កម្ពុជា រកឃើញអ្នកឆ្លងកូវីដ-១៩ ករណីថ្មី ចំនួន ០៨ នាក់ ក្នុងអំឡុង ២៤ ម៉ោង នៃថ្ងៃទី ០២ ខែតុលា ឆ្នាំ ២០២២។
ក្នុងអំឡុងពេលដដែល ក៏មានអ្នកជំងឺកូវីដ-១៩ ចំនួន ០២ នាក់បានជាសះស្បើយ និង មិនមានករណីស្លាប់ថ្មី ដោយសារជំងឺនេះនៅឡើយ។
គិតត្រឹមព្រឹក ថ្ងៃទី ០៣ ខែតុលា ឆ្នាំ ២០២២ កម្ពុជា មាន អ្នកឆ្លងសរុប ៖ ១៣៧,៨៩៣ នាក់, អ្នកជាសះស្បើយសរុប ៖ ១៣៤,៧៥៩ នាក់ និងអ្នកស្លាប់សរុប ៖ ៣,០៥៦ នាក់។
លទ្ធផលនៃការសិក្សាស្រាវជ្រាវរបស់សាកលវិទ្យាល័យ Curtin បានបង្ហាញថា មហាទ្វីបបន្ទាប់នៅលើផែនដីគឺ Amasia នឹងកកើតឡើងនៅពេលមហាសមុទ្រប៉ាស៊ីហ្វ៊ិករួមតូច នៅក្នុងរយៈពេលចាប់ពី ២០០ ទៅ ៣០០ លានឆ្នាំទៀត។
នៅក្នុងអត្ថបទព័ត៌មានដែលបានចុះផ្សាយកាលពីថ្ងៃទិ ២៨ កញ្ញា នៅលើទស្សនាវដ្ដី Science Review ក្រុមអ្នកស្រាវជ្រាវប្រើប្រាស់កុំព្យូទ័រដើម្បីធ្វើការបង្ហាញត្រាប់ (simulation) នូវដំណើរការមហាទ្វីបថ្មីកកើត និងបានរកឃើញថា ដោយសារតែផែនដីចុះត្រជាក់ក្នុងរយៈពេលរាប់ពាន់លានឆ្នាំ ភាពក្រាស់ និងភាពរឹងមាំរបស់ស្រទាប់តិចតូនិច (Tectonic Plate) ដែលនៅខាងក្រោមមហាសមុទ្រប៉ាស៊ីហ្វ្រិក ថយចុះទៅតាមពេលវេលា។ ជាលទ្ធផលគឺថា មហាទ្វីបបន្ទាប់ ពិបាកប្រមូលផ្ដុំគ្នានៅជុំវិញបណ្ដាមហាសមុទ្រវ័យក្មេងដូចជា អាត្លង់ទិច ឬមហាសមុទ្រឥណ្ឌា។
អ្នកវិទ្យាសាស្ត្ររបស់សាកលវិទ្យាល័យ Curtin បានឱ្យដឹងថា របកគំហើញថ្មីនេះបង្ហើបឱ្យដឹងអំពីអ្វីដែលនឹងកើតឡើងចំពោះផែនដីក្នុងរយៈពេល ២០០ ឆ្នាំខាងមុខ។ អ្នកវិទ្យាសាស្ត្ររបស់ Curtin យល់ថា ក្នុងរយៈពេល ២ ពាន់លានឆ្នាំកន្លង បណ្ដាទ្វីបនៅលើផែនដី បានប៉ះទង្គិចនឹងគ្នា ហើយរៀងរាល់ ៦០០ លានឆ្នាំម្ដង នឹងមានមហាទ្វីបថ្មីមួយកើតឡើង ដែលហៅថា វដ្ដនៃមហាទ្វីប។ ដូច្នេះ បណ្ដាទ្វីបបច្ចុប្បន្នជិតប្រមូលផ្ដុំគ្នាម្ដងទៀតនៅក្នុងរយៈពេល ២០០ លានឆ្នាំខាងមុខ។
