សឿន សំណាង - La Reine Media

អ្នកគាំទ្រក្រុមជម្រើសជាតិម៉ាឡេស៊ី ជូនពរថៃ ឱ្យឈ្នះវៀតណាម ក្នុងវគ្គផ្ដាច់ព្រ័ត្រនៅ AFF Cup 2022!

(ម៉ាឡេស៊ី) – ក្រោយការប្រកួតជើងទីពីរនៃវគ្គពាក់កណ្ដាលផ្ដាច់ព្រ័ត្រដែលបានចាញ់ថៃកាលពីព្រលប់ថ្ងៃទី 10 មករា ក្រុមអ្នកគាំទ្ររបស់ម៉ាឡេស៊ី នាំគ្នាច្រៀង និងជូនពរដល់ក្រុមរបស់ថៃ ឱ្យដណ្ដើមបានពានរង្វាន់ជើងឯក AFF Cup នៅឆ្នាំនេះ។

ទស្សនិកជនប្រហែល 300 នាក់ បានទៅកាន់កីឡដ្ឋាន Thammasat នៅបាងកក ដើម្បីលើកទឹកចិត្តដល់ក្រុមជម្រើសជាតិម៉ាឡេស៊ី។ ក្នុងការប្រកួតនេះ ក្រុមដែលពួកគេគាំទ្រនឹងបានឡើងទៅវគ្គផ្ដាច់ព្រ័ត្រ ឱ្យតែមិនចាញ់ ដោយសារតែបានឈ្នះ 1-0 នៅជើងទីមួយដែលបានទាត់លើទីលាន Bukit Jalil របស់ ម៉ាឡេស៊ី។

ក៏ប៉ុន្តែ ថ្វីជើងរបស់កីឡាករ Teerasil Dangda, Bordin Phala និង Adisak Kraisorn បានជួយឱ្យក្រុមរបស់ថៃ ឈ្នះម៉ាឡេស៊ី 3-0 ហើយក៏បានឡើងទៅប៉ះវៀតណាមនៅវគ្គផ្ដាច់ព្រ័ត្រ។

បន្ទាប់ពីការប្រកួតរវាងថៃ និងម៉ាឡេស៊ីបានបញ្ចប់ ក្រុមកីឡាករថៃក៏ដើរខាងមុខតាមបណ្ដោយកន្លែងទស្សនិកជនដើម្បីអរគុណដល់អ្នកគាំទ្រ។ ពេលពួកគេឈប់ត្រង់ខាងមុខកន្លែងទស្សនិករបស់ក្រុមភ្ញៀវ ក្រុមអ្នកគាំទ្រម៉ាឡេស៊ីក៏នាំគ្នាច្រៀង «សួស្ដីក្រុមថៃ»។

បន្ទាប់មក មនុស្សមួយចំនួនក៏បានស្រែកឡើង៖ «យកឈ្នះលើវៀតណាមឱ្យបានណា៎» និង «ជូនពរសំណាងល្អនៅវគ្គផ្ដាច់ព្រ័ត្រ»។ ភ្លាមនោះ ក្រុមកីឡាករថៃក៏បានទះដៃឆ្លើយតបការជូនពរពីអ្នកគាំទ្ររបស់ម៉ាឡេស៊ី។

ថ្វីជើងរបស់កីឡាករ Teerasil Dangda, Bordin Phala និង Adisak Kraisorn បានជួយឱ្យក្រុមរបស់ថៃ ឈ្នះម៉ាឡេស៊ី 3-0 ហើយក៏បានឡើងទៅប៉ះវៀតណាមនៅវគ្គផ្ដាច់ព្រ័ត្រ

ឥរិយាបថរបស់អ្នកគាំទ្រម៉ាឡេស៊ី គឺជារឿងកម្រកើតមាននៅក្នុងតំបន់អាស៊ីអាគ្នេយ៍ ដែលមានទម្លាប់ប្រឈមមុខដាក់គ្នារវាងក្រុមបាល់ទាត់នានា។ សារព័ត៌មានថៃបានលើកសរសើរចំពោះក្រុមអ្នកគាំទ្ររបស់ម៉ាឡេស៊ី ដែលបានបង្ហាញនូវស្មារតីកីឡាដ៏ថ្លៃថ្នូរ។

ម៉ាឡេស៊ី ធ្លាប់ប៉ះវៀតណាម នៅវគ្គសន្សំពិន្ទុរបស់ AFF Cup 2022 ឆ្នាំនេះ ដែលពេលនោះម៉ាឡេស៊ីបានចាញ់ 0-3 នៅលើកីឡដ្ឋាន My Dinh ក្នុងការប្រកួតដែលមានការប្រកែកគ្នាច្រើន។

ក្រុមជម្រើសជាតិថៃ នឹងត្រូវប្រកួតជាមួយក្រុមរបស់វៀតណាមនៅវគ្គផ្ដាច់ព្រ័ត្រដែលក្នុងនោះ ការប្រកួតជើងទីមួយនឹងធ្វើឡើងក្នុងថ្ងៃទី 13 មករាលើវាលស្មៅ My Dinh របស់ រដ្ឋធានីហាណូយ ហើយ 3 ថ្ងៃក្រោយមក នឹងត្រូវប៉ះគ្នាម្ដងទៀត និងជាលើកចុងក្រោយនៅ AFF Cup 2022 លើទីលានបាល់ទាត់ Thammasat ក្នុងរាជធានីបាងកក៕

