សឿន សំណាង - La Reine Media

ប្រធានាធិបតីបេឡារុស ពុះឧសដើម្បី «ជួយឱ្យ អឺរ៉ុប មិនស្លាប់ដោយសារធាតុត្រជាក់»

អាជ្ញាធរបេឡារុស បានបង្ហោះវីដេអូមួយស្ដីពី ប្រធានាធិបតី Lukashenko កំពុងពុះឧស និងថ្លែងថា លោកនឹងមិនបណ្ដោយឱ្យ អឺរ៉ុប «ស្លាប់ដោយសារត្រជាក់» ក្នុងរដូវរងានេះឡើយ។

«នេះពិតជាឧសល្អ» ប្រធានាធិបតីបេឡារុស Alexander Lukashenko ថ្លែងនៅពេលកំពុងពុះឧស នៅក្បែរអ្នកជំនួញ Sergey Teterin លើទីលាននៃតំបន់លំហែកាយនៅជាយក្រុង។

វីដេអូនេះត្រូវបានការិយាល័យសារព័ត៌មានរបស់ ប្រធានាធិបតីបេឡារុស បង្ហោះលើ Telegram កាលពីថ្ងៃទី ១៤ កញ្ញា។ «យើងនឹងមិនបណ្ដោយឱ្យ អឺរ៉ុប ស្លាប់ដោយសារធាតុត្រជាក់។ ចូរជួយដល់ពួកគេ ថ្ងៃណាមួយ ពួកគេនឹងជួយយើងវិញក៏ថាបាន» លោក Lukashenko ថ្លែងដូច្នេះ។

ប្រធានាធិបតី Lukashenko យល់ថា បច្ចុប្បន្ន អឺរ៉ុប មិនមានជម្រើសច្រើន ព្រោះថា ប្រការសំខាន់សម្រាប់ពួកគេនាពេលនេះគឺកម្ដៅ។ «យើងត្រូវធានាថា ឧសទាំងនេះនឹងត្រូវបានបញ្ជូនទៅដល់ដៃពលករ កសិករ មិនមែនក្រុមអ្នកមានឡើង» ប្រធានាធិបតីបេឡារុស បញ្ជាក់ដូច្នេះ។

វីដេអូនេះត្រូវបានបង្ហោះនៅក្នុងស្ថានការណ៍ដែលលំហូរឧស្ម័នពី រុស្ស៊ី ទៅកាន់ អឺរ៉ុប កំពុងថយចុះច្រើន បន្ទាប់ពី ទីក្រុងមូស្គូ បើកយុទ្ធនាការយោធាពិសេសនៅ អ៊ុយក្រែន កាលពីខែកុម្ភៈ ២០២២។

ក្រុមប្រទេសនៅ អឺរ៉ុប កំពុងតែរត់រកប្រភពផ្គត់ផ្គង់ថាមពលជំនួសឧស្មានពី រុស្ស៊ី និងសំច័យឧស្ម័នដើម្បីចៀសវាងបញ្ហាខ្វះខាតថាមពលនៅក្នុងរដូវរងាឆ្នាំនេះ។

បេឡារុស គឺជាសម្ព័ន្ធមិត្តរបស់ រុស្ស៊ី ដើរតួនាទីជាកន្លែងប្រមូលផ្ដុំកងទ័ពរបស់ ទីក្រុងមូស្គូ ក្នុងយុទ្ធនាការយោធាពិសេស។ ប្រទេសទាំងពីរនេះសុទ្ធតែត្រូវបាន សហភាពអឺរ៉ុប ដាក់ទណ្ឌកម្មធ្ងន់ធ្ងរមិនធ្លាប់មានពីមុនមក ដើម្បីប្រឆាំងនឹងការឈ្លានពានរបស់ រុស្ស៊ី ទៅលើ អ៊ុយក្រែន៕

https://www.youtube.com/watch?v=WJzU7tNq-Ts

September 15, 2022

ព្រះរាជពិធីដង្ហែព្រះសពអតីតមហាក្សត្រីអង់គ្លេស Elizabeth II

ព្រះសពរបស់អតីតមហាក្សត្រីអង់គ្លេស Elizabeth II ត្រូវបានដង្ហែនៅលើដងផ្លូវប្រវែង ២ គីឡូម៉ែត្រ ឆ្ពោះទៅកាន់មហាសាល Westminster ដោយមានការអមតាមសងខាងផ្លូវ ក៏ដូជាជាការតាមដានរបស់ប្រជាជនរាប់ពាន់នាក់នៅ ទីក្រុងឡុងដ៍។

