Author: សឿន សំណាង

ទូទាំងពិភពលោក អាចបាត់បង់ប្រាក់ ២.៨ ទ្រីលានដុល្លារអាម៉េរិក ព្រោះតែសង្គ្រាមរវាង រុស្ស៊ី និងអ៊ុយក្រែន
OECD យល់ថា ពិភពលោកកំពុងតែត្រូវ «បង់ថ្លៃយ៉ាងធំធេង» សម្រាប់សង្គ្រាមនៅ អ៊ុយក្រែន និងព្រមមានថា អឺរ៉ុប នឹងធ្លាក់ទៅក្នុងឱនភាពសេដ្ឋកិច្ច។
អង្គការសម្រាប់កិច្ចសហប្រតិបត្តិការសេដ្ឋកិច្ច និងការអភិវឌ្ឍន៍ (OECD) កាលពីថ្ងៃទី ២៦ កញ្ញា បានគណនាឃើញថា យុទ្ធនាការយោធាពិសេសរបស់ រុស្ស៊ី នៅ អ៊ុយក្រែន នឹងធ្វើឱ្យ GDP ទូទាំងសកលលោកបាត់បង់ ២.៨ ទ្រីលានដុល្លារអាម៉េរិក គិតត្រឹមចុងឆ្នាំក្រោយ។ តួលេខនេះអាចខ្ពស់ជាងបើសិនជារដូវត្រជាក់ធ្វើឱ្យ អឺរ៉ុប ត្រូវបែងចែកការប្រើប្រាស់ថាមពល។
សង្គ្រាមរវាង រុស្ស៊ី និង អ៊ុយក្រែន បានបណ្ដាលឱ្យតម្លៃថាមពលកើនឡើងខ្ពស់ខ្លាំង ធ្វើឱ្យការចំណាយរបស់គ្រួសារត្រូវធ្លាក់ចុះ ហើយការជឿជាក់ក្នុងអាជីវកម្ម មុខជំនួញក៏ត្រូវថយចុះ ពិសេសគឺនៅ អឺរ៉ុប។ សង្គ្រាមនេះកំពុងតែបង្កឱ្យមានភាពរអាក់រអួលចំពោះបណ្ដាញផ្គត់ផ្គង់ បញ្ហាខ្វះខាតស្បៀងអាហារ ទំនិញសំខាន់ៗ និងធ្វើឱ្យរង្គោះរង្គើទីផ្សារពិភពលោក។
រដ្ឋាភិបាលនានានៅ អឺរ៉ុប បារម្ភថា សង្គ្រាមនេះអាចអូសបន្លាយពេលច្រើនខែ ឬច្រើនឆ្នាំទៀត។ បញ្ហានេះនឹងដាក់សម្ពាធកាន់តែធ្ងន់ទៅលើសេដ្ឋកិច្ចសកល។ «យើងទាំងអស់គ្នាកំពុងតែបង់ថ្លៃយ៉ាងខ្ពស់សម្រាប់សង្គ្រាមនេះ» Alvaro Santos Pereira ប្រធានក្រុមសេដ្ឋកិច្ចនៅ OECD អះអាងដូច្នេះ។
នៅក្នុងរបាយការណ៍ព្យាករណ៍កាលពីម្សិលម្ង៉ៃ OECD យល់ថា សេដ្ឋកិច្ចទូទាំងពិភពលោកអាចមានកំណើន ៣% ក្នុងឆ្នាំនេះ និង ២.២% ក្នុងឆ្នាំក្រោយ។ នៅមុនសង្គ្រាមរវាង រុស្ស៊ី និង អ៊ុយក្រែន តួលេខនេះគឺ ៤.៥% និង ៣.២%។
ចំពោះតំបន់ប្រើប្រាស់ប្រាក់អឺរ៉ូ OECD គណនាឃើញថា GDP នឹងកើនតែ ០.៣% ប៉ុណ្ណោះនៅឆ្នាំក្រោយ។ សេដ្ឋកិច្ចរបស់ អាល្លឺម៉ង់ ត្រូវបានព្យាករថា នឹងថយចុះ ០.៧%។
OECD ក៏បានព្យាករថា សេដ្ឋកិច្ចរបស់ អឺរ៉ុប អាចធ្លាក់ចុះជ្រៅជាងនេះ បើសិនតម្លៃថាមពលកើនឡើងមកវិញ។ បើសិនតម្លៃឧស្ម័នកើនឡើង ៥០% នៅក្នុងរយៈពេលប៉ុន្មានខែចុងក្រោយនៃឆ្នាំនេះ នោះ GDP របស់ អឺរ៉ុប អាចថយចុះ ១.៣% ក្នុងឆ្នាំ ២០២៣។ សេដ្ឋកិច្ចសកលក៏នឹងមានកំណើនតែ ១.៧% ប៉ុណ្ណោះ។ «អឺរ៉ុប នឹងធ្លាក់ទៅក្នុងវិបត្តិសេដ្ឋកិច្ច» Pereira បញ្ជាក់ដូច្នេះ។
