាជីវកម្ម AES-TKV Mong Duong ដើម្បីដំណើរការគម្រោងថាមពលនេះជាមួយនឹងអត្រាទុន ៥១%, ៣០% និង ១៩%។

ចុងឆ្នាំ ២០២០ AES បានលក់ភាគហ៊ុនរបស់ខ្លួនដែលមាននៅក្នុង AES-TKV Mong Duong ទៅឱ្យភាគីមួយនៅ សហរដ្ឋអាម៉េរិក។ តម្លៃនៃការទិញដូរភាគហ៊ុននេះមិនទាន់ត្រូវបានបង្ហើបឱ្យដឹងនៅឡើយ ប៉ុន្តែ អាចនឹងត្រូវបានទូទាត់រួចរាល់នៅដើមឆ្នាំក្រោយ។

ទន្ទឹមនឹងនេះ AES ក៏សហការជាមួយ ក្រុមហ៊ុនវៀតណាម PV Gas ក្នុងការអភិវឌ្ឍគម្រោងឃ្លាំងកំពង់ផែនាំចូលឧស្ម័នរាវ (LNG) Son My ដែលគ្រោងនឹងមានតម្លៃ ១.៤ ពាន់លានដុល្លារអាម៉េរិក។

ក្រៅពីនេះ ក្រុមហ៊ុនអាម៉េរិក AES ក៏ថែមទាំងជាអ្នកអភិវឌ្ឍគម្រោងរោងចក្រអគ្គិសនីដើរដោយឧស្ម័ន Son My 2 (Son My 2 CCGT) ដោយមានទុនវិនិយោគ ១.៧ ពាន់លានដុល្លារទៀតផងដែរ៕

August 3, 2022

រថយន្តអគ្គិសនីរបស់ BYD នឹងមានវត្តមានក្នុងទីផ្សាររបស់ អ៊ីស្រាអែល ចាប់ពីចុងឆ្នាំនេះ

ក្រុមហ៊ុន BYD ឱ្យដឹងថា រថយន្តប្រភេទស៊ីដាន់ (sedan) ដំបូងៗរបស់ខ្លួន គ្រោងនឹងទៅដល់កំពង់ផែ Eilat នៅភាគខាងត្បូងនៃ ប្រទេសអ៊ីស្រាអែល ក្នុងត្រីមាសទីបី ឆ្នាំ ២០២២។

ក្រុមហ៊ុនផលិតរថយន្តអគ្គិសនីលំដាប់កំពូលរបស់ ចិន BYD គ្រោងនឹងលក់រថយន្តដើរដោយថាមពលអគ្គិសនីនៅ ទីផ្សារអ៊ីស្រាអែល ចាប់ពីចុងឆ្នាំនេះ ដោយសហការជាមួយដេប៉ូចែកចាយរថយន្ត Shlomo Motors របស់ អ៊ីស្រាអែល នេះបើតាមប្រកាសកាលពីម្សិលមិញរបស់ក្រុមហ៊ុនទាំងពីរ។

BYD បង្ហើបឱ្យដឹងថា រថយន្តប្រភេទស៊ីដាន់ (sedan) ដំបូងៗរបស់ខ្លួន គ្រោងនឹងទៅដល់កំពង់ផែ Eilat នៅភាគខាងត្បូងនៃ ប្រទេសអ៊ីស្រាអែល ក្នុងត្រីមាសទីបី ឆ្នាំនេះ។ ក្រុមហ៊ុនអ៊ីស្រាអែល Shlomo បញ្ជាក់ថា ចាប់ពីខែកញ្ញា ឆ្នាំ ២០២២ Shlomo នឹងបើកទីតាំងបង្ហាញរថយន្តថ្មីចំនួន ៤ កន្លែង ដើម្បីឱ្យអតិថិជនអាចទទួលបានបទពិសោធន៍ក្នុងការប្រើប្រាស់រថយន្តអគ្គិសនីរបស់ BYD។