ព្រះសពរបស់អតីតមហាក្សត្រីអង់គ្លេស Elizabeth II កាលពីម្សិលមិញ (១៤ កញ្ញា) ត្រូវបានតម្កល់លើព្រះទីន័ងដែលមានសេះ ៧ ក្បាលជាអ្នកអូស ចេញដំណើរពីរាជវាំង Buckingham នៅក្រុងឡុងដ៍ ចក្រភពអង់គ្លេស។ រៀងរាល់ ១ នាទី ក្រុមទាហានបាញ់កាំភ្លើងធំ ១ គ្រាប់ពីឧទ្យាន Park Hyde ក្នុងពេលដង្ហែព្រះសព។

«យើងអាចដឹងបានកម្លាំងពីសំឡេងតន្ត្រី។ មនុស្សម្នាស្ថិតនៅក្នុងភាពស្ងប់ស្ងាត់ ទិដ្ឋភាពពិតជាអស្ចារ្យ គួរឱ្យរំភើប» Shirley Negal អាយុ ៦៦ ឆ្នាំ ធ្វើដំណើរពី Kent មកកាន់ ក្រុងឡុងដ៍ ដើម្បីតាមដានពិធីដង្ហែព្រះសព ឱ្យដឹងដូច្នេះ។

ពិធីដង្ហែព្រះសពត្រូវបានធ្វើឡើងក្នុងរយៈពេលប្រហែល ៤០ នាទី នៅលើដងផ្លូវប្រវែង ២ គីឡូម៉ែត្រ ដោយចាប់ផ្ដើមចេញដំណើរពីរាជវាំង Buckingham ឆ្លងកាត់ផ្លូវ The Mall និង Whitehall ដើម្បីឆ្ពោះទៅកាន់មហាសាល Westminster។

ខាងលើគឺ បុត្រចំនួន ៤ អង្គរបស់ អតីតមហាក្សត្រី Elizabeth II គឺមហាក្សត្រ Charles III, ព្រះនាង Anne, ព្រះអង្គម្ចាស់ Andrew និងព្រះអង្គម្ចាស់ Edward រួមនឹងព្រះរាជនត្តា (ចៅ) ២ អង្គ គឺព្រះអង្គម្ចាស់ William និង Harry យាងតាមពីក្រោយព្រះសពអតីតមហាក្សត្រី។

ខាងលើគឺ មហាសីរបស់មហាក្សត្រ Charles (ខាងឆ្វេង) និងព្រះនាង Kate គង់នៅលើរថយន្ត បរតាមពីក្រោយព្រះសពអតីតមហាក្សត្រី Elizabeth II។

ព្រះនាង Sophie (ខាងក្នុង) ដែលជាមហេសីរបស់ព្រះអង្គម្ចាស់ Edward និងជាបុត្រប្រសារបស់ អតីតមហាក្សត្រី Elizabeth II រួមនឹងអ្នកម្នាង Meghan ភរិយារបស់ព្រះអង្គម្ចាស់ Harry ស្ថិតនៅក្នុងរថយន្ត បរតាមពីក្រោយព្រះសព។

មនុស្សរាប់ពាន់នាក់ប្រមូលផ្ដុំគ្នាតាមដងផ្លូវ The Mall និង Whitehall ដើម្បីជាការសម្ដែងការគោរព និងសោកសៅ។ ពួកគេខ្លះកាន់ទង់ជាតិ ខ្លះទៀតកាន់ផ្កា។

ព្រះទីន័ងតម្កល់ព្រះសព ចតនៅខាងមុខច្រកចូលមហាសាល Westminsterមហាសាល Westminster បើកទ្វារ ២៤ ម៉ោងរៀងរាល់ថ្ងៃ នៅក្នុងអំឡុងពេលតម្កល់ព្រះសពអតីតមហាក្សត្រី Elizabeth II នៅទីនេះ។ ប្រជាពលរដ្ឋត្រូវបានអនុញ្ញាតឱ្យចូលគោរព សម្ដែងការសោកស្ដាយចាប់ពីម៉ោង ១៧ ថ្ងៃទី ១៤ កញ្ញា ដល់ម៉ោង ០៦ កន្លះ ថ្ងៃទី ១៩ កញ្ញា។ តាមការប៉ាន់ស្មាន មនុស្សរាប់សែននាក់នឹងត្រូវបានអនុញ្ញាតឱ្យចូលសម្ដែងការគោរពចំពោះអតីតមហាក្សត្រី Elizabeth II។