រដ្ឋាភិបាលនានានៅ អឺរ៉ុប បានចំណាយប្រាក់រាប់ពាន់លានដុល្លារអាម៉េរិក ដើម្បីជួយដល់ក្រុមគ្រួសារ និងក្រុមហ៊ុន សហគ្រាសដែលរងផលវិបាកដោយសារតម្លៃឥន្ធនៈកើនឡើងខ្ពស់។ ប្រទេសមួយចំនួនថែមទាំងកំណត់តម្លៃពិតានលើថាមពល។ ប៉ុន្តែ ប្រការទាំងនេះបែរជាធ្វើឱ្យគ្រួសារទាំងឡាយមិនមានកត្តាជំរុញសម្រាប់ការកាត់បន្ថយការប្រើប្រាស់ឥន្ធនៈ។
ទន្ទឹមនឹងនេះ គោលនយោបាយផ្ដល់ជំនួយខាងលើថែមទាំងធ្វើឱ្យបំណុលសាធារណៈកើនឡើងខ្ពស់ខ្លាំង។
OECD បានទម្លាក់ការព្យាករលើអត្រាកំណើនសេដ្ឋកិច្ចរបស់ សហរដ្ឋអាម៉េរិក នៅឆ្នាំក្រោយ ចុះ ០.៥%។ GDP របស់ខឿនសេដ្ឋកិច្ចធំបំផុតក្នុងពិភភពលោកនេះអាចធ្លាក់ចុះជ្រៅជាងនេះ បើសិនអតិផរណាមិនអន់ថយរហ័សដូចការរំពឹងទុករបស់ Fed (ធនាគារកណ្ដាលរបស់ សហរដ្ឋអាម៉េរិក)។
ចំពោះ ប្រទេសចិន OECD យល់ថា សេដ្ឋកិច្ចនឹងងើបឡើងវិញនៅឆ្នាំ ២០២៣ ក្រោយពីវេទនានៅក្នុងឆ្នាំនេះ។ GDP របស់ ប្រទេសចិន អាចមានកំណើន ៣.២% ក្នុងឆ្នាំនេះ និង ៤.៧% ក្នុងឆ្នាំក្រោយ៕
September 28, 2022
ទិដ្ឋភាពខ្លះៗស្ដីពីព្យុះ Noru ដែលកំពុងវាយប្រហារចូលដីគោកនៅ វៀតណាម
ម៉ោង ០៧ ព្រឹក ថ្ងៃទី ២៨ កញ្ញានេះ ចំណុចកណ្ដាលរបស់ព្យុះ Noru កំពុងស្ថិតនៅក្នុងតំបន់ភាគកណ្ដាលនៃប្រទេសវៀតណាម បណ្ដាលឱ្យដើមឈើ ផ្ទះសំបែង និងហេដ្ឋារចនាសម្ព័ន្ធត្រូវរងការខូចខាតធ្ងន់ធ្ងរ។
ទឿធានហ្វេ, ដាណាំង, ក្វាងណាម និងក្វាងង៉ាយ របស់ ប្រទេសវៀតណាម គឺជាបណ្ដាខេត្តដែលស្ថិតក្រោមចំណុចកណ្ដាលរបស់ព្យុះ Noru។ កម្លាំងខ្យល់ដែលមានល្បឿន ១១៧ គីឡូម៉ែត្រ/ម៉ោង បានបណ្ដាលឱ្យដើមឈើត្រូវដួលរលំ ផ្ទះសំបែងជាច្រើនខ្នងត្រូវប៉ើងដំបូល ឬបាក់ស្រុតជាបន្តបន្ទាប់។ ខេត្តជាច្រើននៅក្រោមចំណុចកណ្ដាលរបស់ព្យុះ ត្រូវដាច់ចរន្តអគ្គិសនី ខណៈហេដ្ឋារចនាសម្ព័ន្ធនានាក៏ត្រូវខូចខាត។
ក្រៅពីបណ្ដាខេត្តខាងលើ ក៏នៅមានខេត្តមួយចំនួនទៀតរបស់ វៀតណាម ត្រូវរងផលប៉ះពាល់ខ្លាំងពីឥទ្ធិពលរបស់ព្យុះនេះ ដោយសារមានភ្លៀងធ្លាក់ខ្លាំង បណ្ដាលឱ្យបាក់ដី ទឹកជំនន់។ល។
ខាងក្រោមនេះគឺជាទិដ្ឋភាពខ្លះៗស្ដីពីព្យុះ Noru ដែលកំពុងវាយប្រហារចូលដីគោកនៅ វៀតណាម ៖

September 28, 2022
ប្រទេសថៃ ចង់ក្លាយជាអ្នកផលិតរថយន្តអគ្គិសនីធំរបស់ពិភពលោក
