សឿន សំណាង - La Reine Media

មេដឹកនាំជាន់ខ្ពស់របស់ អង្គការរដ្ឋអ៊ីស្លាម (IS) ធ្វើអត្តឃាត នៅពេលត្រូវបានឡោមព័ទ្ធ

ទីភ្នាក់ងារសារព័ត៌មានរដ្ឋ SANA កាលពីម្សិលមិញ បានឱ្យដឹងថា Abu Salem Al-Iraqi ដែលជាមេដឹកនាំជាន់ខ្ពស់មួយរូបរបស់ អង្គការរដ្ឋអ៊ីស្លាម (IS) បានធ្វើអត្តឃាតនៅក្នុងយុទ្ធនាការសន្តិសុខដែល អាជ្ញាធរស៊ីរី បានអនុវត្តមុននោះមួយថ្ងៃ នៅក្នុងខេត្ត Daraa ភាគខាងត្បូងប្រទេសនេះ។

SANA បានចុះផ្សាយថា Al-Iraqi ត្រូវបានឡោមព័ទ្ធ និងរងរបួសក្នុងផ្ទះមួយខ្នងនៅឯទីរួមស្រុក Adwan ភាគខាងលិចរបស់ខេត្ត Daraa នៅពេលកងកម្លាំងសន្តិសុខរបស់ ស៊ីរី បានបើកយុទ្ធនាការពិសេស។ ក្រោយមក Al-Iraqi ក៏បានធ្វើអត្តឃាតដោយការបំផ្ទុះគ្រាប់ផ្ទុះដែលចងជុំវិញខ្លួន។

យោងតាមប្រភពព័ត៌មានខាងលើ Al-Iraqi គឺជាមេដឹកនាំយោធារបស់អង្គការអ៊ីស្លាមជ្រុលនិយម IS (អង្គការរដ្ឋអ៊ីស្លាម) នៅភាគខាងត្បូងនៃ ប្រទេសស៊ីរី។ ជនដែលមានសញ្ជាតិអ៊ីរ៉ាក់ នេះ បានគេចខ្លួនទៅកាន់ Daraa បន្ទាប់ពី IS ត្រូវបានវាយបំបាក់នៅតំបន់ជំរំ Yarmouk ភាគខាងត្បូងនៃ រដ្ឋធានីដាម៉ាស (Damascus)។

អង្គការតាមដានសិទ្ធិមនុស្សស៊ីរី (SOHR) បានបញ្ជាក់ថា Al-Iraqi ត្រូវបានកម្ចាត់កាលពីថ្ងៃទី ០៩ សីហា។ យោងតាម SORH ជននេះបានលាក់ខ្លួនក្នុងតំបន់ខាងលើតាំងពីឆ្នាំ ២០១៨ និងបានចូលរួមក្នុងករណីធ្វើឃាត ក៏ដូចជាករណីវាយប្រហារធំៗនានាដែលបង្កភាពវឹកវរខ្លាំងនៅភាគខាងត្បូងនៃ ប្រទេសស៊ីរី នាពេលកន្លង៕

August 11, 2022

អ្នកទោសជាង ៨០០ នាក់នៅ កុងហ្កោ «ហែកគុក» គេចខ្លួនបាត់ស្រមោល

អ្នកទោសជាង ៨០០ នាក់ នៅក្នុងពន្ធនាគារក្រុង Butembo ភាគខាងកើតរបស់ សាធារណរដ្ឋប្រជាធិបតេយ្យកុងហ្កោ បាននាំគ្នា «ហែកគុក» រត់គេចខ្លួន បន្ទាប់ពីក្រុមខ្មាន់កាំភ្លើងមួយក្រុមបានសម្រុកចូលពន្ធនាគារ បណ្ដាលឱ្យប៉ូលិស ២ នាក់ត្រូវបាត់បង់ជីវិត។

យោងតាមសមត្ថកិច្ចក្នុងតំបន់ ហេតុការណ៍វឹកវរនេះបានកើតឡើងកាលពីថ្ងៃទី ០៩ សីហា។ ព័ត៌មានដំបូងៗបានឱ្យដឹងថា យ៉ាងហោចណាស់មានប៉ូលិស ២ នាក់ និងមនុស្សម្នាក់ទៀតបានបាត់បង់ជីវិត។ អ្នកទោសជាង ៨០០ នាក់ ក្នុងចំណោមអ្នកទោសសរុប ៨៧២ នាក់ ដែលកំពុងជាប់ឃុំនៅក្នុងពន្ធនាគារស្រុក Butembo បានរត់គេចខ្លួនបាត់ស្រមោល។

