សឿន សំណាង - La Reine Media

មន្ទីរសម្រាកព្យាបាល «ដើមអង្ក្រង» ត្រូវបានបិទ និងដកហូតលិខិតអនុញ្ញាត

ក្រសួងសុខាភិបាល សម្រេចបិទ និងដកហូតលិខិតអនុញ្ញាតឱ្យបើកមន្ទីរសម្រាកព្យាបាលឯកជនឈ្មោះ ដើមអង្ក្រង ដែលមានទីតាំងនៅផ្ទះគ្មានលេខ ផ្លូវជាតិលេខ 3 ឃុំអង្គពពេល ស្រុកគង់ពិសី ខេត្តកំពង់ស្ពឺ របស់លោកស្រីវេជ្ជបណ្ឌិត សូស ច័ន្ទរស្មី។

ការសម្រេចនេះត្រូវបានធ្វើឡើងបន្ទាប់ពី ក្រសួងសុខាភិបាល បានបិទបណ្ដោះអាសន្នចំពោះមន្ទីរសម្រាកព្យាបាលខាងលើ ក្រោយពីមានករណីរំលូតយកទារកក្នុងផ្ទៃដែលបានស្លាប់ ហើយកាត់ចំពោះវៀនរបស់ស្ត្រីជាម្ដាយ នាំឱ្យរងរបួសយ៉ាងធ្ងន់ធ្ងរកាលពីពេលថ្មីៗនេះ។

ក្នុងសេចក្ដីសម្រេចចុះថ្ងៃទី 08 ធ្នូ 2022 ក្រសួងសុខាភិបាល បានឱ្យដឹងថា មន្ទីរសម្រាកព្យាបាល ដើមអង្ក្រង បានប្រើប្រាស់បុគ្គលិកផ្សេងដែលគ្មានការបណ្ដុះបណ្ដាល គ្មានការចុះបញ្ជីគណៈវិជ្ជាជីវៈ និងប្ដូរទីតាំងដោយគ្មានការជូនដំណឹង។ ចំណែកអ្នកដែលពាក់ព័ន្ធ និងម្ចាស់មន្ទីរសម្រាកព្យាបាលនេះ នឹងត្រូវទទួលខុសត្រូវនៅចំពោះមុខច្បាប់។

December 8, 2022

ក្រោយធ្វើរដ្ឋប្រហារមិនបានសម្រេច ប្រធានាធិបតីប៉េរូ ក៏ត្រូវបានទម្លាក់ពីតំណែង

ប្រធានាធិបតីរប្រទេសប៉េរូ លោក Pedro Castillo ត្រូវបានសភាទម្លាក់ពីតំណែង ហើយក្រោយមកប៉ូលិសក៏បានបង្ហោះរូបថតលោកអង្គុយនៅក្នុងប៉ុស្ដិ៍ ប៉ុន្តែមិនទាន់ដឹងថា ត្រូវបានចាប់ខ្លួន ឬយ៉ាងណានៅឡើយ។

សភាប៉េរូ បានអនុម័តលើការសម្រេចចិត្តទម្លាក់ប្រធានាធិបតី Pedro Castillo កាលពីថ្ងៃទី 07 ធ្នូ ដោយមានសន្លឹកឆ្នោតគាំទ្រ 101 សំឡេង, ប្រឆាំង 6 សំឡេង និង អនុបវាទ 10 សំឡេង។ ការសម្រេចនេះត្រូវបានធ្វើឡើងតែប៉ុន្មានម៉ោងប៉ុណ្ណោះ បន្ទាប់ពីលោក Castillo ចេញបញ្ជាឱ្យរំសាយសភា នៅក្នុងការប៉ុនប៉ងក្ដោបក្ដាប់អំណាយមិនបានជោគជ័យ។

សភាប៉េរូ បន្ទាប់មកក៏បានស្នើឱ្យអនុប្រធានាធិបតី Dina Boluarte ស្បថចូលកាន់តំណែងប្រធានាធិបតី នាំឱ្យ ប៉េរូ មានប្រធានាធិបតីជាស្ត្រីភេទលើកដំបូង។ លោកស្រីនឹងកាន់តំណែងនេះរហូតដល់ឆ្នាំ 2026 និងបានអំពាវនាវឱ្យមានការសាមគ្គីគ្នាដើម្បីឆ្លងផុតវិបត្តិបច្ចុប្បន្ន ព្រមទាំងបានរិះគន់ចំពោះបទបញ្ជារបស់លោក Castillo ថា ជា «អំពើរដ្ឋប្រហារ» ផងដែរ។

ប៉ូលិសប៉េរូ បានបង្ហោះរូបថតលើបណ្ដាញសង្គមបង្ហាញថា អតីតប្រធានាធិបតី Castillo អង្គុយអានកាសែតនៅក្នុងប៉ុស្តិ៍ប៉ូលិស ក្រោយការបោះឆ្នោតរបស់សភា ហើយថា ពួកគេបាន «ធ្វើអន្តរាគមន៍» ដើម្បីសម្រេចភារកិច្ច ប៉ុន្តែ មិនបានឱ្យដឹងថា លោក Castillo ត្រូវបានចាប់ខ្លួន ឬយ៉ាងណាទេ។ រូបថតនេះ ក្រោយមកក៏ត្រូវបានលុបចេញពីគណនី Twitter របស់ប៉ូលិសជាតិ។

