សឿន សំណាង - La Reine Media

(World Cup 2022)- បេក្ខភាពជើងឯកលំដាប់ទីមួយត្រូវបានជម្រុះ ខណៈ អាហ្សង់ទីន ឆ្ពោះទៅកាន់វគ្គពាក់កណ្ដាលផ្ដាច់ព្រ័ត្រ

កាលពីយប់ថ្ងៃទី 09 ធ្នូ Lionel Messi រកបានគ្រាប់បាល់ និងបង្កបានឱកាស ប៉ុន្តែ ការស៊ុតបញ្ចូលទី 2 គ្រាប់របស់ Wout Weghorst ធ្វើឱ្យ អាហ្សង់ទីន និង ហូឡង់ ត្រូវទាត់បាល់ប៉េណាំងទី ហើយ អាហ្សង់ទីនក៏ឈ្នះ 4-3 និងបានបន្តដំណើរទៅវគ្គពាក់កណ្ដាលផ្ដាច់ព្រ័ត្រ។

ចំណែក ប្រេស៊ីល វិញ កាលពីយប់ថ្ងៃទី 09 ធ្នូ ក៏ត្រូវបាន ក្រូអាត ទម្លាក់ចេញពី World Cup 2022 ដោយចាញ់ 2-4 នៅក្នុងការទាត់បាល់ប៉េណាំងទី ក្រោយពីពួកគេរកបាន 1 គ្រាប់ដូចគ្នាក្នុងរយៈពេល 120 នាទី ក្នុងការប្រកួតនៅវគ្គ 1/8។

ការធ្វើដំណើរនៅ World Cup 2022 របស់ ប្រេស៊ីល បានបញ្ចប់ដោយការឈឺចាប់នៅចំពោះមុខគូប្រកួតដែលស័ក្ដិសមជា «ស្ដេចប៉េណាំងទី»។ ក្រូអាត បានឈ្នះបន្តបន្ទាប់ 4 លើកនៅក្នុងការទាត់ប៉េណាំងទីនៅ World Cup។

ការចាញ់របស់ ប្រេស៊ីល នៅ World Cup លើកនេះ គឺជារឿងដ៏គួរឱ្យភ្ញាក់ផ្អើលបំផុត ដោយសារ ប្រេស៊ីល ថ្មីៗនេះត្រូវបានគេចាត់ទុកថាជាបេក្ខភាពទីមួយសម្រាប់តំណែងជើងឯក World Cup 2022 ប៉ុន្តែបែរជាចាញ់គូប្រកួតដែលត្រូវបានវាយតម្លៃទាបទៅវិញ។

ក្រោយការប្រកួតចាញ់ ក្រូអាត គ្រូបង្វឹករបស់ ប្រេស៊ីល សុំលាឈប់ពីតំណែង។ ចំណែក Messi វិញក៏បានបំបែកកំណត់ត្រារបស់ Pele នៅ World Cup បន្ទាប់ពី អាហ្សង់ទីន ឈ្នះ ហូឡង់ កាលពីយប់មិញ៕

December 10, 2022

មហាសេដ្ឋីបារាំង បន្តដណ្ដើមបានតំណែងអ្នកមានជាងគេលើលោកពីម្ចាស់ Tesla

ដោយមានសមត្ថភាពផ្នែកជំនួញដ៏អស្ចារ្យតែពីនៅក្មេង បច្ចុប្បន្នមហាសេដ្ឋីបារាំង Bernard Arnault គឺជាអ្នកមានទ្រព្យច្រើនជាងគេលើពិភពលោក ដោយទើបតែដណ្ដើមបានតំណែងនេះកាលពីព្រឹកមិញ។

បង្កើតបានក្រុមហ៊ុន LVMH ដ៏ធំដែលជាអ្នកគ្រប់គ្រងយីហោប្រណិត Louis Vuitton, Tag Heuer, Christian Dior និង Celine។

