សឿន សំណាង - La Reine Media

ដោយសារតែវិជ្ជមាននឹងកូវីដ-១៩ សម្តេចតេជោ ហ៊ុន សែន នឹងត្រឡប់មកដល់កម្ពុជាវិញនៅល្ងាចនេះ

ប្រមុខរាជរដ្ឋាភិបាលកម្ពុជា បានប្រកាសថា បានធ្វើតេស្តរកវីរុសបង្កជំងឺកូវីដ-19 ជារៀងរាល់ថ្ងៃ ពិសេសនៅមុនពេលចេញដំណើរឡើងយន្តហោះទៅកាន់ ឥណ្ឌូណេស៊ី តែពុំមានឃើញអ្វីនោះឡើយ។

ប្រសាសន៍ខាងលើរបស់ សម្ដេចតេជោ ហ៊ុន សែន ត្រូវបានលើកឡើងក្រោយពីពេទ្យនៅ ឥណ្ឌូណេស៊ី បញ្ជាក់ថា សម្ដេចវិជ្ជមាននឹងកូវីដ-19 បន្ទាប់ពីបានធ្វើតេស្ត។

«ខ្ញុំមិនច្បាស់ថាមេរោគនេះមកនៅជាមួយខ្លួនខ្ញុំចាច់ពីពេលណាមកនោះឡើយតែអ្វីដែលច្បាស់ពេលមកដល់ពេទ្យឥណ្ឌូណេស៊ី យកសំណាកពេលល្ងាច លុះព្រឹកឡើងបញ្ជាក់ថា វិជ្ជមានកូវីដ-១៩ ដែលយើងត្រូវតែទទួលស្គាល់ បើទោះជាក្នុងខ្លួនយើងមិនមានអាការៈចម្លែកក៏ដោយ» នេះបើតាមប្រសាសន៍របស់សម្ដេចតេជោ ហ៊ុន សែន។

ប្រមុខរាជរដ្ឋាភិបាលកម្ពុជា ក៏បានសម្រេចឱ្យប្រតិភូកម្ពុជា វិលត្រឡប់មក កម្ពុជា វិញ ដើម្បីសុវត្តិភាពសម្រាប់ប្រតិភូដែលចូលរួមប្រជុំ ខណៈដែលតំណាងប្រទេសអាស៊ាន កំពុងចរចាប្រគល់ជូនឥណ្ឌូណេស៊ី ធ្វើជាតំណាង។

November 15, 2022

ម្ចាស់ Amazon ប្រកាសថា បរិច្ចាគទ្រព្យសម្បត្តិមួយភាគធំសម្រាប់កិច្ចការមនុស្សធម៌

មហាសេដ្ឋី ជេហ្វ បេហ្សូស (Jeff Bezos) និយាយថា នឹងបរិច្ចាគមួយភាគធំនៃទ្រព្យសម្បត្តិតម្លៃ 124 ពាន់លានដុល្លារអាម៉េរិករបស់គាត់ ដើម្បីជួយដល់កិច្ចការទប់ទល់នឹងបម្រែបម្រួលអាកាសធាតុ និងគាំទ្រដល់ក្រុមមនុស្សដែល «អាចបង្កើតសាមគ្គីភាពនៃមនុស្សជាតិ»។

នៅក្នុងកិច្ចសម្ភាសរបស់ CNN នៅឯគេហដ្ឋានផ្ទាល់ខ្លួននៅ វ៉ាស៊ីងតោន កាលពីថ្ងៃទី 13 វិច្ឆិកា មហាសេដ្ឋី ជេហ្វ បេហ្សូស ឆ្លើយថា «មាន» បន្ទាប់ពីត្រូវបានសួរថា «មានបំណងបរិច្ចាគទ្រព្យមួយភាគធំដែរ ឬទេ»។

នេះគឹជាលើកដំបូងដែលលោក ជេហ្វ បេហ្សូស ប្រកាសអំពីការបរិច្ចាគទ្រព្យមួយភាគធំរបស់គាត់។ មនុស្សជាច្រើនធ្លាប់បានរិះគន់ថា លោក ជេហ្វ បេហ្សូស មិនចុះហត្ថលេខាលើកិច្ចសន្យាបរិច្ចាគ ជាកិច្ចព្រមព្រៀងដែលមានកំពូលអ្នកមានរាប់រយនាក់ក្នុងពិភពលោក បានចុះហត្ថលេខានាពេលកន្លង។

មហាសេដ្ឋី ជេហ្វ បេហ្សូស និងភរិយា ក៏បានប្រកាសអំពីខ្ទង់ប្រាក់រង្វាន់សម្រាប់ភាពក្លាហាននិងអរិយធម៌ ចំនួន 100 លានដុល្លារសម្រាប់តន្ត្រីករ និងជាអ្នកចម្រៀងមួយរូបឈ្មោះ Dolly Parton។ នេះគឺជាលើកទីបីហើយដែលលោក បេហ្សូស បានផ្ដល់រង្វាន់នេះ ក្រោយពីបានប្រគល់រង្វាន់តម្លៃដូចគ្នានដល់មេចុងភៅ Jose Andres ដែលជាអ្នកបានចំណាយប្រាក់ផ្ទាល់ខ្លួនសម្រាប់ផ្ដល់អាហារដល់ ជនជាតិអ៊ុយក្រែន និងរង្វាន់សម្រាប់សកម្មជនប្រឆាំងនឹងបម្រែបម្រួលអាកាសធាតុ Van Jones។ លោក បេហ្សូស និយាយថា អ្នកដែលបានទទួលរង្វាន់គឺសុទ្ធតែជាអ្នកដែលមានសមត្ថភាពបង្កើតសាមគ្គីភាពដើម្បីដោះស្រាយបញ្ហាធំ។

លោក បេហ្សូស ដែលបច្ចុប្បន្នគឺជាអ្នកមានជាងគេលំដាប់ទី 4 ក្នុងពិភពលោក (យោងតាម Bloomberg) មិនទាន់បានកំណត់គោលដៅបរិច្ចាគប្រាក់ប៉ុន្មានក្នុងជីវិតរបស់គាត់នៅឡើយ។ ប៉ុន្តែ គាត់ធ្លាប់បានសន្យាថា នឹងបរិច្ចាគ 10 ពាន់លានដុល្លារ ដែលស្មើនឹង 8% នៃទ្រព្យសរុបនាបច្ចុប្បន្ន ក្នុងរយៈពេល 10 ឆ្នាំ សម្រាប់មូលនិធិផែនដីបេហ្សូស។

November 15, 2022

សេដ្ឋកិច្ចរបស់ពិភពលោកទាំងមូល នឹងទៅជាយ៉ាងណានៅឆ្នាំក្រោយ?