អតីតប្រធានាធិបតីប៉េរូ លោក Pedro-Castillo (អាវខៀវ)

រដ្ឋមន្ត្រីជាច្រើនរូបបានលាលែងពីតំណែង បន្ទាប់ពីលោក Casitillo ចេញបញ្ជាឱ្យរំសាយសភាជាតិ ខណៈដែលកងទ័ព និងប៉ូលិសរបស់ ប្រទេសប៉េរូ ព្រមានថា ទង្វើរបស់លោក Casitillo គឺជាការបំពានរដ្ឋធម្មនុញ្ញ។

បាតុកម្មមួយចំនួនបានកើតឡើងនៅ ប៉េរូ ក្រោយពីការបោះឆ្នោតនៅសភា។ មនុស្សរាប់សិបនាក់គ្រវីទង់ជាតិនៅតាមដងផ្លូវក្នុង រដ្ឋធានីលីម៉ា ដើម្បីអបអរការចាកចេញរបស់លោក Casitillo ក្នុងគ្រាដែលក្រុមគាំទ្រអតីតប្រធានាធិបតី ក៏ហែក្បួនដើម្បីប្រឆាំងនឹងការសម្រេចរបស់សភា។

របងបន្លាលួស និងប៉ូលិសប្រឆាំងកុបកម្មរាប់សិបនាក់ត្រូវបានដាក់ពង្រាយនៅជុំវិញតំបន់អគាររដ្ឋាភិបាល និងសភាប៉េរូ។

លោក Casitillo អតីតគ្រូបង្រៀននៅជនបទ បានរងការរិះគន់មិនឈប់ឈរ ចាប់តាំងពីបានក្លាយជាប្រធានាធិបតីរបស់ ប៉េរូ ក្រោយការបោះឆ្នោតកាលពីឆ្នាំកន្លង។ លោកបានកាន់តំណែងតាំងពីខែកក្កដា 2021 និងបានរួចផុតពីការចោទប្រកាន់ពីរលើក ហើយក៏ជាបុគ្គលដែលស្ថិតក្រោមការស៊ើបអង្កេតចំនួន 6 ករណីផងដែរ។

រដ្ឋមន្ត្រីក្រសួងយុត្តិធម៌ប៉េរូ កាលពីខែកន្លង បានដាក់ពាក្យប្ដឹងចោទប្រកាន់ថា លោក Castillo គឺជាមេដឹកនាំក្រុមជនល្មើសទាក់ទងនឹងគ្រួសារ និងសម្ព័ន្ធមិត្តរបស់គាត់។ អតីតប្រធានាធិបតី Castillo បានបដិសេធការចោទប្រកាន់នេះ និងនិយាយថា រូបគាត់គឺជាជនរងគ្រោះនៅក្នុងយុទ្ធនាការទម្លាក់តំណែងរបស់សភា៕

December 8, 2022

Messi និង Ronaldo មានភាពខុសគ្នាឆ្ងាយនៅរដូវកាល World Cup 2022

នៅ កាតា Lionel Messi ប្រៀបបានទៅនឹង «ព្រះចន្ទពេញបូណ៌មី» ក្នុងអាជីព នៅ World Cup ខណៈដែល Cristiano Ronaldo កាន់តែដូចទៅនឹង «ព្រះចន្ទ 15 កើតដែលត្រូវពពកបាំង»។

កំពូលកីឡាករ Messi និង Ronaldo ដែល «រត់ប្រណាំងទន្ទឹមគ្នា» អស់រយៈពេលជាង 10 ឆ្នាំមកហើយនេះ សុទ្ធតែប្ដេជ្ញាចិត្តខ្ពស់ក្នុងការដណ្ដើមយកពានរង្វាន់ជើងឯក World Cup 2022។ ក៏ប៉ុន្តែ Messi និង Ronaldo បង្ហាញអំណាចផ្ទុយគ្នាចាប់តាំងពីដើមរដូវកាល។

Messi គឺជាប្រភពជំរុញទឹកចិត្តជួយឱ្យ អាហ្សង់ទីន ឡើងដល់វគ្គ 1/8 នៅ World Cup 2022។ នៅវគ្គចែកពូល កំពូលតារាបាល់ទាត់វ័យ 35 Messi រកបាន 2 គ្រាប់ ក្នុងនោះ 1 គ្រាប់នៅក្នុងការប្រកួតចាញ់ អារ៉ាប៊ីសាអូឌីត 1-2 និង 1 គ្រាប់ក្នុងការប្រកួតឈ្នះ ម៉ិកស៊ិក 2-0។ ក្នុងវគ្គ 1/8 ពេលប៉ះ អូស្ត្រាលី Messi ក៏បន្តរកបាន 1 គ្រាប់ទៀត ជួយឱ្យ អាហ្សង់ទីន ឈ្នះ 2-1។

