សឿន សំណាង - La Reine Media

ក្រុមហ៊ុនមួយរបស់ចិន ក្លាយជាអ្នកវិនិយោគធំជាងគេក្នុងប្រវត្តិសាស្ត្ររបស់ ហុងគ្រី

ក្រុមហ៊ុន CATL បានសម្រេចចិត្តបោះទុនវិនិយោគ ៧.៦ ពាន់លានដុល្លារអាម៉េរិក ទៅក្នុងគម្រោងសាងសង់រោងចក្រផលិតថ្មផ្ទុកអគ្គិសនីមួយសម្រាប់ផ្គត់ផ្គង់ដល់បណ្ដារោងចក្រផលិតរថយន្តនៅ ប្រទេសហុងគ្រី។

កាលពីចុងសប្ដាហ៍កន្លង ក្រុមហ៊ុនបច្ចេកវិទ្យាផ្ទុកថាមពល Contemporary Amperex Technology Co. Limited (CATL) របស់ ចិន បានក្លាយជាអ្នកវិនិយោគធំជាងគេបង្អស់ក្នុងប្រវត្តិសាស្ត្ររបស់ ប្រទេសហុងគ្រី នៅពេលភាគីទាំងពីរសម្រេចបានកិច្ចព្រមព្រៀងសហការដែលមានតម្លៃ ៧.៦ ពាន់លានដុល្លារ ក្រោយពីការចរចាជាង ២ ឆ្នាំ។

នៅលើទំព័របណ្ដាញសង្គមរបស់ខ្លួន រដ្ឋមន្ត្រីក្រសួងការបរទេស និងពាណិជ្ជកម្មហុងគ្រី Peter Szijjarto បានឱ្យដឹងថា ក្រុមហ៊ុន CATL បានសម្រេចចិត្តវិនិយោគ ៧.៦ ពាន់លានដុល្លារអាម៉េរិក ទៅក្នុងគម្រោងសាងសង់រោងចក្រផលិតថ្មផ្ទុកថាមពលមួយ សម្រាប់ផ្គត់ផ្គង់ដល់បណ្ដារោងចក្រផលិតរថយន្តនៅ ហុងគ្រី។ នេះក៏ជាខ្ទង់វិនិយោគទៅលើវិស័យថាមពលបៃតងធំបំផុតនៅក្នុងប្រវត្តិសាស្ត្ររបស់ ប្រទេសហុងនេះ។

នៅក្នុងប្រកាសមួយ CATL ក៏បានឱ្យដឹងថា ក្រុមហ៊ុននេះនឹងសាងសង់រោងចក្រផលិតថ្មផ្ទុកអគ្គិសនី ១០០ GWh នៅ Debrencen ភាគខាងកើតនៃ ប្រទេសហុងគ្រី។ Debrencen គឺជាទីរួមស្រុកធំទីពីរនៅ ហុងគ្រី និងស្ថិតនៅចំកណ្ដាល ទ្វីបអឺរ៉ុប។

មជ្ឈមណ្ឌលពិព័រណ៍មួយនៅ អឺរ៉ុប របស់ក្រុមហ៊ុនចិន CATL

រោងចក្រថ្មីនេះនឹងផ្គត់ផ្គង់គ្រឿងបន្លាស់ជាដើម ទៅឱ្យបណ្ដាក្រុមហ៊ុនផលិតរថយន្តនៅ អឺរ៉ុប ដូចជា Mercedes-Benz, BMW, Stellantis និង Volkswagen។ល។ រោងចក្រនេះមានផ្ទៃក្រឡាប្រហែល ២២១ ហិកតា និងជារោងចក្រទីពីររបស់ CATL នៅ អឺរ៉ុប បន្ទាប់ពីរោងចក្រមួយនៅ ប្រទេសអាល្លឺម៉ង់។ ការសាងសង់រោងចក្ររបស់ CATL នៅ Debrecen គ្រោងនឹងចាប់ផ្ដើមក្នុងឆ្នាំនេះ។

គម្រោងថ្មីនេះកំពុងតែជួយឱ្យ ហុងគ្រី ក្លាយជាមជ្ឈមណ្ឌលធំមួយទាក់ទងនឹងទីផ្សាររថយន្តអគ្គិសនីនៅ អឺរ៉ុប។ Debrecen គឺជាតំបន់ដែលមានរោងចក្រជាច្រើនកំពុងត្រូវបាន BMW សាងសង់ ខណៈដែលក្រុមហ៊ុន Audi មានរោងចក្រនៅ Gyor ភាគខាងលិចរបស់ ហុងគ្រី និងក្រុមហ៊ុន Mercedes-Benz មានរោងចក្រនៅ Kecskemet ភាគកណ្ដាលនៃប្រទេស៕