ព្រះសពត្រូវបានតម្កល់ក្នុងមហាសាល Westminster

ប្រជាពលរដ្ឋមិនត្រូវបានអនុញ្ញាតឱ្យនាំយកផ្កា ទៀន ឬតុក្កតាចូលមកក្នុងមហាសាល Westminster។ ពួកគេត្រូវរក្សាភាពស្ងប់ស្ងាត់ និងមិនត្រូវថតរូប។ ពួកគេត្រូវបានណែនាំឱ្យឈរជាជួរតាមបណ្ដោយមាត់ទន្លេ Thames និងត្រូវបានផ្ដល់ខ្សែដៃដែលមានលេខសម្គាល់។

រាជទាយាទ William និងព្រះនាង Kate រួមនឹងព្រះអង្គម្ចាស់ Harry និងអ្នកម្នាង Meghan នៅក្នុងរាជពិធីបួងសួងនៅឯ មហាសាល Westminster

ក្នុងរយៈពេលជាង ៧ ទសវត្សរ៍ មហាក្សត្រី Elizabeth II បានដឹកនាំរាជវង្សអង់គ្លេស និងប្រទេសនេះឆ្លងកាត់ដំណាក់កាលលំបាក និងឧបសគ្គជាច្រើនក្នុងប្រវត្តិសាស្ត្រ។

សារព័ត៌មានអង់គ្លេស បានកោតសរសើរថា មហាក្សត្រី Elizabeth II គឺជា «និម្មិតរូបនៃស្ថិរភាព» របស់ប្រទេសជាតិអស់រយៈពេលជាង ៧ ទសវត្សរ៍កន្លង នៅពេលរាជាណាចក្រ និងប្រជាជនត្រូវការបង្អែកផ្នែកស្មារតី ក្នុងគ្រាដែលកើតមានព្រឹត្តិការណ៍អាសន្នធំ៕

September 15, 2022

កម្ពុជា សម្ពោធបើកដំណើរការស្ថានីយបញ្ចូលថាមពលយានយន្តអគ្គិសនី នៅ ខេត្តសៀមរាប

ពិធីសម្ពោធបើកឱ្យដំណើរការជាផ្លូវការ ស្ថានីយបញ្ចូលថាមពលយានយន្តអគ្គិសនីថ្មី ស្ថិតនៅភូមិបឹងដូនប៉ា សង្កាត់ស្លក្រាម ក្រុងសៀមរាប ខេត្តសៀមរាប ត្រូវបានរៀបចំឡើងនាថ្ងៃទី ១៤ ខែកញ្ញា ឆ្នាំ ២០២២ ក្រោមអធិបតីភាព ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន។

ស្ថានីយបញ្ចូលថាមពលសម្រាប់យានយន្តអគ្គិសនីថ្មីនេះ ត្រូវបានឧបត្ថម្ភដោយ កម្មវិធីអភិវឌ្ឍន៍អង្គការសហប្រជាជាតិ (UNDP) ដែលធ្វើឡើងក្នុងបំណងបញ្ជ្រាបការយល់ដឹងអំពីយានយន្តអគ្គិសនី ដើម្បីជំរុញការប្រើប្រាស់យានយន្តប្រភេទថ្មីនេះ។

ការដាក់ដំណើរការស្ថានីយថ្មីខាងលើនេះ ក៏ជាផ្នែកមួយដើម្បីជាការបើកផ្លូវសម្រាប់ក្រុមហ៊ុនឯកជន ចូលរួមវិនិយោគក្នុងវិស័យថ្មីនេះ ក្នុងគោលដៅកាត់បន្ថយការបំភាយឧស្ម័នផ្ទះកញ្ចក់ដែលជាសារធាតុបំពុលបរិស្ថាន និងនាំឱ្យផែនដីឡើងកម្ដៅ។

ទាក់ទងនឹងការដាក់ពង្រាយស្ថានីយបញ្ចូលថាមពលសម្រាប់យានយន្តអគ្គិសនី រដ្ឋមន្ត្រីក្រសួងសាធារណការ បានមានប្រសាសន៍ថា ក្រសួងបាន និងកំពុងពិភាក្សាជាមួយបណ្ដាក្រុមហ៊ុនឯកជនដែលជាម្ចាស់ស្ថានីយប្រេងឥន្ធនៈ ដើម្បីស្នើឱ្យដាក់ស្ថានីយបញ្ចូលថាមពលសម្រាប់យានយន្តអគ្គិសនីនេះ។ បច្ចុប្បន្ន មានក្រុមហ៊ុនមួយចំនួនបានចាប់ផ្ដើមដាក់ពង្រាយ ហើយមួយចំនួនទៀតកំពុងតែរៀបចំដំឡើង។

