សឿន សំណាង - La Reine Media

ការបើកបរសាកល្បងដ៏ធំអស្ចារ្យមិនធ្លាប់មានជាមួយរថយន្ត Ford ស៊េរីថ្មីឆ្នាំ 2023

ក្រុមហ៊ុនរថយន្ត Ford នឹងប្រារព្ធកម្មវិធី «បើកបរសាកល្បងរថយន្ត Ford ស៊េរីថ្មីឆ្នាំ 2023 ចាប់ពី ✅ ថ្ងៃទី 22-23 តុលា 2022 ម៉ោង 9 ព្រឹក – 4 ល្ងាច ✅នៅបរិវេណសណ្ឋាគារ ហ្គាឌិនស៊ីធី (ផ្លូវលីយ៉ុងផាត់)។

➡️ ចូលរួមដើម្បីទទួលយកបទពិសោធន៍ដ៏អស្ចារ្យក្នុងការបើកបរឆ្លងកាត់ឧបសគ្គគ្រប់ស្ថានភាពផ្លូវជាមួយការប្រើប្រាស់បច្ចេកវិទ្យាទំនើបៗនៃរថយន្ត Next-Generation Ford ស៊េរីថ្មីឆ្នាំ 2023

➡️ សម្រាប់អ្នកបើកបរសាកល្បងទទួលបានសំបុត្រចូលទស្សនាសួនសត្វភ្នំពេញសាហ្វារី ឬ សួនទឹកហ្គាឌិនស៊ីធី ដោយឥតគិតថ្លៃ!

ទនាក់ទំនងចុះឈ្មោះចូលរួម: 078 333 748 | 016 333 785
➡️សម្រាប់ទីតាំងសូមចុចលើ តំណរភ្ជាប់ មួយនេះ https://goo.gl/maps/ur4gDXQagDHaYCuF8

October 19, 2022

សមាគមធនាគារ និងសមាគមមីក្រូហិរញ្ញវត្ថុកម្ពុជា ជូនដំណឹងស្ដីពី «ការផ្តល់ការយោគយល់ និងអនុគ្រោះដល់អតិថិជន ដែលរងគ្រោះដោយសារទឹកជំនន់

សមាគមធនាគារនៅកម្ពុជា និង សមាគមមីក្រូហិរញ្ញវត្ថុកម្ពុជា ចេញសេចក្ដីថ្លែងការណ៍រួម ទាក់ទងនឹងការអំពាវនាវរបស់ប្រមុខរាជរដ្ឋាភិបាលកម្ពុជា និងការស្នើរបស់ ធនាគារជាតិនៃកម្ពុជា ស្ដីពីការអនុគ្រោះចំពោះអតិថិដែលរងផលប៉ះពាល់ដោយសារទឹកជំនន់។

គ្រឹះស្ថានធនាគារ និងគ្រឹះស្ថានហិរញ្ញវត្ថុ ដែលជាសមាជិករបស់ សមាគមធនាគារនៅកម្ពុជា និង សមាគមមីក្រូហិរញ្ញវត្ថុកម្ពុជា នឹងផ្ដល់ការយោគយល់ និងអនុគ្រោះចំពោះអតិថិជនដែលរងផលប៉ះពាល់ជាក់ស្ដែងដោយសារទឹកជំនន់ធ្ងន់ធ្ងរ ទៅតាមសំណើរបស់រដ្ឋាភិបាល នេះគឺជាប្រកាសរបស់ សមាគមធនាគារនៅកម្ពុជា និង សមាគមមីក្រូហិរញ្ញវត្ថុកម្ពុជា។

សេចក្ដីថ្លែងការណ៍រួមរបស់ សមាគមធនាគារនៅកម្ពុជា និង សមាគមមីក្រូហិរញ្ញវត្ថុកម្ពុជា បានឱ្យដឹងថា នឹងមានការផ្ដល់ការយោគយល់ និងអនុគ្រោះចំពោះអតិថិជនដែលរងផលប៉ះពាល់ជាក់ស្ដែងដោយសារទឹកជំនន់ធ្ងន់ធ្ងរ តាមការអំពាវនាវរបស់ប្រមុខរាជរដ្ឋាភិបាលកម្ពុជា ដែលបានថ្លែងកាលពីថ្ងៃទី ១៧ តុលា ២០២២ ទាក់ទងនឹងឥណទានរបស់ធនាគារ និងអតិថិជនដែលកំពុងរងផលប៉ះពាល់ដោយសារគ្រោះទឹកជំនន់។

សេចក្ដីថ្លែងការណ៍រួមបានបន្តថា ការផ្ដល់ជូននេះនឹងមានកិច្ចសហការក្នុងក្របខណ្ឌនៃកិច្ចការពារអតិថិជន និងបន្តការអនុគ្រោះតាមរយៈការរៀបចំឥណទានឡើងវិញ ទៅតាមលក្ខខណ្ឌដែល ធនាគារជាតិនៃកម្ពុជា បានកំណត់។

