សឿន សំណាង - La Reine Media

ក្លឹបបាល់ទាត់ PSG រៀបគម្រោងទិញកីឡដ្ឋានធំជាងគេនៅប្រទេសបារាំង

ដោយសារតែបរាជ័យក្នុងការទិញកីឡដ្ឋាន Le Parc des Princes ក្លឹប PSG បច្ចុប្បន្នកំពុងព្យាយាមក្នុងការកែប្រែកីឡដ្ឋានជាតិបារាំង Stade de France ឱ្យទៅជាទីលានផ្ទាល់ខ្លួនរបស់ពួកគេ។

ចាប់តាំងពីបានបង្កើតឡើងកាលពីឆ្នាំ 1970 ក្លឹប PSG តែងតែផ្សារភ្ជាប់ជាមួយនឹងកីឡដ្ឋាន Le Parc des Princes ហើយនៅទីនេះមានអនុស្សាវរីយ៍ជាច្រើនរបស់ក្លឹបបាល់ទាត់រដ្ឋធានីបារីស។

កាលពីឆ្នាំ 2011 ប្រធាន Nasser Al Khelaifi រួមនឹងមូលនិធិជាតិកាតា Qatar Investment Authority បានទទួលជោគជ័យក្នុងការក្ដោបក្ដាប់ក្លឹប PSG។ ប្រវត្តិរបស់ក្រុមបាល់ទាត់នេះបានឈានចូលដល់ទំព័រថ្មី ដោយក្លាយជាក្លឹបដ៏ខ្លាំងក្លាលំដាប់កំពូលនៅប្រទេសបារាំង និងអឺរ៉ុប។

ក្លឹប PSG បានចំណាយប្រាក់ 85 លានអឺរ៉ូក្នុងការលើកកម្ពស់គុណភាពរបស់កីឡដ្ឋាន Le Parc des Princes ក្នុងរយៈពេលច្រើនឆ្នាំកន្លង។ ហើយក្នុងពេលខាងមុខ PSG គ្រោងនឹងចំណាយ 500 លានអឺរ៉ូដើម្បីស្ដារគុណភាព និងពង្រីកកីឡដ្ឋាននេះ។

ក៏ប៉ុន្តែ ការសម្រេចចិត្តដកខ្លួនពីការសន្យាលក់ Le Parc des Princes ឱ្យ PSG ដ៏គួរឱ្យភ្ញាក់ផ្អើលរបស់អភិបាលក្រុងបារីស លោកស្រី Anne Hidalgo បាននាំឱ្យ PSG ប្រឈមនឹងហានិភ័យមិនមានកីឡដ្ឋានផ្ទាល់ខ្លួននាពេលខាងមុខ។ តាមពិត Le Parc des Princes មិនមែនជាកម្មសិទ្ធិរបស់ PSG ឡើយ ប៉ុន្តែគឺជាកម្មសិទ្ធិរបស់អាជ្ញាធររដ្ឋធានីបារីស។

បើទោះជា PSG ព្យាយាមចរចាជាមួយលោកស្រី Anne Hidalgo ប៉ុន្តែគ្រប់យ៉ាងបានបរាជ័យ។ ពេលនេះ ថ្នាក់ដឹកនាំរបស់ PSG ត្រូវបង្ខំចិត្តដាក់ផែនការរកកីឡដ្ឋានមួយផ្សេងទៀតដើម្បីជំនួស Le Parc des Princes។

កីឡដ្ឋានបាល់ទាត់ដែលត្រូវបានប្រធាន Nasser Al Khelaifi ចាប់អារម្មណ៍ខ្លាំងគឺ Stade de France ដែលជាពហុកីឡដ្ឋានជាតិបារាំង។ កីឡដ្ឋាននេះអាចដាក់មនុស្សបាន 81,000 នាក់ (ឈរលេខមួយនៅបារាំងស្ដីពីកម្លាំងផ្ទុក)។ Stade de France គឺជាកម្មសិទ្ធិរបស់រដ្ឋាភិបាលបារាំង ហើយបច្ចុប្បន្នកំពុងត្រូវបានពពាយនាយលក់។

ក្នុងករណីមិនអាចទិញបាន Stade de France ក្លឹប PSG នឹងត្រូវចាកចេញពីរដ្ឋធានីបារីស និងស្វែងរកកីឡដ្ឋានផ្សេងទៀតដែលសមស្រប៕