បច្ចុប្បន្ន សមត្ថកិច្ចកំពុងស្រាវជ្រាវវែកមុខរកក្រុមដែលនៅពីក្រោយការវាយប្រហារ និងការហែកគុកខាងលើ។

អំពើហិង្សាតែងតែកើតមានជាញឹកញាប់នៅភាគខាងត្បូងនៃ សាធារណរដ្ឋកុងហ្កោ ជាទីដែលមានក្រុមប្រដាប់អាវុធជាច្រើន ធ្វើសកម្មភាពរាប់សិបឆ្នាំកន្លងមកហើយ៕

August 11, 2022

ក្រុមហ៊ុនអាល្លឺម៉ង់ ផលិតសាច់ត្រីសិប្បនិម្មិត ចិញ្ចឹមពីកោសិការស់ មិនបាច់ឆ្លងកាត់ការសម្លាប់

ក្រុមហ៊ុន Bluu Seafood នៅ រដ្ឋធានីបែរឡាំង កំពុងរៀបគម្រោងចែកចាយផលិតផលពីសាច់ត្រីដែលគេចិញ្ចឹមពីកោសិកាត្រីនៅក្នុងបន្ទប់ពិសោធន៍ ទៅកាន់ទីផ្សារមួយចំនួនក្នុងពិភពលោក។

Bluu Seafood គឺជាក្រុមហ៊ុនធុរកិច្ចថ្មីដែលត្រូវបានបង្កើតឡើងកាលពីឆ្នាំ ២០២០ ដោយមានឈ្មោះដំបូងថា Bluu Biosciences។ ដោយសារតែការនេសាទត្រីបានក្លាយជាបញ្ហាធ្ងន់ធ្ងរ ក្រុមហ៊ុននេះក៏បានស្វែងរកវិធីដើម្បីជួយកាត់បន្ថយសកម្មភាពសេសាទ តាមរយៈបច្ចេកវិទ្យាចិញ្ចឹមកោសិកាដើម ដើម្បីបង្កើតជាផលិតផលសុវត្ថិភាពសម្រាប់មនុស្ស។

ក្រុមហ៊ុនខាងលើបានអភិវឌ្ឍមុខម្ហូបមួយចំនួនដែលមានឈ្មោះថា «បន្ទះត្រី» និង «ប្រហិតត្រី» ជាដើម ដែលមានរូបរាងដូចទៅនឹងមុខអាហារធម្មតាដែលមានស្រាប់។ ផលិតផលទាំងនេះមានផ្ទុកប្រូតេអ៊ីនរុក្ខជាតិច្រើន ដូច្នេះងាយស្រួលទំពារ និងអាចចម្អិនគ្រប់ពេល។

ដើម្បីបង្កើតបានដុំសាច់ត្រី ក្រុមហ៊ុន Bluu Seafood បានប្រមូលកោសិកាពីសត្វត្រីរស់ ក្រោយមកចិញ្ចឹមវានៅក្នុងឡប្រតិកម្មជីវសាស្ត្រដែលមានបរិស្ថានសម្បូរសារជាតិបំប៉ន។ បន្ទាប់មក កោសិកាទាំងនោះ រីកចម្រើនធំឡើងនៅលើឧបករណ៍ពិសោធន៍ ដូចទៅនឹងសាច់ត្រីធម្មតា។ ដំណាក់កាលទាំងអស់នៃការអភិវឌ្ឍសាច់ត្រីសិប្បនិម្មិតនេះ មិនត្រូវការសកម្មភាពសម្លាប់ត្រីពិតនោះទេ នេះបើតាម TechCrunch ចុះផ្សាយកាលពីថ្ងៃទី ០៨ សីហា។

បច្ចុប្បន្ន ក្រៅពី Bluu ក៏មានក្រុមហ៊ុនជាច្រើនផ្សេងទៀតកំពុងរកវិធីនាំយកផលិតផលគ្រឿងសមុទ្រដែលផលិតដោយបច្ចេកវិទ្យាចិញ្ចឹមកោសិកា ទៅក្នុងទីផ្សារ ក្នុងនោះមានដូចជា ក្រុមហ៊ុន Wild Type និង CellMeat ជាដើមល។ល។

August 10, 2022

សហរដ្ឋអាម៉េរិក ចុះហត្ថលេខាលើសេចក្ដីសម្រេចបញ្ចូល ស៊ុយអែត និង ហ្វាំងឡង់ ជាសមាជិកណាតូ

