សឿន សំណាង - La Reine Media

អាជ្ញាធរចិនប្រកាសអាសន្នកម្រិតខ្ពស់បំផុត ស្ដីពីរលកត្រជាក់នៅសប្ដាហ៍នេះ

ប្រទេសចិន បានប្រកាសអាសន្នស្ដីពីរលកត្រជាក់ឡើងដល់ពណ៌ទឹកក្រូច ដែលជាកម្រិតធ្ងន់ធ្ងរបំផុតក្នុងចំណោម 3 កម្រិត គ្រាដែលរដូវត្រជាក់ត្រូវបានព្យាករថានឹងប៉ះពាល់ដល់ខេត្ត និងក្រុងជាង 20 ដោយសីតុណ្ហភាពអាចថយចុះជាង 20 អង្សាសេ។

ក្រោយរយៈពេលមួយថ្ងៃ បន្ទាប់ពីបានប្រកាសអាសន្នស្ដីពីរលកត្រជាក់ពណ៌លឿង ដែលជាកម្រិតទី 2 ក្នុងចំណោម 3 កម្រិត រួមមានពណ៌ខៀវ លឿន និងទឹកក្រូច ស្ថានីយឧតុនិយមជាតិចិន បានដំឡើងកម្រិតនៃការប្រកាសអាសន្នឡើងខ្ពស់បំផុត ពោលគឺពណ៌ទឹកក្រូច នៅទូទាំងប្រទេសកាលពីម៉ោង 6 ល្ងាចថ្ងៃទី 27 វិច្ឆិកា និងម៉ោង 6 ព្រឹកថ្ងៃទី 28 វិច្ឆិកា (ម៉ោងក្នុងស្រុង)។

យោងតាម ស្ថានីយឧតុនិយមចិន រលកត្រជាក់នេះនឹងប៉ះពាល់ដល់ទឹកដីស្ទើរតែទាំងអស់របស់ ប្រទេសចិន បង្កឱ្យមានអាកាសធាតុត្រជាក់ខ្លាំង ខ្យល់ខ្លាំង ធូលីខ្សាច់ និងភ្លៀងព្រឹលទ្រង់ទ្រាយធំ។ សីតុណ្ហភាពនៅតំបន់ភាគខាងជើង កណ្ដាល និងភាគខាងកើតរបស់ ប្រទេសចិន នឹងថយចុះចាប់ពី 10 ដល់ 16 អង្សាសេ ហើយក៏មានតំបន់ខ្លះថយចុះ 18 អង្សាសេ និងជាង 20 អង្សាសេក៏មាន។ ខេត្តក្រុង និងតំបន់ស្វយ័តជាង 20 របស់ប្រទេសនេះនឹងរងផលប៉ះពាល់ដោយសារអាកាសធាតុត្រជាក់លឿន និងខ្លាំងក្នុងលើកនេះ។

អំពីពេលវេលាដែលអាកាសធាតុចុះត្រជាក់ លោក Hu Xiao អ្នកវិភាគផ្នែកឧតុនិយមរបស់បណ្ដាញអាកាសធាតុចិន ឱ្យដឹងថា សីតុណ្ហភាពនឹងថយចុះដល់កម្រិតទាបបំផុតនៅក្នុងតំបន់ភាគខាងជើងប្រទេសចិន ចាប់ពីថ្ងៃទី 29 ដល់ 30 វិច្ឆិកា ខណៈដែលភាគខាងត្បូងនឹងចាប់ផ្ដើមពីថ្ងៃទី 01 ដល់ទី 02 ធ្នូខាងមុខ៕

November 28, 2022

ផ្ទុះអំពើហិង្សានៅ បែហ្ស៊ិក ក្រោយចាញ់ ម៉ារ៉ុក នៅ World Cup 2022

អ្នកគាំទ្រដែលមានកំហឹង នាំគ្នាវាយបំផ្លាញ ដុតរថយន្តនៅឯ រដ្ឋធានីព្រូចសែល និងទីក្រុងមួយចំនួន ក្រោយពីក្រុមជម្រើសជាតិរបស់ បែលហ្ស៊ិក ចាញ់ 0-2 ក្នុងការប្រកួតជាមួយ ម៉ារ៉ុក នៅ World 2022 ក្នុង ប្រទេសកាត។

«មុនពេលបញ្ចប់ការប្រកួត មនុស្សរាប់សិបនាក់ ក្នុងនោះមានមនុស្សមួយចំនួនដែលពាក់អាវគ្របជិតក្បាល បានប៉ះទង្គិចជាមួយនឹងក្រុមប៉ូលិស បង្កអសន្តិសុខសណ្ដាប់ធ្នាប់សាធារណៈ» ប៉ូលិសនៅ រដ្ឋធានីព្រូចសែល ប្រទេសបែលហ្ស៊ិក ប្រកាសកាលពីថ្ងៃទី 27 វិច្ឆិកា ស្ដីពីករណីអំពើហិង្សាដែលបានកើតឡើងនៅប្រទេសនេះក្នុងថ្ងៃជាមួយគ្នា បន្ទាប់ពីក្រុមបាល់ទាត់របស់ បែលហ្ស៊ិក ចាញ់ ក្រុមម៉ារ៉ុក នៅ World Cup 2022។