ឆ្នាំ ១៩៦១ រថយន្តប្រភេទសេដានមួយគ្រឿងដែលមានឈ្មោះថា Ford Cortina បានចាប់ផ្ដើមបង្កើតវិស័យឧស្សាហកម្មផលិតរថយន្តរបស់ ប្រទេសថៃ ដោយក្នុងនោះ កម្មករក្នុងស្រុកគឺជាអ្នកដំឡើងគ្រឿងបន្លាស់ដែលដឹកមកពី ប្រទេសអង់គ្លេស។ ប៉ុន្មានឆ្នាំក្រោយមក Toyota Motor Corp និង Nissan Motor Co. ក៏បង្កើតរោងចក្រផលិតរថយន្ត និងពង្រីកការផលិតជាបន្តបន្ទាប់អស់ជាច្រើនទសវត្សរ៍ នាំឱ្យ ប្រទេសថៃ ក្លាយជាអ្នកផលិតរថយន្តធំជាងគេលំដាប់ទី ៣ នៅ អាស៊ី និងទី ១០ ក្នុងពិភពលោក។
អំណោយផលនេះបានជួយឱ្យ ប្រទេសថៃ មានរហ័សនាមថា «Detroit របស់ អាស៊ី» ហើយក្នុងពេលជាមួយគ្នានោះ ថៃ គឺជាបណ្ដាញផ្គត់ផ្គង់ពេញលេញសម្រាប់ការផលិតរថយន្តម៉ាស៊ីនចំហេះក្នុង។ ក្នុងរយៈពេល ៥០ ឆ្នាំ ប្រទេសថៃ បានចាប់ផ្ដើមពីការដំឡើងរថយន្ត ទៅជាអ្នកផលិតរថយន្ត ដោយមានរោងចក្រចំនួន ១៨ នៅពាសពេញប្រទេស និងមានអ្នកផ្គត់ផ្គង់គ្រឿងបន្លាស់រាប់ពាន់ស្ថាប័ន។
ពេលនេះ នៅពេលរថយន្តអគ្គិសនីកំពុងតែចូលខ្លួនមកជំនួសរថយន្តម៉ាស៊ីនចំហេះក្នុងនៅទូទាំងពិភពលោក ប្រទេសថៃ ក៏ចាប់ផ្ដើមងាកទៅរកដៃគូបរទេសថ្មីដើម្បីផលិតរថយន្តអគ្គិសនី ក្នុងបំណងរក្សាតំណែងរបស់ខ្លួននៅក្នុងវិស័យឧស្សាហកម្មរថយន្តទូទាំងសកលលោក។
ក្រុមហ៊ុន Ford Motor Co. របស់ សហរដ្ឋអាម៉េរិក និង Toyota របស់ ជប៉ុន គឺជា «អ្នកចេញមុខ» មុនគេនៅក្នុងអំឡុងពាក់កណ្ដាលសតវត្សរ៍ទី ២០ ប៉ុន្តែបច្ចុប្បន្ន ក្រុមហ៊ុន Foxconn Technology Group របស់ កោះតៃវ៉ាន់ ក៏ដូចជា BYD Co. និង Contemporary Amperex Technology Co. (CATL) របស់ ចិនដីគោក កំពុងតែមានចំណាប់អារម្មណ៍ខ្លាំងក្នុងការជួយឱ្យ ប្រទេសថៃ សម្រេចក្ដីប្រាថ្នា «ក្លាយជាអ្នកផលិតរថយន្តអគ្គិសនីដ៏ធំមួយក្នុងពិភពលោក»។
ថៃ ដាក់គោលដៅផលិតរថយន្តអគ្គិសនីឱ្យបាន ៣០% ក្នុងចំណោមរថយន្តទាំងអស់ដែលផលិតនៅប្រទេសនេះនៅឆ្នាំ ២០៣០។ អាជ្ញាធរប្រទេសនេះរៀបផែនការខាងលើជា ២ ដំណាក់កាល ដើម្បីសម្រេចគោលដៅនេះ។ ដំណាក់កាលដំបូងគឺការទាក់ទាញអ្នកប្រើប្រាស់ឱ្យងាកមកជ្រើសយករថយន្តអគ្គិសនី ដោយមិនគិតអំពីប្រភព ខណៈដំណាក់កាលទី ២ គឺការលើកទឹកចិត្តឱ្យអ្នកប្រើប្រាស់គាំទ្រដល់រថយន្តអគ្គិសនីដែលផលិតក្នុងស្រុក។
