សឿន សំណាង - La Reine Media

សំបុត្រទស្សនាជើងទីពីរវគ្គផ្ដាច់ព្រ័ត្រ AFF Cup 2022 លក់អស់ក្នុង 5 នាទី

(ប្រទេសថៃ) – សំបុត្រជាង 20,000 សម្រាប់ទស្សនាការប្រកួតជើងទីពីរនៃវគ្គផ្ដាច់ព្រ័ត្រនៅ AFF Cup 2022 រវាង ថៃ និងវៀតណាម នៅកីឡដ្ឋាន Thammasat ត្រូវបានលក់អស់គ្មានសល់ក្រោយការបើកលក់បាន 5 នាទី កាលពីព្រឹកថ្ងៃទី 12 មករា 2023។

ការប្រកួតជើងទីពីរនៃវគ្គផ្ដាច់ព្រ័ត្រដែលនឹងធ្វើឡើងនៅថ្ងៃទី 16 មករា លើទីលានរបស់កីឡដ្ឋាន Thammasat ក្នុងរាជធានីបាងកក អាចដាក់មនុស្សបាន 25,000 នាក់។ គណៈកម្មការបានបញ្ចេញសំបុត្រទស្សនាជាង 20,000 ដែលទាំងនេះសុទ្ធតែត្រូវបានលក់នៅលើអនឡាញ។ បញ្ជរលក់សំបុត្រត្រូវបានបើកនៅម៉ោង 10 ព្រឹក ហើយប៉ុន្មាននាទីក្រោយមក ទំព័របណ្ដាញសង្គមរបស់ក្រុមជម្រើសជាតិថៃ ក៏បានប្រកាសថា សំបុត្រត្រូវបានលក់អស់។

សំបុត្ររបស់កៅអីតំបន់ A សម្រាប់អ្នកគាំទ្រក្រុមម្ចាស់ផ្ទះមានតម្លៃ 600 បាត () ខណៈកៅអីតំបន់ B គឺ 450 បាត ចំណែក C និង D គឺ 250 បាត។ សារព័ត៌មាន Thairath បានផ្សាយថា សំបុត្រដែលត្រូវបានឈ្មួញសំបុត្រពពាយនាយលក់នៅខាងក្រៅកីឡដ្ឋាន មានតម្លៃខ្ពស់ជាងពីរដងធៀបនឹងតម្លៃដើម។

ដោយឡែក សំបុត្រសម្រាប់អ្នកគាំទ្ររបស់ក្រុមវៀតណាម នៅ Thammasat គឺមានតម្លៃ 750 បាត។ ទីតាំងសម្រាប់អ្នកគាំទ្រក្រុមភ្ញៀវស្ថិតនៅជាប់នឹងទីតាំងសារព័ត៌មាននៅតំបន់ A។

តម្លៃសំបុត្រសម្រាប់ទស្សនាជើងទីពីរនៃវគ្គផ្ដាច់ព្រ័ត្រនៅប្រទេសថៃ មានតម្លៃទាបជាងពាក់កណ្ដាល ធៀបនឹងសំបុត្រនៅជើងទីមួយដែលធ្វើឡើងនៅកីឡដ្ឋាន My Dinh នៅហាណូយ ដែលអាចដាក់មនុស្សបានប្រហែល 40,000 នាក់។ ក្រុមម្ចាស់ផ្ទះវៀតណាម ដាក់លក់សំបុត្រ 4 ប្រភេទ រួមមាន តម្លៃ 400,000, 600,000, 800,000 និង 1 លានដុង។ មកដល់រសៀលម្សិលមិញ ឈ្មួញសំបុត្រនៅខាងក្រៅកីឡដ្ឋាន My Dinh បានដំឡើងថ្លៃសំបុត្រខ្ពស់ជាងមុន 4 ដង។ សំបុត្រចូលទស្សនាវគ្គផ្ដាច់ព្រ័ត្រជើងទីមួយត្រូវបានវៀតណាមលក់អស់ក្នុងរយៈពេលតែប៉ុន្មានម៉ោងប៉ុណ្ណោះ។

វគ្គផ្ដាច់ព្រ័ត្រជើងទីមួយ និងទីពីររបស់ AFF Cup 2022 នឹងត្រូវបានប្រកួតនៅវេលាម៉ោង 19 និង 30 នាទី ថ្ងៃទី 13 មករា និង 16 មករាខាងមុខ៕

អ្នកគាំទ្រក្រុមថៃ ក្នុងការប្រកួតជាមួយម៉ាឡេស៊ី កាលពីប៉ុន្មានថ្ងៃមុន

January 13, 2023

អ្នកជំនាញចិន ណែនាំថា «ពុំគួរទៅសួរសុខទុក្ខមនុស្សចាស់ក្នុងរដូវចូលឆ្នាំ»

ក្រុមអ្នកជំនាញផ្នែកសុខាភិបាលលំដាប់កំពូលៗនៅប្រទេសចិន ណែនាំដល់មនុស្សគ្រប់គ្នាថា មិនគួរទៅសួរសុខទុក្ខមនុស្សវ័យចំណាស់នៅក្នុងរដូវចូលឆ្នាំចិន នៅពេលដែលកូវីដ-19 ផ្ទុះឆ្លងរាលដាលខ្លាំង។