យោងតាមប៉ូលិសរបស់ បែលហ្ស៊ិក មនុស្សរាប់សិបនាក់បាននាំគ្នាវាយបំបែកទ្វារកញ្ចក់របស់ហាងទំនិញ គប់កាំជ្រួច និងដុតរថយន្តនៅតាមដងផ្លូវ។ អ្នកនាំពាក្យរបស់ប៉ូលិស ឱ្យដឹងថា មនុស្សមួយចំនួនថែមទាំងកាន់ដំបង ខណៈអ្នកយកព័ត៌មានម្នាក់រងរបួស។

ប៉ូលិសប្រហែល 100 នាក់ ត្រូវបានបញ្ជូនទៅកាន់កន្លែងកើតហេតុដើម្បីបង្ក្រាបអំពើហិង្សា ក្នុងពេលប្រជាជនត្រូវបានព្រមានឱ្យចៀសវាងតំបន់មួយចំនួននៅកណ្ដាលក្រុង។ ស្ថានីយរថភ្លើងក្រោមដីនៅ ព្រួចសែល ត្រូវបិទទ្វារ ហើយមួយចំនួនត្រូវបានបិទខ្ទប់ដើម្បីចៀសវាងការរាលដាលនៃអំពើហិង្សា។

ឧទ្ធម្ភាគចក្រតាមដានហេតុការណ៍ហោះឆ្វែលលើអាកាសរបស់ទីក្រុង មុនពេលសណ្ដាប់ធ្នាប់ត្រូវបានស្ដារឡើងវិញនៅវេលាម៉ោងប្រហែល 19 (ម៉ោង 01 ថ្ងៃទី 28 វិច្ឆិកា នៅ កម្ពុជា)។ ប៉ូលិសបែលហ្ស៊ិក ឱ្យដឹងថា មនុស្សប្រហែល 11 នាក់ត្រូវបានចាប់ខ្លួន។

ក្រុមជម្រើសជាតិបែលហ្ស៊ិក កាលពីថ្ងៃទី 27 វិច្ឆិកា បានចាក់ក្រុមរបស់ ប្រទេសម៉ារ៉ុក 0-2 ក្នុងការប្រកួតនៅពូល F នៃ World Cup 2022៕

November 28, 2022

អ្នកគាំទ្រស៊ិចស៊ីបំផុតនៅ World Cup Qatar 2022 រងការរិះគន់

តារាបង្ហាញម៉ូដរបស់ ក្រូអាត Ivana Knoll រងការរិះគន់ថា មិនបានគោរពចំពោះប្រពៃណី ទំនៀមទម្លាប់របស់ ប្រទេសកាតា នៅពេលបង្ហោះវីដេអូមួយដែលក្នុងនោះបង្ហាញថា នាងស្លៀកពាក់ឈុតហែលទឹកយ៉ាងស៊ិចស៊ី ដើរនៅលើដងផ្លូវតាមបណ្ដោយឆ្នេរសមុទ្រ។

Ivana Knoll គឺជាតារាបង្ហាញម៉ូដដ៏ល្បីឈ្មោះមួយរូបនៅ ក្រូអាត និងមានអ្នកតាមដានជាង 650,000 នាក់នៅលើ Instagram ហើយនាងក៏ជាអ្នកគាំទ្របាល់ទាត់ដ៏ខ្លាំងក្លាម្នាក់ផងដែរ។ នាងមកកាន់ កាតា ដើម្បីគាំទ្រក្រុមជម្រើសជាតិរបស់ ក្រូអាត នៅ World Cup 2022។ តារាម៉ូដែលរូបនេះក៏ធ្លាប់បានទៅកាន់ ប្រេស៊ីល ក្នុងឆ្នាំ 2014 និង រុស្ស៊ី ឆ្នាំ 2018 នៅពេល World Cup ត្រូវបានប្រារព្ធឡើងនៅប្រទេសទាំងនេះ។ ដូច្នេះហើយបានជា Ivana Knoll ត្រូវបានអ្នកយកព័ត៌មានផ្ដល់រហ័សនាមថា «អ្នកគាំទ្រ World Cup ស៊ិចស៊ីបំផុត»។

