កម្ពុជា រកឃើញអ្នកឆ្លងកូវីដ-១៩ ករណីថ្មី ចំនួន ០៧ នាក់ ក្នុងអំឡុង ២៤ ម៉ោង នៃថ្ងៃទី ១៩ ខែកញ្ញា ឆ្នាំ ២០២២។
ក្នុងអំឡុងពេលដដែល ក៏មានអ្នកជំងឺកូវីដ-១៩ ចំនួន ០៨ នាក់បានជាសះស្បើយ និង មិនមានករណីស្លាប់ថ្មី ដោយសារជំងឺនេះនៅឡើយ។
Author: សឿន សំណាង
ឡាវ អភិវឌ្ឍគម្រោងផលិតអគ្គិសនីដើរដោយថាមពលខ្យល់តម្លៃជាង ២ ពាន់លានដុល្លារអាម៉េរិក
គម្រោងផលិតអគ្គិសនីថាមពលខ្យល់នៅក្នុងតំបន់ Lako ស្រុក Xepon ខេត្ត Savannakhet នេះ ត្រូវបានអនុវត្តដោយ រដ្ឋាភិបាលឡាវ និងក្រុមហ៊ុនថាមពលកកើតឡើងវិញ Savan Vayu សហការជាមួយក្រុមហ៊ុន LMT ឡាវ។
តំបន់ដែលត្រូវសិក្សាសម្រាប់គម្រោងខាងលើ មានផ្ទៃក្រឡា ២៨,៥១៣ ហិកតា ជាមួយនឹងកម្លាំងដំឡើង ១,២០០ មេហ្គាវ៉ាត់ និងចំណាយថវិកាប្រមាណ ២.១៦ ពាន់លានដុល្លារអាម៉េរិក។ គ្រោងនេះគ្រោងនឹងស្ថាបនារួចរាល់ និងចាប់ផ្ដើមដំណើរការនៅចុងឆ្នាំ ២០២៥ ដើម្បីផ្គត់ផ្គង់អគ្គិសនីក្នុងស្រុក ក៏ដូចជាការនាំចេញទៅប្រទេសជិតខាង។
ក្រុមអ្នកអភិវឌ្ឍគម្រោង បានចាប់ផ្ដើមសិក្សាបឋមអំពីគម្រោងអគ្គិសនីដើរដោយកម្លាំងខ្យល់នេះចាប់ពីពាក់កណ្ដាលឆ្នាំ ២០២១ និងបានរកឃើញថា គម្រោងនេះពិតជាមានសក្ដានុពល។ ដូច្នេះ ពួកគេក៏បានដាក់សំណើទៅកាន់ រដ្ឋាភិបាលឡាវ។ ក្រោយការពិនិត្យ ពិភាក្សា និងពិចារណា រដ្ឋាភិបាលឡាវ ក៏បានយល់ព្រម និងអនុម័តលើសំណើសិក្សាលទ្ធភាពអភិវឌ្ឍគម្រោងអគ្គិសនីដើរដោយកម្លាំងខ្យល់ធំបំផុតនៅ ប្រទេសនេះ។
កាលពីថ្ងៃទី ០៩ កញ្ញាកន្លងទៅ អនុរដ្ឋមន្ត្រីក្រសួងផែនការ និងវិនិយោគឡាវ Sthabandith Insisienmay និងនាយកប្រតិបត្តិរបស់ក្រុមហ៊ុនថាមពលកកើតឡើងវិញ Savan Vayu លោក Sengsack Xayyarath បានចុះហត្ថលេខាលើអនុស្សារណៈនៃការយោគយល់ស្ដីពីការសិក្សាលទ្ធភាព (FS) នៃការអភិវឌ្ឍគម្រោងអគ្គិសនីដើរដោយកម្លាំងខ្យល់ខាងលើ ក្រោមអធិបតីភាពរបស់ អនុរដ្ឋមន្ត្រីក្រសួងថាមពល និងរ៉ែឡាវ Sinava Souphanouvong, តំណាងក្រុមហ៊ុន LMT ឡាវ រួមនឹងដៃគូសហការដែលពាក់ព័ន្ធផ្សេងទៀត៕