ការណែនាំនេះបានក្លាយជាប្រធានបទដែលទទួលបានការចូលអានច្រើនជាងគេបំផុតនៅលើបណ្ដាញសង្គម Weibo ថ្ងៃនេះ។ តាមការរំពឹងទុក មនុស្សរាប់សិបលាននាក់នឹងធ្វើដំណើរពីបណ្ដាទីក្រុង ទៅកាន់ស្រុកកំណើតនៅជនបទ ក្នុងឱកាសបុណ្យចូលឆ្នាំប្រពៃណីចិន នាពេលខាងមុខ។

«នេះគឺជាការណែនាំដ៏សមស្រប។ ទៅស្រុក ឬទុកសុខភាពរបស់មនុស្សចាស់ជាធំ» អ្នកលេងបណ្ដាញសង្គមម្នាក់សរសេរលើ Weibo ដូច្នេះ។ ចំណែកម្នាក់ទៀតសរសេរថា មិនហ៊ានទៅសួរសុខទុក្ខលោកយាយទេ តែនឹងទុកជំនូនជូនគាត់នៅខាងមុខទ្វារ និងបន្ថែមថា «ជិតដល់ចូលឆ្នាំហើយ ខ្ញុំខ្លាចថា លោកយាយគាត់ឯកា»។

ការផ្លាស់ទីរបស់ប្រជាជនចិនក្នុងរដូវបុណ្យចូលឆ្នាំប្រពៃណីជាតិ អាចប៉ះពាល់ដល់សុខភាពរបស់មនុស្សវ័យចំណាស់ ពេលឆ្លងជំងឺកូវីដ-19

អង្គការសុខភាពពិភពលោក (WHO) កាលពីថ្ងៃទី 11 មករា បានឱ្យដឹងថា នឹងពិបាកខ្លាំងណាស់ក្នុងការគ្រប់គ្រងវីរុសក្នុងរដូវបុណ្យទាន ពេលដែលប្រទេសចិនមានមនុស្សយ៉ាងច្រើនត្រូវធ្វើដំណើរទៅស្រុកកំណើត។

អាជ្ញាធរចិនបានព្យាករថា ក្នុងរដូវបុណ្យចូលឆ្នាំចិនឆ្នាំនេះ នឹងមានមនុស្សធ្វើដំណើរប្រមាណ 2.1 ពាន់លានជើងនៅទូទាំងប្រទេស។ ក្រុមអ្នកជំនាញបានសង្កត់ធ្ងន់ថា ការផ្លាស់ទីដ៏ធំនេះអាចធ្វើឱ្យមានការឆ្លងរាលដាលជំងឺកាន់តែច្រើន និងបង្កគ្រោះថ្នាក់ដល់មនុស្សវ័យចំណាស់ ក៏ដូចជាក្រុមមនុស្សដែលមិនទាន់បានចាក់វ៉ាក់សាំង៕

January 12, 2023

ក្រុមហ៊ុនផលិតម៉ូតូអគ្គិសនីរបស់ឥណ្ឌា ចាប់ផ្ដើមប្រគល់ទំនិញវគ្គដំបូង

HOP Electric ដែលជាអ្នកផលិតយានយន្តអគ្គិសនីមានទីស្នាក់ការនៅប្រទេសឥណ្ឌា បានចាប់ផ្ដើមចែកចាយម៉ូតូអគ្គិសនីថ្មីបំផុតរបស់ខ្លួនចំនួន 2,500 គ្រឿងដំបូងនៅក្នុងទីក្រុង Jaipur។

យោងតាមក្រុមហ៊ុនខាងលើ ក្នុងរង្វង់ 2 ខែ រាប់ចាប់ពីថ្ងៃបង្ហាញខ្លួន ម៉ូតូអគ្គិសនី HOP OXO របស់ពួកគេ ទាក់ទាញអតិថិជនបញ្ជាទិញបានជាង 10,000 លើក និង 50,000 នាក់សម្ដែងចំណាប់អារម្មណ៍តាមរយៈគេហទំព័រក្រុមហ៊ុន។

ប្រធានផ្នែកទីផ្សាររបស់ HOP Electric បានឱ្យដឹងថា ការយឺតយ៉ាវដែលបានកើតឡើងកន្លងមកគឺដោយសារការអនុវត្តស្ដង់ដា និងការសាកល្បងថ្មី ក៏ដូចជាការកែប្រែលក្ខន្តិកៈរបស់កម្មវិធី FAME II។ ក្រៅពី Jaipur ក្រុមហ៊ុន HOP Electric ក៏នឹងឆាប់ចាប់ផ្ដើមប្រគល់ទំនិញនៅតាមបណ្ដារដ្ឋដទៃរបស់ឥណ្ឌា ក្នុងពេលឆាប់ៗខាងមុខ៕

January 12, 2023

ផឹកទឹកមិនបានគ្រប់គ្រាន់ មានហានិភ័យ «ឆាប់ស្លាប់ជាង 20%»

(សហរដ្ឋអាម៉េរិក) – ការសិក្សាស្រាវជ្រាវបានបង្ហាញថា មនុស្សពេញវ័យដែលផឹកទឹកមិនបានគ្រប់គ្រាន់អាចចាស់មុនអាយុ ប្រឈមនឹងហានិភ័យកើតជំងឺរ៉ាំរ៉ៃខ្ពស់ នាំឱ្យឆាប់ស្លាប់។

