Author: សឿន សំណាង

Tesla មានមហិច្ឆតាលក់រថយន្តអគ្គិសនីឱ្យបាន ២០ លានគ្រឿងនៅឆ្នាំ ២០៣០
ក្រុមហ៊ុន Tesla នឹងមានទំហំធំជាងទ្វេដង ធៀបនឹងរាល់ក្រុមហ៊ុនផលិតរថយន្តក្នុងប្រវត្តិសាស្ត្រ ដោយកាន់កាប់ ២០% នៃចំណែកទីផ្សារក្នុងពិភពលោក បើសិនលក់រថយន្តអគ្គិសនីបាន ២០ លានគ្រឿងក្នុងឆ្នាំ ២០៣០។
នាយប្រតិបត្តិ (CEO) របស់ក្រុមហ៊ុនផលិតរថយន្តអគ្គិសនី Tesla Inc លោក Elon Musk ថ្មី ៗនេះបានកំណត់គោលដៅប្រកបដោយមហិច្ឆតា នោះគឺ លក់រថយន្តអគ្គិសនី (EV) ឱ្យបាន ២០ លានគ្រឿងនៅឆ្នាំ ២០៣០។
នេះក៏ជាប្រការសំខាន់នៅក្នុងការសន្យាជំរុញកំណើនរថយន្ត ក៏ដូចជាការជំរុញការប្រើប្រាស់ថាមពលកកើតឡើងវិញរបស់ Tesla នៅចំពោះមុខក្រុមម្ចាស់ភាគហ៊ុន។
បើសិនជាសម្រេចគោលដៅ «លក់រថយន្តអគ្គិសនីឱ្យបាន ២០ លានគ្រឿងនៅឆ្នាំ ២០៣០» ក្រុមហ៊ុន Tesla នឹងមានទំហំធំជាងទ្វេដង ធៀបនឹងរាល់ក្រុមហ៊ុនផលិតរថយន្តក្នុងប្រវត្តិសាស្ត្រ ដោយកាន់កាប់ ២០% នៃចំណែកទីផ្សារក្នុងពិភពលោក។
ក៏ប៉ុន្តែ យោងតាមការវិភាគរបស់ទីភ្នាក់ងារសារព័ត៌មាន Reuters កំណើនទ្វេដងដូច្នេះ នឹងធ្វើឱ្យ Tesla ត្រូវចំណាយប្រាក់ច្រើនមិនធ្លាប់មាន នៅក្នុងការផលិត ពោលគឺឡើងដល់រាប់សែនពាន់លានដុល្លារ។ គោលដៅរបស់ Tesla ក៏នឹងដាក់សម្ពាធទៅលើការផលិតគ្រឿងបន្លាស់ ក្នុងនោះមានទាំងវត្ថុធាតុដើមសម្រាប់ផលិតថ្មផ្ទុកអគ្គិសនី។ល។
ជាងនេះ Tesla ក៏កំពុងតែត្រូវប្រកួតប្រជែងយ៉ាងខ្លាំងក្លាពីសំណាក់ក្រុមហ៊ុនផលិតរថយន្តអគ្គិសនីតម្លៃទាបរបស់ ប្រទេសចិន មានដូចជា ក្រុមហ៊ុន Xpeng Inc, Nio Inc និង Li Auto Inc ជាដើម បើទោះបរិមាណរថយន្តដែលបានលក់ចេញរបស់ក្រុមហ៊ុនទាំងនេះនៅទាប ប៉ុន្តែ មានកំណើនយ៉ាងលឿន។
ក្រុមហ៊ុន BYD របស់ ប្រទេសចិន កំពុងលក់រថយន្ត EV និងរថយន្តកូនកាត់ EV តម្លៃទាប ខណៈដែល Ford Motor Co និង Rivian Automotive Inc បានយកឈ្នះលើ Tesla នៅលើទីផ្សារនៃរថយន្តអគ្គិសនីប្រភេទទ្រុង ជាប្រភេទដែលទើបតែចាប់ផ្ដើមមានការពេញនិយមនៅ អាម៉េរិកខាងជើង៕
រថយន្តរបស់ Ford
រថយន្តអគ្គិសនីរបស់ក្រុមហ៊ុនចិន BYD
រថយន្តអគ្គិសនីរបស់ Xpeng
August 31, 2022
សហភាពអឺរ៉ុប ផ្ដល់ថ្នាំបង្ការវិទ្យុសកម្មនុយក្លេអែរជាង ៥ លានគ្រាប់ ឱ្យ អ៊ុយក្រែន
សហភាពអឺរ៉ុប (EU) នឹងផ្ដល់ថ្នាំគ្រាប់ potassium iodide ចំនួន ៥.៥ លានគ្រាប់ ទៅឱ្យ អ៊ុយក្រែន នៅពេលមានការប្រយុទ្ធគ្នានៅជុំវិញរោងចក្រអគ្គិសនី Zaporizhzhia ដែលបង្កប់នូវហានិភ័យនៃគ្រោះមហន្តរាយនុយក្លេអែរ។
