សឿន សំណាង - La Reine Media

ប្រទេសចិន បើកការដ្ឋានសាងសង់បណ្ដាញបំពង់បង្ហូរឧស្ម័នថ្មី ដើម្បីធានាសន្តិសុខថាមពល

បណ្ដាញបំពង់បង្ហូរឧស្ម័នថ្មីនេះ នឹងតភ្ជាប់តំបន់ភាគពាយព្យប្រទេសចិន ទៅកាន់តំបន់ស្វយ័ត Ningxia Hui នៅភាគកណ្ដាលនៃតំបន់ខាងជើងរបស់ប្រទេសនេះ។

នាថ្ងៃទី ២៨ កញ្ញានេះ ប្រទេសចិន បានសម្ពោធបើកការដ្ឋានសាងសង់បណ្ដាញបំពង់បង្ហូរឧស្ម័នទី ៤ ក្នុងក្របខណ្ឌនៃគម្រោងបណ្ដាញបំពង់បង្ហូរថាមពលខ្នាតយក្ស ដែលបង្ហូរឧស្ម័នធម្មជាតិពីភាគខាងលិច ទៅកាន់ភាគខាងកើតប្រទេសនេះ។

ដោយមានប្រវែងសរុប ៣,៣៤០ គីឡូម៉ែត្រ បណ្ដាញបំពង់បង្ហូរឧស្ម័នថ្មីនេះ ចាប់ផ្ដើមភ្ជាប់ពីស្រុក Wuqia នៃតំបន់ស្វយ័ត Xinjiang នៅភាគពាយព្យប្រទេសចិន ទៅកាន់ទីក្រុង Zhongwei ក្នុងតំបន់ស្វយ័ត Ningxia Hui នៅភាគកណ្ដាលនៃតំបន់ខាងជើងរបស់ ប្រទេសចិន។

ប្រធានក្រុមប្រឹក្សាភិបាលរបស់ក្រុមហ៊ុនបណ្ដាញបំពង់បង្ហូរប្រេង និងឧស្ម័នចិន (China Oil & Gas Piping Network Corporation) លោក Zhang Wei បានឱ្យដឹងថា ក្រោយពីសាងសង់រួចរាល់ បណ្ដាញបំពង់បង្ហូរឧស្ម័ននេះនឹងជួយឱ្យការបង្ហូរឧស្ម័នរបស់គម្រោងបណ្ដាញបំពង់បង្ហូរខ្នាតយក្សនេះ ឡើងដល់ ១០០ ពាន់លានម៉ែត្រគុប/ឆ្នាំ។

លោក Zhang Wei បញ្ជាក់ថា ក្រុមហ៊ុននេះកំពុងជំរុញការស្ថាបនាបណ្ដាញបំពង់បង្ហូរប្រេង និងឧស្ម័ននៅ ប្រទេសចិន ដើម្បីធានាសន្តិសុខថាមពលសម្រាប់ប្រទេសនេះ៕

September 28, 2022

មហាសេដ្ឋីឥណ្ឌា Adani ៖ ប្រទេសចិន មានហានិភ័យត្រូវគេ «ដាក់ឱ្យនៅឯកា» ខណៈ ឥណ្ឌា ឆ្ពោះទៅរកតំណែងជាសេដ្ឋកិច្ចធំទី ៣ ក្នុងពិភពលោក

មហាសេដ្ឋី Gautam Adani យល់ថា ប្រទេសចិន អាចនឹងត្រូវបានគេដាក់ឱ្យឯកាកាន់តែខ្លាំង ក្នុងពេលដែល ឥណ្ឌា ស្ថិតនៅចំពោះមុខក្ដីសង្ឃឹម បើទោះជាមានឧបសគ្គដែលកើតឡើងដោយសារសង្គ្រាម បម្រែបម្រួលអាកាសធាតុ និងអតិផរណា។

ថ្លែងនៅក្នុងសន្និសីទ CEO សកលរបស់ Forbes នៅ សិង្ហបុរី កាលពីថ្ងៃទី ២៧ កញ្ញា លោក Adani ដែលជាកំពូលអ្នកមានម្នាក់ក្នុងចំណោមកំពូលមហាសេដ្ឋី ៣ រូបរបស់ពិភពលោក យល់ថា ការកើនឡើងនៃលទ្ធិជាតិនិយម បណ្ដាវិធានការកាត់បន្ថយហានិភ័យសម្រាប់បណ្ដាញផ្គត់ផ្គង់ និងការមានកំណត់អំពីបច្ចេកវិទ្យានៅ ប្រទេសចិន អាចនឹងប៉ះពាល់ដល់សមត្ថភាពនៃការតភ្ជាប់របស់ប្រទេសនេះជាមួយនឹងបណ្ដាប្រទេស។