គិតត្រឹមព្រឹកថ្ងៃទី 09 ធ្នូ 2022 មហាសេដ្ឋី Bernard Arnault និងគ្រួសារ នាំមុខគេក្នុងបញ្ជីចំណាត់ថ្នាក់មហាសេដ្ឋីទៅតាមពេលវេលាជាក់ស្ដែងភ្លាមៗរបស់ Forbes ដោយមានទ្រព្យតម្លៃ 186.6 ពាន់លានដុល្លារអាម៉េរិក។ ចំណែកមហាសេដ្ឋី Elon Musk ដែលជាស្ថាបនិករបស់ Tesla វិញ ឈរលំដាប់ទីពីរ ដោយមានទ្រព្យតម្លៃ 185 ពាន់លានដុល្លារ។

ដោយមានសមត្ថភាពផ្នែកជំនួញដ៏អស្ចារ្យតែពីនៅក្មេង មហាសេដ្ឋីបារាំង Bernard Arnault បង្កើតបានក្រុមហ៊ុនដ៏ធំ LVMH ដែលគ្រប់គ្រងយីហោផលិតផលប្រណិត Louis Vuitton, Tag Heuer, Christian Dior និង Celine។ លោក Bernard Arnault គឺជាប្រធាន និងនាយកប្រតិបត្តិរបស់ LVMH។

លោក Bernard Arnault កើតឆ្នាំ 1949 នៅក្នុងគ្រសារធូរធារមួយដែលប្រកបមុខជំនួញនៅ Roubaix ប្រទេសបារាំង។ ឪពុករបស់គាត់មានក្រុមហ៊ុនសំណង់ Ferret-Savinel ចំណែកម្ដាយគឺជាអ្នកចូលចិត្តសម្លៀកបំពាក់ប្រណិតរបស់ Dior។

តាំងពីនៅក្មេង Bernard Arnault បានបង្ហាញនូវសមត្ថភាពរកស៊ីដែលគួរឱ្យកោតសរសើរ។ សមត្ថភាពផ្ទាល់ខ្លួន បូកនឹងការសិក្សា រួមនឹងការទទួលបានបទពិសោធន៍ពីឪពុកទៀតនោះ លោក Bernard Arnault ក៏ចេះតែទទួលបានជោគជ័យនៅក្នុងមុខជំនួញ៕

December 9, 2022

តារាចម្រៀងកូរ៉េខាងត្បូង នឹងហោះទៅកាន់អវកាសជាមួយមហាសេដ្ឋីជប៉ុន

មហាសេដ្ឋី Yusaku Maezawa កាលពីថ្ងៃទី 08 ធ្នូ បានប្រកាសឈ្មោះសមាជិកក្រុមហោះហើរ 8 នាក់ ក្នុងនោះមានទាំងតារាចម្រៀងរ៉ែប T.O.P របស់ក្រុម Big Bang ផងដែរ ដែលនឹងរួមដំណើរជាមួយគាត់ ហោះទៅគោចរជុំវិញឋានព្រះចន្ទនៅឆ្នាំ 2023។

គម្រោងដំណើរទេសចរណ៍ជុំវិញឋានព្រះចន្ទរបស់ Maezawa ដែលមានឈ្មោះថា DearMoon ត្រូវបានប្រកាសជាលើកដំបូងកាលពីឆ្នាំ 2018 និងយកសិល្បករជាចំណុចកណ្ដាល។ ដំបូង មហាសេដ្ឋីជប៉ុន គ្រោងអញ្ជើញមនុស្សដែលគាត់ចង់ធ្វើដំណើរជាមួយ ប៉ុន្តែក្រោយមកក៏បានប្ដូរផ្លាស់ទៅជាការប្រកួតប្រជែងមួយដែលបេក្ខជនអាចចុះឈ្មោះតាមអនឡាញ។ Maezawa នឹងចេញថ្លៃទាំងស្រុងសម្រាប់ក្រុមហោះហើរនេះ។

បេក្ខជនទាំង 8 នាក់ដែលត្រូវបានជ្រើសរើសរួមមាន DJ និងជាអ្នកផលិតចម្រៀងរាំអេឡិចត្រូនិច Steve Aoki របស់ សហរដ្ឋអាម៉េរិក, Youtuber ជនជាតិអាម៉េរិក Tim Dodd, សិល្បករ និងអ្នកបង្កើតក្បាច់រាំជនជាតិឆែក Yemi AD, ជាងថតរូបជនជាតិអអៀរឡង់ Rhiannon Adam, ជាងថតរូបជនជាតិអង់គ្លេស Karim Iliya, ផលិតករភាពយន្តជនជាតិអាម៉េរិក Brendan Hall, តារាសម្ដែងជនជាតិឥណ្ឌា Dev Joshi និងតារាចម្រៀងរ៉ែប T.O.P របស់ក្រុមចម្រៀងកូរ៉េខាងត្បូង Big Bang។