មហាទ្វីបថ្មីនេះនឹងត្រូវបានដាក់ឈ្មោះថា Amasia ដោយសារតែមហាសមុទ្រប៉ាស៊ីហ្វិករួមតូច នៅពេលទ្វីបអាម៉េរិក ប៉ះទង្គិចជាមួយទ្វីបអាស៊ី។ អូស្ត្រាលី ត្រូវបានព្យាករថានឹងចូលរួមចំណែកក្នុងដំណើរការកកើតមហាទ្វីបថ្មីនេះ។ ដំបូង ទ្វីបអូស្ត្រាលី នឹងប៉ះជាមួយទ្វីបអាស៊ី ហើយភ្ជាប់ទ្វីបអាម៉េរិក ជាមួយនឹង ទ្វីបអាស៊ី។
អ្នកវិទ្យាសាស្ត្ររបស់សាកលវិទ្យាល័យ Curtin និយាយថា ការកកើតមហាទ្វីបថ្មីនេះនឹងធ្វើឱ្យទឹកសមុទ្រមានកម្រិតទាបជាងបច្ចុប្បន្ន ហើយនៅលើមហាទ្វីបនេះនឹងមានសភាពស្ងួតខ្លាំងដោយមានសីតុណ្ហភាពខ្ពស់។ បច្ចុប្បន្ន ផែនដីមានទ្វីបចំនួន ៧ ដែលមានប្រព័ន្ធជីវសាស្ត្រចម្រុះ និងវប្បធម៌ផ្សេងៗគ្នា៕
តម្លៃមធ្យមប្រេងឥន្ធនៈលើទីផ្សារអន្តរជាតិ ចាប់ពីថ្ងៃទី ០១ ដល់ទី ១០ តុលា ២០២២ គឺ ៤,៥១៦ រៀល ក្នុង ១ លីត្រ សម្រាប់សាំងធម្មតា និង ៤,៩៦៧ លីត្រ សម្រាប់ប្រេងម៉ាស៊ូត។
យោងតាមតម្លៃខាងលើ ក្រសួងពាណិជ្ជកម្ម បានកំណត់ថា ចាប់ពីថ្ងៃទី ០១ ដល់ទី ១០ តុលា ២០២២ ថ្លៃលក់រាយប្រេងឥន្ធនៈនៅ កម្ពុជា នឹងត្រូវលក់ ៤,២៥០ រៀល ក្នុង ១ លីត្រ សម្រាប់សាំងធម្មតា និង ៤,៧០០/លីត្រ សម្រាប់ប្រេងម៉ាស៊ូត។
ដូច្នេះ ធៀបនឹងមុននេះ តម្លៃប្រេងឥន្ធនៈ ចាប់ពីថ្ងៃទី ០១ ដល់ទី ១០ តុលា ២០២២ បានធ្លាក់ថ្លៃ ១០០ រៀល សម្រាប់ប្រេងសាំងធម្មតា និង ១៥០ រៀល សម្រាប់ប្រេងម៉ាស៊ូត។
ប្រធានាធិបតីអ៊ុយក្រែន កាលពីថ្ងៃទី ០២ តុលា បានប្រកាសថា កងទ័ពប្រទេសនេះដណ្ដើមបានមកវិញទាំងស្រុងនូវទីក្រុង Lyman ដែលជាមជ្ឈមណ្ឌលដឹកជញ្ជូនភាគខាងកើតនៅក្នុងខេត្ត Donetsk និងបានឱ្យដឹងថា មូស្គូ បានដកទ័ពទាំងអស់ចេញពីទីក្រុងនេះ។
«គិតត្រឹមម៉ោង ១២ និង ៣០ នាទី (ម៉ោងក្នុងស្រុក) Lyman ត្រូវបានរំដោះទាំងស្រុង» Reuters ដកស្រង់ប្រកាសរបស់ ប្រធានាធិបតីអ៊ុយក្រែន លោក ហ្សេឡែនស្គី ថ្លែងនៅក្នុងវីដេអូមួយដែលបានបង្ហោះលើ Telegram កាលពីថ្ងៃទី ០២ តុលា។
មុននោះ មេដឹកនាំប្រទេសអ៊ុយក្រែន បានឱ្យដឹងថា «ចំនួនទង់ជាតិអ៊ុយក្រែន ដែលដោតនៅក្នុងតំបន់ Donbass បានកើនឡើង។ វានឹងបានបង់នៅក្នុងតំបន់ជាច្រើនទៀត នៅសប្ដាហ៍ក្រោយ»។