ព័ត៌មានបន្ថែម សូមអាន សេចក្ដីថ្លែងការណ៍រួមរបស់ សមាគមធនាគារនៅកម្ពុជា និង សមាគមមីក្រូហិរញ្ញវត្ថុកម្ពុជា ដូចខាងក្រោម ៖

October 19, 2022

អ៊ីឡុន ម៉ាស ថា អាម៉េរិក មិនទាន់ទូទាត់ប្រាក់សម្រាប់បណ្ដាញអ៊ីនធើណិតនៅ អ៊ុយក្រែន

មហាសេដ្ឋីអាម៉េរិកដើមកំណើតអាហ្វ្រិកខាងត្បូង លោក អ៊ីឡុន ម៉ាស (Elon Musk) និយាយថា បណ្ដាញអ៊ីនធើណិតនៅ អ៊ុយក្រែន ដែលផ្គត់ផ្គង់ដោយផ្កាយរណប Starlink របស់ SpaceX មិនទាន់ទទួលបានប្រាក់ទូទាត់ពី មន្ទីរបញ្ចកោណ នៅឡើយ។

«មិនទាន់ទទួលបានប្រាក់ពី ក្រសួងការពារជាតិអាម៉េរិក ប៉ុន្តែប្រទេស អង្គការ និងបុគ្គលមួយចំនួនផ្សេងទៀតកំពុងតែចេញប្រាក់សម្រាប់ឧបករណ៍ទទួលបណ្ដាញអ៊ីនធើណិតចំនួន ១១,០០០/២៥,០០០ គ្រឿង» លោកអ៊ីឡុន ម៉ាស សរសេរលើ Twitter កាលពីថ្ងៃទី ១៨ តុលាដូច្នេះ។

យោងតាមលោក អ៊ីឡុន ម៉ាស SpaceX «បាត់បង់ប្រាក់ប្រហែល ២០ លានដុល្លារជារៀងរាល់ខែ ព្រោះតែសេវាកម្មដែលមិនមានការទូទាត់ និងការចំណាយទាក់ទងនឹងវិធានការបង្ការសុវត្ថិភាពដើម្បីការពារបណ្ដាញ»។

មតិរបស់លោក អ៊ីឡុន ម៉ាស ត្រូវបានលើកឡើងក្រោយពី ទំព័រ Politico កាលពីថ្ងៃទី ១៧ តុលា បានផ្សាយថា មន្ទីរបញ្ចកោណ កំពុងពិនិត្យលទ្ធភាពទូទាត់ប្រាក់សម្រាប់បណ្ដាញអ៊ីនធើណិតផ្កាយរណប Starlink របស់ មហាសេដ្ឋី អ៊ីឡុន ម៉ាស នៅ ប្រទេសអ៊ុយក្រែន។

លោក អ៊ីឡុន ម៉ាស ចាប់ពីខែមីនា បានផ្គត់ផ្គង់អ៊ីនធើណិតពីផ្កាយរណប Starlink និងផ្ញើឧបករណ៍ទទួលរលកសញ្ញាអ៊ីនធើណិតប្រហែល ២៥,០០០ គ្រឿង ទៅឱ្យ អ៊ុយក្រែន ដើម្បីជួយឱ្យកងទ័ពប្រទេសនេះរក្សាទំនាក់ទំនងនៅលើសមរភូមិ ក្នុងគ្រាដែលបណ្ដាញសេវាទូរស័ព្ទ និងបណ្ដាញអ៊ីនធើណិតរបស់ អ៊ុយក្រែន ត្រូវបានបំផ្លាញនៅក្នុងការប្រយុទ្ធគ្នា។

ក្រុមហ៊ុន SpaceX កាលពីថ្ងៃទី ១៤ តុលា បានប្រកាសប្រាប់ រដ្ឋាភិបាលអាម៉េរិក ថា ខ្លួនមិនអាចបន្តផ្ដល់ជំនួយ និងរក្សាឧបករណ៍ Starlink ដែលផ្គត់ផ្គង់អ៊ីនធើណិតនៅ អ៊ុយក្រែន។ SpaceX ប្រកាសថា ការចំណាយសម្រាប់សកម្មភាពខាងលើមកដល់ពេលនេះគឺ ៨០ លានដុល្លារ ហើយគ្រោងនឹងត្រូវចំណាយជាង ១២០ លានដុល្លារបើសិនផ្គត់ផ្គង់ដល់ដាច់ឆ្នាំនេះ និងជិត ៤០០ លានដុល្លារសម្រាប់ ១២ ខែទៀត។ ក៏ប៉ុន្តែ ក្រោយមក លោក អ៊ីឡុន ម៉ាស បានប្ដូរចិត្ត ដោយនិយាយថា «នឹងផ្គត់ផ្គង់សេវាកម្មនេះបន្តទៀត»៕

October 19, 2022

ឥណ្ឌូណេស៊ី រុះរើកីឡដ្ឋានបាល់ទាត់ដែលកើតមានហេតុការណ៍រត់ជាន់គ្នាស្លាប់ ១៣៣ នាក់

ប្រធានាធិបតីឥណ្ឌូណេស៊ី ប្រកាសថា កីឡដ្ឋានបាល់ទាត់នៅក្នុងទីក្រុង Malang ជាទីដែលបានកើតហេតុការណ៍រត់ជាន់គ្នាបណ្ដាលឱ្យមនុស្ស ១៣៣ នាក់បាត់បង់ជីវិត នឹងត្រូវបានរុះរើ ដើម្បីសាងសង់ជាថ្មី។