កាលពីថ្ងៃទី 24 វិច្ឆិកា Knoll បានបង្ហោះវីដេអូមួយនៅលើ Instagram ដែលក្នុងនោះនាងស្លៀកឈុតហែលទឹកក្រឡាការ៉ូពណ៌ក្រហមលាយស ដើរលើដងផ្លូវមួយតាមបណ្ដោយឆ្នេរសមុទ្រនៅ ប្រទេសកាតា។ សកម្មភាពរបស់ Knoll បន្ទាប់មកក៏ត្រូវរងការរិះគន់ពីអ្នកលេងបណ្ដាញសង្គម។ គណនីមួយបញ្ចេញមតិថា «ពិតជាគួរឱ្យអាម៉ាស។ ចូរគោរពដល់ប្រពៃណី ទំនៀមទម្លាប់របស់ប្រទេសដទៃផង»។

https://www.youtube.com/watch?v=oYiNsr0S17Q

«នាងកំពុងស្ថិតនៅ ប្រទេសកាតា មិនមែន ក្រូអាត ទេ។ នាងត្រូវគោរពការកំណត់នានា នេះគឺជាប្រទេសអ៊ីស្លាម» គណនីមួយទៀតសរសេរបញ្ចេញមតិដូច្នេះ។

យោងតាមទំព័រ Mirror តារាម៉ូដែល Knoll ប្រហែលជានឹងត្រូវបានក្រុមមន្ត្រីរបស់ កាតា ទាក់ទងដើម្បីសួរនាំ។ មុនពេល World Cup ត្រូវបានសម្ពោធបើកការប្រកួតកាលពីថ្ងៃទី 20 វិច្ឆិកា ក្រុមមន្ត្រីរបស់ កាតា បានព្រមានថា ភ្ញៀវ ទាំងបុរស ទាំងស្ត្រី គួរតែគោរពវប្បធម៌របស់ប្រទេសនេះ ចៀសវាងការស្លៀកពាក់ស៊ិចស៊ីហួសហេតុនៅទីសាធារណៈ។ ពួកគេណែនាំថា ភ្ញៀវគួរតែស្លៀកពាក់ឱ្យបានជិតស្មា និងក្បាលជង្គង់។

ក្រោយការប្រកួតជាមួយ ម៉ារ៉ុក ដែលទទួលបានលទ្ធផល 0-0 ក្រុមក្រូអាត នៅ World Cup នឹងបន្តការប្រកួតនៅថ្ងៃទី 27 វិច្ឆិកា ដោយប៉ះនឹងក្រុមរបស់ កាណាដា។ ការប្រកួតចុងក្រោយរបស់ ក្រូអាត នៅក្នុងវគ្គជម្រុះនឹងធ្វើឡើងនៅថ្ងៃទី 01 ធ្នូ ដោយត្រូវជួបក្រុមជម្រើសជាតិរបស់ បែលហ្ស៊ិក៕

November 27, 2022

កែលម្អគុណភាពជីវិតជាមួយនឹងកម្មវិធីរត់ Xiaomi POP Run 2022

ទីក្រុងភ្នំពេញ ថ្ងៃទី 26 ខែវិច្ឆិកា ឆ្នាំ 2022 – Xiaomi ដែលជាក្រុមហ៊ុនផលិតគ្រឿងអេឡិចត្រូនិក និងឧបករណ៍ឆ្លាតវៃឈានមុខគេលើពិភពលោក បន្តលើកទឹកចិត្តសហគមន៍ Xiaomi Fans ឱ្យសុខភាពរបស់ពួកគេប្រសើរឡើងតាមរយៈសកម្មភាពរត់ប្រចាំឆ្នាំ Xiaomi POP Run 2022 ។

Xiaomi POP Run គឺជាសកម្មភាពក្រៅផ្ទះដែលពេញនិយមបំផុតរបស់សហគមន៍ Xiaomi ។ ព្រឹត្តិការណ៍នេះកើតមកក្នុងគោលបំណងលើកទឹកចិត្ត Xiaomi Fans ឱ្យរត់ដើម្បីសុខុមាលភាពសាធារណៈ ព្រមទាំងគ្របដណ្តប់ប្រទេសផ្សេងៗគ្នាជាច្រើន។ ក្នុងអំឡុងពេលព្រឹត្តិការណ៍នេះ Xiaomi Fans តែងតែពាក់អាវយឺតពណ៌ទឹកក្រូចធម្មតានៃម៉ាក Xiaomi ដែលបង្ហាញពីភាពស៊ីសង្វាក់គ្នា និងសាមគ្គីភាព។ ជាពិសេស Xiaomi Fans មានឱកាសទទួលបានបទពិសោធន៍ពីផលិតផលត្រួតពិនិត្យសុខភាពចុងក្រោយបង្អស់របស់ Xiaomi គឺ Xiaomi Smart Band 7។ លើសពីនេះ ក៏មានសកម្មភាពកម្សាន្តផ្សេងៗដូចជាបានជួបជាមួយកីទ្បាករបាល់ទាត់អាជីព អ្នករត់ប្រណាំងអាជីព ការលេងល្បែងប្រជាប្រិយ ក៏រួមចំណែកធ្វើឱ្យបរិយាកាសព្រឹត្តិការណ៍កាន់តែរំភើបផងដែរ។

