Author: សឿន សំណាង

ទឹកជំនន់និង បំណាក់ដីដោយសារភ្លៀង បណ្ដាលឱ្យមនុស្សយ៉ាងតិច ៥០ នាក់នៅ ឥណ្ឌា បាត់បង់ជីវិត
ក្នុងរយៈពេលតែ ៣ ថ្ងៃប៉ុណ្ណោះ គ្រោះទឹកជំនន់ និងបាក់ដីបានសម្លាប់មនុស្សយ៉ាងហោច ៥០ នៅក្នុងតំបន់ភាគខាងជើង និងភាគខាងកើតរបស់ ប្រទេសឥណ្ឌា។
ជំនន់ទឹកភ្លៀងបានហូរចូលភូមិឋាន កួចយកផ្ទះសំបែង និងបណ្ដាលឱ្យប្រជាជនត្រូវជាប់គាំងនៅនឹងកន្លែង ខណៈដែលក្រុមសង្គ្រោះត្រូវរត់ប្រណាំងនឹងពេលវេលាដើម្បីឈ្លៀសមនុស្សដែលនៅមានជីវិត ទៅរកទីសុវត្ថិភាព។
ជនរងគ្រោះនៅក្នុងគ្រោះទឹកជំនន់នេះភាគច្រើននៅក្នុងរដ្ឋ Himachal Pradesh, Uttarakhand និងរដ្ឋ Odisha បន្ទាប់ពីបាតុភូតទឹកជំនន់ និងបំណាក់ដីដែលបានបង្កផលប៉ះពាល់ដល់មនុស្សជិត ៨០០,០០០ នាក់ ក្នុងនោះមានមនុស្សរាប់ពាន់នាក់ត្រូវភៀសខ្លួនពីទីលំនៅ។ ភ្លៀងធ្លាក់បង្កជាទឹកជំនន់បានធ្វើឱ្យមានបញ្ហារអាក់រអួលដល់បណ្ដាញអគ្គិសនី ទឹក និងបំផ្លាញហេដ្ឋារចនាសម្ព័ន្ធផ្លូវថ្នល់យ៉ាងធ្ងន់ធ្ងរ។
ជារៀងរាល់ឆ្នាំ រដូវភ្លៀងនៅ ឥណ្ឌា បានបង្កការខាតបង់ជីវិតមនុស្ស និងទ្រព្យសម្បត្តិយ៉ាងច្រើន ប៉ុន្តែ វាក៏ជាប្រភពផ្គត់ផ្គង់ទឹកដ៏សំខាន់សម្រាប់ឧស្សាហកម្ម ជាវិស័យដែលរួមចំណែកប្រមាណ ១៥% ទៅក្នុងសេដ្ឋកិច្ចរបស់ ប្រទេសឥណ្ឌា៕
August 22, 2022
រថយន្ត Ford Ranger Raptor ស៊េរីថ្មីឆ្នាំ 2023 ត្រូវបានដាក់សម្ពោធជាផ្លូវការនៅប្រទេសកម្ពុជា
[ភ្នំពេញ – ថ្ងៃទី ១៩ ខែសីហា ឆ្នាំ២០២២] ក្រុមហ៊ុន អ អិម អេ (ខេមបូឌា) ម.ក បានបង្កើតនូវមហាព្រឹត្តិការណ៍ដ៏ធំសម្បើមជាថ្មីម្តងទៀតប្រចាំឆ្នាំនោះគឺការប្រារព្ធពិធីសម្ពោធជាផ្លូវការនៃរថយន្ត Ford Ranger Raptor ស៊េរីថ្មីឆ្នាំ 2023 ដែលកម្មវិធីនេះបានប្រារព្ធធ្វើឡើងនៅ ដឹ ព្រេមៀ សេនធ័រ សែនសុខដែលមានភ្ញៀវកិត្តិយសអញ្ជើញចូលរួមប្រមាណជាង 3,000 នាក់។
ឆ្លៀតក្នុងឱកាសនេះដែរ លោក ងន សាំង អគ្គនាយកនៃក្រុមហ៊ុន អ អិម អេ (ខេមបូឌា) ក៏បានថ្លែងសុន្ទរកថានៅក្នុងអង្គពិធីនេះដែរ ដែលលោកបានមានប្រសាសន៍ថា៖ “រាជរដ្ឋាភិបាលកម្ពុជា បានទទួលស្គាល់ក្រុមហ៊ុន RMA ជា ក្រុមហ៊ុនដំបូងបំផុត ដែលនាំចូលរថយន្តមានស្តង់ដារសុវត្ថិភាពខ្ពស់ មកកាន់ទីផ្សារកម្ពុជាដែលក្នុងនោះដែរគឺរថយន្តម៉ាក Ford ដែលមានភាពល្បីល្បាញខ្លាំងបំផុត និងបានទទួលចំណែកទីផ្សាររថយន្តថ្មីលេខ 1 នៅប្រទេសកម្ពុជាអស់រយៈពេលជាច្រើនឆ្នាំជាប់គ្នា ហើយថ្ងៃនេះដែរក្រុមហ៊ុននឹងនាំយកអ្វីដែលកាន់តែថ្មីជូនដល់អតិថិជននោះគឺរថយន្តFord Ranger Raptor ស៊េរីថ្មីឆ្នាំ 2023 ដែលជារថយន្តភីកអាប់អាចជំនះបានគ្រប់ឧបសគ្គនៃការបើកបរ។”