ទន្ទឹមនឹងនេះ ហានិភ័យកើនឡើងចំពោះសកម្មភាពឥណទាន និងទីផ្សារអចលនទ្រព្យនៅក្នុងប្រទេសដែលជាខឿនសេដ្ឋកិច្ចធំលំដាប់ទី ២ ក្នុងពិភពលោកនេះ ក៏កំពុងកើតមានឡើងដូចទៅនឹងបញ្ហាដែល ជប៉ុន បានជួបប្រទះដោយសារបញ្ហាអតិផរណាអូសបន្លាយពេលយូរកាលពីអំឡុងទសវត្សរ៍ឆ្នាំ ១៩៩០។

យោងតាមលោក Adani ឧបសគ្គធំមួយផ្សេងទៀតចំពោះ ចិនដីគោក នោះគឺ គំនិតផ្ដួចផ្ដើម «ខ្សែក្រវាត់ និងផ្លូវ» (BRI) ដែលជាមហាគម្រោងបង្ហាញអំពីមហិច្ឆតាសកលរបស់ ទីក្រុងប៉េកាំង ក៏បាន និងកំពុងជួបបញ្ហាជាច្រើន។

មហាសេដ្ឋី Gautam Adani ជាប់ចំណាត់ថ្នាក់លេខ ៣ ស្ដីពីមហាសេដ្ឋីមានទ្រព្យច្រើនជាងគេក្នុងពិភពលោក (តួលេខគិតជាពាន់លានដុល្លារអាម៉េរិក)

បច្ចុប្បន្ន BRI កំពុងប្រឈមនឹងបញ្ហាមួយចំនួន មានដូចជា កង្វះប្រភពហិរញ្ញវត្ថុ ការយឺតយ៉ាវរបស់គម្រោងមួយចំនួនដោយសារកត្តានយោបាយ ការព្រួយបារម្ភអំពីបំណុល និងឥទ្ធិពលរបស់ ចិនដីគោក ជាដើម។ លោក Adani ថ្លែងថា «ខ្ញុំព្យាករថា ប្រទេសចិន ដែលត្រូវបានគេចាត់ទុកថាជាជើងឯកខាងសកលភាវូបនីយកម្ម នឹងកាន់តែមានអារម្មណ៍ថា ត្រូវគេដាក់ឱ្យនៅឯកា»។

បើទោះជាលើកឡើងនូវមតិដោយត្រង់ៗអំពីសេដ្ឋកិច្ចរបស់ មហាអំណាចចិន ដូចខាងលើ ប៉ុន្តែ កំពូលអ្នកមាននៅ ឥណ្ឌា រូបនេះ នៅតែសម្ដែងការជឿជាក់ថា សេដ្ឋកិច្ចសកលនឹងត្រូវបានកែលំអ និងប្រសើរឡើងទៅតាមពេលវេលា៕

September 28, 2022

មហាសេដ្ឋី Bill Gates ព្រមានអំពីហានិភ័យកើតមានសង្គ្រាមស៊ីវិលនៅ សហរដ្ឋអាម៉េរិក

មហាសេដ្ឋីអាម៉េរិក លោក Bill Gates បានសម្ដែងការព្រួយបារម្ភខ្លាំងចំពោះការរើសអើងផ្នែកនយោបាយនៅ សហរដ្ឋអាម៉េរិក ហើយថា វានឹងនាំទៅរកសង្គ្រាមស៊ីវិលនៅពេលអនាគត។

ជាធម្មតា លោក Bill Gates ត្រូវបានគេស្គាល់ថាជាបុគ្គលដែលសកម្មក្នុងកិច្ចការមនុស្សធម៌ ជាអ្នកដែលផ្ដោតទៅលើការងារប្រយុទ្ធប្រឆាំងនឹងភាពក្រីក្រ និងជំងឺឆ្លង តាមរយៈមូលនិធិមនុស្សធម៌របស់លោក។ ប៉ុន្តែ បញ្ហាមួយទៀតដែលលោកចាប់អារម្មណ៍ខ្លាំងដែរ នោះគឺការរើសអើងផ្នែកនយោបាយនៅ សហរដ្ឋអាម៉េរិក។

«ខ្ញុំទទួលស្គាល់ថា ការរើសអើងនយោបាយអាចបញ្ចប់គ្រប់យ៉ាង។ យើងអាចមានការបោះឆ្នោតមួយដែលមិនមានអ្នកឈ្នះ អ្នកចាញ់ ឬសង្គ្រាមស៊ីវិល» មហាសេដ្ឋី Bill Gates ថ្លែងនៅក្នុងសន្និសីទមនុស្សធម៌របស់ Forbes 400 ក្នុងឆ្នាំនេះ។