នៅទីក្រុងភ្នំពេញ ព្រឹត្តិការណ៍ Xiaomi POP Run លើកដំបូងត្រូវបានប្រារព្ធឡើងនៅថ្ងៃទី 26 ខែវិច្ឆិកា ឆ្នាំ 2022។ បន្ទាប់ពីបញ្ចប់ការរត់ចម្ងាយ 2km អ្នកចូលរួមម្នាក់ៗនឹងទទួលបានមេដាយ និងកាដូរអនុស្សាវរីយ៍។ នៅចុងបញ្ចប់នៃព្រឹត្តិការណ៍នេះ មានការចាប់ឆ្នោតផ្សងសំណាងជាមួយនឹងរង្វាន់ទូរសព្ទ័ Redmi A1, Xiaomi Smart Band 7, ជញ្ជីងឆ្លាតវៃ និងផលិតផល Xiaomi ជាច្រើនទៀត។ ក្នុងកម្មវិធីនេះសមាជិកជាង 100 នាក់នៃសហគមន៍ Xiaomi បានចូលទៅរត់ក្នុងទីធ្លាវិទ្យាល័យឥន្ទ្ររទេវី ដែលបានទទួលការស្វាគមន៍ និងគាំទ្រដ៏កក់ក្ដៅពីលោកនាយកសាលាទៀតផង។

នៅឆ្នាំនេះ សហគមន៍ Xiaomi សកលក៏បានស្វាគមន៍ព្រឹត្តិការណ៍ដ៏គួរឱ្យរំភើបជាច្រើនពី Xiaomi នៅក្នុងតំបន់ចំនួន 13 ដោយមានគោលដៅបញ្ជាក់ពីមុខងារសំខាន់ៗរបស់ Xiaomi Smart Band 7 ដូចជាមុខងាររាប់ចំនួនជំហាន វាស់ចង្វាក់បេះដូង វាស់កម្រិតអុកស៊ីសែននៅក្នុងម៉ាស៊ីន (SPO2), តាមដានការគេង, តាមដានកម្រិតនៃភាពតានតឹង, និងតាមដានសុខភាពស្រ្តីប្រចាំខែជាដើម។

ក្នុងឆ្នាំ 2019 Xiaomi POP Run ត្រូវបានប្រារព្ធឡើងនៅក្នុងតំបន់ចំនួន 5 រួមមាន រុស្ស៊ី ម៉ិកស៊ិក បារាំង អេស្ប៉ាញ និងវៀតណាម ដែលមានសមាជិកចុះឈ្មោះសរុបជាង 4500។

នៅឆ្នាំ 2021 សហគមន៍ Xiaomi បានរៀបចំព្រឹត្តិការណ៍រត់តាមអ៊ីនធឺណិតជាសកលជាលើកដំបូង ដើម្បីលើកទឹកចិត្តអ្នកប្រើប្រាស់ឱ្យរក្សាទម្លាប់នៃការរត់រយៈពេល 21 ថ្ងៃ។ ព្រឹត្តិការណ៍អនឡាញបានទទួលអ្នកតាមដានច្រើនជាង 1.7 លាន (Page View) 880 ពាន់ការចូលមើលគេហទំព័រតែមួយគត់ (Unique Visit) បានទាក់ទាញអ្នកចូលរួមជាង 27,000 នាក់មកពីជាង 125 ប្រទេស ដោយប្រមូលផ្តុំគ្នា 450 លានជំហាន។ លើសពីនេះ Xiaomi ក៏រៀបចំយុទ្ធនាការផ្សព្វផ្សាយសមរម្យនៅក្នុងប្រទេសម៉ាឡេស៊ី ហ្វីលីពីន និងរុស្ស៊ីជាដើម។

Xiaomi Camboida ក៏មានកិត្តិយសក្នុងការបរិច្ចាគមូលនិធីសរុប 5,000,000 រៀល ដើម្បីគាំទ្រលើកទឹកចិត្ដដល់ប្អូនៗសិស្សានុសិស្សនៅវិទ្យាល័យឥន្ត្ររទេវីដែលជួបការលំបាក ដែលមូលនិធីនេះក៏មានចំណែកបានចូលរូមពី Xiaomi Fans, និងដៃគូរសហការរបស់យើងដូចជា We Run Cambodia, CATPRO, Tech Zone, និង One Click។

សូមជំរាបថា ក្រុមហ៊ុន Xiaomi បានបង្កើតកិត្តិនាមរបស់ខ្លួនលើទីផ្សារអន្តរជាតិអស់រយោះពេល 12 ឆ្នាំ គិតត្រឹមឆ្នាំ 2022 នេះ ជាក្រុមហ៊ុនទូរសព្ទ័ចំណាត់ថ្នាក់លេខ 3 លើពិភពលោក និង ឈានមុខគេដោយក្រុមហ៊ុនបានបំពេញនូវតម្រូវការដល់អតិថិជន រាប់រយលាននាក់ នៅទូទាំងសកលលោក តាមរយ:ការបង្កើតផលិតផលបច្ចេកវិទ្យាទំនើប និង eco system ដ៏ឆ្លាតវៃ មានដូចជាផលិតផល Smart Home និងផលិតផលជាច្រើនទៀតជាងបីពាន់មុខ ដែលធ្វើឲ្យជីវិត មានភាពងាយស្រួល និងទាន់សម័យ ( Xiaomi Smart Life Made Simple )។