January 11, 2023

ក្រុមហ៊ុនអាម៉េរិក ប្រកាសលក់យន្តហោះអគ្គិសនីផ្ទាល់ខ្លួន ល្បឿន 101 គីឡូម៉ែត្រ/ម៉ោង

យន្តហោះហោះឡើង និងចុះចតដោយត្រង់ Recon មានតម្លៃ 150,000 ដុល្លារអាម៉េរិក អាចហោះហើរបាន 20 នាទីក្នុងកម្ពស់ 122 ម៉ែត្រ។

ក្រុមហ៊ុនអាម៉េរិក Ryse Aero Technologies ចាប់ផ្ដើមទទួលការបញ្ជាទិញជាមុនសម្រាប់ Recon ដែលជាយន្តហោះអគ្គិសនី ហោះឡើង និងចុះចតដោយត្រង់ (eVTOL) ប្រភេទស្រាល នេះបើតាម Interesting Engineering ចុះផ្សាយកាលបីថ្ងៃទី 10 មករា 2023។

តាមគម្រោង យន្តហោះនេះនឹងត្រូវបានប្រគល់ជូនអតិថិជននៅត្រីមាសទីបួន ឆ្នាំ 2023 ក្នុងតម្លៃ 150,000 ដុល្លារ/គ្រឿង។

Recon ត្រូវបានរចនាឡើងដើម្បីហោះហើរនៅតំបន់ជនបទ និងបម្រើដល់វិស័យកសិកម្ម។ យន្តហោះនេះជួយឱ្យការផ្លាស់ទីនៅតំបន់វាលធំដែលមិនមានផ្លូវកៅស៊ូ និងមានតិចតួច មានភាពងាយស្រួល។

Recon មានកៅអីតែមួយ អាចហោះបានកម្ពស់ 122 ម៉ែត្រ និងល្បឿន 101 គីឡូម៉ែត្រ/ម៉ោង។ ដោយបំពាក់ថ្មផ្ទុកអគ្គិសនីចំនួន 6 គ្រាប់ យន្តហោះនេះអាចហោះបានប្រហែល 20 នាទី បន្ទាប់ពីបញ្ចូលថាមពលមួយពេញ។

យោងតាមក្រុមហ៊ុន Ryse Aero Technologies អ្នកបើកបរយន្តហោះ Recon មិនចាំបាច់មានប័ណ្ណបើកបរយន្តហោះឡើយ៕

January 11, 2023

ណាសា (NASA) រកឃើញពិភពថ្មី ទំហំប៉ុនផែនដី អាចមានទឹករាវ និងជីវិត

ទីភ្នាក់ងារអវកាសអាម៉េរិក (NASA) ប្រកាសថា បានរកឃើញពិភពខាងក្រៅប្រព័ន្ធព្រះអាទិត្យដែលមានចម្ងាយពីផែនដីប្រហែល 100 ឆ្នាំពន្លឺ ស្ថិតក្នុងតំបន់ដែលមានអំណោយផលសម្រាប់ការកកើតជីវិត។

វត្ថុអវកាសដែលមានឈ្មោះថា TOI 700 e អាចជាពិភពថ្មមួយដែលមានទំហំស្មើនឹង 95% ធៀបនឹងផែនដី។ នេះគឺជាពិភពទីបីដែលត្រូវបានរកឃើញនៅជុំវិញកូនផ្កាយ TOI 700។ ពិភពទាំងអស់នេះសុទ្ធតែរកឃើញដោយផ្កាយរណបសង្កេតភពក្រៅប្រព័ន្ធព្រះអាទិត្យ TESS របស់ ណាសា នេះបើតាមរបាយការណ៍ដែលបានប្រកាសកាលពីថ្ងៃទី 10 មករា នៅក្នុងកិច្ចប្រជុំលើកទី 241 របស់សមាគមតារាសាស្ត្រអាម៉េរិក នៅ Seattle។

ពិភពមួយផ្សេងទៀតនៅក្នុងប្រព័ន្ធផ្កាយខាងលើ ត្រូវបានរកឃើញកាលពីឆ្នាំ 2020 និងត្រូវបានដាក់ឈ្មោះឱ្យថា TOI 700 d ក៏មានទំហំប្រហែលនឹងផែនដី។ ទាំង TOI 700 d និង TOI 700 e សុទ្ធតែស្ថិតនៅក្នុងតំបន់ដែលអាចឱ្យជីវិតរស់នៅបាន ដែលនេះមានន័យថា គម្លាតរបស់ពួកវាពីផ្កាយមេគឺអនុញ្ញាតឱ្យមានវត្តមានទឹករាវហូរនៅលើផ្ទៃខាងលើ។ វត្តមានរបស់ទឹករាវ បង្ហាញថា ពិភពទាំងនេះអាចកំពុង ឬធ្លាប់មានវត្តមានជីវិត។