ទំព័រ WhoScored បានដាក់ពិន្ទុឱ្យ Messi 7.39 ពិន្ទុ ក្នុងការប្រួតជាមួយ អារ៉ាប៊ីសាអូឌីត ហើយ 8.4, 8.18 និង 8.15 ពិន្ទុសម្រាប់ 3 ប្រកួតបន្តបន្ទាប់ទៀត។ ជាមធ្យម ពិន្ទុរបស់ប្រធានក្រុមអាហ្សង់ទីន គឺ 7.94។

ចំណែក Ronaldo របស់ ព័រទុយហ្កាល់ វិញ ទើបរកបាន 1 គ្រាប់ ក្នុងការប្រកួតឈ្នះ ហ្កាណា 3-2។ ខ្សែប្រយុទ្ធវ័យ 37 ឆ្នាំរូបនេះ ថែមទាំងធ្វើឱ្យមានភាពចម្រូងចម្រាសនៅពេលទាមទារគ្រាប់បាល់ឈ្នះរបស់ Bruno Fernandes ក្នុងការប្រកួតឈ្នះ អ៊ុយរូហ្កាយ ក្នុងជុំទីពីរ។ ក្រុមហ៊ុន Adidas ប្រើប្រាស់បច្ចេកវិទ្យាបញ្ជាក់ថា បាល់មិនបានប៉ះ Ronaldo ហើយគណៈកម្មការក៏បានយកគ្រាប់បាល់នេះឱ្យ Fernandes។

ក្រោយមក Ronaldo ក៏បានបង្ហាញការខឹងសម្បា នៅពេលត្រូវបានគ្រូបង្វឹកប្ដូរចេញតាំងពីដើមតង់ទីពីរពេលប៉ះ កូរ៉េខាងត្បូង នាំឱ្យលោក Fernando Santos មិនពេញចិត្ត។ មកដល់ការប្រកួតឈ្នះ ស្វ៊ីស 6-1 ក្នុងវគ្គ 1/8 Ronaldo ត្រូវបានដាក់ជាកីឡាករបម្រុង ហើយ Goncalo Ramos ត្រូវទាត់ជំនួស និងបង្កើតបាន hat-trick (រកបាន 3 គ្រាប់ក្នុង 1 ប្រកួត) ជាលើកដំបូងរបស់ World Cup 2022។

ទំព័រ Whoscored បានដាក់ពិន្ទុឱ្យ Ronaldo 7.36 ពិន្ទុ នៅក្នុងការប្រកួតជាមួយ ហ្កាណា និងការប្រកួតបន្តបន្ទាប់ទៀតគឺ 6.63, 5.11 និង 6.07 ពិន្ទុ ធ្វើឱ្យពិន្ទុមធ្យមរបស់ខ្សែប្រយុទ្ធ ព័រទុយហ្កាល់ នេះ បានត្រឹមតែ 6.29 ពិន្ទុ។

មិនត្រឹមតែពិន្ទុនោះទេ សារព័ត៌មានរបស់ អង់គ្លេស Sunsport ក៏បានបញ្ចេញស្ថិតិជំនាញបង្ហាញអំពីភាពផ្ទុយគ្នាទាក់ទងនឹងកម្លាំងរបស់ Messi និង Ronaldo ផងដែរ។ ជាក់ស្ដែង Messi ស៊ុតចំគោលដៅ 10 គ្រាប់, បង្កើតឱកាស៊ុត 13 លើក, បញ្ជូនបាល់ 209 គ្រាប់, បង្កកំហុស 4 លើក, រកបាន 3 គ្រាប់ និងបង្កឱកាសស៊ុតបញ្ចូលទីបាន 1 គ្រាប់ នៅក្នុង 4 ប្រកួតកន្លង។

ចំណែកស្ថិតិសម្រាប់ Ronaldo វិញគឺ ស៊ុតចំគោលដៅ 2 គ្រាប់, បង្កឱកាសស៊ុត 3 លើក, បញ្ជូនបាល់ 81 លើក, បង្កកំហុស 2 លើក, រកបាន 1 គ្រាប់ និងមិនទាន់មានការបង្កឱកាសដែលបានស៊ុតបញ្ចូលទីនៅឡើយ៕

December 8, 2022

អាជ្ញាធរថៃ «ប្រកាសសង្គ្រាម» ជាមួយនឹងសាច់ជ្រូកនាំចូលខុសច្បាប់ពីបរទេស

ប្រទេសថៃ បានព្រមានថា អ្នកទាំងឡាយណាដែលត្រូវចាប់បានភស្ដុតាងទាក់ទិននឹងការនាំចូលសាច់ជ្រូកខុសច្បាប់ នឹងត្រូវប្រឈមនឹងការពិន័យធ្ងន់ធ្ងរទៅតាមច្បាប់របស់ប្រទេសនេះ។