«យើងនឹងរុះរើកីឡដ្ឋាន Kanjuruhan នៅ Malang និងសាងសង់ឡើងវិញទៅតាមស្ដង់ដា FIFA ជាមួយនឹងហេដ្ឋារចនាសម្ព័ន្ធសមស្របដែលអាចធានាសុវត្ថិភាពសម្រាប់កីឡាករ និងអ្នកគាំទ្រ» ប្រធានាធិបតីឥណ្ឌូណេស៊ី Joko Widodo ថ្លែងប្រាប់អ្នកយកព័ត៌មាននៅ ហ្សាការតា កាលពីម្សិលមិញ ក្រោយជំនួបជាមួយប្រធាន FIFA លោក Gianni Infantino។

កីឡដ្ឋាន Kanjuruhan នៅ Malang ខេត្ត Java ខាងកើត គឺជាទីដែលបានកើតមានហេតុការណ៍រត់ជាន់គ្នាកាលពីព្រលប់ថ្ងៃទី ០១ តុលា ក្រោយការប្រកួតរវាងក្រុមម្ចាស់ផ្ទះ Arema និងក្រុម Persebaya Surabaya។ ដោយសារតែក្រុមម្ចាស់ផ្ទះត្រូវចាញ់ អ្នកគាំទ្រក៏មានការខឹងខ្លាំង ហើយនាំគ្នាចុះទៅទីលានប្រកួត ធ្វើឱ្យក្រុមប៉ូលិសបាញ់គ្រាប់បែកផ្សែងបង្ហូរទឹកភ្នែកដើម្បីបង្រាប។

យោងតាមលទ្ធផលនៃការស៊ើបអង្កេត ប៉ូលិសបានបាញ់គ្រាប់បែកផ្សែងបង្ហូរទឹកភ្នែកចំនួន ៨ គ្រាប់ ឡើងទៅកាន់កន្លែងទស្សនិកជន នាំឱ្យហ្វូងមនុស្សមានការភិតភ័យ រកវិធីរត់ចេញពីកីឡដ្ឋាន បង្កឱ្យមានហេតុការណ៍រត់ជាន់គ្នា បណ្ដាលឱ្យមនុស្ស ១៣៣ នាក់បាត់បង់ជីវិត ក្នុងនោះមានក្មេងជាង ៤០ នាក់ ខណៈដែលរាប់រយនាក់ផ្សេងទៀតរងរបួស។

ទិដ្ឋភាពនៃហេតុការណ៍រត់ជាន់គ្នានៅកីឡដ្ឋាន Kanjuruhan នៅ Malang កាលពីព្រលប់ថ្ងៃទី ០១ តុលា ២០២២

ក្រុមមន្ត្រីឥណ្ឌូណេស៊ី រកឃើញថា ជនសង្ស័យ ៦ នាក់ដែលត្រូវបានចោទប្រកាន់ថាមានទង្វើធ្វេសប្រហែសរួមមាន ប៉ូលិស ៣ នាក់ និង ៣ នាក់ទៀតគឺជាអ្នកទទួលខុសត្រូវទៅលើការរៀបចំ ធានាសន្តិសុខសម្រាប់ការប្រកួតបាល់ទាត់។ ជនសង្ស័យទាំងនេះប្រឈមមុខនឹងទោសជាប់ពន្ធនាគារ ៥ ឆ្នាំ បើសិនត្រូវបានដាក់ទោស។

នៅក្នុងជំបួបជាមួយ ប្រធានាធិបតី Widodo ប្រធាន FIFA លោក Infantino អធិប្បាយថា ហេតុការណ៍នេះគឺជា «ថ្ងៃដ៏ខ្មៅងងឹតបំផុតមួយចំពោះបាល់ទាត់»។ លោក Infantino ក៏បានឱ្យដឹងថា FIFA នឹងជួយ «កែទម្រង់ និងប្ដូរផ្លាស់» បាល់ទាត់នៅ ឥណ្ឌូណេស៊ី។

កីឡដ្ឋាន Kanjuruhan ដែលត្រូវបានសម្ពោធបើកដំណើរការកាលពីឆ្នាំ ២០០៤ អាចដាក់មនុស្សបាន ៤២,០០០ នាក់ ប៉ុន្តែ ច្រកចេញចូលតូចចង្អៀត គ្រប់គ្រាន់សម្រាប់តែមនុស្ស ២ នាក់ដើរទន្ទឹមគ្នាប៉ុណ្ណោះ។ ច្រកមួយចំនួនត្រូវបានគេបិទសោនៅពេលហេតុការណ៍រត់ជាន់គ្នាកើតឡើង៕

October 19, 2022

ប្រេងឆៅឡើងថ្លៃក្នុងថ្ងៃទី ១៨ តុលា នៅទ្វីបអាស៊ី ដោយសារការបារម្ភអំពីប្រភពផ្គត់ផ្គង់

