សឿន សំណាង - La Reine Media

បស្ចិមលោកថ្កោលទោសចំពោះផែនការធ្វើប្រជាមតិបញ្ចូលទឹកដីរបស់ អ៊ុយក្រែន ទៅក្នុង សហព័ន្ធរុស្ស៊ី

សហរដ្ឋអាម៉េរិក រួមនឹងបណ្ដាប្រទេសលោកខាងលិច ជំទាស់ទៅនឹងផែនការច្របាច់ទឹកដី ៤ តំបន់របស់ អ៊ុយក្រែន ទៅក្នុងទឹកដីរបស់ រុស្ស៊ី តាមរយៈការធ្វើប្រជាមតិ និងប្រកាសថា លោកខាងលិចមិនទទួលស្គាល់លទ្ធផលជាដាច់ខាត។

«ការធ្វើប្រជាមតិក្លែក្លាយគឺជាភាពអាម៉ាស់ចំពោះគោលការណ៍អធិបតេយ្យ និងបូរណភាពទឹកដី ដែលជាគ្រឹះរបស់ប្រព័ន្ធអន្តរជាតិ» ទីប្រឹក្សាសន្តិសុខជាតិអាម៉េរិក Jake Sullivan កាលពីថ្ងៃទី ២០ កញ្ញា បានថ្លែងដូច្នេះ។

ការថ្លែងរបស់ មន្ត្រីអាម៉េរិក នេះ ត្រូវបានធ្វើឡើងបន្ទាប់ពីក្រុមមន្ត្រីនៅតំបន់ Donetsk, Lugansk ក្នុងភាគខាងកើតអ៊ុយក្រែន និង Kherson, Zaporizhzhia នៅភាគខាងត្បូងអ៊ុយក្រែន បានប្រកាសថានឹងធ្វើប្រជាមតិស្ដីពីការច្របាច់បញ្ចូលទាំងដីទាំងនេះទៅក្នុងប្រទេសរុស្ស៊ី នៅថ្ងៃទី ២៣ និង ២៧ កញ្ញាខាងមុខ។

លោក Sullivan បញ្ជាក់ថា «បើសិនជារឿងនេះកើតឡើង សហរដ្ឋអាម៉េរិក នឹងមិនទទួលស្គាល់សំណើរបស់ រុស្ស៊ី ចំពោះរាល់ទឹកដីដែលបានរឹបអូសពី អ៊ុយក្រែន»។

អគ្គលេខាធិការរបស់ ណាតូ (NATO) Jens Stoltenberg ក៏បានថ្កោលទោសចំពោះផែនការខាងលើ ហើយថា ឥរិយាបថនេះនឹងធ្វើឱ្យជម្លោះកាន់តែមានសភាពធ្ងន់ធ្ងរ។

នាយករដ្ឋមន្ត្រីអាល្លឺម៉ង់ Olaf Scholz បានហៅប្រជាមតិរបស់តំបន់ទាំងនោះថា «ក្លាំងក្លាយ» និងថា ត្រូវតែមានការជំទាស់។

ចំណែក ប្រធានាធិបតីប៉ូឡូញ Andrzej Duda វិញ បានប្រកាសថា ប្រជាមតិនឹងក្លាយជារឿងគ្មានតម្លៃ។ លោកថា ប្រទេសប៉ូឡូញ នឹងមិនទទួលស្គាល់ជាដាច់ខាត។

មុននោះ ទីក្រុងកៀវ បាននិយាយថា ផែនការធ្វើប្រជាមតិរបស់ រុស្ស៊ី នឹងមិនធ្វើឱ្យមានការប្រែប្រួលអ្វីឡើយ។ «អ៊ុយក្រែន នៅតែចាត់ទុក រុស្ស៊ី ថាជាប្រទេសរំលោភបំពានបូរណភាពទឹកដីដោយខុសច្បាប់ ទន្ទឹមនឹងនេះ ទីក្រុងកៀវ មានសិទ្ធិរំដោះទឹកដី និងបន្តធ្វើកិច្ចការនេះ» រដ្ឋមន្ត្រីក្រសួងការបរទេសអ៊ុយក្រែន លោក Dmytro Kuleba បញ្ជាក់ដូច្នេះ។

រីឯភាគីរុស្ស៊ី វិញ ប្រធានសភាជាន់ទាប Vyacheslav Volodin បានប្រកាសគាំទ្រចំពោះតំបន់ទាំងឡាយដែលច្របាច់ខ្លួនបញ្ចូលទៅក្នុងទឹកដីរបស់ រុស្ស៊ី។ រដ្ឋមន្ត្រីការបរទេសរុស្ស៊ី Sergei Lavrov បាននិយាយថា នេះគឺជាបញ្ហាដែលអាស្រ័យទៅលើបំណងរបស់ប្រជាជននៅ អ៊ុយក្រែន៕

September 21, 2022

នារីជនជាតិឥណ្ឌាម្នាក់បានស្លាប់ ក្រោយពីត្រូវក្រុមជនដៃដល់រំលោភ និងដុតទាំងរស់

នារីពលរដ្ឋឥណ្ឌាម្នាក់អាយុ ១៦ ឆ្នាំ បានស្លាប់នៅក្នុងមន្ទីរពេទ្យ ក្រោយពីត្រូវបុរស ២ នាក់ចាប់រំលោភ និងដុតទាំងរស់នៅក្នុងរដ្ឋ Uttar Pradesh។