លទ្ធផលនៃការសិក្សាស្រាវជ្រាវដែលត្រូវបានប្រកាសនៅលើទស្សនាវដ្ដីវេជ្ជសាស្ត្រ Lancet កាលពីថ្ងៃទី 06 មករា 2023 គឺជាការស្រាវជ្រាវរបស់ក្រុមអ្នកវិទ្យាសាស្ត្រនៅវិទ្យាស្ថានជាតិអាម៉េរិក។ ក្នុង 25 ឆ្នាំកន្លង ពួកគេបានវិភាគលទ្ធផលនៃការពិនិត្យសុខភាពរបស់មនុស្សពេញវ័យជាង 11,000 នាក់នៅ សហរដ្ឋអាម៉េរិក ដែលមានអាយុពី 45 ដល់ 66 ឆ្នាំ។

យោងតាមបណ្ឌិត Natalia Dmitrieva មកពីវិទ្យាស្ថានបេះដូង សួត និងឈាម នៃវិទ្យាស្ថានជាតិ ដែលជាប្រធានក្រុមស្រាវជ្រាវ ការបន្ថែមជាតិទឹកដល់រាងកាយនឹងជួយបន្ថយល្បឿននៃការវិវត្តទៅរកភាពចាស់។ ក្រុមអ្នកជំនាញតាមដានបរិមាណជាតិទឹកជាមធ្យមដែលបញ្ចូលទៅក្នុងរាងកាយរបស់អ្នកស្ម័គ្រចិត្ត ដោយការពិនិត្យមើលកំហាប់របស់ សូដ្យូមក្នុងឈាម។ កំហាប់សូដ្យូមកាន់តែខ្ពស់ មានន័យថា មនុស្សនោះផឹកទឹកកាន់តែតិច។

បរិមាណមធ្យមនៃសូដ្យូមក្នុងរាងកាយរបស់អ្នកស្ម័គ្រចិត្តគឺពី 135 ដល់ 146 millimole/លីត្រ។ មនុស្សដែលមានបរិមាណសូដ្យូមខ្ពស់ជាងកម្រិតមធ្យមនេះ មានសញ្ញានៃភាពចាស់ខ្ពស់ជាង 50%។ សញ្ញានៃភាពចាស់ទាំងនេះរួមមាន ខ្លាញ់អាក្រក់ខ្ពស់ សម្ពាធឈាម និងជាតិស្ករកើនឡើង ចំណែកភ្នែកក៏រូង និងស្បែកស្ងួត។

«មនុស្សវ័យកណ្ដាលដែលមានផ្ទុកសារជាតិសូដ្យូមក្នុងឈាមលើសពី 142 mmol/លីត្រ មានហានិភ័យស្លាប់ខ្ពស់ជាងក្នុងផ្នែកជីវសាស្ត្រ ហើយហានិភ័យឆាប់ស្លាប់កើន 20%» លទ្ធផលនៃការស្រាវជ្រាវបញ្ជាក់ដូច្នេះ។

អ្នកទាំងឡាយដែលផឹកទឹកតិច ផឹកទឹកមិនគ្រប់គ្រាន់ ប្រឈមនឹងជំងឺវិវត្តទៅជាធ្ងន់ធ្ងរដែលអាចបណ្ដាលឱ្យស្លាប់ ក្នុងនោះជំងឺខ្សោយបេះដូង ដាច់សរសៃឈាមខួរក្បាល ទឹកនោមផ្អែម បាត់បង់ការចងចាំ និងជំងឺសួតរ៉ាំរ៉ៃ។

យោងតាម NY Post សហរដ្ឋអាម៉េរិក ណែនាំឱ្យផឹកទឹកឱ្យបានពី 8 ទៅ 10 កែវជារៀងរាល់ថ្ងៃ។ ក៏ប៉ុន្តែ ការស្រាវជ្រាវកាលពីឆ្នាំ 2020 បានបង្ហាញថា មនុស្សពេញវ័យប្រហែលតែ 20% ប៉ុណ្ណោះដែលផឹកទឹកបានគ្រប់គ្រាន់។ នៅពេលមនុស្សកាន់តែចាស់ អារម្មណ៍នៃការស្រេកទឹកក៏កាន់តែថយចុះ ហើយពួកគេពិបាកដឹងបានថា ខ្លួនកំពុងខ្វះជាតិទឹក៕

January 12, 2023

ក្រុមជម្រើសជាតិថៃនាំមុខគេស្ដីពីការវាយលុក ខណៈវៀតណាមខ្លាំងខាងការពារនៅ AFF Cup 2022

ការប្រកួត 2 ជើងនៅថ្ងៃទី 13 មករា និង 16 មករា នៃវគ្គផ្ដាច់ព្រ័ត្ររបស់ AFF Cup 2022 ទំនងជានឹងល្អមើលខ្លាំង នៅពេលក្រុមជម្រើសជាតិថៃពូកែខាងវាយលុក ចំណែកវៀតណាមវិញ ក៏ខ្លាំងខាងការការពារ។

គេអាចប្រដូចក្រុមជម្រើសជាតិថៃទៅនឹងដាវ រីឯវៀតណាមវិញគឺប្រៀបបានទៅនឹងខែលការពារនៅ AFF Cup 2022 ព្រោះថា ថៃកំពុងនាំមុខគេនៅក្នុងស្ថិតិវិជ្ជមាននានាទាក់ទងនឹងការវាយលុក។ ផ្ទុយទៅវិញ វៀតណាមនៅតែរក្សាចំណុចពិសេសក្នុងសម័យគ្រូបង្វឹកជនជាតិកូរ៉េខាងត្បូង Park Hang-seo នោះគឺសមត្ថភាពការពារ និងកាត់បន្ថយបានជាអតិបរមានូវចំនួនគ្រាប់បាល់ចាញ់។