កម្មវិធីនេះប្រារព្ធឡើងក្នុងគោលបំណងដើម្បីឲ្យអតិថិជនយល់ជ្រាបកាន់តែច្បាស់ពីវត្តមាននៃកំពូលរថយន្តភីកអាប់ Off-Road Performance មួយនេះជាមួយនឹងរូបរាងថ្មីទាំងស្រុង និងទទួលបានបទពិសោធន៍ដ៏អស្ចារ្យនៃការបើកបរសាកល្បងរថយន្ត Ford Ranger Raptor ស៊េរីថ្មីឆ្នាំ 2023 នេះដោយផ្ទាល់ជាមួយនឹងអ្នកជំនាញបច្ចេកទេសFord ដើម្បីសាកល្បងនូវមុខងារដ៏ថ្មីស្រឡាង ប្រព័ន្ធសុវត្ថិភាព និងបច្ចេកវិទ្យាជំនាន់ចុងក្រោយដែលបានបំពាក់នៅលើរថយន្តនេះ ជាពិសេសនោះគឺអតិថិជនពេញចិត្តជាមួយនឹងកម្លាំងម៉ាស៊ីននៃរថយន្ត Ford Ranger Raptor ស៊េរីថ្មីឆ្នាំ 2023 ដែលម៉ាស៊ីនជំនាន់ថ្មីនេះជាប្រភេទម៉ាស៊ីនសាំង Twin-Turbo 3.0L V6 EcoBoost ដែលអាចផលិតកម្លាំងសេះបានរហូតដល់ទៅ 392 HP និងកម្លាំងរមួលកង់រហូតដល់ទៅ 583 Nm ដែលផ្តល់នូវសន្ទុះដ៏ខ្លាំងគ្មានគូប្រៀប។ មិនតែប៉ុណ្ណោះនៅមានមុខងារជាច្រើនទៀតដែលបានទាក់ចិត្តអតិថិជនបន្ទាប់ពីបានធ្វើតេស្តសាកល្បងរួចមកដូចជា៖
- ប្រព័ន្ធគ្រប់គ្រងការបើកបរគ្រប់ស្ថានភាពផ្លូវរហូតដល់ 7 ជម្រើសរួមមាន៖ ផ្លូវធម្មតា ស្ព័រ រអិល ភក់ ខ្សាច់ BAJA (ផ្លូវឧបសគ្គ) និងផ្លូវមានថ្ម
- ប្រព័ន្ធកំណត់សម្លេងរថយន្ត (Exhaust Mode) ដែលអាចកំណត់សម្លេងរថយន្តបាន 4 ជម្រើសដូចជា៖ ស្ងាត់ ធម្មតា បែបស្ព័រ និងបែប BAJA Mode (ដែលសម្រាប់ការបើកបរលើផ្លូវមានឧបសគ្គ) បូករួមជាមួយនឹងការបំពាក់ជូននូវបំពង់ស៊ីមុំាង 2 ធ្វើឲ្យរថយន្តនេះមានរូបរាង និងការបញ្ចេញសម្លេងដូចទៅនឹងរថយន្តស្ព័រអញ្ចឹង
- ប្រព័ន្ធកំណត់ការប្រើប្រាស់បូមរថយន្ត (Suspension Mode) ដែលអាចកំណត់បូមរថយន្តទន់ ឬរឹងទៅតាមស្ថានភាពផ្លូវ ជាពិសេសគឺបានបំពាក់នូវបូម Fox Live Valve Shocks ទំហំ 5 អ៊ីញ
- ប្រព័ន្ធកំណត់ការប្រើប្រាស់ចង្កូតរថយន្ត (Steering Mode) ដែលអាចកំណត់ចង្កូតរថយន្តធូរ ឬតឹងទៅតាមស្ថានភាពផ្លូវ
- អ្វីដែលអតិថិជនមានការភ្ញាក់ផ្អើល និងពេញចិត្តខ្លាំងមួយទៀតនោះគឺ ប្រអប់លេខអេឡិចត្រូនិចជំនាន់ថ្មី 10 វគ្គអូតូ (E-Shifter) បូករួមជាមួយនឹង Paddle Shift ដែលអាចថែមថយលេខនៅនឹងដៃចង្កូតពិតជាធ្វើឲ្យការចូលរលូនខ្លាំងមែនទែន
- បំពាក់ជូននូវប្រព័ន្ធគ្រប់គ្រងប៉ុងអេឡិចត្រូនិចជំនាន់ថ្មី (2H, 4H, 4L, 4A)
- អ្វីដែលកាន់តែអស្ចារ្យនោះគឺរថយន្ត Ford Ranger Raptor ស៊េរីថ្មីឆ្នាំ 2023 បានបំពាក់ប្រព័ន្ធជំនួយចូលចតដោយស្វ័យប្រវត្តបែបអក្សរ (P), (T) និងប្រព័ន្ធជំនួយចាកចេញពីចំណតដោយស្វ័យប្រវត្ត ដែលវានឹងដំណើរការហ្វ្រាំង ហ្គ៊ែរ ចង្កូត និងការចូលលេខពីប្រអប់លេខអេឡិចត្រូនិចដោយខ្លួនឯង និងអ្នកបើកបរអាចទស្សនាប្រព័ន្ធកាមេរ៉ាសុវត្ថិភាព 360 ដឺក្រេកម្រិតខ្ពស់ជុំវិញរថយន្ត នៅលើអេក្រង់ Touchscreen 12 អ៊ីញបានយ៉ាងងាយស្រួល
- ក្រៅពីនេះគឺនៅមានប្រព័ន្ធសុវត្ថិភាព និងបច្ចេកវិទ្យាជំនាន់ចុងក្រោយជាច្រើនទៀតដែលអាចឲ្យរថយន្តនេះជំនះបានគ្រប់ឧបសគ្គនៃការបើកបរ និងស័ក្តិសមជាកំពូលរថយន្តភីកអាប់ Off-Road Performance