នារីវ័យ ១៦ ឆ្នាំខាងលើស្ថិតក្នុងវណ្ណៈ Dalit ដែលជាស្រទាប់វណ្ណៈតូចទាបបំផុតក្នុងសង្គមរបស់ ជនជាតិហិណ្ឌូ បានស្លាប់នៅក្នុងមន្ទីរពេទ្យកាលពីថ្ងៃទី ២០ កញ្ញា ដោយសារតែរបួសធ្ងន់ធ្ងរ បន្ទាប់ពីបានព្យាបាលច្រើនថ្ងៃ។ នារីរងគ្រោះត្រូវបានបុរស ២ នាក់ចាប់រំលោភផ្លូវភេទ និងដុតទាំងរស់កាលពីដើមខែនេះ។

«យើងបានចាប់ខ្លួនក្រុមជនសង្ស័យក្នុងរយៈពេល ២ ម៉ោងបន្ទាប់ពីទទួលបានរបាយការណ៍ និងធានាថានឹងមានវិធានការច្បាប់សមស្រប» មេប៉ូលិស Dinesh Kumar Prabhu ប្រាប់ដូច្នេះ និងបន្ថែមថា កម្លាំងសន្តិសុខត្រូវបានដាក់ពង្រាយនៅជុំវិញផ្ទះរបស់នារីរងគ្រោះ ដើម្បីធានាថាមិនមានបញ្ហាផ្សេងទៀតកើតឡើង។ គ្រួសាររបស់ជនរងគ្រោះតែងតែត្រូវគេគំរាម ឬវាយប្រហារនៅក្នុងករណីដូចគ្នានេះនាពេលកន្លង។

នារីវ័យ ១៦ ឆ្នាំខាងលើបានបាត់បង់ជីវិតមិនដល់ ១ សប្ដាហ៍បន្ទាប់ពីករណីនារីជាបងប្អូន Dalit ២ នាក់ អាយុ ១៥ ឆ្នាំ និង ១៧ ឆ្នាំ ត្រូវបានប្រទះឃើញចងកព្យួរលើដើមឈើនៅក្នុងរដ្ឋ Uttar Pradesh។ បុរស ៦ នាក់ ត្រូវបានចោទប្រកាន់ថា បានរំលោភផ្លូវភេទ និងសម្លាប់នារីទាំងពីរនាក់នេះ។

Uttar Pradesh ដែលជារដ្ឋក្រីក្ររបស់ ឥណ្ឌា មានប្រជាជន ២៣០ លាននាក់ គឺជាកន្លែងដែលកើតមានករណីរំលោភសម្លាប់ជាញឹកញាប់។

ក្នុងឆ្នាំ ២០២១ នៅ ប្រទេសឥណ្ឌា មានករណីរំលោភចំនួន ៣២,០០០ លើកត្រូវបានរាយការណ៍ នេះបើតាមទិន្នន័យរបស់រដ្ឋាភិបាល។ ប៉ុន្តែ តួលេខពិតប្រាកដអាចខ្ពស់ជាងនេះឆ្ងាយ ព្រោះមានករណីខ្លះ ក្រុមគ្រួសារជនរងគ្រោះមិនបានរាយការណ៍ប្រាប់សមត្ថកិច្ច៕

September 21, 2022

ប្រទេសថៃ លុបកូវីដ-១៩ ចេញពីបញ្ជីឈ្មោះជំងឺដែលត្រូវហាមចូលប្រទេស

អ្នកនាំពាក្យរងរបស់ រដ្ឋាភិបាលថៃ បានលើកឡើងថា កូវីដ-១៩ នឹងលែងស្ថិតនៅក្នុងបញ្ជីឈ្មោះស្ដីពីជំងឺដែលត្រូវហាមចូល ឬស្នាក់នៅក្នុងប្រទេសនេះ។

នាថ្ងៃទី ២០ កញ្ញានេះ គណៈរដ្ឋមន្ត្រីថៃ បានអនុម័តលើបទបញ្ជាមួយដែលលុបកូវីដ-១៩ ចេញពីបញ្ជីឈ្មោះស្ដីពីជំងឺដែលត្រូវហាមឃាត់ការផ្ដល់ទិដ្ឋាការចូលមកប្រទេសនេះ។ អ្នកនាំពាក្យរងរបស់ រដ្ឋាភិបាលថៃ លោកស្រី Rachada Dhnadirek បានឱ្យដឹងថា បទបញ្ជានេះមានសុពលភាពភ្លាមៗបន្ទាប់ពីត្រូវបានប្រកាស ហើយថាគ្រោងនឹងប្រកាសនាពេលឆាប់ៗនេះ។