គណកម្មការអឺរ៉ុប បានឱ្យដឹងថា បានទទួលសំណើស្ដីពីថ្នាំ potassium iodide ពី រដ្ឋាភិបាលអ៊ុយក្រែន រួចហើយ។ ថ្នាំ Potassium iodide គឺជាថ្នាំដែលអាចជួយឱ្យប្រជាជនទប់ទល់នឹងហានិភ័យរងឥទ្ធិពលពីវិទ្យុសកម្មក្នុងករណីកើតមានគ្រោះមហន្តរាយនុយក្លេអែរនៅរោងចក្រខាងលើ។
នៅពេលកើតមានគ្រោះមហន្តរាយនុយក្លេអែរ សារធាតុវិទ្យុសកម្ម iodine អាចសាយភាយទៅក្នុងខ្យល់ ហើយអាចត្រូវបានស្រូបចូលក្នុងរាងកាយមនុស្សតាមរយៈ ក្រពេញទីរ៉ូអ៊ីត នៅពេលដកដង្ហើម ឬតាមរយៈអាហារ។ ថ្នាំ potassium iodide នឹងទប់ស្កាត់ការស្រូបសារធាតុ iodine របស់ក្រពេញទីរ៉ូអ៊ីត និងកាត់បន្ថយហានិភ័យកើតជំងឺមហារីកនៅលើក្រពេញនេះ។
EU បញ្ជាក់ថា ការផ្ដល់ថ្នាំ potassium iodide ចំនួន ៥.៥ លានគ្រាប់នេះត្រូវបានចាត់ទុកថាជា «វិធានការទប់ស្កាត់» ដើម្បីបង្កើនខែលការពារសម្រាប់ប្រជាជននៅជុំវិញរោងចក្រផលិតអគ្គិសនីដើរដោយថាមពលនុយក្លេអែរ Zaporizhzhia ដែលស្ថិតក្នុងតំបន់គ្រប់គ្រងដោយ រុស្ស៊ី នៅភាគខាងត្បូងនៃ ប្រទេសអ៊ុយក្រែន៕
August 31, 2022
ជាង ៤០% នៃប្រជាជនអាម៉េរិក ជឿថា នឹងមានសង្គ្រាមស៊ីវិលនៅ ១០ ឆ្នាំខាងមុខ
៤៣% ក្នុងចំណោមជនជាតិអាម៉េរិក ដែលបានចូលរួមការស្ទង់មតិ យល់ថា សហរដ្ឋអាម៉េរិក នឹងប្រឈមមុខជាមួយនឹងសង្គ្រាមក្នុងប្រទេស នៅ ១ ទសវត្សរ៍ទៀត ដោយសារតែការរើសអើងផ្នែកនយោបាយ។
លទ្ធផលនៃការស្ទង់មតិខាងលើត្រូវបាន YouGov និង Economist ប្រកាសកាលពីចុងសប្ដាហ៍កន្លង។ ៤០% ក្នុងក្រុមសមាជិករបស់ បក្សប្រជាធិបតេយ្យ និង ៥៤% នៃសមាជិកបក្សសាធារណរដ្ឋ ជឿថា នឹងមានសង្គ្រាមនៅ ១០ ឆ្នាំខាងមុខ។
លទ្ធផលនៃការស្ទង់មតិក៏បានបង្ហាញថា ៦៥% ក្នុងចំណោមអ្នកដែលត្រូវបានសួរ និយាយថា អំពើហិង្សាផ្នែកនយោបាយនៅ សហរដ្ឋអាម៉េរិក បានកើនឡើងគួរឱ្យកត់សម្គាល់ចាប់ពីដើមឆ្នាំ ២០២១។ ៦២% ជឿថា ស្ថានការណ៍នេះនឹងនៅតែកើតឡើងជាបន្តក្នុងអំឡុងច្រើនឆ្នាំទៀត។
លទ្ធផលនៃការស្ទង់មតិនេះត្រូវបានប្រកាសក្នុងគ្រាដែល តំណាងរាស្ត្របក្សសាធារណរដ្ឋ នៅសភាជាន់ខ្ពស់ Lindsey Graham កាលពីថ្ងៃទី ២៨ សីហា ព្យាករថា «អំពើហិង្សាតាមដងផ្លូវ» នឹងកើតមាន បើសិន អតីតប្រធានាធិបតី ដូណាល់ ត្រាំ ត្រូវគេកាត់ទោសពីបទរក្សាឯកសារសម្ងាត់បន្ទាប់ពីចាកចេញពី សេតវិមាន។ មតិរបស់ Graham ភ្លាមនោះក៏ត្រូវរងការរិះគន់ជាច្រើនផងដែរ។
August 31, 2022
ត្រូវបានព្យាករថានឹងមានកំណើនសេដ្ឋកិច្ចនាំមុខគេនៅ ASEAN-6 ក្នុងឆ្នាំ ២០២៣ តើ GDP វៀតណាម ប្រែប្រួលយ៉ាងណា?