ការផ្ដល់ជំនួយសម្រាប់ការទិញរថយន្តអគ្គិសនីគឺជាគន្លឹះដំបូងដើម្បីជំរុញឱ្យមានតម្រូវការប្រើប្រាស់។ ការបញ្ចុះអត្រាពន្ធនាំចូល និងពន្ធប្រើប្រាស់ពិសេសនឹងជួយឱ្យរថយន្តអគ្គិសនីអាចប្រកួតប្រជែងបានយ៉ាងល្អជាមួយនឹងរថយន្តស៊ីប្រេងសាំង។ ក្រៅពីនេះ អាជ្ញាធរថៃ ក៏កំពុងមានគម្រោងជាច្រើនទៀតដើម្បីជំរុញ និងលើកទឹកចិត្តឱ្យមានការប្រើប្រាស់ ក៏ដូចជាការផលិតរថយន្តអគ្គិសនីនៅប្រទេសនេះ៕
September 27, 2022
ប្រទេសរុស្ស៊ី រៀបគម្រោងបញ្ចេញ «រូបិយប័ណ្ណរូប្លឌីជីថល» នៅដើមឆ្នាំក្រោយ
ធនាគារជាតិរុស្ស៊ី បានធ្វើការសាកល្បងប្រាក់រូប្លឌីជីថលជាមួយនឹងធនាគារមួយចំនួន បន្ទាប់ពីប្រទេសនេះត្រូវរងទណ្ឌកម្មទាក់ទិននឹងការចូលឈ្លានពានលើ អ៊ុយក្រែន។
ប្រធានគណៈកម្មការហិរញ្ញវត្ថុនៃសភាជាន់ទាបរុស្ស៊ី លោក Anatoly Aksakov កាលពីថ្ងៃទី ២៦ កញ្ញា បានឱ្យដឹងថា រុស្ស៊ី មានគម្រោងបង្ហាញប្រាក់រូប្លឌីជីថលនៅដើមឆ្នាំ ២០២៣ និងប្រើប្រាស់ក្នុងការទូទាត់ទ្វេភាគីជាមួយប្រទេសចិន។
រុស្ស៊ី បានអភិវឌ្ឍប្រាក់ឌីជីថលអស់រយៈពេលច្រើនឆ្នាំមកហើយដើម្បីធ្វើទំនើបកម្មលើប្រព័ន្ធហិរញ្ញវត្ថុ បង្កើនល្បឿននៃការទូទាត់ និងទប់ទល់នឹងការគំរាមកំហែងពីប្រាក់ឌីជីថលគ្រីបតូ ដូចជា bitcoin ជាដើម។
ធនាគារជាតិរុស្ស៊ី បានធ្វើការសាកល្បងប្រាក់រូប្លឌីជីថលជាមួយនឹងធនាគារមួយចំនួន បន្ទាប់ពីប្រទេសនេះត្រូវរងទណ្ឌកម្មទាក់ទិននឹងការចូលឈ្លានពានលើ អ៊ុយក្រែន។ ដំណោះស្រាយសម្រាប់បញ្ហាខាងលើរបស់ រុស្ស៊ី គឺការប្រើប្រាស់ប្រាក់រូប្លឌីជីថល ព្រោះថា លំហូរហិរញ្ញវត្ថុអាចឆ្លងផុតប្រព័ន្ធទាំងឡាយដែលគ្រប់គ្រងដោយបណ្ដាប្រទេសដែល រុស្ស៊ី ចាត់ទុកថា «មិនស្និទ្ធស្នាល»។
យោងតាម ប្រធានគណៈកម្មការហិរញ្ញវត្ថុនៃសភាជាន់ទាបរុស្ស៊ី ក្រោយពីបានដំណើរការ ប្រាក់រូប្លឌីជីថលនេះនឹងត្រូវបានប្រើប្រាស់ក្នុងការទូទាត់ទ្វេភាគីជាមួយ ប្រទេសចិន ដែលបច្ចុប្បន្នប្រទេសនេះក៏កំពុងដំណើរការសាកល្បងប្រាក់យុនឌីជីថលផងដែរ។
ក្រុមអ្នកជំនាញក្នុងវិស័យធនាគាររបស់ រុស្ស៊ី អះអាងថា បច្ចេកវិទ្យាទូទាត់បែបទំនើបគឺមានសារសំខាន់ខ្លាំងណាស់ ព្រោះថា បណ្ដាប្រទេសអាចទូទាត់ប្រាក់ដោយផ្ទាល់ជាមួយគ្នា ដោយមិនឆ្លងកាត់បណ្ដាញទូទាត់ដែលគ្រប់គ្រងដោយបណ្ដាប្រទេសលោកខាងលិច មានដូចជាប្រព័ន្ធទូទាត់អន្តរជាតិ SWIFT ជាដើម៕
September 27, 2022
រូបភាពចុងក្រោយរបស់យានអវកាសណាសា មុនពេលបុកទៅលើអាចម៍ផ្កាយ
