សឿន សំណាង - La Reine Media

ដើម្បីអបអរជ័យជម្នះនៅ World Cup 2022 អ៊ីរ៉ង់ ដោះលែងអ្នកទោសច្រើនរយនាក់

រដ្ឋមន្ត្រីក្រសួងយុត្តិធម៌អ៊ីរ៉ង់ ចុះហត្ថលេខាលើបទបញ្ជាដោះលែងអ្នកទោសជាង 700 នាក់នៅទូទាំងប្រទេស ក្រោយពីក្រុមបាល់ទាត់ជម្រើសជាតិរបស់ប្រទេសនេះយកឈ្នះ 2-0 លើក្រុមមកពី រាជាណាចក្រវ៉ែលស៍ (Wales) នៅ World Cup 2022។

«ក្រោយជ័យជម្នះប្រកបដោយមោទកភាពរបស់ក្រុមបាល់ទាត់ជម្រើសជាតិ រដ្ឋមន្ត្រីក្រសួងយុត្តិធម៌ Gholam Hossein Mohseni Ejei បានចូលរួមអបអរជាមួយប្រជាជនទូទាំងប្រទេស និងចុះហត្ថលេខាលើបទបញ្ជាពិសេស ស្នើឱ្យក្រុមមន្ត្រីយុត្តិធម៌ជួយដល់អ្នកទោសដែលមានលក្ខខណ្ឌគ្រប់គ្រាន់សម្រាប់ការលើកលែងទោស ដោះលែងឱ្យមានសេរីភាពត្រលប់ទៅកាន់គ្រួសារ» ទីភ្នាក់ងារសារព័ត៌មាន Mizan ដែលមានទំនាក់ទំនងជាមួយនឹង ក្រសួងយុត្តិធម៌អ៊ីរ៉ង់ ប្រកាសកាលពីម្សិលមិញដូច្នេះ។

សារព័ត៌មានអ៊ីរ៉ង់ ឱ្យដឹងថា អ្នកទោសប្រហែល 715 នាក់នៅក្នុង 12 ខេត្តរបស់ប្រទេសនេះ ត្រូវបានដោះលែង ក្នុងនោះមានទាំងអ្នកទោសដែលត្រូវបានចាប់ខ្លួន «ក្នុងព្រឹត្តិការណ៍ថ្មីៗនេះ» ដែលនេះហាក់សំដៅលើបាតុកម្មដែលបានផ្ទុះឡើងក្រោយពីការស្លាប់របស់នារី Mahsa Amini កាលពីខែកញ្ញា។

ជ័យជម្នះ 2-0 លើ រាជាណាចក្រវ៉ែលស៍ កាលពីថ្ងៃទី 25 វិច្ឆិកា គឺជាលើកដំបូងដែល អ៊ីរ៉ង់ បានយកឈ្នះលើក្រុមជម្រើសជាតិមកពី អឺរ៉ុប នៅក្នុងប្រវត្តិសាស្ត្រ World Cup។

អ៊ីរ៉ង់ បានចាញ់ 2-6 នៅក្នុងការប្រកួតជាមួយនឹង អង់គ្លេស កាលពីថ្ងៃទី 21 វិច្ឆិកា។ ក្រុមជម្រើសជាតិអ៊ីរ៉ង់ ក៏រងការខាតបង់ធំក្រោយការប្រកួតនោះ នៅពេលអ្នកចាំទីសំខាន់ Alireza Beiranvand ត្រូវបាក់ក្ដោងច្រមុះដោយសារការប៉ះទង្គិចជាមួយនឹងកីឡាកររួមក្រុមក្នុងពេលទប់ស្កាត់បាល់។

អ៊ីរ៉ង់ កំពុងមានឱកាសជាលើកដំបូងដើម្បីចូលទៅកាន់វគ្គជម្រុះផ្ទាល់។ ក្រុមជម្រើសជាតិប្រទេសនេះកំពុងស្ថិតនៅចំណាត់ថ្នាក់ទីពីរក្នុងពូល B ហើយនឹងត្រូវប្រកួតជាមួយ សហរដ្ឋអាម៉េរិក នៅជុំចុងក្រោយ៕