យោងតាមលទ្ធផលនៃកំណើនសេដ្ឋកិច្ចកើនឡើងខ្ពស់ខ្លាំងក្នុងអំឡុងពាក់កណ្ដាលដើមឆ្នាំ ២០២២ បណ្ដាអង្គការអន្តរជាតិ បានលើកឡើងនូវការព្យាករអំពីកំណើនសេដ្ឋកិច្ចរបស់ វៀតណាម និងបណ្ដាប្រទេសក្នុងតំបន់ ASEAN-6 សម្រាប់ឆ្នាំ ២០២២ និង ២០២៣។
យោងទៅលើរបាយការណ៍ព្យាករសេដ្ឋកិច្ចទូទាំងសកលលោកថ្មីបំផុតរបស់ វិទ្យាស្ថានគណនេយ្យករជាន់ខ្ពស់ចក្រភពអង់គ្លេស និងវែល (ICAEW) និង Oxford Economics ដែលត្រូវបានប្រកាសកាលពីខែមិថុនា ២០២២ បង្ហាញថា វៀតណាម ត្រូវបានព្យាករថាជាប្រទេសដែលមានសក្ដានុពលកំណើនសេដ្ឋកិច្ចខ្ពស់ក្នុងតំបន់ ពោលគឺ ៦.៥% ក្នុងឆ្នាំ ២០២២ និង ៨.៣% ក្នុងឆ្នាំ ២០២៣ (ខ្ពស់ជាងគេបង្អស់ក្នុងតំបន់ ASEAN-6)។
ចំណែក ឥណ្ឌូណេស៊ី ថៃ ម៉ាឡេស៊ី សិង្ហបុរី និង ហ្វ៊ីលីពីន ត្រូវបានព្យាករថា មានកំណើន GDP តាមពីក្រោយ ប្រទេសវៀតណាម ដោយមានកំណតាមលំដាប់គឺ ៥.៧%, ៤.៤%, ៧.២%, ២.៩%, ៧.៣% នៅឆ្នាំ ២០២២ និង ៥.៧%, ៦.១%, ៤.២%, ២.២%, ៥.២% នៅឆ្នាំ ២០២៣។
ទំហំ GDP របស់ ឥណ្ឌូណេស៊ី នឹងនាំមុខគេក្នុងតំបន់ ASEAN-6 ក្នុងឆ្នាំ ២០២២ និង ២០២៣ ដោយ GDP សម្រេចបាន ១.២១ ទ្រីលានដុល្លារអាម៉េរិក និង ១.២៨ ទ្រីលានដុល្លារ។ ឈរបន្ទាប់ពី ឥណ្ឌូណេស៊ី គឺ ប្រទេសថៃ, ម៉ាឡេស៊ី, សិង្ហបុរី, ហ្វ៊ីលីពីន និង វៀតណាម។
យោងតាមការព្យាកររបស់ មូលនិធិរូបិយប័ណ្ណអន្តរជាតិ (IMF) កំណើនសេដ្ឋកិច្ចរបស់ វៀតណាម នឹងសម្រេចបាន ៦% ឈរលំដាប់ទី ២ ក្នុងតំបន់ ASEAN-6 នៅឆ្នាំ ២០២២ និង ៧.២% ឈរលំដាប់ទី ១ ក្នុងតំបន់ ASEAN-6 (ASEAN-6 រួមមាន ១០ ប្រទេសនៃ សមាគមប្រជាជាតិអាស៊ីអាគ្នេយ៍ បូកនឹង ចិន, ជប៉ុន, កូរ៉េខាងត្បូង, អូស្ត្រាលី, នូវែលសេឡង់ និង ឥណ្ឌា) នៅឆ្នាំ ២០២៣។
ចំណែក ឥណ្ឌូណេស៊ី, ថៃ, ម៉ាឡេស៊ី, សិង្ហបុរី និង ហ្វ៊ីលីពីន ត្រូវបានព្យាករថា នឹងមានកំណើនសេដ្ឋកិច្ចតាមពីក្រោយ ប្រទេសវៀតណាម នៅឆ្នាំ ២០២២ និង ២០២៣។
ដូច្នេះ យោងតាមការព្យាកររបស់ ICAEW, IMF និង AMRO ទំហំ GDP របស់ វៀតណាម ក្នុងឆ្នាំ ២០២២ ឈរលំដាប់ទី ៦ ក្នុងតំបន់ ASEAN-6។ ដល់ឆ្នាំ ២០២៣ ទំហំ GDP របស់ប្រទេសនេះនឹងឈរលំដាប់ទី ៤ ក្នុងតំបន់ ASEAN-6 ដោយមានទំហំ GDP មិនលើសខ្វះគ្នាប៉ុន្មាន បើប្រៀបធៀបរវាងការព្យាកររបស់អង្គការទាំង អន្តរជាតិទាំង ៣ ខាងលើនេះ៕
August 30, 2022