ប្រធានាធិបតីសហរដ្ឋអាម៉េរិក លោក ចូ បៃដិន កាលពីថ្ងៃទី ០៩ សីហា បានចុះហត្ថលេខាចុងក្រោយលើសេចក្ដីសម្រេចទទួលយក ស៊ុយអែត និង ហ្វាំងឡង់ ជាសមាជិករបស់ ណាតូ (NATO)។

ការចុះហត្ថលេខានេះគឺជាជំហានចុងក្រោយបង្អស់របស់ សហរដ្ឋអាម៉េរិក ក្នុងដំណើរការនៃការអនុម័តលើលិខិតស្នើសុំឱ្យពិនិត្យលើការដាក់បញ្ចូលជាសមាជិកណាតូ ចំពោះ ប្រទេសហ្វាំងឡង់ និង ស៊ុយអែត។ ថ្លែងនៅក្នុងពិធីចុះហត្ថលេខា លោក បៃដិន ឱ្យដឹងថា សហរដ្ឋអាម៉េរិក គឺជាសម្ព័ន្ធមិត្តទី ២៣ ក្នុងអង្គការណាតូ ដែលបានអនុម័តឱ្យប្រទេសទាំងពីរនេះ ចូលជាសមាជិក។

ហ្វាំងឡង់ និង ស៊ុយអែត បានដាក់ពាក្យសុំចូលជាសមាជិកសម្ព័ន្ធយោធាណាតូ កាលពីថ្ងៃទី ១៨ ឧសភា។ ៣០ ប្រទេសដែលជាសមាជិករបស់ ណាតូ បានចុះហត្ថលេខាលើលិខិតស្នើឱ្យធ្វើការអនុម័តលើពាក្យស្នើសុំរបស់ប្រទេសទាំងពីរខាងលើកាលពីថ្ងៃទី ៣០ ឧសភា។ ហ្វាំងឡង់ និង ស៊ុយអែត នឹងក្លាយជាសមាជិករបស់សម្ព័ន្ធយោធានេះ បន្ទាប់ពីសភារបស់ប្រទេសទាំង ៣០ នៃអង្គការនេះ អនុម័តរួចរាល់៕

August 10, 2022

ផ្ទុះធំជាច្រើនករណីនៅឯព្រលានយន្តហោះរបស់ឧបទ្វីបគ្រីមៀ (Crimea)

ក្រសួងការពារជាតិរុស្ស៊ី បានឱ្យដឹងថា ឃ្លាំងអាវុធនៅឯព្រលានយន្តហោះរបស់ ឧបទ្វីបគ្រីមៀ បានផ្ទុះ បណ្ដាលឱ្យកើតមានអគ្គិភ័យច្រើនកន្លែង ប៉ុន្តែ មិនមែនជាការវាយប្រហារពីសត្រូវ។

គ្រាប់បែក និងគ្រាប់កាំភ្លើងសម្រាប់យន្តហោះចម្បាំងបានផ្ទុះនៅឯព្រលានយន្តហោះ Saki ក្បែរតំបន់រស់នៅ Novofyodorovka នៃឧបទ្វីបគ្រីមៀ នេះបើតាម ក្រសួងការពារជាតិរុស្ស៊ី។ ស្ថាប័ននេះកំពុងស្វែងរកមូលហេតុនៃការផ្ទុះនេះ ប៉ុន្តែបានអះអាងថា ព្រលានយន្តហោះនេះមិនមែនជាគោលដៅនៃការវាយប្រហារ។ ករណីផ្ទុះឃ្លាំងអាវុធនេះបានបណ្ដាលឱ្យមានមនុស្សស្លាប់ម្នាក់ និងរងរបួស ៥ នាក់។

ឧបទ្វីបគ្រីមៀ មានទីតាំងនៅជាប់ជាមួយនឹងតំបន់ Kherson នៅភាគខាងត្បូងនៃ ប្រទេសអ៊ុយក្រែន ជាទីដែលកំពុងត្រូវបានគ្រប់គ្រងដោយ រុស្ស៊ី និងជិតតំបន់ Zaporizhzhia នៅភាគអាគ្នេយ៍អ៊ុយក្រែន ដែលមួយភាគធំស្ថិតក្នុងការកាន់កាប់របស់ ទីក្រុងមូស្គូ។

