សឿន សំណាង - La Reine Media

លោក ដូណាល ត្រាំ ប្រកាសឈរឈ្មោះ «ដណ្ដើមកៅអី» ប្រធានាធិបតីអាម៉េរិក ជាថ្មី

អតីតប្រធានាធិបតីសហរដ្ឋអាម៉េរិក លោក ដូណាល ត្រាំ (Donald Trump) បានប្រកាសចូលរួមការប្រកួតប្រជែងដណ្ដើមកៅអីប្រធានាធិបតីនៅឆ្នាំ 2024 បន្ទាប់ពីបានដាក់ឯកសារឡើងទៅកាន់គណៈកម្មការរៀបចំការបោះឆ្នោតរបស់ សហរដ្ឋអាម៉េរិក។

«ការវិលត្រលប់របស់ ប្រទេសអាម៉េរិក ចាប់ផ្ដើមពីពេលនេះ» អតីតប្រធានាធិបតី វ័យ 76 ឆ្នាំ ថ្លែងនៅចំពោះមុខអ្នកគាំទ្រនៅ វិមាន Mar-a-Lago រដ្ឋ Florida កាលពីព្រលប់ថ្ងៃទី 15 វិច្ឆិកា។ «ដើម្បីធ្វើឱ្យ ប្រទេសអាម៉េរិក មហាអស្ចារ្យ និងរុងរឿងមកវិញ ព្រលប់នេះខ្ញុំសូមប្រកាសថា ឈរឈ្មោះជាបេក្ខភាពប្រធានាធិបតីអាម៉េរិក»។

ក្រោយការប្រកាសរបស់លោក ត្រាំ អ្នកគាំទ្រក៏បានស្រែកហ៊ោ និងទះដៃយ៉ាងយូរ។ នៅក្នុងសេចក្ដីថ្លែងការណ៍ លោក ត្រាំ ក៏បានសន្យាថា នឹងបង្រួបបង្រួមជាតិ។ «យើងនឹងនាំគ្រប់គ្នាឱ្យខិតចូលជិតគ្នា» លោក ត្រាំ អះអាងដូច្នេះ។

លោក ត្រាំ បញ្ជាក់ថា «ខ្ញុំធានាថា លោក បៃដិន នឹងមិនអាចមានអាណត្តិទីពីរ។ ប្រទេសជាតិយើងមិនទទួលយកប្រការនោះ»។

ឆ្លើយតបនឹងការប្រកាសឈរឈ្មោះបោះឆ្នោតជាថ្មីរបស់លោក ត្រាំ ប្រធានាធបិតីអាម៉េរិក លោក បៃដិន យល់ថា អតីតប្រធានាធិបតី «បានធ្វើឱ្យ ប្រទេសអាម៉េរិក បរាជ័យ» គ្រាដែលនៅកាន់អំណាច។ បច្ចុប្បន្ន លោក បៃដិន ស្ថិតនៅឯកោះ Bali ប្រទេសឥណ្ឌូណេស៊ី ក្នុងដំណើរចូលរួមកិច្ចប្រជុំកំពូល G20។

បក្សប្រជាធិបតេយ្យ បានវាយតម្លៃទាបចំពោះការប្រកួតប្រជែងក្នុងការបោះឆ្នោតនៅឆ្នាំ 2024 របស់ បក្សសាធារណៈ ហើយយល់ថា លោក ត្រាំ មិនមែនជាដៃគូប្រជែងដែលគួរឱ្យញញើត។

November 16, 2022

Shakira «រាជនីចម្រៀង World Cup» នឹងច្រៀងនៅ កាតា ក្នុងថ្ងៃសម្ពោធបើកការប្រកួត

តារាចម្រៀងស្រី នាង Shakira ត្រូវបានគេដាក់ឈ្មោះឱ្យថា «រាជនីចម្រៀង World Cup» ជាមួយនឹងបទចម្រៀងដ៏ល្បីល្បាញ «Hips don’t lie Bamboo», «Waka Waka» និង «La la la»។

តារាចម្រៀងស្រីរូបនេះនឹងច្រៀងនៅក្នុងពិធីបើកការប្រកួត World Cup 2022 នៅទីលានប្រកួត Al Bayt របស់ ប្រទេសកាតា នៅថ្ងៃទី 20 វិច្ឆិកា 2022 ខាងមុខ។ យោងតាមទំព័រសារព័ត៌មាន Musicmundial ស្ថាប័ន FIFA បានអញ្ជើញ Shakira មកច្រៀង ដោយសារតែបណ្ដាបទចម្រៀងដែល FIFA បានបញ្ចេញកន្លងមក មិនទទួលបានជោគជ័យដូចការរំពឹងទុក។

Hayya Hayya (Better Together) ជាបទចម្រៀងដែលច្រៀងដោយ Trinidad Cardona, Davido និង Aisha មានអ្នកចូលមើលតែ 29 លានលើក (16 វិច្ឆិកា 2022) បន្ទាប់ពីបានបង្ហោះលើបណ្ដាញ Youtube រយៈពេល 7 ខែ ហើយ FIFA ក៏ទទួលបានការស្នើឱ្យប្រើប្រាស់បទ Waka Waka របស់ Shakira ឡើងវិញ។