August 16, 2022

រុស្ស៊ី ប្រកាសបង្ហាញស្ថានីយអវកាសថ្មីផ្ទាល់ខ្លួន សម្រាប់ដំណាក់កាលក្រោយដកថយពី ISS

ទីភ្នាក់ងារអវកាសរុស្ស៊ី (Roscosmos) កាលពីម្សិលមិញ បានប្រកាសបង្ហាញទម្រង់រូបរាងគំរូនៃស្ថានីយអវកាសថ្មី ក្នុងគ្រាប្រទេសនេះមានគម្រោងដកខ្លួនពីស្ថានីយអវកាសអន្តរជាតិ (ISS) ក្រោយឆ្នាំ ២០២៤។

ទម្រង់រូបរាងរបស់ស្ថានីយអវកាសថ្មីរបស់ រុស្ស៊ី ត្រូវបានប្រកាសបង្ហាញនៅក្នុងវេទិកាយោធា-បច្ចេកទេសអន្តរជាតិ Army 2022។ ក្រុមហ៊ុនអវកាស Energia ដែលជាក្រុមហ៊ុនបុត្រសម្ព័ន្ធរបស់ Roscosmos បច្ចុប្បន្នកំពុងអភិវឌ្ឍគ្រោងឆ្អឹងរបស់ស្ថានីយអវកាសអនាគត ដែលគ្រោងនឹងត្រូវបានដំឡើងនៅទីអវកាសទៅតាម ២ ដំណាក់កាល។

ដំណាក់កាលពី ១ រួមមាន ម៉ូឌុលចំនួន ៤ និងមានសមាជិកនៅលើស្ថានីយនេះចំនួន ២ នាក់។ ដំណាក់កាលទី ២ នឹងបន្ថែមមូឌុលចំនួន ២ ទៀត។ ក្រោយមក ចំនួនសមាជិកក្នុងស្ថានីយអវកាសនេះនឹងកើនឡើងដល់ ៤ នាក់។

រូងរាងគំរូនៃស្ថានីយអវកាសថ្មី និងផ្ទាល់ខ្លួនរបស់ ប្រទេសរុស្ស៊ី

កាលពីខែកក្កដាកន្លងទៅ ប្រធានអង្ការ Roscosmos លោក Yury Borisov ថ្លែងថា រុស្ស៊ី នឹងដកខ្លួនពី ISS ក្រោយឆ្នាំ ២០២៤។ លោក Yury បញ្ជាក់ថា ការសម្រេចចិត្តនេះមិនជាប់ពាក់ព័ន្ធនឹងបញ្ហាភូមិសាស្ត្រនយោបាយឡើយ។

រុស្ស៊ី អាចផ្ដើមសាងសង់ស្ថានីយអវកាសផ្ទាល់ខ្លួន ចាប់ពីឆ្នាំ ២០២៨ នេះបើយោងទៅតាមលោក Vladimir Solovyov អវកាសចរជំនាន់សូវៀត និងបច្ចុប្បន្នជាប្រធានក្រុមរចនារបស់ក្រុមហ៊ុនអភិវឌ្ឍយានអវកាស RSC Energia ឱ្យដឹងកាលពីឆ្នាំ ២០២១៕

August 16, 2022

តម្លៃអគ្គិសនីនៅ ប្រទេសថៃ កើនឡើងខ្ពស់មិនធ្លាប់មាន

ប្រទេសថៃ ថ្មីៗនេះ បានអនុម័តដំឡើងថ្លៃអគ្គិសនីក្នុងអត្រា ១៨% ចាប់ពីខែកញ្ញា ២០២២ នាំឱ្យតម្លៃអគ្គិសនីនៅប្រទេសនេះ ឡើងដល់ ៤.៧២ បាត/គីឡូវ៉ាតម៉ោង។