2022 គឺជាឆ្នាំដ៏អាក្រក់ចំពោះសេដ្ឋកិច្ចពិភពលោក ប៉ុន្តែ នៅឆ្នាំក្រោយ សេដ្ឋកិច្ចអាចនឹងកាន់តែអាក្រក់ជាងបច្ចុប្បន្ន នេះបើតាម Bloomberg។

ប្រវត្តិសាស្ត្របានបង្ហាញថា ការដំឡើងអត្រាការប្រាក់ជាបន្តបន្ទាប់របស់ រតនាគារជាតិអាម៉េរិក (Fed) នឹងរុញច្រានសេដ្ឋកិច្ចរបស់ សហរដ្ឋអាម៉េរិក និងពិភពលោកឱ្យធ្លាក់ទៅក្នុងវិបត្តិ។ ទន្ទឹមនឹងនេះ ការដែលតម្លៃឧស្ម័ននៅ អឺរ៉ុប នឹងបន្តឡើងថ្លៃ ក៏នឹងមិនមែនជារឿងចម្លែក។ ចំណែកគោលនយោបាយប្រឆាំងជំងឺរាតត្បាតដ៏តឹងរឹង និងទីផ្សារអចលនទ្រព្យជួបបញ្ហា ក៏ធ្វើឱ្យកំណើនសេដ្ឋកិច្ចរបស់ ប្រទេសចិន មានហានិភ័យត្រូវដាំក្បាលចុះ។

ក្នុងសេណារីយ៉ោអាក្រក់ បញ្ហាទាំងឡាយខាងលើអាចកើតមានឡើងដំណាលគ្នា។ ពេលនោះ វិស័យសេដ្ឋកិច្ចទូទាំងសកលលោកនឹងបាត់បង់ប្រហែល 5 ទ្រីលាន (5,000,000,000,000.00) ដុល្លារអាម៉េរិក នេះបើតាមការព្យាកររបស់ទីភ្នាក់ងារសារព័ត៌មាន Bloomberg Economics។

ទិដ្ឋភាពមិនមានអំណោយផលល្អនោះបានកើតឡើងជាបណ្ដើរៗនៅក្នុងឆ្នាំនេះ។ ដំណាក់កាលអត្រាការប្រាក់ទាប តម្រូវការខ្ពស់ពី ប្រទេសចិន ដែលភូមិសាស្ត្រនយោបាយមិនសូវមានការប្រែប្រួល គឺជាកត្តាសំខាន់ដែលបាននាំមកនូវការរីកចម្រើន និងតម្លៃទំនិញមានស្ថិរភាពអស់ជាច្រើនទសវត្សរ៍សម្រាប់ពិភពលោក។ រាល់ការប្រែប្រួលវិជ្ជមានទាំងនេះបានបាត់ខ្លួនទាំងស្រុងនៅក្នុងឆ្នាំនេះ ធ្វើឱ្យអតិផរណាកើនឡើងខ្ពស់បំផុតក្នុងរង្វង់ច្រើនទសវត្សរ៍ ហើយទីផ្សារហិរញ្ញវត្ថុក៏បានខូចខាតរហូតដល់រាប់ទ្រីលានដុល្លារអាម៉េរិក។

ក៏ប៉ុន្តែ នៅតែមានក្ដីសង្ឃឹមសម្រាប់ឆ្នាំ 2023។ Fed អាចនឹងនាំអតិផរណាទៅកាន់គោលដៅដោយមិនបង្កឱ្យមានបញ្ហាបាត់បង់ការងារច្រើន។ ចំណែកអាកាសធាតុកក់ក្ដៅក៏អាចជួយឱ្យ អឺរ៉ុប រួចផុតពីឱនភាពសេដ្ឋកិច្ច។ប្រទេសចិន អាចនឹងបន្ធូរបន្ថយវិធានការទប់ស្កាត់ជំងឺកូវីដ-19។ លទ្ធភាពនេះមួយចំនួនបានកើតឡើងកាលពីសប្ដាហ៍កន្លងរួចហើយ នៅពេលទីផ្សារនានាមានពិន្ទុកើនឡើងដោយសារអតិផរណារបស់ សហរដ្ឋអាម៉េរិក មានកម្រិតទាបជាងការគ្រោងទុក និងសញ្ញាទាំងឡាយស្ដីពីលទ្ធភាពនៃការកែសម្រួលវិធានការទប់ស្កាត់ជំងឺរាតត្បាតរបស់ ប្រទេសចិន។

សូម្បីតែនៅពេលសញ្ញាវិជ្ជមានទាំងឡាយខាងលើមិនបានក្លាយជាការពិតក៏ដោយ ក៏នឹងនៅមានក្រុមអ្នកវិនិយោគដែលមានសុទិដ្ឋិនិយម ចាប់ផ្ដើមផ្សងព្រេងជាមួយនឹងការរំពឹងដែលថា សេដ្ឋកិច្ចនឹងងើបឡើងវិញ ដោយសារយល់ថា អត្រាការប្រាក់បានឡើងដល់ចំណុចខ្ពស់ខ្លាំង ហើយកំណើនសេដ្ឋកិច្ចក៏បានធ្លាក់ដល់បាត។

ក៏ប៉ន្តែ Bloomberg បានឱ្យដឹងថា ក្រោយការខូចខាតអស់ជាច្រើនឆ្នាំដោយសារតែកូវីដ-19 សង្គ្រាម និងបញ្ហាកង្វះប្រភពផ្គត់ផ្គង់ គេពិតជាពិបាកក្នុងការជឿជាក់ទៅលើភាពវិជ្ជមានរបស់សេដ្ឋកិច្ច ដោយសារតែកត្តាហានិភ័យមួយចំនួនមានដូចជា «ហានិភ័យនៃការដំឡើងអត្រាការប្រាក់របស់ Fed, ហានិភ័យបំណុលសាធារណៈ, កង្វះថាមពលនៅ អឺរ៉ុប, សុខភាពរបស់ ប្រទេសចិន រួមនឹងហានិភ័យជាច្រើនផ្សេងទៀត» ដែលអាចប៉ះពាល់ធ្ងន់ធ្ងរដល់ការងើបឡើងរបស់សេដ្ឋកិច្ចពិភពលោក៕