រូបភាពចុងក្រោយដែលត្រូវបានយានអវកាស DART របស់ ណាសា បញ្ជូនមកកាន់ផែនដី បង្ហើបឱ្យឃើញអំពីផ្ទៃរបស់អាចម៍ផ្កាយដែលវាកំពុងហោះទៅបុកក្នុងល្បឿន ២២,៥០០ គីឡូម៉ែត្រ/ម៉ោង។
បេសកកម្មសាកល្បងបង្វែរទិសដៅអាចម៍ផ្កាយភ្លោះ (DART) ត្រូវបានធ្វើឡើងក្នុងបំណងពិនិត្យមើលការប៉ះទង្គិចបែបថាមវន្ត ជាបច្ចេកទេសដែលមនុស្សអាចប្រើប្រាស់ដើម្បីបង្វែរទិសដៅរបស់បណ្ដាអាចម៍ផ្កាយដែលត្រូវបានចាត់ទុកថា អាចបង្កគ្រោះថ្នាក់ដល់ផែនដី។
បេសកកម្មនេះត្រូវបានយានអវកាស DART ធ្វើឡើងកាលពីម៉ោង ៧ និង ១៤ នាទីយប់នៃថ្ងៃទី ២៦ កញ្ញា ម៉ោងនៅ សហរដ្ឋអាម៉េរិក (ម៉ោងប្រហែល ៦ ព្រឹកនៃថ្ងៃទី ២៧ កញ្ញានៅ កម្ពុជា) ដោយវាបានហោះទៅបុកអាចម៍ផ្កាយដែលគេដាក់ឈ្មោះថា Dimorphos។ លទ្ធផលទទួលបានពីការបុកគ្នានេះគឺកម្រងរូបភាពដ៏អស្ចារ្យ។
អាចម៍ផ្កាយ Dimorphos
Nancy Chabot ប្រធានក្រុមចាត់ចែងបេសកកម្ម DART និងជាអ្នកវិទ្យាសាស្ត្រភពនៅបន្ទប់ពិសោធន៍របស់ សាកលវិទ្យាល័យ Johns Hopkins បានចែករំលែករូបថតដែលហួសពីការរំពឹងទុករបស់នាង។
សូមទស្សនាវីដេអូដែលបង្ហាញអំពីការបុកគ្នារវាងយានអវកាស DART និងអាចម៍ផ្កាយ Dimorphos ៖
September 27, 2022
ឱកាសបុណ្យភ្ជុំបិណ្ឌ ០៣ ថ្ងៃ កម្ពុជា ទទួលបានភ្ញៀវសរុបជាង ១.២ លាននាក់
កម្ពុជា ទទួលបានភ្ញៀវសរុបជាង ១ លាន ២ សែននាក់ ក្នុងឱកាសបុណ្យភ្ជុំបិណ្ឌ ចំនួន ០៣ ថ្ងៃ នេះបើតាម ក្រសួងទេសចរណ៍។
ពិធីបុណ្យភ្ជុំបិណ្ឌប្រពៃណីជាតិ ដែលមានរយៈពេល ០៣ កន្លងទៅនេះ កម្ពុជា ទទួលបានទេសចរសរុបជាង ១.២ លាននាក់ ចាប់ពីថ្ងៃទី ២៤ ដល់ថ្ងៃទី ២៦ ខែកញ្ញា ឆ្នាំ ២០២២ ក្នុងនោះ ខេត្តបាត់ដំបង សៀមរាប និង ប៉ៃលិន ទទួលបានភ្ញៀវច្រើនជាងគេ។
យោងតាម ក្រសួងទេសចរណ៍ ក្នុងចំណោមភ្ញៀវសរុបទូទាំងប្រទេសដែលមាន ១,២៥៩,១២១ នាក់ មានភ្ញៀវជាតិចំនួន ១,២៤៤,៦៤២ នាក់ និងភ្ញៀវបរទេសផ្ទៃក្នុងចំនួន ១៤,៤៧៩ នាក់។
ក្នុងរយៈពេល ០៣ ថ្ងៃនេះ ខេត្តដែលទទួលបានភ្ញៀវច្រើនជាងគេបង្អស់គឺខេត្ត បាត់ដំបង ដោយមានភ្ញៀវប្រមាណជាជាង ២១០,០០០ នាក់។ ខេត្តសៀមរាប ជាប់លេខ ២ ដោយមានភ្ញៀវ ១៤៣,៤៧០ នាក់ និង ខេត្តកែប ជាប់ចំណាត់ថ្នាក់លេខ ៣ (១១៦,៧៧៦ នាក់)។
September 27, 2022
ទិដ្ឋភាពរួមនឹងពិធីតម្កល់ធាតុរបស់អតីតនាយករដ្ឋមន្ត្រីជប៉ុន លោក ស្ហីនហ្សូ អាបេ