លោក Gates បញ្ជាក់ថា ការរើសអើងនយោបាយដើរទន្ទឹមគ្នាជាមួយនឹងបញ្ហាមួយ នោះគឺការផ្សព្វផ្សាយព័ត៌មានមិនពិត។ លោកថ្លែងប្រាប់ Forbes ថា «ការរើសអើង និងកង្វះភាពជឿជាក់គឺជាបញ្ហាមួយ។ សៀវភៅមួយក្បាលក្នុងចំណោមសៀវភៅលក់ដាច់ជាងគេរបស់ Robert Kennedy និយាយថា ខ្ញុំចូលចិត្តរកប្រាក់ និងសម្លាប់មនុស្សរាប់លាននាក់ដោយវ៉ាក់សាំង។ ពិតជាគួរឱ្យភ្ញាក់ផ្អើលនៅពេលសៀវភៅនោះលក់ដាច់»។ សហស្ថាបនិករបស់ Microsoft ក៏បានលើកឡើងថា លោកនឹងមិនវិនិយោគទៅលើវិស័យទាំងឡាយណាដែលបង្កអស្ថិរភាព។

ក្នុងប៉ុន្មានឆ្នាំកន្លងមកនេះ Bill Gates និងអតីតភរិយា Melinda French Gates បានបរិច្ចាគប្រាក់រាប់ពាន់លានដុល្លារសម្រាប់ការស្រាវជ្រាវ អភិវឌ្ឍ និងចែកចាយវ៉ាក់សាំង តាមរយៈមូលនិធិមនុស្សធម៌របស់ពួកគេ។ មហាសេដ្ឋីរូបនេះធ្លាប់ក្លាយជាប្រធានបទនៃទ្រីស្ដីបកស្រាយ ឬទ្រីស្ដីឃុបឃិតមួយចំនួនដែលនិយាយថា លោកបំពាក់បច្ចេកវិទ្យានៅក្នុងវ៉ាក់សាំងដើម្បីតាមដានមនុស្ស។

នៅក្នុងការជជែកជាមួយ Forbes លោក Gates ក៏បានឱ្យដឹងថា លោក និងអតីតភរិយា Melinda សង្ឃឹមថា នឹងរក្សាមូលនិធិមនុស្សធម៌របស់ពួកគេឱ្យដំណើរការ ២៥ ឆ្នាំទៀត ដើម្បីផ្ដោតទៅលើដំណោះស្រាយសម្រាប់បញ្ហាជំងឺឆ្លង៕

September 28, 2022

Nissan ពិនិត្យលទ្ធភាពក្នុងការចូលរួមបង្កើតក្រុមហ៊ុនរថយន្តអគ្គិសនីជាមួយ Renault

ក្រុមហ៊ុនបណ្ដាក់ទុនរួមគ្នាថ្មីមួយរបស់ Nissan Motor, Groupe Renault និង Mitsubishi Motor នឹងបង្ហាញវត្តមានក្នុងទីផ្សាររថយន្តអគ្គិសនីនាពេលឆាប់ៗខាងមុខ។

ប្រធាន និងជានាយកប្រតិបត្តិរបស់ក្រុមហ៊ុនផលិតរថយន្តជប៉ុន Nissan Motor លោក Makoto Uchida បានឱ្យដឹងថា នឹងពិនិត្យលទ្ធភាពក្នុងការចូលរួមបង្កើតក្រុមហ៊ុនផលិតរថយន្តអគ្គិសនីជាមួយនឹង Renault ដែលជាក្រុមហ៊ុនផលិតរថយន្តរបស់ បារាំង។

ក្រុមហ៊ុន Renault ប្រកាសថា នឹងកែប្រែផ្នែកផលិតរថយន្តអគ្គិសនី (EV) របស់ខ្លួនទៅជាក្រុមហ៊ុនមួយដាច់ដោយឡែក។ ក្រុមហ៊ុនផលិតរថយន្តរបស់ បារាំង មួយនេះ មានគម្រោងដាក់ក្រុមហ៊ុនថ្មីឡើងផ្សារហ៊ុននៅក្នុងឆ្នាំក្រោយ។

Renault បានស្នើឱ្យដៃគូសហការរបស់ខ្លួនគឺ Nissan និង Mitsubishi Motor ចូលរួមបង្កើតក្រុមហ៊ុនថ្មីជាមួយគ្នា និងបានពិភាក្សាអំពីការវិនិយោគរួម។ កាលពីដើមឆ្នាំ ២០២២ ក្រុមហ៊ុនបណ្ដាក់ទុនរួមគ្នានេះបានប្រកាសថា នឹងបញ្ចេញរថយន្តអគ្គិសនីចំនួន ៣៥ ម៉ូដែលនៅឆ្នាំ ២០៣០។