សម្រាប់ពត៌មានបន្ថែមសូមតាមដានគេហទំព័រហ្វេសប៊ុកផ្លូវការ Xiaomi Cambodia។

November 26, 2022

គ្រាន់តែកន្លែងចតឡានមួយសោះ មានតម្លៃរហូតដល់ជាង 300,000 ដុល្លារអាម៉េរិក

(សហរដ្ឋអាម៉េរិក) – ទឹកប្រាក់ 300,000 ដុល្លារអាម៉េរិក គឺគ្រប់គ្រាន់សម្រាប់ទិញផ្ទះមួយខ្នងដ៏ស្រស់ស្អាត និងធំទូលាយនៅ កម្ពុជា ប៉ុន្តែ ចំនួនទឹកប្រាក់នេះអាចទិញបានតែកន្លែងចតឡានមួយប៉ុណ្ណោះនៅទីក្រុង New York សហរដ្ឋអាម៉េរិក។

ទីក្រុង New York ថ្មីៗនេះបានក្លាយជាទីដែលការចំណាយលើការចតឡាន មានកម្រិតខ្ពស់ជាងគេបំផុតលើពិភពលោក។ យោងតាម Parkopedia ជាមធ្យម ម្ចាស់ឡាននៅទីនេះនឹងត្រូវបង់ថ្លៃប្រហែល 43.1 ដុល្លារសម្រាប់ការចតឡាន 2 ម៉ោង ហើយថ្លៃចតឡានប្រចាំថ្ងៃគឺប្រហែល 52.65 ដុល្លារ/8 ម៉ោង។

ក៏ប៉ុន្តែ CNBC បែរជាបានឱ្យដឹងថា ខាងលើនេះគ្រាន់តែជាតម្លៃនៅតាមទីតាំងផ្ញើឡានបែបប្រពៃណីប៉ុណ្ណោះ។ ចំពោះទីតាំងចតឡានបច្ចេកវិទ្យាខ្ពស់នៅ New York ខ្ទង់ប្រាក់ដែលអាចកាន់កាប់កន្លែងចតឡានមួយបាន គឺចាប់ពី 300,000 ដល់ 600,000 ដុល្លារអាម៉េរិក/មួយកន្លែង។

យោងតាម CNBC មូលហេតុមួយក្នុងចំណោមកាតាដែលនាំឱ្យទីតាំងចតឡាននេះមានតម្លៃខ្ពស់គឺដោយសារវាត្រូវបានសាងសង់ឡើងសម្រាប់តែក្រុមអភិជនដែលស្នាក់នៅក្នុងអគារប្រណិត។

កាលពីដើមខែនេះ អ្នកស្រី Lori Alf (អាយុ 50 ឆ្នាំ) បានទិញខុនដូ 2 ជាន់ក្នុងតម្លៃ 9.45 លានដុល្លារ នៅ Manhattan (New York) និងទទួលបានកាដូអមមួយដែលជាកន្លែងចតឡានមួយកន្លែងតម្លៃ 300,000 ដុល្លារ នៅក្នុងទីតាំងចតឡានបច្ចេកវិទ្យាខ្ពស់របស់អគារ។

យោងតាមអ្នកស្រី Lori នេះគឺជាខ្ទង់ប្រាក់ដ៏សមស្រប ព្រោះថាពេលនេះ នៅពេលសមាជិកណាម្នាក់ក្នុងគ្រួសារ ត្រូវការកន្លែងចតឡាន ពួកគេគ្រាន់តែបើកឡានចូលទៅក្នុងទីលានរង់ចាំ ស្កេនកាត ID និងចុះពីលើឡាន។ ក្រោយមក ការងារដែលនៅសល់បន្ទាប់នឹងត្រូវបានប្រគល់ឱ្យរ៉ូបូត៕

November 26, 2022

(World Cup 2022) – Ronaldo លូកដៃចូលក្នុងខោយកអាហារមកទំពាហូបក្នុងពេលប្រកួត

អ្នកគាំទ្របាល់ទាត់មានការភ្ញាក់ផ្អើល និងមន្ទិលខ្លាំងនៅពេលឃើញកីឡាកររបស់ ព័រទុយហ្កាល់ Cristiano Ronaldo លូកដៃយកអាហារពីក្នុងខោ ហើយដាក់ចូលមាត់ទំពាធ្វើព្រងើយ នៅក្នុងការប្រកួតជាមួយក្រុមជម្រើសជាតិរបស់ ហ្កាណា។