BYD និង Shlomo បានសហការគ្នារកស៊ីជាង ១ ទសវត្សរ៍មកហើយ តាមរយៈសកម្មភាពជំនួញលើរថយន្តក្រុងអគ្គិសនីរបស់ BYD។ BYD (Build Your Dreams) ត្រូវបានបង្កើតឡើងកាលពីឆ្នាំ ១៩៩៥ និងមានការិយាល័យកណ្ដាលនៅ Shenzhen ប្រទេសចិន។ ក្រុមហ៊ុននេះផ្ដោតសំខាន់ទៅលើការអភិវឌ្ឍ និងផលិតថ្មផ្ទុកថាមពលអគ្គិសនីសុវត្ថិភាព។

BYD អះអាងថា បច្ចេកវិទ្យាថ្មផ្ទុកអគ្គិសនីរបស់ខ្លួន អនុញ្ញាតឱ្យរថយន្តម៉ូដែល e-Platform 3.0 រត់បានចម្ងាយលើសពី ១,០០០ គីឡូម៉ែត្រ។ ក៏ប៉ុន្តែ BYD និង Shlomo មិនទាន់បង្ហើបឱ្យដឹងថា រថយន្ត BYD ម៉ូដែលណាមួយដែលនឹងត្រូវបានដាក់លក់ក្នុងទីផ្សាររបស់ អ៊ីស្រាអែល នៅឡើយ៕

August 3, 2022

ស្ថានភាពជំងឺកូវីដ-១៩ នៅ កម្ពុជា គិតត្រឹមវេលាទៀបភ្លឺ ថ្ងៃទី ០២ ខែសីហា ២០២២

កម្ពុជា រកឃើញអ្នកឆ្លងកូវីដ-១៩ ករណីថ្មី ចំនួន ៤០ នាក់ ក្នុងអំឡុង ២៤ ម៉ោងនៃថ្ងៃទី ០២ ខែសីហា ២០២២ ក្នុងនោះមានករណីឆ្លងក្នុងសហគមន៍ចំនួន ៤០ នាក់។

ក្នុងអំឡុងពេលដដែល ក៏មានអ្នកជំងឺកូវីដ-១៩ ចំនួន ៣៩ នាក់បានជាសះស្បើយ និងមិនមានករណីស្លាប់ថ្មី ដោយសារជំងឺនេះនៅឡើយ។

August 3, 2022

ក្រុមហ៊ុនជប៉ុន បាត់បង់ ១.៧ ពាន់លានដុល្លារអាម៉េរិក ដោយសារវិនិយោគលើគម្រោងរបស់ រុស្ស៊ី

ក្រុមហ៊ុន Mitsui និងក្រុមហ៊ុន Mitsubishi របស់ ជប៉ុន បានបាត់បង់ប្រាក់អស់ប្រហែល ១.៧ ពាន់លានដុល្លារអាម៉េរិក ដែលពួកគេបានវិនិយោគទៅក្នុងគម្រោងឧស្ម័នធម្មជាតិរាវ (LNG) របស់ រុស្ស៊ី។

យោងតាម Bloomberg សាជីវកម្ម Mitsui និង Mitsubishi របស់ ជប៉ុន បានបាត់បង់ប្រាក់សរុបប្រហែល ១.៧ ពាន់លានដុល្លារអាម៉េរិក ដែលបានវិនិយោគទៅក្នុងគម្រោងឧស្ម័នធម្មជាតិរាវ (LNG) Sakhalin-2 របស់ រុស្ស៊ី ដោយសារតែត្រូវបានរឹបអូស និងបញ្ចូលទៅក្នុងទ្រព្យរបស់រដ្ឋរុស្ស៊ី ទៅតាមបទបញ្ជារបស់ ប្រធានាធិបតី ពូទីន។

ទុនវិនិយោគរបស់ Mitsui ដែលត្រូវបាន រុស្ស៊ី រឹបអូស គឺ ១៣៦.៦ ពាន់លានយ៉េន (១.១ ពាន់លានដុល្លារអាម៉េរិក) ចំណែក ទុនដែល Mitsubishi បានបាត់បង់ គឺ ៨១ ពាន់លានយ៉េន (៦១០ លានដុល្លារអាម៉េរិក)។ ក្រុមហ៊ុនទាំងពីរខាងលើនេះសុទ្ធតែកាន់កាប់ភាគហ៊ុន ២២.៥% នៅក្នុងគម្រោងឧស្ម័នធម្មជាតិរាវ (LNG) Sakhalin-2 របស់ រុស្ស៊ី។