យោងតាម Billboard តារាចម្រៀង Shakari បានបង្ហាញអំពីឥទ្ធិពលជាមួយនឹង World Cup តាមរយៈបទចម្រៀងជានិមិត្តរូបមួយចំនួនដែលតារាចម្រៀងក្រោយៗពិបាកយកឈ្នះ។ ទំព័រសារព័ត៌មាន Rolling Stone យល់ថា រូបមន្តជោគជ័យនៅក្នុងផលិតផលរបស់ Shakira គឺ ចង្វាក់ភ្លេងបែប catchy tune ដ៏គគ្រឹកគគ្រេង ស៊ិចស៊ី រួមនឹងភាពល្បីល្បាញរបស់នាង។

Shakari ចាប់ផ្ដើមភ្ជាប់ទំនាក់ទំនងជាមួយនឹង World Cup ចាប់ពីឆ្នាំ 2006 ជាមួយនឹងបទ Hips don’t lie/Bamboo។ ខុសពីបទចម្រៀងដែលបានជ្រើសរើសជាផ្លូវការរបស់ឆ្នាំនោះ The time of our lives របស់ Shakari បានធ្វើឱ្យកក្រើកបរិយាកាសនៅទីលានប្រកួតរបស់ ប្រទេសអាល្លឺម៉ង់ នាពេលនោះ។

ក្នុងកិច្ចសម្ភាសមួយ Shakari បានឱ្យដឹងថា បទចម្រៀង The time of our lives ខាងលើត្រូវបានដាក់ឈ្មោះដែលមានទំនាក់ទំនងជាមួយនឹងការជជែកគ្នាលេងរបស់នាងជាមួយនឹងតារាចម្រៀងដទៃ។ នាងបកស្រាយថា «ចង្កេះរបស់ខ្ញុំនឹងមិនដែលនិយាយកុហក់ឡើយ។ បើសិនវាមិនគ្រលែង គឺមានន័យថា បទភ្លេងនេះមិនទាន់បានល្អត្រឹមត្រូវ»។

Shakra បានច្រៀង និងសម្ដែងបទ Hips don’t lie នៅក្នុងពិធីបើកការប្រកួត World Cup 2006 នៅ Munich និងមុនការប្រកួតចុងក្រោយនៅ បែរឡាំង ហើយទាក់ទាញការចូលមើលបាន 500 លាននាក់នៅលើ Youtube និង 700 លាននាក់មើលតាមទូរទស្សន៍កាលណោះ។ ឆ្នាំ 2021 Time Out New York បានចាត់ Hips don’t lie ទៅក្នុងចំណាត់ថ្នាក់ទី 11 ស្ដីពីបទចម្រៀងប៉ប់ដែលពីរោះ និងអស្ចារ្យជាងគេក្នុងប្រវត្តិសាស្ត្រ។

បួនឆ្នាំក្រោយមក Shakira ក៏បានច្រៀងបទចម្រៀងផ្លូវការ Waka Waka របស់ World Cup នៅ អាហ្វ្រិកខាងត្បូង។ មនុស្សជាច្រើននៅ អាហ្វ្រិក យល់ថា ការជ្រើសរើស Shakira គឺជារឿងមិនសមស្រប ហើយនាងគួរតែទុកឱកាសនេះឱ្យតារាចម្រៀងក្នុងស្រុក។ ប៉ុន្តែ ភាពទាក់ទាញរបស់ Waka Waka បានបញ្ជាក់ថា ការជ្រើសរើស Shakira គឺជារឿងត្រឹមត្រូវបំផុត។

ចំណែកបទ La la la របស់ World Cup 2014 នៅ ប្រេស៊ីល ដែលជាបទទីពីររបស់រដូវកាល និងត្រូវបានច្រៀងដោយ Shakira ក៏មិនអន់ឡើយ៕

November 16, 2022

ប៉ូឡូញ ត្រៀមទ័ពប្រយុទ្ធប្រឆាំង រុស្ស៊ី ក្រោយមានរ៉ុក្កែតច្រើនគ្រាប់ធ្លាក់លើទឹកដី

ទីក្រុងវ៉ាសូវី (Warsaw) បានដាក់អង្គភាពទ័ពមួយចំនួនឱ្យស្ថិតក្នុងស្ថានភាពរួចរាល់កម្រិតខ្ពស់សម្រាប់ការប្រយុទ្ធ បន្ទាប់ពីមានព័ត៌មានមិនទាន់ច្បាស់ការណ៍ថា រ៉ុក្កែតរបស់ រុស្ស៊ី បានធ្លាក់ទៅលើទឹកដីរបស់ ប្រទេសប៉ូឡូញ។

អ្នកនាំពាក្យ Piotr Muller បានឱ្យដឹងថា ការសម្រេចចិត្តដាក់អង្គភាពទ័ពមួយចំនួនឱ្យស្ថិតក្នុងស្ថានភាពត្រៀមប្រយុទ្ធកម្រិតខ្ពស់ត្រូវបានធ្វើឡើង។ ក៏ប៉ុន្តែ លោក Piotr មិនបានលើកឡើងអំពីព័ត៌មានស្ដីពីករណីរ៉ុក្កែតធ្លាក់ ដោយនិយាយដល់តែករណីផ្ទុះនៅភាគខាងកើតដែលបានបណ្ដាលឱ្យ ពលរដ្ឋប៉ូឡូញ 2 នាក់បាត់បង់ជីវិត។