ក្នុងនាទីទី 36 ក្នុងការប្រកួតរវាង ព័រទុយហ្កាល់ ជាមួយនឹង ហ្កាណា នៅ World Cup 2022 កាលពីថ្ងៃទី 24 វិច្ឆិកា ម៉ាស៊ីនថតរបស់ទូរទស្សន៍បានបាញ់កាណុងតម្រង់ Cristiano Ronaldo និងថតបានទិដ្ឋភាពកីឡាករខ្សែប្រយុទ្ធវ័យ 37 ឆ្នាំរូបនេះ លូកដៃចូលក្នុងខោ ហើយបន្តិចក្រោយមកក៏យករបស់អ្វីម្យ៉ាងដាក់ចូលក្នុងមាត់ ទំពាធ្វើមិនដឹង នេះបើតាមទំព័រសារព័ត៌មាន Marca របស់ អេស្ប៉ាញ។

សកម្មភាពរបស់ Ronaldo ធ្វើឱ្យអ្នកគាំទ្របាល់ទាត់មួយចំនួនមានការមន្ទិលសង្ស័យ នាំឱ្យមានការបញ្ចេញមតិជាច្រើន។ «Ronaldo កំពុងទំពាថ្នាំជក់» គណនី Twitter មួយសរសេរដូច្នេះ។

មនុស្សម្នាក់ទៀតយល់ថា FIFA គួរតែចូលធ្វើអន្តរាគមន៍ និងស្វែងយល់អំពីសកម្មភាពនៅពេលកំពុងប្រកួតរបស់តារាបាល់ទាត់ជនជាតិព័រទុយហ្កាល់រូបនេះ។ ម្នាក់នេះសរសេរលើ Twitter ថា «Ronaldo គួរតែត្រូវបានស៊ើបអង្កេត»។

សារព័ត៌មានព័រទុយហ្កាល់ យល់ថា Ronaldo ប្រហែលជាហូបអាហារបំប៉នកម្លាំងដែលដាក់នៅក្នុងខោជាស្រេចមុនពេលចូលប្រកួត។ ចំណែក សមាគមបាល់ទាត់ព័រទុយហ្កាល់ វិញ បានឱ្យដឹងថា កីឡាកររូបនេះគ្រាន់តែយកស្ករកៅស៊ូពីក្នុងខោដើម្បីទំពាប៉ុណ្ណោះ។

ទាក់ទិននឹងបញ្ហាដែលត្រូវបានលើកឡើងខាងលើ កីឡាករពាក់អាវលេខ 7 របស់ ក្រុមបាល់ទាត់ជម្រើសជាតិព័រទុយហ្កាល់ មិនទាន់មានការបកស្រាយអ្វីនៅឡើយ៕

November 26, 2022

សហរដ្ឋអាម៉េរិក ហាមឃាត់ការលក់ឧបករណ៍ទូរគមនាគមន៍របស់ក្រុមហ៊ុនចិន Huawei និង ZTE

សហរដ្ឋអាម៉េរិក បានដាក់ក្រុមហ៊ុន Huawei និង ZTE ទៅក្នុងបញ្ជីស្ដីពីក្រុមហ៊ុនដែលត្រូវបានចាត់ទុកថាជាការគំរាមកំហែងដល់ប្រទេសនេះ និងហាមការផ្ដល់អាជ្ញាប័ណ្ណ ក៏ដូចជាការនាំចូល ឬលក់ផលិតផលរបស់ក្រុមហ៊ុនទាំងនេះ។

ក្រុមមន្ត្រីអាម៉េរិក កាលពីថ្ងៃទី 25 វិច្ឆិកា បានប្រកាសអំពីបទបញ្ជាហាមនាំចូល ឬលក់ឧបករណ៍ទំនាក់ទំនងដែល អាម៉េរិក ចាត់ទុកថាជា «ហានិភ័យមិនអាចទទួលយកបានសម្រាប់សន្តិសុខជាតិ» ក្នុងនោះក៏មានផលិតផលរបស់ក្រុមហ៊ុនចិន Huawei និង ZTE ផងដែរ។

ក្រុមហ៊ុនចិនទាំងពីរនេះ សុទ្ធតែស្ថិតក្នុងបញ្ជីឈ្មោះស្ដីពីបណ្ដាក្រុមហ៊ុនដែលត្រូវ គណៈកម្មការទូរគមនាគមន៍សហរដ្ឋអាម៉េរិក (FCC) ចាត់ទុកជាការគំរាមកំហែង។ បទបញ្ជាថ្មីក៏ហាមការផ្ដល់អាជ្ញាប័ណ្ណនៅ សហរដ្ឋអាម៉េរិក ចំពោះបណ្ដាឧបករណ៍របស់ Huawei និង ZTE នៅក្នុងអនាគត។