តម្លៃអគ្គិសនីសម្រាប់ប្រើប្រាស់តាមគ្រួសារនៅ ប្រទេសថៃ នឹងកើនឡើងដល់ ៤.៧២ បាត (៥៥១ រៀល) ក្នុង ១ គីឡូវ៉ាតម៉ោង ខ្ពស់បំផុតមិនធ្លាប់មានពីមុនមករបស់ប្រទេសនេះ នៅពេល គណៈកម្មការគ្រប់គ្រងថាមពល (ERC) ដំឡើងថ្លៃឥន្ធនៈក្នុងអំឡុងពេលពីខែកញ្ញាដល់ខែធ្នូ ២០២២។

តម្លៃឥន្ធនៈនៅ ប្រទេសថៃ បានកើនឡើងខ្ពស់ខ្លាំង ព្រោះតែប្រទេសនេះត្រូវនាំចូលឧស្ម័នធម្មជាតិរាវ (LNG) ពីទីផ្សារដែលមានស្រាប់ ដើម្បីបង្គ្រប់ទៅលើការថយចុះនៃបរិមាណដែលផលិតបានពី ឈូងសមុទ្រថៃ។ ថៃ នាំចូល LNG រហូតដល់ ៦០% ធៀបនឹងឥន្ធនៈសរុបដែលប្រើប្រាស់ដើម្បីផលិតអគ្គិសនីនៅ ប្រទេសនេះ។

ERC បានឱ្យដឹងថា ការផលិត LNG ក្នុងស្រុករបស់ ថៃ បានថយចុះច្រើន បង្ខំឱ្យប្រទេសនេះត្រូវនាំចូល LNG បន្ថែមទៀត ដើម្បីផ្គត់ផ្គង់ដល់បណ្ដារោងចក្រផលិតអគ្គិសនីរបស់ខ្លួន។ ទន្ទឹមនឹងនេះ សង្គ្រាមរវាង រុស្ស៊ី និង អ៊ុយក្រែន ក៏បានរុញច្រានតម្លៃ LNG នៅក្នុងទីផ្សារអន្តរជាតិ ឡើងខ្ពស់ខ្លាំង ធ្វើឱ្យការចំណាយលើការផលិតអគ្គិសនីនៅ ប្រទេសថៃ កើនឡើងថែមមួយកម្រិតទៀត។

REC ព្យាករថា ស្ថានភាពខ្វះ LNG នឹងអូសបន្លាយដល់ឆ្នាំ ២០២៣ ដោយសារប្រភពផ្គត់ផ្គង់នៅ ប្រទេសថៃ និង មីយ៉ានម៉ា នៅតែមិនអាចធានាបាន ហើយស្ថានការណ៍សេដ្ឋកិច្ចបច្ចុប្បន្នក៏មិនទាន់មានអំណោយផលល្អសម្រាប់ការវិនិយោគទៅលើគម្រោងថ្មីដើម្បីស្វែងរក LNG។

បច្ចុប្បន្ន ERC កំពុងស្រាវជ្រាវលើលទ្ធភាពនៃការប្រើប្រាស់ប្រភពឥន្ធនៈជំនួសសម្រាប់បណ្ដារោងចក្រអគ្គិសនីរបស់ ប្រទេសថៃ រួមមាន ប្រេង, ប្រេងម៉ាស៊ូត, ធ្យូង, វារីអគ្គិសនី និងថាមពលកកើតឡើងវិញ។

គណៈកម្មការគ្រប់គ្រងថាមពល (ERC) របស់ ថៃ ក៏បានអំពាវនាវដល់ប្រជាពលរដ្ឋ និងក្រុមហ៊ុន សហគ្រាសទាំងអស់ ឱ្យមានសន្សំសំច័យអគ្គិសនី ដើម្បីកាត់បន្ថយការពឹងផ្អែករបស់ ប្រទេសថៃ ទៅលើប្រភព LNG ពីបរទេស៕

August 16, 2022

សហរដ្ឋអាម៉េរិក ធ្វើសមយុទ្ធការពារមីស៊ីល ជាមួយ ជប៉ុន និង កូរ៉េខាងត្បូង

កងទ័ពជើងទឹកអាម៉េរិក កូរ៉េខាងត្បូង និងកងទ័ពរបស់ ជប៉ុន រួមគ្នាធ្វើសមយុទ្ធការពារមីស៊ីលនៅលើ មហាសមុទ្រប៉ាស៊ីហ្វ៊ិក ដើម្បីទប់ទល់នឹង «ឧបសគ្គពី កូរ៉េខាងជើង»។