November 15, 2022

អង្គការសហប្រជាជាតិ អំពាវនាវដល់ រុស្ស៊ី ឱ្យផ្ដល់សំណងដល់ អ៊ុយក្រែន

មហាសន្និបាតអង្គការសហប្រជាជាតិ អនុម័តសេចក្ដីសម្រេចស្ដីពីការគាំទ្រយន្តការស្នើឱ្យ រុស្ស៊ី ផ្ដល់សំណងលើការខូចខាតដល់មនុស្ស និងទ្រព្យសម្បត្តិទៅឱ្យ អ៊ុយក្រែន នៅក្នុងសង្គ្រាម។

សេចក្ដីសម្រេចដែលមិនមានលក្ខណៈចាប់បង្ខំនេះ ត្រូវបានមហាសន្និបាតអង្គការសហប្រជាជាតិ អនុម័ត បន្ទាប់ពីការបោះឆ្នោតកាលពីថ្ងៃទី 14 វិច្ឆិកា ដែលទទួលបានការគាំទ្រ 94 សំឡេង, ប្រឆាំង 14 សំឡេង និង អនុបវាទ 63 សំឡេង។

រុស្ស៊ី ចិន គុយបា កូរ៉េខាងជើង និង អ៊ីរ៉ង់ ស្ថិតក្នុងចំណោមប្រទេសដែលបោះឆ្នោតប្រឆាំង ខណៈដែល ឥណ្ឌា អ៊ីស្រាអែល និង ប្រេស៊ីល ស្ថិតក្នុងចំណោមប្រទេសបោះឆ្នោតអនុបវាទ។

យោងតាមសេចក្ដីសម្រេច រុស្ស៊ី «ត្រូវតែទទួលផលវិបាកផ្លូវច្បាប់សម្រាប់រាល់សកម្មភាពខុសច្បាប់អន្តរជាតិ ក្នុងនោះក៏មានការបង់ប្រាក់សំណងសម្រាប់រាល់ការខូចខាតដែលកើតដោយសារសកម្មភាពទាំងនេះ»។ សេចក្ដីសម្រេចខាងលើក៏បានអំពាវនាវឱ្យបង្កើតស្ថិតិផ្លូវការមួយស្ដីពីការខូចខាតដែល អ៊ុយក្រែន បានទទួលរងនៅក្នុងសង្គ្រាមជាមួយ រុស្ស៊ី។

សេចក្ដីសម្រេចកាលពីថ្ងៃទី 14 វិច្ឆិកា អាចជួយឱ្យ អ៊ុយក្រែន លើកឡើងនូវការទាមទារចំពោះទ្រព្យដែលមានតម្លៃរាប់រយពាន់លានដុល្លាររបស់ រុស្ស៊ី ដែល សហរដ្ឋអាម៉េរិក និងសម្ព័ន្ធអឺរ៉ុប បានបង្កក បន្ទាប់ពីសង្គ្រាមបានផ្ទុះឡើង។

ឯកអគ្គរដ្ឋទូតអ៊ុយក្រែន ប្រចាំអង្គការសហប្រជាជាតិ Sergiy Kyslytsya អះអាងថា ធ្លាប់មានករណីបែបនេះរួចមកហើយ ដែលកាលណោះ អ៊ីរ៉ាក់ ត្រូវសងការខូចខាត 52.4 ពាន់លានដុល្លារអាម៉េរិក ឱ្យ កូវ៉ែត ក្រោយពីការវាយប្រហារកាលពីឆ្នាំ 1990។ សកម្មភាពនេះត្រូវបានតាមដានដោយ ក្រុមប្រឹក្សាសំណងនៃអង្គការសហប្រជាជាតិ។

ចំណែក ឯកអគ្គរដ្ឋទូតរុស្ស៊ី នៅ អង្គការសហប្រជាជាតិ Vassily Nebenzia បានចោទ អ៊ុយក្រែន និងប្រទេសលោកខាងលិចថា កំពុងរកវិធីដើម្បី «ការពារអំពើរឹបអូសទ្រព្យដែលបានបង្កក ក្នុងគោលដៅប្រើប្រាស់ដើម្បីអូសបន្លាយពេល និងបង្កើនសភាពធ្ងន់ធ្ងរដល់សង្គ្រាម»។

ក្រុមមន្ត្រីអ៊ុយក្រែន កាលពីថ្ងៃទី 22 កញ្ញា បានឱ្យដឹងថា ការខូចខាតដែលប្រទេសនេះទទួលរងគឺឡើងដល់ជិត 1 ទ្រីលានដុល្លារអាម៉េរិក (1,000,000,000,000.00) ច្រើនជាង 5 ដង ធៀបនឹង GDP ប្រចាំឆ្នាំអំឡុងពេលមុនសង្គ្រាមរបស់ប្រទេសនេះ៕

November 15, 2022

វិស័យទេសចរណ៍របស់កោះ Bali សង្ឃឹមថានឹងងើបឡើងវិញនៅក្នុងកិច្ចប្រជុំកំពូល G20

នៅពេលចំណាប់អារម្មណ៍របស់ពិភពលោកបាញ់ឆ្ពោះទៅរកកិច្ចប្រជុំកំពូល G20 នៅ Bali ដែលមានការចូលរួមរបស់មេដឹកនាំរាប់សិបរូបមកពីបណ្ដាប្រទេសអ្នកមានៗនៅជុំវិញពិភពលោក វិស័យទេសចរណ៍នៅកោះនេះក៏កំពុងត្រូវបានរំពឹងថា នឹងងើបឡើងវិញ។

កោះ Bali គឺជាទីរស់នៅរបស់ប្រជាជនជាង 4 លាននាក់ដែលរកប្រាក់ចំណូលសំខាន់បានពីវិស័យទេសចរណ៍។ មុនពេលវិបត្តិកូវីដ-19 កើតឡើង កោះ Bali បានទទួលភ្ញៀវបរទេសជាង 6.2 លាននាក់ជារៀងរាល់ឆ្នាំ។