ស្ថានភាព និងជំងឺដែលស្ថិតក្នុងបញ្ជីឈ្មោះត្រូវហាមឃាត់ការផ្ដល់ទិដ្ឋាការ ឬហាមការចូលមកប្រទេសថៃ រួមមាន ជំងឺឃ្លង់ ជំងឺរបេងស្ថិតក្នុងដំណាក់កាលគ្រោះថ្នាក់ ជំងឺជើងដំរី មនុស្សញៀនថ្នាំញៀន អ្នកញៀននឹងគ្រឿងស្រវឹងរ៉ាំរ៉ៃ និងជំងឺស្វាយដំណាក់កាលទី ៣។

ក្នុងថ្ងៃដដែលនេះ ក្រសួងសុខាភិបាលថៃ បានប្រកាសថា ក្នុងអំឡុង ២៤ ម៉ោងកន្លង ប្រទេសនេះមានអ្នកស្លាប់ចំនួន ១៥ នាក់ ដោយសារជំងឺកូវីដ-១៩ និងករណីឆ្លងថ្មីចំនួន ៧៧៤ នាក់។

ករណីឆ្លងថ្មីប្រចាំថ្ងៃជាមធ្យមក្នុងអំឡុង ១៤ ថ្ងៃ គិតត្រឹមថ្ងៃទី ២០ កញ្ញា នៅ ប្រទេសថៃ គឺ ៩៥៨ នាក់ ថយចុះជិតពាក់កណ្ដាល បើធៀបនឹង ១,៦៦៥ ករណី/ថ្ងៃ ក្នុងអំឡុង ១៤ ថ្ងៃ គិតត្រឹមថ្ងៃទី ៧ កញ្ញា៕

September 20, 2022

វិស័យទេសចរណ៍ថៃ ឆ្នាំ ២០២៣ ត្រូវបានព្យាករថា ងើបឡើង ៨០% ធៀបនឹងមុនសម័យកូវីដ-១៩

យោងតាមទិន្នន័យរបស់ រដ្ឋាភិបាលថៃ ដែលប្រកាសកាលពីម្សិលមិញ ប្រាក់ចំណូលបានពីសកម្មភាពទេសចរណ៍របស់ប្រទេសនេះក្នុងឆ្នាំ ២០២៣ នឹងសម្រេចបាន ៦៤.៥ ពាន់លានដុល្លារ ប្រហែល ៨០% ធៀបនឹងដំណាក់កាលមុនសម័យកូវីដ-១៩។

អ្នកនាំពាក្យរបស់ រដ្ឋាភិបាលថៃ Anucha Burapachaisri បានឱ្យដឹងថា វិស័យទេសចរណ៍ងើបឡើងវិញ ៨០% ធៀបនឹងដំណាក់កាលមុនកូវីដ-១៩ នៅក្នុងឆ្នាំ ២០២៣។ ប្រាក់ចំណូលបានពីភ្ញៀវបរទេសអាចឡើងដល់ ៤០.៦ ពាន់លានដុល្លារអាម៉េរិក ក្នុងពេលដែលទេសចរក្នុងស្រុករួមចំណែកប្រហែល ២៣.៨ ពាន់លានដុលលារ។ នេះបើតាមការចុះផ្សាយរបស់សារព័ត៌មាន Nikkei Asia។

យោងតាមលោក Anucha Burapachaisri ប្រទេសថៃ កំពុងស្ថិតនៅលើផ្លូវងើបឡើងវិញ ហើយរដ្ឋាភិបាលក៏យល់ថា ផែនការកែលំអរសកម្មភាពជំនួញរបស់បណ្ដាក្រុមហ៊ុនអាកាសចរណ៍នឹងសមស្របជាមួយចំនួនភ្ញៀវដែលកាន់តែកើនឡើង ពិសេសគឺនៅក្នុងរដូវកាលពេញនិយមនាចុងឆ្នាំ។

វិស័យទេសចរណ៍ធ្លាប់ជាចលករដែលជំរុញកំណើនសេដ្ឋកិច្ចដ៏សំខាន់របស់ប្រទេសថៃ ដោយវារួមចំណែក ១៨% ទៅក្នុងផលិតផលក្នុងស្រុកសរុប (GDP)។ កាលពីឆ្នាំ ២០១៩ ប្រទេសថៃ ធ្លាប់ទទួលទេសចររហូតដល់ ៣៩ លាននាក់ ដែលចំណាយប្រាក់ ៩១ ពាន់លានដុល្លារ។ ប៉ុន្តែ ១ ឆ្នាំបន្ទាប់ពីកូវីដ-១៩ បានផ្ទុះឡើង ប្រាក់ចំណូលពីភ្ញៀវបរទេសនៅ ប្រទេសថៃ បានធ្លាក់ចុះមកនៅត្រឹម ៨.៩ ពាន់លានដុល្លារ៕

September 20, 2022

រដ្ឋមន្ត្រីក្រសួងពាណិជ្ជកម្មកម្ពុជា ទទួលជួបពិភាក្សាការងារទ្វេភាគីជាមួយ តំណាងពាណិជ្ជកម្មអាមេរិក

ជំនួបរវាងប្រតិភូកម្ពុជា ដឹកនាំដោយ រដ្ឋមន្ត្រីក្រសួងពាណិជ្ជកម្ម និងប្រតិភូអាម៉េរិក ដឹកនាំដោយ តំណាងពាណិជ្ជកម្មសហរដ្ឋអាមេរិក ក្នុងបំណងជំរុញការបន្តកិច្ចសហប្រតិបត្តិការលើវិស័យសំខាន់ៗមួយចំនួន ពិសេសគឺ វិស័យសេដ្ឋកិច្ចឌីជីថល។