November 29, 2022

គម្រោងសាងសង់កំពង់ផែថ្មីមួយទៀតនៅភាគកណ្ដាលនៃប្រទេសវៀតណាម នឹងបើកការដ្ឋាននៅចុងឆ្នាំនេះ

តាមផែនការ ផ្នែកហេដ្ឋារចនាសម្ព័ន្ធសម្រាប់ប្រើប្រាស់រួមរបស់គម្រោងកំពង់ផែថ្មី Lien Chieu នៅភាគកណ្ដាលរបស់ ប្រទេសវៀតណាម នឹងចាប់ផ្ដើមការស្ថាបនានៅចុងឆ្នាំ 2022 ដោយមានទុនវិនិយោគជាង 3.4 ទ្រីលានដុង។

យោងតាមព័ត៌មានដែលត្រូវបានបង្ហោះនៅលើគេហទំព័ររបស់ ក្រសួងដឹកជញ្ជូនវៀតណាម កាលពីថ្ងៃទី 27 វិច្ឆិកា គម្រោងសាងសង់ខាងលើនេះគឺជាសមាសភាគ A ក្នុងចំណោមសមាសភាគចំនួន 2 របស់គម្រោងវិនិយោគសាងសង់កំពង់ផែ Lien Chieu ដែលមានទីតាំងស្ថិតក្នុងទីក្រុង Da Nang នៅភាគកណ្ដាលប្រទេស។

ខ្ទង់ប្រាក់វិនិយោគសម្រាប់គម្រោងសមាសភាគ A ដែលឡើងដល់ជាង 3.4 ទ្រីលានដុង ប្រហែលនឹង 137 លានដុល្លារអាម៉េរិកនេះគឺជាការបណ្ដាក់ទុនរបស់រដ្ឋ។ ចំណែកសមាសភាគ B របស់គម្រោងកំពង់ផែ Lien Chieu ទាំងមូល នឹងមានទំហំ 44 ហិកតា ដែលជាការវិនិយោគរបស់វិស័យឯកជន។

កំពង់ផែ Lien Chieu គឺជាកំពង់ផែមួយក្នុងចំណោមកំពង់ផែទឹកជ្រៅចំនួន 3 របស់ វៀតណាម។ កំពង់ផែ Lien Chieu ដែលនឹងចាប់ផ្ដើមការសាងសង់នៅថ្ងៃទី 14 ធ្នូ 2022 ខាងមុខ នឹងទទួលកប៉ាល់កុងតឺន័រដែលអាចដឹកបានពី 6,000 ទៅ 8,000 TEU៕

November 28, 2022

គម្រោងបង្កើតសណ្ឋាគារ និងរោងចក្រថ្មីចំនួន 4 មានទុនវិនិយោគជិត 172 លានដុល្លារ ទទួលបានការអនុម័តរួចហើយ

ក្រុមប្រឹក្សាអភិវឌ្ឍន៍កម្ពុជា នារសៀលថ្ងៃទី 28 វិច្ឆិកា 2022 នេះ បានប្រកាសថា សំណើសុំវិនិយោគសាងសង់ និងអាជីវកម្មសណ្ឋាគារផ្កាយ 5 មួយកន្លែង រួមនឹងគម្រោងបង្កើតរោងចក្រថ្មី 3 កន្លែងទៀត ត្រូវបានផ្ដល់អាជ្ញាប័ណ្ណរួចហើយ។

យោងតាម គណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា គម្រោងវិនិយោគលើសណ្ឋាគារផ្កាយ 5 ដែលមាន 582 បន្ទប់ និងមជ្ឈមណ្ឌលពាណិជ្ជកម្ម ក៏ដូចជាមណ្ឌលកម្សាន្តរបស់ក្រុមហ៊ុន MARITIME CITY CO., LTD ដែលទើបត្រូវបានផ្ដល់វិញ្ញបនបត្រពី ក្រុមប្រឹក្សាអភិវឌ្ឍន៍កម្ពុជា គឺមានទីតាំងស្ថិតនៅភូមិ 2 សង្កាត់លេខ 3 ក្រុងព្រះសីហនុ ខេត្តព្រះសីហនុ ដែលមានទុនវិនិយោគប្រមាណ 164.4 លានដុល្លារអាម៉េរិក និងអាចបង្កើតការងារបានជិត 1,500 កន្លែង។