រថយន្ត Ford Ranger Raptor ស៊េរីថ្មីឆ្នាំ 2023 មានវត្តមាននៅទីផ្សារព្រះរាជាណាចក្រកម្ពុជាជាមួយនឹងជម្រើសពណ៌យ៉ាងច្រើនសម្បូររហូតដល់ទៅ 8 ជម្រើសរួមមាន៖ ពណ៌ក្រហម ទឹកក្រូច ខៀវ ខ្មៅ ប្រផេះស្ងួត ប្រផេះរលោង ទឹកប្រាក់ និងពណ៌ស។ ជាមួយនឹងតម្លៃពិសេសត្រឹមតែជាង 7 ម៉ឺនដុល្លាតែប៉ុណ្ណោះ។សម្រាប់ព័ត៌មានបន្ថែមលោកអ្នកអាចអញ្ជើញទៅសាកសួរ និងបើកបរសាកល្បងរថយន្ត Ford Ranger Raptor ស៊េរីថ្មីឆ្នាំ 2023 នៅតាមបណ្តាសាខាអគារតាំងបង្ហាញរថយន្ត Ford និងទំនាក់ទំនងទៅតាមលេខទូរស័ព្ទដូចខាងក្រោម៖
- អគារតាំងបង្ហាញរថយន្ត Ford សាខា ផ្លូវព្រះមុនីវង្ស ដែលស្ថិតនៅអគារលេខ 444 ផ្លួវព្រះមុនីវង្ស ជាប់ទូតវៀតណាម លេខទូរស័ព្ទទំនាក់ទំនង៖ 078 999 773
- អគារតាំងបង្ហាញរថយន្ត Ford សាខា ទឹកថ្លា ដែលស្ថិតនៅតាមបណ្តោយផ្លូវទៅព្រលានយន្តហោះ លេខទូរស័ព្ទទំនាក់ទំនង៖ 095 939 939
- អគារតាំងបង្ហាញរថយន្ត Ford សាខា ទួលសង្កែ ដែលស្ថិតនៅលើផ្លូវ 105 ជិតផ្សារសាំហាន់ លេខទូរស័ព្ទទំនាក់ទំនង៖ 078 935 935
- អគារតាំងបង្ហាញរថយន្ត Ford Trade-In ដែលស្ថិតនៅតាមបណ្តោយផ្លូវទៅព្រលានយន្តហោះ លេខទូរស័ព្ទទំនាក់ទំនង៖ 077 722 999
- អគារតាំងបង្ហាញរថយន្ត Ford សាខា ខេត្តសៀមរាប ដែលស្ថិតនៅអគារលេខ 593 តាមបណ្តោយផ្លូវជាតិលេខ 6A លេខទូរស័ព្ទទំនាក់ទំនង៖ 077 666 357 | 088 9 666 357
- អគារតាំងបង្ហាញរថយន្ត Ford សាខា ខេត្តកំពង់ចាម ដែលស្ថិតនៅអគារលេខ 940 តាមបណ្តោយផ្លូវជាតិលេខ 7 ភូមិបឹងស្នាយ សង្កាត់សំបូមាស ក្រុងកំពង់ចាម លេខទូរស័ព្ទទំនាក់ទំនង៖ 078 999 883 | 088 3 999 883។
August 20, 2022
សេវាទេសចរណ៍អវកាសតម្លៃ ៥១៤ លានរៀល ប្រើបាឡុងហោះរបស់ក្រុមហ៊ុនអាម៉េរិក
ទេសចរណ៍អវកាសប្រកបដោយសុវត្ថិភាព មិនបំភាយឧស្ម័នពុល ប៉ុន្តែនៅតែអាចគយគន់សម្រស់របស់ផែនដី និងអវកាសបាន គឺជាគោលដៅរបស់ក្រុមហ៊ុនអវកាសចរណ៍ធំៗលើពិភពលោក ក្នុងនោះក៏មាន Apace Perspective ផងដែរ។
ការប្រកួតប្រជែងក្នុងវិស័យទេសចរណ៍អវកាសកំពុងតែក្ដៅគគុកជាងពេលណាៗទាំងអស់។ ប៉ុន្តែ អ្វីដែលត្រូវបានគេរំពឹងថានឹងមានសក្ដានុពលខ្ពស់នាពេលដ៏ខ្លីខាងមុន នោះគឺសេវាទេសចរណ៍អវកាសតាមរយៈបាឡុងហោះដែលមិនបញ្ចេញឧស្ម័នពុល។
ក្រុមហ៊ុន Space Perspective នៅ Florida សហរដ្ឋអាម៉េរិក មានគម្រោងនាំអតិថិជនឡើងទៅកាន់កម្ពស់ជាង ៣០,០០០ ម៉ែត្រ តាមរយៈបាឡុងហោះ។ អតិថិជននឹងបានហោះហើរក្នុងទីអវកាសដោយជិះក្នុងបន្ទប់មួយដែលភ្ជាប់ពីខាងក្រោមបាឡុងហោះខ្នាតយក្ស បំពាក់បច្ចេកវិទ្យាទំនើប។ រូបភាពនានាដែលត្រូវបានប្រកាសកាលពីចុងខែកក្កដា បង្ហាញថា រចនារូបរាងថ្មីរបស់បន្ទប់ដែលមានឈ្មោះថា Space Neptune ទទួលបានវិញ្ញបនបត្រពីស្ថាប័នរដ្ឋរួចហើយ។