ពិធីបូជាសព និងតម្កល់ធាតុរបស់ អតីតនាយករដ្ឋមន្ត្រីជប៉ុន លោក ស្ហីនហ្សូ អាបេ គឺជាព្រឹត្តិការណ៍ធំដំបូងដែលត្រូវបានធ្វើឡើងបន្ទាប់ពី ជប៉ុន ចាប់ផ្ដើមអនុវត្តគោលការណ៍សន្តិសុខថ្មី ក្រោយពីករណីឃាតកម្មលើលោក អាបេ។ ប៉ូលិសរាប់ម៉ឺននាក់ត្រូវបានដាក់ពង្រាយនៅក្នុង រាជធានីតូក្យូ ដើម្បីបង្កើនសកម្មភាពថែរក្សាសន្តិសុខ។
លោក ស្ហីនហ្សូ អាបេ អាយុ ៦៧ ឆ្នាំ ជាអតីតនាយករដ្ឋមន្ត្រីកាន់អំណាចយូរជាងគេនៅ ជប៉ុន ត្រូវបានធ្វើឃាតកាលពីថ្ងៃទី ០៨ កក្កដា ពេលកំពុងថ្លែងការណ៍ទៅកាន់ប្រជាពលរដ្ឋនៅក្នុងទីក្រុង Nara ភាគខាងលិចនៃប្រទេសជប៉ុន។
ពិធីបូជាសព និងតម្កល់ធាតុរបស់ អតីតនាយករដ្ឋមន្ត្រីជប៉ុន លោក ស្ហីនហ្សូ អាបេ ចាប់ផ្ដើមនៅវេលាម៉ោង ១៤ ថ្ងៃនេះ (ម៉ោង ១២ នៅ កម្ពុជា) នៅឯសាលប្រកួតក្បាច់គុន Nippon Budokan ក្នុង រាជធានីតូក្យូ ដោយមានការចូលរួមពីភ្ញៀវប្រមាណ ៤,៣០០ នាក់។
ខាងក្រោមនេះគឺជាទិដ្ឋភាពខ្លះៗស្ដីពីពិធីតម្កល់ធាតុរបស់ អតីតនាយករដ្ឋមន្ត្រីជប៉ុន លោក ស្ហីនហ្សូ អាបេ ៖
រថយន្តដង្ហែធាតុអតីតនាយករដ្ឋមន្ត្រីជប៉ុន លោក ស្ហីនហ្សូ អាបេ ទៅកាន់សាលប្រកួតក្បាច់គុន Nippon Budokan ក្នុង រាជធានីតូក្យូ នាថ្ងៃនេះ
លោកស្រី Akie Abe កាន់ធាតុរបស់ អតីតនាយករដ្ឋមន្ត្រីជប៉ុន លោក ស្ហីនហ្សូ អាបេ ចូលមកកាន់កន្លែងប្រារព្ធពិធីតម្កល់ធាតុ
ធាតុរបស់អតីតនាយករដ្ឋមន្ត្រីជប៉ុន លោក ស្ហីនហ្សូ អាបេ ត្រូវបានតម្កល់លើទីសម្រាប់តម្កល់ធាតុ
ទិដ្ឋភាពខាងក្នុងសាលប្រកួតក្បាច់គុន Nippon Budokan ជាទីប្រារព្ធពិធីតម្កល់ធាតុរបស់អតីតនាយករដ្ឋមន្ត្រីជប៉ុន លោក ស្ហីនហ្សូ អាបេ
ភ្ញៀវចូលរួមកំពុងគោរពវិញ្ញាណក្ខន្ធអតីតនាយករដ្ឋមន្ត្រីជប៉ុន លោក ស្ហីនហ្សូ អាបេ
អនុប្រធានាធិបតីអាម៉េរិក លោកស្រី Kamala Harris ក៏ចូលរួមក្នុងព្រឹត្តិការណ៍នេះ
ការបញ្ចាំងវីដេអូនៅ សាលប្រកួតក្បាច់គុន Nippon Budokan ដែលនិយាយអំពីអតីតនាយករដ្ឋមន្ត្រីជប៉ុន លោក ស្ហីនហ្សូ អាបេ
ការបញ្ចាំងវីដេអូនៅ សាលប្រកួតក្បាច់គុន Nippon Budokan ដែលនិយាយអំពីអតីតនាយករដ្ឋមន្ត្រីជប៉ុន លោក ស្ហីនហ្សូ អាបេ
នាយករដ្ឋមន្ត្រីជប៉ុន Fumio Kishida អានសេចក្ដីថ្លែងការណ៍ក្នុងពិធីតម្កល់សពអតីតនាយករដ្ឋមន្ត្រីជប៉ុន លោក ស្ហីនហ្សូ អាបេ
លោកស្រី Akie Abe ជូតទឹកភ្នែក នៅពេលក្រុមមន្ត្រីថ្លែងរៀបរាប់អំពីស្វាមី
អតីតនាយករដ្ឋមន្ត្រី Suga អានសុន្ទរកថា