កាលពីព្រឹកថ្ងៃទី ១៩ កញ្ញា ២០២២ ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានដឹកនាំគណៈប្រតិភូក្រសួងពាណិជ្ជកម្ម ទទួលជួបពិភាក្សាការងារទ្វេភាគីជាមួយលោកជំទាវ Katherine Tai តំណាងពាណិជ្ជកម្មសហរដ្ឋអាមេរិក (USTR) ក្នុងអំឡុងពេលដែលលោកជំទាវមកចូលរួមកិច្ចប្រជុំរដ្ឋមន្ដ្រីសេដ្ឋកិច្ចអាស៊ានលើកទី ៥៤ និងកិច្ចប្រជុំពាក់ព័ន្ធ ដែលបានប្រព្រឹត្តទៅចាប់ពីថ្ងៃទី ១១-១៨ ខែកញ្ញា ឆ្នាំ ២០២២។

យោងតាម ក្រសួងពាណិជ្ជកម្មកម្ពុជា ជំនួបទ្វេភាគីនេះ ធ្វើឡើងក្នុងគោលបំណងពង្រឹងកិច្ចសហប្រតិបត្តិការពាណិជ្ជកម្មរវាងកម្ពុជា និងសហរដ្ឋ អាមេរិក ព្រមទាំងប្តេជ្ញាចិត្តបន្តកិច្ចសហប្រតិបត្តិការលើវិស័យសំខាន់ៗមួយចំនួន ជាពិសេស វិស័យសេដ្ឋកិច្ចឌីជីថល ដែលភាគីទាំងពីរកំពុងតែអនុវត្តស្ថិតក្រោមកិច្ចព្រមព្រៀងក្របខណ្ឌវិនិយោគ និងពាណិជ្ជកម្ម (TIFA) រវាងរដ្ឋាភិបាលព្រះរាជាណាចក្រកម្ពុជា និងសហរដ្ឋអាមេរិក។ ភាគីទាំងពីរប្ដេជ្ញាបន្តកិច្ចសហប្រតិបត្តិការ និងជំរុញពាណិជ្ជកម្ម រវាងប្រទេសទាំងពីរឱ្យកាន់តែរីកចម្រើនបន្ថែមទៀត។

September 20, 2022

បណ្ដាប្រទេសនៅមជ្ឈិមបូព៌ា ជិតអស់យុគសម័យសម្បូរប្រាក់ចាយដោយសារប្រេង

តម្លៃប្រេងរ៉ែកើនឡើងខ្ពស់ខ្លាំងនៅពេលសង្គ្រាមផ្ទុះឡើងនៅ អ៊ុយក្រែន ធ្វើឱ្យបណ្ដាប្រទេសនៅតំបន់មជ្ឈិមបូព៌ារកបានប្រាក់យ៉ាងច្រើន ក៏ប៉ុន្តែនេះអាចជាលើកចុងក្រោយបង្អស់ដែលពួកគេរកបានផលចំណេញខ្ពស់បែបនេះ។

ដើមឆ្នាំនេះ តម្លៃប្រេងឆៅមានពេលខ្លះបានហក់ឡើងខ្ពស់បំផុតក្នុងអំឡុង ៨ ឆ្នាំកន្លងមក។ តម្លៃថាមពលកើនឡើងខ្ពស់ដោយសារសង្គ្រាមរវាង រុស្ស៊ី និង អ៊ុយក្រែន បាន និងកំពុងជួយឱ្យបណ្ដាប្រទេសនៅតំបន់ឈូងសមុទ្រពែក្ស ចាកផុតពីដំណើរនៃឱនភាពសេដ្ឋកិច្ចដែលអូសបន្លាយពេលជិត ១ ទសវត្សរ៍កន្លង។

បណ្ដាប្រទេសនៅតំបន់ឈូងសមុទ្រពែក្ស ធ្លាប់បានទទួលផលចំណេញច្រើនពីតម្លៃប្រេងឆៅឡើងថ្លៃកាលពីទសវត្សរ៍ទី ៧០, ៨០ និងដើមសតវត្សរ៍នេះ។ ប៉ុន្តែ ការយល់ឃើញអំពីការប្រើប្រាស់ថាមពលកំពុងតែផ្លាស់ប្ដូរ ប្រការនេះមានន័យថា វដ្ដនៃការឡើងថ្លៃរបស់ប្រេងពិបាកនឹងមានស្ថិរភាព។ ក្រុមអ្នកវិភាគយល់ថា បណ្ដាប្រទេសនៅតំបន់ឈូងសមុទ្រពែក្ស គួរតែត្រៀមខ្លួនសម្រាប់បញ្ហានេះ។

«នេះប្រាកដជាដំណាក់កាលចាប់ផ្ដើមសម្រាប់ការបញ្ចប់ការរកស៊ីមានបានដោយសារប្រេងរ៉ែ» Karen Young អ្នកស្រាវជ្រាវជាន់ខ្ពស់ប្រចាំមជ្ឈមណ្ឌល Columbia ស្ដីពីគោលនយោបាយថាមពលសកល បានឱ្យដឹងដូច្នេះ។