បន្ទប់ Space Neptune សម្រាប់ភ្ញៀវ ធំទូលាយជាង ធៀបនឹងកំណែមុន ជួយឱ្យអតិថិជនឈរត្រង់បានយ៉ាងស្រួលខ្លួន ក៏ដូចជាសមត្ថភាពនៃការស៊ូទ្រាំនឹងសម្ពាធមានកម្រិតខ្ពស់ជាងមុន។
Space Perspective សហការជាមួយ studio of My Imagination (OMI) ដែលមានទីស្នាក់ការកណ្ដាលនៅ ទីក្រុងឡុងដ៍ ដើម្បីរចនានូវរូបរាងរបស់បន្ទប់ Space Neptune ថ្មីនេះ។
ក្រុមហ៊ុន Space Perspective កំណត់ផែនការថា នៅចុងឆ្នាំ ២០២៤ នឹងចាប់ផ្ដើមនាំទេសចរ ៨ នាក់ ឡើងទៅគយគន់ផែនដី និងអវកាសពីចម្ងាយ ដោយប្រើប្រាស់ពេល ៦ ម៉ោង។ បាឡុងហោះនេះនឹងស្ថិតនៅលើស្រទាប់បរិយាកាស stratosphere របស់ផែនដី។
អតិថិជនដែលនឹងធ្វើដំណើរទេសចរណ៍ក្នុងកម្មវិធីបាឡុងហោះប្រើប្រាស់ឧស្ម័នអ៊ីដ្រូសែន របស់ Space Perspective នឹងមិនចាំបាច់ឆ្លងកាត់ការបណ្ដុះបណ្ដាលស៊ីជម្រៅដូចអ្នកអវកាសឡើយ។
តម្លៃសំបុត្រសម្រាប់មនុស្សម្នាក់គឺ ១២៥ ពាន់ដុល្លារអាម៉េរិក (ប្រហែល ៥១៤ លានរៀល)។ Space Perspective ឱ្យដឹងថា សំបុត្រចំនួនជាង ៩០០ ត្រូវបានលក់ឱ្យអតិថិជនរួចហើយ៕
>ទេសចរណ៍នាពេលអនាគត ៖ ជិតក្នុងបាឡុងហោះខ្នាតយក្សទស្សនាទិដ្ឋភាពភាពកោងរបស់ផែនដីពីលើមេឃ
>ទេសចរណ៍អវកាស! Virgin Galactic មានអតិថិជនជាង 600នាក់ក្នុងដៃ ខណៈ Blue Origin មិនទាន់ប្រកាសពីតម្លៃសំបុត្រធម្មតានៅឡើយ

August 20, 2022
ស្ថានភាពជំងឺកូវីដ-១៩ នៅ កម្ពុជា ប្រកាសនៅក្នុងថ្ងៃទី ២០ ខែសីហា ២០២២
កម្ពុជា រកឃើញអ្នកឆ្លងកូវីដ-១៩ ករណីថ្មី ចំនួន ១៧ នាក់ ក្នុងអំឡុង ២៤ ម៉ោង នៃថ្ងៃទី ១៩ ខែសីហា ២០២២។
ក្នុងអំឡុងពេលខាងលើ ក៏មានអ្នកជំងឺកូវីដ-១៩ ចំនួន ២២ នាក់បានជាសះស្បើយ និង មិនមានករណីស្លាប់ថ្មី ដោយសារជំងឺនេះនៅឡើយ។
គិតមកដល់បច្ចុប្បន្ន កម្ពុជា បានរកឃើញអ្នកវិជ្ជមាននឹងកូវីដ-១៩ សរុបចំនួន ១៣៧,៣៩៤ នាក់ ក្នុងនោះមាន ៣,០៥៦ នាក់បានបាត់បង់ជីវិត។
August 20, 2022
មាសពិភពលោក កំពុងធ្លាក់ថ្លៃរយៈពេលវែងបំផុត រាប់ពីខែវិច្ឆិកា ២០២១
តម្លៃមាសកាលពីម្សិលមិញ បានបន្តដាំក្បាលចុះ ធ្វើឱ្យរយៈពេលនៃការធ្លាក់ថ្លៃរបស់វា អូសបន្លាយដល់ ៥ ថ្ងៃជាប់ៗគ្នា ដែលនេះគឺជាការធ្លាក់ថ្លៃយូរជាងគេ រាប់ចាប់ពីខែវិច្ឆិកា ២០២១។
បញ្ចប់ការជួញដូរកាលពីថ្ងៃសុក្រ តម្លៃមាសប្រគល់ភ្លាម ធ្លាក់ថ្លៃ ០.៦% ចុះមកនៅត្រឹម ១,៧៤៨.៥៨ ដុល្លារ/អោន (១ អោន (ounce) ស្មើនឹង ៨.២៩៤២៦ ជី) ដែលជាតម្លៃទាបបំផុតរាប់ចាប់ពីថ្ងៃទី ២៨ កក្កដា។ មាសប្រគល់ក្នុងកាលកំណត់ បាត់បង់តម្លៃអស់ ០.៥% មកនៅត្រឹម ១,៧៦២.៩ ដុល្លារ/អោន។
ក្រោយពីបានឡើងថ្លៃក្នុង ៤ សប្ដាហ៍កន្លង តម្លៃមាសបានថយចុះ ២.៩% ក្នុងសប្ដាហ៍នេះ ដែលនេះក៏ជាសប្ដាហ៍ដែលមាសធ្លាក់ថ្លៃខ្លាំងបំផុត រាប់ចាប់តាំងពីសប្ដាហ៍ដែលបញ្ចប់នៅថ្ងៃទី ០៨ កក្កដា ២០២២។