ប្រជាជនម៉ិកស៊ិក ភ័យស្លន់ស្លោ ពេលរញ្ជួយធរណីកើតឡើងចំថ្ងៃរម្លឹកខួបគ្រោះមហន្តរាយរញ្ជួយដីពីរលើក
រញ្ជួយដីកម្លាំង ៧.៤ រិចទ័រ នៅភាគខាងលិចនៃប្រទេសម៉ិកស៊ិក បណ្ដាលឱ្យប្រជាជនភ័យស្លន់ស្លោ នៅពេលវាកើតឡើងចំថ្ងៃរម្លឹកខួបនៃគ្រោះមហន្តរាយរញ្ជួយដី ២ លើក ដែលបានកើតឡើងកាលពីឆ្នាំ ១៩៨៥ និង ២០១៧។
ស្ថាប័នគ្រប់គ្រងគ្រោះរញ្ជួយធរណីរបស់ ម៉ិកស៊ិក បានឱ្យដឹងថា គ្រោះរញ្ជួយដីថ្មីនេះកើតឡើងនៅថ្ងៃទី ១៩ កញ្ញា ដោយចំណុចកណ្ដាលស្ថិតនៅក្បែរឆ្នេរមហាសមុទ្រប៉ាស៊ីហ្វ៊ិក ជម្រៅ ១៥ គីឡូម៉ែត្រ និងមានចម្ងាយពីរ រដ្ឋធានីម៉ិកស៊ីកូ ប្រហែល ៤០០ គីឡូម៉ែត្រ ទៅទិសខាងលិច។
ការប្រកាសអាសន្នអំពីគ្រោះរញ្ជួយដីនៅ ម៉ិកស៊ីកូ បានបន្លឺឡើង មួយម៉ោងក្រោយពីរដ្ឋធានីនេះបានធ្វើការហ្វឹកហ្វឺនបន្ទាន់ ដែលជាផ្នែកមួយដើម្បីរម្លឹកដល់ខួបគ្រោះមហន្តរាយកាលពីឆ្នាំ ១៩៨៥ និង ២០១៧។
ប្រធានាធិបតី Andres Manuel Lopez Obrador បានបង្ហោះសារលើ Twitter ថា មនុស្សម្នាក់បានស្លាប់ដោយសារវត្ថុបែកបាក់បានធ្លាក់ទៅលើមជ្ឈមណ្ឌលពាណិជ្ជកម្មមួយនៅ Manzanillo ភាគខាងលិចរបស់រដ្ឋ Colima។
«នោះគឺជាហេតុការណ៍ចៃដន្យដ៏គួរឱ្យភ័យខ្លាច! ហេតុអ្វីបែរជាកើតឡើងចំថ្ងៃនេះ?» លោកយាយ Laura Resendiz វ័យ ៧៣ ឆ្នាំ បានថ្លែងដូច្នេះ នៅខាងក្រៅអគារដែលគាត់រស់នៅ ក្នុង រដ្ឋធានីម៉ិកស៊ីកូ។
នេះគឺជាគ្រោះរញ្ជួយដីធំទី ៣ ដែលកើតឡើងនៅ ប្រទេសម៉ិកស៊ិក ក្នុងថ្ងៃទី ១៩ កញ្ញា។ អាជ្ញាធរគ្រប់គ្រងគ្រោះរញ្ជួយដីរបស់ប្រទេសនេះបានឱ្យដឹងថា នេះគឺជាហេតុការណ៍ចៃដន្យធម្មតា។ «ពុំមានមូលហេតុបែបវិទ្យាសាស្ត្រណាមួយដើម្បីបកស្រាយឡើយ»។
ក៏ប៉ុន្តែ នៅក្នុងមជ្ឈដ្ឋានប្រជាពលរដ្ឋសាមញ្ញ ហេតុការណ៍នេះបានធ្វើឱ្យពួកគេដាក់សំណួរជាច្រើនទាក់ទងនឹងអប្បិយជំនឿផ្សេង៕
ស្ថានទូតរុស្ស៊ី ប្រចាំនៅ ប្រទេសកាណាដា ត្រូវគេគប់គ្រាប់បែកសាំង
បុរសម្នាក់បានគប់គ្រាប់បែកសាំងចូលទៅក្នុងស្ថានទូតរុស្ស៊ី នៅ រដ្ឋធានីអូតាវ៉ា ប៉ុន្តែមិនបានបណ្ដាលឱ្យមានការខូចខាតដល់អាយុជីវិតមនុស្ស ឬទ្រព្យសម្បត្តិ។