យោងតាមទិន្នន័យលើទំព័រ DearMoon ដំណើរហោះហើរតាមយានអវកាស Starship ដែលកំពុងត្រូវបានអភិវឌ្ឍរបស់ SpaceX នេះ នឹងអូសបន្លាយពេលជិត 6 ថ្ងៃ និងគោចរជុំវិញព្រះចន្ទ ដោយមិនមានការចុះចត។ នៅពេលផលិតរួចរាល់ Starship នឹងក្លាយជារ៉ុក្កែតដែលមានកម្លាំងខ្លាំងបំផុតនៅលើពិភពលោក។

កាលពីខែធ្នូឆ្នាំកន្លង មហាសេដ្ឋីជប៉ុន Maezawa ស្ថាបនិករបស់មជ្ឈមណ្ឌលទិញដូរសម្លៀកបំពាក់អនឡាញធំបំផុតនៅ ជប៉ុន បានហោះទៅកាន់ស្ថានីយអវកាសអន្តរជាតិ ក្នុងរយៈពេលខ្លី ជាមួយនឹងអ្នកផលិតវីដេអូរបស់គាត់គឺ Yozo Hirano រួមនឹងក្រុមអវកាសចរជនជាតិរុស្ស៊ី តាមរយៈយានអវកាស Soyuz។ ថ្លៃសម្រាប់ដំណើរហោះហើរនេះគឺប្រហែល 73 លានដុល្លារអាម៉េរិក៕

December 9, 2022

យន្តហោះអគ្គិសនីផ្ទាល់ខ្លួនប្រភេទហោះឡើង-ចុះចតដោយត្រង់ តម្លៃ 99 ពាន់ដុល្លារអាម៉េរិក

(សហរដ្ឋអាម៉េរិក)- យន្តហោះអគ្គិសនី Dragon ដែលមានស្លាបកង្ហារចំនួន 8 និងល្បឿន 101 គីឡូម៉ែត្រ/ម៉ោង ត្រូវបានលក់ក្នុងតម្លៃ 99 ពាន់ដុល្លារអាម៉េរិក។

ក្រុមហ៊ុនផលិតឧទ្ធម្ភាគចក្រអាម៉េរិក RotorX បានចូលប្រលូកក្នុងការប្រកួតលើវិស័យយន្តហោះអគ្គិសនី (eVTOL) ផ្ទាល់ខ្លួន ដែលអាចហោះឡើង និងចុះចតដោយត្រង់ ជាមួយនឹងម៉ូដែលយន្តហោះដែលមានស្លាប់កង្ហារច្រើន ឈ្មោះ Dragon នេះបើតាម New Atlas ចុះផ្សាយកាលពីថ្ងៃទី 08 ធ្នូ។

យន្តហោះ Dragon អាចដឹកទម្ងន់បាន 113 គីឡូក្រាម អាចត្រូវបានបញ្ជាដោយចង្កូត អាចហោះបណ្ដែតខ្លួនដោយស្វ័យប្រវត្ត និងចុះចតដោយស្វ័យប្រវត្ត។ យន្តហោះនេះបំពាក់ម៉ូទ័រអគ្គិសនី 16 kW សម្រាប់កង្ហារនីមួយ។ ដើម្បីធានាសុវត្ថិភាព ក្រុមហ៊ុន RotorX ក៏បានបំពាក់ឆត្រយោងមួយផងដែរ។ អ្នកបើកបរមិនបាច់មានបណ្ណបើកបរឡើយ។