ក្រុមអ្នកវិភាគទីផ្សារបានឱ្យដឹងថា កត្តាដែលនាំឱ្យមាសធ្លាក់ថ្លៃគឺការងើបឡើងនៃតម្លៃប្រាក់ដុល្លារអាម៉េរិក និងការដែល រតនាគារជាតិអាម៉េរិក ត្រូវការដំឡើងការប្រាក់ដើម្បីទប់ទល់នឹងអតិផរណា។
August 20, 2022
ទំហំសេដ្ឋកិច្ចអ៊ីនធើណិតនៅ អាស៊ីអាគ្នេយ៍ អាចកើនឡើងដល់ ៣០០ ពាន់លានដុល្លារអាម៉េរិក នៅឆ្នាំ ២០២៥
នៅលើខឿនសេដ្ឋកិច្ចឌីជីថលអ៊ីនធើណិត ទិន្នន័យធំ (Big Data) មានសក្ដានុពលយ៉ាងធំសម្បើម ជួយជំរុញល្បឿននៃការងើបឡើងរបស់សេដ្ឋកិច្ចនៅ អាស៊ីអាគ្នេយ៍ ក្រោយសម័យកូវីដ-១៩ ដោយផលប្រយោជន៍ក្នុងវិស័យសុខាភិបាលសាធារណៈ សុខុមាលភាពសង្គម និងអប់រំ សម្រេចបានតម្លៃជាង ១០០ ពាន់លានដុល្លារអាម៉េរិក។
យោងតាមរបាយការណ៍ថ្មីរបស់ ធនាគារអភិវឌ្ឍអាស៊ី (ADB) ដែលមានប្រធានបទ ទាញយកសក្ដានុពលរបស់ Big Data នៅ អាស៊ីអាគ្នេយ៍ ក្រោយកូវីដ-១៩ Big Data អាចកែលម្អការផ្គត់ផ្គង់សេវាកម្មរបស់រដ្ឋាភិបាល និងជំរុញល្បឿននៃការងើបឡើងរបស់សេដ្ឋកិច្ច ក្រោយវិបត្តិកូវីដ-១៩។
របាយការណ៍ថ្មីរបស់ ADB បង្ហាញថា បណ្ដាប្រព័ន្ធតាមដានពីចម្ងាយអាចជួយសន្សំសំច័យបាន ៩.៤ ពាន់លានដុល្លារ សម្រាប់បណ្ដាញសុខាភិបាលនៅ អាស៊ីអាគ្នេយ៍ ក្នុងឆ្នាំ ២០៣០ ដោយសារតែការថយចុះនៃចំនួនប្រជាពលរដ្ឋដែលមកកាន់មន្ទីរពេទ្យ ពេលវេលានៃការសម្រាកព្យាបាលនៅមន្ទីរពេទ្យខ្លីជាងមុន និងការថយចុះនៃលិខិតស្នាមនៅមន្ទីរពេទ្យ។
ចំណែកឯការប្រើប្រាស់ទិន្នន័យវិភាគដើម្បីកំណត់គោលដៅសម្រាប់អន្តរាគមន៍ផ្នែកសុខាភិបាលដែលផ្ដោតសំខាន់ទៅលើក្រុមប្រជាពលរដ្ឋងាយរងគ្រោះ ក៏អាចនាំឱ្យកើនឡើងប្រហែល ១៥.៥ ពាន់លានដុល្លារ នៅក្នុងផលិតផលក្នុងស្រុកសរុប (GDP) របស់តំបន់ អាស៊ីអាគ្នេយ៍ នៅឆ្នាំ ២០៣០។
របាយការណ៍ខាងលើបញ្ជាក់ថា ការប្រើប្រាស់បច្ចេកវិទ្យាឌីជីថលដើម្បីផ្គត់ផ្គង់សេវាកម្មអប់រំ ការធ្វើការពីចម្ងាយ និងលក្ខណៈឯកជន អាចរួមចំណែកប្រមាណ ៧៧.១ ពាន់លានដុល្លារជារៀងរាល់ឆ្នាំ ទៅក្នុង GDP របស់បណ្ដាប្រទេសនៅ តំបន់អាស៊ីអាគ្នេយ៍ នៅឆ្នាំ ២០៣០ ផងដែរ។
បច្ចេកវិទ្យាឌីជីថល កំពុងតែផ្លាស់ប្ដូរសេដ្ឋកិច្ចពិភពលោក។ របាយការណ៍របស់ ADB បានបង្ហាញថា គិតតែក្នុង តំបន់អាស៊ីអាគ្នេយ៍ ទំហំរបស់សេដ្ឋកិច្ចអ៊ីនធើណិត អាចកើនជា ៣ ដង ធៀបនឹងឆ្នាំ ២០១៩ ដោយអាចនឹងឡើងដល់ ៣០០ ពាន់លានដុល្លារនៅក្នុងឆ្នាំ ២០២៥៕
August 20, 2022
វៀតណាម ស្នើឱ្យ កម្ពុជា ជួយសហការស៊ើបអង្កេតករណី ជនជាតិវៀតណាម រត់គេចពីកាស៊ីណូនៅ កម្ពុជា
អាជ្ញាធរវៀតណាម ស្នើ កម្ពុជា ជួយសហការ ស៊ើបអង្កេតរកមូលហេតុដែលនាំឱ្យ ជនជាតិវៀតណាម ៤២ នាក់ រត់គេចពីកាស៊ីណូ នៅក្នុង ខេត្តកណ្ដាល និងស្វែងរកអ្នកដែលបានបាត់ខ្លួន នេះបើតាមសារព័ត៌មានវៀតណាម VNexpress ស្រង់ព័ត៌មានពី ក្រសួងការបរទេសវៀតណាម ចេញផ្សាយនាព្រឹកថ្ងៃទី ២០ សីហា។