ក្រៅពីគម្រោងសណ្ឋាគារខាងលើ ក្រុមប្រឹក្សាអភិវឌ្ឍន៍កម្ពុជា នារសៀលនេះក៏បានឱ្យដឹងដែរថា បានចេញវិញ្ញាបនបត្រជូនក្រុមហ៊ុនចំនួន 3 ផ្សេងទៀត ដែលគ្រោងនឹងបង្កើតរោងចក្រផលិតសម្ភារៈប្រើប្រាស់ រួមមាន ៖

ក្រុមហ៊ុន ONEPLUS NEW MATERIAL TECHNOLOGY CO., LTD ៖ គម្រោងបង្កើតរោងចក្រផលិតទុយោប្លាស្ទិក គ្រឿងតំណបំពង់ទីបជ័រគ្រប់ប្រភេទ និងគ្រឿងបន្ទាប់បន្សំ ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស ក្រុងព្រះសីហនុ ខេត្តព្រះសីហនុ ក្នុងទុនវិនិយោគចំនួន 5.5 លានដុល្លារអាម៉េរិក និងអាចបង្កើតការងារបានចំនួនប្រមាណ 70 កន្លែង។

ក្រុមហ៊ុន JINLAI TEXTILES CO., LTD. ៖ គម្រោងបង្កើតរោងចក្រផលិតភួយ ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស ក្រុងព្រះសីហនុ ខេត្តព្រះសីហនុ ក្នុងទុនវិនិយោគចំនួន 1 លានដុល្លារអាម៉េរិក និងអាចបង្កើតការងារបានចំនួនប្រមាណ 100 កន្លែង។

ក្រុមហ៊ុន XINJINCAI PLASTIC (CAMBODIA) CO., LTD. ៖ គម្រោងបង្កើតរោងចក្រផលិតសម្ភារៈវេចខ្ចប់គ្រប់ប្រភេទ ធ្វើពីប្លាស្ទិក ស្កុត និងស្ទិកឃ័រ ដែលមានទីតាំងវិនិយោគស្ថិតនៅក្នុងតំបន់សេដ្ឋកិច្ចពិសេស ក្រុងព្រះសីហនុ ខេត្តព្រះសីហនុ ក្នុងទុនវិនិយោគចំនួន 1 លានដុល្លារអាម៉េរិក និងអាចបង្កើតការងារបានចំនួនប្រមាណ 80 កន្លែង៕

November 28, 2022

ប្រភេទបន្លែសម្រាប់ជ្រូកនៅស្រុកចំការខ្មែរ បែរជាមានតម្លៃខ្ពស់នៅ ប្រទេសជប៉ុន

នៅផ្ទះរបស់ខ្ញុំ ក៏ដូចជាអ្នកស្រុកចំការនៅភូមិខ្ញុំ (កម្ពុជា) កូនដើមចេកគឺជាបន្លែដែលអាចយកមកធ្វើជាមុខម្ហូបមួយចំនួន ចំណែកដើមចេកចាស់ ចេកដែលប្រមូលផលផ្លែរួច តែងត្រូវអ្នកភូមិកាប់រំលំចោល ឬកាប់យកមកធ្វើជាចំណីសម្រាប់សត្វចិញ្ចឹម មានជ្រូក និងគោជាដើម ប៉ុន្តែ នៅ ប្រទេសជប៉ុន វិញ ដើមចេញក្រមុំត្រូវបានកាត់លក់ថ្លឹងគីឡូក្នុងតម្លៃខ្ពស់នៅក្នុងផ្សារទំនើប។

នៅ ប្រទេសជប៉ុន ដើមចេកដែលមានទម្ងន់ពី 400-500 ក្រាម ប្រវែងប្រហែល 10 សម ត្រូវបានដាក់លក់នៅផ្សារទំនើបក្នុងតម្លៃរហូតដល់ 1,400 យ៉េន ប្រហែលនឹង 42,000 រៀល។ មិនមែនជារឿងចម្លែកឡើយដែល ជនជាតិជប៉ុន ផ្ដល់តម្លៃខ្ពស់ទៅលើដើមចេក។