Nissan ធ្វើសកម្មភាពភាគច្រើននៅក្នុងទីផ្សារ សហរដ្ឋអាម៉េរិក ជប៉ុន និង ចិនដីគោក។ ដូច្នេះ ក្រុមហ៊ុននេះត្រូវប្រឈមនឹងកម្រិតនៃភាពបន្ទាន់ខុសៗគ្នាក្នុងការឆ្លើយតបនឹងតម្រូវការរថយន្តអគ្គិសនី។ ក្រៅពីនេះ ក្រុមហ៊ុនបណ្ដាក់ទុនរួមគ្នាថ្មីរបស់ Nissan, Renault និង Mitsubishi ក៏ត្រូវបានស្នើឱ្យដាក់ការិយាល័យកណ្ដាលនៅ ប្រទេសបារាំង ដែលនេះមានន័យថា សកម្មភាពចម្បងរបស់ពួកគេ នឹងផ្ដោតទៅលើទីផ្សារអឺរ៉ុប៕

September 28, 2022

ក្រុមមហាសេដ្ឋីដែលមានទ្រព្យច្រើនជាងគេនៅ សហរដ្ឋអាម៉េរិក ឆ្នាំ ២០២២ ៖ Elon Musk គ្មានគូប្រជែង ខណៈ Mark Zuckerberg ចាកចេញពី «top 10» ជាលើកដំបូង

ក្រុមមហាសេដ្ឋី ២០ រូបដែលមានទ្រព្យច្រើនជាងគេបង្អស់នៅ សហរដ្ឋអាម៉េរិក ឆ្នាំ ២០២២ បានបាត់បង់ប្រាក់អស់ ២៣៥ ពាន់លានដុល្លារ ធៀបនឹងឆ្នាំកន្លង ដោយភាគច្រើនបណ្ដាលមកពីសម្ពាធរបស់អតិផរណា និងទីផ្សារមូលបត្រដាំក្បាលចុះ។

យោងតាមការស្រាវជ្រាវមួយ និងការប្រមូលទិន្នន័យរបស់ទស្សនាវដ្ដី Forbes ក្រុមអ្នកមានជាងគេ ២០ រូបនៅ សហរដ្ឋអាម៉េរិក ក្នុងឆ្នាំ ២០២២ មានទ្រព្យសុទ្ធសរុប ១.៦ ទ្រីលាន (១,៦០០,០០០,០០០,០០០) ដុល្លារអាម៉េរិក ថយចុះ ២៣៥ ពាន់លានដុល្លារធៀបនឹងឆ្នាំកន្លង។

អាចនិយាយបានថា មហាសេដ្ឋីដែលបាត់បង់ទ្រព្យច្រើនជាងគេបំផុតក្នុងចំណោមមហាសេដ្ឋីកំពូលៗនៅ សហរដ្ឋអាម៉េរិក នាឆ្នាំនេះ គឺ Mark Zuckerberg ម្ចាស់ Meta Platforms (ក្រុមហ៊ុនមេរបស់ Facebook)។

Zuckerberg បានបាត់បង់ទ្រព្យប្រហែល ៥៧% ស្មើនឹង ៧៤ ពាន់លានដុល្លារអាម៉េរិក រាប់ចាប់តាំងពីដើមឆ្នាំនេះ។ ប្រការនេះបានធ្វើឱ្យម្ចាស់ Facebook ត្រូវខ្ទាតចេញពីបញ្ជីឈ្មោះកំពូលមហាសេដ្ឋីទាំង ១០ របស់ សហរដ្ឋអាម៉េរិក ជាលើកដំបូង គិតចាប់ពីឆ្នាំ ២០១៤។ មហាសេដ្ឋីបច្ចេកវិទ្យា ៨ រូបផ្សេងទៀត រួមមានទាំង Bill Gates, Larry Page និង Sergey Brin ជាដើម បានបាត់បង់ទ្រព្យសរុប ១៨៨ ពាន់លានដុល្លារអាម៉េរិក។

មហាសេដ្ឋី ៤ រូប ក្នុងចំណោមអ្នកមានជាងគេ ២០ រូបនៅ សហរដ្ឋអាម៉េរិក នាឆ្នាំនេះ មានទ្រព្យសុទ្ធតម្លៃចាប់ពី ១០០ ពាន់លានដុល្លារ។ តួលេខនេះថយចុះពាក់កណ្ដាលធៀបនឹង ៨ រូបក្នុងឆ្នាំកន្លង ប៉ុន្តែ កើនឡើងធៀបនឹង ២ រូបកាលពីឆ្នាំ ២០២០ និងគ្មានម្នាក់សោះក្នុងឆ្នាំ ២០១៧។

ពុំមានអ្នកណាម្នាក់អាចលោតរំលង Elon Musk ដែលជានាយកប្រតិបត្តិរបស់ក្រុមហ៊ុនផលិតរថយន្តអគ្គិសនី Tesla និង SpaceX ដែលឡើងមកនាំមុខគេក្នុងបញ្ជីចំណាត់ថ្នាក់មហាសេដ្ឋី ៤០០ រូបដែលមានទ្រព្យច្រើនជាងគេនៅ សហរដ្ឋអាម៉េរិក។