ក្នុងចំណោមពិភពចំនួន 4 របស់ប្រព័ន្ធផ្កាយ TOI 700 ពិភព TOI 700 b ស្ថិតនៅក្បែរផ្កាយមេបំផុត។ TOI 700 b មានទំហំស្មើនឹង 90% ធៀបនឹងផែនដី និងចំណាយពេល 10 ថ្ងៃក្នុងការគោចរបានមួយជុំផ្កាយមេ។ បន្ទាប់មកគឺ TOI 700 c ធំជាងផែនដី 2.5 ដង ហើយមួយឆ្នាំរបស់វាស្មើនឹង 16 ថ្ងៃ។

ពិភពទីពីរ និងទីបីគឺ TOI 700 d និង TOI 700 e ស្ថិតក្នុងតំបន់ដែលអាចឱ្យមានវត្តមានជីវិត ហើយមួយឆ្នាំរបស់ពួកវាគឺ 37 ថ្ងៃ និង 28 ថ្ងៃ។ ពិភព TOI 700 e ដែលទើបត្រូវបាន ណាសា ប្រកាសកាលពីម្សិលមិញ គឺស្ថិតនៅចន្លោះពិភព TOI 700 c និង TOI 700 d៕

January 11, 2023

តម្លៃប្រេងសាំងនៅកម្ពុជា អនុវត្តចាប់ពីថ្ងៃទី 11 ដល់ 20 មករា 2023

ក្រសួងពាណិជ្ជកម្មបានប្រកាសពី តម្លៃលក់រាយប្រេងឥន្ធនៈថ្មី ដែលត្រូវអនុវត្ត ចាប់ពីថ្ងៃទី 11 ដល់ 20 មករា 2023 ក្នុងនោះ សាំងធម្មតាមានតម្លៃដដែលគឺ 4,200 រៀល/លីត្រ និងប្រេងម៉ាស៊ូត ចុះ ១៥០ រៀល ដោយត្រូវលក់ 4,400 រៀល/លីត្រ។

January 11, 2023

ភាពយន្តរបស់ Steven Spielberg ផ្ដួល «Avatar 2» និងទទួលបានពានផែនដីមាស

(សហរដ្ឋអាម៉េរិក)- «The Fabelmans» របស់ Steven Spielberg ឈ្នះ «Avatar 2» ដោយដណ្ដើមបានពានរង្វាន់ «ភាពយន្តមនោសញ្ចេតនាល្អបំផុតប្រចាំឆ្នាំ» 2023 នៅក្នុងព្រឹត្តិការណ៍ប្រគល់ពានរង្វាន់ Golden Globes លើកទី 80។

ពិធីប្រគល់រង្វាន់ត្រូវបានធ្វើឡើងនៅព្រឹកថ្ងៃទី 11 មករា 2023 (ម៉ោងនៅកម្ពុជា) នៅ Los Angeles និងត្រូវបានផ្សាយផ្ទាល់បន្ទាប់ពីអវត្តមានមួយឆ្នាំដោយសារបញ្ហាអាស្រូវមួយចំនួន។

អ្នកដឹកនាំសម្ដែង Quentin Tarantino ប្រកាសឈ្មោះនៃស្នាដៃដែលបានឈ្នះពានរង្វាន់ភាពយន្តមនោសញ្ចេតនាល្អបំផុតឆ្នាំនេះទៅឱ្យភាពយន្តរបស់ Steven Spielberg គឺ The Fabelmans។ The Fabelmans បានយកជ័យជម្នះលើកំពូលខ្សែភាពយន្តជាច្រើនក្នុងឆ្នាំ មានជាអាទិ៍ រឿង «Avatar: The Way of Water, Top Gun: Maverick» ជាដើម ហើយក្លាយជាម្ចាស់ពានរង្វាន់ខាងលើ។

ខ្លឹមសាររបស់ The Fabelmans ត្រូវបានបំផុសគំនិតដោយសារអតីតកាលរបស់ Spielberg អ្នកដែលធំឡើងនៅ Arizona ក្នុងសម័យក្រោយសង្គ្រាមលោកលើកទីពីរ។ ខ្សែភាពយន្តនេះមានការចូលរួមសម្ដែងដោយតារាល្បីៗមួយចំនួន មានដូចជា Michelle Williams, Paul Dano, Seth Rogen និង Gabriel LaBelle ជាដើម។

ផលិតករភាពយន្តដែលជាម្ចាស់កម្មសិទ្ធិលើ The Fabelmans ថែមទាំងបានឈ្នះពានរង្វាន់អ្នកដឹកនាំរឿងឆ្នើមជាងគេទៀតផង។ នេះគឺជាពានរង្វាន់ផែនដីមាស (Golden Globes) ទីបីក្នុងអាជីពរបស់ Steven Spielberg។ អ្នកដឹកនាំរឿងរូបនេះក៏ធ្លាប់ទទួលបានពានរង្វាន់កិត្តិយស Cecil B. DeMille ឆ្នាំ 2008 ផងដែរ។