បណ្ដាប្រទេសលោកខាងលិចកំពុងតែងាកទៅរកថាមពលកកើតឡើងវិញ។ ប្រការនេះកាន់តែចាំបាច់ដោយសារតែយុទ្ធនាការយោធារបស់ រុស្ស៊ី នៅ អ៊ុយក្រែន បាន និងកំពុងបង្កការរាំងស្ទះដល់ការផ្គត់ផ្គង់ប្រេង និងឧស្ម័នសម្រាប់អឺរ៉ុប។ យោងតាម Young «តម្លៃប្រេងឡើងខ្ពស់ក្នុងឆ្នាំនេះមិនប្រក្រតី។ វាមិនត្រឹមតែជាវិបត្តិប្រេង ប៉ុន្តែគឺជាការប្ដូរផ្លាស់យ៉ាងធំស្ដីពីរចនាសម្ព័ន្ធថាមពលសកល»។

មូលនិធិរូបិយវត្ថុអន្តរជាតិ (IMF) ឱ្យដឹងថា បណ្ដាប្រទេសនាំចេញប្រេងនៅ មជ្ឈិមបូព៌ា ត្រូវបានព្យាករថា រកបាន ១.៣ ទ្រីលានដុល្លារពីឥន្ធនៈហ្វូស៊ីលក្នុងរយៈពេល ៤ ឆ្នាំ ដោយសារការឡើងថ្លៃប្រេងនាបច្ចុប្បន្ន។ ប៉ុន្តែ ក្រុមអ្នកជំនាញព្រមានថា ពួកគេមិនគួរប្រើប្រាស់ខ្ជះខ្ជាយប្រាក់ទាំងនេះ។ បណ្ដាប្រទេសនៅមជ្ឈិមបូព៌ា គួរតែការពារខ្លួនពីការប្រែប្រួលរបស់តម្លៃប្រេង តាមរយៈការប្រើប្រាស់ប្រាក់ទាំងនេះដើម្បីវិនិយោគទៅលើវិស័យផ្សេងៗដើម្បីធ្វើពិពិធកម្មប្រភពចំណូល ចៀសវាងការពឹងផ្អែកទៅលើតែរ៉ែប្រេង៕

September 20, 2022

ម្ចាស់ Facebook បាត់បង់ទ្រព្យជាង ៧០ ពាន់លានដុល្លារក្នុងឆ្នាំនេះ

ទ្រព្យសម្បត្តិរបស់ម្ចាស់ Facebook បានថយចុះអស់ជាងពាក់កណ្ដាលចាប់ពីដើមឆ្នាំ ដែលនេះគឺជាតួលេខខ្ពស់ជាងគេបង្អស់ក្នុងបញ្ជីមហាសេដ្ឋីពិភពលោករបស់ Bloomberg។

បើទោះជាឆ្នាំនេះគឺជាឆ្នាំដែលលំបាកចំពោះមហាសេដ្ឋីគ្រប់រូបនៅក្នុងវិស័យបច្ចេកវិទ្យានៅ សហរដ្ឋអាម៉េរិក ប៉ុន្តែ ការធ្លាក់ចុះនៃទ្រព្យសម្បត្តិរបស់ Mark Zuckerberg ដែលជា CEO របស់ Meta Platforms (ក្រុមហ៊ុនមេរបស់ Facebook) នៅតែគួរឱ្យយកចិត្តទុកដាក់ជាងគេ។ ជាសរុប តាំងពីដើមឆ្នាំរហូតដល់បច្ចុប្បន្ន ម្ចាស់ Facebook បាត់បង់ទ្រព្យអស់ ៧១ ពាន់លានដុល្លារ។

បច្ចុប្បន្ន Zuckerberg នៅសល់ទ្រព្យ ៥៥.៩ ពាន់លានដុល្លារ ឈរលំដាប់ទី ២០ ក្នុងពិភពលោក។ នេះគឺជាចំណាត់ថ្នាក់ទាបបំផុតរបស់ម្ចាស់ Facebook គិតចាប់ពីឆ្នាំ ២០១៤។

ភាគហ៊ុន Facebook បានថយចុះជិត ៥៧% ក្នុងឆ្នាំនេះ។ ការថយចុះនេះខ្ពស់ជាងឆ្ងាយធៀបនឹង Apple (ថយចុះ ១៤%), Amazon (-២៦%) និង Alphabet (-29%)។

ទ្រព្យសម្បត្តិភាគច្រើនរបស់ Zuckerberg គឺផ្សារភ្ជាប់ជាមួយនឹងភាគហ៊ុន Meta។ បច្ចុប្បន្នគាត់កាន់កាប់ជាង ៣៥០ លានហ៊ុននៅក្នុងក្រុមហ៊ុននេះ។

