សឿន សំណាង - La Reine Media

អាជ្ញាធរចិន ចាប់ផ្ដើមអនុម័តលើគម្រោងអាជីវកម្មរថយន្តតាក់ស៊ីគ្មានមនុស្សបើកបរ

Baidu បានក្លាយជាក្រុមហ៊ុនដំបូងគេដែលត្រូវបាន អាជ្ញាធរចិន ផ្ដល់អាជ្ញាប័ណ្ណដំណើរការរថយន្តតាក់ស៊ីស្វ័យប្រវត្តទាំងស្រុងនៅតំបន់មួយចំនួន ដែលនេះគឺជាការបោះជំហានដ៏ធំរបស់ Baidu ធៀបនឹងគូប្រជែងនានាដូចជា Pony.ai និង XPeng ជាដើម។

ក្រុមហ៊ុនបច្ចេកវិទ្យាខ្នាតយក្ស Baidu ទទួលបានអាជ្ញាប័ណ្ណដំណើរការអាជីវកម្មរថយន្តតាក់ស៊ីគ្មានមនុស្សបើកបរនៅក្នុងទីក្រុងចំនួន ២ គឺ អ៊ូហាន (Wuhan) និង ឆុងឈីង (Chongqing)។

ការសម្រេចចិត្តខាងលើនេះបានបង្ហាញថា អាជ្ញាធរចិន កំពុងតែផ្ដល់ភ្លើងខៀវបន្តិចម្ដងៗសម្រាប់គម្រោងតាក់ស៊ីស្វ័យប្រវត្ត។ មុននោះ ក្រុមមន្ត្រីចិន បានកំណត់ឱ្យមានមនុស្សម្នាក់នៅក្នុងរថយន្តដើម្បីគ្រប់គ្រងករណីបន្ទាន់។

ក្រុមហ៊ុន Baidu នឹងចាប់ផ្ដើមដំណើរការសេវាកម្មតាក់ស៊ីបើកបរស្វ័យប្រវត្តនៅទីក្រុងអ៊ូហាន ចាប់ពីម៉ោង ០៩ ដល់ម៉ោង ១៧ ខណៈដែល ទីក្រុងឆុងឈីង នឹងចាប់ពីម៉ោង ០៩ កន្លះ ដល់ម៉ោង ១៦ កន្លះ។

Wei Dong អនុប្រធានរបស់ក្រុមហ៊ុន Baidu Intelligence Driving Group បានឱ្យដឹងថា ក្រុមហ៊ុននេះនឹងធ្វើការជាមួយក្រុមមន្ត្រីនៅ ប៉េកាំង និង ក្វាងចូវ (Guangzhou) ដើម្បីបន្តសុំអាជ្ញាប័ណ្ណសម្រាប់តំបន់ទាំងនេះ។

នៅ សហរដ្ឋអាម៉េរិក មុននោះតាក់ស៊ីគ្មានមនុស្សបើកបរក៏ត្រូវបានអនុញ្ញាតឱ្យដំណើរការ។ ក្រុមហ៊ុន Cruise LLC ទទួលបានអាជ្ញាប័ណ្ណអាជីវកម្មសម្រាប់តំបន់មួយចំនួននៅ សាន ហ្វ្រានស៊ីស្កូ (San Francisco)។ ប៉ុន្តែ ក្រុមហ៊ុននេះកំពុងប្រឈមនឹងការតាមដានពីអាជ្ញាធរ បន្ទាប់ពីកើតមានគ្រោះថ្នាក់ ២ លើកនៅលើដងផ្លូវ បណ្ដាលឱ្យមានមនុស្ស ២ នាក់ រងរបួសស្រាល។

អនុប្រធានរបស់ក្រុមហ៊ុន Baidu Intelligence Driving Group បញ្ជាក់ថា ក្រុមហ៊ុននេះនឹងបង្កើនចំនួនរថយន្តតាក់ស៊ីបើកបរស្វ័យប្រវត្តរបស់ខ្លួននៅលើដងផ្លូវក្នុង ប្រទេសចិន ឱ្យបាន ៦០០ គ្រឿង នៅចុងឆ្នាំនេះ៕