ក្រសួងការពារជាតិរុស្ស៊ី កាលពីថ្ងៃទី ០១ តុលា បានប្រកាសថា កងទ័ពប្រទេសនេះ និងកងកម្លាំងផ្ដាច់ខ្លួននៅ ភាគខាងកើតអ៊ុយក្រែន បានដកចេញពី Lyman ដើម្បីត្រលប់ទៅកាន់ជួរដែលមានអំណោយផលល្អជាងនេះ នៅចំពោះហានិភ័យទីក្រុងនេះត្រូវរងការវាយប្រហារទ្រង់ទ្រាយធំពីសំណាក់ អ៊ុយក្រែន។
ចំណែកលោក Serhiy Gaidai អភិវាលខេត្ត Lugansk បានឱ្យដឹងថា ការដែល ទីក្រុងកៀវ ដណ្ដើមបានសិទ្ធិគ្រប់គ្រង Lyman ដែលជាទីក្រុងត្រូវ រុស្ស៊ី កាន់កាប់តាំងពីខែឧសភា និងជាច្រកដឹកជញ្ជូនរបស់ មូស្គូ គឺជាសញ្ញាបង្ហាញនូវកត្តាសំខាន់ក្នុងការជួយឱ្យកងទ័ពរបស់ អ៊ុយក្រែន ឆ្ពោះទៅមុខបានឆ្ងាយជាងនេះ សំដៅតំបន់ Kreminna និង Severodonetsk។
មេដឹកនាំ ៩ ប្រទេសរបស់ ណាតូ បានប្រកាសគាំទ្រដំណើរការបញ្ចូលជាសមាជិកចំពោះ អ៊ុយក្រែន និងអំពាវនាវឱ្យបង្កើនជំនួយយោធាដល់ប្រទេសនេះ។
មេដឹកនាំ ៩ ប្រទេសរបស់ ណាតូ រួមមាន សាធារណរដ្ឋឆែក, អេស្តូនី, ឡេតូនី, លីទុយអានី, ម៉ាសេដ្វាន, ម៉ុងតេណេហ្គ្រោ, ប៉ូឡូញ, រូម៉ានី និង ស្លូវ៉ាគី កាលពីថ្ងៃទី ០២ តុលា បានប្រកាសគាំទ្រ «សេចក្ដីសម្រេចរបស់មហាសន្និបាតណាតូ Bucharest ឆ្នាំ ២០០៨ ទាក់ទងនឹងតួនាទីជាសមាជិកក្នុងអនាគតរបស់ អ៊ុយក្រែន»។
នៅក្នុងមហាសន្និបាតណាតូឆ្នាំ ២០០៨ បណ្ដាប្រទេសជាសមាជិក បានសាទរចំពោះបំណងចូលជាសមាជិកសម្ព័ន្ធយោធានេះរបស់ អ៊ុយក្រែន និង ហ្សកហ្ស៊ី ប៉ុន្តែមិនបានលើកឡើងកាលបរិច្ឆេទជាក់លាក់ស្ដីពីដំណើរការដែលប្រទេសទាំងពីរនេះអាចចូលរួម។ ប្រកាសរបស់ មេដឹកនាំ ៩ ប្រទេសរបស់ ណាតូ នាពេលថ្មីៗនេះក៏មិនបាននិយាយដល់ពេលវេលាជាក់លាក់។
មេដឹកនាំ ៩ ប្រទេសរបស់ ណាតូ ខាងលើ ក៏បានអំពាវនាវឱ្យ «រុស្ស៊ី ដកទ័ពជាបន្ទាន់ចេញពីទឹកដីរបស់ អ៊ុយក្រែន» និងលើកទឹកចិត្តដល់សម្ព័ន្ធមិត្ត បង្កើនជំនួយយោធាឱ្យបានច្រើនជាងបច្ចុប្បន្ន សម្រាប់ ទីក្រុងកៀវ។