«ម៉ោងប្រហែល ០ និង ១៦ នាទី ថ្ងៃទី ១២ កញ្ញា មនុស្សម្នាក់មិនទាន់ស្គាល់អត្តសញ្ញាណ បានគប់គ្រាប់បែកសាំងពីខាងក្រៅរបង ចូលទៅក្នុងបរិវេណស្ថានទូត។ បុរសនេះរត់ពីសួនដែលនៅក្បែរស្ថានទូត គប់គ្រាប់បែកសាំង ហើយក៏បាត់ស្រមោល» អគ្គរដ្ឋទូតរុស្ស៊ី ប្រចាំ ប្រទេសកាណាដា Oleg Stepanov ប្រកាសកាលពីថ្ងៃទី ១៩ កញ្ញា។
«ដបកែវបានបែក ប៉ុន្តែធាតុផ្សំមិនឆាបឆេះ…។ ពុំមានបុគ្គលិកណាម្នាក់របស់ស្ថានទូតត្រូវរងរបួស ទ្រព្យសម្បត្តិរបស់ស្ថានទូតក៏មិនបានរងការខូចខាត» លោក Stepanov បញ្ជាក់ និងបង្ហើបឱ្យដឹងថា ស្ថានទូតរុស្ស៊ី នៅ អូតាវ៉ា បានផ្ញើកំណត់ការទូតទៅកាន់ ក្រសួងការបរទេសកាណដា រួចហើយ។
ប៉ូលិសសេះកាណាដា បានប្រកាសថា បានបើកការស្រាវជ្រាវលើករណីខាងលើ ដើម្បីប្រមូលព័ត៌មានបន្ថែម ខណៈដែលប៉ូលិសនៅ អូតាវ៉ា មុននោះនិយាយថា មិនបានដឹងអំពីករណីគប់គ្រាប់បែកសាំងនេះ។
ស្ថានទូតរុស្ស៊ី នៅ កាណាដា បានហៅករណីគប់គ្រាប់បែកសាំងនេះថាជា «អំពើភារវកម្ម»។ ក្រសួងការបរទេសរុស្ស៊ី កាលពីថ្ងៃទី ១៩ កញ្ញា ក៏បានកោះហៅ ឯកអគ្គរដ្ឋទូតកាណាដា ប្រចាំប្រទេសនេះ ដើម្បីធ្វើការតវ៉ាចំពោះករណី «ប៉ូលិសនៅ អូតាវ៉ា ធ្វើព្រងើយនៅចំពោះមុខក្រុមបាតុករដែលមានកំហឹង» រារាំងមនុស្សមិនឱ្យមកស្ថានទូតរុស្ស៊ី។
ចំណែក ប៉ូលិសកាណាដា វិញ បានអះអាងថា សមត្ថកិច្ចប្រទេសនេះ តែងតែយកចិត្តទុកដាក់ការពារស្ថានទូតរុស្ស៊ី ឱ្យបានសមស្រប៕
ព្រះសពអតីតមហាក្សត្រី Elizabeth ទី ២ បានដង្ហែដល់ទីស្ងប់សុខចុងក្រោយ និងបានបញ្ចុះរួចរាល់
ព្រះសពអតីតមហាក្សត្រី Elizabeth ទី ២ ត្រូវបានដង្ហែទៅដល់វិមាន Windsor ជាទីដែលទ្រង់នឹងត្រូវបានបញ្ចុះនៅក្បែរស្វាមីរបស់ទ្រង់ គឺព្រះអង្គម្ចាស់ Philip។
ព្រះទីន័ងដឹកព្រះសពអតីតមហាក្សត្រី Elizabeth ទី ២ បានទៅដល់វិមាន Windsor កាលពីរសៀលថ្ងៃទី ១៩ កញ្ញា ក្រោយពីធ្វើដំណើរជាង ៣០ គីឡូម៉ែត្រ ពីខ្លោងទ្វារ Wellington នៅរាជធានីឡុងដ៍របស់ អង់គ្លេស។ ប្រជាជនឈរនៅតាមដងផ្លូវដែលក្បួនដង្ហែព្រះសពអតីតមហាក្សត្រី Elizabeth ទី ២ ឆ្លងកាត់។ មនុស្សមួយចំនួននាំគ្នាបាចផ្កា និងអ្នកខ្លះហ៊ោដើម្បីយាងដំណើរអតីតមហាក្សត្រី។