«កងទ័ពជើងទឹកអាម៉េរិក កងកម្លាំងការពារសមុទ្ររបស់ ជប៉ុន និងកងទ័ពជើងទឹករបស់ កូរ៉េខាងត្បូង ថ្ងៃទី ០៨ ដល់ ១៤ (ខែសីហា) ចូលរួមធ្វើលំហាត់សមយុទ្ធព្រមាន ស្វែងរក និងតាមដានមីស៊ីលប្លោង នៅក្នុងក្របខណ្ឌនៃសមយុទ្ធពហុជាតិ Pacific Dragon នៅលើសមុទ្រក្បែរឆ្នេរហ្វឹកហ្វឺនមីស៊ីលប៉ាស៊ីហ្វ៊ិក (PMRF) នៅ Hawaii» មន្ទីរបញ្ចកោណ ប្រកាសកាលពីថ្ងៃទី ១៥ សីហា។

មន្ទីរបញ្ចកោណ ឱ្យដឹងថា សមយុទ្ធត្រូវបានធ្វើឡើងក្នុងបំណងបង្ហាញនូវការប្ដេជ្ញាចិត្តរបស់ សហរដ្ឋអាម៉េរិក, ជប៉ុន និង កូរ៉េខាងត្បូង ក្នុងការសហការត្រីភាគីដើម្បី «ទប់ទល់នឹងឧបសគ្គពី កូរ៉េខាងជើង ការការពារសន្តិសុខរួម និងការស្ដារសណ្ដាប់ធ្នាប់អន្តរជាតិដោយយោងទៅលើច្បាប់ទម្លាប់»។

កម្មវិធីហ្វឹកហ្វឺន Pacific Dragon ត្រូវបានធ្វើឡើង ២ ឆ្នាំម្ដង ដើម្បីកែលម្អសមត្ថភាពសហការផ្នែកបច្ចេកទេស យុទ្ធសាស្ត្រ ក៏ដូចជាកម្លាំងអន្តរកម្មទាក់ទងនឹងការបង្ការមីស៊ីល និងការការពារដែនអាកាសក្នុងតំបន់។ នាវាចម្បាំងចំនួន ៧ គ្រឿង មកពីប្រទេសចំនួន ៥ រួមមាន សហរដ្ឋអាម៉េរិក, ជប៉ុន, កូរ៉េខាងត្បូង, អូស្ត្រាលី និង កាណាដា ចូលរួមសមយុទ្ធ Pacific Dragon នៅក្នុងឆ្នាំនេះ៕

August 16, 2022

អ្នកបើកបរយន្តហោះពូកែបំផុតនៅ អ៊ុយក្រែន បាត់បង់ជីវិតពេលប្រយុទ្ធជាមួយសត្រូវ

ទីភ្នាក់ងារសារព័ត៌មាន Ukrinform របស់ អ៊ុយក្រែន កាលពីថ្ងៃទី ១៥ សីហា បានចុះផ្សាយថា អ្នកបើកបរយន្តហោះ Anton Lystopad អាយុ ៣១ ឆ្នាំ ដែលត្រូវបានវាយតម្លៃថាជាអ្នកបើកបរយន្តហោះម្នាក់ដែលពួកែជាងគេនៅ អ៊ុយក្រែន បានទទួលមរណភាពក្នុងពេលប្រយុទ្ធមួយជាមួយ កងទ័ពរុស្ស៊ី។

នៅលើទំព័រ Facebook សាលារូបវិទ្យា-វិស្វកម្ម Ivano Frankivsk ជាទីដែល Anton បានបញ្ចប់ការសិក្សា បានឱ្យដឹងថា «ឆ្នាំ ២០១៩ Anton ត្រូវបានទទួលស្គាល់ថាជាអ្នកបើកបរយន្តហោះពូកែជាងគេរបស់ ទ័ពអាកាសអ៊ុយក្រែន ហើយក្រោយមកក៏បានចូលរួមធ្វើសកម្មភាពយោធានៅភាគខាងកើត»។

ប្រកាសរបស់សាលាខាងលើក៏បានបញ្ជាក់ថា «អ្នកបើកបរយន្តហោះ Anton Lystopad បានការពារ ទឹកដីអ៊ុយក្រែន នៅចំពោះមុខការវាយប្រហារទូទៅរបស់ រុស្ស៊ី នៅក្នុងគ្រាដំបូងបង្អស់»។