ភាគីខាងអ៊ុយក្រែន មិនទាន់មានការអធិប្បាយអ្វីទាក់ទិននឹងករណីផ្ទុះឃ្លាំងអាវុធនៅក្នុង តំបន់គ្រីមៀ នៅឡើយ ប៉ុន្តែ កងទ័ពប្រទេសនេះត្រូវបានគេមើលឃើញថា មិនធ្លាប់បានវាយប្រហារលើគោលដៅនៅលើឧបទ្វីបនេះ ចាប់តាំងពីសង្គ្រាមផ្ទុះឡើងកាលពីថ្ងៃទី ២៤ កុម្ភៈ។

August 10, 2022

ពាណិជ្ជកម្មទ្វេភាគីរវាង ថៃ និង វៀតណាម នឹងសម្រេចបាន ២៥ ពាន់លានដុល្លារអាម៉េរិក ក្នុងឆ្នាំ ២០២៥

លោក Nikorndej Balankura ឯកអគ្គរាជទូតប្រទេសថៃ ប្រចាំ ប្រទេសវៀតណាម នៅក្នុងពិធីសម្ពោធព្រឹត្តិការណ៍សប្ដាហ៍ថៃ ឆ្នាំ ២០២២ នៅ ទីក្រុងព្រៃនគរ (ក្រុងហូជីមិញ) នាពេលថ្មីៗនេះ បានអះអាងថា ក្នុងឆ្នាំ ២០២៥ ការដោះដូរពាណិជ្ជកម្មទ្វេភាគីរវាង ថៃ និង វៀតណាម នឹងសម្រេចបាន ២៥ ពាន់លានដុល្លារអាម៉េរិក។

ទំនាក់ទំនងពិសេសរវាង ប្រទេសថៃ និង វៀតណាម បានឈានដល់ដំណាក់កាលចាស់ទុំ និងត្រូវបានលើកកម្ពស់ទៅជា «ទំនាក់ទំនងយុទ្ធសាស្ត្រកម្រិតជំរុញបន្ថែម» ចាប់តាំងពីឆ្នាំ ២០១៩។

កាលពីឆ្នាំ ២០២១ ប្រទេសថៃ បានបង្កើតសមាគមសហគ្រាសថៃ នៅ ប្រទេសវៀតណាម ឬហៅថា ThaiCham ក្នុងបំណងជំរុញលំហូរពាណិជ្ជកម្ម និងវិនិយោគរវាងប្រទេសទាំងពីរ។

ឯកអគ្គរាជទូតប្រទេសថៃ ប្រចាំ ប្រទេសវៀតណាម ឱ្យដឹងថា ការដោះដូរពាណិជ្ជកម្មទ្វេភាគីរវាង ថៃ និង វៀតណាម ក្នុងឆ្នាំ ២០២១ សម្រេចបាន ១៨.៨ ពាន់លានដុល្លារអាម៉េរិក កើន ១៧.៩% ធៀបនឹងឆ្នាំ ២០២០។ ប្រទសថៃ គឺជាដៃគូពាណិជ្ជកម្មធំជាងគេរបស់ វៀតណាម នៅក្នុងតំបន់អាស៊ីអាគ្នេយ៍ និងជាអ្នកវិនិយោគបរទេសធំលំដាប់ទី ៨ របស់ វៀតណាម។

ទន្ទឹមនឹងប្រការខាងលើ ប្រទេសថៃ និង វៀតណាម កំពុងតែប្រឹងប្រែងដើម្បីសម្រេចបានគោលដៅពាណិជ្ជកម្មទ្វេភាគីឱ្យបាន ២៥ ពាន់លានដុល្លារអាម៉េរិក នៅក្នុងឆ្នាំ ២០២៥ ខាងមុខ នេះបើតាមការអះអាងរបស់លោក Nikorndej Balankura ឯកអគ្គរាជទូតប្រទេសថៃ ប្រចាំ ប្រទេសវៀតណាម។

ពិធីសម្ពោធព្រឹត្តិការណ៍សប្ដាហ៍ថៃ ឆ្នាំ ២០២២ នៅ ទីក្រុងព្រៃនគរ (ក្រុងហូជីមិញ) នាពេលថ្មីៗនេះ

ពិព័រណ៍ពាណិជ្ជកម្មមួយរបស់ ថៃ នៅ វៀតណាម កាលពីពេលថ្មីៗនេះ

August 10, 2022

អតីត CEO របស់ JPMorgan ៖ ក្រុមមនុស្សកំពូលជោគជ័យ តែងតែឈានជើងចេញពីតំបន់សុវត្ថិភាព

អតីត CEO មួយរូបនៃធនាគារមួយក្នុងចំណោមធនាគារធំៗជាងគេក្នុងពិភពលោក JPMorgan បានលើកទឹកចិត្តឱ្យគ្រប់គ្នាចាកចេញពីតំបន់សុវត្ថិភាព ដោយជឿថា ការទទួលយកបទពិសោធន៍នៅក្នុងបរិស្ថានថ្មី និងមិនស្រួលអារម្មណ៍ បាននាំគាត់ទៅដល់ទីឋានជោគជ័យយ៉ាងត្រចះត្រចង់។