August 8, 2022

ការនាំចេញអង្កររបស់ កម្ពុជា នឹងកើនឡើងខ្ពស់នៅចុងឆ្នាំនេះ

ប្រធានសហព័ន្ធស្រូវអង្ករកម្ពុជា រំពឹងថា ការនាំចេញអង្កររបស់ កម្ពុជា នៅចុងឆ្នាំនេះ នឹងមានការកើនឡើងទៅតាមផែនការ ពោលគឺកើនឡើងចន្លោះពី ៧៥ ម៉ឺន ទៅ ៨០ ម៉ឺនតោន។

ចាប់ពីខែសីហានេះ រហូតដល់ខែធ្នូ ២០២២ ការនាំចេញអង្កររបស់ កម្ពុជា នឹងមានកំណើនងើបឡើងវិញ ដោយសារថា នៅក្នុងឆ្នាំ ២០២២ នេះ សហព័ន្ធស្រូវអង្ករ បានកំណត់ផែនការសកម្មភាព នៃការនាំចេញអង្ករឱ្យបានចន្លោះពី ៧៥ ម៉ឺន ទៅ ៨០ ម៉ឺនតោន ដែលនេះគឺជាការស្តារស្ថានភាពមួយដ៏ធំ បន្ទាប់ពី កម្ពុជា បានជួបឧបសគ្គមួយចំនួនទាក់ទិននឹងការនាំចេញអង្ករនាពេលកន្លងមក។ នេះបើតាម លោកឧកញ៉ា សុង សារ៉ន ប្រធានសហព័ន្ធស្រូវអង្ករកម្ពុជា។

ក្នុងរយៈពេល ៧ ខែនៃឆ្នាំ ២០២២ កម្ពុជា បាននាំចេញអង្ករចំនួន ៣៥០,៩០២ តោន ស្មើនឹង ២១៨.១៧ លានដុល្លារអាមេរិក តាមរយៈក្រុមហ៊ុននាំចេញអង្ករចំនួន ៥៣ ស្ថាប័ន ទៅកាន់ប្រទេសចំនួន ៥៦ ក្នុងពិភពលោក។ ទីផ្សារនាំចេញអង្ករធំជាងគេរបស់ កម្ពុជា នាបច្ចុប្បន្ន គឺ ប្រទេសចិន ដោយអង្ករ ១៦៩,៧៦៦ តោន តម្លៃ ៨៩.០៩ លានដុល្លារអាម៉េរិក ស្មើនឹង ៤៨.៣៨% នៃការនាំចេញអង្ករសរុបរបស់ កម្ពុជា ត្រូវបាននាំចេញទៅកាន់ទីផ្សារប្រទេសនេះ។

ប្រធានសហព័ន្ធស្រូវអង្ករកម្ពុជា លោកឧកញ៉ា សុង សារ៉ន

ប្រធានសហព័ន្ធស្រូវអង្ករកម្ពុជា បញ្ជាក់ថា ក្នុងរយៈពេល ៧ ខែនៃឆ្នាំ ២០២២ នេះ ការនាំចេញអង្ករសរុបមានកំណើន ១៣.២៤% ធៀបនឹងរយៈពេល ៧ ខែនៃឆ្នាំ ២០២១។ ដូចនេះ លោកឧកញ៉ា រំពឹងថា ការនាំចេញអង្ករនៅចុងឆ្នាំនេះ នឹងមានកំណើនកើនឡើងខ្ពស់ ស្របពេលដែល កម្ពុជា កំពុងពង្រីកទីផ្សារថ្មីៗបន្ថែមទៀត៕

August 8, 2022

មន្ត្រីអាម៉េរិក ព្យាករអំពីពេលវេលានៃការបញ្ចប់សង្គ្រាមរវាង រុស្ស៊ី និង អ៊ុយក្រែន

មន្ត្រីមួយរូបរបស់ សហរដ្ឋអាម៉េរិក បានប្រាប់សារព័ត៌មានរបស់ អ៊ុយក្រែន ថា លោកគិតថា សង្គ្រាម រុស្ស៊ី-អ៊ុយក្រែន នឹងបន្តកើតមាននៅឆ្នាំក្រោយ។

លោក Kurt Walker អតីតអ្នកតំណាងពិសេសរបស់ សហរដ្ឋអាម៉េរិក ស្ដីពីបញ្ហា អ៊ុយក្រែន និយាយថា អ៊ុយក្រែន អឺរ៉ុប និង រុស្ស៊ី គួរត្រៀមស្មារតីសម្រាប់រដូវរងានៅខាងមុខ ព្រោះថា សង្គ្រាមនេះអាចនឹងអូសបន្លាយពេលយូរ ហើយវិបត្តិថាមពលមួយនឹងកើតឡើង។ ប៉ុន្តែ លោក Walker បញ្ជាក់ថា សហរដ្ឋអាម៉េរិក នឹងបន្តប្រកៀកស្មាជាមួយ អ៊ុយក្រែន គ្រប់កាលៈទេសៈ។

