ស្ថានីយអវកាស Tiangong នឹងចូលរួមគម្រោងប្រមូលថាមពលព្រះអាទិត្យក្នុងអវកាស ហើយបាញ់បញ្ជូនមកកាន់ផែនដីក្នុងទម្រង់កាំរស្មីមីក្រូវ៉េវថាមពលកម្រិតខ្ពស់ មិននឹងត្រូវបានទទួល និងបំប្លែងទៅជាអគ្គិសនី។
ស្ថានីយអវកាស Tiangong របស់ ប្រទេសចិន បានដំណើរការពេញលេញបន្ទាប់ពីម៉ូឌុលចុងក្រោយដែលមានឈ្មោះថា Mengtian ត្រូវបានភ្ជាប់ទៅនឹងបន្ទប់ស្នូលកាលពីដើមខែវិច្ឆិកា 2022។
កាលពីថ្ងៃទី 22 វិច្ឆិកា លោក Yang Hong ប្រធានផ្នែករចនារបស់ស្ថានីយអវកាសចិន បានឱ្យដឹងថា Tiangong នឹងដើរតួនាទីសំខាន់ក្នុងគម្រោងរោងចក្រថាមពលព្រះអាទិត្យនៅទីអវកាស (SSPS) របស់ ប្រទេសចិន។ Tiangong នឹងផ្ដល់ថ្នាលសម្រាប់ការសាកល្បងឧបករណ៍អគ្គិសនីតង់ស្យុងខ្ពស់ និងជួយដំឡើងឧបករណ៍ធំ។
យោងតាមលោក Yang Hong ស្ថានីយអវកាសចិន មានធនធាន និងសមត្ថភាពគ្រប់គ្រាន់ក្នុងការពិសោធ សាកល្បងបច្ចេកវិទ្យាសំខាន់ៗ ជំរុញការអភិវឌ្ឍបច្ចេកវិទ្យា និងប្រមូលទិន្នន័យនៃការធ្វើតេស្តនៅលើគន្លងគោចរសម្រាប់គម្រោង SSPS។
រោងចក្រថាមពលព្រះអាទិត្យនៅទីអវកាសរបស់ ប្រទេសចិន នឹងជាហេដ្ឋារចនាសម្ព័ន្ធមួយដែលមានទំហំ 1 គីឡូម៉ែត្រ នេះបើតាម Chinese Space Science and Technology ចុះផ្សាយកាលពីខែមិថុនា 2022។ រោងចក្រនេះនឹងបាញ់បញ្ជូនកាំរស្មីមីក្រូវ៉េវថាមពលកម្រិត gigawatt ពីចម្ងាយ 36,000 គីឡូម៉ែត្រ មកកាន់ផែនដី។ រោងចក្រនេះដំណើរការ 24 ម៉ោង/ថ្ងៃ ដោយកាំរស្មីរបស់វាអាចឆ្លងកាត់ពពក និងត្រូវបានទទួលដោយអង់តែននៅលើផែនដី មុននឹងបំប្លែងទៅជាអគ្គិសនី។
ក្រៅពី ប្រទេសចិន កន្លងមក សហរដ្ឋអាម៉េរិក ក៏បានរៀបផែនការបាញ់បង្ហោះផ្កាយរណបឡើងទៅកាន់ទីអវកាសនៅឆ្នាំ 2025 ដើម្បីផលិត និងបាញ់បញ្ជូនកាំរស្មីមីក្រូវ៉េវថាមពលកម្រិតខ្ពស់មកកាន់ផែនដីផងដែរ៕