គម្រោងសាងសង់ស្ពានអាកាសនៅចំណុចប្រសព្វមហាវិថី សម្តេចតេជោ ហ៊ុន សែន មហាវិថីព្រះមុនីវង្ស និងវិថីកងយោធពលខេមរភូមិន្ទ នៅ រាជធានីភ្នំពេញ
នារសៀលថ្ងៃទី ៣០ សីហា ២០២២ នេះ មន្ទីរសាធារណការ និងដឹកជញ្ជូនរាជធានីភ្នំពេញ បានប្រកាសឱ្យដឹងអំពីព័ត៌មានលំអិត នៃគម្រោងសាងសង់ស្ពានអាកាសនៅចំណុចប្រសព្វមហាវិថី សម្តេចតេជោ ហ៊ុន សែន មហាវិថីព្រះមុនីវង្ស និងវិថីកងយោធពលខេមរភូមិន្ទ ដែលស្ថិតក្នុងខណ្ឌចំការមន និងខណ្ឌមានជ័យ រាជធានីភ្នំពេញ។
សេចក្ដីលម្អិតស្ដីអំពីគម្រោងនេះ មានដូចខាងក្រោម ៖
-ជាគម្រោងរបស់រាជរដ្ឋាភិបាលកម្ពុជាតាមរយៈរដ្ឋបាលរាជធានីភ្នំពេញ
-សាងសង់ដោយក្រុមហ៊ុនវិនិយោគទុនអាណិកជនកម្ពុជា OCIC
-គ្រោងចំណាយថវិកាចំនួន ៣៦.៧៧៥.០០០ដុល្លាអាមេរិក
-រយៈពេលសាងសង់ ៣៦ខែ
លក្ខណៈបច្ចេកទេសនៃផ្លូវថ្នល់ផ្ទាល់ដី ស្ពានអាកាសជាន់ទី ១ និងជាន់ទី២ ៖
១. ផ្លូវថ្នល់ផ្ទាល់ដីៈ
មានរង្វង់មូល នៅត្រង់ចំណុចប្រសព្វ ដែលបំបែកខ្នែងជាបួនទិសផ្សេងគ្នា។
១.១ រង្វង់មូល (មានបរិមាត្រ ១៧៨ម៉ែត្រ x ទទឹង១១.៨៥ម៉ែត្រ)
– កាំរង្វង់ក្នុង ២០.០០ម៉ែត្រ និងកាំរង្វង់ក្រៅ ៣៣.០០ម៉ែត្រ ដែលមានតួនាទីជារង្វង់មូលដើម្បីបែងចែកទិសដៅចរាចរណ៍
– គន្លងចរាចរណ៍មាន៣គន្លងផ្លូវ (សម្រាប់រថយន្តមានទំហំ ៣.៩៥ម៉ែត្រក្នុងមួយគន្លង)
– កម្ពស់សុវត្ថិភាព : ៥.០០ម៉ែត្រ ផ្នែកឆ្លងកាត់ក្រោមស្ពានអាកាសជាន់ទី១
១.២ ផ្លូវថ្នល់ផ្ទាល់ដី តាមបណ្តោយស្ពាន និងក្រោមស្ពានដែលតភ្ជាប់ទៅនឹងរង្វង់មូល (មានទទឹង ៧ម៉ែត្រ)
– ទិសដៅចរាចរណ៍ : ផ្លូវឯកទិស មានទិសដៅទៅ និងមកពីមហាវិថីសម្តេចតេជោ ហ៊ុន សែន មហាវិថីព្រះមុនីវង្ស វិថីកងយោធពលខេមរភូមិន្ទ ស្ពានព្រះមុនីវង្ស និងផ្លូវជាតិលេខ២
– គន្លងចរាចរណ៍ : ២គន្លងផ្លូវ (១គន្លងផ្លូវសម្រាប់រថយន្តមានទំហំ ៣.៥០ម៉ែត្រ)។
២. ស្ពានអាកាសជាន់ទី១ :
ជាស្ពានរង្វង់មូល នៅត្រង់ចំណុចប្រសព្វ ដែលបំបែកខ្នែងជាបួនទិសផ្សេងគ្នា នៃមហាវិថីសម្តេចតេជោ ហ៊ុន សែន ស្ពានព្រះមុនីវង្ស មហាវិថីព្រះមុនីវង្ស និងវិថីកងយោធពលខេមរភូមិន្ទ
២.១ ស្ពានអាកាសរង្វង់មូល (មានបរិមាត្រ ១៧៨ម៉ែត្រ x ទទឹង១២.៨៥ម៉ែត្រ)
– កាំរង្វង់ក្នុង ២០.០០ម៉ែត្រ និងកាំរង្វង់ក្រៅ ៣៣.០០ម៉ែត្រ ដែលមានតួនាទីជារង្វង់មូលដើម្បីបែងចែកទិសដៅចរាចរណ៍
– គន្លងចរាចរណ៍ មាន៣គន្លងផ្លូវ (សម្រាប់រថយន្តមានទំហំ ៣.៩៥ម៉ែត្រ ក្នុងមួយគន្លង)