ក្នុងការជួញដូរនៅថ្ងៃទី ១៨ តុលា នៅ ទ្វីបអាស៊ី តម្លៃប្រេងឆៅ Brent កើន ៨២ សេនអាម៉េរិក ដោយឡើងដល់ជាង ៩២ ដុល្លារ/ធុង ចំណែកប្រេងឆៅ WTI កើន ៨៦ សេនអាម៉េរិក ដោយឡើងដល់ជាង ៨៦ ដុល្លារ/ធុង។

ការឡើងថ្លៃរបស់ប្រេងឆៅនៅ អាស៊ី គឺដោយសារប្រាក់ដុល្លារអាម៉េរិកថមថយកម្លាំង បូករួមនឹងការបារម្ភអំពីប្រភពផ្គត់ផ្គង់ បើទោះជាល្បឿននៃការឡើងថ្លៃត្រូវបានបង្អាក់ដោយការព្យាករដែលថា តម្រូវការឥន្ធនៈនៅ ប្រទេសចិន ថយចុះ ព្រោះតែគោលនយោបាយ «គ្មានកូវីដ» ត្រូវបានអនុវត្តបន្ត។

តម្លៃប្រេង Brent ប្រគល់មានកាលកំណត់ កើន ៨២ សេនអាម៉េរិក ឬ ០.៩% ដោយឡើងដល់ ៩២.៤៤ ដុល្លារ/ធុងនៅម៉ោង ១៣ និង ៤៣ នាទី (ម៉ោងនៅ កម្ពុជា) ខណៈដែលប្រេងឆៅ WTI របស់ អាម៉េរិក កើន ៨៦ សេនអាម៉េរិក ឬ ១% ដោយឡើងដល់ ៨៦.៣២ ដុល្លារ/ធុង។

សន្ទស្សន៍ USD ដែលវាស់ស្ទង់តម្លៃរបស់ប្រាក់ដុល្លារអាម៉េរិក ជាមួយនឹងរូបិយប័ណ្ណដទៃទៀត ថយចុះទាបបំផុតរាប់ចាប់ពីថ្ងៃទី ០៦ តុលា។ ប្រាក់ដុល្លារអាម៉េរិកខ្សោយជាង នឹងធ្វើឱ្យប្រេងថោកជាងសម្រាប់អ្នកទិញដែលទូទាត់ដោយប្រាក់ដទៃដែលផ្សេងពីដុល្លារអាម៉េរិក។

យោងតាមអ្នកវិភាគរបស់ ANZ Research ក្រោយពី OPEC+ (ប្រទេសផលិតប្រេង និងដៃគូ) កាលពីដើមខែនេះប្រកាសកាត់បន្ថយបរិមាណប្រេង ក្រុមអ្នកវិនិយោគបានបង្កើនការទិញដោយយល់ថា តម្លៃនឹងឡើងក្នុងពេលអនាគត។

ក្នុងគ្រានេះដែរ លទ្ធភាពដែល ចិន បន្តអនុវត្តគោលនយោបាយហិរញ្ញវត្ថុដើម្បីជួយដល់សេដ្ឋកិច្ចដែលកំពុងរងផលប៉ះពាល់ដោយសារវិធានការបង្ការជំងឺកូវីដ-១៩ ក៏បានគាំទ្រដល់តម្លៃប្រេង។

អំពីប្រភពផ្គត់ផ្គង់ Reuters បានឱ្យដឹងថា ឃ្លាំងប្រេងឆៅរបស់ អាម៉េរិក កើនក្នុងសប្ដាហ៍ទីពីរបន្តបន្ទាប់ ក្នុងកម្រិត ១.៦ លានធុងនៅក្នុងសប្ដាហ៍ដែលបញ្ចប់កាលពីថ្ងៃទី ១៤ តុលា៕

October 18, 2022

មជ្ឈមណ្ឌលបង្ហាញត្រាប់ខ្យល់ព្យុះកម្លាំង ១៦៥ គីឡូម៉ែត្រ/ម៉ោង នៅអឺរ៉ុប (វីដេអូ)

មជ្ឈមណ្ឌលបង្ហាញត្រាប់ខ្យល់ព្យុះថ្មីមួយទើបត្រូវបានដាក់ឱ្យដំណើរការនៅ ប្រទេសដាណឺម៉ាក ដើម្បីលើកកម្ពស់ការយល់ដឹងរបស់មនុស្សគ្រប់គ្នាអំពីកម្លាំងដ៏មហិមារបស់ធម្មជាតិ។

ស្ថាបនិករបស់មជ្ឈមណ្ឌលបង្ហាញត្រាប់ខ្យល់ព្យុះ «Beat the Storm» បានឱ្យដឹងថា គោលបំណងនៃការបង្កើតឱ្យមានមជ្ឈមណ្ឌលនេះ គឺដើម្បីលើកកម្ពស់ការយល់ដឹងអំពីធម្មជាតិតាមរយៈល្បែងកំសាន្ត។