យោងតាមអ្នកវិទ្យាសាស្ត្រ និងវេជ្ជបណ្ឌិត ដើមចេកទាំងមូលសុទ្ធតែមានប្រយោជន៍ចំពោះសុខភាព។ ដើមចេកផ្ទុកសារជាតិកាកសរសៃច្រើន ល្អសម្រាប់អ្នកដែលមានបំណងសម្រកទម្ងន់។ ដើមចេកក៏ផ្ទុកសារជាតិ ប៉ូតាស្យូម វីតាមីន B6 និងសារជាតិចិញ្ចឹមជាច្រើនទៀត។ ស្លឹកចេកខ្ចីក៏ជាថ្នាំដ៏ល្អផងដែរនៅក្នុងឱសថបុរាណ។ ក៏ប៉ុន្តែ ល្អបំផុតគួរហូបក្រោម 5 ដងក្នុងមួយសប្ដាហ៍ ព្រោះថា បើហូបច្រើនជាងនេះអាចធ្វើឱ្យទល់លាមក។

ដើមចេកគឺជាប្រភេទបន្លែដែលត្រូវបានគេវាយតម្លៃថា ស្អាត សុវត្ថិភាព ងាយស្រួលដាំ និងមិនចាំបាច់បាញ់ថ្នាំគីមីដូចប្រភេទបន្លែដទៃ៕

November 28, 2022

យន្តហោះបុកចំបង្គោលខ្សែភ្លើង ធ្វើឱ្យរដ្ឋធានីរបស់ អាម៉េរិក ដាច់អគ្គិសនីទ្រង់ទ្រាយធំ

យន្តហោះធុនតូចហោះទៅបុកចំបង្គោលខ្សែភ្លើងនៅក្នុងរដ្ឋ Maryland បណ្ដាលឱ្យប្រជាជនជាង 120,000 គ្រួសារនៅ រដ្ឋធានីវ៉ាស៊ីងតោន ត្រូវដាច់ចរន្តអគ្គិសនី។

យន្តហោះម៉ាស៊ីនតែមួយ Mooney M20J ហោះបុកចំបង្គោលខ្សែភ្លើងតង់ស្យុងខ្ពស់នៅតំបន់ Montgomery ក្នុងរដ្ឋ Maryland របស់ សហរដ្ឋអាម៉េរិក កាលពីល្ងាចថ្ងៃទី 27 វិច្ឆិកា (ព្រឹកថ្ងៃទី 28 វិច្ឆិកានៅ កម្ពុជា) នៅក្នុងពេលអាកាសធាតុចុះអ័ព្ទខ្លាំង។

រូបភាពនៅកន្លែងកើតហេតុបង្ហាញថា យន្តហោះត្រូវជាប់នៅកណ្ដាលគ្រោងសសរ និងខ្សែភ្លើងតង់ស្យុងខ្ពស់ដែលមានកម្ពស់ជាង 30 ម៉ែត្រ។

ក្រុមហ៊ុនអគ្គិសនី Pepco បានឱ្យដឹងថា អតិថិជនប្រមាណ 120,000 នៅក្នុង រដ្ឋធានីវ៉ាស៊ីងតោន ត្រូវដាច់ចរន្តអគ្គិសនីដោយសារតែហេតុការណ៍គ្រោះថ្នាក់នេះ។ ផ្លូវជាច្រើនត្រូវបិទទ្វារ ស្របពេលដែលភ្លើងចរាចរណ៍ក្នុងតំបន់កើតហេតុត្រូវផ្អាកដំណើរការ។

ក្រុមមន្ត្រីនិយាយថា មនុស្សពីរនាក់នៅលើយន្តហោះនៅមានជីវិតនៅឡើយ និងបានជាប់គាំងក្នុងរយៈពេលយូរ ប៉ុន្តែមិនបានឱ្យដឹងលម្អិត។

អាជ្ញាធរគ្រប់គ្រងអាកាសចរណ៍អាម៉េរិក (FAA) បានឱ្យដឹងថា យន្តហោះ M20J ចេញដំណើរពី Westchester ក្នុងរដ្ឋ New York ហើយគ្រោងនឹងចុះចតនៅឯព្រលានយន្តហោះ Montgomery ក្បែរកន្លែងកើតហេតុ៕

November 28, 2022

ប្រតិភូសមាគមធុរកិច្ចថៃ-កម្ពុជា ស្វែងយល់អំពីឱកាសបង្កើនការវិនិយោគ និងពាណិជ្ជកម្មនៅ កម្ពុជា