ឯកឧត្តមទេសរដ្ឋមន្ត្រី ស៊ុន ចាន់ថុល បានឱ្យដឹងថា គិតចាប់ពីខែមករា ដល់ខែកក្កដា ២០២២ កម្ពុជា មានយានយន្តអគ្គិសនីប្រមាណ ៣០៥ គ្រឿង ហើយបច្ចុប្បន្នបានឡើងដល់ជិត ១,០០០ គ្រឿង ដែលតួលេខនេះច្រើនជាងឆ្ងាយបើធៀបនឹង ១៦ គ្រឿងកាលពីឆ្នាំ ២០២១។

ទាក់ទងនឹងការលើកទឹកចិត្តដើម្បីឱ្យប្រជាពលរដ្ឋងាកមកប្រើប្រាស់យានយន្តអគ្គិសនី ឯកឧត្តមទេសរដ្ឋមន្ត្រី ស៊ុន ចាន់ថុល បានបញ្ជាក់ថា កម្ពុជា បានបញ្ចុះអត្រាពន្ធ ៦៣% សម្រាប់ការទិញមធ្យោបាយធ្វើដំណើរប្រភេទថ្មីនេះ។

យោងតាម រដ្ឋមន្ត្រីក្រសួងសាធារណការ និងដឹកជញ្ជូន សម្រាប់យានយន្តដែលបញ្ចូលថាមពលអគ្គិសនីនៅតាមស្ថានីយនានា នឹងត្រូវបង់ប្រាក់តែ ១៥០០ រៀលប៉ុណ្ណោះ នៅក្នុង ១ គីឡូវ៉ាត់។

នៅក្នុងពិធីសម្ពោធនេះដែរ ឯកឧត្តមទេសរដ្ឋមន្ត្រី ស៊ុន ចាន់ថុល ក៏បានឱ្យដឹងថា កម្ពុជា បាន និងកំពុងសិក្សាអំពីគម្រោងសាងសង់ផ្លូវរថភ្លើងក្រោមដីនៅ ភ្នំពេញ, ផ្លូវល្បឿនលឿនទី ២ ភំពេញ-បាវិត ខេត្តស្វាយរៀងរួមនឹងគម្រោងស្ថាបនាហេដ្ឋារចនាសម្ព័ន្ធជាច្រើនផ្សេងទៀត។

ក្រៅពីនេះ លោកទេសរដ្ឋមន្ត្រី ក៏បានស្នើឱ្យក្រុមហ៊ុនដឹកជញ្ជូនទំនិញ គោរពច្បាប់ចរាចរណ៍ កុំដឹកទំនិញលើសចំណុះ ដើម្បីចូលរួមថែរក្សាផ្លូវឱ្យនៅគង់វង្សបានយូរអង្វែង៕

September 14, 2022

កម្ពុជា ឈរលំដាប់ទី ៤០ ក្នុងតារាងចំណាត់ថ្នាក់ទីផ្សារដឹកជញ្ជូនទាំង ៥០ ដែលទើបលេចធ្លោជាងគេក្នុងពិភពលោក

យោងតាមតារាងចំណាត់ថ្នាក់របស់ Agility កម្ពុជា ជាប់ចំណាត់ថ្នាក់ទី ៤០ ក្នុងចំណោមទីផ្សារដឹកជញ្ជូនដែលទើបតែលេចធ្លោជាងគេក្នុងពិភពលោក និងទី ៦ នៅក្នុងតំបន់អាស៊ីអាគ្នេយ៍។

Agility ដែលជាអ្នកផ្គត់ផ្គង់សេវាដឹកជញ្ជូន និងឃ្លាំងផ្ទុកទំនិញ ថ្មីៗនេះបានប្រកាសបញ្ជីចំណាត់ថ្នាក់ស្ដីពីទីផ្សារដឹកជញ្ជូនទាំង ៥០ ដែលទើបតែលេចធ្លោ និងទាក់ទាញជាងគេក្នុងពិភពលោក។ ទីផ្សារធំជាងគេទាំង ៣ នៅក្នុងតារាងចំណាត់ថ្នាក់នេះ គឺ ប្រទេសចិន ឥណ្ឌា និង អេមីរ៉ាតអារ៉ាប់រួម (UAE)។

កម្ពុជា ជាប់លេខ ៤០ នៅក្នុងតារាងចំណាត់ថ្នាក់នេះ ដោយលោតឡើងបាន ១ ថ្នាក់ ធៀបនឹងលេខ ៤១ កាលពីឆ្នាំ ២០២១។