ប្រធានាធិបតីអ៊ុយក្រែន លោក ហ្សេឡែនស្គី កាលពីថ្ងៃទី ៣០ កញ្ញា បានចុះហត្ថលេខាលើពាក្យស្នើសុំចូលជាសមាជិកណាតូ (NATO) និងស្នើឱ្យសម្ព័ន្ធយោធានេះប្រញាប់ទទួលយក អ៊ុយក្រែន បន្ទាប់ពី រុស្ស៊ី រឹបអូសទឹកដី ៤ ខេត្តទៀតរបស់ប្រទេសនេះ។
មេដឹកនាំខេត្ត Java ខាងកើត បានបញ្ជាក់អំពីតួលេខនៃអ្នកស្លាប់ក្នុងករណីរត់ជាន់គ្នានៅកីឡដ្ឋាន Kanjuruhan នាទីក្រុង Malang ថា មាន ១២៥ នាក់ មិនមែន ១៧៤ ដូចដែលបានប្រកាសមុននោះ។
«តួលេខអ្នកស្លាប់គឺ ១២៥ នាក់ ក្នុងនោះមាន ១២៤ នាក់ត្រូវបានស្គាល់អត្តសញ្ញាណ និងម្នាក់ទៀតមិនទាន់ស្គាល់អត្តសញ្ញាណ។ ឈ្មោះរបស់មនុស្សមួយចំនួនត្រូវបានកត់ត្រាពីរលើក ដោយសារតែពួកគេត្រូវបានបញ្ជូនទៅកាន់មន្ទីរពេទ្យផ្សេង ដែលនៅទីនោះឈ្មោះរបស់ពួកគេត្រូវបានកត់ត្រាម្ដងទៀត» អភិបាលរងខេត្ត Java ខាងកើត Emil Dardak ថ្លែងកាលពីថ្ងៃទី ០២ តុលាដូច្នេះ។ លោកបានឱ្យដឹងថា តួលេខនេះត្រូវបាននគរបាលក្នុងតំបន់ប្រមូលយកពី ១០ មន្ទីរពេទ្យ។
ករណីរត់ជាន់ជើងគ្នានៅកីឡដ្ឋាន Kanjuruhan ក្នុងទីក្រុង Malang ដែលស្ថិតនៅលើកោះ Java របស់ ឥណ្ឌូណេស៊ី បានកើតឡើងកាលពីថ្ងៃទី ០១ តុលា បន្ទាប់ពីក្រុមប៉ូលិសបានបាញ់គ្រាប់បែកផ្សែងដើម្បីបង្ក្រាបអំពើហិង្សារបស់ហ្វូងមនុស្ស ក្រោយពីការប្រកួតបាល់ទាត់រវាងក្រុម Arema និងក្រុម Persebaya Surabaya។
ស្នងការប៉ូលេសខេត្ត Java ខាងកើត Nico Afinta បានឱ្យដឹងថា ក្រុមអ្នកគាំទ្រក្រោយមកក៏ភ័យស្លន់ស្លោ ដណ្ដើមគ្នារត់ចេញពីទីលានបាល់ទាត់តាមច្រកបណ្ដោះអាសន្ន បណ្ដាលឱ្យមានករណីជាន់គ្នាស្លាប់នេះ។
លោក Nico Afinta បញ្ជាក់ថា ៣៤ នាក់បានស្លាប់នៅក្នុងកីឡដ្ឋាន ក្នុងនោះមានប៉ូលិស ២ នាក់ផងដែរ។ លោកថា ប៉ូលិសបានអនុវត្តវិធានការបង្ការមុនពេលបាញ់គ្រាប់បែកផ្សែងបង្ហូរទឹកភ្នែក ដោយសារតែក្រុមអ្នកគាំទ្រចាប់ផ្ដើមវាយប្រហារលើប៉ូលិស និងបំផ្លាញរថយន្តសមត្ថកិច្ច។