ពានរង្វាន់ផែនដីមាន ជាពានរង្វាន់ដែលផ្ដោតលើការកំសាន្ត មិនដូចទៅនឹង Oscar។ ដូច្នេះ លទ្ធផលនៃការជ្រើសរើសបេក្ខភាពក៏មិនបង្កភាពចម្រូងចម្រាសប៉ុន្មាននៅក្នុងចំណោមទស្សនិកជន។ The Fabelmans និង The Banshees of Inisherin បានឈ្នះពានរង្វាន់ភាពយន្តពីរដែលសំខាន់បំផុតរបស់ Golden Globes។ នេះក៏ជាពន្លកកំពូលៗសម្រាប់ការចូលរួមដណ្ដើមពានរង្វាន់ «ភាពយន្តល្អបំផុត» នៅ Oscar នាពេលខាងមុខ។

ចំណែកផ្នែកសម្ដែងវិញ គណៈកម្មការមេប្រយោគបានប្រគល់ពានជាច្រើនទៅឱ្យអ្នកសម្ដែងពហុជាតិសាសន៍ ក្នុងនោះភាគច្រើនគឺជាសិល្បករ សិល្បការិនីមានដើមកំណើតអាហ្វ្រិក និងអាស៊ី។

ខ្លឹមសាររបស់ The Fabelmans ត្រូវបានបំផុសគំនិតដោយសារអតីតកាលរបស់ Spielberg អ្នកដែលធំឡើងនៅ Arizona ក្នុងសម័យក្រោយសង្គ្រាមលោកលើកទីពីរ

ពានរង្វាន់ផែនដីមាស (Golden Globes) ដែលត្រូវបានបង្កើតឡើងដោយ HFPA កាលពីឆ្នាំ 1944 គឺជាពាន់រង្វាន់ដែលទាក់ទាញទស្សនិកជនបានច្រើនជាងគេលំដាប់ទីបីនៅ សហរដ្ឋអាម៉េរិក បន្ទាប់ពី Oscar និង Grammy។ គណៈកម្មការមេប្រយោគគឺជាសមាជិករបស់ HFPA មកពីបណ្ដាទីភ្នាក់ងារសារព័ត៌មានរបស់ប្រទេសជាង 50 លើពិភពលោក។ ប៉ុន្មានឆ្នាំកន្លងមកនេះ Golden Globes ត្រូវបានគេធ្វើពហិការមិនចូលរួម ដោយសារតែក្នុងជួរគណៈកម្មការមេប្រយោគពុំមានសមាជិកជាជនជាតិស្បែកខ្មៅ និងការមន្ទិលទាក់ទងនឹងអំពើពុករលួយ ទិញពាន។

ខាងក្រោមគឺជាបញ្ជីឈ្មោះភាពយន្ត អ្នកដឹកនាំរឿង និងតួសម្ដែងដែលបានឈ្នះពាននៅ Golden Globes ឆ្នាំនេះ ៖

January 11, 2023

ទិញ iPhone 14 Pro Max ពីផ្សារអនឡាញ Shopee អតិថិជនទទួលបានដុំឈើ

(សិង្ហបុរី) – បុរសម្នាក់ចូលទៅកាន់ផ្សារអនឡាញ Shopee ទិញទូរស័ព្ទ iPhone 14 Pro Max តម្លៃ 1,961 ដុល្លារសិង្ហបុរី ប៉ុន្តែទំនិញដែលគាត់ទទួលបានគឺឈើមួយដុំ។

សារព័ត៌មាន Shin Min Daily News ដកស្រង់សម្ដីរបស់បុគ្គលិកសុខាភិបាលម្នាក់ឈ្មោះ Yu អាយុ 37 ឆ្នាំ ឱ្យដឹងអំពីបទពិសោធន៍អាក្រក់នៅពេលទិញទំនិញលើ Shopee។ លោក Yu និយាយថា គាត់តែងតែទិញទូរស័ព្ទពីហាងចែកចាយផ្លូវការរបស់ Apple។ ប៉ុន្តែលើកនេះ គាត់ទិញ iPhone ពីផ្សារអនឡាញ ដោយសារតែគេនឹងទទួលបានប័ណ្ណបញ្ចុះតម្លៃ 8 ដុល្លារសិង្ហបុរី និងសន្យាថាសងប្រាក់វិញនៅលើ Shopee បើមានបញ្ហា។

«ខ្ញុំបានពិនិត្យមើលមតិស្ដីពីហាងអនឡាញនេះ។ កំណែដែលខ្ញុំចង់ទិញក៏ជិតអស់ពីឃ្លាំងនៅកន្លែងជាច្រើន ទើបខ្ញុំសម្រេចចិត្តបញ្ជាទិញ iPhone 14 Pro Max កំណែ 256 GB នៅលើ Shopee» លោក Yu ឱ្យដឹងដូច្នេះ។