ប្រតិភូសមាគមធុរកិច្ចថៃ-កម្ពុជា នាព្រឹកមិញនេះ ត្រូវបានអនុញ្ញាតឱ្យចូលសម្ដែងការគួរសម និងពិភាក្សាការងារជាមួយថ្នាក់ដឹកនាំរបស់ ក្រសួងពាណិជ្ជកម្មកម្ពុជា។

នៅទីស្តីការក្រសួងពាណិជ្ជកម្ម កាលពីព្រឹកថ្ងៃទី 28 វិច្ឆិកា 2022 ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានអនុញ្ញាតជូន លោក Voratat Tantimongkolsuk ប្រធានថ្មីរបស់ សមាគមធុរកិច្ចថៃ-កម្ពុជា រួមនឹងសមាជិកប្រតិភូ ចូលជួបពិភាក្សាការងារស្ដីពីវិស័យធុរកិច្ចរវាង ប្រទេសថៃ និង កម្ពុជា។

លោក Voratat Tantimongkolsuk ប្រធានសមាគមធុរកិច្ចថៃ-កម្ពុជា បានថ្លែងថា គោលបំណងនៃទស្សនកិច្ចរបស់គណៈប្រតិភូសមាគមធុរកិច្ចថៃ-កម្ពុជា នាពេលនេះ គឺដើម្បីស្វែងយល់បន្ថែមអំពីការបង្កើនឱកាសពាណិជ្ជកម្ម វិនិយោគ ពង្រីកបណ្តាញទីផ្សារ រវាងប្រទេសទាំងពីរបន្ថែមទៀត។

ក្នុងជំនួបនេះ ឯកឧត្តមរដ្ឋមន្ត្រី ប៉ាន សូរស័ក្ដិ បានមានប្រសាសន៍ថា ដំណើរទស្សនកិច្ចនេះ នឹងជួយឱ្យ គណៈប្រតិភូនៃ សមាគមធុរកិច្ចថៃ-កម្ពុជា ជ្រាបច្បាស់ថែមទៀតពីសក្តានុពលរបស់កម្ពុជា សម្រាប់ការវិនិយោគនាពេលបច្ចុប្បន្ន។

យោងតាមប្រសាសន៍របស់ រដ្ឋមន្ត្រីក្រសួងពាណិជ្ជកម្មកម្ពុជា ក្រសួងពាណិជ្ជកម្មបានធ្វើកំណែទម្រង់ការផ្តល់សេវាសាធារណៈ និងបានដាក់ឱ្យប្រើប្រាស់ប្រព័ន្ធស្វ័យប្រវត្តិកម្មក្នុងការផ្តល់វិញ្ញាបនបត្របញ្ជាក់ដើមកំណើតទំនិញ ការចុះបញ្ជីក្រុមហ៊ុន និងការចុះបញ្ជីម៉ាក ដែលមានភាពងាយស្រួល តម្លាភាព និងប្រសិទ្ធភាពជាងមុន។

ឯកឧត្តមរដ្ឋមន្ត្រី ក៏បានលើកទឹកចិត្តដល់ គណៈប្រតិភូសមាគមធុរកិច្ចថៃ-កម្ពុជា ប្រើប្រាស់នូវកិច្ចព្រមព្រៀងពាណិជ្ជកម្មនានាដែល កម្ពុជា ជាសមាជិក ដើម្បីបង្កើនការដោះដូរពាណិជ្ជកម្មរវាងប្រទេសទាំងពីរ៕

November 28, 2022

គម្រោងស្ថាបនាផ្លូវរូងខ្នាតធំក្រោមសមុទ្រ ប្រវែង 900 ម៉ែត្រ រួចរាល់ជាស្ថាពរ

(ប្រទេសចិន)-រូងក្រោមដីសម្រាប់ផ្លូវដែកតភ្ជាប់ Macao និងកោះ Hengqin ដែលស្ថាបនាដោយម៉ាស៊ីនជីករូងក្រោមដីខ្នាតយកប្រវែង 87 ម៉ែត្រ បានរួចរាល់ជាស្ថាពរកាលពីថ្ងៃសុក្រកន្លងទៅថ្មីៗនេះ។