ប្រធានាធិបតីឥណ្ឌូណេស៊ី Joko Widodo កាលពីម្សិលមិញ បានចេញបញ្ជាឱ្យផ្អាករាល់ការប្រកួតនៅ Liga 1 រហូតដល់ការស៊ើបអង្កេតលើករណីខាងលើបានចប់សព្វគ្រប់។
…
ជើងហោះហើរដឹកអ្នកដំណើរ ៦៣ នាក់របស់ក្រុមហ៊ុនអាកាសចរណ៍ជាតិមីយ៉ានម៉ា បានត្រូវគ្រាប់កាំភ្លើងនៅពេលជិតចុះចតក្នុងទីក្រុងរដ្ឋបាលរបស់រដ្ឋ Kayah បណ្ដាលឱ្យមនុស្សម្នាក់រងរបួស។
យន្តហោះរបស់ក្រុមហ៊ុនអាកាសចរណ៍មីយ៉ានម៉ា ចេញដំណើរពី រដ្ឋធានីណៃពិដោ (Naypyidaw) ទៅកាន់ Loikaw ដែលជាទីក្រុងរដ្ឋបាលរបស់រដ្ឋ Kayah នៅភាគអាគ្នេយ៍ប្រទេសនេះ បានត្រូវគ្រាប់កាំភ្លើងនាព្រឹកថ្ងៃសុក្រម្សិលមិញ នៅលើកម្ពស់ប្រហែល ១,០០០ ម៉ែត្រ ពេលកំពុងត្រៀមចុះចតលើព្រលានយន្តហោះ។ គ្រាប់កាំភ្លើងដែលមិនទាន់ស្គាល់ប្រភេទច្បាស់ បានទម្លុះជញ្ជាំងរបស់យន្តហោះ និងត្រូវចំអ្នកដំណើរម្នាក់។
«អ្នកដំណើរនេះត្រូវរងរបួសដោយសារត្រូវគ្រាប់កាំភ្លើងត្រង់ថ្ពាល់ខាងស្ដាំ និងកំពុងសម្រាកព្យាបាលនៅមន្ទីរពេទ្យប្រជាជន Loikaw។ កងកម្លាំងសន្តិសុខកំពុងធ្វើការនៅក្នុងតំបន់កើតមានហេតុការណ៍វាយប្រហារនេះ» អាជ្ញាធរយោធារបស់ មីយ៉ានម៉ា បានប្រកាសដូច្នេះ។
របបសឹកមីយ៉ានម៉ា បានចោទថា ខ្មាន់កាំភ្លើងរបស់ គណបក្សចម្រើនជាតិការ៉ែន (KNPP) ដែលជាក្រុមបះបោរជនជាតិភាគតិច នៅពីក្រោយអំពើនេះ។
ប្រទេសមីយ៉ានម៉ា បានធ្លាល់ទៅក្នុងភាពច្របូកច្របល់ចាប់តាំងពីកងទ័ពបានធ្វើរដ្ឋប្រហារកាលពីខែកុម្ភៈ ឆ្នាំកន្លង ដោយបានផ្ដួលរំលំរដ្ឋាភិបាលជាប់ឆ្នោតរបស់លោកស្រី Aung San Suu Kyi នឹងប្រគល់អំណាចឱ្យឧត្តមសេនីយ៍ Min Aung Hlaing។
យោងតាមអង្គការតាមដានសិទ្ធិមនុស្សនៅ មីយ៉ានម៉ា មនុស្សជាង ២,០០០ នាក់បានស្លាប់ និងជាង ១៥,០០០ នាក់ត្រូវបានចាប់ខ្លួន ដោយសារបានចូលរួមធ្វើបាតុកម្មប្រឆាំងនឹងអាជ្ញាធរយោធា៕
កម្ពុជា រកឃើញអ្នកឆ្លងកូវីដ-១៩ ករណីថ្មី ចំនួន ០៤ នាក់ ក្នុងអំឡុង ២៤ ម៉ោង នៃថ្ងៃទី ៣០ ខែកញ្ញា ឆ្នាំ ២០២២។