ពិធីបញ្ចុំព្រះសពអតីតមហាក្សត្រី Elizabeth ទី ២ ដែលមានភ្ញៀវចូលរួមប្រមាណ ៨០០ នាក់ ត្រូវបានធ្វើឡើងនៅវិហារ St George ក្នុងសួនរបស់វិមាន Windsor មុនពេលព្រះសពត្រូវបានបញ្ចុះ។ ក្រុមមេដឹកនាំសាសនាអានធម៌អធិដ្ឋាន មុនពេលមកុដ ដំបងរាជ និងគ្រាប់បាល់រាជាធិបតេយ្យ ដែលជាវត្ថុតំណាងឱ្យរបបរាជានិយម ត្រូវបានលើកឡើងពីព្រះសព និងដាក់នៅលើអាសនៈ។
បន្ទាប់មក ចៅហ្វាវាំង មន្ត្រីជាន់ខ្ពស់បំផុតដែលបម្រើរាជវង្ស ធ្វើពិធីកាច់បំបាក់ដំបងរាជជា ២ កំណាត់ ហើយដាក់ទៅលើព្រះសព ដើម្បីបង្ហាញអំពីការបញ្ចប់ដំណាក់កាលបម្រើប្រទេសជាតិ និងបញ្ចប់រជ្ជកាលរបស់ អតីតមហាក្សត្រី Elizabeth ទី ២។
ក្រោយមក ព្រះសពអតីតមហាក្សត្រី Elizabeth ទី ២ ត្រូវបានដាក់បញ្ចុះទៅក្នុងផ្នូរសម្រាប់ព្រះសពរបស់រាជវង្ស។
ពិធីត្រូវបានបញ្ចប់នៅពេលប្រធានគណៈអាចារ្យ Canterbury Justin Welby ដែលជាមេដឹកនាំវិហារគ្រិស្តសាសនាអង់គ្លេស អានធម៌បួងសួង និងក្រុមស្មូត ស្មូតបទ «សូមព្រះប្រទានពរដល់ព្រះមហាក្សត្រី»៕
រដ្ឋាភិបាលឡាវ អនុម័តលើការសិក្សាអំពីសក្ដានុពលនៃគម្រោងផ្លូវដែកឡាវ-វៀតណាម
រដ្ឋាភិបាលឡាវ ទើបតែបានសម្រេចអនុញ្ញាតឱ្យក្រុមហ៊ុនចិន Jiangsu Hengtong Construction Engineering Co., Ltd អនុវត្តគម្រោងសិក្សាអំពីលទ្ធភាពនៃការស្ថាបនាផ្លូវដែកប្រវែង ២២០ គីឡូម៉ែត្រ ពីខេត្ត Savannakhet របស់ ឡាវ ទៅកាន់ព្រំដែនជាប់នឹងតំបន់ Lao Bao នៃខេត្ត Quang Tri របស់ វៀតណាម។
លោក Sonesack Nhansana អគ្គនាយករងនៃអគ្គនាយកដ្ឋានផ្លូវដែកឡាវ បានឱ្យដឹងថា បើសិនជាគម្រោងស្ថាបនាត្រូវបានអនុម័ត ផ្លូវដែកនេះនឹងត្រូវចំណាយប្រាក់ប្រហែល ៥ ពាន់លានដុល្លារអាម៉េរិក។
ចំណែកការសិក្សាអំពីគម្រោងផ្លូវដែកនេះវិញ នឹងត្រូវចំណាយពេល ២ ឆ្នាំ ហើយការស្ថាបនានឹងស៊ីពេលអស់ប្រហែល ៣ ឆ្នាំ។