យោងតាមអ្នកនាំពាក្យ Piotr Muller ក្រុមប្រឹក្សាសន្តិសុខប៉ូឡូញ បានកោះប្រជុំបន្ទាន់ ខណៈសមត្ថកិច្ចកំពុងស្រាវជ្រាវរកមូលហេតុនៃការផ្ទុះខាងលើ។

ប្រធានាធិបតីប៉ូឡូញ Andrzej Duda ក៏បានពិភាក្សាតាមទូរស័ព្ទជាមួយ ប្រធានាធិបតីអាម៉េរិក បៃដិន និង អគ្គលេខាធិការនៃអង្គការណាតូ Jens Stoltenberg អំពីករណីនេះផងដែរ។ ទីក្រុងវ៉ាសូវី កំពុងពិចារណាថា តើត្រូវការពិភាក្សាបន្ទាន់ជាមួយក្រុមមេដឹកនាំណាតូ ទៅតាមមាត្រាទី 4 របស់សម្ព័ន្ធយោធានេះ ឬអត់។

យោងតាមមាត្រាទី 4 របស់ ណាតូ ការពិគ្រោះយោបល់អាចត្រូវបានធ្វើឡើងនៅពេលប្រទេសជាសមាជិកណាមួយ យល់ថា «បូរណភាពទឹកដី ឯករាជ្យផ្នែកនយោបាយ ឬសន្តិសុខ» ជួបហានិភ័យ។

សារព័ត៌មាន Reuters បានផ្សាយថា អ្នកការទូតអឺរ៉ុប បង្ហើបឱ្យដឹងថា ឯកអគ្គរដ្ឋទូតណាតូ នឹងកោះប្រជុំក្នុងថ្ងៃទី 16 វិច្ឆិកានេះ ទៅតាមសំណើរបស់ ប៉ូឡូញ ដោយយោងទៅតាមមាត្រាទី 4 របស់ ណាតូ។ អ្នកការទូតម្នាក់និយាយថា ណាតូ នឹងធ្វើសកម្មភាពដោយការប្រុងប្រយ័ត្ន និងត្រូវការពេលដើម្បីបញ្ជាក់អំពីហេតុការណ៍។

ក្នុងថ្ងៃដដែល រដ្ឋមន្ត្រីការបរទេសរុស្ស៊ី បានប្រកាសអះអាងថា មិនជាប់ទាក់ទងទៅនឹងហេតុការណ៍ផ្ទុះនៅ ប៉ូឡូញ ហើយបានចោទបណ្ដាញសារព័ត៌មាន និងក្រុមមន្ត្រីប៉ូឡូញ ថា កំពុងរកវិធីដើម្បីបង្កើនភាពតានតឹង៕

November 16, 2022

ក្រុមហ៊ុន Foxconn សហការជាមួយក្រុមហ៊ុនប្រេងសាំងថៃ ផលិតរថយន្តអគ្គិសនីនៅខេត្ត Chonburi

ក្រុមហ៊ុនចិនតៃវ៉ាន់ Foxconn កំពុងពង្រីកការផលិតរថយន្តអគ្គិសនីនៅ ប្រទេសថៃ ដែលមានសមត្ថភាពអាចផលិតឡើងដល់ 150,000 គ្រឿងជារៀងរាល់ឆ្នាំ។

Foxconn បានសម្ពោធការដ្ឋានសាងសង់រោងចក្រផលិតរថយន្តអគ្គិសនីនៅ ប្រទេសថៃ ដែលជាផ្នែកមួយនៃការបណ្ដាក់ទុនរួមជាមួយនឹងក្រុមហ៊ុនប្រេងសាំង PTT។ រោងចក្រនេះគ្រោងនឹងដំណើរការចាប់ពីឆ្នាំ 2024 ជាមួយនឹងសមត្ថភាពផលិត 50,000 គ្រឿង/ឆ្នាំក្នុងដំណាក់កាលដំបូង និងឡើងដល់ 150,000 គ្រឿងក្នុងដំណាក់បន្ទាប់។

ក្រុមហ៊ុនបណ្ដាក់ទុនរួមនេះត្រូវបានបង្កើតឡើងកាលពីឆ្នាំមុនដែលមានឈ្មោះថា Horizon Plus ហើយនឹងសាងសង់រោងចក្រតម្លៃប្រហែល 1 ពាន់លានដុល្លារអាម៉េរិក នៅក្នុងតំបន់ឧស្សាហកម្ម Rojana Nhongyai ក្នុងខេត្ត Chonburi។

ក្រុមហ៊ុនខាងលើប្រកាសថា បណ្ដារថយន្តអគ្គិសនីដែលផលិតដោយរោងចក្ររបស់ពួកគេនៅ Chonburi ភាគច្រើននឹងត្រូវបានផ្គត់ផ្គង់ក្នុងតំបន់ អាស៊ីអាគ្នេយ៍៕