បើទិញនៅ Apple Store ទូរស័ព្ទខាងលើនេះមានតម្លៃ 1,987 ដុល្លារសិង្ហបុរី ប៉ុន្តែបើទិញអនឡាញ អាចចំណេញបាន 26 ដុល្លារសិង្ហបុរី។ លោក Yu ក៏ជឿជាក់លើ Shopee ដូច្នេះ គាត់ក៏សម្រេចចិត្តទិញ។

មកដល់ថ្ងៃទី 31 ធ្នូ 2022 ទំនិញត្រូវបានដឹកមកប្រគល់ដល់អាសយដ្ឋានរបស់លោក Yu។ អ្នកប្រគល់ទំនិញបានដាក់កញ្ចប់ទំនិញមួយនៅខាងក្រៅទ្វារ ថតរូបមួយសន្លឹក រួចក៏ប្រញាប់ចាកចេញ។ នៅពេលបើកប្រអប់ទំនិញ លោក Yu ឃើញថា ខាងក្នុងមានតែឈើមួយដុំនៅកណ្ដាលថង់ប្លាស្ទិកដែលមានខ្យល់ពេញ។ ពុំមានទូរស័ព្ទ iPhone ណាមួយត្រូវបានប្រគល់ឱ្យអតិថិជនម្នាក់នេះឡើយ។

លោក Yu បានទាក់ទងទៅកាន់អ្នកលក់ ស្នើឱ្យសងប្រាក់មកវិញ ប៉ុន្តែត្រូវបានបដិសេធ។ បន្ទាប់មក លោក Yu ក៏បានទាក់ទងទៅកាន់ផ្នែកបម្រើអតិថិជនរបស់ Shopee ប៉ុន្តែ ក៏មិនត្រូវបានជួយដោះស្រាយ ព្រោះគេថា ទំនិញត្រូវបានផ្ញើទៅកាន់អាសយដ្ឋានទៅតាមសំណើរួចហើយ។

លោក Yu ក៏បន្តប្ដឹងទៅកាន់សមត្ថកិច្ច។ ក្រោយពីពិនិត្យឡើងវិញ គាត់រកឃើញថា នៅបាតប្រអប់មានស្នាមស្កុត។ គាត់សង្ស័យថា ទំនិញត្រូវបានប្ដូរនៅពេលដឹកជញ្ជូន។

អតិថិជនវ័យ 35 រូបនេះយល់ថា អ្នកទិញមិនគួរត្រូវរងការខាតបង់ដូច្នេះសោះ។ គាត់ក៏ស្បថថា នឹងមិនទិញទំនិញនៅលើផ្សារអនឡាញទៀតឡើយ។

នេះមិនមែនជាលើកដំបូងទេ ដែលអ្នកទិញ iPhone តាមអនឡាញ បែរជាទទួលបានរបស់ចម្លែក គ្មានតម្លៃ។ យោងតាម មុននោះ អតិថិជនម្នាក់នៅ អង់គ្លេស បានទិញ iPhone 13 Pro Max តម្លៃ 1,500 ផោន ប៉ុន្តែទទួលបានទឹកលាងដៃពីរដប៕

January 11, 2023

ធនាគារពិភពលោក (WB) ព្យាករថា សេដ្ឋកិច្ចសកលឆ្នាំ 2023 អាចធ្លាក់ទៅក្នុងវិបត្តិ

ក្នុងការព្យាករស្ដីពីសេដ្ឋកិច្ចថ្មីបំផុតកាលពីថ្ងៃទី 10 មករា 2023 ធនាគារពិភពលោក (World Bank – WB) បានទម្លាក់ការព្យាករកំណើនសេដ្ឋកិច្ចរបស់ប្រទេសជាច្រើនចុះមកត្រឹមឱនភាព ដោយសារតែផលប៉ះពាល់ពីកំណើនការប្រាក់ សង្គ្រាមរុស្ស៊ី-អ៊ុយក្រែន និងសេដ្ឋកិច្ចធ្លាក់ចុះនៅក្នុងបណ្ដាប្រទេសធំៗ។

Reuters ដកស្រង់ព័ត៌មានពីធនាគារពិភពលោក ឱ្យដឹងថា កំណើនផលិតផលក្នុងស្រុកសរុប (GDP) នៅទូទាំងសកលលោកគ្រោងនឹងមានអត្រា 1.7% ក្នុងឆ្នាំ 2023 ដែលនេះគឺជាកំណើនយឺតបំផុតរាប់ចាប់ពីឆ្នាំ 1993 លើកលែងតែឆ្នាំ 2009 និង 2020 ដែលមានវិបត្តិធ្ងន់ធ្ងរ។

តួលេខខាងលើត្រូវបានទម្លាក់ចុះទាបធៀបនឹងនៅក្នុងរបាយការណ៍ទស្សនវិស័យសេដ្ឋកិច្ចសកលកាលពីខែមិថុនា 2022 ដែលពេលនោះ WB បានព្យាករថា កំណើន GDP ទូទាំងពិភពលោកនៅឆ្នាំ 2023 ស្ថិតនៅត្រឹម 3.0%។