នាយកដ្ឋានអភិវឌ្ឍវិស័យចិញ្ចឹមសត្វនៃក្រសួងកសិកម្ម និងសហករណ៍ថៃ ទើបតែបានប្រកាសជំរុញការចាត់វិធានការទប់ស្កាត់អំពើនាំចូលសាច់ជ្រូកខុសច្បាប់ពីបរទេស ដែលបង្កការខាតបង់ដល់កសិករ និងអ្នកប្រើប្រាស់ក្នុងប្រទេសនេះ។

ប្រកាសរបស់ នាយកដ្ឋានអភិវឌ្ឍវិស័យចិញ្ចឹមសត្វនៃក្រសួងកសិកម្មថៃ ត្រូវបានធ្វើឡើងបន្ទាប់ពីខែមុន អាជ្ញាធរថៃ បានរកឃើញ និងរឹបអូសសាច់ជ្រូកខុសច្បាប់ 40 តោន ដែលនាំចូលពីបណ្ដាប្រទេសជិតខាង។

លោក Somchuan Ratanamungklanon ប្រធាននាយកដ្ឋានអភិវឌ្ឍវិស័យចិញ្ចឹមសត្វ បានឱ្យដឹងថា ស្ទើរតែទាំងអស់នៃសាច់ជ្រូកនាំចូលខុសច្បាប់ សុទ្ធតែត្រូវបានដឹកតាមកប៉ាល់កុងតឺន័រ ហើយនាយកដ្ឋានគយ អាចត្រួតពិនិត្យបានតែមួយភាគតូចប៉ុណ្ណោះ។

ប្រធាននាយកដ្ឋានអភិវឌ្ឍវិស័យចិញ្ចឹមសត្វថៃ បានព្រមានថា អ្នកទាំងឡាយណាដែលត្រូវចាប់បានភស្ដុតាងទាក់ទិននឹងការនាំចូលសាច់ជ្រូកខុសច្បាប់ នឹងត្រូវប្រឈមនឹងការពិន័យធ្ងន់ធ្ងរទៅតាមច្បាប់ស្ដីពីជំងឺរាតត្បាតលើសត្វចិញ្ចឹមរបស់ប្រទេសនេះ។ ទំនិញដែលត្រូវបានរឹបអូសនឹងត្រូវកម្ទេចចោល ខណៈម្ចាស់ទំនិញនឹងត្រូវប្រឈមមុខនឹងការចោទប្រកាន់តាមច្បាប់ព្រហ្មទណ្ឌ និងរដ្ឋប្បវេណី៕

December 7, 2022

ក្រុមហ៊ុន GM សម្ពោធរោងចក្រធំដំបូងនៅ កាណាដា ដើម្បីផលិតរថយន្តអគ្គិសនីដឹកទំនិញ

ក្រុមហ៊ុនផលិតរថយន្តអាម៉េរិក General Motors (GM) បានសម្ពោធរោងចក្រផលិតរថយន្តអគ្គិសនីទ្រង់ទ្រាយធំដំបូងនៅ ប្រទេសកាណាដា កាលពីថ្ងៃទី 05 ធ្នូកន្លងទៅ ក្រោមអធិបតីភាព នាយករដ្ឋមន្ត្រី Justin Trudeau។

រោងចក្រដំឡើងរថយន្តដែលមានទីតាំងនៅក្នុងតំបន់ Ingersoll ខេត្ត Ontario នេះ ទទួលបានទុនវិនិយោគប្រហែល 380 លានដុល្លារអាម៉េរិក ពីរដ្ឋាភិបាល និងខេត្ត Ontario។ នេះគឺជាផ្នែកមួយនៃយុទ្ធសាស្ត្ររថយន្តអគ្គិសនីធំរបស់ កាណាដា ដែលរួមមានទាំងការរុករករ៉ែលីចូមសម្រាប់ការផលិតថ្មផ្ទុកថាមពលដើម្បីផ្គត់ផ្គត់ដល់រថយន្តអគ្គិសនីនៅ អាម៉េរិកខាងជើង។

នាយករដ្ឋមន្ត្រីកាណាដា លោក Justin Trudeau ថ្លែងកាលពីថ្ងៃទី 05 ធ្នូថា «ថ្ងៃនេះ យើងនឹងសម្ពោធរោងចក្រផលិតរថយន្តអគ្គិសនីទ្រង់ទ្រាយធំដំបូងនៅ កាណាដា»។ ចំណែកប្រធានក្រុមហ៊ុន GM កាណាដា អ្នកស្រី Marissa West បាននិយាយថា «អនាគតរបស់រថយន្តអគ្គិសនីនៅ កាណាដា លែងនៅជាគម្រោងមួយដែលនៅឆ្ងាយទៀតហើយ»។

រថយន្តអគ្គិសនីប្រភេទដឹកទំនិញ BrightDrop Zevo 600

រោងចក្រខាងលើនេះនឹងផលិតរថយន្តអគ្គិសនីប្រភេទដឹកទំនិញដែលមានឈ្មោះថា BrightDrop Zevo 600។ GM បានកំណត់គោលដៅផលិតរថយន្តប្រភេទនេះឱ្យបាន 50,000 គ្រឿងជារៀងរាល់ឆ្នាំចាប់ពីឆ្នាំ 2025។ ក្រុមហ៊ុនដឹកជញ្ជូនទំនិញរបស់ អាល្លឺម៉ង់ DHL Express គឺជាអតិថិជននៅ កាណាដា ដំបូងដែលបានបញ្ជាទិញរថយន្តដឹកទំនិញ BrightDrop៕