នេះគឺជាឥរិយាបថថ្មីបំផុតនៅក្នុងសកម្មភាពផ្លូវច្បាប់ ដើម្បីកាត់បន្ថយសិទ្ធិរបស់បណ្ដាក្រុមហ៊ុនចិន ក្នុងការវាយលុកទីផ្សារទូរគមនាគមន៍នៅ សហរដ្ឋអាម៉េរិក។ ការសម្រេចចិត្តខាងលើនេះត្រូវបានលើកឡើងនៅពេលស្ថានការណ៍នយោបាយ និងពាណិជ្ជកម្មរបស់ ចិន និង អាម៉េរិក កំពុងជាប់គាំង។

អាជ្ញាធររបស់ ប្រទេសចិន មិនទាន់មានប្រតិកម្មឆ្លើយតបនៅឡើយ ទាក់ទិននឹងបទបញ្ជាថ្មីខាងលើរបស់ សហរដ្ឋអាម៉េរិក។

កាលពីឆ្នាំ 2019 សហរដ្ឋអាម៉េរិក បានបញ្ចូលក្រុមហ៊ុន Huawei ទៅក្នុងបញ្ជីខ្មៅ និងហាមក្រុមហ៊ុនអាម៉េរិក រកស៊ីជាមួយ ក្រុមហ៊ុនចិនមួយនេះ។ ជាលទ្ធផល ផ្នែកផលិតទូរស័ព្ទរបស់ Huawei ហាក់ស្ទើរតែក្ស័យធន ដោយប្រាក់ចំណូលរបស់ក្រុមហ៊ុននេះធ្លាក់ចុះយ៉ាងគំហុក៕

November 26, 2022

អ្នកបង្ហាញផ្លូវនៅ World Cup 2022 ធ្វើឱ្យផ្ទុះការចាប់អារម្មណ៍នៅប្រទេសកាតា

Abubakr Abbass ក្លាយជាបាតុភូតលេចធ្លោនៅលើបណ្ដាញសង្គម ដោយសារតែវិធីបង្ហាញផ្លូវប្រកបដោយភាពសប្បាយរីករបស់គាត់ សម្រាប់អ្នកគាំទ្របាល់ទាត់នៅពេលទៅមើល World Cup នៅ កាតា។

អង្គុយនៅលើកៅអីសម្រាប់អាជ្ញាកណ្ដាលនៃកីឡាវាយកូនបាល់ (tennis) និងកាន់ស្លាកបង្ហាញផ្លូវដែលមានរូបរាងជាម្រាមដៃ Abubakr Abbass គឺជាអ្នកបង្ហាញផ្លូវម្នាក់សម្រាប់ភ្ញៀវដែលមកពីផ្សារ Souq Waqif នៅ រដ្ឋធានីដូហា ប្រទេសកាតា ទៅកាន់ស្ថានីយរថភ្លើងអគ្គិសនីក្រោមដីនៅក្បែរនោះ។

«ស្ថានីយរថភ្លើងអគ្គិសនីក្រោមដី? ផ្លូវនេះ។ ស្ថានីយរថភ្លើងអគ្គិសនីក្រោមដី? ផ្លូវនេះ» (Metro? This way) Abbass វ័យ 23 ឆ្នាំ មកពី កេនយ៉ា និយាយដាក់ប្រដាប់បំពងសំឡេងជាបន្តបន្ទាប់ដូច្នេះ។

សកម្មភាពបង្ហាញផ្លូវដ៏សប្បាយរីករាយរបស់ Abbass បាននាំឱ្យមនុស្សម្នាមានការចាប់អារម្មណ៍ខ្លាំង។ នៅពេល Abbass និយាយថា «ស្ថានីយរថភ្លើងអគ្គិសនីក្រោមដី?» ភ្ញៀវទាំងឡាយក៏ស្រែកហ៊ោតាមថា «ផ្លូវនេះ»។

នៅលើបណ្ដាញសង្គម គេឃើញមានការបង្ហោះវីដេអូបង្ហាញពីសកម្មភាពរបស់ Abbass ក៏ដូចជាភាពសប្បាយរីករាយរបស់អ្នកគាំទ្របាល់ទាត់ដែលបានជួប បានឃើញ និងបានថតរូបជាមួយ Abbass៕

November 26, 2022

ក្រសួងសាធារណការ និងក្រុមហ៊ុនផលិតរថយន្តអគ្គិសនី BYD ពិភាក្សាគ្នាអំពី «ការដំឡើងឆ្នាំងសាកថ្មល្បឿនលឿននៅទូទាំងប្រទេស»