យោងតាម Ukrinform លោក Anton Lystopad បានសិក្សានៅសាកលវិទ្យាល័យជាតិទ័ពអាកាស Ivan Kozhedub តាំងពីឆ្នាំ ២០១៣ ដល់ឆ្នាំ ២០១៨ និងក្លាយជាអ្នកបើកបរប្រយុទ្ធដែលមានឋាននន្តរសក្ដិខ្ពស់បំផុត។

ប៉ុន្មានថ្ងៃមុនពេលទទួលមរណភាព លោក Lystopad ត្រូវបានប្រធានាធិបតីរបស់ អ៊ុយក្រែន ផ្ដល់មេដាយក្លាហានថ្នាក់ទី ៣ ព្រោះតែបង្កើតបានស្នាដៃជាច្រើននៅក្នុងការប្រយុទ្ធដើម្បីការពារទឹកដី។

ក្រសួងការពារជាតិរុស្ស៊ី បានឱ្យដឹងថា យន្តហោះចម្បាំង និងកម្លាំងការពារដែនអាកាសរបស់ប្រទេសនេះ បានបាញ់ទម្លាក់យន្តហោះចម្បាំងជាង ២៦០ គ្រឿងរបស់ អ៊ុយក្រែន រាប់ចាប់តាំងពីសង្គ្រាមបានផ្ទុះឡើង៕

August 16, 2022

អូស្ត្រាលី កំពុងតែពិនិត្យលើលទ្ធភាពដំឡើងពិតាននៃអន្តោប្រវេសន៍ដើម្បីបង្កើនប្រភពពលករ

រដ្ឋាភិបាលអូស្ត្រាលី កំពុងតែពិនិត្យមើលលទ្ធភាពនៃការអនុញ្ញាតឱ្យនាំចូលពលករជំនាញពីបរទេសបន្ថែមទៀតដើម្បីឆ្លើយតបនឹងតម្រូវការទីផ្សារពលកម្មក្នុងប្រទេស ដែលបច្ចុប្បន្នស្ថិតក្នុងស្ថានភាពវិបត្តិកម្លាំងពលកម្ម។

គម្រោងលម្អិតនឹងត្រូវបាន រដ្ឋធានីកង់បេរ៉ា ប្រកាសនៅក្នុងរបាយការណ៍ថវិកាជាតិ ដែលនឹងចេញផ្សាយនៅក្នុងខែតុលាខាងមុខ។ ក៏ប៉ុន្តែ ប្រភពព័ត៌មានផ្ទៃក្នុងបានឱ្យដឹងថា អូស្ត្រាលី គ្រោងនឹងអនុញ្ញាតឱ្យបង្កើនការទទួលយកពលករបរទេសដែលមានជំនាញ ប្រមាណ ៤០,០០០ នាក់ជារៀងរាល់ឆ្នាំ បន្ថែមពីលើការកំណត់នាបច្ចុប្បន្ន ដែលនេះនឹងដំឡើងពិតាននៃការនាំចូលពលករអន្តប្រវេសន៍ឡើងដល់ជិត ២០០,០០០ នាក់/ឆ្នាំ។

ការលើកឡើងខាងលើទទួលបានការសាទរពីក្រុមអ្នកនយោបាយ និងសហគ្រិនក្នុងប្រទេស ក្នុងគ្រាដែលវិស័យនានារបស់ អូស្ត្រាលី សុទ្ធតែកំពុងខ្វះកម្លាំងធនធានមនុស្ស នាំឱ្យក្រុមហ៊ុនជាច្រើនត្រូវកាត់បន្ថយពេលវេលាធ្វើសកម្មភាពជំនួញ ហើយខ្លះថែមទាំងត្រូវបិទទ្វារបណ្ដោះអាសន្នផងដែរ៕

August 15, 2022

ក្រសួងសុខាភិបាល ផាកពិន័យ និងព្រមានបិទមន្ទីរពហុព្យាបាលមួយនៅភ្នំពេញ

ក្រសួងសុខាភិបាល នារសៀលថ្ងៃទី ១៥ សីហានេះ បានប្រកាសជាសាធារណៈអំពីការផាកពិន័យ ណែនាំ និងព្រមានចំពោះ ម្ចាស់មន្ទីរពហុព្យាបាលម្លិះដង្កោ ដែលមានទីនៅ សង្កាត់ដង្កោ ខណ្ឌដង្កោ រាជធានីភ្នំពេញ ព្រោះតែបានបំពានការណែនាំរបស់ក្រសួង។