មហាសេដ្ឋីអាម៉េរិកដើមកំណើតអាហ្វ្រិកខាងត្បូង Elon Musk មានទ្រព្យសរុប ២៥១ ពាន់លានដុល្លារ កើន ៦០.៥ ពាន់លានដុល្លារធៀបនឹងឆ្នាំកន្លង ដោយសារភាគហ៊ុន Tesla ឡើងថ្លៃ ១១% ខណៈដែល SpaceX ត្រូវបានកំណត់តម្លៃរហូតដល់ ១២៧ ពាន់លានដុល្លារអាម៉េរិក។

បច្ចុប្បន្ន កំពូលមហាសេដ្ឋី Elon Musk មានទ្រព្យច្រើនជាង Jeff Bezos ម្ចាស់ Amazon រហូតដល់ជាង ១០០ ពាន់លានដុល្លារអាម៉េរិក៕

September 28, 2022

ជាង ៤០% នៃពលរដ្ឋសិង្ហបុរី គាំទ្រចំពោះការហាមឃាត់រថយន្តម៉ាស៊ីនប្រេងសាំង

ក្រុមហ៊ុនផលិតរថយន្តស៊ុយអែត Polestar បានធ្វើការស្ទង់មតិមួយនៅក្នុងទីផ្សារនានាស្ដីពីនិន្នាការចង់ឱ្យមានការហាមឃាត់ការប្រើប្រាស់រថយន្តចំហេះក្នុងរបស់ពលរដ្ឋនៃបណ្ដាប្រទេស។ លទ្ធផលបានបង្ហាញថា នៅ សិង្ហបុរី មានពលរដ្ឋរហូតដល់ ៤២% គាំទ្រចំពោះការហាមឃាត់ការប្រើប្រាស់រថយន្តចំហេះក្នុងនៅឆ្នាំ ២០៣០ ឬឆាប់ជាងនេះ។ ប្រការនេះបង្ហាញថា ពលរដ្ឋសិង្ហបុរី ហាក់កំពុងត្រេកអរក្នុងការទទួលយករថយន្តអគ្គិសនី។

ក្រុមហ៊ុនផលិតរថយន្តអគ្គិសនីលំដាប់ប្រណិតរបស់ ស៊ុយអែត បានបង្ហើបឱ្យដឹងអំពីរបកគំហើញរបស់ខ្លួនដែលបង្ហាញនូវតម្រូវការខ្ពស់របស់អ្នកប្រើប្រាស់ចំពោះការងាកទៅរករថយន្តអគ្គិសនី។ ការស្រាវជ្រាវទូទាំងសកលលោករបស់ Polestar ត្រូវបានធ្វើឡើងចំពោះមនុស្ស ១៨ ពាន់នាក់នៅក្នុងទីផ្សារចំនួន ១៩ នៅ អាម៉េរិកខាងជើង, អឺរ៉ុប និង អាស៊ីប៉ាស៊ីហ្វិក។

លទ្ធផលបង្ហាញថា អ្នកប្រើប្រាស់ ៣៤% គាំទ្រចំពោះការហាមឃាត់រថយន្តចំហេះក្នុង (ICE) នៅឆ្នាំ ២០៣។ តួលេខនេះកើនដល់ ៤៧% ចំពោះរថយន្ត ICE ដែលនឹងហាមឃាត់នៅឆ្នាំ ២០៣៥។ ក្នុងចំណោមអ្នកដែលត្រូវបានសួរ មាន ៧៥% ជឿថា សង្គមត្រូវការគាំទ្រការប្រើប្រាស់រថយន្តអគ្គិសនីដើម្បីរក្សាបរិយាកាស និងបរិស្ថានទុកសម្រាប់មនុស្សជំនាន់ក្រោយ។

កូរ៉េខាងត្បូង ឈរលំដាប់លេខ ១ ដោយមាន ៤៨% គាំទ្រច្បាប់ថ្មីដែលហាមឃាត់រថយន្ត ICE នៅឆ្នាំ ២០៣០ ឬឆាប់ជាងនេះ។ ឈរលំដាប់លេខ ២ និងលេខ ៣ គឺ អង់គ្លេស (៤៤%) និង សិង្ហបុរី (៤២%)។ ឈរលំដាប់បន្តបន្ទាប់ទៀតគឺ អាល្លឺម៉ង់ (៣៧%), ចិនដីគោក (៣៥%), អូស្ត្រាលី (៣៤%), សហរដ្ឋអាម៉េរិក (៣៣%), នូវែលសេឡង់ (២៨%), ន័រវែស (២៧%) និង ហ្វាំងឡង់ (២០%)។

និន្នាការខាងលើកើតឡើងក្នុងគ្រាដែលរថយន្តអគ្គិសនីដែលបរនៅលើដងផ្លូវទូទាំងសកលលោកនាបច្ចុប្បន្ន មានចំនួនតែ ១.៥% ប៉ុណ្ណោះ ក្នុងចំណោមរថយន្តសរុប និងនៅពេលដែលពិភពលោកកំពុងងាកមករកវិស័យថាមពលកកើតឡើងវិញ ដើម្បីជួយដោះស្រាយបញ្ហាបម្រែបម្រួលអាកាសធាតុ និងបញ្ហាបរិស្ថាន។ល។