ស្ថាបនិករបស់ «Beat the Storm» ថ្លែងថា «យើងគួរតែដឹងអំពីវិធីទប់ទល់នឹងខ្យល់ព្យុះ។ ពិតណាស់ មនុស្សជាច្រើនដឹងថា ព្យុះគឺជាអ្វី ប៉ុន្តែនៅពេលអាជ្ញាធរស្នើ ដូចជា ឱ្យចាកចេញពីតំបន់មានព្យុះ មានមនុស្សជាច្រើនមិនធ្វើតាម»។

«បើសិនជាអ្នកបានចំណាយពេលតែ ២០ វិនាទីក្នុងការទទួលបទពិសោធន៍ពី Beat the Storm អ្នកនឹងដឹងច្បាប់អំពីកម្លាំងមិនធម្មតារបស់ធម្មជាតិ របស់បាតុភូតអាកាសធាតុដ៏អាក្រក់នេះ ហើយអ្នកនឹងបានដឹងថា មនុស្សយើងតូចតាចកម្រិតណា» លោក Ingus Augstkalns ស្ថាបនិករបស់ Beat the Storm និយាយដូច្នេះ។

(ខាងលើគឺជារូបភាពដែលបង្ហាញថា Beat the Storm កំពុងតែបក់ភ្ញៀវមកលេងកំសាន្តដោយកម្លាំងខ្យល់កើនឡើងជាលំដាប់ នៅពេលពួកគេព្យាយាមឆ្ពោះទៅគោលដៅម្ខាងទៀតក្នុងបន្ទប់ខ្យល់ដើម្បីចុចប៊ូតុង)

ដំណើរការនៃការបង្ហាញត្រាប់ Beat the Storm ត្រូវបានបង្កើតឡើងសម្រាប់មនុស្សចាប់ពីអាយុ ៤ ឆ្នាំ ដល់ ៨០ ឆ្នាំ ក្នុងនោះ ក្មេងៗអាចឆ្លងកាត់កម្លាំងខ្យល់ ១៣០ គីឡូម៉ែត្រ/ម៉ោង។ ចំណែកក្មេងជំទង់ និងមនុស្សពេញវ័យអាចជ្រើសរើសខ្យល់កម្លាំងឡើងដល់ ១៦៥ គីឡូម៉ែត្រ/ម៉ោង។

ដោយសារតែបាតុភូតធម្មជាតិអាក្រក់នឹងកើតឡើងញឹកញាប់ជាងមុន និងបង្កការខូចខាតធ្ងន់ធ្ងរជាងមុន ការបង្ហាញត្រាប់ព្យុះក៏នឹងមានប្រយោជន៍ចំពោះបេសកកម្ម និងសេវាកម្មជួយសង្គ្រោះ។ ចំពោះពួកគេ ប្រការសំខាន់គឺត្រូវតែដឹងវិធីធ្វើការនៅក្នុងស្ថានភាពមានខ្យល់ខ្លាំង នេះបើតាមលោក Ingus Augstkalns។

ស្ថាបនិករបស់ «Beat the Storm» បញ្ជាក់ថា «យើងមានប្រព័ន្ធបង្ហាញត្រាប់មួយដែលត្រូវបានផលិតឡើងជាពិសេសសម្រាប់សេវាកម្មជួយសង្គ្រោះ និងកងទ័ព។ មានភារកិច្ចមួយចំនួនដែលអ្នកអាចហ្វឹកហាត់នៅទីនោះ»៕

October 18, 2022

ធនាគារជាតិនៃកម្ពុជា ស្នើឱ្យគ្រឹះស្ថានហិរញ្ញវត្ថុ «អនុគ្រោះចំពោះអ្នកខ្ចីប្រាក់ ដែលរងផលប៉ះពាល់ធ្ងន់ធ្ងរដោយសារទឹកជំនន់»

ធនាគារជាតិនៃកម្ពុជា គាំទ្រចំពោះប្រសាសន៍របស់ សម្ដេចតេជោ ហ៊ុន សែន និងស្នើឱ្យគ្រឹះស្ថានធនាគារ និងគ្រឹះស្ថានហិរញ្ញវត្ថុ បន្តចូលរួមសហការក្នុងក្របខណ្ឌកិច្ចការពារអតិថិជន និងបន្តការអនុគ្រោះតាមរយៈការរៀបចំឥណទានឡើងវិញ ដោយមានលក្ខខណ្ឌមួយចំនួន នេះបើតាមសេចក្ដីជូនដំណឹងរបស់ ធនាគារជាតិនៃកម្ពុជា ចុះថ្ងៃទី ១៨ តុលា ២០២២។

ប្រកាសគាំទ្រ និងការស្នើរបស់ ធនាគារជាតិនៃកម្ពុជា ត្រូវបានធ្វើឡើងក្នុងគ្រាដែលខេត្តមួយចំនួនកំពុងជួបបញ្ហាទឹកជំនន់ធ្ងន់ធ្ងរ និងក្រោយពីប្រសាសន៍អំពាវនាវរបស់ សម្ដេចតេជោ កាលពីថ្ងៃទី ១៧ តុលាកន្លងទៅ និងបន្ទាប់ពីមានការពិភាក្សាជាមួយស្ថាប័នពាក់ព័ន្ធ ទាក់ទងនឹងបំណុលរបស់ប្រជាពលរដ្ឋក្នុងតំបន់ទឹកជំនន់ និងឥណទានរបស់បណ្ដាធនាគារ និងគ្រឹះស្ថានហិរញ្ញវត្ថុ។