យោងតាមលិខិតជម្រាបទៅ លោកវេជ្ជបណ្ឌិត ស៊ឹម វន់ ដែលជា ម្ចាស់មន្ទីរពហុព្យាបាលម្លិះដង្កោ ក្រសួងសុខាភិបាល បានឱ្យដឹងថា មន្ទីរពហុព្យាបាលនេះ បានធ្វើផ្ទុយពីការណែនាំកន្លងមករបស់ ក្រសួង ទាក់ទិននឹងការបញ្ចេញរថយន្តគិលានសង្គ្រោះរបស់ខ្លួន ទៅដឹកអ្នករងរបួសដោយគ្រោះថ្នាក់ចរាចរណ៍តាមដងផ្លូវ យកមកព្យាបាលនៅក្នុងគ្លីនិកនេះ។

ដោយកំហុងឆ្គងខាងលើ ក្រសួងសុខាភិបាល សម្រេចផាកពិន័យជាប្រាក់ចំនួន ១០ លានរៀល ចំពោះលោកវេជ្ជបណ្ឌិត ស៊ឹម វន់ ក៏ដូចជា មន្ទីរពហុព្យាបាលម្លិះដង្កោ និងតម្រូវឱ្យគោរពតាមការណែនាំរបស់ ក្រសួងសុខាភិបាល។ ជាងនេះ ក្រសួងក៏បានព្រមានអំពីការបិទ លែងឱ្យដំណើរការ ក្នុងករណីដែលគ្លីនិកនេះនៅតែបំពានការណែនាំ។

ព័ត៌មានលម្អិត សូមអានសេចក្ដីជម្រាបជូនរបស់ ក្រសួងសុខាភិបាល ដែលមានដូចខាងក្រោម ៖

August 15, 2022

ទីភ្នាក់ងារសារព័ត៌មានចិន ព្រមានក្រុមតំណាងរាស្ត្រអាម៉េរិក ដែលធ្វើទស្សនកិច្ចនៅ កោះតៃវ៉ាន់

Xinhua បានចុះផ្សាយអត្ថបទព្រមានក្រុមអ្នកនយោបាយអាម៉េរិក ថា «ប្រលែងនឹងភ្លើង» ទាក់ទិននឹងបញ្ហា កោះតៃវ៉ាន់ ក្រោយពីប្រតិភូមួយក្រុមរបស់ សភាអាម៉េរិក ធ្វើទស្សនកិច្ចនៅ កោះតៃវ៉ាន់ នាពេលថ្មីៗនេះ។

«ក្រុមអ្នកនយោបាយអាម៉េរិក ដែលកំពុងតែប្រលែងជាមួយនឹងភ្លើងចំពោះបញ្ហា តៃវ៉ាន់ គួរតែបោះបង់ការស្រមើស្រមៃ។ មិនមានកន្លែងសម្រាប់ការព្រមព្រៀង ឬសម្បទានឡើយ នៅពេលទាក់ទងនឹងផលប្រយោជន៍ស្នូលរបស់ ប្រទេសចិន» ទីភ្នាក់ងារសារព័ត៌មានរដ្ឋចិន Xinhua បានចុះផ្សាយអត្ថបទវិចារណកថាមួយ បន្ទាប់ពីក្រុមតំណាងរាស្ត្ររបស់ សភាអាម៉េរិក មកធ្វើទស្សនកិច្ចនៅ កោះតៃវ៉ាន់ កាលពីថ្ងៃទី ១៤ សីហា។

Xinhua បានចោទក្រុមតំណាងរាស្ត្ររបស់ សហរដ្ឋអាម៉េរិក ដែលបានទៅកាន់ កោះតៃវ៉ាន់ ថាជា «ក្រុមឱកាសនិយម» ដែលកំពុងគិតអំពីផលប្រយោជន៍ផ្នែកនយោបាយ ក្នុងពេល សហរដ្ឋអាម៉េរិក ជិតរៀបចំការបោះឆ្នោតពាក់កណ្ដាលអាណត្តិ នៅខែវិច្ឆិកាខាងមុខ។

ក្រុមមន្ត្រីការទូតចិន នៅ សហរដ្ឋអាម៉េរិក ក៏បានចោទថា ដំណើរទស្សនកិច្ចនៅ កោះតៃវ៉ាន់ ថ្មីៗនេះរបស់ ក្រុមតំណាងរាស្ត្រអាម៉េរិក បង្ហាញថា វ៉ាស៊ីងតោន «មិនចង់ឃើញស្ថិរភាពនៅលើច្រកសមុទ្រតៃវ៉ាន់» និង «ជ្រៀតជ្រែកកិច្ចការផ្ទៃក្នុងរបស់ ប្រទសចិន»។