កាលពីខែមិថុនា ២០២២ ក្រុមប្រឹក្សារដ្ឋមន្ត្រីបរិស្ថានអឺរ៉ុប បានឯកភាពគ្នាថា ដល់ឆ្នាំ ២០៣៥ បណ្ដារថយន្តថ្មីដែលនាំចូលមកទីផ្សារសហភាពអឺរ៉ុប គឺត្រូវតែជារថយន្តដែលមិនបំភាយឧស្ម័ន។ បណ្ដាប្រទេសដទៃដូចជា ជប៉ុន ថៃ អង់គ្លេស និង កាណាដា ជាដើម ក៏បានប្រកាសថា ការប្រើប្រាស់រថយន្តចំហេះក្នុងនឹងត្រូវបានហាមឃាត់ចាប់ពីឆ្នាំ ២០៣៥។ ក្រុមហ៊ុនផលិតរថយន្ត Audi, Volkswagen, Subaru និង Mazda ជាដើម ក៏បានឱ្យដឹងថា ពួកគេនឹងងាកមកផលិតរថយន្តអគ្គិសនីនៅឆ្នាំដំណាលគ្នានោះ៕

September 28, 2022

ជប៉ុន បង្កើតរោងចក្រដំឡើងរថយន្តនៅ កម្ពុជា ៖ នាយករដ្ឋមន្ត្រី គីស៊ីដា ស្នើឱ្យ កម្ពុជា ជួយគាំទ្រ

នាយករដ្ឋមន្ត្រីជប៉ុន លោក គីស៊ីដា ហ្វូមីអូ បានស្នើឱ្យ កម្ពុជា គាំទ្រក្រុមហ៊ុនរបស់ ជប៉ុន ក្នុងប្រតិបត្តិការធុរកិច្ចនៅ កម្ពុជា នៅពេលក្រុមហ៊ុន Toyota របស់ ជប៉ុន នឹងបង្កើតរោងចក្រនៅទីនេះនាពេលខាងមុខ។

លោក កៅ គឹមហួន រដ្ឋមន្ត្រីប្រតិភូអមនាយករដ្ឋមន្ត្រី បានឱ្យដឹងថា សំណើខាងលើត្រូវបានធ្វើឡើងក្នុងជំនួបពិភាក្សាការងារជាមួយសម្តេចតេជោ ហ៊ុន សែន នៅ រាជធានីតូក្យូ ប្រទេសជប៉ុន នាព្រឹកថ្ងៃទី ២៨ កញ្ញា ២០២២។

ទាក់ទងនឹងគម្រោងបើករោងចក្ររថយន្ត Toyota នៅ កម្ពុជា នេះ ក្រុមប្រឹក្សាអភិវឌ្ឍន៍កម្ពុជា (CDC) កាលពីថ្ងៃទី ៨ ខែកញ្ញា ឆ្នាំ ២០២២ ក៏បានសម្រេចអនុម័តសំណើវិនិយោគក្នុងទំហំទឹកប្រាក់ ៣៦.៧ លានដុល្លារអាម៉េរិក របស់ Toyota (Toyota Tsusho Manufacturing) រួចមកហើយ។ Toyota គ្រោងនឹងបង្កើតរោងចក្រដំឡើងរថយន្តនៅ កម្ពុជា ដើម្បីបំពេញតម្រូវការក្នុងទីផ្សារនេះ ក៏ដូចជាការនាំចេញទៅបរទេស។ គម្រោងរបស់ Toyota ដែលស្ថិតនៅក្នុងតំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ នេះ គ្រោងនឹងផ្ដល់ការងារប្រមាណ ១៥០ កន្លែងដល់ពលរដ្ឋកម្ពុជា។

សម្តេចតេជោ ហ៊ុន សែន និងលោកនាយករដ្ឋមន្ត្រីជប៉ុន គីស៊ីដា ហ្វូមីអូ ក្នុងជំនួបពិភាក្សានា រាជធានីតូក្យូ កាលពីព្រឹកមិញ

September 28, 2022

ស្ថានភាពជំងឺកូវីដ-១៩ នៅ កម្ពុជា ប្រកាសនៅក្នុងថ្ងៃទី ២៨ ខែកញ្ញា ២០២២

កម្ពុជា រកឃើញអ្នកឆ្លងកូវីដ-១៩ ករណីថ្មី ចំនួន ០៥ នាក់ ក្នុងអំឡុង ២៤ ម៉ោង នៃថ្ងៃទី ២៧ ខែកញ្ញា ឆ្នាំ ២០២២។