ក្រុមហ៊ុនចិនខាងលើក៏បានស្នើសុំ រដ្ឋាភិបាលឡាវ ធ្វើសម្បទានដីសម្រាប់ការសាងសង់ស្ថានីយរថភ្លើងធំៗចំនួន ៤ កន្លែង និងស្ថានីយតូចៗ ៧ កន្លែង នៅតាមបណ្ដោយផ្លូវដែក លើផ្ទៃដីសរុប ៤,១០០ ហិកតា។
អង់គ្លេស ជិតប្រារព្ធពិធីបញ្ចុះព្រះសពអតីតមហាក្សត្រី Elizabeth ទី ២ (វីដេអូ)
ពិធីបញ្ចុះព្រះសពអតីតមហាក្សត្រី Elizabeth ទី២ គ្រោងនឹងចាប់ផ្ដើមនៅវេលាម៉ោង ១១ ព្រឹក (ម៉ោង ១៧ នៅ កម្ពុជា) ថ្ងៃនេះ នៅក្នុងវិហារ Westminster នាទីក្រុងឡុងដ៍ ដោយមានភ្ញៀវចូលរួមប្រមាណ ២,០០០ នាក់ បន្ទាប់ពីព្រះសពត្រូវបានដង្ហែពីមហាសាល Westminster។
សំឡេងជួងដំបូងបានចាប់ផ្ដើមបន្លឺឡើងដើម្បីរម្លឹកដល់ព្រះវិញ្ញាណក្ខន្ធរបស់អតីតមហាក្សត្រី នៅខាងក្រៅវិហារ Westminster។ សំឡេងជួងនឹងបន្លឺឡើងមួយនាទីម្ដង ចំនួន ៩៦ ដង ដែលតំណាងឱ្យព្រះជន្មរបស់មហាក្សត្រីអង់គ្លេស។
ប្រធានធិបតីអាម៉េរិក និងភរិយា ស្ថិតក្នុងចំណោមភ្ញៀវបរទេសជិត ៥០០ នាក់ ក្នុងនោះមានមេដឹកនាំយ៉ាងតិច ៧០ នាក់ មានដូច ប្រធានាធិបតីបារាំង, ប្រធានាធិបតីប្រេស៊ីល, ប្រធានាធិបតីអាល្លឺម៉ង់, នាយករដ្ឋមន្ត្រីនូវែលសេឡង់, នាយករដ្ឋមន្ត្រីអូស្ត្រាលី និង នាយករដ្ឋមន្ត្រីកាណាដា ជាដើម។ល។ ដែលនឹងចូលរួមពិធីបញ្ចុះព្រះសពអតីតមហាក្សត្រី Elizabeth ទី ២។
ព្រះមហាក្សត្រជប៉ុន និងមហាសី ក៏គ្រោងនឹងបង្ហាញព្រះវត្តមាននៅក្នុងព្រះរាជពិធីខាងលើ រួមជាមួយនឹងមហាក្សត្រ មហាក្សត្រី មហេសី រាជទាយាទ ព្រះអង្គម្ចាស់ អ្នកអង្គម្ចាស់ ប្រហែលជាង ២០ អង្គ ដែលយាងមកពីប្រទេសមួយចំនួនមានដូចជា អេស្ប៉ាញ, ហូឡង់, បែហ្ស៊ិក, ន័រវែស, ដាណឺម៉ាក និងស៊ុយអែត។ល។
https://www.youtube.com/watch?v=OuENY9sKTxQ
រញ្ជួយដីនៅ តៃវ៉ាន់ ៖ ពិតាននៃអគារមជ្ឈមណ្ឌលកីឡានៅ តៃវ៉ាន់ ត្រូវធ្លាក់បាក់បែកគួរឱ្យភ័យរន្ធត់
សាលលេងកីឡាវាយសីនៅភាគខាងជើងរបស់ កោះតៃវ៉ាន់ ត្រូវញាប់ញ័រ និងធ្លាក់បាក់បែកគួរភ័យខ្លាច នៅក្នុងហេតុការណ៍រញ្ជួយដីកម្លាំង ៦.៨ រិចទ័រ កាលពីម្សិលមិញ។