រាជទាយាទ Akishino (ទីពីរ រាប់ពីឆ្វេង) និង ព្រះនាង Kiko ជា មហេសី (ទីបី រាប់ពីឆ្វេង) របស់ ជប៉ុន យាងចូលរួមពិធីតម្កល់សព
លោកស្រី Akie Abe ដាក់កម្រផ្កាជូនស្វាមីជាលើកចុងក្រោយ
ក្រុមមន្ត្រីជាន់ខ្ពស់បរទេស ដាក់កម្រងផ្កាជូនលោក អាបេ
ក្រុមមន្ត្រីជាន់ខ្ពស់បរទេស ដាក់កម្រងផ្កាជូនលោក អាបេ
ក្រុមមន្ត្រីជាន់ខ្ពស់បរទេស ដាក់កម្រងផ្កាជូនលោក អាបេ
September 27, 2022
ក្រសួងសាធារណការ និងដឹកជញ្ជូន ចេញសេចក្តីជូនដំណឹង ស្តីពី ការអនុញ្ញាតឱ្យប្រើប្រាស់សាកល្បងផ្លូវល្បឿនលឿនភ្នំពេញ-ក្រុងព្រះសីហនុ
ក្រសួងសាធារណការ និងដឹកជញ្ជូន ចេញសេចក្តីជូនដំណឹង ស្តីពី ការអនុញ្ញាតឱ្យប្រើប្រាស់សាកល្បងផ្លូវល្បឿនលឿនភ្នំពេញ-ក្រុងព្រះសីហនុ ដោយឥតគិតថ្លៃរយៈពេល ១ ខែ គិតចាប់ពីថ្ងៃទី ០១ ដល់ថ្ងៃ ៣១ ខែតុលា ឆ្នាំ ២០២២។
September 27, 2022
នេះគឺជា «រាជាណាចក្រ» តែមួយគត់របស់ ប្រទេសឥណ្ឌូណេស៊ី
ដោយសារតែបានរួមចំណែកយ៉ាងធំធេងនៅក្នុងសង្គ្រាមដណ្ដើមឯករាជ្យ Yogyakarta ក៏ទទួលបានសិទ្ធិស្វ័យគ្រប់គ្រង និងក្លាយជា «រាជាណាចក្រអ៊ីស្លាម» តែមួយគត់នៅ ឥណ្ឌូណេស៊ី។
Yogyakarta ដែលជាខេត្តមួយនៅភាគកណ្ដាលនៃកោះជ្វា (Java) និងមានចម្ងាយពី រដ្ឋធានីហ្សាការតា ជាង ៤២០ គីឡូម៉ែត្រទៅទិសខាងត្បូង ដើរតួនាទីសំខាន់ក្នុងការទាមទារឯករាជ្យរបស់ ឥណ្ឌូណេស៊ី ដែលត្រូវបានហៅថា បដិវត្តន៍ជាតិឥណ្ឌូណេស៊ី ចាប់ពីឆ្នាំ ១៩៤៥ ដល់ ១៩៤៩។
កាលពីថ្ងៃទី ១៧ ខែសីហា ឆ្នាំ ១៩៤៥ នៅពេលដែលប្រធានាធិបតីដំបូងរបស់ ឥណ្ឌូណេស៊ី Sukarno ប្រកាសបង្កើត សាធារណរដ្ឋឥណ្ឌូណេស៊ី Sultan (ស្ដេចរបស់ប្រទេសកាន់សាសនាអ៊ីស្លាម) Hamengkubuwono IX ដែលជាមេដឹកនាំរបស់ រាជាណាចក្រអ៊ីស្លាម Yogyakarta កាលណោះ បានផ្ញើសារលិខិតភ្លាមៗទៅកាន់លោក Sukarno ដើម្បីសម្ដែងការគាំទ្រចំពោះ ប្រទេសឥណ្ឌូណេស៊ី ដែលទើបចាប់កំណើត និងបញ្ជាក់ថា រាជាណាចក្រអ៊ីស្លាម Yogyakarta គឺជាទឹកដីមួយផ្នែករបស់ សាធារណរដ្ឋឥណ្ឌូណេស៊ី។
ទីក្រុង Yogyakarta ក្លាយជារដ្ឋធានីរបស់ សាធារណរដ្ឋឥណ្ឌូណេស៊ី ចាប់ពីឆ្នាំ ១៩៤៦ ដល់ឆ្នាំ ១៩៤៨ ក្រោយពី ហ្សាការតា បានធ្លាក់ក្នុងកណ្ដាប់ដៃរបស់ជនជាតិហូឡង់។ កងទ័ពហូឡង់ បន្ទាប់មកក៏បានចូលឈ្លាមពាន Yogyakarta បណ្ដាលឱ្យរដ្ឋានីរបស់ប្រទេសនេះ ជាថ្មីម្ដងទៀត ត្រូវរើទៅកាន់ Bukittinggi នៅភាគខាងលិចនៃកោះ Sumatra។