ក៏ប៉ុន្តែ នៅពេលកូវីដ-19 ករណីដំបូងត្រូវបានរកឃើញនៅ ឥណ្ឌូណេស៊ី កាលពីខែមីនា 2020 ស្ថានភាពបានប្រែប្រួលទាំងស្រុង។ ភ្ញៀវបរទេសមកកាន់កោះ Bali ថយចុះមកនៅត្រឹម 1 លាននាក់ក្នុងឆ្នាំ 2020 នេះបើតាម Reuters។ មកដល់ឆ្នាំ 2021 តួលេខនេះបានថយចុះមកនៅត្រឹមតែប៉ុន្មានសិបនាក់ប៉ុណ្ណោះ។

ដោយសារតែមិនមានភ្ញៀវ ហាងទំនិញ ភោជនីយដ្ឋាន និងតំបន់លំហែកាយក៏ត្រូវបានបិទទ្វារជាបន្តបន្ទាប់ ខណៈដែលពលរដ្ឋជាង 92,000 នាក់ដែលរស់ដោយសារវិស័យទេសចរណ៍ក៏ត្រូវបាត់បង់ការងារ និងត្រូវរកការងារថ្មី។

សេដ្ឋកិច្ចរបស់កោះ Bali ក៏ធ្លាក់ចុះជាបន្តបន្ទាប់ ក្នុងនោះ កំណើនក្នុងឆ្នាំ 2020 ស្មើនឹង 9.3% ក្រោមសូន្យ ធៀបនឹងឆ្នាំ 2019 ហើយបន្តធ្លាក់ដល់ 2.5% ក្រោមសូន្យនៅឆ្នាំ 2021។

ក៏ប៉ុន្តែ អំឡុងចុងឆ្នាំ 2022 ស្ថានភាពទំនងជាអាចនឹងប្រសើរឡើងវិញបន្តិច។ គិតត្រឹមខែតុលាកន្លងទៅ ភ្ញៀវបរទេសជាង 1.5 លាននាក់ និងភ្ញៀវក្នុងប្រទេសជាង 3.1 លាននាក់ បានមកលេងកោះ Bali។

មេដឹកនាំកោះ Bali លោក Dewa Made Indra បានឱ្យដឹងថា ការដែលព្រលានយន្តហោះអន្តរជាតិ Bali បើកដំណើរការឡើងវិញ បូករួមនឹងការដែលភ្ញៀវរាប់ពាន់នាក់មកចូលរួមកិច្ចប្រជុំ G20 និងកិច្ចប្រជុំពាក់ព័ន្ធ ត្រូវបានរំពឹងថា នឹងអាចជួយដល់លើកស្ទួយសេដ្ឋកិច្ចតំបន់នេះបានមួយកម្រិតធំ៕

November 14, 2022

បុរសដែលមានជំនាញក្នុងការផលិត «ពានមាស» សម្រាប់ World Cup

ចាប់តាំងពីឆ្នាំ 2014 ឱ្យតែជិតដល់រដូវកាល World Cup លោក ង្វៀន វ៉ាន់ តាម (Nguyen Van Tam) នៅ ទីក្រុងហូជីមិញ (ព្រៃនគរ) ប្រទេសវៀតណាម ក៏បើកកន្លែងច្នៃចម្លងពាន «World Cup FIFA» សម្រាប់លក់ឱ្យអតិថិជនយកទៅធ្វើជាអំណោយអនុស្សាវរីយ៍។

ជំហានដំបូងគឺត្រូវចាក់ពុម្ពដោយប្រើប្រាស់ជ័រ composite និងធាតុគីមីដទៃមួយចំនួនទៀត ទៅតាមរូបមន្តដោយឡែក។ «ពិបាកបំផុតគឺការធ្វើពុម្ព ព្រោះថាវាកំណត់អំពីរូបរាងរបស់ផលិតផល។ ខ្ញុំត្រូវស្រាវជ្រាវទៅលើរូបរបស់ពានដែលថតពីគ្រប់ជ្រុងដើម្បីធ្វើតាម។ រដូវកាល World Cup នីមួយៗ ខ្ញុំត្រូវធ្វើពុម្ពផ្សេងៗគ្នា» លោក ង្វៀន វ៉ាន់ តាម ប្រាប់ដូច្នេះ។

កាលពីថ្ងៃទី 11 តុលា នៅក្នុងរោងសិប្បកម្មទំហំប្រហែល 50 ម៉ែត្រក្រឡា លោក តាម និងបុគ្គលិកពីរនាក់ទៀត នាំគ្នាធ្វើពាន។ លោក តាម វ័យ 59 ឆ្នាំ បានឱ្យដឹងថា «ខ្ញុំមានបំណងធ្វើពាន World Cup នេះតាំងពីទសវត្សរ៍ឆ្នាំ 1990 ប៉ុន្តែ រហូតដល់ឆ្នាំ 2014 ទើបមានឱកាសធ្វើ»។

ក្រោយរយៈពេលប្រហែល 10 នាទីដែលទុកឱ្យសមាសធាតុចុះត្រជាក់ និងរឹង ពុម្ពក៏ត្រូវបានបើកចេញ។ ដោយសារមានពុម្ពតែមួយ ហើយរាល់ដំណាក់កាលត្រូវធ្វើដោយដៃ ដូច្នេះក្នុងមួយថ្ងៃពួកគេអាចចាក់ពុម្ពពានបានត្រឹមតែជិត 10 ប៉ុណ្ណោះ។

ក្រោយពីបើកពុម្ព ពួកគេយកក្រដាសខាត់ សម្អាតពាន មុនពេលលាបថ្នាំ គូររូប និងពាសមាស។ មាសសុទ្ធប្រភេទសន្លឹកត្រូវបានពាសពេញផ្ទៃរបស់ពាន ដែលទាំងអស់ប្រហែលពី 40 ទៅ 50 សន្លឹក។ កិច្ចការនេះអាចចំណាយពេលប្រហែល 90 នាទី។

ម្ចាស់សិប្បកម្មខាងលើបានឱ្យដឹងថា «សិប្បកម្មនេះអាចពាសប្រភេទមាសទៅតាមការស្នើរបស់អតិថិជន»។

ផលិតផលនេះមានរូបរាងប្រហាក់ប្រហែលនឹងពាន World Cup ពិត ដោយវាមានកម្ពស់ 36.5 សម, ទទឹងធំបំផុត 13 សម ប៉ុន្តែមានទម្ងន់ស្រាលជាង ពោលគឺប្រហែល 1.5 គីឡូក្រាម។