ដូចទៅនឹង Jetson One របស់ ក្រុមហ៊ុនស៊ុយអែត យន្តហោះ Dragon អាចហោះក្នុងមួយជើងបានរយៈពេលប្រហែល 20 នាទី និងមានល្បឿន 101 គីឡូម៉ែត្រ/ម៉ោង។ អ្នកទិញយន្តហោះ Dragon នឹងទទួលបានឧបករណ៍សម្រាប់ដំឡើង ឬរុះរើដោយខ្លួនឯង។ ប៉ុន្តែ ក៏អាចទៅកាន់ទីស្នាក់ការ Advanced Tactics នៅ California ដើម្បីដំឡើងយន្តហោះ និងទទួលការបណ្ដុះបណ្ដាលផងដែរ។

RotorX នឹងចាប់ផ្ដើមប្រគល់ទំនិញដល់អតិថិជននៅខែសីហា 2023។ ខណៈដែលតម្លៃរបស់ Jetson One គឺ 92,000 ដុល្លារអាម៉េរិក តម្លៃលក់តាមការគ្រោងទុនរបស់ Dragon គឺ 99,000 ដុល្លារ។ ប៉ុន្តែ RotorX កំពុងទទួលការបញ្ជាទិញជាមុនដោយតម្លៃកក់ 19,500 ដុល្លារ និងតម្លៃលក់ដំបូងត្រឹមតែ 85,000 ដុល្លារប៉ុណ្ណោះ៕

December 9, 2022

(World Cup 2022) – អតីតខ្សែប្រយុទ្ធប្រេស៊ីល ចង់ឃើញ Messi យំ ខណៈឱកាសប៉ះគ្នានៅវគ្គពាក់កណ្ដាលផ្ដាច់ព្រ័ត្រគឺ 43%

អតីតខ្សែប្រយុទ្ធ Fred និយាយថា គាត់ចង់ឃើញ ប្រេស៊ីល ប៉ះ អាហ្សង់ទីន នៅវគ្គពាក់កណ្ដាលផ្ដាច់ព្រ័ត្រនៅ World Cup 2022។

«ខ្ញុំសង្ឃឹមថា ប្រេស៊ីល និង អាហ្សង់ទីន នឹងប្រយុទ្ធគ្នានៅវគ្គពាក់កណ្ដាលផ្ដាច់ព្រ័ត្រ» Fred និយាយនៅលើទូរទស្សន៍ TV Globo ដូច្នេះ។ «ខ្ញុំចង់ឃើញការប្រកួតនោះច្របូកច្របល់ ប្រវាយប្រតប់។ Neymar នឹងស៊ុតបញ្ចូលទីពីការពិន័យ ហើយ Messi ត្រូវយំ»។

Fred លេងឱ្យ ប្រេស៊ីល ក្នុងអំឡុងពីឆ្នាំ 2005 ដល់ 2014 ក្នុងនោះគាត់បានចូលរួម និងរកបានគ្រាប់បាល់នៅ World Cup 2006 និង 2014។ កីឡាកររូបនេះចំណាយពេលច្រើនក្នុងអាជីពសម្រាប់ការលេងឱ្យក្លឹបប្រេស៊ីល លើកលែងតែដំណាក់កាលពីឆ្នាំ 2005-2009 ដែលលេងឱ្យ Lyon។ កីឡាករខ្សែប្រយុទ្ធវ័យ 39 ឆ្នាំនេះ បានចូលនិវត្តន៍កាលពីខែមេសា 2022 ព្រោះតែរងរបួសច្រើន។

ប្រេស៊ីល និង អាហ្សង់ទីន បានប៉ះគ្នា 4 ប្រកួតនៅ World Cup ហើយសុទ្ធតែមានការប្រកួតយ៉ាងស្វិតស្វាញ និងហិង្សា។ លើកដំបូងគឺនៅ World Cup 1974 នៅ អាល្លឺម៉ង់ខាងលិច ដែលកាលណោះ អាហ្សង់ទីន ចាញ់ ប្រេស៊ីល 1-2 និងត្រូវជម្រុះត្រឹមជុំទីពីរនៃវគ្គចែកពូល ដែលប្រហាក់ប្រហែលនឹងវគ្គ 1/8 បច្ចុប្បន្ន។