រាជវាំង Yogyakarta
ការវាយលុកទូទៅកាលពីដើមឆ្នាំ ១៩៤៩ របស់ ឥណ្ឌូណេស៊ី បានបង្ខំឱ្យ កងទ័ពហូឡង់ ត្រូវដកថយ។ ថ្ងៃទី ២៩ មិថុនា ១៩៤៩ ដោយមានសម្ពាធពី អង្គការសហប្រជាជាតិ Yogyakarta ក៏ត្រូវបានរំដោះទាំងស្រុងពីកណ្ដាប់ដៃជនជាតិហូឡង់។
ដោយសារតែបានរួមចំណែកយ៉ាងធំធេងក្នុងបេសកកម្មស្លាប់រស់របស់ សាធារណរដ្ឋឥណ្ឌូណេស៊ី Yogyakarta ក៏ទទួលបានសិទ្ធិស្វ័យគ្រប់គ្រង ដែលដូចទៅនឹង «តំបន់ពិសេស» និងក្លាយជាតំបន់តែមួយគត់ដែលរក្សារបបរាជានិយម និងត្រូវបានទទួលស្គាល់នៅ ឥណ្ឌូណេស៊ី។
សម្ដេច Hamengkubawono ទី ១០
មហាក្សត្ររបស់ រាជាណាចក្រអ៊ីស្លាម Yogyakarta បច្ចុប្បន្នគឺ សម្ដេច Hamengkubawono ទី ១០ ព្រះជន្ម ៧៦ វស្សា។ ទ្រង់បានឡើងគ្រងរាជសម្បត្តិកាលពីឆ្នាំ ១៩៨៨ បន្ទាប់ពីបិតារបស់ទ្រង់បានសោយទិវង្គត។
មហាក្សត្រ Hamengkubawono ទី ១០ ត្រូវបានវាយតម្លៃថា ជាអ្នកប្រជាធិបតេយ្យ នៅពេលទ្រង់បញ្ចប់ប្រពៃណីពហុពន្ធភាព (មហេសីច្រើន) ទៅតាមបំណងរបស់បិតា ដែលទ្រង់ធ្លាប់មានបន្ទូលឱ្យធ្វើទំនើបកម្មរាជវង្សានុវង្ស។ មហាក្សត្រ Hamengkubawono ទី ១០ បានរៀបអភិសេកជាមួយមហេសី Hemas និងមានបុត្រី ៥ អង្គ។ បុត្រីច្បង ព្រះនាង Mangkubumi អាចនឹងក្លាយជាមហាក្សត្រីបន្ទាប់របស់ Yogyakarta ប៉ុន្តែ បញ្ហានេះក៏កំពុងមានភាពចម្រូងចម្រាសនៅក្នុងរាជវង្សានុវង្ស ព្រោះតែទ្រង់មិនមែនជារាជបុត្រា។
មហាក្សត្រ Hamengkubawono ទី ១០ និង មហេសី រួមនឹងបុត្រី ៥ អង្គ
មហាក្សត្រ Hamengkubawono ទី ១០ របស់ Yogyakarta ធ្លាប់មានបន្ទូលថា រាជបុត្រីមួយអង្គអាចក្លាយជាមេដឹកនាំបន្ទាប់ ហើយថា ទ្រង់កំពុងពិចារណាលើបញ្ហានេះដើម្បីលើកកម្ពស់សិទ្ធិរបស់ស្ត្រីភេទ ប៉ុន្តែ ព្រះនាង Mangkubumi នឹងត្រូវឆ្លើយតបនឹងលក្ខខណ្ឌមួយចំនួនដើម្បីអាចឡើងសោយរាជសម្បត្តិ៕
September 27, 2022
ស្ថានភាពជំងឺកូវីដ-១៩ នៅ កម្ពុជា ប្រកាសនៅក្នុងថ្ងៃទី ២៧ ខែកញ្ញា ២០២២
កម្ពុជា រកឃើញអ្នកឆ្លងកូវីដ-១៩ ករណីថ្មី ចំនួន ០៧ នាក់ ក្នុងអំឡុង ២៤ ម៉ោង នៃថ្ងៃទី ២៦ ខែកញ្ញា ឆ្នាំ ២០២២។
ក្នុងអំឡុងពេលដដែល ក៏មានអ្នកជំងឺកូវីដ-១៩ ចំនួន ០៩ នាក់បានជាសះស្បើយ និង មិនមានករណីស្លាប់ថ្មី ដោយសារជំងឺនេះនៅឡើយ។
September 27, 2022