ក្នុងអំឡុងពេលដដែល ក៏មានអ្នកជំងឺកូវីដ-១៩ ចំនួន ០៤ នាក់បានជាសះស្បើយ និង មិនមានករណីស្លាប់ថ្មី ដោយសារជំងឺនេះនៅឡើយ។
រដ្ឋាភិបាលកូរ៉េខាងត្បូង ទើបតែបានសម្រេចសាងសង់រោងចក្រចំនួន ២ បន្ថែមទៀត ដើម្បីរក្សាទុកស្ពៃបូកគោ ដែលមានតម្លៃ ៤០ លានដុល្លារអាម៉េរិក ក្នុងគ្រាដែលបណ្ដាក្រុមហ៊ុនផលិតជ្រក់គីមជីនៅប្រទេសនេះ ជួបបញ្ហាកង្វះប្រភពផ្គត់ផ្គង់។
សារព័ត៌មាន Reuters បានឱ្យដឹងថា រោងចក្ររក្សាស្ពៃបូកគោនីមួយៗ មានទំហំ ៩,៩០០ ម៉ែត្រក្រឡា នឹងត្រូវបានសាងសង់នៅតំបន់ជនបទក្នុងទឹកដី Goesan និង Haenam។ ទំហំសរុបរបស់រោងចក្រទាំងពីរនេះគឺប្រហាក់ប្រហែលនឹងទីលានបាល់ទាត់ចំនួន ៣ និងអាចរក្សាទុកស្ពៃបូកគោបានរហូតដល់ ១០,០០០ តោន និងជ្រក់ស្ពៃបូគោបាន ៥០ តោនជារៀងរាល់ថ្ងៃ។
គម្រោងរោងចក្រទាំងខាងលើដែលគ្រោងនឹងត្រូវចំណាយប្រហែល ៥៨ ពាន់លានវ៉ុន (៤០ លានដុល្លារអាម៉េរិក) នេះ នឹងត្រូវបានសាងសង់រួចរាល់ជាស្ថាពរនៅឆ្នាំ ២០២៥។
ស្ថានភាពអាកាសធាតុប្រែប្រួលក្នុងរយៈពេលប៉ុន្មានឆ្នាំមកនេះ បានបណ្ដាលឱ្យមានសីតុណ្ហភាពកើនឡើងខ្ពស់ និងភ្លៀងធ្លាក់ច្រើនជាងមុន ធ្វើឱ្យប្រភពផ្គត់ផ្គង់ស្ពៃបូកគោដែលជាវត្ថុធាតុដើមសំខាន់របស់គីមជី ត្រូវថយចុះច្រើន។ ក្នុងឆ្នាំនេះ តម្លៃស្ពៃបូកគោនៅ កូរ៉េខាងត្បូង បានកើនឡើងទ្វេដងក្នុងរង្វង់មិនដល់ ៣ ខែ ដោយមូលហេតុបណ្ដាលមកពីអតិផរណាក្នុងខែកក្កដាឆ្នាំនេះ បានកើនឡើងខ្ពស់បំផុតក្នុងអំឡុង ២៤ ឆ្នាំចុងក្រោយនេះ។
លោក Ahn Ik-jin នាយកប្រតិបត្តិរបស់ក្រុមហ៊ុនផលិតគីមជី Cheongone Organic បានឱ្យដឹងថា «យើងតែងតែទិញស្ពៃបូកគោនៅក្នុងខែមិថុនា ដើម្បីរក្សាទុក និងប្រើប្រាស់បណ្ដើរៗ បន្ទាប់ពីតម្លៃកើនឡើង។ ប៉ុន្តែ ឆ្នាំនេះ យើងអស់ទំនិញរលីងហើយ»។
«យើងធ្លាប់ផលិតគីមជី ១៥ តោនជារៀងរាល់ថ្ងៃ។ ប៉ុន្តែ ពេលនេះ តួលេខនេះនៅសល់តែ ១០ តោន ឬទាបជាងនេះ» លោក Ahn Ik-jin បញ្ជាក់ និងបន្ថែមថា ក្រុមហ៊ុនបានដំឡើងតម្លៃគីមជីដល់ ២/៣ ធៀបនឹងតម្លៃមុននោះ ពោលគឺស្មើនឹង ៣.៥ ដុល្លារអាម៉េរិក/គីឡូក្រាម។