ពានចម្លងរបស់សិប្បកម្មលោក តាម មានតម្លៃប្រហែល 1 លានដុង (40.5 ដុល្លារអាម៉េរិក) អាស្រ័យទៅលើតម្លៃរបស់មាសដែលយកមកពាស។ មកដល់បច្ចុប្បន្ន សិប្បកម្មនេះបានផលិតពាន World Cup ប្រហែល 50 រួចទៅហើយ។ ក្នុងរដូវកាល World Cup 2022 នេះ លោក តាម មានគម្រោងផលិតឱ្យបាន 500 ពាន។

World Cup 2022 ដែលមានក្រុមបាល់ទាត់ 32 ក្រុមចូលរួម នឹងធ្វើការប្រកួតនៅ ប្រទេសកាតា ចាប់ពីថ្ងៃទី 20 វិច្ឆិកា ដល់ 18 ធ្នូ 2022។ ឆ្នាំនេះ World Cup នឹងប្រកួតក្នុងរយៈពេល 29 ថ្ងៃ មិនមែន 32 ថ្ងៃដូចកាលពីមុន។ នេះក៏ជាលើកទីមួយហើយដែល World Cup ត្រូវបានធ្វើឡើងក្នុងរដូវរងា ដោយសារតែទឹកដីរបស់ប្រទេសម្ចាស់ផ្ទះមានអាកាសធាតុក្ដៅខ្លាំងនៅរដូវក្ដៅ៕

November 14, 2022

តាក់ស៊ីហោះ 2X របស់ក្រុមហ៊ុន Volocopter ហោះហើរសាកល្បងដំបូងនៅ បារីស

(បារាំង)-ម៉ូដែលតាក់ស៊ីហោះអគ្គិសនីដែលបំពាក់ rotor ច្រើន បានហោះហើរសាកល្បងលើកដំបូងនៅក្បែរ ទីក្រុងបារីស កាលពីថ្ងៃទី 10 វិច្ឆិកា មុនពេលត្រៀមសម្រាប់ការហោះហើរពាណិជ្ជកម្មចាប់ពីឆ្នាំ 2024។

យន្តហោះសាកល្បងរបស់ Volocopter មាន rotor ចំនួន 8 បានហោះហើរសាកល្បងដឹកមនុស្សម្នាក់ពីព្រលានយន្តហោះ Pontoise-Cormeilles នៅជាយក្រុងបារីស និងហោះឆ្វែលក្នុងរយៈពេលខ្លី។ បច្ចុប្បន្ន Volocopter មានល្បឿនអតិបរមា 90 គឺឡូម៉ែត្រ/ម៉ោង និងហោះបានចម្ងាយ 20 គីឡូម៉ែត្រ នេះបើតាម Reuters ចុះផ្សាយកាលពីថ្ងៃទី 12 វិច្ឆិកា។

Dirk Hoke នាយកប្រតិបត្តិរបស់ក្រុមហ៊ុន Volocopter របស់ អាល្លឺម៉ង់ បានឱ្យដឹងថា ក្នុងរង្វង់ 18 ខែទៀត ពួកគេនឹងត្រៀមស្នើសុំលិខិតអនុញ្ញាតសម្រាប់ម៉ូដែលយន្តហោះ Volocopter 2X នេះ ហើយសង្ឃឹមថា អាចហោះហើរពាណិជ្ជកម្មរយៈចម្ងាយខ្លីចាប់ពីឆ្នាំ 2024 នៅពេល បារីស ប្រារព្ធព្រឹត្តិការណ៍កីឡារដូវក្ដៅ (Summer Olympic Games)។

ក្រុមហ៊ុនខាងលើមានបំណងធ្វើឱ្យយន្តហោះមានកៅអី 2 នេះ អាចហោះហើរដោយស្វ័យប្រវត្ត ប៉ុន្តែបានទទួលស្គាល់ថា នៅមានការងារជាច្រើនទៀតត្រូវធ្វើ ក្នុងនោះមានដូចជា ផ្នែកហេដ្ឋារចនាសម្ព័ន្ធ ដែនអាកាស និងការរង់ចាំទទួលស្គាល់ពីសាធារណជនជាដើម។

អ្នកបើកបរសាកល្បង Paul Stone បានឱ្យដឹងថា យន្តហោះនេះងាយស្រួលបើកបរជាង បើធៀបនឹងឧទ្ធម្ភាគចក្របច្ចុប្បន្ន។

Volocopter 2X ដំណើរការទៅតាមបច្ចេកវិទ្យា drone និងប្រើប្រាស់រ៉ូបូតក្នុងការប្ដូរថ្មមុនពេលបន្តការហោះហើរ។ ក្រុមហ៊ុន Volocopter កំពុងឆ្ពោះទៅរកគោលដៅដឹកអ្នកដំណើរឱ្យបាន 100,000 នាក់នៅពាសពេញពិភពលោកជារៀងរាល់ម៉ោងក្នុងរង្វង់ 10 ឆ្នាំខាងមុខ។ ដោយសារតែប្រើប្រាស់អគ្គិសនី ដូច្នេះ Volocopter 2X មិនបំភាយឧស្ម័ន ហើយក៏មិនបង្កសំឡេងរំខាន៕

https://www.youtube.com/watch?v=pcxLOunnfrw

November 14, 2022

ជនទុច្ចរិតអាចបើកសោទូរស័ព្ទ Android បានយ៉ាងងាយ ដោយគ្រាន់តែប្ដូរស៊ីម (SIM) ថ្មី

បន្ទាប់ពីត្រូវជាប់សោស៊ីមកាត់ (SIM) លោក David Schutz បានប្រទះឃើញដោយចៃដន់ថា ការប្ដូរស៊ីមអាចធ្វើឱ្យទូរស័ព្ទ Google មិនសួររកពាក្យសម្ងាត់សម្រាប់បើកសោទូរស័ព្ទ។

David Schutz បានឱ្យដឹងថា គាត់បានរាយការណ៍ប្រាប់ Google តាំងពីខែមិថុនា ប៉ុន្តែ រហូតដល់ថ្ងៃទី 07 វិច្ឆិកា ទើបបញ្ហាត្រូវបានដោះស្រាយ។ David Schutz ណែនាំឱ្យអ្នកប្រើប្រាស់ទូរស័ព្ទ Android ធ្វើបច្ចុប្បន្នភាពកំណែជួសជុលថ្មី ដើម្បីចៀសវាងត្រូវគេលួចចូលប្រើទូរស័ព្ទដោយប្រការណាមួយ។