នៅក្នុងកិច្ចសម្ភាសមួយជាមួយនឹងអ្នកយកព័ត៌មានរបស់ អ៊ុយក្រែន កាលពីថ្ងៃទី ០៧ សីហា មន្ត្រីអាម៉េរិកខាងលើ បានព្យាករថា រដូវរងាខាងមុខនឹងក្លាយជាពេលវេលាដ៏លំបាកសម្រាប់គ្រប់ភាគី។

មន្ត្រីរូបនេះបញ្ជាក់ថា សហភាពអឺរ៉ុប នឹងត្រូវប្រឈមនឹងបញ្ហាខ្វះថាមពលធ្ងន់ធ្ងរ និងតម្លៃខ្ពស់។ ចំណែក អ៊ុយក្រែន វិញ មានមូលហេតុតិចតួចដើម្បីមានភាពជឿជាក់ ខណៈដែលពេលវេលាដ៏លំបាកកំពុងរង់ចាំខាងមុខ។ រីឯ រុស្ស៊ី វិញ ក៏នឹងត្រូវប្រឈមមុខនឹងបញ្ហាស្រដៀងទៅនឹង អ៊ុយក្រែន នេះដែរ។

យោងតាមការព្យាកររបស់លោក Walker សង្គ្រាមនៅ អ៊ុយក្រែន នឹងបន្តអូសបន្លាយរហូតដល់រដូវផ្ការីក ឬអាចដល់រដូវក្ដៅឆ្នាំក្រោយ។ ប៉ុន្តែ លោកបានលើកសរសើរនូវអ្វីដែល អ៊ុយក្រែន សម្រេចបាននាពេលកន្លង។

លោក Walker អះអាង ក្រុមមន្ត្រីនៅឯ សហរដ្ឋអាម៉េរិក បង្ហាញអំពីការជឿជាក់ទៅលើ អ៊ុយក្រែន និងការសន្យារបស់ សហរដ្ឋអាម៉េរិក ចំពោះប្រជាធិបតេយ្យ។ ដូច្នេះ សហរដ្ឋអាម៉េរិក ត្រៀមខ្លួនជានិច្ចក្នុងការបន្តផ្ដល់ជំនួយដល់ អ៊ុយក្រែន ដើម្បីបណ្ដេញកងទ័ពរបស់ រុស្ស៊ី និងក្រុមផ្ដាច់ខ្លួន។

ដោយឡែក វិមានក្រឹមឡាំង បានបញ្ជាក់ជាច្រើនលើកហើយថា រុស្ស៊ី មិនបានកំណត់ពេលជាក់លាក់នៅក្នុងយុទ្ធនាការយោធារបស់ខ្លួន និងអះអាងថា សង្គ្រាមនឹងនៅតែបន្ត រហូតដល់ រុស្ស៊ី សម្រេចបានគោលដៅនៅ អ៊ុយក្រែន៕

August 8, 2022

អង្ករថៃ ក្លាយជាកសិផលដែលត្រូវបានលក់ក្នុងតម្លៃថ្លៃជាងគេនៅក្នុងពិភពលោក

ក្នុងរយៈពេលច្រើនខែមកនេះ អង្កររបស់ ប្រទេសថៃ បានឡើងថ្លៃជាបន្តបន្ទាប់ ខណៈដែលអង្កររបស់បណ្ដាប្រទេសដទៃ កំពុងប្រកួតប្រជែងតម្លៃ។

ក្រោយពីបានរក្សាតម្លៃទាបជាងអង្កររបស់ប្រទេសដទៃពី ១០ ទៅ ២០ ដុល្លារ/តោន អស់រយៈពេលជាយូរ តម្លៃអង្ករសំរូបដែលនៅកន្ទក់ ១០០% របស់ ប្រទេសថៃ មានតម្លៃ ៤២០ ដុល្លារ/តោន កើន ១០ ដុល្លារ/តោន ធៀបនឹង ១០ ថ្ងៃមុននេះ ខណៈដែលអង្ករសំរូបមានកន្ទក់ ៥% មានតម្លៃ ៤១០ ដុល្លារ/តោន កើន ១០ ដុល្លារ/តោន និងអង្ករកន្ទក់ ២៥% មានតម្លៃ ៣៩៤ ដុល្លារ/តោន កើន ៣ ដុល្លារ/តោន។