យោងតាមនាយកដ្ឋានឧតុនិយមតៃវ៉ាន់ (CWB) នៅវេលាម៉ោងជិត ១៤ ថ្ងៃទី ១៨ កញ្ញា កោះនេះបានរងគ្រោះដោយសាររញ្ជួយដីកម្លាំង ៦.៨ រិចទ័រ នៅក្នុងជម្រៅ ៧ គីឡូម៉ែត្រ។ នាយកដ្ឋានបង្ការ និងពន្លត់អគ្គិភ័យរបស់ តៃវ៉ាន់ នៅវេលាម៉ោងប្រហែល ១៤ និង ៥៤ នាទី បានទទួលព័ត៌មានស្ដីពីពិតានរបស់សាលលេងកីឡានៅជាន់ទី ៥ នៃអគារមជ្ឈមណ្ឌលកីឡាមួយក្នុងស្រុក Bade របស់ទីក្រុង Taoyuan ត្រូវបាក់ធ្លាក់ទាំងស្រុងនៅក្នុងគ្រោះរញ្ជួយដី។ ហេតុការណ៍នេះបានធ្វើឱ្យមនុស្សមួយចំនួនរងរបួស។
សារព័ត៌មានតៃវ៉ាន់ ថ្ងៃនេះបានឱ្យដឹងថា គ្រោះរញ្ជួយដីខាងលើបានសម្លាប់មនុស្សម្នាក់ និង ១៤៦ នាក់រងរបួស គ្រាដែលជិត ៥០០ នាក់កំពុងជាប់នៅក្នុងតំបន់ភ្នំភាគខាងកើតកោះនេះ។
XPeng បង្ហាញកម្មវិធីសម្រាប់រថយន្តបើកបរស្វ័យប្រវត្ត City NGP ដូច Tesla FSD
មុខងារជួយដល់ការបើកបរកម្រិតខ្ពស់របស់ XPeng Motors ចុងក្រោយក៏ត្រូវបានបំពាក់នៅលើរថយន្តអគ្គិសនីមួយចំនួននៅ ប្រទេសចិន។
ក្រុមហ៊ុន XPeng ថ្ងៃនេះបានប្រកាសថា មុខងារបើកបរស្វ័យប្រវត្តក្នុងទីក្រុង (City NGP) របស់ខ្លួន ត្រូវបានដំណើរការក្នុងទ្រង់ទ្រាយសាកល្បងនៅក្នុងទីក្រុង Guangzhou ជាទីដែល XPeng ដាក់ទីស្នាក់ការកណ្ដាល។ ប្រការនេះបានជួយឱ្យ XPeng ក្លាយជាក្រុមហ៊ុនផលិតរថយន្តរបស់ ចិន ដំបូងដែលបង្ហាញប្រព័ន្ធជំនួយការបើកបរកម្រិតខ្ពស់ (ADAS)។
XPeng ឱ្យដឹងថា ម្ចាស់រថយន្តអគ្គិសនី XPeng P5 មួយចំនួននៅ Guangzhou បច្ចុប្បន្នអាចប្រើប្រាស់មុខងារ City NGP តាមរយៈកំណែបច្ចុប្បន្នភាព OTA។
លោក He Xiaopeng ដែលជាប្រធាន និងជានាយកប្រតិបត្តិរបស់ក្រុមហ៊ុនផលិតរថយន្តចិន XPeng បាននិយាយថា «យើងជឿថា បទពិសោធន៍នៃការប្រើប្រាស់ដែលត្រូវបានលើកកម្ពស់របស់ City NGP នឹងជំរុញដំណើរការប្ដូរផ្លាស់ទម្លាប់បើកបរទៅរកយុគសម័យស្វ័យប្រវត្ត និងការបើកបរស្វ័យប្រវត្តិក្នុងពេលអនាគត»។
City NGP គឺជាមុខងារ ADAS ដូចទៅនឹងមុខងារបើកបរស្វ័យប្រវត្តទាំងស្រុង (Full Self-Driving – FSD) របស់ Tesla ដែលអនុញ្ញាតឱ្យរថយន្តអនុវត្តគ្រប់តួនាទីរបស់អ្នកបើកបរនៅពេលវាត្រូវបានបើកដំណើរការ និងទីតាំងជាគោលដៅដែលត្រូវបានម្ចាស់រថយន្តកំណត់៕