កាលពីជិត ២ ឆ្នាំមុន Zuckerberg មានទ្រព្យ ១០៦ ពាន់លានដុល្លារ និងជាមហាសេដ្ឋីលំដាប់ទី ៣ ក្នុងពិភពលោក។ ទ្រព្យរបស់គាត់បានឡើងដល់ ១៤២ ពាន់លានដុល្លារអាម៉េរិក កាលពីខែកញ្ញាឆ្នាំកន្លង នៅពេលតម្លៃភាគហ៊ុនរបស់ Meta ឡើងដល់ ៣៨២ ដុល្លារ/ហ៊ុន។ តម្លៃនេះកាលពីម្សិលមិញ នៅសល់តែ ១៤៨ ដុល្លារ។

Laura Martin ដែលជាអ្នកវិភាគ Internet ប្រចាំក្រុមហ៊ុន Needham & Co យល់ថា ការវិនិយោគទៅលើ metaverse (ចក្រវាលនិម្មិត) បានទាញក្រុមហ៊ុន Meta ឱ្យធ្លាក់ចុះ។ Zuckerberg ធ្លាប់បាននិយាយថា គម្រោងនេះអាចត្រូវការប្រាក់ច្រើនក្នុងរយៈពេលពី ៣ ទៅ ៥ ឆ្នាំទៀត។ Martin និយាយថា Meta កំពុងខំប្រឹងដើម្បីអូសទាញអ្នកប្រើប្រាស់ពី TikTok ត្រលប់មកវិញ។ ជាងនេះ Meta ក៏ត្រូវរងសម្ពាធខ្លាំងពីការដែលប្រទេសជាច្រើនរឹតបន្តឹងលើ Facebook៕

September 20, 2022

ឡានហោះអគ្គិសនីបញ្ចូលថាមពលរហ័ស ល្បឿនជាង ២០០ គីឡូម៉ែត្រ/ម៉ោង

ឡានហោះ H1 ប្រើពេលប្រហែល ២០ នាទី ដើម្បីបញ្ចូលថាមពលថ្មពី ២០% ឡើងដល់ ៨០% និងហោះបានជិត ១០០ គីឡូម៉ែត្រ ដោយដឹកមនុស្ស ២ នាក់។

ក្រុមហ៊ុនអាកាសចរណ៍ Doroni មានទីស្នាក់ការនៅ Miami សហរដ្ឋអាម៉េរិក ចាប់ផ្ដើមទទួលការបញ្ជាទិញជាមុនសម្រាប់ឡានហោះឯកជន H1 នេះបើតាម Interesting Engineering ចុះផ្សាយកាលពីថ្ងៃទី ១៩ កញ្ញា។

ក្នុងគ្រាដែលបណ្ដាក្រុមហ៊ុនផលិតយានយន្តអគ្គិសនីហោះហើរ និងចុះចតត្រង់ភាគច្រើនកំណត់គោលដៅទីផ្សារតាក់ស៊ីហោះនៅក្នុងទីក្រុង ក្រុមហ៊ុន Doroni ឯណេះវិញមានបំណងវាយលុកទីផ្សារផ្សេងពីនេះ។ ក្រុមហ៊ុននេះឆ្ពោះទៅរកអ្នកបើកបរឯកជន និងអះអាងថា H1 ងាយស្រួលប្រើប្រាស់ជាង បើធៀបនឹងឧទ្ធម្ភាគចក្រ ឬយន្តហោះធម្មតា។ គ្រប់គ្នាឱ្យតែមានប័ណ្ណបើកបរធម្មតាគឺអាចប្រើប្រាស់ H1 ក្រោយពីបានបញ្ចប់វគ្គហ្វឹកហាត់ប្រហែល ២០ ម៉ោង។

H1 គឺជាឡានហោះ ២ កៅអី មានកង់ មានប្រព័ន្ធស្លាបចំនួន ២ និងមានស្លាបកង្ហារធំៗ អាចដឹកទម្ងន់ ២២៧ គីឡូក្រាម។ អ្នកប្រើប្រាស់អាចបើកបរ H1 ចូលទៅក្នុងស្ថានីយបញ្ចូលថាមពលធម្មតា។ ជាមួយនឹងមុខងារបញ្ចូលថាមពលរហ័ស H1 ចំណាយពេលតែ ២០ នាទីប៉ុណ្ណោះ គឺអាចបន្ថែមថាមពលពី ២០% ឡើងដល់ ៨០% នេះបើតាម Doron Merdinger នាយកប្រតិបត្តិរបស់ក្រុមហ៊ុន Doroni។

ល្បឿនអតិបរមារបស់ H1 នឹងឡើងដល់ ២២៥ គីឡូម៉ែត្រ/ម៉ោង និងអាចហោះបានចម្ងាយជិត ១០០ គីឡូម៉ែត្រ។ H1 ក៏មានបំពាក់ឆត្រយោងមួយដើម្បីធានាសុវត្ថិភាព។

ក្រុមហ៊ុន Doroni បានបង្ហាញប្រព័ន្ធនានារបស់ H1 នៅក្នុងពិព័រណ៍អាកាសចរណ៍ Experimental Aircraft Association (EAA) AirVenture នៅឯព្រលានយន្តហោះក្នុងតំបន់ Wisconsin សហរដ្ឋអាម៉េរិក កាលពីខែកក្កដា។