តំបន់សុវត្ថិភាពរបស់អ្នកពិតជាស្រួលខ្លួន ស្រួលអារម្មណ៍ ប៉ុន្តែក៏មានកម្រិត។ Bill Harrison ដែលជាអតីត CEO របស់ធនាគារធំបំផុតមួយក្នុងពិភពលោក គឺ JPMorgan បានលើកទឹកចិត្តឱ្យមនុស្សគ្រប់រូបហ៊ានចាកចេញពីតំបន់សុវត្ថិភាពនោះ។

«អ្នកត្រូវតែឈានជើងចេញពីតំបន់សុវត្ថិភាពរបស់ខ្លួន។ នោះគឺជាវិធីដើម្បីឱ្យអ្នកបន្តរីកចម្រើន» លោក Harrison និយាយនៅក្នុងកម្មវិធី «How Leaders Lead with David Novak» កាលពីពេលថ្មីៗនេះ។

យោងតាមលោក Harrison ដែលធ្លាប់ធ្វើជា CEO របស់ JPMorgan ចន្លោះពីឆ្នាំ ២០០០ ដល់ ២០០៦ ជាធម្មតាអ្នកតែងតែបានរៀនសូត្រអំពីអ្វីមួយពីបរិស្ថាន តំណែង ឬឱកាសថ្មី ដែលជំរុញការអភិវឌ្ឍខ្លួន និងនាំអ្នកទៅដល់វិថីឆ្ពោះទៅកាន់ភាពជោគជ័យ។ មុនពេលបានឡើងទៅកាន់តំណែងជាអ្នកដឹកនាំធនាគារធំបំផុតមួយនៅ សហរដ្ឋអាម៉េរិក ការងាររបស់លោក Harrison បានជួបនឹងការប្រែប្រួលធំៗជាបន្តបន្ទាប់។ លោក Harrison មិនពេញចិត្តនឹងការប្រែប្រួលទាំងនោះឡើយ ប៉ុន្តែ វាបែរជាជួយឱ្យលោកបានទទួលជោគជ័យនាពេលក្រោយៗមកទៀត។

អតីត CEO របស់ JPMorgan បានប្រាប់ថា ការផ្លាស់ប្ដូរបានជួយលើកកម្ពស់ការងាររបស់លោកច្រើនជាងគេ។ នោះគឺក្នុងអំឡុងទសវត្សរ៍ឆ្នាំ ១៩៨០ ពេលលោកទទួលតំណែងជាអ្នកគ្រប់គ្រងដំបូង ជាមួយនឹងតួនាទីដឹកនាំក្រុមការងារដែលមានបុគ្គលិក ១៣ នាក់ នៅក្នុងការិយាល័យតំបន់របស់ Chemical Bank នៅ San Francisco។ ៣ ឆ្នាំក្រោយមក ធនាគារនេះបានស្នើឱ្យលោកទៅធ្វើការនៅ ទីក្រុងឡុងដ៍ ដើម្បីគ្រប់គ្រងទីផ្សារនៅ អឺរ៉ុប ជាទីដែលលោកត្រូវគ្រប់គ្រងបុគ្គលិកប្រមាណ ១,៣០០ នាក់។

ដំបូង លោក Harrison មិនចូលចិត្តគំនិតនេះ។ «ខ្ញុំមិនចង់ទៅកាន់ ក្រុងឡុងដ៍។ ខ្ញុំសប្បាយរីករាយនឹងការងារនៅ San Francisco។ គំនិតខ្ញុំគឺថា ខ្ញុំមានអារម្មណ៍ស្រួលខ្លួននៅពេលស្ថិតក្នុងតំបន់សុវត្ថិភាពរបស់ខ្លួន»។

ទោះជាយ៉ាងនេះក្ដី គាត់ប្រមូលបានចំណេះដឹងជាច្រើននៅពេលធ្វើការក្នុងបរិស្ថានថ្មី ប្លែក និងលំបាកនោះ។ «បទពិសោធន៍នេះពិតជាបានបង្រៀនខ្ញុំនូវប្រការជាច្រើន គឺច្រើនជាងអ្វីដែលខ្ញុំធ្លាប់បានធ្វើមុននោះ»។