December 7, 2022

(World Cup 2022) – ការតាមរកទិញសំបុត្រក្នុងផ្សារងងឹតដើម្បីចូលទស្សនា

Ashraf Ali ទៅដល់កីឡដ្ឋាន 974 រយៈពេល 6 ម៉ោង មុនពេលបាល់ចាប់ផ្ដើមរមៀលក្នុងការប្រកួតរវាង អាហ្សង់ទីន និង ប៉ូឡូញ កាលពីយប់ថ្ងៃទី 30 វិច្ឆិកា ប៉ុន្តែ អស់សង្ឃឹម ដោយសារតែមិនអាចទិញបានសំបុត្រចូលទស្សនា ហើយក៏បានលើកបដាសរសេរដោយដៃថា «ខ្ញុំត្រូវការសំបុត្រ»។

មនុស្សម្នាក់ ក្រោយមកក៏បានចូលមកក្បែរ និងស្នើលក់សំបុត្រមួយសន្លឹកឱ្យ Ali ក្នុងតម្លៃ 2,000 ដុល្លារអាម៉េរិក ខ្ពស់ជាង 9 ដង ធៀបនឹងតម្លៃដើម។ តម្លៃនេះខ្ពស់ខ្លាំងណាស់សម្រាប់អ្នកគាំទ្រវ័យ 30 ឆ្នាំ មកពី អេហ្ស៊ីប ដើម្បីបំពេញក្ដីស្រមៃក្នុងការទស្សនាការប្រកួតរបស់ Lionel Messi ដោយផ្ទាល់។

30 នាទីមុនការប្រកួតចាប់ផ្ដើម Ali ទិញបានសំបុត្រមួយក្នុងតម្លៃ 500 ដុល្លារអាម៉េរិក ដើម្បីចូលទៅកាន់កីឡដ្ឋាន ហើយក៏បានទស្សនា ក្រុមអាហ្សង់ទីន ឈ្នះ ប៉ូឡូញ 2-0។

នៅពេល World Cup 2022 ឈានចូលដល់វគ្គជម្រុះផ្ទាល់ដែលប្រកបដោយភាពតានតឹង អ្នកគាំទ្រក៏ប្រមូលផ្ដុំគ្នាកាន់តែច្រើននៅខាងក្រៅកីឡដ្ឋាននានានៅ ដូហា ប្រទេសកាតា ដើម្បីតថ្លៃសំបុត្រជាមួយក្រុមអ្នកជួញដូរសំបុត្រ។ តម្លៃសំបុត្រសម្រាប់ទស្សនាការប្រកួតវគ្គសំខាន់ៗអាចត្រូវបានដំឡើងខ្ពស់ជាងធម្មតា 10 ដង។

ក្រុមឈ្មួញសំបុត្រហាក់មិនខ្លាចក្រែងចំពោះសមត្ថកិច្ចដែលដើរល្បាត ក៏ដូចជាកាមេរ៉ាសុវត្ថិភាព និងច្បាប់ហាមលក់សំបុត្រក្នុងទីផ្សារងងឹតនៅ កាតា។ «ទីផ្សារងងឹតកំពុងតែមានរូបរាង» ឈ្មួញសំបុត្រម្នាក់មកពី ប្រទេសបារាំង និយាយដូច្នេះ ហើយថា ការងារនេះជួយឱ្យគាត់រកបានប្រាក់ដើម្បីមើលការប្រកួតវគ្គផ្ដាច់ព្រ័ត្រ។

បុរសម្នាក់កាន់បដា «ខ្ញុំត្រូវការសំបុត្រមួយ» មុនការប្រកួតកាលពីថ្ងៃទី 30 វិច្ឆិកា 2022

បុរសខាងលើដែលសុំមិនបញ្ចេញឈ្មោះ បានឱ្យដឹងថា គាត់លក់សំបុត្រនេះទៅវិញក្នុងតម្លៃខ្ពស់ជាងធម្មតា 1,000% សម្រាប់ «អ្នកគាំទ្រដែលខ្លាំងក្លាបំផុត» នៅក្នុងការប្រកួតដែលមានកំពូលតារាបាល់ទាត់ដូចជា Messi ឬ Ronaldo ជាដើម។

World Cup 2022 បាន និងកំពុងទាក់ទាញឈ្មួញសំបុត្រជំនាញមកពីជុំវិញពិភពលោក។ អ្នកគាំទ្រប្រហែល 20 នាក់បានបង្ហើបប្រាប់ Reuters ថា ពួកបានទិញ ឬបានព្យាយាមទិញសំបុត្រនៅក្នុងផ្សារងងឹតតាមរយៈបណ្ដាញសង្គម ឬខាងក្រៅកីឡដ្ឋាន។