បណ្ដាប្រទេសនៅក្នុងតំបន់អាស៊ីអាគ្នេយ៍ដែលមានឈ្មោះនៅក្នុង top 10 នៃតារាងនេះ រួមមាន ម៉ាឡេស៊ី (លេខ ៤), ឥណ្ឌូណេស៊ី (លេខ ៥) និង ប្រទេសថៃ (លេខ ៨) ខណៈ វៀតណាម ជាប់លេខ ១១។

នៅក្នុងតំបន់អាស៊ីអាគ្នេយ៍វិញ ក្នុងចំណោមប្រទេសដែលមានឈ្មោះនៅក្នុងតារាងចំណាត់ថ្នាក់នេះ កម្ពុជា ជាប់លេខ ៦ ដោយ ឈរពីក្រោយ ម៉ាឡេស៊ី ឥណ្ឌូណេស៊ី ប្រទេសថៃ វៀតណាម ហ្វ៊ីលីពីន ប៉ុន្តែ នៅពីលើ មីយ៉ានម៉ា។

September 14, 2022

ទីផ្សារដឹកជញ្ជូនទំនិញតាមរថភ្លើងនឹងកើនដល់ ២០៥ ពាន់លានដុល្លារអាម៉េរិក

ទីផ្សារដឹកជញ្ជូនទំនិញតាមផ្លូវដែកទូទាំងពិភពលោកគ្រោងនឹងកើនឡើងដល់ ២០៥.៣ ពាន់លានដុល្លារអាម៉េរិក ដោយមានអត្រាកំណើនប្រចាំឆ្នាំជារួម (CAGR) ៤.៣% ក្នុងអំឡុងពីឆ្នាំ ២០២២-២០២៦។

របាយការណ៍របស់ Research And Markets បានព្យាករថា ទីផ្សារនេះនឹងសម្រេចបាន ១៦៩.៨ ពាន់លានដុល្លារក្នុងឆ្នាំ ២០២២។ Intermodals (ការដឹកជញ្ជូនពហុផ្នែក-ក្នុងនោះ ទំនិញត្រូវបានដឹកតាមមធ្យោបាយដឹកជញ្ជូនចាប់ពី ២ ប្រភេទឡើងទៅ) ត្រូវបានព្យាករថា នឹងមានកំណើនប្រចាំឆ្នាំ ៣.៧% និងសម្រេចបាន ៩៦ ពាន់លានដុល្លារនៅឆ្នាំ ២០២៦។

ចំណែកការដឹកទំនិញតាមរថយន្ត ត្រូវបានព្យាករថា នឹងមានកំណើន CAGR ៤.៥% ក្នុងរយៈពេល ៧ ឆ្នាំទៀត។ ផ្នែកនេះបច្ចុប្បន្នកាន់កាប់ ២៣% ក្នុងទីផ្សារដឹកជញ្ជូនតាមផ្លូវដែកទូទាំងពិភពលោក។

នៅក្នុងបណ្ដាតំបន់ដែលត្រូវបានស្រាវជ្រាវ ទីផ្សារអាម៉េរិក ត្រូវបានគណនាឃើញថានឹងសម្រេចបាន ៥៨ ពាន់លានដុល្លារក្នុងឆ្នាំ ២០២២ នេះ ខណៈដែល ប្រទេសចិន នឹងសម្រេចបាន ៣៥.៤ ពាន់លានដុល្លារនៅឆ្នាំ ២០២៦ ជាមួយនឹងកំណើន CAGR ៥.៥% ក្នុងដំណាក់កាលដែលបានវិភាគ។ បច្ចុប្បន្ន សហរដ្ឋអាម៉េរិក គ្រប់គ្រង ៣៤.៤% ក្នុងទីផ្សារដឹកជញ្ជូនតាមផ្លូវដែកទូទាំងពិភពលោក។

September 14, 2022

Tesla ដំឡើងប្រព័ន្ធបញ្ចូលថាមពលថ្ម V4 ដំបូង ដែលប្រើប្រាស់កម្ដៅព្រះអាទិត្យ

ស្ថានីយបញ្ចូលថាមពលអគ្គិសនី V4 ថ្មីនេះនឹងមានឧបករណ៍បញ្ចូលថាមពលចំនួន ៤០ ឈុត, ប្រព័ន្ធសូឡាមួយគ្រឿង និងប្រព័ន្ធថ្មផ្ទុកអគ្គិសនីខ្នាតយក្សមួយគ្រឿង។