– កម្ពស់សុវត្ថិភាព : ៥.០០ម៉ែត្រ ផ្នែកឆ្លងកាត់ក្រោមស្ពានអាកាសជាន់ទី២
២.២ ស្ពានអាកាសខ្នែង A ឆ្ពោះទៅស្ពានព្រះមុនីវវង្ស (មានប្រវែង ២០០ម៉ែត្រ x ទទឹង ១១.៥០ម៉ែត្រ)
– ទិសដៅចរាចរណ៍ : ផ្លូវទ្វេទិស មានទិសដៅទៅមកពីស្ពានព្រះមុនីវង្ស
– គន្លងចរាចរណ៍ : ៤គន្លងផ្លូវទៅមក (២គន្លងទៅ និង២គន្លងមក ដែលម្ខាងមាន ១គន្លងផ្លូវសម្រាប់រថយន្តមានទំហំ ៣.៥០ម៉ែត្រ + ១គន្លងគន្លងផ្លូវសម្រាប់ទោចក្រយានយន្ត
មានទំហំ ១.៥០ម៉ែត្រ)
២.៣ ស្ពានអាកាសខ្នែង B វិថីកងយោធពលខេមរភូមិន្ទ (មានប្រែវង ២០០ម៉ែត្រ x ទទឹង ៦.០០ម៉ែត្រ)
– ទិសដៅចរាចរណ៍ : ផ្លូវឯកទិស មានទិសដៅឆ្ពោះទៅវិថីកងយោធពលខេមរភូមិន្ទ
– គន្លងចរាចរណ៍ : ២គន្លងផ្លូវ (១គន្លងផ្លូវសម្រាប់រថយន្តមានទំហំ ៣.៥០ម៉ែត្រ + ១គន្លងផ្លូវសម្រាប់ទោចក្រយានយន្ត មានទំហំ ១.៥០ម៉ែត្រ)
២.៤ ស្ពានអាកាសខ្នែង C មហាវិថីព្រះមុនីវង្ស (មានប្រវែង ១៤៤ម៉ែត្រ x ទទឹង ៦.០០ម៉ែត្រ)
– ទិសដៅចរាចរណ៍ : ផ្លូវឯកទិស មានទិសដៅមកពីមហាវិថីព្រះមុនីវង្ស
– គន្លងចរាចរណ៍ : ២គន្លងផ្លូវ (១គន្លងផ្លូវសម្រាប់រថយន្តមានទំហំ ៣.៥០ម៉ែត្រ + ១គន្លងផ្លូវ សម្រាប់ទោចក្រយានយន្តមានទំហំ ១.៥០ម៉ែត្រ)
២.៥ ស្ពានអាកាសខ្នែង D មហាវិថីព្រះមុនីវង្ស (មានប្រវែង ១៦១ម៉ែត្រ x ទទឹង ៦.០០ម៉ែត្រ)
– ទិសដៅចរាចរណ៍ : ផ្លូវឯកទិស មានទិសដៅឆ្ពោះទៅមហាវិថីព្រះមុនីវង្ស
– គន្លងចរាចរណ៍ : ២គន្លងផ្លូវ (១គន្លងផ្លូវសម្រាប់រថយន្តមានទំហំ ៣.៥០ម៉ែត្រ + ១គន្លងផ្លូវសម្រាប់ទោចក្រយានយន្ត
មានទំហំ ១.៥០ម៉ែត្រ)
២.៦ ស្ពានអាកាសខ្នែង E មហាវិថីសម្តេចតេជោ ហ៊ុន សែន (មានប្រវែង ១៥១ម៉ែត្រ x ទទឹង ៦.០០ម៉ែត្រ)
– ទិសដៅចរាចរណ៍ : ផ្លូវឯកទិស មានទិសដៅមកពីមហាវិថីសម្តេចតេជោ ហ៊ុន សែន
– គន្លងចរាចរណ៍ : ២គន្លងផ្លូវ (១គន្លងផ្លូវសម្រាប់រថយន្តមានទំហំ ៣.៥០ម៉ែត្រ + ១គន្លងផ្លូវសម្រាប់ទោចក្រយានយន្ត
មានទំហំ ១.៥០ម៉ែត្រ)។
២.៧ ស្ពានអាកាសខ្នែង F មហាវិថីសម្តេចតេជោ ហ៊ុន សែន (មានប្រវែង ១៣១ម៉ែត្រ x ទទឹង ៦.០០ម៉ែត្រ)
– ទិសដៅចរាចរណ៍ : ផ្លូវឯកទិស មានទិសដៅឆ្ពោះទៅមហាវិថីសម្តេចតេជោ ហ៊ុន សែន
– គន្លងចរាចរណ៍ : ២គន្លងផ្លូវ (១គន្លងផ្លូវសម្រាប់រថយន្តមានទំហំ ៣.៥០ម៉ែត្រ + ១គន្លងផ្លូវសម្រាប់ទោចក្រយានយន្ត
មានទំហំ ១.៥០ម៉ែត្រ)។
៣. ស្ពានអាកាសជាន់ទី២ : (មានប្រវែង ១,២០០ម៉ែត្រ x ទទឹងពី ១៤.០០ម៉ែត្រ ទៅ ១៥.៨០ម៉ែត្រ)