យោងតាមស្ថិតិរបស់ទំព័រ AFF Cup 2022 ក្រុមថៃនាំមុខគេក្នុងបញ្ជីស្ដីពីការស៊ុតបញ្ចូលទី ដោយរកបាន 16 គ្រាប់។ ថៃក៏មានកីឡាករដែលកំពុងនាំមុខគេក្នុងបញ្ជីចំណាត់ថ្នាក់ស្ដេចកម្ទេចសំណាញ់ទី នោះគឺ Teerasil Dangda ដោយរកបាន 6 គ្រាប់ក្នុង 6 ប្រកួត ច្រើនជាង 1 គ្រាប់ធៀបនឹងកីឡាករវៀតណាម Nguyen Tien Linh។

ទន្ទឹមនឹងនេះ ប្រធានក្រុម Theerathon Bunmathan និងកីឡាករ Safawi Rasid របស់ថៃ ក៏នាំមុខគេ (4 លើក) ស្ដីពីការបង្កឱកាសស៊ុតបញ្ចូលទីបានសម្រេច។ កីឡាករ 3 រូបដែលបង្កើតឱកាសស៊ុតបញ្ចូលទីបានជោគជ័យច្រើនជាងគេបំផុតនៅ AFF Cup 2022 គឺបានទៅលើក្រុមថៃ រួមមានកីឡាករ Theerathon, Teerasil និង Ekanit Panya។ កីឡាករ 3 រូបដែលស៊ុតផ្ដាច់បានច្រើនជាងគេបង្អស់គិតត្រឹមវគ្គពាក់កណ្ដាលផ្ដាច់ព្រ័ត្រក៏បានទៅលើក្រុមជម្រើសជាតិថៃ ក្នុងនោះដែរ Teerasil មានរហូតដល់ 21 លើក ច្រើនជាងទ្វេដងធៀបនឹង Bordin Phala និង Peeradol Chamrasamee។

ក្រៅពីនេះ ក្រុមថៃក៏មានការបញ្ជូនបាល់ 3,480 លើក, អត្រានៃការបញ្ចូលបាល់បានល្អ 87%, ស៊ុតផ្ដាច់បាន 128 លើក, ស៊ុតចំគោលដៅ 45 លើក, ទទួលបានបាល់ពិន័យជ្រុង 40 លើក និងបាល់ប៉េណាំទីចំនួន 3 គ្រាប់។ នេះគឺជាសន្ទស្សន៍ល្អបំផុតសម្រាប់ក្រុមបាល់ទាត់ជម្រើសជាតិមួយនៅ AFF Cup 2022។

ចំណែកក្រុមជម្រើសជាតិវៀតណាមវិញ មកដល់បច្ចុប្បន្ន គឺជាក្រុមតែមួយគត់ក្នុងប្រវត្តិសាស្ត្រ AFF Cup ដែលឡើងដល់វគ្គផ្ដាច់ព្រ័ត្រដោយមិនមានក្រុមណាមួយអាចស៊ុតបញ្ចូលទីរបស់ពួកគេបាន។ អ្នកចាំទីរបស់វៀតណាម Dang Van Lam ក៏ជាកីឡាករដែលរក្សាទីបាន «ស្អាត» ជាងគេ ក្នុង 6 ប្រកួត (540 នាទីផ្លូវការ) របស់ពានរង្វាន់នេះ។

ការប្រកួតជើងទីមួយនៃវគ្គផ្ដាច់ព្រ័ត្ររបស់ AFF Cup 2022 រវាងវៀតណាម និងថៃ នៅឯកីឡដ្ឋាន My Dinh ក្នុងរដ្ឋធានីហាណូយ នឹងធ្វើឡើងនៅម៉ោង 19 និង 30 នាទី ថ្ងៃទី 13 មករា 2023៕

January 12, 2023

ក្រសួងសាធារណការ ស្នើឱ្យក្រុមហ៊ុនឯកជនសិក្សាពីលទ្ធភាពស្ថាបនាផ្លូវរថភ្លើងល្បឿនលឿននៅកម្ពុជា

រដ្ឋលេខាធិការប្រចាំការនៃ ក្រសួងសាធារណការ និងដឹកជញ្ជូន បានស្នើឱ្យក្រុមហ៊ុន NIPPON KOEI សិក្សាពីលទ្ធភាពស្ថាបនាផ្លូវរថភ្លើងល្បឿនលឿននៅ ភ្នំពេញ ក្នុងឱកាសអញ្ជើញទទួលជួបពិភាក្សាការងារជាមួយតំណាងក្រុមហ៊ុន NIPPON KOEI កាលពីដើមសប្ដាហ៍នេះ។