ផ្លូវរូងក្រោមសមុទ្រដែលមានអង្កត់ផ្ចិតធំសម្រាប់រថភ្លើងធុនស្រាល ដែលតភ្ជាប់តំបន់រដ្ឋបាលពិសេស Macao (SAR) ជាមួយនឹងកោះ Hengqin ខេត្ត Guangdong ប្រទេសចិន ត្រូវបានស្ថាបនារួចរាល់កាលពីថ្ងៃទី 25 វិច្ឆិកា 2022។

ផ្លូវរូងនេះមានអង្កត់ផ្ចិតខាងក្រៅ និងខាងក្នុងប្រវែងជាបន្តបន្ទាប់គឺ 7.7 ម៉ែត្រ និង 7 ម៉ែត្រ។ ផ្លូវរូងនេះស្ថិតក្នុងគម្រោង Hengqin Line ដែលជាផ្នែកពង្រីកបន្ថែមរបស់ប្រព័ន្ធដឹកជញ្ជូនរហ័សធុនស្រាល (LRT) របស់ Macao។ គម្រោង Hengqin Line មានប្រវែងសរុប 2.2 គីឡូម៉េត្រ ក្នុងនោះ 900 ម៉ែត្រគឺជាផ្លូវរូងក្រោមសមុទ្រ។

ដើម្បីដោះស្រាយបញ្ហាដីទន់នៅជុំវិញផ្លូវរូង ក្រុមហ៊ុនឧស្សាហកម្មធុនធ្ងន់ស្ថាបនាផ្លូវដែកចិន បានផលិតម៉ាស៊ីនជីករូងដែលមានខែលការពារសម្ពាធ EPB។ នេះគឺជាម៉ាស៊ីនធំបំផុតក្នុងប្រភេទនេះដែលធ្លាប់ត្រូវបានប្រើប្រាស់នៅ Macao ដោយមានអង្កត់ផ្ចិតប្រវែង 7.98 ម៉ែត្រ និងបណ្ដោយ 87 ម៉ែត្រ។

ម៉ាស៊ីនខ្នាតយក្សនេះបំពាក់ប្រព័ន្ធបច្ចេកវិទ្យាឆ្លាតវៃ មានដូចជាប្រព័ន្ធស្ទាបស្ទង់ភូគព្ភសាស្ត្រទំនើប ដែលជួយធានាសុវត្ថិភាពរបស់សំណង់។

តាមផែនការ គម្រោងខាងលើនេះនឹងត្រូវបានដាក់ឱ្យប្រើប្រាស់នៅឆ្នាំ 2024។ នេះគឺជាផ្លូវសម្រាប់ប្រជាជនទៅមករវាងតំបន់ Macao និង Hengqin និងជួយបង្កើនកិច្ចសហការក្នុងតំបន់ឈូតសមុទ្រ Guangdong – Hong Kong – Maocao ផងដែរ៕

November 28, 2022

ករណីឆ្លងកូវីដ-19 នៅ កម្ពុជា មានការកើនឡើងបន្តិចក្នុងប៉ុន្មានថ្ងៃចុងក្រោយនេះ

ក្រសួងសុខាភិបាលកម្ពុជា បានរកឃើញអ្នកឆ្លងកូវីដ-19 ករណីថ្មី ចំនួន 10 នាក់ ក្នុងអំឡុង 24 ម៉ោង នៃថ្ងៃទី 27 ខែវិច្ឆិកា ឆ្នាំ 2022។

ក្នុងអំឡុងពេលដដែល មានករណីជាសះស្បើយ ចំនួន 05 នាក់ និង មិនមានករណីស្លាប់ថ្មី ដោយសារជំងឺនេះនោះទេ។

គិតត្រឹមព្រឹក ថ្ងៃទី 28 ខែវិច្ឆិកា ឆ្នាំ 2022 កម្ពុជា មានអ្នកឆ្លងកូវីដ-១៩ សរុប ៖ 138,073 នាក់, អ្នកជាសះស្បើយសរុប ៖ 134,976 នាក់ និងអ្នកស្លាប់សរុប ៖ 3,056 នាក់។

November 28, 2022

ករណីឆ្លងជំងឺកូវីដ-19 ផ្ទុះឡើងជាថ្មី និងខ្ពស់បំផុតក្នុង 5 ថ្ងៃបន្តបន្ទាប់នៅប្រទេសចិន