វៀតណាម បានទាក់ទងទៅកាន់ អាជ្ញាធរកម្ពុជា ដើម្បីបញ្ជាក់អំពីព័ត៌មាននេះ និងស្នើឱ្យត្រួតពិនិត្យទីតាំងមួយនៅក្នុង ភូមិជ្រៃធំ ឃុំសំពៅពូន ស្រុកកោះធំ ខេត្តកណ្ដាល នេះបើតាមអ្នកនាំពាក្យក្រសួងការបរទេសវៀតណាម Le Thi Thu Hang និយាយអំពីព័ត៌មានស្ដីពីពលករវៀតណាម ៤២ នាក់ ដែលបានរត់គេចខ្លួនពីកាស៊ីណូ នៅ កម្ពុជា។
លោកស្រី Hang ឱ្យដឹងថា វៀតណាម បានស្នើឱ្យ កម្ពុជា ជួយតាមរកអ្នកដែលកំពុងបាត់ខ្លួន និងស៊ើបអង្កេតរកមូលហេតុនៃហេតុការណ៍នេះ។ អ្នកនាំពាក្យរូបនេះក៏បានព្រមានអំពីស្ថានភាព ជនជាតិវៀតណាម ត្រូវគេមេខ្យល់បោកមកធ្វើការដោយខុសច្បាប់នៅ កម្ពុជា ក្នុងរយៈពេលកន្លង។ លោកស្រី Hang បញ្ជាក់ថា ជនជាតិវៀតណាម ជាង ៥០០ នាក់ ត្រូវបានជួយសង្គ្រោះ និងនាំត្រលប់ទៅកាន់ប្រទេសដោយសុវត្ថិភាព និងរាប់ពាន់នាក់ទទួលបានជំនួយក្នុងការធ្វើលិខិតស្នាម។
ការិយាល័យការពារព្រំដែន Long Binh ខេត្ត An Giang របស់ វៀតណាម កាលពីថ្ងៃទី ១៨ សីហា បានចាប់ខ្លួនមនុស្ស ៤០ នាក់ រួមមានស្ត្រី ៥ នាក់ និងបុរស ៣៥ នាក់ ព្រោះតែឆ្លងដែនចូលទឹកដីរបស់ វៀតណាម ដោយខុសច្បាប់។ អ្នកដែលត្រូវបានចាប់ខ្លួននេះបានឱ្យដឹងថា មនុស្ស ៤២ នាក់ បានរត់គេចខ្លួនពីកាស៊ីណូ នៅក្នុង ខេត្តកណ្ដាល និងហែលឆ្លងទន្លេ Binh Di ត្រលប់ទៅប្រទេស។ ប៉ុន្តែ ម្នាក់ត្រូវទឹកគួចបាត់ខ្លួន និងម្នាក់ត្រូវបានខាងកាស៊ីណូចាប់ត្រលប់មកវិញ។
ក្រុមពលករវៀតណាម ដែលរត់គេចពីកាស៊ីណូ នៅ កម្ពុជា កំពុងសម្រាកនៅក្នុងទីតាំងមួយរបស់ អាជ្ញាធរវៀតណាម នៅខេត្ត An Giang កាលពីថ្ងៃទី ១៩ សីហា ២០២២
ជនជាតិវៀតណាម ខាងលើ បានសារភាពថា មុននោះពួកគេបានចូលទឹកដីរបស់ កម្ពុជា ដោយខុសច្បាប់ ដើម្បីទៅធ្វើការក្នុងកាស៊ីណូមួយចំនួន។ ដោយសារតែត្រូវធ្វើការលើសពីការកំណត់របស់ច្បាប់ មិនបានសម្រាកគ្រប់គ្រាន់ និងមិនទទួលបានប្រាក់ខែ ពួកគេក៏នាំគ្នារកវិធីឆ្លងដែនត្រលប់ទៅ វៀតណាម វិញ។
សារព័ត៌មាន VNexpress បានឱ្យដឹងថា ថ្មីៗនេះ ជនជាតិវៀតណាម ជាច្រើន ត្រូវបានមេខ្យល់បោកយកមក កម្ពុជា ហើយលក់ទៅឱ្យបនល្បែងមួយចំនួន ឬក្រុមជួញដូរប្រាក់ឌីជីថលគ្រីបតូ និងត្រូវរំលោភបំពានកម្លាំងពលកម្ម។ បើសិនជាចង់ត្រលប់ទៅប្រទេសវិញ ពួកគេត្រូវតែបង់ប្រាក់ចាប់ពី ៣,០០០ ដល់ ៣០,០០០ ដុល្លារអាម៉េរិក។
ក្រសួងសន្តិសុខសាធារណៈវៀតណាម បានចោទថា បនល្បែងដែលរំលោភកម្លាំងពលកម្ម រឹបអូសទ្រព្យសម្បត្តិបុគ្គល ភាគច្រើនស្ថិតនៅក្នុង ក្រុងបាវិត ខេត្តស្វាយរៀង, ក្រុងប៉ោយប៉ែត ខេត្តបន្ទាយមានជ័យ, ក្រុងព្រះសីហនុ ខេត្តព្រះសីហនុ, ជ្រៃធំ ខេត្តកណ្ដាល និង ភ្នំពេញ។ ក្នុងរយៈពេល ៦ ខែដើមឆ្នាំនេះ ប៉ូលិសវៀតណាម សហការជាមួយសមត្ថកិច្ចរបស់ កម្ពុជា រំដោះជនរងគ្រោះបានជាង ២៥០ ករណី ដែលត្រូវបានជនខិលខូចបោកមកធ្វើការនៅ កម្ពុជា ដោយខុសច្បាប់៕