Tesla ត្រូវបានគេជឿថា នឹងសាងសង់ស្ថានីយបញ្ចូលថាមពល Supercharger V4 ដំបូងរបស់ខ្លួននៅក្នុងស្រុក Yuma រដ្ឋ Arizona សហរដ្ឋអាម៉េរិក ស្ថិតនៅលើបណ្ដោយផ្លូវជាតិលេខ ។

យោងតាម Twitter @MarcoRPTesla ដែលហៅខ្លួនឯងថា Supercharger King ស្ថានីយថ្មីនេះនឹងមានឧបករណ៍សម្រាប់បញ្ចូលថាមពលចំនួន ៤០ ឈុត ដែលទាញយកអគ្គិសនីពីកម្ដៅព្រះអាទ្យិតាមរយៈផ្ទាំងសូឡា និងមានប្រព័ន្ធផ្ទុកថាមពលជាទម្រង់ Megapack ៣ MWh ដែលអាចបញ្ចូលថាមពលឱ្យរថយន្តអគ្គិសនីខ្នាតធំប្រហែល ៤០ គ្រឿង។

ល្បឿននៃការបញ្ចូលថាមពលក៏នឹងលឿនជាងមុន ដោយប្រើប្រាស់ប្រព័ន្ធបញ្ចូលថាមពលរហ័ស V4 ដែលឡើងដល់ ៣៥០ KW។ នេះបើតាមប្រកាសកាលពីឆ្នាំ ២០២១ របស់នាយកប្រតិបត្តិ Tesla លោក Elon Musk។

ប្រព័ន្ធបញ្ចូលថាមពល V2 បច្ចុប្បន្នរបស់ Tesla ផ្ដល់កម្លាំងអតិបរមា ១៥០ kW កើនបន្តិច ធៀបនឹង ១២០ kW របស់កំណែដំបូង។

មហាសេដ្ឋី Elon Musk បានប្រកាសជាច្រើនលើកហើយថា ការដែលស្ថានីយបញ្ចូលថាមពល អាចផលិត និងរក្សាទុកអគ្គិសនី គឺជាអាទិភាពកំពូលរបស់ Tesla ប៉ុន្តែ ការដាក់ពង្រាយស្ថានីយបែបនេះគឺនៅមានភាពយឺតយ៉ាវ។

Tesla ក៏នឹងដំឡើងប្រព័ន្ធបញ្ចូលថាមពលពិសេសសម្រាប់រថយន្តដឹកទំនិញ Semi អគ្គិសនីរបស់ខ្លួន។ ប្រព័ន្ធនេះនឹងមានខ្សែកាបដែលបញ្ចុះកម្ដៅដោយធាតុរាវ ដើម្បីអនុញ្ញាតឱ្យបញ្ចូលថាមពលបន្ថែមដល់ថ្មខ្នាតធំនៅលើរថយន្ត Tesla Semi ដោយប្រើពេលខ្លី៕

September 14, 2022

ផ្ទុះអាវុធនៅក្នុងមូលដ្ឋានទ័ពរបស់ ថៃ បណ្ដាលឱ្យមនុស្ស ៣ នាក់ស្លាប់ និងរងរបួស

ប៉ូលិសថៃ បានឱ្យដឹងថា ខ្មាន់កាំភ្លើងម្នាក់បានស្លាប់ និងមនុស្ស ២ នាក់ទៀតរងរបួស នៅក្នុងករណីផ្ទុះអាវុធនៅមូលដ្ឋានទ័ពក្នុង រាជធានីបាងកក នាថ្ងៃទី ១៤ កញ្ញានេះ។

អ្នកនាំពាក្យរងរបស់ប៉ូលិសថៃ លោក Kissana Phathanacharoen និយាយថា ជនសង្ស័យត្រូវបានចាប់ខ្លួន ក្រោយពីហេតុការណ៍ផ្ទុះអាវុធមួយបានកើតឡើងនៅសាលា Army War College នៃបញ្ជាការហ្វឹកហ្វឺនកងទ័ព ដែលជាផ្នែកមួយក្នុងបណ្ដុំអគារកងទ័ពនៅភាគខាងជើងនៃ រាជធានីបាងកក នេះបើតាម AFP។

«ករណីផ្ទុះអាវុធបានសម្លាប់មនុស្សម្នាក់ និង ២ នាក់ទៀតរងរបួស ប៉ូលិសក្នុងតំបន់បានគ្រប់គ្រងស្ថានការណ៍។ យើងបានចាប់ខ្លួនជងសង្ស័យម្នាក់» លោក Kissana Phathanacharoen ប្រាប់ AFP ដូច្នេះ។