ប្រទេសចិន រកឃើញករណីឆ្លងថ្មីនូវជំងឺកូវីដ-19 ជាង 40,000 នាក់ ក្នុងនោះមានជាង 36,000 នាក់មិនមានរោគសញ្ញា ដែលនេះគឺជាកំណើនក្នុងរយៈពេល 5 ថ្ងៃបន្តបន្ទាប់នៅក្នុងការផ្ទុះឆ្លងសាជាថ្មីនេះ។

គណៈកម្មការជាតិសុខាភិបាលរបស់ ប្រទេសចិន ថ្ងៃនេះបានឱ្យដឹងថា ប្រទេសនេះរកឃើញករណីឆ្លងថ្មីនូវជំងឺកូវីដ-19 ចំនួន 40,347 នាក់ក្នុងអំឡុង 24 ម៉ោងកន្លង ក្នុងនោះមាន 3,822 ករណីមានរោគសញ្ញា និង 36,525 ករណីមិនមានរោគសញ្ញា។ នេះគឺជាកំណើនខ្ពស់មិនធ្លាប់មាននៅ ប្រទេសចិន រាប់ចាប់ពីការផ្ទុះជំងឺរាតត្បាត និងជាការកើនឡើងថ្ងៃទី 5 នៃការផ្ទុះឆ្លងបន្តបន្ទាប់ចុងក្រោយនេះ។

ក្នុងរលកនៃការឆ្លងរាលដាលថ្មីនេះ ប្រទេសចិន មិនបានរកឃើញករណីស្លាប់ដោយសារកូវីដ-19។ ករណីស្លាប់សរុបដោយសារជំងឺនេះនៅ ប្រទេសចិន បច្ចុប្បន្នគឺ 5,233 នាក់។

គិតត្រឹមថ្ងៃទី 27 វិច្ឆិកា 2022 ប្រទេសចិន (ចិនដីគោក) បានរកឃើញករណីឆ្លងកូវីដ-19 សរុប 311,624 នាក់ ដែលទាំងនេះសុទ្ធតែជាករណីមានរោគសញ្ញា៕

November 28, 2022

World Cup 2022 – អង្គភាពពិសេសរបស់ FIFA ប្រឆាំងឧបាយកលនៃការរៀបចំលទ្ធផលជាមុន

ក្រុមហ៊ុនបច្ចេកវិទ្យាកីឡារបស់ ស្វ៊ីស Sportradar ត្រូវបាន FIFA ប្រគល់ភារកិច្ចស្វែងរកភាពមិនប្រក្រតីនៅក្នុងទីផ្សារល្បែងភ្នាល់ ដើម្បីវែករកមុខការប្រកួតដែលសង្ស័យថា មានការរៀបចំលទ្ធផលជាមុន។

Sportradar តាមដានការប្រកួតទាំង 64 នៅក្នុងតារាងកាលបរិច្ឆេទប្រកួត។ ក្រៅពីភារិកិច្ចនេះ ពួកគេក៏សហការជាមួយ ការិយាល័យស៊ើបអង្កេតសហរដ្ឋអាម៉េរិក (FBI) និងប៉ូលិសអន្តរជាតិ (Interpol) ផងដែរ។

«បាល់ទាត់គឺជាកីឡាដែលទាក់ទាញបំផុតចំពោះក្រុមអ្នករៀបចំឧបាយកលគ្រប់គ្រងលទ្ធផល។ នៅ World Cup ឆ្នាំនេះ យើងសន្និដ្ឋានថា ការប្រកួតនីមួយៗមានការភ្នាល់រហូតដល់ជាង 1 ពាន់លានដុល្លារអាម៉េរិក» Andreas Krannich ដែលជាមេដឹកនាំមួយរូបនៅ Sportradar និយាយអំពីកម្រិតនៃសកម្មភាពនៅក្នុងទីផ្សារល្បែងភ្នាល់ ក្នុងរដូវកាល World Cup 2022។ ចំណែកទស្សនាវដ្ដីអាម៉េរិក Forbes បានព្យាករថា ប្រាក់ភ្នាល់បាល់សរុបនៅរដូវកាលបាល់ទាត់ពិភពលោកនៅ កាតា នឹងឡើងដល់ 160 ពាន់លានដុល្លារអាម៉េរិក។