ក្នុងអំឡុងពេលដដែល ក៏មានអ្នកជំងឺកូវីដ-១៩ ចំនួន ០៦ នាក់បានជាសះស្បើយ និង មិនមានករណីស្លាប់ថ្មី ដោយសារជំងឺនេះនៅឡើយ។

September 28, 2022

ល្អាងភ្នំដែលធ្លាប់ «ឃុំឃាំង» សិស្សថៃច្រើននាក់អស់ជាច្រើនសប្ដាហ៍ ត្រៀមខ្លួនទទួលទេសចរឡើងវិញ

ក្រោយពីព្រឹត្តិការណ៍ជួយសង្គ្រោះក្មេងចំនួន ១២ នាក់ និងគ្រូបង្វឹកបាល់ទាត់ម្នាក់ប្រកបដោយភាពក្ដុកក្ដួលកាលពី ៤ ឆ្នាំមុន ល្អាងភ្នំ Tham Luang នៅ ប្រទេសថៃ បានក្លាយជាទីតាំងទេសចរណ៍ដ៏ទាក់ទាញមួយ ប៉ុន្តែត្រូវបានបិទទ្វារអស់រយៈពេល ២ ឆ្នាំ ដោយសារកូវីដ-១៩។

កាលពី ៤ ឆ្នាំមុន នៅខាងក្រៅល្អាងភ្នំ Tham Luang គឺជាទិដ្ឋភាពដ៏ច្របូកច្របល់ដោយមានមនុស្សរាប់ពាន់នាក់ ក្នុងនោះមានទាំងក្រុមគ្រូពេទ្យ ក្រុមអ្នកជួយសង្គ្រោះ និងសាច់ញាតិរបស់ជនរងគ្រោះ ក៏ដូចជាអ្នកស្ម័គ្រចិត្តរាប់រយនាក់មកពីជុំវិញពិភពលោក កំពុងតែចូលរួមជួយសង្គ្រោះអ្នកដែលកំពុងជាប់នៅក្នុងល្អាងភ្នំពេញដោយទឹក។

ក្នុងរយៈពេលនៃការស្លាប់រស់ ១៨ ថ្ងៃ ចុងក្រោយ កុមារចំនួន ១២ នាក់ មកពីក្រុមបាល់ទាត់ Wild Boars រួមនឹងគ្រូបង្វឹកម្នាក់ក៏ត្រូវបានជួយសង្គ្រោះដោយជោគជ័យ។ ចាប់តាំងពីពេលនោះមក រឿងរ៉ាវនៃព្រឹត្តិការណ៍នេះបានក្លាយជាចំណុចកណ្ដាលនៃបណ្ដាខ្សែភាពយន្តឯកសារ និងខ្សែភាពយន្តនានារបស់ Hollywood ក៏ដូចជាសៀវភៅរាប់សិបក្បាល។

បច្ចុប្បន្ន ទិដ្ឋភាពខាងក្រៅល្អាងខាងលើគឺជាតំបន់ដែលត្រូវបានសាងសង់ដូចទៅនឹងឧទ្យានជាតិ អាចទទួលទេសចរមកទស្សនា។ យោងតាម New York Times ផ្លូវនានាដែលភ្ជាប់ទៅកាន់តំបន់ល្អាងនេះត្រូវបានជួសជុលឡើងវិញ ខណៈដែលសណ្ឋាគារ ភោជនីយដ្ឋាន និងហាងកាហ្វេថ្មី នៅជុំវិញតំបន់នេះ បានលេចឡើងជាបន្តបន្ទាប់។

ដើម្បីលើកតម្កើងលោក Saman Gunan អ្នកមុជទឹកស្ម័គ្រចិត្ត និងជាអតីតទាហានពិសេសរបស់ទ័ពជើងទឹកថៃ ដែលបានបាត់បង់ជីវិតក្នុងពេលជួយសង្គ្រោះក្នុងករណីខាងលើ អាជ្ញាធរថៃ ក៏បានសង់រូបសំណាករបស់គាត់នៅឯការិយាល័យកណ្ដាលរបស់ឧទ្យាជាតិ Tham Luang Khun Nam Nang Non។ ឧទ្យាន Tham Luang ក៏ត្រូវបានដាក់នៅក្នុងផែនទីទេសចរណ៍ពិភពលោក ដោយសារតែក្រុមបាល់ទាត់ Wild Boars ដែលបានជាប់ក្នុងល្អាងនោះ។

ក្រោយពីបេសកកម្មជួយសង្គ្រោះបានបញ្ចប់ដោយជោគជ័យ អ្នកទេសចរណ៍ជាច្រើនចាប់ផ្ដើមនាំគ្នាមកកាន់តំបន់នេះ ហើយពេលខ្លះមានមនុស្សច្រើនដល់ថ្នាក់កកស្ទះចរាចរណ៍ទៀតផង។ ក៏ប៉ុន្តែ នៅពេលកូវីដ-១៩ មកដល់ តំបន់នេះក៏ប្រែជាស្ងប់ស្ងាត់ ធ្វើឱ្យអ្នកស្រុកមានការខកចិត្ត។