កាលពីសប្ដាហ៍កន្លង គណៈកម្មការ World Cup បានអំពាវនាវដល់ក្រុមអ្នកគាំទ្រថា អ្នកដែលមិនមានសំបុត្រ កុំមកកាន់កីឡដ្ឋាន បន្ទាប់ពីមានករណីហ្វូងមនុស្សព្យាយាមចូលទៅខាងក្នុងដោយការ «ជែក» នៅក្នុងការប្រកួតមួយចំនួន។

កន្លែងលក់សំបុត្រផ្លូវការនៅ World Cup 2022

ចំណែកអ្នកការទូតម្នាក់មកពី អាម៉េរិកឡាទីន បាននិយាយថា អាជ្ញាធរនៅ កាតា មិនបានចាត់ការឱ្យបានតឹងរឹងចំពោះសកម្មភាពលក់សំបុត្រក្នុងផ្សារងងឹត ហើយករណីភាគច្រើនត្រូវបានដាក់ទោសត្រឹមតែការពិន័យជាប្រាក់។ ស្ថានទូតបរទេសនានានៅ កាតា មិនទាន់បានទទួលដំណឹងណាមួយស្ដីពីការបណ្ដេញជនល្មើសចេញពីប្រទេសដោយសារទង្វើជួញដូរសំបុត្រនេះនៅឡើយ៕

December 7, 2022

ឱសថអភិវឌ្ឍពី «លាមកមនុស្ស» ទទួលបានការអនុម័តឱ្យប្រើប្រាស់ពី សហរដ្ឋអាម៉េរិក

FDA បានអនុម័តចំពោះវិធីព្យាបាលដែលដាក់បញ្ចូលបាក់តេរីយកពីលាមកមនុស្ស ដើម្បីព្យាបាលជំងឺពោះវៀន ជួយទប់ស្កាត់ករណីស្លាប់ដោយសារកើតជំងឺធ្ងន់ព្រោះតែឆ្លងមេរោគ។

ឱសថដែលរៀបរាប់ខាងលើមានឈ្មោះថា Rebyota ជាប្រភេទរាវ និងល្អក់ មានផ្ទុកបាក់តេរីពោះវៀនដែលយកពីលាមករបស់អ្នកបរិច្ចាគដែលមានសុខភាពល្អ។

ឱសថ Rebyota ទទួលបានការយល់ព្រមឱ្យប្រើប្រាស់សម្រាប់ការព្យាបាលអ្នកជំងឺដែលមានអាយុចាប់ពី 18 ឆ្នាំឡើងទៅ ជាអ្នកដែលត្រូវបានព្យាបាលជាសះស្បើយពីការឆ្លងមេរោគក្នុងពោះវៀន ប៉ុន្តែអាចកើតជំងឺនេះឡើងវិញ ដោយសារបាក់តេរី Clostridioides difficile ឬហៅថា C. diff។

បាក់តេរីប្រភេទនេះអាចចូលទៅគ្រប់គ្រងពោះវៀន បើសិនប្រព័ន្ធបាក់តេរីល្អត្រូវបានបំផ្លាញ (ដោយសារតែថ្នាំរម្ងាប់មេរោគជាដើម)។ នៅពេលបាក់តេរី C. diff កើនឡើងច្រើន ពួកវានឹងបញ្ចេញសារធាតុពុល បង្កឱ្យមានអាការរាករូស ឈឺពោះ ក្ដៅខ្លួន និងរលាកពោះវៀនធំ។

យោងតាម អាជ្ញាធរគ្រប់គ្រងអាហារ និងឱសថ (FDA) របស់ សហរដ្ឋអាម៉េរិក បាក់តេរី C. diff ជួលកាលអាចបណ្ដាលឱ្យមានជំងឺខ្សោយសរីរាង្គខាងក្នុង និងអាចបាត់បង់ជីវិត។ នៅ សហរដ្ឋអាម៉េរិក ជារៀងរាល់ឆ្នាំមានមនុស្សពី 15,000 ទៅ 30,000 នាក់បានស្លាប់ដោយសារជំងឺដែលទាក់ទងនឹងបាក់តេរី C. diff នេះ។

គ្រប់គ្នាអាចកើតជំងឺជាថ្មីច្រើនលើកដែលទាក់ទងនឹង C. diff ហើយថ្នាំរម្ងាប់មេរោគក៏មិនមែនពេលណាក៏មានប្រសិទ្ធភាពលើបាក់តេរីប្រភេទនេះដែរ តែពេលខ្លះទៀត ថ្នាំរម្ងាប់មេរោគអាចបំផ្លាញប្រព័ន្ធបាក់តេរីល្អ និងធ្វើឱ្យស្ថានភាពជំងឺកាន់តែធ្ងន់ធ្ងរ។

លោក Peter Marks ប្រធានមជ្ឈមណ្ឌលវាយតម្លៃ និងស្រាវជ្រាវជីវសាស្ត្ររបស់ FDA ឱ្យដឹងថា «ការយល់ព្រមសម្រាប់ថ្នាំ Rebyota គឺជាជំហានមួយនៅក្នុងការថែទាំអ្នកដែលមានជំងឺរើឡើងវិញដោយសារឆ្លង C. difficile»។