4 ឆ្នាំក្រោយមក (1978) ប្រេស៊ីល និង អាហ្សង់ទីន ស្មើគ្នា 0-0 នៅជុំទីពីរនៃវគ្គចែកពូល ប៉ុន្តែចុងក្រោយ Mario Kempes និងមិត្តរួមក្រុមអាហ្សង់ទីន ដណ្ដើមបានសិទ្ធិធ្វើដំណើរទៅមុខ និងយកបានពានរង្វាន់ជើងឯក។

World Cup 1982 នៅ អេស្ប៉ាញ ក្រុមប្រេស៊ីល និង អាហ្សង់ទីន បានជួបគ្នាម្ដងទៀត។ លើកនេះ ប្រេស៊ីល ឈ្នះ 3-1 ចំណែក Diego Maradona ត្រូវទទួលកាតក្រហម ដោយសារតែទាត់ខ្សែបម្រើ Batista។ World Cup 1990 នៅ អ៊ីតាលី ប្រេស៊ីល ចាញ់ អាហ្សង់ទីន 0-1 ហើយនៅក្រោយការប្រកួត កីឡាករប្រេស៊ីល ចោទថា ក្រុមគ្រូបង្វឹករបស់ អាហ្សង់ទីន បានឱ្យដបទឹកមានថ្នាំងងុយដេកមកឱ្យខ្លួនផឹក តែក្រោយមកទៀត Maradona ឱ្យដឹងថា នោះគឺជាទឹកទេព។

ដើម្បីប៉ះគ្នាលើកទី 5 នៅ World Cup ប្រេស៊ីល និង អាហ្សង់ទីន សុទ្ធតែត្រូវឈ្នះ ក្រូអាត និង ហូឡង់ នៅវគ្គ 1/8។ FiveThityEight យល់ថា ឱកាសដើរបន្តរបស់ ប្រេស៊ីល គឺ 77% ចំណែក អាហ្សង់ទីន គឺ 56%។ ប្រការនេះបង្ហាញថា ភាគរយនៃការប៉ះគ្នារបស់ ប្រេស៊ីល និង អាហ្សង់ទីន នៅវគ្គពាក់កណ្ដាលផ្ដាច់ព្រ័ត្រគឺ 43%៕

December 9, 2022

កម្ពុជា រកឃើញអ្នកឆ្លងថ្មីនូវជំងឺកូវីដ-19 ច្រើនជាងម្សិលមិញ 6 នាក់

កម្ពុជា រកឃើញអ្នកឆ្លងថ្មីនូវជំងឺកូវីដ-19 ចំនួន 20 នាក់ និងជាសះស្បើយ 15 នាក់ ខណៈមិនមានអ្នកស្លាប់ នៅក្នុងអំឡុង 24 ម៉ោងនៃថ្ងៃទី 08 ធ្នូ 2022។

គិតត្រឹមព្រឹក ថ្ងៃទី 09 ខែធ្នូ 2022 កម្ពុជា មានអ្នកឆ្លងកូវីដ-19 សរុប 138,222 នាក់, អ្នកជាសះស្បើយ 135,065 នាក់ និងអ្នកស្លាប់សរុប 3,056 នាក់។

December 9, 2022

ស្ពានមិត្តភាពកម្ពុជា-កូរ៉េខាងត្បូងតម្លៃជាង 245 លានដុល្លារ នឹងចាប់ផ្ដើមស្ថាបនានៅឆ្នាំក្រោយ

គម្រោងសាងសង់ស្ពានមិត្តភាពកម្ពុជា-សាធារណរដ្ឋកូរ៉េ នឹងត្រូវចុះហត្ថលេខារវាងរាជរដ្ឋាភិបាល នៃព្រះរាជាណាចក្រកម្ពុជា និង រដ្ឋាភិបាលនៃសាធារណរដ្ឋកូរ៉េថ្ងៃទី 09 ធ្នូ នៅវិមានសន្តិភាព ហើយចាប់ផ្ដើមសាងសង់នៅឆ្នាំក្រោយ នេះបើតាម អ្នកនាំពាក្យក្រសួងសាធារណការ និងដឹកជញ្ជូន និងក្រសួងការបរទេសកម្ពុជា។