ធនាគារជាតិនៃកម្ពុជា បានស្នើឱ្យគ្រឹះស្ថានហិរញ្ញវត្ថុ ពិចារណាលើការបន្ធូរបន្ថយការប្រាក់ ឬលើកលែងការផាកពិន័យ និងជៀសវាងការរឹបអូសទ្រព្យធានារបស់អ្នកខ្ចីប្រាក់ជាដើម ដែលសំណើនេះត្រូវបានលើកឡើងក្នុងបំណងចូលរួមជួយសម្រាលទុក្ខរបស់អ្នកខ្ចីប្រាក់។

ព័ត៌មានលម្អិត សូមអានសេចក្ដីប្រកាសរបស់ ធនាគារនៃកម្ពុជា ខាងក្រោម ៖

October 18, 2022

ចំនួនប្រជាជនពិភពលោកជិតកើនដល់ ៨ ពាន់លាននាក់ ៖ អង្គការសហប្រជាជាតិថា «កុំភិតភ័យ»

មូលនិធិប្រជាជនអង្គការសហប្រជាជាតិ អំពាវនាវដល់ពិភពលោកថា កុំភ័យភិតនៅពេលចំនួនប្រជាជនពិភពលោកកើនដល់ ៨ ពាន់លាននាក់ ហើយគួរតែផ្ដោតលើការជួយដល់ស្ត្រី និងកុមារ។

ចំនួនប្រជាជនពិភពលោកគ្រោងនឹងកើនឡើងដល់ ៨ ពាន់លាននាក់នៅថ្ងៃទី ១៥ វិច្ឆិកាខាងមុខ ក្នុងគ្រាដែលអ្នកវិភាគមួយចំនួនបានសម្ដែងការបារម្ភអំពីផលប៉ះពាល់នៃការកើនឡើងនេះទៅលើពិភពលោកដែលកំពុងតែដោះស្រាយយ៉ាងត្រដាបត្រដួសនូវបញ្ហាវិសមភាព វិបត្តិអាកាសធាតុ ចំណាកស្រុក និងការភៀសខ្លួនដោយសារសង្គ្រាម។

ក៏ប៉ុន្តែ បណ្ឌិត Natalia Kanem នាយិកាប្រតិបត្តិរបស់មូលនិធិប្រជាជនរបស់ អង្គការសហប្រជាជាតិ (UNFPA) បានអំពាវនាវដល់បណ្ដាប្រទេសថា កុំមានការភ័យភិត ប៉ុន្តែ ត្រូវផ្ដោតលើការជួយដល់ស្ត្រី និងកុមា ជាក្រុមដែលងាយរងគ្រោះបំផុត នៅចំពោះមុខការកើនឡើងនៃចំនួនប្រជាជននេះ។

«ខ្ញុំដឹងថា ទិដ្ឋភាពនេះមិនត្រូវបានមនុស្សគ្រប់គ្នាទទួលស្វាគមន៍។ មនុស្សមួយចំនួនសម្ដែងការព្រួយបារម្ភថា ពិភពលោកនេះកំពុងតែកកកុញ មនុស្សច្រើនពេក និងមិនមានប្រភពធនធានគ្រប់គ្រានដើម្បីរក្សាជីវភាពសម្រាប់ពួកគេ។ ខ្ញុំសូមនិយាយឱ្យបានច្បាស់ថា ចំនួនប្រជាជនកើនឡើងមិនមែនជាមូលហេតុដើម្បីភិតភ័យឡើយ» លោកស្រី Kanem បញ្ជាក់។

លោកស្រី Kanem ឱ្យដឹងថា បើសិនជារដ្ឋាភិបាលគ្រាន់តែផ្ដោតទៅលើតួលេខ នោះពួកគេមានហានិភ័យចាត់វិធានការគ្រប់គ្រងលើចំនួនប្រជាជនដែលប្រវត្តិសាស្ត្របានបញ្ជាក់ថា «មិនមានប្រសិទ្ធភាព តែថែមទាំងបង្កគ្រោះថ្នាក់ទៀតផង។

ដោយសារតែអត្រាចាប់កំណើតថយចុះ ល្បឿននៃកំណើនប្រជាជនពិភពលោកដែលធ្លាប់ឡើងដល់ជាង ២% ក្នុង ១ ឆ្នាំ កាលពីអំឡុងចុងទសវត្សរ៍ឆ្នាំ ១៩៦០ បច្ចុប្បន្នថយមកនៅត្រឹមក្រោម ១%។ ប៉ុន្តែ ទិដ្ឋភាពសកលកំពុងតែមានភាពខុសគ្នាខ្លាំង ពីប្រទេសមួយទៅប្រទេសមួយ។ អង្គការសហប្រជាជាតិគណនាឃើញថា ៦០% នៃចំនួនប្រជាជនសរុប រស់នៅក្នុងបណ្ដាប្រទេសដែលមានអត្រាចាប់កំណើតស្ថិតក្រោម «កម្រិតកើតជំនួស» (ជាអត្រាដែលចំនួនប្រជាជនរក្សាបានស្ថិរភាព ដោយមិនកើន និងមិនថយចុះ)។