ដោយការបញ្ចូលថ្នាំខាងលើទៅកាន់តំបន់ចុងពោះវៀនធំ (កន្លែងតភ្ជាប់រវាងពោះវៀនធំ និងរន្ធគូទ) របស់អ្នកជំងឺ វេជ្ជបណ្ឌិតអាចកែលំអប្រព័ន្ធបាក់តេរីល្អក្នុងពោះវៀនផ្នែកខាងក្រោម ទប់ស្កាត់ការកើតជំងឺនេះជាថ្មី។ វិធីព្យាបាលនេះត្រូវបានប្រើប្រាស់បន្ទាប់ពីអ្នកជំងឺបានបញ្ចប់ការព្យាបាលដោយថ្នាំរម្ងាប់មេរោគ៕

December 7, 2022

ធនាគារពិភពលោក ថា «សេដ្ឋកិច្ចកម្ពុជាកំពុងងើបឡើងវិញ ប៉ុន្តែអាចនៅជួបឧបសគ្គច្រើនទៀត»

សេដ្ឋកិច្ចរបស់ កម្ពុជា កំពុងងើបឡើងវិញបានល្អបន្ទាប់ពីការផ្ទុះជំងឺកូវីដ-19 ប៉ុន្តែកត្តាអវិជ្ជមាននានាដែលកំពុងកើតឡើងលើសកលលោក អាចបង្កហានិភ័យដល់ទស្សនវិស័យវិជ្ជមានសម្រាប់កំណើនក្នុងរយៈពេលប៉ុន្មានខែខាងមុខ នេះបើតាមរបាយការណ៍របស់ធនាគារពិភពលោក (WB) ចេញផ្សាយនៅថ្ងៃទី 07 ធ្នូនេះ។

របាយការណ៍បច្ចុប្បន្នភាពសេដ្ឋកិច្ចកម្ពុជា សម្រាប់ខែធ្នូ 2022 របស់ WB បានឱ្យដឹងថា ការងើបឡើងវិញនៃសេដ្ឋកិច្ចក្រោយសម័យកូវីដរបស់ កម្ពុជា ជាមួយនឹងកំណើន 4.8% នៅឆ្នាំ 2022 គឺមួយផ្នែកអាស្រ័យទៅលើការស្ទុះងើបឡើងវិញនៃវិស័យទេសចរណ៍។

ឧស្សាហកម្មកាត់ដេរ ទំនិញធ្វើដំណើរ និងការនាំចេញស្បែកជើងរបស់ កម្ពុជា នៅរក្សាបានភាពស្វិតស្វាញរបស់ខ្លួន។ វិស័យសេវាកម្ម ជាពិសេសផ្នែកធ្វើដំណើរ និងទេសចរណ៍ មានដំណើរបាន ខណៈដែលភ្ញៀវអន្តរជាតិមកកាន់ កម្ពុជា បានកើនឡើងជាលំដាប់ រហូតដល់ទៅ 1.2 លាននាក់ ក្នុងរយៈពេល 9 ខែដំបូងនៃឆ្នាំ 2022 នេះបើតាម WB។ ធនាគារនេះបន្ថែមថា កំណើនសេដ្ឋកិច្ចក៏កើនឡើងដោយសារ «ទំនុកចិត្តរបស់ធុរកិច្ច និងអ្នកប្រើប្រាស់បានកើនឡើង អមដោយការកើនឡើងនៃការវិនិយោគក្នុងប្រទេស និងពីក្រៅប្រទេសផងដែរ»។

«កំណើនសេដ្ឋកិច្ចរបស់ កម្ពុជា នឹងកើន 5.2% នៅឆ្នាំ 2023 ព្រោះថាកំណើននៃការជួលមនុស្សធ្វើការនឹងកាន់តែជួយដល់ការកើនឡើងនៃការទទួលទាន ការប្រើប្រាស់ក្នុងស្រុក អមដោយការធ្លាក់ចុះនៃអតិផរណា» ធនាគារពិភពលោក បានព្យាករដូច្នេះ។

ក៏ប៉ុន្តែ WB អះអាងថា កម្ពុជា នៅប្រឈមមុខនឹងហានិភ័យធ្ងន់ធ្ងរនៅឡើយ ដោយសារតែការវិវត្តសភាពការណ៍នៅក្រៅប្រទេស ក្នុងនោះ ទស្សនវិស័យកំណើនសេដ្ឋកិច្ចពិភពលោកនៅមានសភាពអាប់អួរ។ កំណើនពាណិជ្ជកម្មសកលបានថយចុះនៅឆមាសទីពីរនៃឆ្នាំ 2022 ហើយត្រូវបានព្យាករថា នឹងថយចុះយ៉ាងខ្លាំងនៅឆ្នាំ 2023 ដែលនេះនឹងប៉ះពាល់ដល់បណ្ដាប្រទេសកំពុងអភិវឌ្ឍ ក្នុងនោះមាន កម្ពុជា ផងដែរ។