ក្រុមហ៊ុន Gogoro ផ្គត់ផ្គង់បណ្ដាញស្ថានីយប្ដូរថ្មផ្ទុកថាមពលសម្រាប់ម៉ូតូអគ្គិសនីនៅ សិង្ហបុរី
ប្រទេសសិង្ហបុរី គឺជាប្រទេសទីពីរហើយដែលសហការជាមួយនឹងក្រុមហ៊ុនផលិតថ្មផ្ទុកថាមពលអគ្គិសនី Gogoro របស់ តៃវ៉ាន់។
កាលពីថ្ងៃទី ០២ កញ្ញា ២០២២ ក្រុមហ៊ុន Gogoro បានប្រកាសថា ពួកគេនឹងដំឡើងស្ថានីយប្ដូរថ្មផ្ទុកថាមពលរបស់ខ្លួននៅ សិង្ហបុរី។ ចំណែកនាយកដ្ឋានចរាចរណ៍ផ្លូវគោករបស់ សិង្ហបុរី ក៏ទើបតែបានផ្ដល់វិញ្ញាបនបត្រដើម្បីអនុញ្ញាតឱ្យ Gogoro ដំឡើងហេដ្ឋារចនាសម្ព័ន្ធសម្រាប់ផ្ដល់សេវាប្ដូរថ្មយានយន្តនៅ សិង្ហបុរី។
Gogoro ប្រកាសថា កំពុងសហការជាមួយក្រុមហ៊ុន Jardine Cycle & Carriage ក្នុងតំបន់ ដើម្បីធ្វើកិច្ចការខាងលើនេះ។ Jardine Cycle & Carriage គឺជាក្រុមហ៊ុនលំដាប់កំពូលដែលវិនិយោគរយៈពេលយូរទៅលើបណ្ដាអាជីវកម្មនានាដែលនាំមុខគេនៅពាសពេញអាស៊ីអាគ្នេយ៍។ បច្ចុប្បន្ន Jardine Cycle & Carriage មានវត្តមាននៅក្នុងប្រទេសសិង្ហបុរី មីយ៉ានម៉ា ថៃ ម៉ាឡេស៊ី វៀតណាម និង ឥណ្ឌូណេស៊ី។
បច្ចុប្បន្ន Jardine Cycle & Carriage ក៏ជាអ្នកចែកចាយផ្ដាច់មុខម៉ូតូអគ្គិសនី Gogoro នៅក្នុងទីផ្សារមួយចំនួនផងដែរ។ ពួកគេនឹងដំឡើង ដំណើរការ និងគ្រប់គ្រងស្ថានីយប្ដូរថ្ម Gogoro ដើម្បីផ្ដល់ថាមពលសម្រាប់ម៉ូតូលេខស្វ័យប្រវត្តអគ្គិសនីដែលពួកគេលក់។
អាជីវកម្មខាងលើទាក់ទងនឹងផែនការបៃតងរបស់ សិង្ហបុរី សម្រាប់ឆ្នាំ ២០៣០ (Singapore Green Plan 2030 – SGP 2030) ក្នុងនោះក៏មានការកំណត់គោលដៅច្បាស់លាស់មួយចំនួនសម្រាប់កម្មវិធីនានាដែលត្រូវដោះស្រាយ ក្នុងបំណងបង្កើនស្ថិរភាពរបស់បរិស្ថាន និងការបន្សានកាបូន។
SGP 2030 ក៏បានប្រកាសថា សិង្ហបុរី កំពុងកំណត់គោលដៅដាក់ឱ្យដំណើរការស្ថានីយបញ្ចូលថាមពលអគ្គិសនីចំនួន ៦០,០០០ កន្លែង នៅឆ្នាំ ២០៣០ ដោយចែកជា ៤០,០០០ ទីតាំងនៅក្នុងចំណតរថយន្តសាធារណៈ និង ២០,០០០ ទីតាំងនៅក្នុងគម្រោងនានារបស់វិស័យឯកជន៕