ក្រៅពីនេះ ការព្យាករអំពីកំណើនសេដ្ឋកិច្ចសកលថ្មីបំផុតសម្រាប់ 2024 ក៏ត្រូវបានទម្លាក់ពី 2.9% ក្នុងរបាយការណ៍ឆ្នាំ 2022 មកនៅត្រឹម 2.7% ក្នុងរបាយការណ៍ចុងក្រោយនាបច្ចុប្បន្ន។ កំណើនមធ្យមក្នុងដំណាក់កាលពីឆ្នាំ 2020 ដល់ 2024 នឹងស្ថិតក្រោម 2% ជារយៈពេលដែលមានកំណើនយឺតជាងគេបង្អស់រាប់ពីឆ្នាំ 1960។

ក្នុងប្រកាសមួយដែលអមនឹងរបាយការណ៍ព្យាករខាងលើ WB បានសង្កត់ធ្ងន់ថា ដោយមានសេដ្ឋកិច្ចផុយស្រួយដូចបច្ចុប្បន្ន រាល់ការប្រែប្រួលអវិជ្ជមានណាមួយក៏អាចរុញច្រានសេដ្ឋកិច្ចសកលឱ្យធ្លាក់ទៅក្នុងវិបត្តិ។ ការប្រែប្រួលអវិជ្ជមាននេះអាចជាអតិផរណាកើនឡើងខ្ពស់ជាងការរំពឹងទុក ការប្រាក់កើនឡើងភ្លាមៗដើម្បីគ្រប់គ្រងអតិផរណា ការផ្ទុះឡើងជាថ្មីនៃជំងឺរាតត្បាតសកលកូវីដ-19 ឬសេដ្ឋកិច្ចធ្លាក់ចុះនៅក្នុងបណ្ដាប្រទេសធំៗ និងភាពតានតឹងក្នុងភូមិសាស្ត្រនយោបាយមានការកើនឡើងជាដើម៕

January 11, 2023

AFF Cup 2022 – គ្រូបង្វឹក Polking ថា «ថៃរងផលអវិជ្ជមានច្រើន» មុនប៉ះវៀតណាមនៅវគ្គផ្ដាច់ព្រ័ត្រ

(ប្រទេសថៃ)- គ្រូបង្វឹកជនជាតិប្រេស៊ីល របស់ក្រុមជម្រើសជាតិថៃ បានឱ្យដឹងថា ថៃរងផលមិនល្អជាច្រើននៅពេលត្រៀមខ្លួនចូលប្រកួតនៅវគ្គផ្ដាច់ព្រ័ត្រដែលត្រូវប៉ះនឹងវៀតណាម។

នៅ AFF Cup 2020 គ្រូបង្វឹក Mano Polking ដឹកនាំក្រុមជម្រើសជាតិថៃ បានយកឈ្នះលើវៀតណាម 2-0 ក្រោយការប្រកួតពីរជើងនៅវគ្គពាក់កណ្ដាលផ្ដាច់ព្រ័ត្រ មុនពេលផ្ដួលឥណ្ឌូណេស៊ី ដើម្បីក្លាយជាជើងឯក។ ក៏ប៉ុន្តែ កាលពីរដូវកាលនោះ ក្រុមទាំងអស់ត្រូវទៅទាត់នៅសិង្ហបុរី។ ចំណែក AFF Cup 2022 ក្រុមទាំងអស់ត្រូវទាត់តាមរូបមន្ត «ធ្វើជាភ្ញៀវ និងម្ចាស់ផ្ទះ»។ ដូច្នេះ គ្រូបង្វឹករបស់ថៃ វាយតម្លៃថា «វៀតណាមមានប្រៀបជាងច្រើនផ្នែក»។

«វៀតណាមបានសម្រាកច្រើនជាងពួកខ្ញុំមួយថ្ងៃ» លោក Polking ថ្លែងដូច្នេះ បន្ទាប់ពីបានផ្ដួលម៉ាឡេស៊ីនៅវគ្គពាក់កណ្ដាលផ្ដាច់ព្រ័ត្រកាលពីថ្ងៃទី 10 មករា និងបន្តថា «…បន្ទាប់មក ពួកគេបានទាត់នៅលើទីលានរបស់ពួកគេនៅជើងទីមួយវគ្គផ្ដាច់ព្រ័ត្រ ដូច្នេះយើងខ្ញុំចាញ់ប្រៀបជាង»។ ក៏ប៉ុន្តែ គ្រូបង្វឹករបស់ថៃអះអាងថា «បើសិនត្រូវជ្រើសរើស ខ្ញុំនៅតែចង់បានស្ថានភាពបច្ចុប្បន្ន»។

គ្រូបង្វឹកជនជាតិប្រេស៊ីល Polking (ឆ្វេង) អបអរជាមួយនឹងប្រធានប្រតិភូក្រុមបាល់ទាត់ជម្រើសជាតិថៃ អ្នកស្រី Nualphan Lamsan បន្ទាប់ពីថៃយកឈ្នះលើម៉ាឡេស៊ី 3-0 នៅជើងទីពីរនៃវគ្គពាក់កណ្ដាលផ្ដាច់ព្រ័ត្រនៅ AFF Cup 2022 កាលពីថ្ងៃទី 10 មករា 2023