អ្នកនាំពាក្យរបស់ ក្រុមប្រឹក្សាសន្តិសុខជាតិអាម៉េរិក ឱ្យដឹងថា ក្រុមតំណាងរាស្ត្រអាម៉េរិក បានទៅកាន់ តៃវ៉ាន់ ក្នុងអំឡុងច្រើនទសវត្សរ៍មកហើយ ហើយថានឹងបន្តធ្វើដូច្នេះទៀត ដោយយល់ថា ដំណើរទស្សនកិច្ចបែបនេះនៅតែសមស្របសម្រាប់គោលនយោបាយចិនតែមួយ របស់ វ៉ាស៊ីងតោន។

ប្រតិភូមួយក្រុមនៃ សភាអាម៉េរិក កាលពីម្សិលមិញបានចាប់ផ្ដើមចេញដំណើរទស្សនកិច្ចរយៈពេល ២ ថ្ងៃ នៅ កោះតៃវ៉ាន់ និងមានគម្រោងជួបពិភាក្សាការងារជាមួយមេដឹកនាំកោះនេះ។

ក្រុមតំណាងរាស្ត្រអាម៉េរិក ដែលកំពុងធ្វើទស្សនកិច្ចនៅ កោះតៃវ៉ាន់ ក្នុងថ្ងៃទី ១៥ សីហា

យោងតាមការិយាល័យតំណាងអាម៉េរិក នៅ កោះតៃវ៉ាន់ (AIT) ប្រតិភូអាម៉េរិក មួយក្រុមនេះរួមមានតំណាងរាស្ត្រ ៥ រូប ដែលដឹកនាំដោយតំណាងរាស្ត្រសភាជាន់ខ្ពស់ Ed Markey មកពីបក្សប្រជាធិបតេយ្យ។ ពួកគេនឹងពិភាក្សាអំពីបញ្ហាជាច្រើន មានដូចជា សន្តិសុខក្នុងតំបន់ ពាណិជ្ជកម្ម វិនិយោគ បណ្ដាញផ្គត់ផ្គង់ទូទាំងពិភពលោក និងបញ្ហាអាកាសធាតុជាដើម។ លោក Markey គឺជាប្រធានអនុគណៈកម្មការកិច្ចការបរទេសអាស៊ីខាងកើត អាស៊ីប៉ាស៊ីហ្វ៊ិក និងប្រធានអនុគណៈកម្មការសន្តិសុខអ៊ីនធើណិតអន្តរជាតិរបស់ សភាជាន់ខ្ពស់អាម៉េរិក។

ដំណើរទស្សនកិច្ចនេះកើតឡើងបន្ទាប់ពី ប្រធានសភាជាន់ទាបអាម៉េរិក លោកស្រី Nancy Pelosi បានធ្វើទស្សនកិច្ចនៅ កោះតៃវ៉ាន់ ចាប់ពីថ្ងៃទី ០២ ដល់ ០៣ សីហា ដែលបានបណ្ដាលឱ្យ ទីក្រុងប៉េកាំង ប្រតិកម្មយ៉ាងខ្លាំងក្លា ក្នុងនោះមានទាំងការធ្វើសមយុទ្ធយោធាទ្រង់ទ្រាយធំនៅជុំវិញ កោះតៃវ៉ាន់។

សហរដ្ឋអាម៉េរិក សន្យាគោរពគោលនយោបាយចិនតែមួយ ប៉ុន្តែ នៅតែរក្សាទំនាក់ទំនងជាមួយ កោះតៃវ៉ាន់ និងផ្គត់ផ្គង់សព្វាវុធឱ្យកោះនេះ៕

August 15, 2022

Toyota ឈរលើកំពូលតារាងចំណាត់ថ្នាក់ពិភពលោកស្ដីពីចំនួនរថយន្តដែលបានលក់ចេញនៅពាក់កណ្ដាលដើមឆ្នាំ

យោងតាមទិន្នន័យផ្លូវការ Toyota នាំមុខគេស្ដីពីចំនួនរថយន្តដែលបានលក់ចេញនៅពាក់កណ្ដាលដើមឆ្នាំ ២០២២ ដោយមានរថយន្ត ៥.១៣៨ លានគ្រឿងត្រូវបានលក់ចេញក្នុងទីផ្សារទូទាំងពិភពលោក។