សមាគមអ្នកនាំចេញអង្កររបស់ ប្រទេសថៃ បានឱ្យដឹងថា មូលហេតុដែលនាំឱ្យតម្លៃអង្កររបស់ប្រទេសនេះកើនឡើងខ្ពស់ដូច្នេះ គឺដោយសាររូបិយប័ណ្ណបាតថៃ ធ្លាក់ថ្លៃ ធៀបនឹងប្រាក់ដុល្លារអាម៉េរិក។ ម្យ៉ាងទៀត ការដែលអង្ករថៃ បានធ្លាក់ថ្លៃក្នុងខែកក្កដា ក៏នាំឱ្យវាមានសមត្ថភាពប្រកួតប្រជែងខ្ពស់ ជួយឱ្យការបញ្ជាទិញមានការកើនឡើង។

យោងតាម សមាគមអ្នកនាំចេញអង្កររបស់ ប្រទេសថៃ ទិន្នផលស្រូវបានប្រសើរឡើងនៅក្នុងបណ្ដាប្រទេសដែលនាំចេញអង្ករធំៗដូចជា ឥណ្ឌា និង ប៉ាគីស្ថាន ជាដើម ក៏ឱ្យពួកគេបង្កើនការប្រកួតប្រជែងដោយលក់កសិផលនេះក្នុងតម្លៃទាប។

ប្រទេសថៃ កំពុងឈរលើកំពូលតារាងនៃបណ្ដាប្រទេសដែលនៅសល់អង្ករច្រើនជាងគេ ដូច្នេះការដែលអង្កររបស់ប្រទេសនេះខ្ពស់ជាងគេ ត្រូវបានព្យាករថា នឹងមិនស្ថិតនៅបានយូរឡើយ ព្រោះតែក្រុមអ្នកជំនួញកំពុងស្វែងរកវិធីដើម្បីលក់អង្ករដែលកំពុងនៅសល់ក្នុងឃ្លាំង៕

August 8, 2022

ស្ថានភាពជំងឺកូវីដ-១៩ នៅ កម្ពុជា គិតត្រឹមដើមថ្ងៃទី ០៨ ខែសីហា ២០២២

កម្ពុជា រកឃើញអ្នកឆ្លងកូវីដ-១៩ ករណីថ្មី ចំនួន ៣៥ នាក់ ក្នុងអំឡុង ២៤ ម៉ោង នៃថ្ងៃទី ០៧ ខែសីហា ២០២២ ក្នុងនោះមានករណីឆ្លងក្នុងសហគមន៍ចំនួន ៣៥ នាក់។

ក្នុងអំឡុងពេលដដែល ក៏មានអ្នកជំងឺកូវីដ-១៩ ចំនួន ២៤ នាក់បានជាសះស្បើយ និងមិនមានករណីស្លាប់ថ្មី ដោយសារជំងឺនេះនៅឡើយ។

August 8, 2022

ក្រុមហ៊ុនអាកាសចរណ៍មួយរបស់ វៀតណាម ប្រឈមនឹងហានិភ័យ «បាត់ខ្លួន» ពីទីផ្សារ

Pacific Airlines ត្រូវតែបំពេញលក្ខខណ្ឌទុនអប្បបរមា ៦០០ ពាន់លានដុង (ជាង ២៥ លានដុល្លារអាម៉េរិក) នៅក្នុងឆ្នាំនេះ ពុំដូចនេះទេនឹងត្រូវ អាជ្ញាធរវៀតណាម ដកហូតអាជ្ញាប័ណ្ណអាជីវកម្មអាកាសចរណ៍។