៨ ប្រទេស ក្នុងនោះមាន នីហ្សេរីយ៉ា អេត្យូពី និង ហ្វ៊ីលីពីន ត្រូវបានព្យាករថា នឹងកាន់កាប់ពាក់កណ្ដាលនៃអត្រាកំណើនប្រជាជនក្នុងឆ្នាំ ២០៥០។ ឥណ្ឌា គ្រោងនឹងយកឈ្នះលើ ចិន ចាប់ពីឆ្នាំក្រោយ ហើយក្លាយជាប្រទេសដែលមានប្រជាជនច្រើនជាងគេបង្អស់ក្នុងពិភពលោក៕

October 18, 2022

សហរដ្ឋអាម៉េរិក ទំនងជាកំពុងរៀបចំបញ្ចេញប្រេង ១៥ លានធុងបន្ថែមទៀតពីឃ្លាំងយុទ្ធសាស្ត្រ

ដើម្បីទប់ស្កាត់តម្លៃសាំងឡើងថ្លៃមកវិញ រដ្ឋាភិបាលអាម៉េរិក ត្រូវបានគេជឿថា នឹងបន្តលក់ប្រេងច្រើនលានធុងបន្ថែមទៀត ពីឃ្លាំងយុទ្ធសាស្ត្រ។

Bloomberg ដកស្រង់ព័ត៌មានពីប្រភពជិតស្និទ្ធ បានឱ្យដឹងថា រដ្ឋាភិបាលរបស់លោក បៃដិន ជិតប្រកាសអំពីការបញ្ចេញប្រេងបន្ថែមពី ១០ ទៅ ១៥ លានធុងពីឃ្លាំងជាតិ ក្នុងបំណងរក្សាតុល្យភាពតម្លៃក្នុងទីផ្សារ និងទប់ស្កាត់សាំងឡើងថ្លៃខ្ពស់ជាថ្មី។

ខាងលើនេះនឹងជាការបញ្ចេញប្រេងថ្មីបំផុតនៅក្នុងកម្មវិធីលក់ប្រេង ១៨០ លានធុង ដែលត្រូវបានប្រកាសកាលពីដើមឆ្នាំនេះ។ ផែនការបញ្ចេញប្រេង ១៨០ លានធុងពីឃ្លាំងយុទ្ធសាស្ត្ររបស់ សហរដ្ឋអាម៉េរិក គ្រោងនឹងអូសបន្លាយពេល ៦ ខែ ចាប់ពីខែឧសភា ២០២២។

រដ្ឋាភិបាលរបស់លោក បៃដិន សប្ដាហ៍នេះក៏មានគម្រោងប្រកាសអំពីផែនការបំពេញឃ្លាំងប្រេងរបស់ខ្លួនផងដែរ។ ក្រសួងថាមពលអាម៉េរិក ក៏កំពុងតែពិចារណាអំពីការកាត់បន្ថយការនាំចេញប្រេងឥន្ធនៈដើម្បីរក្សាប្រភពផ្គត់ផ្គង់ប្រេងសាំងក្នុងស្រុក នេះបើតាម Bloomberg។

សេតវិមាន នៅតែស្វែងរកវិធីដើម្បីបញ្ចុះតម្លៃសាំង និងបង្កើនបរិមាណឥន្ធនៈក្នុងឃ្លាំង ត្រៀមសម្រាប់រដូវរងា ពិសេសក្នុងស្ថានការណ៍ដែល OPEC+ (ក្រុមប្រទេសផលិត និងដៃគូនាំចេញប្រេង) កាត់បន្ថយបរិមាណប្រេងនាំចេញ។ តម្លៃសាំងនាបច្ចុប្បន្ន គឺជាអាទិភាពកំពូលរបស់លោក បៃដិន។ កាលពីប៉ុន្មានសប្ដាហ៍កន្លងទៅនេះ លោក បៃដិន បានព្រមានជាបន្តបន្ទាប់ចំពោះក្រុមហ៊ុនឥន្ធនៈ ទាក់ទងនឹងការកើនឡើងនៃប្រាក់ចំណាយ។

«តម្លៃសាំងកំពុងឡើងខ្ពស់ខ្លាំង ហើយយើងត្រូវការបញ្ចុះតម្លៃ» ប្រធានាធិបតីអាម៉េរិក លោក ចូ បៃដិន ថ្លែងដូច្នេះនៅក្នុងព្រឹត្តិការណ៍មួយនៅ Los Angeles កាលពីសប្ដាហ៍កន្លង៕

October 18, 2022

អាស៊ាន និង សហភាពអឺរ៉ុប ចុះកិច្ចព្រមព្រៀងដឹកជញ្ជូនតាមអាកាសអន្តរតំបន់ដំបូងគេក្នុងពិភពលោក