Toyota, Volkswagen និង Hyundai គឺជាក្រុមហ៊ុនផលិតរថយន្តដែលនាំមុខគេក្នុងពិភពលោកស្ដីពីបរិមាណរថយន្តដែលបានលក់ចេញនៅក្នុងរយៈពេល ៦ ខែដើមឆ្នាំនេះ។

Toyota មានរថយន្ត ៥.១៣៨ លានគ្រឿងត្រូវបានលក់ចេញក្នុងទីផ្សារទូទាំងពិភពលោក ខណៈដែលលំដាប់ទី ២ គឺបានទៅលើ Volkswagen Group ដោយមានរថយន្ត ៤.០០៦ លានគ្រឿងត្រូវបានលក់ចេញ និងទី ៣ គឺ Hyundai Motor Co លក់បាន ៣.២៩៩ លានគ្រឿង។

បរិមាណរថយន្តដែលបានលក់ចេញរបស់ក្រុមហ៊ុនផលិតរថយន្តធំៗក្នុងពិភពលោក សុទ្ធតែបានថយចុះបើធៀបទៅនឹង ១ ឆ្នាំមុននោះ ក្នុងនោះ ក្រុមហ៊ុន Toyota ថយចុះ ៦%, Hyundai ថយចុះ ៥.១%, Volkswagen Group ថយចុះ ១៤%, Stellantis ថយចុះ ១៦% និង General Motor Co. ថយចុះ ១៩%៕

August 15, 2022

ក្រុមប្រទេស G20 ឯកភាពគ្នាបង្កើតមូលនិធិសម្រាប់ជួយដល់បណ្ដាប្រទេសក្រីក្រ

រដ្ឋមន្ត្រី Suharso ប្រកាសថា សមាជិកនានារបស់ G20 បានយល់ព្រមបង្កើនកិច្ចសហប្រតិបត្តិការពហុភាគី និងជំរុញការបង្កើតមូលនិធិអភិវឌ្ឍសម្រាប់បណ្ដាប្រទេសក្រីក្រ ប្រទេសកំពុងអភិវឌ្ឍ ក៏ដូចជាបណ្ដាប្រទេសកោះ។

រដ្ឋមន្ត្រីក្រសួងផែនការអភិវឌ្ឍជាតិឥណ្ឌូណេស៊ី លោក Suharso Monoarfa កាលពីម្សិលមិញ បានប្រកាសថា សមាជិកទាំងអស់របស់ក្រុមប្រទេសដែលមានសេដ្ឋកិច្ចរីកចម្រើន និងទើបលេចធ្លោលំដាប់កំពូលរបស់ពិភពលោក (G20) បានឯកភាពគ្នាក្នុងការបង្កើនកិច្ចសហការពហុភាគី និងជំរុញការបង្កើតមូលនិធិអភិវឌ្ឍសម្រាប់ជួយដល់បណ្ដាប្រទេសក្រីក្រ ប្រទេសកំពុងអភិវឌ្ឍ ក៏ដូចជាបណ្ដាប្រទេសកោះ។

ប្រកាសនេះត្រូវបានលើកឡើងនៅក្នុងសន្និសីទនៃក្រុមបេសកកម្មអភិវឌ្ឍរបស់ G20 (DWG) លើកទី ៣ ដែលធ្វើឡើងនៅ កោះបាលី (ឥណ្ឌូណេស៊ី) នាពេលថ្មីៗនេះ។

DWG គឺជាក្រុមមួយក្នុងចំណោមក្រុមបេសកកម្មដែល ឥណ្ឌូណេស៊ី ជាអ្នកផ្ដួចផ្ដើមគំនិតក្នុងនាមជាប្រធានប្ដូរវេនរបស់ G20 ក្នុងបំណងពិភាក្សាអំពីបញ្ហាទាំងឡាយដែលទាក់ទិននឹងការអភិវឌ្ឍ។ នេះគឺជាវេទិកាសម្រាប់ សមាជិករបស់ G20 ផ្លាស់ប្ដូរយោបល់គ្នាអំពីកិច្ចសហការពហុភាគី និងផែនការអភិវឌ្ឍសំដៅទៅរកគោលដៅអភិវឌ្ឍប្រកបដោយចីរភាព (SDG)៕

August 15, 2022

Author: សឿន សំណាង