និយាយរួម បទពិសោធន៍ទាំងឡាយនៅក្នុងបរិស្ថានប្លែក ថ្មី និងមិនស្រួលអារម្មណ៍ដែល Harrison បានឆ្លងកាត់ បាននាំគាត់ទៅកាន់អាជីពមួយប្រកបដោយជោគជ័យយ៉ាងត្រចះត្រចង់។

ឆ្នាំ ១៩៩១ ក្រោយពីប៉ុន្មានឆ្នាំដែល Harrison បានចាកចេញពី ទីក្រុងឡុងដ៍ ដើម្បីត្រលប់ទៅដឹកនាំអាជីវកម្មនៅ សហរដ្ឋអាម៉េរិក របស់ Chemical Bank គាត់បានជួយរៀបចំដំណើរការនៃការច្របាច់បញ្ចូលគ្នារវាងធនាគារនេះ ជាមួយនឹង Manufactures Hanover ដែលជាការទិញដូរក្រុមហ៊ុនដំបូងក្នុងចំណោម ៣ ករណីចុងក្រោយដែលបង្កើតបានជា JPMorgan Chase កាលពីឆ្នាំ ២០០០។ លោក Harrison បានចូលនិវត្តន៍កាលពីឆ្នាំ ២០០៦ បន្ទាប់ពីជិត ៤ ទសវត្សរ៍ដែលលោកបានធ្វើការក្នុងវិស័យធនាគារ។

ក្នុងអាជីពរបស់ខ្លួន លោក Harrison ត្រូវបានគេដាក់ឱ្យស្ថិតក្នុងស្ថានភាពត្រូវធ្វើការជ្រើសរើសជាញឹកញាប់រវាងការចាកចេញពីតំបន់សុវត្ថិភាពរបស់គាត់ និងការនៅជាមួយក្រុមមនុស្សដែលលោកស្គាល់ជិតស្និទ្ធ លោក Harrison ចែករំលែកបទពិសោធន៍របស់គាត់ដូច្នេះ។ គាត់ថា គាត់តែងតែជ្រើសរើសវិធីដែលមិនជួយឱ្យគាត់បានស្រួលចិត្ត ហើយគាត់ក៏មិនដែលស្ដាយក្រោយចំពោះអ្វីដែលគាត់បានសម្រេចចិត្តចំពោះការជ្រើសរើសទាំងនោះ។

«ពេលងាកមើលក្រោយ ខ្ញុំឃើញថា បើសិនមិនបានធ្វើដូច្នោះ ខ្ញុំប្រាកដជាបានរំលងចោលបទពិសោធន៍ទាំងឡាយដែលអស្ចារ្យ មិនគួរឱ្យជឿ» អតីត CEO របស់ធនាគារ JPMorgan សង្កត់ធ្ងន់ដូច្នេះ៕

August 10, 2022

វៀតណាម បញ្ចុះអត្រាពន្ធគយនាំចូលសម្រាប់ទំនិញពិសេស «ប្រេងសាំង»

អត្រាពន្ធពិសេសចំពោះប្រេងសាំងនាំចូលពីបរទេស ត្រូវបាន វៀតណាម បញ្ចុះពី ២០% មកនៅត្រឹម ១០% និងមានសុពលភាពចាប់ពីថ្ងៃទី ០៨ សីហានេះ។

យោងតាម ក្រសួងហិរញ្ញវត្ថុវៀតណាម ធៀបនឹងប្រទេសជាច្រើន អត្រាពន្ធគយសម្រាប់ប្រេងសាំងរបស់ វៀតណាម ដែលនាំចូលពីបរទេស នាបច្ចុប្បន្ន នៅមានកម្រិតទាបជាងមធ្យមភាគរួម។ អត្រាពន្ធលើប្រេងសាំងនៅក្នុងបណ្ដាប្រទេស ភាគច្រើនស្ថិតក្នុងរង្វង់ពី ៤០% ទៅ ៥៥% និង ៣៥% ទៅ ៥០% សម្រាប់ប្រេងម៉ាស៊ូត (លើកលែងតែប្រទេសដែលមានបរិមាណប្រេងសាំងក្នុងឃ្លាំងច្រើន ទើបមានអត្រាពន្ធគយទាបជាង)។