– ទិសដៅចរាចរណ៍ : ផ្លូវទ្វេទិស មានទិសដៅទៅមករវាង មហាវិថីព្រះមុនីវង្ស និងមហាវិថីសម្តេចតេជោ ហ៊ុន សែន
– គន្លងចរាចរណ៍ : ៤គន្លងផ្លូវ (២គន្លងទៅ និង២គន្លងមក ដែលម្ខាងមាន២គន្លងផ្លូវសម្រាប់រថយន្តមានទំហំ ៣.២៥ម៉ែត្រ ទៅ ៣.៧០ម៉ែត្រ)
• ធ្នឹមប្រអប់ជាបេតុងអាមេ ដែលមានកម្ពស់ ១.៥០ម៉ែត្រ
• សសរស្ពាននីមួយៗប្រើបេតុង ជាមួយនឹងជើងតាងកម្ពស់ ១.៥០ម៉ែត្រ
• ប្រភេទគ្រឹះខួង (Bored pile) មានអង្កត់ផ្ចិតទំហំ ១.៥០ម៉ែត្រ ទៅ ១.២០ម៉ែត្រ និងមានជម្រៅប្រមាណ៥០ម៉ែត្រ
• ជម្រាលទទឹងស្ពាន: ២%
• ជម្រាលបណ្តោយស្ពាន: ៥%
• បង្កាន់ដៃស្ពានមានកម្ពស់: ១.១០ម៉ែត្រ
• ល្បឿនសុវត្ថិភាព: ២០គ. ម/ម៉ោង ទៅ៤០គ.ម/ម៉ោង
• ទម្ងន់ផ្ទុកអនុញ្ញាត: ៣០តោន
• កម្ពស់អនុញ្ញាត: ៥.០០ម៉ែត្រ
• អ៊ុតកៅស៊ូ AC កម្រាស់ ០.១០ម៉ែត្រ
• ដាក់ស្លាកសញ្ញាចរាចរ និងអ៊ុតគំនូសចរាចរដោយប្រើថ្នាំទែរម៉ូប្លាស្ទឹក
• រៀបចំប្រព័ន្ឋបង្ហូរទឹកនិងបណ្តាញលូ និងកែសម្រួចចិញ្ចើផ្លូវអមសងខាង
• បំពាក់ភ្លើងបំភ្លឺផ្លូវ និងបំភ្លឺស្ពាន
• រៀបចំសួនច្បារ
August 30, 2022
ឥណ្ឌូណេស៊ី ដាក់ឱ្យប្រើប្រាស់កូដ QR តភ្ជាប់ប្រព័ន្ធទូទាត់នៅទូទាំងតំបន់អាស៊ាន
ធនាគារកណ្ដាលនៃ ប្រទេសឥណ្ឌណេស៊ី អភិវឌ្ឍកូដ QR មួយប្រភេទ អនុញ្ញាតឱ្យអ្នកប្រើប្រាស់សេវាទូទាត់នានារបស់ប្រទេសនេះ អាចផ្ទេរប្រាក់ និងទទួលប្រាក់ជាមួយនឹងសេវាទូទាត់ប្រាក់ដទៃនៃបណ្ដាប្រទេសនៅក្នុង សមាគមអាស៊ាន ទាំងមូល។
ប្រធានាធិបតីឥណ្ឌូណេស៊ី កាលពីថ្ងៃទី ២៩ សីហា បានប្រកាសបង្ហាញកូដ QR អន្តរជាតិ ស្ដង់ដារ ឥណ្ឌូណេស៊ី (QRIS) ដើម្បីភ្ជាប់បណ្ដាញទូទាត់ប្រាក់របស់ប្រទេសនេះទៅនឹងបណ្ដាញទូទាត់របស់សមាជិកនានាក្នុងតំបន់អាស៊ាន។
QRIS ដែលត្រូវបានអភិវឌ្ឍដោយធនាគារកណ្ដាលនៃ ប្រទេសឥណ្ឌណេស៊ី អនុញ្ញាតឱ្យអតិថិជន ប្រើប្រាស់សេវាទូទាត់របស់នានារបស់ប្រទេសនេះ ផ្ទេរប្រាក់ និងទទួលប្រាក់ជាមួយនឹងសេវាទូទាត់ប្រាក់ដទៃនៅក្នុង សមាគមប្រជាជាតិអាស៊ីអាគ្នេយ៍ (អាស៊ាន-ASEAN) ទាំង ១០ ប្រទេស។
នៅក្នុងពិធីប្រកាសបង្ហាញ QRIS ប្រធានាធិបតីឥណ្ឌូណេស៊ី Joko Widodo លើកឡើងថា «ប្រព័ន្ធទំនើបនេះបង្ហាញថា ប្រទេសរបស់យើងបត់បែនបានជាមួយនឹងបច្ចេកវិទ្យាឌីជីថល ហើយយើងក៏មិនត្រូវស្ថិតនៅពីក្រោយធៀបនឹងបណ្ដាប្រទេសដទៃ»។