August 20, 2022
ក្រុមហ៊ុនឡាវ អភិវឌ្ឍគម្រោងផលិតអគ្គិសនីពីថាមពលព្រះអាទិត្យ តម្លៃជាង ៦៩ លានដុល្លារអាម៉េរិក
ក្រុមហ៊ុនទទួលខុសត្រូវមានកម្រិត Solar Attapeu Power Sole (SAPC) ទើបតែបានសម្ពោធបើកការដ្ឋានអនុវត្តគម្រោងថាមពលអគ្គិសនីព្រះអាទិត្យ Attapeu (SAPP) តម្លៃ ៦៩.២ លានដុល្លារនៅស្រុក Xaysettha ក្នុងខេត្ត Attampeu ប្រទេសឡាវ។
លោក Sisavath Souvannavong ប្រធានក្រុមហ៊ុន SAPC ឡាវ បានឱ្យដឹងថា គម្រោងផលិតអគ្គិសនីពីថាមពលព្រះអាទិត្យ Attapeu នេះ គ្រោងនឹងត្រូវបានស្ថាបនារួចរាល់នៅចុងឆ្នាំ ២០២៣ ហើយនឹងមានកម្លាំងដំឡើង ៦៤MWdc/៥០MWac។ គម្រោងនេះត្រូវបានក្រុមហ៊ុន និងស្ថាប័នពាក់ព័ន្ធ សិក្សាស្រាវជ្រាវតាំងពីឆ្នាំ ២០១៤។
គម្រោងផលិតអគ្គិសនីពីថាមពលព្រះអាទិត្យ Attapeu ត្រូវបានគេរំពឹងថា នឹងជួយជំរុញការអភិវឌ្ឍវិស័យថាមពល រួមចំណែកក្នុងការធានាសន្តិសុខថាមពល បង្កើតការងារនៅក្នុងតំបន់ និងផ្ដល់អគ្គិសនី ១២៨GWh ជារៀងរាល់ឆ្នាំ សម្រាប់ប្រទេស និង ប្រជាជនឡាវ។
រដ្ឋាភិបាលឡាវ កំពុងតែអនុវត្តគោលនយោបាយអនុគ្រោះ ដើម្បីលើកទឹកចិត្តដល់បណ្ដាក្រុមហ៊ុនវិនិយោគក្នុងវិស័យផលិតថាមពលស្អាត មានដូចជា អគ្គិសនីផលិតពីថាមពលព្រះអាទិត្យ អគ្គិសនីផលិតពីថាមពលខ្យល់ និងថាមពលជីវម៉ាសជាដើម៕
August 19, 2022
ក្រុមហ៊ុនជប៉ុន គ្រោងនឹងផ្ដល់សេវាកម្មទេសចរណ៍ «លំដាប់ប្រណិត» សម្រាប់ភ្ញៀវដែលមានទ្រព្យចាប់ពី ៥០ លានដុល្លារ
បណ្ដាសហគ្រិនវិស័យទេសចរណ៍នៅ ប្រទេសជប៉ុន កំពុងពិភាក្សាគ្នាអំពីការផ្ដល់សេវាកម្មទេសចរណ៍ដែលអនុញ្ញាតឱ្យអតិថិជនដើរកម្សាន្តតាមតំបន់ប្រវត្តិសាស្ត្រ ធម្មជាតិ និងវប្បធម៌គ្រប់ទិសទីនៅក្នុង ប្រទេសជប៉ុន តាមរយៈយន្តហោះឯកជន។
ក្រុមហ៊ុនអាកាសចរណ៍ធំជាងគេរបស់ ជប៉ុន ANA Holdings Inc. និងក្រុមហ៊ុនជាច្រើនទៀត កំពុងតែពិនិត្យមើលលទ្ធភាពក្នុងការផ្ដល់សេវាកម្មទេសចរណ៍លំដាប់ប្រណិតសម្រាប់ភ្ញៀវអ្នកមានពីបរទេសដែលមានលទ្ធភាពចំណាយប្រាក់ច្រើននៅ ជប៉ុន។
កញ្ចប់សេវាកម្មទេសចរណ៍ខាងលើនេះ នឹងអនុញ្ញាតឱ្យភ្ញៀវដើរទេសចរណ៍ពាសពេញផ្ទៃប្រទេសជប៉ុន ក្នុងរយៈពេលជាង ១ សប្ដាហ៍ តាមរយៈយន្តហោះឯកជន ក្នុងនោះ តំបន់ប្រវត្តិសាស្ត្រ តំបន់ទេសចរណ៍ធម្មជាតិ និងវប្បធម៌ គឺជាគោលដៅសំខាន់។
ផែនការនេះ កំពុងត្រូវបានពិភាក្សារួមគ្នាដោយ Nippon Travel Agency ដែលជាក្រុមហ៊ុនបុត្រសម្ព័ន្ធរបស់ ANA Holdings, ក្រុមហ៊ុនលក់ឧបករណ៍ក្រៅផ្ទះ Snow Peak, រដ្ឋបាលទីក្រុង Tajimi នៅខេត្ត Gifu និង ក្រុមប្រឹក្សាទេសចរណ៍ និងស្ដារតំបន់ក្នុងប្រទេស។