ពេលនេះ គោលដៅរបស់ថៃគឺការយកកម្លាំងមកវិញ មុនពេលផ្លាស់ទី និងមានវត្តមាននៅ រដ្ឋធានីហាណូយ នៅព្រលប់ថ្ងៃទី 11 មករា។ ក្រុមនេះនឹងហ្វឹកហាត់សាកល្បងនៅលើទីលាន My Dinh មួយពេលក្នុងថ្ងៃទី 12 មករា មុនពេលចូលប្រកួតជើងទីមួយនៃវគ្គផ្ដាច់ព្រ័ត្រដែលនឹងធ្វើឡើងនៅថ្ងៃទី 13 មករា។ 3 ថ្ងៃក្រោយមក ការប្រកួតជើងទីពីរនឹងធ្វើឡើងនៅកីឡដ្ឋាន Thammasat នៅរាជធានីបាងកក។

ថៃ ប្រកួតនឹង វៀតណាម នៅវគ្គពាក់កណ្តាលផ្តាច់ព្រ័ត្រ ជើងទីពីរនៅ AFF Suzuki Cup 2020

ក្នុងការប្រកួត 14 រដូវកាលនៅ AFF Cup ថៃបានឡើងដល់វគ្គផ្ដាច់ព្រ័ត្រចំនួន 10 ដង។ ពួកគេធ្លាប់ដណ្ដើមបានជើងឯក 6 រដូវកាល គឺនៅឆ្នាំ 1996, 2000, 2002, 2014, 2016 និង 2020 ព្រមទាំងដណ្ដើមបានលេខ 2 ចំនួន 3 រដូវកាល គឺនៅឆ្នាំ 2007, 2008 និង 2012។ នេះគឺជាលើកទីពីរហើយដែលថៃត្រូវប្រកួតនឹងវៀតណាមនៅវគ្គផ្ដាច់ព្រ័ត្រ បន្ទាប់ពីលើកដំបូងនៅឆ្នាំ 2008។ កាលណោះ វៀតណាមឈ្នះថៃ 2-1 នៅកីឡដ្ឋាន Rajamangala មុនពេលស្មើ 1-1 នៅកីឡដ្ឋាន My Dinh ដែលជួយឱ្យវៀតណាមបានក្លាយជាជើងឯកលើកដំបូង។ ក្នុង 28 ប្រកួត ថៃនៅតែមានប្រៀបជាងវៀតណាម ក្នុងនោះ ថៃឈ្នះ 16 ប្រកួត, ស្មើ 9 ប្រកួត និងចាញ់ 3 ប្រកួត។

ថៃ ប្រកួតនឹង វៀតណាម នៅវគ្គផ្តាច់ព្រ័ត្រ ជើងទីពីរនៅ AFF Suzuki Cup 2008

នៅវគ្គពាក់កណ្ដាលផ្ដាច់ព្រ័ត្រ AFF Cup 2022 ថៃបានចាញ់ម៉ាឡេស៊ី 0-1 ក្នុងជើងទីមួយ និងឈ្នះ 3-0 នៅជើងទីពីរ មុនពេលបានឡើងទៅវគ្គផ្ដាច់ព្រ័ត្រដែលនឹងត្រូវប៉ះវៀតណាមនៅជើងទីមួយដែលប្រកួតនៅថ្ងៃទី 13 មករា នៅវៀតណា និងជើងទីពីរនៅថ្ងៃទី 16 មករា នៅប្រទេសថៃ៕

January 11, 2023

ប្រជាជននៅតូក្យូ ហាក់មិនរីករាយនឹងការបោះបង់ទីក្រុងទៅនៅជនបទ បើទោះរដ្ឋផ្ដល់ប្រាក់ឧបត្ថម្ភច្រើន

រាជធានីតូក្យូ របស់ប្រទេសជប៉ុន បង្កើនខ្ទង់ប្រាក់ឧបត្ថម្ភដើម្បីលើកទឹកចិត្តឱ្យប្រជាជនរើទៅរស់នៅឯជនបទ ដើម្បីកាត់បន្ថយសម្ពោធនៅតំបន់ស្នូលរបស់រាជធានី ប៉ុន្តែ មិនអាចទាក់ទាញបានចំណាប់អារម្មណ៍ច្រើននោះទេ។

តូក្យូមានផែនការឧបត្ថម្ភប្រាក់ 1 លានយ៉េន (7,500 ដុល្លារអាម៉េរិក) ដល់ក្មេងអាយុក្រោម 18 ឆ្នាំនៅក្នុងគ្រួសារនានា ដែលព្រមរើចេញពី 23 ខណ្ឌនៅកណ្ដាលរាជធានី ទៅតាំងលំនៅយ៉ាងតិច 5 ឆ្នាំ នៅក្នុងតំបន់ជនបទក្បែររាជធានី។