ឯកឧត្តម តូច ចាន់កុសល រដ្ឋលេខាធិការប្រចាំការ ក្រសួងសាធារណការ និងដឹកជញ្ជូន កាលពីថ្ងៃទី 09 មករា 2023 បានអញ្ជើញទទួលជួបក្រុមការងាររបស់ក្រុមហ៊ុន NIPPON KOEI ដែលដឹកនាំដោយលោក Hirotoshi SUZIKI ដើម្បីស្វែងយល់អំពីបទបង្ហាញរបស់ក្រុមហ៊ុន NIPPON KOEI ទាក់ទងនឹងគម្រោងកែលម្អប្រពន្ធ័ដឹកជញ្ជូនអ្នកដំណើរតាមរថភ្លើងនៅតាមតំបន់ចំនួនបីនៃផ្លូវដែកភាគខាងជើងរបស់កម្ពុជា ដែលរួមមាន បាត់ដំបង សិរីសោភ័ណ និងប៉ោយប៉ែត។

ក្នុងឱកាសនោះដែរ ឯកឧត្តម តូច ចាន់កុសល បានស្នើឱ្យក្រុមហ៊ុន NIPPON KOEI ពិនិត្យលទ្ធភាពលើការសិក្សាគម្រោងផ្លូវរថភ្លើងក្នុងទីក្រុងភ្នំពេញ។ ផ្លូវរថភ្លើងល្បឿនលឿនក្នុងក្រុង បច្ចុប្បន្នមានការពេញនិយមនៅបរតេស ដោយសារវាមានតម្លៃទាប ងាយស្រួលក្នុងការវិនិយោគ បើធៀបនឹងប្រព័ន្ធប្រតិបត្តិការរថភ្លើងស្វ័យប្រវត្តិ (AGT)។

យោងតាម ក្រសួងសាធារណការ និងដឹកជញ្ជូន ក្រុមហ៊ុន NIPPON KOEI ទទួលបានការគាំទ្រពីសមាគមសហប្រតិបត្តិការដឹកជញ្ជូនជប៉ុន (JTCA – Japan Transport Cooperative Association) ជាអង្គភាពសហប្រតិបត្តិការអន្តរជាតិតែមួយគត់របស់ប្រទេសជប៉ុន ដែលផ្តោតជាសំខាន់លើអភិវឌ្ឍន៍ហេដ្ឋារចនាសម្ព័ន្ធដឹកជញ្ជូន៕

January 12, 2023

ជិះយានជំនិះប្រភេទថ្មីនេះ អ្នកមិនបាច់ចេញពីកាប៊ីន តាំងពីបរលើដី ហោះលើអាកាស និងជូនដល់ផ្ទះ

(សហរដ្ឋអាម៉េរិក) – ក្រុមហ៊ុន Node Air កំពុងអភិវឌ្ឍមធ្យោបាយដឹកជញ្ជូនមួយដែលរួមផ្សំរវាងផ្លូវគោក និងផ្លូវអាកាស ហើយមានកាប៊ីនសម្រាប់ដឹកភ្ញៀវ អាចដោះចេញបាន។

ក្រុមហ៊ុន Node Air ដែលមានទីស្នាក់ការនៅ Florida សហរដ្ឋអាម៉េរិក កំពុងសហការជាមួយ JetX ដើម្បីអភិវឌ្ឍមធ្យោបាយដឹកជញ្ជូនទម្រង់ module ថ្មី ដែលបំពាក់ប្រព័ន្ធរុញច្រាន vector។

ក្នុងមធ្យោបាយដឹកជញ្ជូននេះ កាប៊ីនរបស់វានឹងធ្វើដំណើរទៅទទួលអតិថិជនដល់ផ្ទះរបស់ពួកគេ។ កាប៊ីននេះស្ថិតនៅលើគ្រោងទម្រដែលដំណើរការដោយថាមពលអគ្គិសនីដែលមានថ្មដោយឡែក និងមានម៉ូទ័រ អង្គញាណ ប្រព័ន្ធកាច់ចង្កូត និងប្រព័ន្ធបញ្ជាសមស្រប។ វានឹងដឹកភ្ញៀវទៅដល់កន្លែងត្រូវហោះឡើង ជាទីដែលមានយន្តហោះដ្រូនគ្មានមនុស្សបើកកំពុងរង់ចាំជាស្រេច។ ប្រព័ន្ធទម្រនឹងខ្ជាក់កាប៊ីននោះចេញ ហើយយន្តហោះដ្រូនដែលនៅពីលើនោះនឹងចាប់យកកាប៊ីនដែលមានភ្ញៀវនៅខាងក្នុងពីអាកាស មុនពេលចេញដំណើរ។

ដោយមានបំពាក់បណ្ដុំថ្មផ្ទុកអគ្គិសនីដោយឡែក យានជំនិះនេះនឹងដឹកភ្ញៀវទៅដល់កន្លែងចុះចត រួចទម្លាក់កាប៊ីនដឹកភ្ញៀវទៅលើប្រព័ន្ធទម្រមួយផ្សេងទៀតដើម្បីដឹកភ្ញៀវទៅកាន់គោលដៅ។ នៅក្នុងការធ្វើដំណើរនេះ អតិថិជនមិនចាំបាច់ចេញពីកាប៊ីនឡើយ។

ម៉ូឌុលនានារបស់ប្រព័ន្ធដឹកជញ្ជូននេះក៏អាចដឹកជញ្ជូនដោយមធ្យោបាយស្តង់ដា មានដូចជា រថភ្លើង ឬកប៉ាល់ជាដើម ចំពោះការធ្វើដំណើររយៈចម្ងាយឆ្ងាយ។