Doroni នឹងចាប់ផ្ដើមប្រគល់ទំនិញនៅត្រីមាសចុងក្រោយនៃឆ្នាំ ២០២៤។ ក្រុមហ៊ុននេះទទួលការបញ្ជាទិញមុនតែ ៣៦ គ្រឿងប៉ុណ្ណោះ។ តាមការគណនា នៅពេលបង្ហាញខ្លួនជាផ្លូវការ ឡានហោះនេះអាចនឹងមានតម្លៃ ១៥០,០០០ ដុល្លារអាម៉េរិក៕

https://www.youtube.com/watch?v=tFkJ-TVZizM

September 20, 2022

គម្រោងរៀបចំច្រកទ្វារអន្តរជាតិស្ទឹងបត់ និងផ្លូវតភ្ជាប់មកផ្លូវជាតិលេខ ៥ សម្រេចបានជាង ៥៨ ភាគរយ

នៅទីស្ដីការក្រសួងសាធារណការ និងដឹកជញ្ជូន ឯកឧត្តម យិត បុណ្ណា រដ្ឋលេខាធិការក្រសួង និងជា នាយកគម្រោងរៀបចំច្រកទ្វារអន្តរជាតិស្ទឹងបត់ និងផ្លូវតភ្ជាប់ទៅផ្លូវជាតិលេខ៥ បានអញ្ជើញដឹកនាំកិច្ចប្រជុំតាមប្រព័ន្ធវីដេអូពីចម្ងាយ ដើម្បីត្រួតពិនិត្យវឌ្ឍនភាពនៃការអនុវត្តគម្រោងរៀបចំច្រកទ្វារអន្តរជាតិស្ទឹងបត់ និងផ្លូវតភ្ជាប់ទៅផ្លូវជាតិលេខ ៥។

អង្គប្រជុំដែលមានការចូលរួមពីថ្នាក់ដឹកនាំក្រសួង ទីប្រឹក្សាត្រួតពិនិត្យបច្ចេកទេស និងមន្រ្តីជំនាញបច្ចេកទេសគម្រោងពាក់ព័ន្ធនេះ បានពិនិត្យ និងពិភាក្សាលម្អិតលើវឌ្ឍនភាពការងារ ការនាំចូលសម្ភារៈវត្ថុធាតុដើម ការបែងចែកកម្លាំងពលកម្ម-កម្មករជំនាញតាមអគារនីមួយៗ និងបញ្ហាប្រឈមនានា ព្រមទាំងបានស្នើ ឱ្យទីប្រឹក្សាត្រួតពិនិត្យបច្ចេកទេសរៀបចំផែនការលម្អិតលើការងារនាំចូលសម្ភារៈវត្ថុធាតុដើម និងការសាងសង់ ដើម្បីតាមដាន ត្រួតពិនិត្យ និងជំរុញឱ្យពាក់ព័ន្ធ អនុវត្តគម្រោងឱ្យសម្រេចតាមផែនការដែលបានសន្យា។

របាយការណ៍របស់អង្គភាពគ្រប់គ្រងគម្រោងបានឱ្យដឹងថា គិតត្រឹមថ្ងៃទី ១៩ ខែកញ្ញា ឆ្នាំ ២០២២ គម្រោងរៀបចំច្រកទ្វារអន្តរជាតិស្ទឹងបត់ និងផ្លូវតភ្ជាប់មកផ្លូវជាតិលេខ ៥ ដែលអនុវត្តដោយ ក្រុមហ៊ុន CM Grand Development និង Tan Kim Eng សម្រេចបានចំនួន ៥៨,៤៨%៕

September 20, 2022

គម្រោងទិញដូរអគ្គិសនីពហុប្រទេសដំបូងគេបង្អស់នៅក្នុងតំបន់អាស៊ាន ផ្ដល់សញ្ញាវិជ្ជមានសម្រាប់ការតភ្ជាប់បណ្ដាញអគ្គិសនីរួមនៅទូទាំងតំបន់

គម្រោងទិញដូរអគ្គិសនីរវាង ឡាវ-ថៃ-ម៉ាឡេស៊ី-សិង្ហបុរី បានក្លាយជាការពិត ដែលនេះគឺជាការបើកផ្លូវឱ្យមានក្ដីសង្ឃឹមចំពោះការតភ្ជាប់បណ្ដាញអគ្គិសនីរួមរបស់បណ្ដាប្រទេសដែលជាសមាជិកនៃសមាគមប្រជាជាតិអាស៊ីអាគ្នេយ៍។

គម្រោងទិញដូរអគ្គិសនីរវាង ឡាវ និង សិង្ហបុរី គឺជាផ្នែកមួយនៃគម្រោងតភ្ជាប់បណ្ដាញអគ្គិសនីទ្រង់ទ្រាយធំជាងនេះដែលមានការចូលរួមរបស់ប្រទេសចំនួន ៤ គឺ ឡាវ-ថៃ-ម៉ាឡេស៊ី-សិង្ហបុរី (គម្រោង LTMS-PIP) ដែលត្រូវបានប្រទេសទាំងនេះអនុម័តជាផ្លូវការនៅក្នុងចក្ខុវិស័យអាស៊ាន ២០២០។