នៅ ប្រទេសវៀតណាម អត្រាពន្ធការពារបរិស្ថានដែលកំពុងត្រូវបានបន្ធូរបន្ថយ ជួយឱ្យអត្រាពន្ធក្នុងតម្លៃមូលដ្ឋានរបស់សាំងស្ថិតក្នុងចន្លោះពី ១៩.៣៩% ទៅ ២១.៩៥% ទៅតាមប្រភេទសាំង និង ១១.០៥% ចំពោះប្រេងម៉ាស៊ូត។

ក្រសួងហិរញ្ញវត្ថុវៀតណាម បានបញ្ជាក់ថា ទំនិញប្រេងសាំងភាគច្រើនត្រូវបាននាំចូលពីបណ្ដាប្រទេសដែលមានកិច្ចព្រមព្រៀងពាណិជ្ជកម្មសេរី (FTA) ជាមួយ វៀតណាម ដូច្នេះ ពន្ធនាំចូលមានអត្រាទាបជាង ធៀបនឹង ពន្ធ MFN (MFN ជាប្រភេទនៃប្រព័ន្ធអនុគ្រោះពន្ធមួយសម្រាប់បណ្ដាប្រទេសក្រីក្រ)៕

August 9, 2022

ចិន រកឃើញវីរុសថ្មី «កាចសាហាវជាងកូវីដ-១៩» និងអាចឆ្លងពីសត្វកណ្ដុរមកមនុស្ស

អត្ថបទព័ត៌មានមួយដែលចុះផ្សាយលើទស្សនាវដ្ដីវេជ្ជសាស្ត្រដ៏ល្បីឈ្មោះមួយកាលពីពេលថ្មីៗនេះបានឱ្យដឹងថា ក្រុមអ្នកស្រាវជ្រាវបានរកឃើញប្រភេទវីរុសថ្មីមួយនៅ ប្រទេសចិន ដែលត្រូវបានគេហៅបណ្ដោះអាសន្នថា «LayV» អាចឆ្លងមកមនុស្សតាមរយៈសត្វ និងនាំឱ្យកើតជំងឺសាហាវផ្សេងៗ។

អត្ថបទខាងលើត្រូវបានចុះផ្សាយដោយទស្សនាវដ្ដី «The New England Journal of Medicine» (NEJM) ហើយព័ត៌មានស្ដីពីអត្ថបទនោះត្រូវបានប្រកាសដោយទំព័រ The Paper របស់ ចិន។ ការរកឃើញវីរុសខាងលើនេះ គឺជាលទ្ធផលនៃកិច្ចសហការរវាងក្រុមអ្នកវិទ្យាសាស្ត្រចិន និង សិង្ហបុរី។

អត្ថបទស្ដីពីរបកគំហើញនោះបានឱ្យដឹងថា វីរុសដែលទើបរកឃើញនោះគឺ Henipavirus មានប្រភពពីសត្វ អាចឆ្លងមកមនុស្ស និងត្រូវបានរកឃើញនៅក្នុងខេត្ត សានទុង និង ខេត្តហឺណាន ប្រទេសចិន។ ក្រុមអ្នកវិទ្យាសាស្ត្របានដាក់ឈ្មោះឱ្យវីរុសនោះថា Langya henipavirus (LayV)។ គិតមកដល់បច្ចុប្បន្ន មានមនុស្ស ៣៥ នាក់បានឆ្លងវីរុសនេះ។

ការវិភាគហ្សែនបានបង្ហាញថា សត្វកណ្ដុលច្រមុះវែងមួយប្រភេទ ដែលមានឈ្មោះក្នុងបញ្ជីវិទ្យាសាស្ត្រថា Sorex araneus Linnaeus។ កណ្ដុរដែលរស់នៅក្នុងព្រៃនេះ អាចជាភ្នាក់ងារចម្លងក្នុងធម្មជាតិរបស់វីរុសនេះ។ បច្ចុប្បន្ន មិនទាន់ដឹងច្បាស់ថា វីរុសនេះអាចឆ្លងពីមនុស្សទៅមនុស្សដែរ ឬយ៉ាងណានៅឡើយ។

សត្វកណ្ដុលច្រមុះវែងមួយប្រភេទ ដែលមានឈ្មោះក្នុងបញ្ជីវិទ្យាសាស្ត្រថា Sorex araneus Linnaeus អាចជាភ្នាក់ងារចម្លងវីរុស Henipavirus

អ្នកជំងឺទាំង ៣៥ នាក់ដែលបានឆ្លងវីរុសខាងលើ សុទ្ធតែមានអាការក្ដៅខ្លួន ក្នុងនោះមានអ្នកជំងឺចំនួនជាងពាក់កណ្ដាល មានអាការអស់កម្លាំង ក្អក មិនចង់បរិភោគអាហារ។ ចំណែកអ្នកជំងឺពី ៣០% ទៅ ៤០% មានរោគសញ្ញាដូចជា ឈឺសាច់ដុំ ក្អួតចង្អោរ ឈឺក្បាល និង ៨% ត្រូវខ្សោយមុខងារតម្រងនោម។