November 15, 2022

បើមានគម្រោងទៅមើល World Cup 2022 សូមស្វែងយល់ជាមុនអំពីវប្បធម៌ខ្លះៗរបស់ជនជាតិកាតា

កាតា គឺជាដែនដីដែលសម្បូរអគារខ្ពស់កប់ពពក និងជាប្រទេសម្ចាស់ផ្ទះ World Cup 2022 ហើយក៏ជាប្រទេសកាន់សាសនាអ៊ីស្លាមដែលមានលក្ខណៈអភិរក្សច្រើន ក្នុងនោះក៏មានវប្បធម៌នៃរបៀបស្វាគមន៍គ្នា ឬរបៀបផឹកកាហ្វេជាដើម។

World Cup 2022 នឹងធ្វើឡើងនៅ កាតា ចាប់ពីថ្ងៃទី 20 វិច្ឆិកា ដល់ 18 ធ្នូ 2022។ ប្រទេសដ៏តូចមួយនេះកំពុងក្លាយជាទីចាប់អារម្មណ៍របស់ពិភពលោក។

នៅទីសាធារណៈ ជនជាតិកាតា តែងក្រោកឈរនៅពេលជំរាបសួរអ្នកដទៃ ពិសេសគឺមនុស្សចាស់ ដើម្បីបង្ហាញអំពីការគោរព។ បើសិនអ្នកជាបុរស និងបានជួប ហើយជំរាបសួរស្ត្រីកាតា អ្នកគួរតែរង់ចាំនាងហុចដៃជាមុន។

ជនជាតិកាតាមួយចំនួន មិនចង់ចាប់ដៃ ឬប៉ះអ្នកដទៃនៅពេលជំរាបសួរគ្នា ដោយសារតែកត្តាសាសនា។ ដូច្នេះ បុរសជនជាតិកាតា មិនមែនពេលណាក៏ចាប់ដៃនៅពេលជំរាបសួរស្ត្រីនោះដែរ។ ជំនួសឱ្យការចាប់ដៃ ជនជាតិកាតា នឹងដាក់ដៃស្ដាំលើទ្រូងខាងខ្វេង។

ជនជាតិកាតា ចៀសវាងការបង្ហាញមនោសញ្ចេតនាស្នេហា ដូចជាការឱបថើបជាដើមនៅទីសាធារណៈ ប៉ុន្តែអាចកាន់ដៃគ្នាបាន។ បើទោះជា ភាសាអង់គ្លេស នៅប្រទេសដែលមានមនុស្ស 90% ជាជនបរទេស ប៉ុន្តែ កាតា ផ្ដល់តម្លៃយ៉ាងខ្ពស់ទៅលើអ្នកដែលចេះជំរាបសួរដោយ ភាសាអារ៉ាប់ និងចេះសម្ដែងការដឹងគុណ។

បើសិនមាន ជនជាតិកាតា អញ្ជើញឱ្យទៅលេងផ្ទះ ចូរកុំភ្លេចដោះស្រោមជើងមុនពេលឈានចូលផ្ទះរបស់ពួកគេ។ អ្នកដែលអង្គុយគងអន្ទាក់ខ្លានឹងត្រូវបានចាត់ទុកថា ឈ្លើយ មិនមានការគោរពដល់ម្ចាស់ផ្ទះ បើសិនបាតជើងបែរទៅរកម្ចាស់ផ្ទះ។

ជនជាតិកាតា តែងប្រើម្រាមដៃចាប់អាហារនៅក្នុងចានរួម ដែលនេះក៏ជារបៀបទទួលទានអាហារតាមវប្បធម៌សមុទ្រខ្សាច់ Bedouin។

ប្រការសំខាន់មួយទៀត នោះគឺអ្នកគួរតែទទួលយកការអញ្ជើញរបស់ ជនជាតិកាតា ព្រោះថា បើសិនបដិសេធនឹងត្រូវបានចាត់ទុកថា ធ្វើឱ្យបាត់បង់ទំនុកចិត្ត (ប៉ុន្តែកុំភ្លេចមើលស្ថានការណ៍ផង!)។

ដូចទៅនឹងបណ្ដាប្រទេសនៅ មជ្ឈិមបូព៌ា ដទៃទៀតដែរ ជនជាតិកាតា ចូលចិត្តកាហ្វេអារ៉ាប់ ដែលឆុងពីគ្រាប់កាហ្វេលីង និងដាំឱ្យពុះជាមួយនឹងគ្រាប់ nutmeg និង saffron។ កាហ្វេនេះមានពណ៌ស្រដៀងទឹកតែ និងលឿងបន្តិច ហើយសិតពីប៉ាន់ dallah ទៅក្នុងចានតូច សម្រាប់ផឹកអមជាមួយនឹងផ្លែ ឬតំណាប់ផ្លែលម៉ើ។

មុនពេលអញ្ជើញភ្ញៀវ ម្ចាស់ផ្ទះតែងភ្លក់មុនដើម្បីពិនិត្យរសជាតិ។ ភ្ញៀវត្រូវកាន់ចានកាហ្វេដោយដៃស្ដាំ។ កាហ្វេនឹងត្រូវសិតជាបន្តបន្ទាប់រហូតដល់អ្នកអង្រួនចានកាហ្វេស្រាលៗដើម្បីជាសញ្ញាប្រាប់ថា គ្រប់គ្រាន់ហើយ៕