Bangkok Post ឱ្យដឹងថា អ្នកនាំពាក្យម្នាក់និយាយថា មន្ត្រីទាហានម្នាក់ដែលមានជំងឺផ្លូវចិត្ត បានសម្លាប់មនុស្សម្នាក់ និងបង្ករបួសស្នាមដល់មនុស្សម្នាក់ទៀត ព្រមទាំងគំរាមសម្លាប់មនុស្ស ១០ នាក់។

ជនសង្ស័យឈ្មោះ Yongyut Mangkornkim ត្រូវបានចាប់ខ្លួន

យោងតាម Bangkok Post ជនសង្ស័យឈ្មោះ Yongyut Mangkornkim អាយុ ៥៩ ឆ្នាំ ត្រូវបានប៉ូលិសចាប់ខ្លួន។ ក៏ប៉ុន្តែ មូលហេតុនៃករណីផ្ទុះអាវុធនេះ មិនទាន់ត្រូវបានដឹងច្បាស់នៅឡើយ។

September 14, 2022

ការនាំចេញទំទិញរបស់ កម្ពុជា ទៅកាន់ទីផ្សារបរទេសសម្រេចបាន ១៥ ពាន់លានដុល្លារអាមេរិក

៨ ខែដើមឆ្នាំ ២០២២ ការនាំចេញទំនិញរបស់ កម្ពុជា ទៅកាន់ទីផ្សារអន្តរជាតិ សម្រេចបានជាង ១៥ ៦៥១ លានដុល្លារអាម៉េរិក កើនជាង ២៦% បើធៀបនឹង ៨ ខែដើមឆ្នាំ ២០២១។

យោងតាមរបាយការណ៍របស់ អគ្គនាយកដ្ឋានគយ និងរដ្ឋាករកម្ពុជា ក្នុងអំឡុង ៨ ខែដើមឆ្នាំ ២០២២ ការនាំចេញទំនិញរបស់ កម្ពុជា ទៅកាន់ទីផ្សារអន្តរជាតិ សម្រេចបានជាង ១៥ ៦៥១ លានដុល្លារអាម៉េរិក កើនជាង ២៦% គ្រាដែលការនាំចូលសម្រេចបានជាង ២១ ៧៦៤ លានដុល្លារ កើនជាង ១៨% ធៀបនឹង ៨ ខែដើមឆ្នាំ ២០២១។

ទីផ្សារដែល កម្ពុជា នាំចេញទំនិញសម្រេចបានលើសពី ១ ពាន់លានដុល្លារអាម៉េរិក គឺ សហរដ្ឋអាម៉េរិក និង វៀតណាម ក្នុងនោះ ការនាំចេញទៅ សហរដ្ឋអាម៉េរិក សម្រេចបាន ៦ ៤២១ លានដុល្លារ កើន ៣៧% និង វៀតណាម សម្រេចបានជាង ១ ៤៦៩ លានដុល្លារ កើនជិត ៤%។ ទីផ្សារដែល កម្ពុជា បាននាំចេញទំនិញមានតម្លៃលើសពី ៥០០ លានដុល្លារ រួមមាន ជប៉ុន (ជិត ៧៩០ លានដុល្លារ), អាល្លឺម៉ង់ (៧៤៧ លានដុល្លារ) និង អង់គ្លេស (៦២៧ លានដុល្លារ)។

ចំណែកទីផ្សារដែល កម្ពុជា នាំចូលទំនិញសម្រេចបានលើសពី ២ ពាន់លានដុល្លារ រួមមាន ប្រទេសចិន (៧ ១៩៣ លានដុល្លារ), ប្រទេសថៃ (២ ៦១៣ លានដុល្លារ), វៀតណាម (ជាង ២ ៧៧៤ លានដុល្លារ) និង ស្វ៊ីស (ជាង ១ ៣៣៩ ដុល្លារ)៕

September 14, 2022

តម្លៃមាសពិភពលោក ធ្លាក់ថ្លៃជាង ១% ក្រោយមានទិន្នន័យស្ដីពីអតិផរណារបស់ សហរដ្ឋអាម៉េរិក

តម្លៃមាសអាចនឹងត្រូវបានជួញដូរក្នុងរង្វង់ ១,៦៩០ ទៅ ១,៧០០ ដុល្លារ/អោន ក្នុងរយៈពេលខ្លី នៅពេលដែលប្រាក់ដុល្លារអាម៉េរិក អាចត្រូវបានជូញដូរក្នុងតម្លៃខ្ពស់ថ្មី ក្នុងគ្រា រតនាគារជាតិអាម៉េរិក (Fed) រឹតបន្តឹងហិរញ្ញវត្ថុនៅសប្ដាហ៍ក្រោយ។