ដំណើរទេសចរណ៍លក្ខណៈសាកល្បងមួយចំនួន ត្រូវបានបើកដំណើរការតាំងពីខែមេសា ២០២២។ ស្ថាប័នពាក់ព័ន្ធមានគម្រោងជ្រើសរើសតំបន់ទេសចរណ៍ល្បីៗប្រមាណជា ១០ នៅទូទាំងប្រទេសជប៉ុន សម្រាប់សេវាកម្មរបស់ពួកគេនៅចុងឆ្នាំនេះ ហើយនឹងផ្ដល់សេវាកម្មទេសចរណ៍ជាផ្លូវការនៅដើមឆ្នាំក្រោយ។
អតិថិជនគោលដៅរបស់បណ្ដាក្រុមហ៊ុនខាងលើគឺក្រុមមនុស្សដែលមានទ្រព្យយ៉ាងតិច ៥០ លានដុល្លារអាម៉េរិក។ តាមការគណនា អតិថិជនប្រភេទនេះមានប្រហែល ២១០,០០០ នាក់ នៅលើពិភពលោក។
សំបុត្រសម្រាប់ដំណើរទេសចរណ៍ថ្នាក់ប្រណិតនេះនឹងមានតម្លៃប្រមាណ ៥ លានយេន (៣៦,០០០ ដុល្លារអាម៉េរិក) ក្នុង ១ សំបុត្រ៕
August 19, 2022
គម្រោងបង្កើតរោងចក្រឧស្សាហកម្មថ្មីចំនួន ៤ ទៀត ទទួលបានការអនុម័តពី ក្រុមប្រឹក្សាអភិវឌ្ឍន៍កម្ពុជា
នៅវេលាថ្ងៃត្រង់ ថ្ងៃទី ១៩ សីហានេះ ក្រុមប្រឹក្សាអភិវឌ្ឍន៍កម្ពុជា បានឱ្យដឹងថា បានសម្រេចចេញវិញ្ញាបនបត្រចុះបញ្ជីគម្រោងវិនិយោគជូនដល់ក្រុមហ៊ុនថ្មីចំនួន ៤ ដែលគ្រោងនឹងបង្កើតរោងចក្រនៅ ភ្នំពេញ និង ខេត្តព្រះសីហនុ។
ខាងក្រោមនេះគឺជាបណ្ដាក្រុមហ៊ុនដែលទើបតែទទួលបានវិញ្ញាបនបត្រចុះបញ្ជីគម្រោងវិនិយោគពី ក្រុមប្រឹក្សាអភិវឌ្ឍន៍កម្ពុជា ៖
១-ក្រុមហ៊ុន R.G. FOOTWEAR (CAMBODIA) CO., LTD ដែលមានទីតាំងវិនិយោគស្ថិតនៅភូមិអណ្តូង ឃុំបែកចាន ស្រុកអង្គស្នួល ខេត្តកណ្តាល គ្រោងនឹងវិនិយោគប្រមាណ ៥.៦ លានដុល្លារអាមេរិក និងអាចបង្កើតការងារដល់ពលរដ្ឋបានចំនួន ១,៣២៨ កន្លែង។
២- ក្រុមហ៊ុន Xing Gang Wood Industry (Cambodia) Co., Ltd.។ គម្រោងបង្កើតរោងចក្រផលិតគ្រឿងសង្ហារឹមបង្គុំ និងសម្ភារៈតុបតែងលំអធ្វើពីឈើ ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស ខេមបូឌាន ចេជាង ហ្គ័រជឺ, ខេត្តព្រះសីហនុ, ក្នុងទុនវិនិយោគចំនួន ៣.៩ លានដុល្លារអាមេរិក និងអាចបង្កើតការងារបានចំនួនប្រមាណ ២៥០ នាក់។
៣- ក្រុមហ៊ុន Zhejiang Jeni Furniture Co., Ltd. គម្រោងបង្កើតរោងចក្រផលិតសាឡុង និងស្រោមសាឡុង ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស ខេមបូឌាន ចេជាង ហ្គ័រជឺ, ខេត្តព្រះសីហនុ,ក្នុងទុនវិនិយោគចំនួន ១ លានដុល្លារអាមេរិក និងអាចបង្កើតការងារបានចំនួនប្រមាណ ៤០០ នាក់។
៤- ក្រុមហ៊ុន FF.LL (Cambodia) Co., Ltd.។ គម្រោងបង្កើតរោងចក្រផលិតសម្ភារៈវេចខ្ចប់គ្រប់ប្រភេទ ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស ក្រុងព្រះសីហនុ, ខេត្តព្រះសីហនុ, ក្នុងទុនវិនិយោគចំនួន ៦.៥ លានដុល្លារអាមេរិក និងអាចបង្កើតការងារបានចំនួនប្រមាណ ៨៣០ នាក់។
គម្រោងវិនិយោកដែលមានទុន ១៧ លានដុល្លារអាម៉េរិក របស់ក្រុមហ៊ុនទាំង ៤ ខាងលើនេះ នឹងបង្កើតការងារថ្មីបានប្រមាណ ២,៨០០ កន្លែង៕
August 19, 2022