November 15, 2022

អាចារ្យម្នាក់ត្រូវដកហូតងារ ព្រោះតែ «បន់» ឱ្យ ប្រធានាធិបតីកូរ៉េខាងត្បូង ជួបគ្រោះថ្នាក់យន្តហោះ

អាចារ្យនៅវិហារអង់គ្លីកង់កូរ៉េខាងត្បូង ត្រូវបានរិះគន់ និងដកហូតងារ បន្ទាប់ពីបានបួងសួងជាសាធារណៈឱ្យយន្តហោះដឹក ប្រធានាធិបតី Yoon ជួបគ្រោះថ្នាក់។

ប្រធានាធិបតី Yoon Suk-yeol និងភរិយា កាលពីថ្ងៃទី 11 វិច្ឆិកា បានធ្វើដំណើរមកកាន់ អាស៊ីអាគ្នេយ៍ ដើម្បីចូលរួមកិច្ចប្រជុំអាស៊ាន និង G20។ លោក Yoon គ្រោងនឹងត្រលប់ទៅវិញនៅថ្ងៃទី 16 វិច្ឆិកាខាងមុខ។

អាចារ្យ Kim Gyu-dong បានបង្ហោះសារលើបណ្ដាញសង្គមថា គាត់ចង់ឱ្យយន្តហោះដឹកប្រធានាធិបតីជួបគ្រោះថ្នាក់ និងសង្ឃឹមថា ប្រជាជនកូរ៉េខាងត្បូង ទាំងអស់ បួងសួងបែបនេះ។

លោក Kim Gyu-dong បានលុបសាររបស់គាត់បន្ទាប់ពីរងការរិះគន់។ គាត់បានបកស្រាយថា ខ្លឹមសារនេះគ្រាន់តែជាការកត់ត្រាផ្ទាល់ខ្លួន ប៉ុន្តែត្រូវបានបែកធ្លាយជាសាធារណៈដោយអចេតនា។

ក្រុមប្រឹក្សាព្រះវិហារអង់គ្លីកង់ នៃតំបន់ Daejeon របស់ កូរ៉េខាងត្បូង កាលពីថ្ងៃទី 14 វិច្ឆិកា បានប្រកាសដកហូតតំណែងអាចារ្យរបស់លោក Kim Gyu-dong រួចហើយ ក្រោយពីមានការរិះគន់ចំពោះទង្វើខាងលើ។

មន្ត្រីខាងសាសនាមួយរូបថ្លែងថា សាររបស់លោក Kim គឺជារឿងមិនអាចទទួលយកបានក្នុងនាមគាត់ជាអាចារ្យម្នាក់។

មុននោះ អាចារ្យមួយរូបរបស់វិហាររ៉ូម៉ាំកាតូលិកនៅតំបន់ Daejeon ក៏បានធ្វើឱ្យមានការរិះគន់ដោយសារតែការបង្ហោះសារដែលមានខ្លឹមសារប្រហាក់ប្រហែលនេះ។ អាចារ្យរូបនេះ ក្រោយមកក៏បានបិទគណនីបណ្ដាញសង្គម និងឱ្យដឹងថា គាត់គ្រាន់តែសម្ដែងអំពីការខកចិត្តរបស់សាធារណជនប៉ុណ្ណោះ និងមានអារម្មណ៍ថាខ្មាសអៀននៅពេលសារនេះទទួលបានចំណាប់អារម្មណ៍ច្រើន។

ថ្មីៗនេះ ពលរដ្ឋកូរ៉េខាងជើង នាំគ្នាសម្ដែងការមិនពេញចិត្តចំពោះចំណាត់ការរបស់រដ្ឋាភិបាល ក្រោយពីកើតមានហេតុការណ៍ប្រជ្រៀតជាន់គ្នាស្លាប់ 158 នាក់នៅ Itaewon។ ប្រធានាធិបតី Yoon បានសុំទោសចំពោះប្រជាជន និងបានសន្យាថា កែទម្រង់វិធានការទប់ស្កាត់ហានិភ័យ និងគ្រោះថ្នាក់ឱ្យបានសមស្រប៕

November 15, 2022

សម្ដេចតេជោ កំពុងត្រៀមចេញពី ឥណ្ឌូណេស៊ី ត្រឡប់មក កម្ពុជា វិញ ក្រោយប្រកាសថា វិជ្ជមាននឹងកូវីដ-19

នារសៀលថ្ងៃទី 15 វិច្ឆិកា 2022 នេះ នៅលើទំព័របណ្ដាញសង្គម ប្រមុខរាជរដ្ឋាភិបាលកម្ពុជា បានឱ្យដឹងថា កំពុងត្រៀមចេញពី ឥណ្ឌូណេស៊ី ត្រឡប់មក កម្ពុជា វិញ ក្រោយពីបានទទួលលទ្ធផលតេស្ដវិជ្ជមាននឹងកូវីដ-19។