គម្រោងសាងសង់ស្ពានមិត្តភាពកម្ពុជា-កូរ៉េខាងត្បូង ឆ្លងទន្លេសាប និងទន្លេមេគង្គ ពីផ្សារចាស់ រាជធានីភ្នំពេញ ទៅជ្រោយចង្វារ និង អរិយ្សត្រ ខេត្តកណ្ដាល ដែលនឹងចំណាយថវិកា 245,909,000 ដុល្លារអាមេរិកនេះ គឺជាស្ពានខ្សែកាបដែលមានជើងសសរទម្រខ្ពស់សំខាន់ចំនួនពីរ ហើយជើងសសររង្វើល ងាយស្រួលកប៉ាល់ឆ្លងកាត់ពីខាងក្រោម។

យោងតាមលោក ហ៊ាង សុទ្ធាយុត្តិ អ្នកនាំពាក្យក្រសួងសាធារណការ និងដឹកជញ្ជូន ស្ពានដែលមានប្រវែងសរុបជាង 2 គីឡូម៉ែត្រនេះ នឹងជួយសម្រួលឱ្យការធ្វើចរាចរណ៍ កាត់បន្ថយការកកស្ទះចេញចូលរាជធានីភ្នំពេញ និងតភ្ជាប់ទៅតំបន់អភិវឌ្ឍន៍អរិយក្សត្រ ស្វាយជ្រុំ។

គម្រោងស្ថាបនាស្ពានខាងលើនេះស្ថិតក្នុងចំណោមគម្រោងហេដ្ឋារចនាសម្ព័ន្ធចំនួនពីរនៅ កម្ពុជា ដែលផ្ដល់ឥណទានសម្បទានដោយ កូរ៉េខាងត្បូង។ ឥណទានសម្បទានតម្លៃ 1,500 លានដុល្លារអាម៉េរិក សម្រាប់ កម្ពុជា ពីឆ្នាំ 2022-2026 របស់ កូរ៉េខាងត្បូង គ្រោងនឹងចុះហត្ថលេខានៅថ្ងៃនេះ។

ឥណទានសម្បទានដែលផ្ដល់ដោយ កូរ៉េខាងត្បូង នេះ នឹងចូលរួមចំណែកដ៏សំខាន់ក្នុងការខិតខំរបស់ កម្ពុជា ដើម្បីពន្លឿនការអភិវឌ្ឍសេដ្ឋកិច្ច ក៏ដូចជាការពង្រឹងបន្ធែមនូវទំនាក់ទំនងល្អទ្វេភាគីដែលមានស្រាប់រវាង កម្ពុជា និង កូរ៉េខាងត្បូង នេះបើតាម ក្រសួងការបរទេសកម្ពុជា៕

December 9, 2022

សម្ដេចតេជោអញ្ជើញប្រជាពលរដ្ឋទៅលេងបុណ្យសមុទ្រនៅក្រុងព្រះសីហនុ

នៅលើទំព័របណ្ដាញសង្គម នាព្រឹកមិញ ប្រមុខរាជរដ្ឋាភិបាលកម្ពុជា បង្ហោះសារអញ្ជើញប្រជាពលរដ្ឋទៅលេងបុណ្យសមុទ្រនៅ ខេត្តព្រះសីហនុ ដែលធ្វើឡើងចាប់ពីថ្ងៃទី 09 ដល់ 11 ធ្នូ 2022។

សម្ដេចតេជោ បានសរសេរថា «កំពុងធ្វើដំណើរលើផ្លូវល្បឿនលឿនពី ភ្នំពេញ ខេត្តព្រះសីហនុ។ យើងនឹងខិតខំកសាងផ្លូវល្បឿនលឿនមួយខ្សែទៀតតភ្ជាប់ពីភ្នំពេញទៅបាវិត ព្រំដែនវៀតណាម។ សូមអញ្ជើញទៅលេងបុណ្យសមុទ្រនៅ ក្រុងព្រះសីហនុ ថ្ងៃស្អែក 10 ធ្នូ 2022»។