ក្រុមហ៊ុន JetX ដែលជាដៃគូសហការរបស់ Node Air កំពុងអភិវឌ្ឍបច្ចេកវិទ្យារុញច្រាន vector ដែលជួយឱ្យយានជំនិះមិនចាំបាច់ផ្អៀងខ្លួនពេលប្ដូរទិសក្នុងពេលហោះហើរ ដោយវានឹងប្រើប្រាស់ប្រព័ន្ធបែងចែកលំហូរខ្យល់ដែលមានស្លាប់ ឬមិនមានស្លាប។

ទោះជាយ៉ាងណាក៏ដោយ ប្រព័ន្ធយានជំនិះប្រភេទម៉ូឌុលនេះ បច្ចុប្បន្នស្ថិតក្នុងដំណាក់កាលរៀបចំរចនារូបរាង ហើយ Node Air ក៏មិនទាន់បង្ហើបឱ្យដឹងអំពីដំណាក់កាលសាកល្បងនៅឡើយ៕

January 12, 2023

AFF ចេញសេចក្ដីព្រមានសំខាន់បំផុតសម្រាប់ក្រុមជម្រើសជាតិថៃ និងវៀតណាម នៅវគ្គផ្ដាច់ព្រ័ត្រ

សហព័ន្ធបាល់ទាត់អាស៊ីអាគ្នេយ៍ (AFF) ចេញសេចក្ដីព្រមានកម្រិតខ្ពស់ ទៅកាន់កីឡាករ និងគ្រូបង្វឹករបស់ក្រុមជម្រើសជាតិថៃ និងវៀតណាម នៅវគ្គផ្ដាច់ព្រ័ត្រ AFF Cup 2022 (AFF Mitsubishi Electric Cup 2022)។

នៅសល់មួយថ្ងៃទៀតប៉ុណ្ណោះ ការប្រកួតវគ្គផ្ដាច់ព្រ័ត្ររវាងក្រុមជម្រើសជាតិថៃ និងវៀតណាម នៅ AFF Cup 2022 នឹងត្រូវបានធ្វើឡើង។ ការប្រកួតជើងទីមួយរវាងក្រុមទាំងពីរនឹងធ្វើឡើងនៅថ្ងៃទី 13 មករា 2023 លើវាលស្មៅរបស់កីឡដ្ឋាន My Dinh នៅវៀតណាម ហើយ 3 ថ្ងៃក្រោយមក គឺនៅថ្ងៃទី 16 មករា ការប្រកួតជើងទីពីរនឹងធ្វើឡើងនៅឯកីឡដ្ឋាន Thammasat របស់ថៃ។

នេះគឺជាលើកដំបូងក្រោយរយៈពេល 14 ឆ្នាំ ដែលអ្នកគាំទ្រនឹងបានទស្សនាការប្រកួតវគ្គផ្ដាច់ព្រ័ត្ររវាងថៃ និងវៀតណាម នៅ AFF Cup។ ឆ្នាំ 2008 ក្រុមជម្រើសជាតិវៀតណាម បានផ្ដួលថៃដោយលទ្ធផល 3-2 ដែលជួយឱ្យវៀតណាមដណ្ដើមបានជើងឯកជាលើកដំបូងនៅ AFF Cup។

មុនថ្ងៃប្រកួតវគ្គផ្ដាច់ព្រ័ត្រ នៅ AFF Cup 2022 ក្រុមវៀតណាម និងថៃ សុទ្ធតែកំពុងរៀបចំយុទ្ធសាស្ត្រយ៉ាងម៉ត់ចត់។ អ្វីដែលគួរឱ្យចាប់អារម្មណ៍ជាងគេគឺថា ក្រុមទាំងពីរនឹងត្រូវប្រកួតយ៉ាងប្រុងប្រយ័ត្ន ក្រោយពីមានការព្រមានថ្មីបំផុតពីសហព័ន្ធបាល់ទាត់អាស៊ីអាគ្នេយ៍ (AFF)។

ថ្មីៗនេះ AFF បានប្រកាសព័ត៌មានស្ដីពីការពិន័យនានាសម្រាប់ក្រុមដែលនឹងចូលប្រកួតវគ្គផ្ដាច់ព្រ័ត្រនៅ AFF Cup 2022។ ជាក់ស្ដែង ក្រុមថៃ និងវៀតណាម កំពុងមានកីឡាករ និងគ្រូបង្វឹកសរុប 10 នាក់ ប្រឈមនឹងហានិភ័យអវត្តមាននៅក្នុងការប្រកួតដណ្ដើមតំណែងជើងឯកនៅថ្ងៃទី 16 មករា។

ក្នុងចំណោម 10 នាក់ខាងលើ ក្រុមថៃ មានកីឡាករ 5 នាក់ និងគ្រូបង្វឹក Mano Polking ផងដែរ ដែលបានទទួលកាត់លឿងនៅវគ្គពាក់កណ្ដាលផ្ដាច់ព្រ័ត្រ ខណៈដែលវៀតណាម មានកីឡាករ 4 នាក់បានទទួលកាត់លឿង។