ថ្មីៗនេះ គម្រោងទិញដូរអគ្គិសនីពហុភាគីដំបូងគេនៅក្នុង អាស៊ាន រវាង ៤ ប្រទេសខាងលើបានក្លាយជាការពិត ដែលនេះគឺជាការបើកផ្លូវឱ្យមានការរំពឹងទុកចំពោះការតភ្ជាប់បណ្ដាញអគ្គិសនីរួមនៅក្នុងតំបន់អាស៊ាន។

គម្រោងដែលមានគោលដៅបង្កើតជាប្រព័ន្ធសន្តិសុខថាមពលសម្រាប់ទូទាំងតំបន់ តាមរយៈការតភ្ជាប់ទៅក្នុងបណ្ដាញអគ្គិសនីរួម សមាជិកទាំងឡាយអាចចែករំលែកអគ្គិសនីដល់គ្នា ក្នុងនោះ ប្រទេសដែលសល់អគ្គិសនីនឹងអាចលក់ទៅឱ្យបណ្ដាប្រទេសដែលមានតម្រូវការ ប្រកបដោយភាពងាយស្រួល។

ចាប់ពីចុងខែមិថុនា សិង្ហបុរី បាននាំចូលអគ្គិសនីពីប្រភពថាមពលកកើតឡើងវិញរបស់ ឡាវ នៅក្នុងដំណាក់កាលសាកល្បងរយៈពេល ២ ឆ្នាំ។ តួលេខ ១០០ មេហ្គាវ៉ាត់ ដែលស្មើនឹង ១.៥% នៃតម្រូវការអគ្គិសនីក្នុងម៉ោងមានការប្រើច្រើនរបស់ សិង្ហបុរី ក្នុងឆ្នាំ ២០២០ គឺគ្រប់គ្រាន់សម្រាប់ផ្គត់ផ្គង់ដល់ ១៤៤,០០០ គ្រួសារនៅក្នុង ១ ឆ្នាំ។

លោក Chanthaboun Soukaloun អគ្គនាយកនៃក្រុមហ៊ុនអគ្គិសនីឡាវ (EDL) បានឱ្យដឹងថា EDL លក់អគ្គិសនីឱ្យ សិង្ហបុរី ទៅតាមកម្រិតនៃថាមពល។ បច្ចុប្បន្ន គម្រោងផលិតអគ្គិសនីប្រមាណ ៩០% របស់ ប្រទេសឡាវ គឺត្រូវបានផលិតឡើងដោយថាមពលកកើតឡើងវិញ ឬហៅថា ថាមពលបៃតង។ ឡាវ ក៏កំពុងតែទាក់ទាញអ្នកវិនិយោគនៅក្នុងវិស័យផលិតអគ្គិសនីពីថាមពលបៃតង ដូចជា ខ្យល់ កម្ដៅព្រះអាទិត្យ និងវារីអគ្គិសនីជាដើម។

ដើម្បីជំរុញការទិញដូរថាមពលរវាងបណ្ដាប្រទេសក្នុងតំបន់អាស៊ាន ពិសេសគឺការជំរុញការស្ថាបនាបណ្ដាញអគ្គិសនីអាស៊ាន ប្រទេសជាសមាជិកត្រូវតែប្រញាប់បង្កើតស្ដង់ដារួមស្ដីពីប្រព័ន្ធបញ្ជូន និងទាញយកអគ្គិសនីក្នុងតំបន់។ ប្រការនេះមិនត្រឹមតែជួយឱ្យការតភ្ជាប់បណ្ដាញអគ្គិសនីឆ្លងព្រំដែនមានភាពងាយស្រួលនោះទេ តែក៏ជួយកាត់បន្ថយការចំណាយក្នុងការអនុវត្តគម្រោងផ្សេងៗនាពេលអនាគត។

គម្រោងសមាហរណកម្មថាមពលឡាវ-ថៃ-ម៉ាឡេស៊ី-សិង្ហបុរី នឹងបង្កើតឱ្យមានការចាប់ផ្ដើមដ៏ល្អសម្រាប់ទីផ្សារទិញដូរថាមពលរវាងប្រទេសជាសមាជិករបស់ អាស៊ាន នាពេលខាងមុខ។ ចំណែកជោគជ័យរបស់គម្រោងទិញដូរអគ្គិសនីរវាង ឡាវ និង សិង្ហបុរី មិនត្រឹមតែផ្ដល់ផលប្រយោជន៍ដល់ប្រទេសដែលចូលរួមនោះទេ តែក៏ជួយឱ្យមានក្ដីសង្ឃឹមខ្ពស់សម្រាប់ការជំរុញដំណើរការស្ថាបនាបណ្ដាញអគ្គិសនីរួមរបស់ អាស៊ាន ជាប្រការដែលនឹងនាំមកនូវប្រសិទ្ធភាពផ្នែកសេដ្ឋកិច្ចយ៉ាងខ្ពស់សម្រាប់អ្នកវិនិយោគ និងផលប្រយោជន៍សម្រាប់អ្នកប្រើប្រាស់ ព្រមទាំងការពង្រីកទីផ្សារទិញដូរអគ្គិសនី ជំរុញការវិនិយោគ ហើយពិសេសគឺការធានាសន្តិសុខថាមពលសម្រាប់សមាជិកអាស៊ានទៀតផង៕

September 20, 2022

Author: សឿន សំណាង