យោងតាម ក្រសួងទេសចរណ៍ ពិធីបុណ្យសមុទ្រលើកទី 9 ដែលចាប់ផ្ដើមពីថ្ងៃទី 09 ដល់ 11 ធ្នូ 2022 នេះនឹងធ្វើឡើងអមជាមួយនឹងការធ្វើជាម្ចាស់ផ្ទះរៀបចំមហាសន្និបាត ក្លិបឆ្នេរសមុទ្រដែលស្អាតបំផុតលើសកលលោក ចាប់ពីថ្ងៃទី 09 ដល់ 14 ខែធ្នូ ក្រោមប្រធានបទ «ឆ្នេរនៃសន្តិភាព ឆ្នេរនៃក្ដីសង្ឃឹម»។

គិតមកដល់ពេលនេះ សេវាកម្មស្នាក់នៅក្នុង ក្រុងព្រះសីហនុ មានការកក់យ៉ាងច្រើនដើម្បីត្រៀមមកកម្សាន្ត នាឱកាសបុណ្យសមុទ្រ ប៉ុន្តែមិនទាន់ខ្វះកន្លែងស្នាក់នៅសម្រាប់ទេសចរនៅឡើយ ដោយសារថា ក្រុងព្រះសីហនុ មានបន្ទប់ស្នាក់នៅសរុបជាង 9,000 បន្ទប់ឯណោះ នេះបើតាម លោក តាំង សុចិត្រគ្រឹស្នា ប្រធានមន្ទីរទេសចរណ៍ខេត្តព្រះសីហនុ៕

December 9, 2022

សភាជាន់ទាបអាម៉េរិក អនុម័តសេចក្ដីព្រាងច្បាប់ផ្ដល់ជំនួយរាប់ពាន់លានដុល្លារដល់តៃវ៉ាន់

សភាជាន់ទាបអាម៉េរិក អនុម័តសេចក្ដីព្រាងច្បាប់ស្ដីពីថវិកាសម្រាប់ការពារជាតិឆ្នាំ 2023 ក្នុងនោះមានទាំងកញ្ចប់ជំនួយយោធាឡើងដល់ 10 ពាន់លានដុល្លារសម្រាប់ កោះតៃវ៉ាន់ ផងដែរ។

សេចក្ដីព្រាងច្រាប់ការពារជាតិ (NDAA) សម្រាប់ឆ្នាំ 2023 ដែលត្រូវបានសភាជាន់ទាបរបស់ សហរដ្ឋអាម៉េរិក អនុម័តកាលពីថ្ងៃទី 08 ធ្នូ នឹងអនុញ្ញាតឱ្យប្រទេសនេះផ្ដល់ជំនួយដល់ កោះតៃវ៉ាន់ ចំនួន 2 ពាន់លានដុល្លារជារៀងរាល់ឆ្នាំ ចាប់ពីឆ្នាំ 2023 ដល់ 2027។ ច្បាប់នេះក៏អនុញ្ញាតឱ្យ ប្រធានាធិបតី ចូ បៃដិន ផ្ដល់ឱ្យ តៃវ៉ាន់ នូវឧបករណ៍ការពារជាតិដែលយកពីឃ្លាំងរបស់ អាម៉េរិក ឬសេវាកម្មដទៃ ដែលមានទំហំទឹកប្រាក់ឡើងដល់ 1 ពាន់លានដុល្លារ/ឆ្នាំ។

យោងតាមសេចក្ដីព្រាងច្បាប់ថ្មីខាងលើ រដ្ឋមន្ត្រីការបរទេស រដ្ឋមន្ត្រីការពារជាតិ ត្រូវ «ផ្ដល់អាទិភាព និងពន្លឿនការឆ្លើយតបនឹងសំណើពី តៃវ៉ាន់ ទៅតាមកម្មវិធីលក់ទំនិញយោធាឱ្យភាគីខាងក្រៅ»។

«NDAA នឹងបង្កើនទំនាក់ទំនងផ្នែកការពារជាតិរបស់ សហរដ្ឋអាម៉េរិក ជាមួយនឹង តៃវ៉ាន់» តំណាងរាស្ត្រ Bob Menendez ប្រធានគណៈកម្មការកិច្ចការបរទេសនៅសភាជាន់ទាប បានឱ្យដឹងដូច្នេះនៅក្នុងប្រកាសមួយ មុនពេលសេចក្ដីព្រាងច្បាប់ត្រូវបានអនុម័ត។