សាជីវកម្មបរទេសមួយផ្សេងទៀតដែលមានភាគហ៊ុន ២៧.៥% នៅក្នុងគម្រោង Sakhlin -2 គឺ ក្រុមហ៊ុន Shell របស់ ចក្រភពអង់គ្លេស។ ភាគហ៊ុនដែលនៅសល់គឺជាកម្មសិទ្ធិផ្ដាច់មុខរបស់សាជីវកម្មឧស្ម័ន Gazprom របស់ រុស្ស៊ី។

ក្រុមហ៊ុន Shell មុននោះបានប្រកាសលុបចោលខ្ទង់វិនិយោគរាប់ពាន់លានដុល្លារអាម៉េរិក ទៅក្នុងគម្រោង ពាណិជ្ជកម្មនានារបស់ រុស្ស៊ី ប៉ុន្តែមិនបាននិយាយច្បាស់អំពីតួលេខនៃខ្ទង់វិនិយោគទៅលើ Sakhalin-2 នោះទេ៕

August 3, 2022

មាសពិភពលោក ម្សិលមិញឡើងថ្លៃខ្ពស់បំផុតក្នុងអំឡុងជិតមួយខែកន្លង

តម្លៃមាសពិភពលោកនៅក្នុងការជួញដូរកាលពីថ្ងៃទី ០២ សីហា បានឡើងខ្ពស់បំផុតក្នុងអំឡុងជិតមួយខែកន្លង ក្នុងគ្រាដែលមានភាពតានតឹងរវាង អាម៉េរិក-ចិន និងការបារម្ភអំពីវិបត្តិសេដ្ឋកិច្ចអាម៉េរិក។

ក្នុងការជួញដូរនៅវេលាម៉ោងប្រហែល ០ និង ៥៩ នាទី នៃថ្ងៃទី ០២ សីហា (ម៉ោងនៅ កម្ពុជា) មាសប្រគល់ភ្លាមត្រូវបានជួញដូរក្នុងតម្លៃ ១,៧៧១.៥៩ ដុល្លារអាម៉េរិក/អោន។ តម្លៃមាសប្រគល់មានកាលកំណត់ កើន ០.១% និងត្រូវបានជួញដូរក្នុងតម្លៃ ១,៧៨៩.៧០ ដុល្លារអាម៉េរិក/អោន (១ អោនស្មើនឹង ៨.២៩៤២៦ ជី)។

David Meger ប្រធានផ្នែកពាណិជ្ជកម្មមាសនៃ ស្ថាប័នហិរញ្ញវត្ថុ High Ridge Futures (សហរដ្ឋអាម៉េរិក) អះអាងថា ពាក្យចចាមអារ៉ាមស្ដីពីការបន្ថយអត្រាការប្រាក់របស់ Fed (ធនាគារកណ្ដាលអាម៉េរិក) និងឱនភាពសេដ្ឋកិច្ចនៅ សហរដ្ឋអាម៉េរិក រួមនឹងភាពតានតឹងជុំវិញបញ្ហា កោះតៃវ៉ាន់ នាបច្ចុប្បន្ន គឺជាកត្តាចម្បងដែលនាំឱ្យអ្នកវិនិយោគរត់មករកមាស ជាទ្រព្យដែលត្រូវគេចាត់ទុកថា «សុវត្ថិភាព»។

Craig Erlam អ្នកវិភាគទីផ្សារជាន់ខ្ពស់ប្រចាំក្រុមហ៊ុន OANDA (សហរដ្ឋអាម៉េរិក) ព្យាករថា ១,៨០០ ដុល្លារ/អោន អាចជាតម្លៃសាកល្បងដ៏ធំសម្រាប់មាស ប៉ុន្តែ លោហធាតុមានតម្លៃនេះអាចស្ថិតក្នុងការប្រទាញប្រទង់ក្នុងរង្វង់ប្រហែល ១,៧៨០ ដុល្លារ/អោន៕

August 3, 2022

Author: សឿន សំណាង