«ខ្ញុំកំពុងត្រៀមចេញពី ឥណ្ឌូណេស៊ី ត្រឡប់ទៅ កម្ពុជា វិញ បន្ទាប់ពីអង្គុយរង់ចាំការអនុញ្ញាតពីប្រទេសដែលយើងត្រូវហោះហើរឆ្លងកាត់។ សូមអរគុណ មិត្តឥណ្ឌូណេស៊ី ដែលបានយកចិត្តទុកដាក់ទទួលប្រតិភូរបស់យើង និងសូមអធ្យាស្រ័យដែលយើងមិនអាចចូលប្រជុំ G20 បាន» សម្ដេចតេជោ សរសេរដូច្នេះ។ សម្ដេចបន្ថែមថា «ការហោះរយៈពេល 3 ម៉ោង 30 នាទី ដែលខ្ញុំនឹងទៅដល់ក្បាលព្រលប់ល្ងាចនេះ»។

ប្រមុខរាជរដ្ឋាភិបាលកម្ពុជា នាព្រឹកនេះ បានប្រកាសថា ទទួលលទ្ធផលវិជ្ជមាននឹងកូវីដ-19 ក្រោយពីពេទ្យនៅ ឥណ្ឌូណេស៊ី បានធ្វើតេស្ត នៅមុនការចូលរួមកិច្ចប្រជុំ G20 នៅ ឥណ្ឌូណេស៊ី។

ក្រោយទទួលបានលទ្ធផលនេះ សម្ដេចក៏បានក៏បានសម្រេចឱ្យប្រតិភូកម្ពុជា វិលត្រឡប់មក កម្ពុជា វិញ ដើម្បីសុវត្តិភាពសម្រាប់ប្រតិភូដែលចូលរួមប្រជុំ ខណៈដែលតំណាងប្រទេសអាស៊ាន កំពុងចរចាប្រគល់ជូនឥណ្ឌូណេស៊ី ធ្វើជាតំណាង។

November 15, 2022

អាយុជាមធ្យមរបស់មនុស្សជាតិបានកើនឡើងខ្ពស់! តើដោយសារកត្តាអ្វីខ្លះ?

មូលនិធិប្រជាជននៃអង្គការសហប្រជាជាតិ ទើបតែបានព្យាករថា អាយុជាមធ្យមរបស់មនុស្សលើពិភពលោកនឹងកើនដល់ 77.2 ឆ្នាំនៅក្នុងឆ្នាំ 2050 ដោយសារតែការរីកចម្រើនរបស់វិស័យសុខាភិបាល លក្ខខណ្ឌអនាម័យ ទម្លាប់នៃការរស់នៅល្អ អាហារ និងជាតិបំប៉នត្រូវបានកែលំអ។

ព្រឹកថ្ងៃទី 15 វិច្ឆិកា 2022 មូលនិធិប្រជាជននៃអង្គការសហប្រជាតិ (UNFPA) បានកត់ត្រាអំពីចំនួនប្រជាជនដែលបានកើនឡើងដល់ 8 ពាន់លាននាក់ នៅទូទាំងសកលលោក ហើយព្យាករថាអាចកើនដល់ 9 ពាន់លាននាក់នៅឆ្នាំ 2037។ ក្នុងរង្វង់ 9 ឆ្នាំ រាប់ចាប់ពី 1990 អាយុជាមធ្យមរបស់មនុស្សលើពិភពលោកបានកើន 9 ឆ្នាំបន្ថែមទៀត ដោយឡើងដល់ 72.8 ឆ្នាំ និងត្រូវបានព្យាករថា អាចកើនឡើងដល់ 77.2 ឆ្នាំនៅក្នុងឆ្នាំ 2050។

ជាក់ស្ដែង អាយុរបស់មនុស្សជាតិបានកើនឡើងខ្ពស់ក្នុងរង្វង់ 200 ឆ្នាំកន្លង។ អង្គការសហប្រជាជាតិ បានវាយតម្លៃថា នៅពេលបច្ចេកវិទ្យារីកចម្រើនជាងមុន ក្រុមអ្នកវិទ្យាសាស្ត្រមានឱកាសក្នុងការស្វែងយល់អំពីអាថ៌កំបាំងរបស់រាងកាយមនុស្ស និងយន្តការជីវសាស្ត្រដែលទាក់ទង ដូច្នេះពួកគេអាចរកវិធីធ្វើឱ្យសុខភាពទូទៅបានប្រសើរឡើង និងអាចបង្ការជំងឺផ្សេង។

សមិទ្ធិផលនៃការរីកចម្រើនសំខាន់បំផុតរបស់មនុស្សជាតិក្នុងរយៈពេល 200 កន្លងគឺ វ៉ាក់សាំង នេះបើតាម UNFPA។ មុនពេលមានវ៉ាក់សាំង បណ្ដាជំងឺឆ្លងដូចជា អុតស្វាយ ឬជំងឺគ្រុនស្វិតដៃជើងជាដើម បានសម្លាប់មនុស្សរាប់លាននាក់ជារៀងរាល់ឆ្នាំ។ ក្រោយមក យុទ្ធនាការចាក់វ៉ាក់សាំង បានលុបបំបាត់ជំងឺទាំងនេះនៅក្នុងតំបន់ជាច្រើនរបស់ពិភពលោក ហើយលទ្ធផលទទួលបាននោះគឺ អត្រានៃការស្លាប់បានថយចុះច្រើន។