ក្នុងអំឡុង ២ ឆ្នាំបន្តបន្ទាប់មកនេះ ក្រុមហ៊ុនអាកាសចរណ៍ Pacific Airlines មិនបានបំពេញលក្ខខណ្ឌទុនអប្បបរមា ៦០០ ពាន់លានដុង ដែល វៀតណាម បានកំណត់ចំពោះអាជីវកម្មរកស៊ីក្នុងវិស័យដឹកជញ្ជូនផ្លូវអាកាសដែលមានយន្តហោះចាប់ពី ១១ ទៅ ៣០ គ្រឿង។ ទុនរបស់ម្ចាស់ក្រុមហ៊ុនអាកាសចរណ៍នេះ បានធ្លាក់ទៅក្នុងឱនភាព (អវិជ្ជមាន) ពោលគឺ បំណុលលើសពីតម្លៃទ្រព្យសកម្មរបស់ក្រុមហ៊ុន នៅក្នុងឆ្នាំ ២០២០ និង ២០២១។

ច្បាប់របស់ ប្រទេសវៀតណាម កំណត់ថា ក្រុមហ៊ុនអាកាសចរណ៍មួយនឹងត្រូវបានដកហូតអាជ្ញាប័ណ្ណអាជីវកម្ម បើសិនក្រុមហ៊ុននោះបានបរាជ័យក្នុងការរក្សាទុនអប្បបរមាដែលរដ្ឋបានកំណត់ ក្នុងរយៈពេល ៣ ឆ្នាំជាប់គ្នា។

ដូច្នេះ ក្រុមហ៊ុនអាកាសចរណ៍ Pacific Airlines អាចនឹងត្រូវបានលុបឈ្មោះចេញពីបញ្ជីរបស់រដ្ឋ បើសិនមិនអាចបំពេញតាមលក្ខខណ្ឌខាងលើ នៅក្នុងឆ្នាំ ២០២២ នេះ។

August 8, 2022

ឆេះស្ពានបុរាណអាយុកាលជាង ៩០០ ឆ្នាំ នៅ ប្រទេសចិន

ស្ពាន Wan’an ជាស្ពានដែលមានដំបូលធ្វើពីឈើ ស្ថិតនៅក្នុងខេត្ត Fujian ប្រទេសចិន និងមានប្រវត្តិជាង ៩០០ ឆ្នាំ ត្រូវបានលេបត្របាក់ដោយអគ្គិភ័យ នាំឱ្យសមត្ថកិច្ចក្នុងតំបន់បើកការស៊ើបអង្កេតរកមូលហេតុ។

ប្រភពព័ត៌មានពី ប្រទេសចិន បានឱ្យដឹងថា ស្ពាន Wan’an នៅទីរួមស្រុក Changqiao ស្រុក Pingnan នៃខេត្ត Fujian ត្រូវបានភ្លើងឆាបឆេះកាលពីព្រលប់ថ្ងៃទី ០៦ សីហា និងត្រូវបានពន្លត់ក្រោយភ្លើងឆេះបានជាង ១ ម៉ោង។

ស្ពានបុរាណនេះបានស្រុតរលំ បន្ទាប់ពីត្រូវអគ្គិភ័យឆាបឆេះ។ សំណាងល្អ ពុំមានមនុស្សស្លាប់ ឬរងរបួសនៅក្នុងហេតុការណ៍នេះ។ អាជ្ញាធរក្នុងតំបន់ បានបង្កើតក្រុមស៊ើបអង្កេតមួយដើម្បីស្រាវជ្រាវរកមូលហេតុនៃករណីអគ្គិភ័យ។

ស្ពានបុរាណ Wan’an មានប្រវត្តិជាង ៩០០ ឆ្នាំ ត្រូវបានកសាងក្នុងរាជវង្សសុងខាងជើង។ ស្ពាននេះធ្លាប់បានឆេះម្ដងរួចហើយកាលពីរជ្ជកាល ព្រះចៅអធិរាជកាងស៊ី នៃរាជវង្ស ឈីង និងត្រូវបានសាងសង់ឡើងវិញក្នុងឆ្នាំ ១៧៤២ ក្នុងរជ្ជកាលស្ដេច ឆៀនឡុង ហើយត្រូវបានជួសជុលច្រើនលើកនៅក្នុងរជ្ជកាលបន្តបន្ទាប់។

ស្ពាន Wan’an ក៏ជាស្ពានបុរាណមានដំបូលធ្វើពីឈើវែងជាងគេនាបច្ចុប្បន្ននៅ ប្រទេសចិន។ ស្ពាននេះឆ្លងកាត់ទន្លេ Changqiao នេះ មានប្រវែង ៩៨.២ ម៉ែត្រ, ទទឹង ៤.៧ ម៉ែត្រ និងត្រូវបានដាក់បញ្ចូលទៅក្នុងបញ្ជីបេតិកភណ្ឌវប្បធម៌សំខាន់របស់ ចិន កាលពីឆ្នាំ ២០០៦។

https://www.youtube.com/watch?v=r9rYySaGVUQ

August 8, 2022

ក្រុមហ៊ុន Alibaba ចាប់ដៃជាមួយគូប្រជែងរបស់ Tesla ដើម្បីអភិវឌ្ឍរថយន្តគ្មានមនុស្សបើកបរ