សមាគមប្រជាជាតិអាស៊ីអាគ្នេយ៍ (ASEAN) និង សហភាពអឺរ៉ុប (EU) បានចុះហត្ថលេខាលើកិច្ចព្រមព្រៀងដឹកជញ្ជូនតាមអាកាសពេញលេញ (ASEAN-EU CATA) នៅក្នុងកិច្ចប្រជុំរដ្ឋមន្ត្រីដឹកជញ្ជូនអាស៊ានលើកទី ២៨ ដែលត្រូវបានធ្វើឡើងនៅ Bali ប្រទេសឥណ្ឌូណេស៊ី កាលពីថ្ងៃទី ១៧ តុលាកន្លងទៅ។

យោងតាមប្រកាសលើគេហទំព័រផ្លូវការរបស់ អាស៊ាន ASEAN-EU CATA គឺជាកិច្ចព្រមព្រៀងផ្នែកដឹកជញ្ជូនតាមអាកាសរវាងតំបន់នឹងតំបន់ដំបូងគេបង្អស់ក្នុងពិភពលោក ដែលនេះបានស្ដែងឱ្យឃើញនូវគំនិតស្ដីពីគោលនយោបាយថ្មីបំផុតទាក់ទងនឹងការកំណត់នានានៅក្នុងវិស័យអាកាសចរណ៍។ ការចរចាស្ដីអំពីកិច្ចព្រមព្រៀងនេះបានដំណើរការឡើងវិញកាលពីឆ្នាំ ២០១៦ និងបញ្ចប់ជាស្ថាពរកាលពីថ្ងៃទី ០២ មិថុនា ២០២១។ កិច្ចព្រមព្រៀងនេះកំពុងរង់ចាំបណ្ដាប្រទេសជាសមាជិករបស់ EU និង ASEAN អនុម័តការនីតិវិធី។

ASEAN-EU CATA ត្រូវបានគេរំពឹងថា នឹងនាំមកនូវឱកាសធំធេងសម្រាប់បណ្ដាក្រុមហ៊ុនអាកាសចរណ៍របស់ អាស៊ាន និង សហភាពអឺរ៉ុប ក្នុងការដឹកភ្ញៀវ និងទំនិញតាមផ្លូវអាកាសរវាងតំបន់ទាំងពីរនេះ។ កិច្ចព្រមព្រៀងនេះនឹងជួយពន្លឿនការស្ដារសេវាកម្មអាកាសចរណ៍រវាងតំបន់ទាំងពីរ ក្រោយពីវិបត្តិកូវីដ-១៩។ អ្នកដំណើរនឹងមានជម្រើសច្រើនជាងមុន ទាក់ទងនឹងទីតាំងចុះចត ចំនួនជើងហោះហើរជាដើម រវាង អាស៊ីអាគ្នេយ៍ និង ទ្វីបអឺរ៉ុប។

អាស៊ាន និង សហភាពអឺរ៉ុប ចុះកិច្ចព្រមព្រៀងដឹកជញ្ជូនតាមអាកាសអន្តរតំបន់ដំបូងគេក្នុងពិភពលោក កាលពីថ្ងៃទី ១៧ តុលា ២០២២ នៅ ឥណ្ឌូណេស៊ី

កិច្ចព្រមព្រៀងនេះក៏នឹងអនុញ្ញាតឱ្យបណ្ដាក្រុមហ៊ុនអាកាសចរណ៍របស់បណ្ដាប្រទេសក្នុងតំបន់ទាំងពីរ អាចដឹកអ្នកដំណើរបានរហូតដល់ ១៤ ជើងក្នុង ១ សប្ដាហ៍ និងមិនមានការកំណត់ចំនួនជើងហោះហើរសម្រាប់ការដឹកទំនិញទៅកាន់ប្រទេសនីមួយៗនៃតំបន់ម្ខាងទៀត។

ASEAN-EU CATA អាចចូលមកជំនួសកិច្ចព្រមព្រៀងទ្វេភាគីជាង ១៤០ នៅក្នុងវិស័យអាកាសចរណ៍នៃបណ្ដាប្រទេសក្នុងតំបន់អឺរ៉ុប និង អាស៊ាន។

លោក Budi Karya Sumadi ប្រធានកិច្ចប្រជុំរដ្ឋមន្ត្រីដឹកជញ្ជូនអាស៊ានលើកទី ២៨ និងជា រដ្ឋមន្ត្រីក្រសួងដឹកជញ្ជូនឥណ្ឌូណេស៊ី បានឱ្យដឹងថា «ការចុះហត្ថលេខាលើកិច្ចព្រមព្រៀងនេះនឹងបង្កើតឱ្យមានឯកភាពយ៉ាងសុខដុម ដើម្បីពន្លឿនដំណើរការស្ដារសេដ្ឋកិច្ច ពិសេសគឺការតភ្ជាប់វិស័យអាកាសចរណ៍រវាង អាស៊ាន និង អឺរ៉ុប»៕

October 18, 2022

Author: សឿន សំណាង