ដោយសារតែ AFF Cup 2022 បន្តអនុវត្តលក្ខន្តិកៈ «បូកសរុបកាតពិន័យចាប់ពីវគ្គពាក់កណ្ដាលផ្ដាច់ព្រ័ត្រ» កីឡាករ និងគ្រូបង្វឹកទាំង 10 រូបខាងលើ នឹងត្រូវបានបញ្ឈរជើង ឬហាមដឹកនាំក្រុមនៅវគ្គផ្ដាច់ព្រ័ត្រជើងទីពីរដែលនឹងប្រកួតនៅថ្ងៃទី 16 មករាខាងមុខ បើសិនទទួលបានកាតលឿង 1 ទៀតក្នុងការប្រកួតជើងទីមួយនៅកីឡដ្ឋាន My Dinh របស់វៀតណាម នៅថ្ងៃទី 13 មករា។

នេះគឺជាប្រការសំខាន់បំផុតរបស់ក្រុមជម្រើសជាតិថៃ និងវៀតណាម នៅវគ្គផ្ដាច់ព្រ័ត្រ។ អវត្តមានកីឡាករ ឬគ្រូបង្វឹកណាម្នាក់ ក៏នឹងប៉ះពាល់យ៉ាងធ្ងន់ធ្ងរដល់ក្រុមរបស់ពួកគេ ដូច្នេះ កីឡាកររបស់ក្រុមទាំងពីរ និងគ្រូបង្វឹក Polking សុទ្ធតែត្រូវប្រុងប្រយ័ត្នជាទីបំផុត។

ជើងទីមួយនៃវគ្គផ្ដាច់ព្រ័ត្ររបស់ AFF Cup 2022 នឹងត្រូវប្រកួតនៅវេលាម៉ោង 19 និង 30 នាទី ថ្ងៃទី 13 មករា 2023៕

January 12, 2023

ប្រធានាធិបតី ហ្សែនឡែនស្គី៖ ច្បាស់ហើយថា ភាគីណាជាអ្នកឈ្នះសង្គ្រាមនៅអ៊ុយក្រែន

ប្រធានាធិបតីអ៊ុយក្រែន លោក ហ្សែនឡែនស្គី អះអាងថា បានដឹងច្បាស់ហើយថាខាងណាជាអ្នកឈ្នះសង្គ្រាមនៅ អ៊ុយក្រែន ហើយយល់ថា សង្គ្រាមលោកលើកទីបីនឹងមិនអាចកើតឡើង។

«ពេលនេះជាឆ្នាំ 2023 សង្គ្រាមនៅ អ៊ុយក្រែន នៅតែមិនទាន់បានបញ្ចប់ ប៉ុន្តែស្ថានការណ៍បានប្រែប្រួល ហើយខាងណាជាអ្នកដណ្ដើមបានជ័យជម្នះក៏បានច្បាស់ហើយដែរ» ប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡែនស្គី អះអាងនៅក្នុងសេចក្ដីថ្លែងការណ៍ដែលបានចាក់ផ្សាយក្នុងព្រឹត្តិការណ៍ប្រគល់ពានរង្វាន់ផែនដីមាស (Golden Globes) នៅ សហរដ្ឋអាម៉េរិក កាលពីថ្ងៃទី 10 មករា។

លោក ហ្សេឡែនស្គី ហាក់ជឿជាក់ថា កងកម្លាំងរបស់អ៊ុយក្រែន ដណ្ដើមបានជ័យជម្នះលើរុស្ស៊ី ដែលទំនងជាចង់និយាយអំពីការវាយបកដ៏ខ្លាំងក្លារបស់ ទីក្រុងកៀវ កាលពីពេលថ្មីៗនេះដែលបានជួយឱ្យពួកគេរំដោះបានតំបន់ជាច្រើនដែលកន្លងមកធ្លាប់ត្រូវបានកាន់កាប់ដោយទីក្រុងមូស្គូ។

មេដឹកនាំអ៊ុយក្រែន បន្តថា នឹងមិនមានសង្គ្រាមលោកលើកទីបីឡើយ បន្ទាប់ពីបានលើកឡើងថា សង្គ្រាមលោកលើកទីមួយបានសម្លាប់មនុស្សរាប់លាននាក់ និងសង្គ្រាមលោកលើកទីពីរក៏បានធ្វើឱ្យមនុស្សរាប់សិបលាននាក់បាត់បង់ជីវិត។

លោក ហ្សេឡែនស្គី ក៏បានថ្លែងអំណរគុណដល់អ្នកទាំងឡាយដែលគាំទ្រសេរីភាពសម្រាប់ អ៊ុយក្រែន និងហៅប្រការនោះថាជា «ការប្រយុទ្ធរួមរបស់យើងដើម្បីសេរីភាព ប្រជាធិបតេយ្យ ដើម្បីសិទ្ធិរស់រានមានជីវិត សិទ្ធិស្រលាញ់គ្នា»។

លោក ហ្សេឡែនស្គី បានថ្លែងការណ៍នៅក្នុងព្រឹត្តិការណ៍វប្បធម៌មួយចំនួនដើម្បីប្រមូលការគាំទ្រសម្រាប់អ៊ុយក្រែន។ កាលពីឆ្នាំមុន មេដឹកនាំអ៊ុយក្រែនក៏បានបង្ហាញវត្តមាននៅក្នុងព្រឹត្តិការណ៍ប្រគល់រង្វាន់ Grammy ផងដែរ។ ក៏ប៉ុន្តែ ភាគីខាង Oscar វិញ បានបដិសេធសំណើដើម្បីឱ្យលោក ហ្សេឡែនស្គី ធ្វើសេចក្ដីថ្លែងការណ៍។