យ៉ាងនេះក្ដី ដោយសារតែវិបត្តិកូវីដ-១៩ បានធូរស្រាលឡើងវិញ រួមនឹងវត្តមានរបស់ខ្សែភាពយន្តល្បីៗ (Thirteen Lives របស់ Amazon Prime និង Thai Cave Rescue របស់ Netflix) ស្ដីពីការសង្គ្រោះជីវិតមនុស្សនៅក្នុងល្អាង Tham Luang អ្នកស្រុកក្នុងតំបន់នេះសង្ឃឹមថា តំបន់នេះនឹងក្លាយជាទីទាក់ទាញភ្ញៀវមកទស្សនាជាថ្មីនៅពេលរដូវភ្លៀងបានបញ្ចប់ និងនៅពេលល្អាងនេះបើកទ្វារឡើងវិញនៅខែតុលាខាងមុខ៕

September 28, 2022

លោក ហ្សេឡែនស្គី ប្រកាសថា អ៊ុយក្រែន មិនចរចាជាមួយ រុស្ស៊ី

ប្រធានាធិបតី ហ្សេឡែនស្គី បានថ្លែងថា អ៊ុយក្រែន នឹងមិនចរចាជាមួយ រុស្ស៊ី ឡើយ ក្រោយពី ទីក្រុងមូស្គូ រៀបចំធ្វើប្រជាមតិស្ដីពីការច្របាច់ ៤ តំបន់របស់ អ៊ុយក្រែន ទៅក្នុងទឹកដីរបស់ រុស្ស៊ី។

«ការដែល រុស្ស៊ី ទទួលស្គាល់ការធ្វើប្រជាមតិក្លែងក្លាយគឺជារឿងធម្មតា ការអនុវត្តការប្រឌិតដូចទៅនឹងតំបន់គ្រីមៀ នាពេលកន្លង និងការប្រឹងប្រែងដទៃទៀតដើម្បីរឹបអូសទឹកដីរបស់ អ៊ុយក្រែន គឺស្មើនឹងមិនមានអ្វីត្រូវនិយាយជាមួយ ប្រធានាធិបតីរុស្ស៊ី បច្ចុប្បន្ន» លោក ហ្សេឡែនស្គី ថ្លែងតាមរយៈវីដេអូជាមួយ ក្រុមប្រឹក្សាសន្តិសុខនៃអង្គការសហប្រជាជាតិ កាលពីថ្ងៃទី ២៧ កញ្ញា។

ប្រធានាធិបតីអ៊ុយក្រែន បានហៅការធ្វើប្រជាមតិរបស់ រុស្ស៊ី នៅលើទឹកដីរបស់ អ៊ុយក្រែន ថាជា «ល្បែងត្លុក»។ លោក ហ្សេឡែនស្គី អះអាងថា តួលេខស្ដីពីលទ្ធផលនៃការបោះឆ្នោតប្រជាមតិត្រូវបានកំណត់ជាមុនរួចហើយ។

ការបោះឆ្នោតប្រជាមតិស្ដីពីការច្របាច់បញ្ចូលទឹកដី ៤ តំបន់របស់ អ៊ុយក្រែន គឺ Donetsk, Luhansk, Zaporizhzhia និង Kherson ដែលប្រហែលនឹង ១៥% នៃទឹកដីរបស់ អ៊ុយក្រែន ទៅក្នុងទឹកដីរបស់ រុស្ស៊ី ត្រូវបានធ្វើឡើងក្នុងរយៈពេល ៥ ថ្ងៃ ចាប់ពីថ្ងៃទី ២៣ កញ្ញា។

លទ្ធផលបឋមនៃការរាប់សន្លឹកឆ្នោតកាលពីថ្ងៃទី ២៧ កញ្ញា បង្ហាញថា អត្រាគាំទ្រឱ្យមានការច្របាច់ទឹកដីអ៊ុយក្រែន ទៅក្នុងទឹកដីរុស្ស៊ី ឡើង-ចុះ ពី ៨៧% ទៅ ៩៨.៥%។ លទ្ធផលផ្លូវការចុងក្រោយអាចនឹងត្រូវបានប្រកាសឆាប់ៗនៅថ្ងៃនេះ សម្រាប់តំបន់ Zaporizhzhia។

មេដឹកនាំសភាជាន់ខ្ពស់រុស្ស៊ី បានឱ្យដឹងថា សភារុស្ស៊ី អាចនឹងពិនិត្យលើការបង្រួបបង្រួមជាមួយតំបន់ Donetsk, Luhansk, Zaporizhzhia និង Kherson នៅថ្ងៃទី ០៤ តុលាខាងមុខ។

September 28, 2022

Author: សឿន សំណាង