បច្ចុប្បន្ន ពុំទាន់មានវ៉ាក់សាំង ឬថ្នាំសម្រាប់ព្យាបាលជំងឺ Henipavirus នេះនៅឡើយ។ វិធីសាស្ត្រព្យាបាលតែមួយគត់ នោះគឺថែទាំ និងជួយដល់អ្នកជំងឺដើម្បីអាចគ្រប់គ្រងអាការរោគ។ យោងតាម WHO អត្រានៃការស្លាប់ដោយសារ Henipavirus គឺពី ៤០% ទៅ ៧៥% ខ្ពស់ជាងឆ្ងាយធៀបនឹង កូវីដ-១៩៕

August 9, 2022

វិស័យទេសចរណ៍របស់ ឡាវ មានសញ្ញាប្រសើរជាងមុន បន្ទាប់ពីបើកប្រទេសឡើងវិញ

ក្នុង ៦ ខែដើមឆ្នាំនេះ ភ្ញៀវបរទេសដែលបានមកទេសចរណ៍នៅ ប្រទេសឡាវ មានជាង ៤២ ពាន់នាក់ ក្នុងនោះភាគច្រើននៅក្នុងខែឧសភា និងខែមិថុនា។

ប្រភពព័ត៌មានពី រដ្ឋធានីវៀងចន្ទន៍ បានឱ្យដឹងថា នាយកដ្ឋានអភិវឌ្ឍទេសចរណ៍ នៃ ក្រសួងព័ត៌មាន វប្បធម៌ និងទេសចរណ៍ឡាវ ប្រកាសថា ចំនួនទេសចរមកកាន់ប្រទេសនេះបានកើនឡើងវិញ បន្ទាប់ពី ឡាវ បានដកបម្រាមក្នុងការដើរហើរកាលពីខែមករា ២០២២។

ជាក់ស្ដែង ក្នុងរយៈពេល ៦ ខែដើមឆ្នាំនេះ ភ្ញៀវបរទេសដែលបានមកកាន់ ប្រទេសឡាវ ដោយប្រើប្រាស់ទិដ្ឋាការទេសចរណ៍ មានជាង ៤២ ពាន់នាក់ ក្នុងនោះភាគច្រើននៅក្នុងខែឧសភា និងខែមិថុនា នៅពេលរដ្ឋាភិបាល បានលុបចោលលក្ខខណ្ឌនៃការផ្ដល់ទិដ្ឋាការ ទាក់ទិននឹងការបង្ការជំងឺកូវីដ-១៩។

នាយកដ្ឋានអភិវឌ្ឍទេសចរណ៍ឡាវ បានឱ្យដឹងថា ក្នុងអំឡុង ៥ ខែដើមឆ្នាំ ២០២២ ឡាវ បានទទួលភ្ញៀវបរទេសជាង ៣៦,៥០០ នាក់ ស្នាក់នៅជាមធ្យម ៧.៩ ថ្ងៃ និងចំណាយមធ្យមប្រមាណ ៨៣ ដុល្លារអាម៉េរិក/ម្នាក់/ថ្ងៃ បង្កើតបានចំណូលជូនរដ្ឋជាង ៤.៥៥ លានដុល្លារអាម៉េរិក។

ចំនួនទេសចរក្នុងស្រុកក្នុង ៥ ខែដើមឆ្នាំនេះ ក៏ឡើងដល់ជាង ៦២៦,០០០ លើក កើន ២.៨% ធៀបនឹងដំណាក់កាលដូចគ្នាក្នុងឆ្នាំកន្លង និងបង្កើតបានចំណូលប្រមាណ ៧០.៧៩ លានដុល្លារ។

យោងតាម នាយកដ្ឋានអភិវឌ្ឍទេសចរណ៍ឡាវ ភ្ញៀវមកពី តំបន់អាស៊ីអាគ្នេយ៍ គឺមានច្រើន ក្នុងនោះ ប្រទេសថៃ ឈរលំដាប់កំពូលតារាង ដោយមាន ១៨,០០០ នាក់ បានទៅលើ ប្រទេសឡាវ ក្នុងអំឡុង ៦ ខែដើមឆ្នាំ ២០២២។

August 9, 2022

Author: សឿន សំណាង