កំហុសខាងលើអាចនាំឱ្យទូរស័ព្ទមួយចំនួនត្រូវជនទុច្ចរិតលួចបើកសោអេក្រង់ដោយការដាក់ស៊ីមដទៃ និងអនុវត្តកិច្ចការ 5 ជំហានដ៏ងាយស្រួលក្នុងរយៈពេលតែប៉ុន្មាននាទីប៉ុណ្ណោះ។

ការរកឃើញកំហុសដោយចៃដន់

បើទោះខ្លួនគឺជាអ្នកជំនាញផ្នែកការពារទិន្នន័យ ប៉ុន្តែ David Schutz មិនមែនស្រាវជ្រាវដោយផ្ទាល់អំពីប្រព័ន្ធប្រតិបត្តិ Android ឡើយ។ David Schutz រកឃើញកំហុសខាងលើដោយចៃដន់ប៉ុណ្ណោះនៅពេលប្រើប្រាស់ទូរស័ព្ទ Pixel 6 របស់ Google។

មានម្ដងនោះ ក្រោយពីថ្មអស់ថាមពលរលីង និងត្រូវបានបញ្ចូលថាមពលជាថ្មី ហើយបើកទូរស័ព្ទឡើងវិញ វាក៏ស្នើឱ្យ David Schutz បញ្ចូលលេខសម្ងាត់ PIN របស់ស៊ីម។ ដោយសារមិនចាំ និងបញ្ចូលខុស 3 ដង ស៊ីមរបស់ David Schutz ក៏ត្រូវបានបិទសោ និងត្រូវបញ្ចូលលេខសម្ងាត់ PUK បើសិនចង់បើកសោស៊ីម។

PUK គឺជាលេខការពារស៊ីមដែលមាន 8 ខ្ទង់ ដែលតែងត្រូវបានបោះពុម្ភនៅលើសម្បកស៊ីមកាតនៅពេលទិញពីក្រុមហ៊ុន។ David Schutz ត្រូវទៅរកសម្បកស៊ីម និងបញ្ចូលកូដ PUK ហើយប្ដូរលេខ PIN ថ្មីដើម្បីបើកសោស៊ីម។ ប៉ុន្តែ អ្វីដែលគាត់ភ្ញាក់ផ្អើលនោះគឺថា បន្ទាប់ពីបើកសោស៊ីម ទូរស័ព្ទ Pixel 6 របស់គាត់គ្រាន់តែស្នើឱ្យគាត់ប្រើប្រាស់ក្រយៅដៃប៉ុណ្ណោះដើម្បីបើកសោទូរស័ព្ទ។

«ប្រការនេះគួរតែមិនត្រូវកើតមាន។ ព្រោះថា បន្ទាប់ពីបើកដំណើរការទូរស័ព្ទ ឧបករណ៍នឹងស្នើឱ្យអ្នកប្រើប្រាស់បញ្ចូលពាក្យសម្ងាត់សម្រាប់បើកសោទូរស័ព្ទយ៉ាងតិចម្ដង» David Schutz វាយតម្លៃដូច្នេះ។ ការបញ្ចូលពាក្យសម្ងាត់បន្ទាប់ពីបើកដំណើរការម៉ាស៊ីន ក៏ជាដំណើរការដែលត្រូវបានតម្រូវនៅលើគ្រប់ឧបករណ៍ iOS ឬ Android នាបច្ចុប្បន្ន។

ក្រោយមក David Schutz ក៏បានធ្វើសាចុះសាឡើងដើម្បីបញ្ជាក់អំពីកំហុស និងធ្វើរបាយការណ៍។ David Schutz ក៏បានរកឃើញថា ទូរស័ព្ទរបស់គាត់មិនបានសួររកក្រយៅដៃ ប៉ុន្តែ អនុញ្ញាតឱ្យអ្នកប្រើប្រាស់ចូលទៅកាន់អេក្រង់កម្មវិធីដោយគ្រាន់តែបើកសោស៊ីម។

ទំព័រ Bleeping Computer វាយតម្លៃថា កំហុសនេះនឹងប៉ះពាល់ធ្ងន់ធ្ងរនៅក្នុងករណីមួយចំនួនដូចជា ទូរស័ព្ទត្រូវគេលួច ត្រូវគេរើសបាន ឬត្រូវប៉ូលិសស៊ើបអង្កេត។ល។

យោងតាមប្រកាសរបស់ Google កំហុសនេះប៉ះពាល់ដល់ឧករណ៍ទាំងអស់ដែលប្រើប្រាស់ Android កំណែ 10, 11, 12 និង 13 បើសិនមិនទាន់ធ្វើបច្ចុប្បន្នភាពកំណែជួសជុលខែវិច្ឆិកា 2022។ ដើម្បីមានសិទ្ធិចូលប្រើទូរស័ព្ទអ្នកដទៃ ជនទុច្ចរិតគ្រាន់តែប្រើប្រាស់ស៊ីមរបស់ពួកគេ (ដែលមានកូដ PUK ស្រាប់) និងស្កេនក្រយៅដៃ និងបញ្ចូល PIN ឱ្យខុសច្រើនដងដើម្បីឱ្យបិទសោស៊ីម ហើយក្រោយមកបញ្ចូលលេខកូដ PUK ដើម្បីបើកសោស៊ីម គឺជាការស្រេច។

ភាពយឺតយ៉ាវរបស់ Google

ក្រុមហ៊ុន Google បានចំណាយពេលយ៉ាងយូរដើម្បីជួសជុលកំហុសឆ្គងខាងលើនេះ។ យោងតាមសម្ដីរបស់ David Schutz នៅពេលរកឃើញកំហុសកាលពីខែមិថុនា គាត់បានរាយការណ៍ឱ្យ Google និងត្រូវបានផ្នែក Android VRP ទទួលយកភ្លាម។ David Schutz គ្រោងនឹងឆាប់ប្រកាសអំពីការរកឃើញរបស់ខ្លួននៅលើប្លក់ផ្ទាល់ខ្លួន បន្ទាប់ពី Google បញ្ចេញកំណែជួសជុស ហើយគាត់ក៏អាចទទួលបានប្រាក់រង្វាន់ពីកម្មវិធីប្រមាញ់កំហុសផ្នែកការពារទិន្នន័យរបស់ Google។ ការរកឃើញកំហុសធំបែបនេះ អ្នករាយការណ៍ដំបូងអាចទទួលបានប្រាក់រង្វាន់ឡើងដល់ 100,000 ដុល្លារអាម៉េរិក។