វិស័យឧស្សាហកម្មគីមជីរបស់ កូរ៉េខាងត្បូង បានធ្លាក់ចុះក្នុងរយៈពេលយ៉ាងយូរ ខណៈដែលការនាំចូលពី ប្រទេសចិន (តម្លៃស្មើនឹង ១/៣ នៃតម្លៃគីមជីដែលផលិតក្នុងស្រុក) បានកើនឡើងក្នុងរង្វង់ ២ ទសវត្សរ៍កន្លង ដោយកាន់កាប់ចំណែកទីផ្សារគីមជីក្នុង ប្រទេសកូរ៉េខាងត្បូង ប្រមាណ ៤០%។
យោងតាមការស្រាវជ្រាវរបស់ Korea Rating & Data កាលពីឆ្នាំមុន ជិតពាក់កណ្ដាលក្នុងចំណោមអ្នកផលិតគីមជី របស់ កូរ៉េខាងត្បូង បានបិទទ្វារជារៀងរហូត ឬងាកទៅរកអាជីវកម្មផ្សេង។ ក្នុងពេលនេះ ក្រុមអ្នកផលិតគីមជីនៅ កូរ៉េខាងត្បូង កំពុងតែរំពឹងថា គម្រោងថ្មីរបស់រដ្ឋាភិបាល យ៉ាងហោចណាស់ក៏នឹងអាចជួយឱ្យបណ្ដាក្រុមហ៊ុនផលិតគីមជីក្នុងស្រុក មិនបាត់បង់ «មុខនាទី»៕
រ៉ូបូត Cassie បង្កើតបានកំណត់ត្រាពិភពលោក Guinness ស្ដីពីរ៉ូបូតជើងពីរដែលរត់លឿនជាងគេក្នុងរយៈចម្ងាយ ១០០ ម៉ែត្រ ដែលនេះគឺជាស្នាដៃដ៏អស្ចារ្យ។
Cassie គឺជារ៉ូបូតរបស់ Agility Robotics ដែលជាក្រុមហ៊ុនបច្ចេកវិទ្យារបស់សាកលវិទ្យាល័យ Oregon ត្រូវបានបង្ហាញកាលពីឆ្នាំ ២០១៧។ កាលពីឆ្នាំ ២០២១ Cassie ចំណាយពេលតែជាង ៥៣ នាទីប៉ុណ្ណោះ ក្នុងការរត់ចម្ងាយ ៥ គីឡូម៉ែត្រ។
Cassie ត្រូវបានបង្កើតឡើងជាមួយនឹងបច្ចេកវិទ្យាទំនើបៗជាច្រើន ហើយក្បាលជង្គង់របស់វា ត្រូវបានផលិតឡើងដូចទៅនឹងសត្វអូទ្រីសដើម្បីអាចរក្សាលំនឹងបានល្អ។ Cassie ស្ថិតក្នុងចំណោមរ៉ូបូតជើងពីរដែលចេះរត់ ក្នុងនោះមានដូចជា រ៉ូបូតរាងមនុស្ស Atlas របស់ Boston Dynamics និង Mabel របស់សាកលវិទ្យាល័យ Michigan ជាដើម។
មុននឹងបង្កើតបានកំណត់ត្រាពិភពលោក Guinness រ៉ូបូត Cassie បានជោគជ័យក្នុងការរត់ចម្ងាយ ១០០ ម៉ែត្រ ដោយចំណាយពេល ២៤.៧៣ វិនាទី។ ល្បឿននេះ យឺតជាងឆ្ងាយ បើធៀបនឹងអ្នករត់ប្រណាំងឆ្នើមជាងគេក្នុងពិភពលោក ដែលចំណាយពេលរត់មិនដល់ ១០ វិនាទី។ ក៏ប៉ុន្តែ ក្រុមអ្នកស្រាវជ្រាវយល់ថា លទ្ធផលនេះអាចកែលំអបាននាពេលខាងមុខ៕