ខ្ទង់ប្រាក់ឧបត្ថម្ភនេះខ្ពស់ជាង 3 ដង ធៀបនឹងខ្ទង់ប្រាក់ដែលអនុវត្តតាំងពីឆ្នាំ 2019 ធ្វើឱ្យខ្ទង់ប្រាក់ជំនួយសម្រាប់គ្រួសារនានាឡើងដល់ 3 លានយ៉េន។ ផែនការថ្មីនេះត្រូវបានគេរំពឹងថា នឹងទាក់ទាញគ្រួសារបានប្រហែល 10,000 គ្រួ ត្រឹមឆ្នាំ 2027 ជួយឱ្យដង់ស៊ីតេប្រជាជនថយចុះ និងកាត់បន្ថយសម្ពាធលើសាលារៀន មន្ទីរពេទ្យ និងមូលដ្ឋាននានានៅរាជធានី។

23 ខណ្ឌនៅកណ្ដាលរាជធានីតូក្យូ គឺជាកន្លែងរស់នៅរបស់ប្រជាជនជាង 9.2 លាននាក់ និងមានដង់ស៊ីតេប្រជាជនជាង 14,400 នាក់/គីឡូម៉ែត្រក្រឡា។ ក្នុងចំណោមប្រជាជន 125 លាននាក់នៅជប៉ុន មានប្រហែល 35 លាននាក់ ស្មើនឹង 28% កំពុងរស់នៅក្នុងរាជធានីតូក្យូ និងតំបន់ក្បែរខាង ធ្វើឱ្យទីនេះក្លាយជាតំបន់ទីក្រុងធំជាងគេមួយលើពិភពលោក។

ប្រជាជនជាច្រើនដែលរស់នៅក្នុងទីក្រុងតូក្យូ មានចំណាប់អារម្មណ៍ ឬចូលចិត្តរស់នៅបែបស្រុកចំការ ប៉ុន្តែពួកគេហាក់ចាត់ទុកថា ជីវភាពបែបនោះគឺសម្រាប់តែអ្នកចូលនិវត្តន៍ប៉ុណ្ណោះ។ គ្រួសារថ្មីភាគច្រើនយល់ថា ការរស់នៅក្នុងទីក្រុងនៅតែជាកន្លែងល្អបំផុតដែលផ្ដល់ឱកាសច្រើនដល់ការសិក្សា ធ្វើការ រកស៊ី និងកំសាន្ត។

យោងតាម Nikkei កម្មវិធីខាងលើរបស់តូក្យូ ទាក់ទាញបាន 71 គ្រួសារចូលរួមកាលពីឆ្នាំ 2019។ តួលេខនេះបានកើនដល់ 290 គ្រួសារនៅឆ្នាំ 2020 និង 1,184 គ្រួសារនៅឆ្នាំ 2021៕

January 11, 2023

AFF Cup 2022 – ខ្សែប្រយុទ្ធលេខមួយរបស់ថៃរងរបួស មុននឹងប៉ះវៀតណាមនៅវគ្គផ្ដាច់ព្រ័ត្រ

ក្រុមជម្រើសជាតិថៃ ទទួលដំណឹងមិនល្អនៅពេល Teerasil Dangda រងរបួសនៅក្នុងការប្រកួតជាមួយម៉ាឡេស៊ីនៅជើងទីពីរនៃវគ្គពាក់កណ្ដាលផ្ដាច់ព្រ័ត្ររបស់ AFF Cup 2022 កាលពីព្រលប់ថ្ងៃទី 10 មករា ដែលថៃបានយកឈ្នះ 3-0។

ខ្សែប្រយុទ្ធលេខមួយរបស់ថៃ Teerasil Dangda រងរបួសក្នុងម៉ោងចន្លោះពីរតង់។ យោងតាមសារព័ត៌មានថៃ Thairath ខ្សែប្រយុទ្ធវ័យ 34 ឆ្នាំនេះ រងរបួសត្រង់កំភួនជើង។ គាត់ត្រូវបាននាំទៅមន្ទីរពេទ្យដើម្បីពិនិត្យលំអិតអំពីស្ថានភាពរបួស។

មុនពេលចាកចេញពីទីលាន Teerasil រួមចំណែកបានមួយគ្រាប់ដំបូងដោយការតែតបញ្ចូលទីនៅនាទីទី 19។ ក្នុងតង់ទីពីរ Bordin Phala និង Adisak Kraisorn រកបានពីរគ្រាប់ទៀតនៅនាទីទី 55 និង 71។ ចប់ការប្រកួត ថៃផ្ដួលម៉ាឡេស៊ី 3-0 ក្នុងជើងទីពីរ និងឈ្នះសរុប 3-1 ហើយក៏បានឡើងទៅវគ្គផ្ដាច់ព្រ័ត្រដែលនឹងត្រូវជួបវៀតណាម។

ដំណឹងស្ដីពីខ្សែប្រយុទ្ធលេខមួយរបស់ថៃ Teerasil Dangda រងរបួស គឺជារឿងមិនល្អសម្រាប់ថៃ នៅក្នុងការត្រៀមខ្លួនដើម្បីទៅប្រកួតជាមួយវៀតណាមនៅថ្ងៃទី 13 និង 16 មករាខាងមុខ៕

January 11, 2023

Author: សឿន សំណាង