ប៉ុន្តែ 1 ខែក្រោយមក David Schutz បានទទួលដំណឹងពី Google ថា កំហុសដែលគាត់បានប្រទះឃើញ ត្រូវបានអ្នកស្រាវជ្រាវម្នាក់រាយការណ៍មុនគាត់បាត់ទៅហើយ ចំណែក Google ក៏កំពុងជួសជុសកំហុសនេះ។ ប្រការនេះមានន័យថា David Schutz មិនទទួលបានប្រាក់រង្វាន់ ហើយក៏មិនអាចប្រកាសអំពីកំហុសនេះ។

2 ខែក្រោយមកទៀត នៅពេលចូលរួមក្នុងព្រឹត្តិការណ៍ស្ដីពីការការពារភាពសម្ងាត់របស់ Google លោក David Schutz ក៏បានរកឃើញថា កំហុសនេះនៅតែមិនទាន់ត្រូវបានជួសជុលនៅឡើយ។ David Schutz ក៏បានជជែកដោយផ្ទាល់ជាមួយមនុស្សមួយចំនួននៅក្នុងផ្នែក Android VRP និងបានបង្ខំឱ្យពួកគេជួសជុលកំហុសនេះបន្ទាន់ មិនដូច្នេះទេ David Schutz នឹងប្រកាសជាសាធារណៈនៅចុងខែតុលា 2022។

ចុងក្រោយ កំហុសខាងលើក៏ត្រូវបាន Google ប្រកាសកាលពីដើមខែវិច្ឆិកា ដោយដាក់ឈ្មោះថា CVE-2022-20465។ លោក David Schutz បើទោះមិនមែនជាអ្នកដែលបានរកឃើញកំហុសខាងលើដំបូងគេ ប៉ុន្តែក៏បានទទួលប្រាក់រង្វាន់ 70,000 ដុល្លារអាម៉េរិក ដោយសាររបាយការណ៍ទីពីររបស់គាត់។ អ្នកប្រើប្រាស់ឧបករណ៍ Android ពិសេសគឺទូរស័ព្ទ Pixel ត្រូវបានណែនាំឱ្យធ្វើបច្ចុប្បន្នភាពប្រព័ន្ធដំណើរការថ្មីបំផុតដើម្បីចៀសវាងកំហុសខាងលើនេះ៕

November 14, 2022

ចាក់ជះធាតុរាវក្នុងពិព័រណ៍សាកសពអប់ (ម៉ាំមី/Mummy) ដើម្បីអំពាវនាវឱ្យការពារបរិស្ថាន (វីដេអូ)

(អេស្ប៉ាញ)-ក្រុមសកម្មជនបរិស្ថាននាំគ្នាចាក់ និងជះធាតុរាវទៅលើទូដាក់សាកសពអប់ដែលគេហៅថា ម៉ាំមី (Mummy) នៅក្នុងសារមន្ទីរមួយនៅ Barcelona ក្នុងបំណងអំពាវនាវឱ្យមានសកម្មភាពការពារបរិស្ថាន។

សកម្មជនបរិស្ថានពីររូប បានចាក់ និងជះធាតុរាវពណ៌ប្រផេះ និងក្រហមពីដបទឹកសុទ្ធ ទៅលើទូកញ្ចក់ការពារសាកសពអប់ដែលគេដាក់ជាការបង្ហាញត្រាប់ ព្រមទាំងជះធាតុរាវនោះទៅលើស៊ុមរូបគំនូរដែលព្យួរជុំវិញជញ្ជាំងនៅក្នុងសារមន្ទីរអេហ្ស៊ីប នៅ Barcelona កាលពីថ្ងៃទី 13 វិច្ឆិកា។

បន្ទាប់មក ពួកគេដាក់ដៃទៅលើប្រអប់កញ្ចក់តាំងបង្ហាញ និងលើកបដាដែលសរសេរថា «យុត្តិធម៌អាកាសធាតុ»។ នៅពេលក្រុមប៉ូលិសមកដល់ សកម្មជនបរិស្ថានទាំងពីរនាក់ក៏បានសហការ និងមិនត្រូវបានចាប់ខ្លួន ប៉ុន្តែ ខាងសារមន្ទីរនិយាយថា នឹងដាក់ពាក្យប្ដឹងដើម្បីទាមទារសំណង។

សកម្មជនខាងលើស្ថិតក្នុងក្រុម Futuro Vegetal ដែលជាអ្នកការពារបរិស្ថាននៅ ប្រទេសអេស្ប៉ាញ និងធ្លាប់បានដាក់ដៃទៅលើរូបគំនូរនៅក្នុងសារមន្ទីរ Prado នៅ ម៉ាឌ្រីដ កាលពីដើមខែវិច្ឆិកា។

នេះគឺជាសកម្មភាពថ្មីបំផុតនៅក្នុងចំណោមបាតុកម្មរបស់ក្រុមការពារបរិស្ថាន។ កន្លងមក ពួកគេធ្លាប់ជះទឹកស៊ុបទៅលើគំនូររបស់ Vicent van Gogh នៅ ទីក្រុងឡុងដ៍ និង រ៉ូម ព្រមទាំងបានប៉ាតដំឡូងបារាំងកិនទៅលើផ្ទាំងគំនូរដែលជាកំពូលស្នាដៃរបស់វិចិត្រករ Monet។

ក្រុម Futuro Vegetal បានឱ្យដឹងថា ករណីបាតុកម្មថ្មីបំផុតនេះគឺដើម្បី «បង្ហាញនូវស្ថានការណ៍បន្ទាន់» ដែលពិភពលោកកំពុងប្រឈម។ «បច្ចុប្បន្ន កាកសំណល់ជ័រ 99% នៅលើពិភពលោកត្រូវបានផលិតឡើងពីឥន្ធនៈហ្វូស៊ីល» ក្រុមនេះអះអាងដូច្នេះ។

Futuro Vegetal ចង់ឱ្យ អេស្ប៉ាញ ឈប់ផ្ដល់ជំនួយដល់វិស័យចិញ្ចឹមសត្វ និងស្នើឱ្យប្រើប្រាស់ប្រាក់ជំនួយនេះដើម្បីជំរុញការផលិតអាហារដែលមានប្រភពពីរុក្ខជាតិ៕

November 14, 2022

មេដឹកនាំរបស់ Volvo និយាយថា រថយន្តអគ្គិសនីនឹងមានតម្លៃទាបដូចរថយន្តសាំងនៅឆ្នាំ 2025

ប្រការនេះអាចមានលទ្ធភាពកើតឡើងចំពោះតែក្រុមហ៊ុនផលិតរថយន្ត Volvo និងបណ្ដាក្រុមហ៊ុនរថយន្តប្រណិត ឬជារឿងទូទៅ?