វ៉ាក់សាំងក៏ជាអាវុធពិសេសមួយនៃយុទ្ធនាការប្រយុទ្ធប្រឆាំងនឹងជំងឺកូវីដ-19 ផងដែរ។ យោងតាមស្ថិតិរបស់ សហរដ្ឋអាម៉េរិក វ៉ាក់សាំងបង្ការកូវីដ-19 បានសង្គ្រោះជីវិតមនុស្សជិត 20 លាននាក់នៅលើពិភពលោកនៅក្នុងរយៈពេលមួយឆ្នាំ។

ការរីកចម្រើនមួយដ៏ធំផ្សេងទៀតរបស់វិស័យសុខាភិបាល នោះគឺថ្នាំរម្ងាប់មេរោគ ដែលត្រូវបានប្រើប្រាស់តាំងពីឆ្នាំ 1940 ដើម្បីព្យាបាលជំងឺឆ្លងដោយសារមេរោគ (បាក់តេរី)។ ថ្នាំរម្ងាប់មេរោគបានជួយឱ្យអាយុមធ្យមរបស់មនុស្សក្នុងពិភពលោកកើនជាមធ្យមពី 5 ដល់ 10 ឆ្នាំ។

លោកយាយ Jeanne Calment ជាជនជាតិបារាំង រស់បានដល់អាយុ 122 ឆ្នាំ និងបានទទួលមរណភាពកាលពីឆ្នាំ 1997

សមិទ្ធិផលធំមួយទៀតដែលត្រូវបានវាយតម្លៃថា បានរួមចំណែកធំធេងក្នុងការជួយឱ្យអាយុរបស់មនុស្សកើនឡើងគឺបច្ចេកវិទ្យាសុខាភិបាល។ បច្ចេកវិទ្យាថ្មីដូចជា ការថតស្កេន CT ជាដើម ជួយឱ្យវេជ្ជបណ្ឌិតធ្វើរោគវិនិច្ឆ័យបានសុក្រឹតជាងមុន មុនពេលជំងឺបង្ហាញអាការ ដែលនេះអនុញ្ញាតឱ្យពេទ្យព្យាបាលបានឆាប់ និងទប់ស្កាត់ជំងឺវិវត្តទៅរកភាពធ្ងន់ធ្ងរនាពេលអនាគត។

អាយុជាមធ្យមរបស់មនុស្សជាតិកើនក៏អាស្រ័យមួយផ្នែកទៅលើការកែលំអទាក់ទងនឹងបញ្ហាអនាម័យ និងទម្លាប់នៃការរស់នៅផងដែរ។ ឧទាហរណ៍ ៖ វត្តមានរបស់បណ្ដាញបំពង់ទឹកស្អាត និងលូទំនើប បានជួយឱ្យមនុស្សរស់នៅក្នុងបរិស្ថានស្អាតបាតជាងពេលណាៗទាំងអស់។ បច្ចុប្បន្ន មនុស្សជាច្រើនកំពុងរស់នៅដោយមិនត្រូវប៉ះពាល់ប្រភពមេរោគនានាដែលអាចនាំឱ្យកើតជំងឺ និងស្លាប់។

សព្វថ្ងៃ មនុស្សម្នាបានយល់ដឹងច្រើនជាងមុនទាក់ទងនឹងផលប៉ះពាល់នៃទម្លាប់រស់នៅ ដល់សុខាភាព។ ការសិក្សាស្រាវជ្រាវនានាបានបង្ហាញថា សកម្មភាពបញ្ចេញកម្លាំង (ហាត់ប្រាណជាដើម) បានជួយកាត់បន្ថយហានិភ័យឡើងឈាម (សម្ពាធឈាមឡើងខ្ពស់) ជំងឺទឹកនោមផ្អែមកម្រិត 2 ជំងឺបេះដូង ជំងឺដាច់សរសៃឈាមខួរក្បាល និងមហារីកជាដើម។

ការសិក្សាស្រាវជ្រាវក៏បានបង្ហាញថា របបអាហារដែលសម្បូរបន្លែផ្លែឈើស្រស់ គ្រាប់ធញ្ញជាតិ និងមានសាច់សុទ្ធក្នុងបរិមាណសមល្មមក៏ជួយអូសបន្លាយអាយុរបស់មនុស្សផងដែរ។ របបអាហាររបស់មនុស្សដែលមានអាយុវែងត្រូវបានអ្នកវិទ្យាសាស្ត្ររកឃើញថា គឺសុទ្ធតែមានវត្តមានត្រី សណ្ដែក ធញ្ញជាតិ និងមិនសូវមានជាតិស្ករ៕

November 15, 2022

មនុស្សទី 8 ពាន់លានរបស់ពិភពលោក បានចាប់កំណើតនៅ អាស៊ីអាគ្នេយ៍

ទារិកាម្នាក់បានចាប់កំណើតនៅវេលាម៉ោង 1 និង 29 នាទី ថ្ងៃទី 15 វិច្ឆិកា 2022 នៅ រដ្ឋធានីម៉ានីល ប្រទេសហ្វ៊ីលីពីន ត្រូវបានទទួលស្គាល់ថា ជាមនុស្សទី 8 ពាន់លានរបស់ពិភពលោក។