សេចក្ដីព្រាងច្បាប់នេះត្រូវការសភាជាន់ខ្ពស់អនុម័តបន្តទៀត មុនពេលត្រូវបានបញ្ជូនទៅកាន់ សេតវិមាន ដើម្បីប្រធានាធិបតី ចូ បៃដិន ចុះហត្ថលេខាជាច្បាប់។

ទីក្រុងប៉េកាំង និង ទីក្រុងតៃប៉ិ មិនទាន់បញ្ចេញប្រតិកម្មអ្វីនៅឡើយ ទាក់ទិននឹងសេចក្ដីព្រាងច្បាប់ថ្មីរបស់ សហរដ្ឋអាម៉េរិក៕

December 9, 2022

(World Cup 2022)- អាល្លឺម៉ង់ ៖ ក្រុម WAGs (គូស្នេហ៍របស់កីឡាករ) គឺជាមូលហេតុមួយនាំឱ្យពួកគេបរាជ័យ

ទំព័រ Bild របស់ អាល្លឺម៉ង់ ចុះផ្សាយថា នៅក្នុងសន្និសីទសារព័ត៌មានដើម្បីស្វែងរកមូលហេតុនៃការបរាជ័យរបស់ ក្រុមជម្រើសជាតិអាល្លឺម៉ង់ នៅ World Cup 2022 ក្រុម WAGs (គូស្នេហ៍របស់កីឡាករ) របស់ ក្រុមជម្រើសជាតិ ត្រូវបានមេដឹកនាំមួយចំនួននៅ សហព័ន្ធបាល់ទាត់អាល្លឺម៉ង់ «ហៅឈ្មោះ»។

ក្រោយរដូវកាល World Cup 2018 ដែលមិនបានឆ្លងផុតវគ្គចែកពូល ក្រុមជម្រើសជាតិអាល្លឺម៉ង់ ក៏បានប្ដេជ្ញាចិត្តខ្ពស់សម្រាប់រដូវកាលនៅ កាតា។ ប៉ុន្តែ ពួកគេនៅតែលេងមិនបានល្អដដែល ហើយក៏មិនអាចឡើងដល់វគ្គ 1/8 ជាលើកទីពីរនៅ World Cup ពីររដូវកាលចុងក្រោយនេះ។

ក្រោយបរាជ័យនៅ កាតា ក្រុមអាល្លឺម៉ង់ ក៏ត្រលប់ទៅស្រុកវិញ។ ថ្មីៗនេះ សហព័ន្ធបាល់ទាត់អាល្លឺម៉ង់ (DFB) បានធ្វើសន្និសីទ 2 ម៉ោងដើម្បីវិភាគ រកមូលហេតុនៃការបរាជ័យរបស់ ក្រុមជម្រើសជាតិ នៅ World Cup 2022។

មានមូលហេតុជាច្រើនត្រូវបានលើកឡើង ក្នុងនោះក៏មានការពិតដែលថា គ្រូបង្វឹក Hansi Flick បានអនុញ្ញាតឱ្យប្រពន្ធ និងមិត្តស្រីរបស់កីឡាករ ស្នាក់នៅក្នុងសណ្ឋាគាររបស់ក្រុម។ ប្រធានសហព័ន្ធបាល់ទាត់អាល្លឺម៉ង់ Bernd Neuendorf និងអនុប្រធាន Joachim Watzke យល់ថា វត្តមានរបស់ Wags បានធ្វើឱ្យកីឡាករអាល្លឺម៉ង់ ត្រូវបែកអារម្មណ៍។ ក្រុមមេដឹកនាំរបស់ DFB មិនពេញចិត្តនៅពេលឃើញកីឡាករត្រូវថែទាំកូន។

យោងតាម Bild គ្រូបង្វឹក Flick នឹងនៅតែបន្តការងារជាធម្មតា។ លោក Flick នឹងដឹកនាំក្រុមជម្រើសជាតិរបស់ អាល្លឺម៉ង់ ទៅប្រកួតនៅ Euro 2024៕

December 9, 2022

Author: សឿន សំណាង