បណ្ដាក្រុមហ៊ុនផលិតរថយន្ត និងយានជំនិះដើរដោយម៉ាស៊ីនចំហេះក្នុងធ្លាប់បាននិយាយថា យានយន្តអគ្គិសនីនឹងមានតម្លៃថោកជាងបច្ចុប្បន្ន នៅពេលតម្លៃថ្មផ្ទុកថាមពលថយចុះ និងបរិមាណនៃការផលិតកើនឡើង។ ការយល់ឃើញនេះអាចត្រូវ ហើយវាអាចកើតឡើងជាបណ្ដើរៗទៅតាមពេលវេលា ប៉ុន្តែ កូវីដ-19 រួមនឹងបញ្ហាកង្វះបន្ទះអេឡិចត្រូនិក (semiconductor) និងតម្លៃប្រេងសាំងឡើងខ្ពស់ខ្លាំងបានជំរុញឱ្យតម្រូវការប្រើប្រាស់រថយន្តអគ្គិសនីកើនឡើងយ៉ាងគំហុក នាំឱ្យកើតមានឥទ្ធិពលបញ្ច្រាស ពោលគឺយានយន្តអគ្គិសនីកាន់តែឡើងថ្លៃនាបច្ចុប្បន្ន។

ថ្មីនេះ នាយកប្រតិបត្តិរបស់ក្រុមហ៊ុន Volvo លោក Jim Rowan ជឿថា រថយន្តអគ្គិសនីនឹងមានតម្លៃស្មើនឹងរថយន្តប្រេងសាំងម៉ូដែលដូចគ្នា យ៉ាងឆាប់ចាប់ពីឆ្នាំ 2025។ ក៏ប៉ុន្តែ បើសិនជាយើងនៅតែស្ថិតនៅក្នុងដំណាក់កាលវិបត្តិហិរញ្ញវត្ថុ ហើយតម្លៃប្រេងសាំងនៅតែស្ថិតក្នុងកម្រិតខ្ពស់ខ្លាំង នោះការព្យាកររបស់លោក Jim Rowan ទំនងជាអាចប្រែប្រួល។

លោក Jim Rowan មិនត្រឹមតែនិយាយដូចខាងលើទេ ប៉ុន្តែក៏បាននិយាយដល់រឿងផ្គត់ផ្គង់តាមតម្រូវការរបស់ក្រុមមនុស្សដែលមិនមានប្រាក់ច្រើនផងដែរ ដោយលោកលើកឡើងថា បណ្ដាក្រុមហ៊ុនផលិតរថយន្តអគ្គិសនី មិនគួររំពឹងទៅលើតែជំនួយរបស់រដ្ឋដើម្បីជោគជ័យឡើយ។ លោកថា ក្រុមហ៊ុនរថយន្តគួររកវិធីផលិតរថយន្តអគ្គិសនីដែលមនុស្សគ្រប់រូបចង់ទិញ និងមានតម្លៃទាបដែលគ្រប់គ្នាអាចទិញបាន។

យោងតាម Automotive News Europe នៅក្នុងព្រឹត្តិការណ៍មួយនាពេលថ្មីៗនេះនៅ ស្តុកខុល ប្រទេសស៊ុយអែត នាយកប្រតិបត្តិរបស់ Volvo បានឱ្យដឹងថា «យើងខ្ញុំគិតថា យើងខ្ញុំសម្រេចបាន [តម្លៃប្រហាក់ប្រហែលគ្នា] នៅឆ្នាំ 2025 ជាពេលវេលាដែលនឹងមានបច្ចេកវិទ្យាគ្រប់គ្រាន់ជួយបញ្ចុះតម្លៃថ្មផ្ទុកថាមពល។ បច្ចេកវិទ្យានឹងជួយឱ្យរថយន្តធ្វើដំណើរបានឆ្ងាយជាង។ រថយន្តអគ្គិសនីអាចត្រូវការថ្មដែលមានទម្ងន់ស្រាលជាង ប៉ុន្តែធ្វើដំណើរបានឆ្ងាយជាង ហើយមានតម្លៃទាបជាង – យើងនឹងសម្រេចបានចំណុចនោះ»។

ក្រុមហ៊ុន Volvo ដែលកន្លងមកធ្លាប់ប្រកាសថា នឹងលក់តែរថយន្តអគ្គិសនី 100% នាពេលអនាគត ថ្មីៗនេះទើបតែបានបញ្ចេញរថយន្តអគ្គិសនីប្រភេទតម្លៃមធ្យម EX90 មានកៅអី 3 ជួរ ដែលនឹងចូលមកជំនួស Volvo XC90 បច្ចុប្បន្ន។ Volvo ក៏បង្ហាញរថយន្ត crossover អគ្គិសនី ដែលមានរូបរាងតូចជាង EX90 ផងដែរ។ បច្ចុប្បន្ន ក្រុមហ៊ុននេះផ្គត់ផ្គង់រថយន្តអគ្គិសនីម៉ូដែលខ្នាតតូច XC40 Recharge និង C40 Recharge។

តម្លៃរថយន្តអគ្គិសនី EX90 ប្រភេទ SUV ដែលជិតត្រូវបាន Volvo ដាក់លក់ក្នុងទីផ្សារនឹងមានតម្លៃក្រោម 80,000 ដុល្លារអាម៉េរិក ជាមួយនឹងលក្ខណៈបច្ចេកទេសល្អ៕

November 14, 2022

Author: សឿន សំណាង