«នេះគឺជាការចាប់កំណើតតាមធម្មតា» វេជ្ជបណ្ឌិត Romeo Bituin ប្រធានផ្នែកសុខាភិបាលរបស់មន្ទីរពេទ្យ Jose Fabella ជាទីដែលទារិកាខាងលើបានចាប់កំណើត បានប្រាប់ដូច្នេះ នេះបើតាម Manila Bulletin។

ប្រធានរដ្ឋបាលរបស់ គណៈកម្មាធិការប្រជាជន និងអភិវឌ្ឍហ្វ៊ីលីពីន (POPCOM) នៃវិទ្យាស្ថានស្ថិតិហ្វ៊ីលីពីង (PSA) លោកស្រី Lyneth Therese Monsalve សង្ឃឹមថា ទារិកា Venice ដែលជាមនុស្សទី 8 ពាន់លានរបស់ពិភពលោក នឹងក្លាយ «ជានិមិត្តរូបនៃភាពរុងរឿងក្នុងពេលអនាគត»។

ម្ដាយរបស់ Venice អ្នកស្រី Maria Margarette Villorente សប្បាយចិត្តជាខ្លាំងនៅពេលកូនស្រីរបស់គាត់ត្រូវបានទទួលស្គាល់ថាជាមនុស្សទី 8 ពាន់លានរបស់ពិភពលោក។ «នេះគឺជាភ័ព្វសំណាងចំពោះគ្រួសារ» អ្នកស្រី Maria ថ្លែងដូច្នេះ។

ព្រឹកថ្ងៃដដែលនេះ មូលនិធិប្រជាជននៃអង្គការសហប្រជាជាតិ (UNFPA) ក៏បានកត់ត្រាអំពីចំនួនប្រជាជនដែលបានកើនដល់ 8 ពាន់លាននាក់ និងព្យាករថា អាចឡើងដល់ 9 ពាន់លាននាក់នៅឆ្នាំ 2037។

យោងតាម UNFPA ការកើនឡើងយ៉ាងលឿននៃចំនួនប្រជាជនរបស់ពិភពលោកនេះគឺព្រោះតែអាយុរបស់មនុស្សវែងជាងមុន ដោយសារការរីកចម្រើនផ្នែកសុខុមាលភាពក្នុងសហគមន៍ របបអាហារ អនាម័យផ្ទាល់ខ្លួន និងឱសថ។ នេះក៏ជាលទ្ធផលនៃការចាប់កំណើតដែលមានកម្រិតខ្ពស់ និងស្ថិរភាពនៅក្នុងប្រទេសជាច្រើនរបស់ពិភពលោក៕

November 15, 2022

ទេសចរដែលនាំយកផ្លែឈើស្រស់ចូលទឹកដីថៃ អាចត្រូវបានពិន័យដាក់ពន្ធនាគារ

បើសិនជានាំយកផ្លែឈើដែលមិនទទួលបានការអនុញ្ញាត ចូលទៅក្នុងទឹកដីរបស់ ប្រទេសថៃ ទេសចរនឹងត្រូវពិន័យជាប្រាក់រាប់រយដុល្លារអាម៉េរិក ឬជាប់ពន្ធនាគារទៀតផង។

Rapeephat Chantarasriwong អ្នកនាំពាក្យរបស់ ក្រសួងកសិកម្មថៃ បានឱ្យដឹងថា ទេសចរនាំយកផ្លែឈើស្រស់ចូលទឹកដីរបស់ ប្រទេសថៃ ដោយមិនមានលិខិតបញ្ជាក់ថា មិនមានជំងឺដង្កូវ លិខិតអនុញ្ញាតការនាំចូល ឬមិនបានរាយការណ៍ គឺជាការបំពានច្បាប់ត្រួតពិនិត្យរុក្ខជាតិរបស់ ប្រទេសថៃ នេះបើតាម Thai PBS World។

យោងតាម National News Bureau of Thailand ពលរដ្ឋថៃ ដែលទៅទេសចរណ៍នៅប្រទេសក្រៅ ត្រូវបានព្រមានមិនឱ្យនាំយកបន្លែផ្លែឈើស្រស់ត្រលប់មក ប្រទេសថៃ ព្រោះអាចប្រឈមនឹងបញ្ហាផ្លូវច្បាប់។

អ្នកនាំពាក្យរបស់ ក្រសួងកសិកម្មថៃ បានឱ្យដឹងថា ការនាំចូលផ្លែឈើដោយខុសច្បាប់នឹងត្រូវពិន័យជាប្រាក់ 20,000 បាត (ប្រហែល 560 ដុល្លារអាម៉េរិក) ឬជាប់ពន្ធនាគារ 1 ឆ្នាំ។ បច្ចុប្បន្ន មានទេសចរជាច្រើននាក់ត្រូវបានរឹបអូសយកផ្លែឈើ និងបំផ្លាញចោលនៅឯព្រលានយន្តហោះ ប៉ុន្តែមិនទាន់មានករណីរងការពិន័យនៅឡើយ។

លោក Rapeephat Chantarasriwong បន្ថែមថា នាពេលខាងមុខ ក្រសួងកសិកម្មថៃ នឹងស្នើឱ្យគ្រប់អាកាសយានដ្ឋាន ផ្ដល់ព័ត៌មាននេះដល់អ្នកដំណើរគ្រប់រូប៕

November 15, 2022

Author: សឿន សំណាង