Krannich យល់ថា កីឡាករ និងអាជ្ញាកណ្ដាលដែលសុខចិត្តទទួលសំណូកនឹងដូចទៅនឹងមេដឹកនាំអាក្រក់នៅក្រុងហិរញ្ញវត្ថុ Wall Street របស់ New York។ «ការរៀបចំលទ្ធផលបាល់ទាត់ក៏ដូចទៅនឹងការជួញដូរភាគហ៊ុនខុសច្បាប់។ ឱ្យតែមានព័ត៌មានផ្ទៃក្នុងពេលណា គឺប្រាក់ច្រើនសន្ធឹកនឹងត្រូវបានគេជះចូល»។

យោងទៅតាមគោលការណ៍ស្នូលនេះ ក្រុមអ្នកជំនាញនៅ Sportradar នឹងកត់ត្រាភាពមិនប្រក្រតីដែលបានប្រែប្រួលនៅក្នុងទីផ្សារល្បែងភ្នាល់។ សញ្ញាគន្លឹះចំនួនពីរដែលអាចប្រាប់ថា ការប្រកួតមួយមានធាតុផ្សំពីល្បែងចាក់ភ្នាល់ នោះគឺការប្រែប្រួលខ្លាំងរបស់គណនីភ្នាល់ដែលត្រូវបានគេចុះឈ្មោះ និងលំហូរនៃប្រាក់ភ្នាល់ទៅលើការប្រកួតនោះ។ Krannich ឱ្យដឹងថា គ្រាន់តែមើលទៅលើចំនួនទឹកប្រាក់ក៏ដឹងថាក្រុមណានឹងឈ្នះ។

អង្គភាពពិសេសប្រឆាំងល្បែងភ្នាល់ Sportradar នៅ World Cup 2022

នៅ Word Cup 2018 Sportradar ធ្លាប់ជួយដល់សមត្ថកិច្ចរកឃើញករណីរៀបចំលទ្ធផលក្នុងការប្រកួតរវាង អាហ្វ្រិកខាងត្បូង-សេណេហ្កាល់ នៅវគ្គជម្រុះតំបន់ កាលពីថ្ងៃទី 12 វិច្ឆិកា 2016។ ពេលនោះ អាជ្ញាកណ្ដាល Joseph Lamptey ជនជាតិហ្កាណា អនុញ្ញាតឱ្យ អាហ្វ្រិកខាងត្បូង ទាត់បាល់ពិន័យក្រោមមូលហេតុថា ខ្សែការពារ Kalidou Koulibaly លេងបាល់ដោយដៃ បើទោះជាការពិតបង្ហាញថា បាល់បានប៉ះជើងកីឡាករនេះ។

ចុងក្រោយ អាហ្វ្រិកខាងត្បូង បានឈ្នះ 2-1។ ប៉ុន្មានថ្ងៃក្រោយមក Sportradar និងដៃគូសហការជាអាជ្ញាធរមានសមត្ថកិច្ចក៏បានប្រកាសទិន្នន័យ និងភ័ស្ដុតាងស្ដីពីការប្រែប្រួលខុសប្រក្រតីនៅលើទីផ្សារភ្នាល់ និងបង្ហាញថា ក្រុមអ្នកលេងល្បែងភ្នាល់បានដឹងលទ្ធផលមុន។ ក្រោយពីមានលទ្ធផលនៃការស៊ើបអង្កេត FIFA ក៏បានសម្រេចចិត្តព្យួរការងារជាអាជ្ញាកណ្ដាលរបស់ Joseph Lamptey ជារៀងរហូត។

កាលពីឆ្នាំកន្លង Sportradar បានរកឃើញ 500 ប្រកួតដែលគួរឱ្យសង្ស័យ ប៉ុន្តែឆ្នាំនេះ គិតត្រឹមពាក់កណ្ដាលខែវិច្ឆិកា ពួកគេរកឃើញ 700 ករណី។ ចំណែកទិន្នន័យរួមបង្ហាញថា មាន 1,100 ប្រកួតគួរឱ្យសង្ស័យ ខណៈដែលពេញមួយឆ្នាំកន្លង មាន 903 ករណី៕

November 28, 2022

Author: សឿន សំណាង