ប្រធានាធិបតីឥណ្ឌូណេស៊ី Joko Widodo រំពឹងថា QRIS នឹងអាចជួយកាត់បន្ថយការចំណាយរបស់អាជីវករ ម្ចាស់ក្រុមហ៊ុន ក៏ដូចជាក្នុងវិស័យទេសចរណ៍ ក្នុងការផ្ដល់សេវាកម្ម និងទំនិញដែលមានតម្លៃអាចប្រកួតប្រជែងបាននៅក្នុងទីផ្សារសកល។
ទេសាភិបាលរបស់ ធនាគារកណ្ដាលឥណ្ឌូណេស៊ី Perry Warjiyo បានឱ្យដឹងថា ថៃ គឺជាប្រទេសដំបូងគេដែលមានប្រព័ន្ធទូទាត់ទាំងស្រុងជាមួយនឹង QRIS របស់ ឥណ្ឌូណេស៊ី។ ចំណែករដ្ឋាភិបាលមួយចំនួនទៀត ដូចជា ម៉ាឡេស៊ី សិង្ហបុរី និង ហ្វ៊ីលីពីន ជាដើម ក៏បានអះអាងថា នឹងភ្ជាប់ជាមួយប្រព័ន្ធទូទាត់មួយនេះក្នុងពេលឆាប់ៗខាងមុខ៕
August 30, 2022
គ្រោះមហន្តរាយទឹកជំនន់ កំពុងពន្លិចផ្ទៃដី ១/៣ របស់ ប្រទេសប៉ាគីស្ថាន (វីដេអូ)
រដ្ឋមន្ត្រីឧតុនិយមរបស់ ប៉ាគីស្ថាន បានឱ្យដឹងថា ជំនន់ទឹកភ្លៀងចាប់ពីខែមិថុនារហូតដល់បច្ចុប្បន្ន បានបណ្ដាលឱ្យផ្ទៃដី ១/៣ របស់ប្រទេសនេះ ត្រូវលិចលង់ទាំងស្រុង។
«នោះគឺជាសមុទ្រទឹកដ៏ធំ ពុំមានដីគោកដើម្បីបូមទឹកចេញទៅក្រៅ» រដ្ឋមន្ត្រីឧតុនិយមប៉ាគីស្ថាន Sherry Rehman ថ្លែងកាលពីថ្ងៃទី ២៩ សីហា។ លោកស្រីបន្ថែមថា «វិបត្តិនេះមានទំហំធំដែលនឹកស្មានមិនដល់ លើសពីអ្វីដែលយើងធ្លាប់បានឃើញកន្លងមក»។
ប្រទេសប៉ាគីស្ថាន មានផ្ទៃដីជាង ៩៧៦,០០០ គីឡូម៉ែត្រក្រឡា។ យោងតាមប្រកាសរបស់លោកស្រី Rehman ផ្ទៃដីជាង ២៦៥,០០០ គីឡូម៉ែត្រក្រឡារបស់ប្រទេសនេះ កំពុងលិចលង់ក្នុងទឹកជំនន់។
អាជ្ញាធរគ្រប់គ្រងគ្រោះមហន្តរាយធម្មជាតិរបស់ ប៉ាគីស្ថាន បានបញ្ជាក់ថា មនុស្សប្រមាណ ៣៣ លាននាក់ ក្នុងចំណោមជិត ២២១ លាននាក់របស់ប្រទេសនេះ ត្រូវរងផលប៉ះពាល់ធ្ងន់ធ្ងរដោយសារទឹកជំនន់ចាប់ពីខែមិថុនា ព្រោះតែភ្លៀងធំធ្លាក់ជាបន្តបន្ទាប់។ ផ្ទះប្រមាណកន្លះលានខ្នងត្រូវរងផលប៉ះពាល់ ក្នុងនោះមាន ផ្ទះជិត ២២០,០០០ ខ្នងត្រូវបានបំផ្លាញទាំងស្រុង។
https://www.youtube.com/watch?v=VDajhuqMcwY
August 30, 2022
ស្ថានភាពជំងឺកូវីដ-១៩ នៅ កម្ពុជា ប្រកាសនៅក្នុងថ្ងៃទី ៣០ ខែសីហា ២០២២
កម្ពុជា រកឃើញអ្នកឆ្លងកូវីដ-១៩ ករណីថ្មី ចំនួន ១៥ នាក់ ក្នុងអំឡុង ២៤ ម៉ោង នៃថ្ងៃទី ២៩ ខែសីហា ២០២២។
ក្នុងអំឡុងពេលដដែល ក៏មានអ្នកជំងឺកូវីដ-១៩ ចំនួន ២១ នាក់បានជាសះស្បើយ និង មិនមានករណីស្លាប់ថ្មី ដោយសារជំងឺនេះនៅឡើយ។
August 30, 2022
មហាសេដ្ឋីឥណ្ឌា ក្លាយជាអ្នកមានជាងគេលំដាប់ទីបីក្នុងពិភពលោក