ក្រុមហ៊ុនខ្នាតយក្សរបស់ ចិន Alibaba និងក្រុមហ៊ុនផលិតរថយន្តអគ្គិសនីក្នុងស្រុកចិន Xpeng សហការគ្នាបើកមជ្ឈមណ្ឌលបច្ចេកវិទ្យាធំមួយ ក្នុងបំណងអភិវឌ្ឍរថយន្តអគ្គិសនីបើកបរដោយស្វ័យប្រវត្ត។

ជាបច្ចេកវិទ្យាមួយដែលនៅក្មេងខ្ចី ប្រព័ន្ធបើកបរដោយស្វ័យប្រវត្តរបស់ Alibaba និង Xpeng នឹងត្រូវការពេលច្រើនដើម្បីមានទិន្នន័យចាំបាច់គ្រប់គ្រាន់សម្រាប់ការអភិវឌ្ឍ និងបណ្ដុះបណ្ដាលប្រព័ន្ធឱ្យសមស្របនឹងស្ថានភាពចរាចរណ៍ជាក់ស្ដែង។ ក៏ប៉ុន្តែ Xpeng បានប្រកាសថា មជ្ឈមណ្ឌលកុំព្យូទ័រថ្មីដែលក្រុមហ៊ុននេះ និង Alibaba បង្កើតឡើង នឹងជួយកាត់បន្ថយពេលវេលាក្នុងការបណ្ដុះបណ្ដាលរូបមន្តបើកបរស្វ័យប្រវត្ត ពី ៧ ថ្ងៃ ចុះមកនៅត្រឹម ១ ម៉ោង។ ជាក់ស្ដែង Xpeng នឹងប្រើប្រាស់បច្ចេកវិទ្យាពីវិស័យកុំព្យូទ័រពពក (cloud computing) របស់ Alibaba សម្រាប់បម្រើដល់តម្រូវការនៃមជ្ឈមណ្ឌលកុំព្យូទ័ររបស់ខ្លួន។

មជ្ឈមណ្ឌលដែលមានឈ្មោះថា Fuyao នឹងត្រូវបានស្ថាបនានៅក្នុងតំបន់ Inner Mongolia ដែលស្ថិតនៅភាគខាងជើងនៃ ប្រទេសចិន។

កិច្ចសហការខាងលើនេះ បានបង្ហាញថា ក្រុមហ៊ុន Alibaba កំពុងប្រឹងប្រែងដើម្បីលោតចូលក្នុងវិស័យរថយន្តអគ្គិសនីដែលកំពុងតែផ្ទុះការពេញនិយមនាបច្ចុប្បន្ន។ សម្រាប់ Xpeng វិញ កិច្ចសហការនេះគឺជាការបោះជំហានដ៏ធំមួយរបស់ខ្លួននៅក្នុងការប្រកួតប្រជែងជាមួយនឹងក្រុមហ៊ុនខ្នាតយក្ស Tesla របស់ សហរដ្ឋអាម៉េរិក និង BYD របស់ ចិន នៅក្នុងទីផ្សាររថយន្តអគ្គិសនីពិភពលោក៕

August 8, 2022

សភាជាន់ខ្ពស់អាម៉េរិក អនុម័តច្បាប់ចំណាយតម្លៃ ៤៣០ ពាន់លានដុល្លារ

សភាជាន់ខ្ពស់របស់ សហរដ្ឋអាម៉េរិក កាលពីថ្ងៃទី ០៧ សីហា បានអនុម័តសេចក្ដីព្រាងច្បាប់ស្ដីពីការចំណាយលើសុខាភិបាល និងអាកាសធាតុ តម្លៃ ៤៣០ ពាន់លានដុល្លារ ដែលនេះនឹងនាំមកនូវជោគជ័យដ៏សំខាន់សម្រាប់ប្រធានាធិបតី ចូ បៃដិន។