យោងតាម WB វិស័យផលិតកម្មរបស់ កម្ពុជា ពឹងផ្អែកលើទីផ្សារនាំចេញដើម្បីរីកចម្រើន ហើយវានឹងរងផលប៉ះពាល់ជាអវិជ្ជមានខ្លាំង នៅពេលកំណើនយឺតៗកាន់តែអូសបន្លាយពេលនៅ សហរដ្ឋអាមេរិក និងសហភាពអឺរ៉ុប ដែលជាទីផ្សារនាំចេញដ៏ធំបំផុតរបស់ កម្ពុជា។ ដូចគ្នានេះដែរ ការវិនិយោគ និងលំហូរមូលធនទំនងជានឹងថយចុះ ដោយសារការធ្លាក់ចុះបន្តិចម្តងៗនូវទុនពី ប្រទេសចិន ដែលជាប្រភពនៃការវិនិយោគផ្ទាល់ពីបរទេសធំបំផុតរបស់ កម្ពុជា គិតមកទល់ពេលនេះ។

នាយិកាធនាគារពិភពលោកប្រចាំប្រទេសមីយ៉ាន់ម៉ា កម្ពុជា និងឡាវ លោកស្រី ម៉ារៀម ស័រមែន បានមានប្រសាសន៍ថា ដើម្បីការពារសេដ្ឋកិច្ចពីផលប៉ះទង្គិចដោយសារការធ្លាក់ចុះនៃតម្រូវការនៅក្រៅប្រទេស កម្ពុជាគួរចាត់វិធានការដើម្បីពង្រឹងជំហរសារពើពន្ធរបស់ខ្លួន និងលើកកម្ពស់សេដ្ឋកិច្ចក្នុងស្រុក ជាពិសេសវិស័យឧស្សាហកម្មទេសចរណ៍ដ៏ទាក់ទាញ៕

December 7, 2022

ក្រសួងទេសចរណ៍ កំពុងត្រៀមរៀបចំពិធីបុណ្យសមុទ្រចាប់ពីថ្ងៃទី 09 ធ្នូខាងមុខ

ពិធីបុណ្យសមុទ្រដែលនឹងត្រូវបានធ្វើឡើងចាប់ពីថ្ងៃទី 09 ដល់ 11 ធ្នូខាងមុខ កំពុងត្រូវបាន ក្រសួងទេសចរណ៍ត្រៀមរៀបចំ ដើម្បីអមនឹង មហាសន្និបាតក្លឹបឆ្នេរសមុទ្រដែលស្អាតបំផុតលើពិភពលោក។

ក្រសួងទេសចរណ៍ សហការជាមួយរដ្ឋបាលខេត្តព្រះសីហនុ និងក្រសួងស្ថាប័នពាក់ព័ន្ធ កំពុងត្រៀមរៀបចំពិធីបុណ្យសមុទ្រចាប់ពីថ្ងៃទី 09 ដល់ 11 ធ្នូខាងមុខ ដើម្បីអមជាមួយមហាសន្និបាតក្លឹបឆ្នេរសមុទ្រដែលស្អាតបំផុតលើពិភពលោក ដែលនឹងចាប់ផ្ដើមធ្វើឡើងពីថ្ងៃទី 09 ដល់ 14 ធ្នូ 2022 នេះបើតាម ក្រសួងទេសចរណ៍កម្ពុជា ឱ្យដឹងនៅថ្ងៃនេះ។

ដោយឡែក និយាយអំពីចំនួនទេសចរនៅ កម្ពុជា ក្នុងឆ្នាំ 2022 ក្រសួងទេសចរណ៍ បានបញ្ជាក់ថា ក្នុងរយៈពេល 11 ខែកន្លងទៅនៃឆ្នាំ 2022 នេះ កម្ពុជា ទទួលបានទេសចរផ្ទៃក្នុងជាង 10 លាននាក់ ហើយបើតាមការប៉ាន់ស្មាន តួលេខនេះអាចឡើងដល់ជិត 11 លាននាក់ នៅពេញមួយឆ្នាំ 2022៕

December 7, 2022

ចំនួនករណីឆ្លងថ្មីនូវជំងឺកូវីដ-19 នៅ កម្ពុជា មានជាង 10 នាក់ក្នុង 24 ម៉ោងកន្លង

កម្ពុជា រកឃើញអ្នកឆ្លងថ្មីនូវជំងឺកូវីដ-19 ចំនួន 12 នាក់ និងជាសះស្បើយ 09 នាក់ ខណៈមិនមានអ្នកស្លាប់ នៅក្នុងអំឡុង 24 ម៉ោងនៃថ្ងៃទី 06 ធ្នូ 2022។

គិតត្រឹមព្រឹក ថ្ងៃទី 07 ខែធ្នូ 2022 កម្ពុជា មានអ្នកឆ្លងកូវីដ-19 សរុប 138,188 នាក់, អ្នកជាសះស្បើយ 135,044 នាក់ និងអ្នកស្លាប់សរុប 3,056 នាក់។

December 7, 2022

Author: សឿន សំណាង