សង្គ្រាមនៅអ៊ុយក្រែន បានឈានចូលដល់ខែទី 11 ហើយប្រទេសនេះបានទទួលការគាំទ្រយ៉ាងសកម្មពីបណ្ដាប្រទេសលោកខាងលិច។ សារព័ត៌មានរុស្ស៊ី TASS បានឱ្យដឹងថា ជំនួយផ្នែកយោធាសរុបរបស់លោកខាងលិចសម្រាប់អ៊ុយក្រែន ចាប់ពីចុងខែកុម្ភៈ 2022 ដល់បច្ចុប្បន្ន គឺជិតស្មើនឹង 95% នៃកញ្ចប់ថវិកាការពារជាតិរបស់រុស្ស៊ី ក្នុងឆ្នាំ 2021៕

January 12, 2023

វគ្គផ្ដាច់ព្រ័ត្រ AFF Cup 2022 – ទិដ្ឋភាពក្រុមជម្រើសជាតិថៃ នៅអាកាសយានដ្ឋានវៀតណាម

(ហាណូយ)- កីឡាករលេខមួយ Teerasil Dangda ដែលបានរងរបួសកាលពីប៉ុន្មានថ្ងៃមុន ពេលនេះរួមដំណើរជាមួយក្រុមជម្រើសជាតិថៃ បានទៅដល់ហាណូយ ប្រទេសវៀតណាម ដើម្បីទាត់វគ្គផ្ដាច់ព្រ័ត្រជើងទីមួយរបស់ AFF Cup 2022 ដែលត្រូវប៉ះនឹងក្រុមជម្រើសជាតិវៀតណាម។

Teerasil Dangda ដើរធម្មតានៅពេលរួមដំណើរជាមួយក្រុមជម្រើសជាតិថៃ ចុះចតនៅអាកាសយានដ្ឋាន Noi Bai កាលពីល្ងាចថ្ងៃទី 11 មករា។ កីឡាករលេខមួយរបស់ថៃរូបនេះ បានរងរបួសក្នុងការប្រកួតឈ្នះម៉ាឡេស៊ី 3-0 កាលពីព្រលប់ថ្ងៃទី 10 មករា។ Teerasil Dangda ត្រូវបាននាំទៅមន្ទីរពេទ្យ ប៉ុន្តែភាគីថៃមិនបានបង្ហើបឱ្យដឹងអំពីព័ត៌មានលម្អិតស្ដីពីរបួសនោះទេ។

Teerasil Dangda កើតឆ្នាំ 1988 កំពុងនាំមុខគេក្នុងបញ្ជីចំណាក់ថ្នាក់ស្ដេចកម្ទេចសំណាញ់នៅ AFF Cup 2022 ដោយរកបាន 6 គ្រាប់ ច្រើនជាង 1 គ្រាប់ ធៀបនឹង Nguyen Tien Linh របស់វៀតណាម។ Teerasil Dangda គឺជាកីឡាករតែម្នាក់គត់នៅក្នុងការប្រកួតវគ្គផ្ដាច់ព្រ័ត្រ AFF Cup 2008 រវាងថៃ និងវៀតណាម ដែលនៅមានវត្តមានក្នុងវគ្គផ្ដាច់ព្រ័ត្រលើកនេះ។ កាលណោះ Teerasil Dangda រកបាន 1 គ្រាប់ ប៉ុន្តែ ថៃបានចាញ់ 2-3 ក្រោយការប្រកួតពីរជើង។

ក្រុមជម្រើសជាតិថៃ ជិះយន្តហោះពីរគ្រឿងទៅកាន់ហាណូយ ដោយសារមិនមានកៅអីគ្រប់គ្រាន់។ ប៉ុន្តែ ព្រោះតែយន្តហោះមួយគ្រឿងត្រូវចេញដំណើរយឺត ដូច្នេះពួកគេហាក់មានវត្តមានស្របគ្នានៅអាកាសយានដ្ឋាន Noi Bai នៅវេលាម៉ោងប្រហែលពី 18 និង 25 នាទី ទៅ 18 និង 30 នាទី។

គ្រូបង្វឹកជនជាតិប្រេស៊ីល Mano Polking របស់ក្រុមជម្រើសជាតិថៃ ក៏បង្កការចាប់អារម្មណ៍ពេលទៅដល់ Noi Bai។ គ្រូបង្វឹករូបនេះធ្លាប់ធ្វើការនៅវៀតណាម ដោយបានដឹកនាំក្លឹបទីក្រុង HCM ពីឆ្នាំ 2020 ដល់ 2021។

ម៉ោងប្រហែល 20 ក្រុមកីឡាករថៃ បានចេញពីតំបន់ទទួលអីវ៉ាន់ ទៅកាន់រថយន្ត។ គ្រូបង្វឹក Mano Polking គឺជាអ្នកដែលបានចាកចេញពីអាកាសយានដ្ឋានក្រោយគេ។

ក្រុមថៃ ចំណាយពេល 40 នាទីក្នុងការធ្វើដំណើរទៅកាន់សណ្ឋាគារ Hyatt ដែលមានចម្ងាយពីកីឡដ្ឋាន My Dinh ប្រហែល 5 នាទី បើជិតរថយន្តក្រុង។ ទីនេះក៏ជាកន្លែងស្នាក់នៅរបស់ក្រុមឥណ្ឌូណេស៊ី ពេលធ្វើជាភ្ញៀវនៅវៀតណាម៕

January 12, 2023

Author: សឿន សំណាង