គម្រោងប្រើប្រាស់ថវិកា ៤៣០ ពាន់លានដុល្លារនេះនឹងរួមមាន បណ្ដាខ្ទង់វិនិយោគធំៗបំផុតមិនធ្លាប់មានពីមុនមករបស់ សហរដ្ឋអាម៉េរិក ទៅលើការដោះស្រាយបញ្ហាអាកាសធាតុ ក្នុងនោះ ខ្ទង់ប្រាក់ ៣៧០ ពាន់លានដុល្លារនឹងត្រូវបានប្រើប្រាស់ដើម្បីកាត់បន្ថយឧស្ម័នផ្ទះកញ្ចក់ឱ្យ ៤០% នៅក្នុងឆ្នាំ ២០៣០។

សេចក្ដីព្រាងច្បាប់នេះត្រូវបានគេជឿថា នឹងនាំមកនូវជ័យជម្នះយ៉ាងច្បាស់លាស់សម្រាប់លោក បៃដិន នៅមុនការបោះឆ្នោតពាក់កណ្ដាលអាណត្តិនាចុងឆ្នាំនេះ ព្រមទាំងស្ដារតួនាទីនាំមុខគេរបស់ សហរដ្ឋអាម៉េរិក នៅក្នុងកិច្ចប្រឹងប្រែងទប់ទល់នឹងបម្រែបម្រួលអាកាសធាតុពិភពលោក។

ដោយមានសេចក្ដីព្រាងច្បាប់នេះ ពលរដ្ឋអាម៉េរិក នឹងទទួលបានការអនុគ្រោះពន្ធឡើងដល់ ៧,៥០០ ដុល្លារ នៅពេលទិញរថយន្តអគ្គិសនី បូករួមនឹងការបញ្ចុះតម្លៃ ៣០% នៅពេលដំឡើងផ្ទាំងសូឡានៅលើដំបូលផ្ទះ។

វាក៏នឹងផ្ដល់រាប់លានដុល្លារសម្រាប់កិច្ចប្រឹងប្រែងការពារ និងថែរក្សាព្រៃឈើរបស់ សហរដ្ឋអាម៉េរិក។ ការលើកលែងពន្ធរាប់ពាន់លានដុល្លារក៏នឹងត្រូវបានធ្វើឡើងសម្រាប់វិស័យឧស្សាហកម្មមួយចំនួនដែលបង្កផលប៉ះពាល់ធ្ងន់ធ្ងរដល់បរិស្ថាន ដោយជួយឱ្យក្រុមហ៊ុន រោងចក្រទាំងនោះងាកមកប្រើប្រាស់ថាមពលស្អាត។

សេចក្ដីព្រាងច្បាប់នេះនឹងកាត់បន្ថយការចំណាយក្នុងការថែទាំសុខភាពរបស់ ពលរដ្ឋអាម៉េរិក តាមរយៈកិច្ចព្រមព្រៀងធានារ៉ាប់រង។

សេចក្ដីព្រាងច្បាប់នេះនឹងត្រូវបានបញ្ចូនទៅកាន់ សភាជាន់ទាបអាម៉េរិក ដើម្បីធ្វើការអនុម័តនៅថ្ងៃទី ១២ សីហាខាងមុខ ក្រោយមក នឹងត្រូវបញ្ជូនទៅកាន់ប្រធានាធិបតី ចូ បៃដិន ដើម្បីចុះហត្ថលេខាឱ្យទៅជាច្បាប់៕

August 8, 2022

ស្ថានភាពជំងឺកូវីដ-១៩ នៅ កម្ពុជា គិតត្រឹមដើមថ្ងៃទី ០៦ ខែសីហា ២០២២

កម្ពុជា រកឃើញអ្នកឆ្លងកូវីដ-១៩ ករណីថ្មី ចំនួន ១៨ នាក់ ក្នុងអំឡុង ២៤ ម៉ោងនៃថ្ងៃទី ០៥ ខែសីហា ២០២២ ក្នុងនោះមានករណីឆ្លងក្នុងសហគមន៍ចំនួន ១៥ នាក់។

ក្នុងអំឡុងពេលដដែល ក៏មានអ្នកជំងឺកូវីដ-១៩ ចំនួន ១០ នាក់បានជាសះស្បើយ និងមិនមានករណីស្លាប់ថ្មី ដោយសារជំងឺនេះនៅឡើយ។

August 6, 2022

Author: សឿន សំណាង