តម្លៃមាសពិភពលោកបានធ្លាក់ចុះជាង ១% ក្នុងការជួញដូរកាលពីម្សិលមិញ ក្នុងគ្រាដែលប្រាក់ដុល្លារអាម៉េរិក ឡើងថ្លៃជាថ្មី បន្ទាប់ពីសន្ទស្សន៍ថ្លៃទំនិញប្រើប្រាស់ក្នុងខែសីហា ២០២២ របស់ សហរដ្ឋអាម៉េរិក កើនឡើងភ្លាមៗ ធ្វើឱ្យប្រាកដប្រជាចំពោះព័ត៌មានចចាមអារ៉ាមដែលថា ធនាគារកណ្ដាលអាម៉េរិក នឹងមានភាពសកម្មក្នុងការដំឡើងការប្រាក់។

នៅវេលាទៀបភ្លឺថ្ងៃទី ១៤ ខែកញ្ញា ឆ្នាំ ២០២២ (ពេលវេលានៅ កម្ពុជា) តម្លៃមាសប្រគល់ភ្លាមបានធ្លាក់ចុះ ១.២% មកនៅត្រឹម ១,៧០៣.៨០ ដុល្លារ/អោន។ តម្លៃមាសប្រគល់តាមកាលកំណត់ថយចុះ ១.៣% មកនៅត្រឹម ១,៧១៧.៤០ ដុល្លារ/អោន (១ អោន (ounce) = ៨.២៩៤២៦ ជី)។

មូលហេតុដែលនាំឱ្យមាសធ្លាក់ថ្លៃគឺមកពីសន្ទស្សន៍ថ្លៃទំនិញប្រើប្រាស់ (CPI) របស់ សហរដ្ឋអាម៉េរិក ខ្ពស់ជាងការគ្រោងទុក បណ្ដាលឱ្យដំណឹងចចាមអារ៉ាមស្ដីពីអត្រាការប្រាក់ ៧៥ ពិន្ទុ មានភាពប្រាកដប្រជាដែលថានឹងកើតឡើង។ ប្រាក់ដុល្លារអាម៉េរិក កំពុងឡើងថ្លៃ ក៏អាចបន្តដាក់សម្ពាធដល់តម្លៃមាសផងដែរ នេះបើតាម Tai Wong មកពីក្រុមហ៊ុនជួញដូរលោហធាតុមានតម្លៃ Heraeus Precious Metals នៅ សហរដ្ឋអាម៉េរិក។

លោក Tai Wong ព្យាករថា មាសអាចត្រូវបានជួញដូរក្នុងរង្វង់ពី ១,៦៩០ ទៅ ១,៧០០ ដុល្លារអាម៉េរិក/អោន ក្នុងរយៈពេលខ្លី គ្រាដែលប្រាក់ដុល្លារអាម៉េរិក អាចត្រូវបានជូញដូរក្នុងតម្លៃខ្ពស់ថ្មី នៅពេល រតនាគារជាតិអាម៉េរិក (Fed) នឹងរឹតបន្តឹងហិរញ្ញវត្ថុនៅសប្ដាហ៍ក្រោយ។

បើទោះជាត្រូវបានចាត់ទុកថាជារនាំងសម្រាប់ទប់ទល់នឹងអតិផរណា ប៉ុន្តែ ការប្រាក់ដែលកាន់តែកើនឡើងខ្ពស់ ធ្វើឱ្យការចំណាយលើឱកាសកាន់កាប់មាស កាន់តែកើនឡើងខ្ពស់ទៅតាមនោះ៕

September 14, 2022

ស្ថានភាពជំងឺកូវីដ-១៩ នៅ កម្ពុជា ប្រកាសនៅក្នុងថ្ងៃទី ១៤ ខែកញ្ញា ២០២២

កម្ពុជា រកឃើញអ្នកឆ្លងកូវីដ-១៩ ករណីថ្មី ចំនួន ០៤ នាក់ ក្នុងអំឡុង ២៤ ម៉ោង នៃថ្ងៃទី ១៣ ខែកញ្ញា ឆ្នាំ ២០២២។

ក្នុងអំឡុងពេលដដែល ក៏មានអ្នកជំងឺកូវីដ-១៩ ចំនួន ១២ នាក់បានជាសះស្បើយ និង មិនមានករណីស្លាប់ថ្មី ដោយសារជំងឺនេះនៅឡើយ។

September 14, 2022

Author: សឿន សំណាង