មហាសេដ្ឋី Gautam Adani គឺជាអ្នកមានជាងគេនៅក្នុង ទ្វីបអាស៊ី ដែលមានឈ្មោះនៅក្នុង top 3 ក្នុងចំណោមអ្នកមានទ្រព្យច្រើនជាងគេបង្អស់នៅក្នុងពិភពលោក ដោយមានទ្រព្យជិត ១៤០ ពាន់លានដុល្លារអាម៉េរិក។
កាលពីប៉ុន្មានឆ្នាំមុន នៅខាងក្រៅ ប្រទេសឥណ្ឌា មានមនុស្សតិចណាស់ដែលបានស្គាល់លោក Gautam Adani។ ប៉ុន្តែ មួយរយៈពេលចុងក្រោយនេះ អ្នកជំនួញជនជាតិឥណ្ឌា រូបនេះ បានបង្កការភ្ជាក់ផ្អើលជាបន្តបន្ទាប់ ព្រោះតែទ្រព្យរបស់គាត់កើនឡើងមិនឈប់ឈរ។
បច្ចុប្បន្ន លោក Adani មានទ្រព្យសរុប ១៣៧.៤ ពាន់លានដុល្លារអាម៉េរិក ច្រើនជាងមហាសេដ្ឋីបារាំង Bernard Arnault ទៅទៀត ដែលនេះបាននាំឱ្យគាត់ជាប់ចំណាត់ថ្នាក់ទីបីស្ដីពីអ្នកមានជាងគេក្នុងពិភពលោក។
នេះគឺជាលើកដំបូងហើយដែល ជនជាតិអាស៊ីម្នាក់ មានឈ្មោះនៅក្នុង top 3 នៃបញ្ជីចំណាត់ថ្នាក់អ្នកមានរបស់ Bloomberg Billionaires Index។
បច្ចុប្បន្ន មហាសេដ្ឋី Gautam Adani ឈរពីក្រោយលោក Elon Musk និងលោក Jeff Bezos។ ក្នុងឆ្នាំនេះ មហាសេដ្ឋី Adani រកបានប្រាក់សរុប ៦០.៩ ពាន់លានដុល្លារ ខ្ពស់ជាង ៥ ដង ធៀបនឹងមហាសេដ្ឋកិច្ចដទៃ។
August 30, 2022
មហាសេដ្ឋ Elon Musk វាយតម្លៃអំពី «ការស្រេកឃ្លាន» ថាមពលរបស់ពិភពលោក
មហាសេដ្ឋីអាម៉េរិកដើមកំណើតអាហ្វ្រិកខាងត្បូង លោក Elon Musk យល់ថា ពិភពលោកនៅតែត្រូវការប្រើប្រាស់រ៉ែប្រេង និងឧស្ម័ន យ៉ាងហោចក៏នៅក្នុងរយៈពេលខ្លី មុនពេលអាចប្ដូរទៅប្រើប្រាស់ថាមពលបៃតង។
ទន្ទឹមនឹងការអភិវឌ្ឍប្រភពថាមពលបៃតង បណ្ដាប្រទេសក្នុងពិភពលោកត្រូវការបន្តរុករក និងទាញយករ៉ែប្រេង និងឧស្ម័នដើម្បីរក្សាសេដ្ឋកិច្ចបច្ចុប្បន្ន។
ខាងលើគឺជាការអះអាងរបស់ម្ចាស់ក្រុមហ៊ុនផលិតរថយន្តអគ្គិសនី Tesla លោក Elon Musk ដែលបានលើកឡើងកាលពីថ្ងៃទី ២៩ សីហា នៅខាងក្រៅសន្និសីទស្ដីពីថាមពល ដែលត្រូវបានរៀបចំឡើងនៅក្នុងទីក្រុង Stavanger របស់ ប្រទេសន័រវែស។
លោក Musk ថ្លែងថា ពិភពលោកនៅតែត្រូវការប្រើប្រាស់ប្រេងរ៉ែ និងឧស្ម័ន យ៉ាងហោចក៏នៅក្នុងរយៈពេលខ្លី មុនពេលអាចប្ដូរទៅប្រើប្រាស់ថាមពលបៃតងទាំងស្រុង មិនដូច្នេះទេ សេដ្ឋកិច្ចបច្ចុប្បន្ននឹងត្រូវដួលរលំ។
លោក Musk យល់ថា ការប្ដូរពីការប្រើប្រាស់រ៉ែប្រេង និងឧស្ម័ន ទៅប្រើប្រាស់ថាមពលស្អាត ដូចជាកម្ដៅព្រះអាទិត្យ កម្លាំងខ្យល់ កម្លាំងរលកទឹកសមុទ្រជាដើម គឺត្រូវការពេលរាប់ទសវត្សរ៍ទៅមុខទៀត។
August 30, 2022