កាលពីថ្ងៃទី 25 វិច្ឆិកាកន្លងទៅ តំណាងក្រុមហ៊ុនផលិតរថយន្តអគ្គិសនីចិន BYD ត្រូវបានអនុញ្ញាតឱ្យចូលជួបពិភាក្សាជាមួយ រដ្ឋមន្ត្រីក្រសួងសាធារណការ និងដឹកជញ្ជូនកម្ពុជា ក្នុងបំណងផ្លាស់ប្ដូរយោបល់ស្ដីពី ការជំរុញការប្រើប្រាស់រថយន្តអគ្គិសនីនៅ កម្ពុជា និងការដំឡើងឆ្នាំងសាកថ្មល្បឿនលឿនសម្រាប់រថយន្តអគ្គិសនីនៅទូទាំងប្រទេស។

យោងតាមក្រុមហ៊ុន BYD នៅក្នុងជំនួបរវាង ក្រសួងសាធារណការ និងក្រុមហ៊ុន BYD លោក Henry Yip ដែលជានាយកប្រតិបត្តិក្រុមហ៊ុន BYD Auto Industry បានណែនាំនូវផលិតផលមួយដែលមានបច្ចេកវិទ្យាខ្ពស់ របស់ក្រុមហ៊ុន BYD ដែលអាចជួយដោះស្រាយបញ្ហាកកស្ទះចរាចរណ៍ នោះគឺ រថភ្លើងលើអាកាស (Sky Rail)។

តបទៅនឹងការបង្ហាញរបស់ BYD ខាងលើ ឯកឧត្តម ស៊ុន ចាន់ថុល ទេសរដ្ឋមន្ត្រី និងជា រដ្ឋមន្ត្រីក្រសួងសាធារណការ និងដឹកជញ្ជូន បានមានប្រសាសន៍ថា ផែនការនេះនឹងអាចសម្រេចបាននាពេលសមស្របណាមួយនៅក្នុងពេលអនាគត។

លោក Marco Mok នាយកប្រតិបត្តិក្រុមហ៊ុន BYD Cambodia បានណែនាំនូវផែនការសម្រាប់រថយន្តអគ្គិសនីរបស់ក្រុមហ៊ុននេះសម្រាប់ឆ្នាំ 2023 ខាងមុខនេះផងដែរ។ ប៉ុន្តែ សេចក្ដីលម្អិត មិនទាន់ត្រូវបានបង្ហើបឱ្យដឹងនៅឡើយ។

November 26, 2022

អ៊ីរ៉ង់ ឈ្នះក្រុមបាល់ទាត់ជម្រើសជាតិមកពី អឺរ៉ុប ជាលើកដំបូងនៅ World Cup

ការផ្ដួលក្រុមបាល់ទាត់របស់ ប្រទេសវ៉ែលស៍ ដោយលទ្ធផល 2-0 គឺជាជ័យជម្នះលើកដំបូងដែលក្រុមជម្រើសជាតិរបស់ អ៊ីរ៉ង់ យកឈ្នះលើក្រុមមកពី អឺរ៉ុប នៅក្នុងការប្រកួតបាល់ទាត់ពិភពលោក World Cup។

នៅក្នុង 4 រដូវកាលមុនរបស់ World Cup អ៊ីរ៉ង់ បានប៉ះក្រុមបាល់ទាត់មកពី អឺរ៉ុប ចំនួន 6 ប្រកួត ក្នុងនោះមានតែ 1 ប្រកួតប៉ុណ្ណោះ ដែល អ៊ីរ៉ង់ បាន «ស្មើមុខ ស្មើមាត់» នៅពេលទាត់ជាមួយក្រុមរបស់ ព័រទុយហ្កាល់ ក្នុងវគ្គជម្រុះកាលពីឆ្នាំ 2018 ដែលទទួលបានលទ្ធផល 1-1។

ក្រុមជម្រើសជាតិរបស់ប្រទេសអាស៊ីខាងលិចមួយនេះ បានចាញ់ យូហ្គោស្លាវី (ឈ្មោះចាស់) 0-1, ចាញ់ អាល្លឺម៉ង់ 0-2 ក្នុងឆ្នាំ 1998, ចាញ់ ព័រទុយហ្កាល់ 0-2 ក្នុងឆ្នាំ 2006, ចាញ់ បូស្នី & ហឺហ្សីហ្គូវីណា ឆ្នាំ 2014 និងចាញ់ អេស្ប៉ាញ 0-1 ក្នុងឆ្នាំ 2018។

ជ័យជម្នះលើ វ៉ែលស៍ (Wales/ វ៉ែលស៍ ជារាជាណាចក្រមួយនៅក្នុងចក្រភពអង់គ្លេស) នៅលើកីឡដ្ឋាន Ahmed bin Ali នាថ្ងៃនេះ ក៏ទើបតែជាលើកទី 3 ដែល អ៊ីរ៉ង់ ឈ្នះការប្រកួតនៅ World Cup។ មុននោះ អ៊ីរ៉ង់ បានផ្ដួល អាម៉េរិក 2-1 ក្នុងឆ្នាំ 1998 និងផ្ដួល ម៉ារ៉ុក 1-0 ក្នុងឆ្នាំ 2018៕

November 26, 2022

Author: សឿន សំណាង