ពហុកីឡដ្ឋាន Stade de France គឺជាកម្មសិទ្ធិរបស់រដ្ឋាភិបាលបារាំង

January 18, 2023

គ្រោះថ្នាក់អាកាសចរណ៍ដែលសម្លាប់មនុស្សច្រើនជាងគេក្នុងប្រវត្តិសាស្ត្រ

យន្តហោះបុកគ្នានៅលើផ្លូវរត់ កំហុសផ្នែកទំនាក់ទំនង ឬកំហុសផ្នែកបច្ចេកទេសគឺជាមូលហេតុចម្បងដែលបណ្ដាលឱ្យមានគ្រោះថ្នាក់អាកាសចរណ៍សម្លាប់មនុស្សច្រើនពាន់នាក់ក្នុងប្រវត្តិសាស្ត្រ។

1-ករណីយន្តហោះ Boeing 747 ពីរគ្រឿងប៉ះគ្នានៅ Tenerife ប្រទេសអេស្ប៉ាញកាលពីថ្ងៃទី 27 មីនា 1977 គឺជាគ្រោះថ្នាក់យន្តហោះដែលបានសម្លាប់មនុស្សច្រើនជាងគេក្នុងប្រវត្តិសាស្ត្រអាកាសចរណ៍របស់ពិភពលោក។

ដោយសារតែកំហុសផ្នែកទំនាក់ទំនង យន្តហោះ KLM 4805 កំពុងផ្លាស់ទីលើផ្លូវរត់ដើម្បីត្រៀមហោះឡើង ស្រាប់តែបានប៉ះនឹង Pan Am 1736 ដែលជាយន្តហោះកំពុងស្ថិតនៅលើផ្លូវរត់ដូចគ្នា។ គ្រោះថ្នាក់យន្តហោះដែលកើតឡើងដោយសារមេឃចុះអ័ព្ទក្រាស់នេះបានសម្លាប់មនុស្ស 583 នាក់ ខណៈ 61 នាក់ផ្សេងទៀតបានរួចពីការស្លាប់។

2-យន្តហោះ Boeing 747 របស់ក្រុមហ៊ុន Japan Airlines កំពុងហោះហើរក៏ជួបនឹងឧបទ្ទវហេតុកាលពីថ្ងៃទី 12 សីហា 1985 នៅជប៉ុន។

កំហុសបច្ចេកទេសត្រង់ជញ្ជាំងទប់សម្ពោធនៅខាងក្រោយយន្តហោះ បណ្ដាលឱ្យកន្ទុយរបស់វាត្រូវបាក់ នាំឱ្យយន្តហោះធ្លាក់ទៅបុកភ្នំ Takamagahara។ គ្រោះថ្នាក់នេះបានសម្លាប់មនុស្ស 520 នាក់ និង 4 នាក់រួចពីការស្លាប់។

3-ករណីប៉ះគ្នាលើអាកាសនៅភូមិ Charkhi Dadri ប្រទេសឥណ្ឌា កាលពីថ្ងៃទី 12 វិច្ឆិកា 1996 រវាងយន្តហោះ Boeing 747 របស់ក្រុមហ៊ុន Saudi Arabian Airlines និង Ilyushin II-76 របស់ក្រុមហ៊ុន Kazakhstan Airlines។

មូលហេតុត្រូវបានគេដឹងថា ដោយសារអ្នកបើកបររបស់ Kazakhstan Airlines មិនបានរក្សាកម្ពស់ឱ្យបានច្បាស់ព្រោះតែបញ្ហានៅពេលទំនាក់ទំនងជាមួយបុគ្គលិកគ្រប់គ្រងជើងហោះហើរ។ ឧបទ្ទវហេតុនេះបានសម្លាប់មនុស្ស 349 នាក់ដែលនៅលើយន្តហោះទាំងពីរ។

ក្រៅពីនេះ នៅមានករណីគ្រោះថ្នាក់យន្តហោះជាច្រើនទៀតដែលបានសម្លាប់មនុស្សរាប់រយនាក់/ករណី រួមមាន ៖

4-ករណីយន្តហោះ McDonnell Douglas DC-10 របស់ក្រុមហ៊ុនអាកាសចរណ៍តួកគី ធ្លាក់នៅប្រទេសបារាំង កាលពីថ្ងៃទី 03 មីនា 1974 បានសម្លាប់មនុស្ស 346 នាក់។

5-យន្តហោះក្រុមហ៊ុនឥណ្ឌា Air India 182 កាលពីថ្ងៃទី 23 មិថុនា 1985 ក៏មានហេតុការណ៍បំផ្ទុះគ្រាប់បែកនៅលើអាកាស បណ្ដាលឱ្យយន្តហោះធ្លាក់ចូលមហាសមុទ្រអាត្លង់ទិក សម្លាប់មនុស្ស 329 នាក់។

6-យន្តហោះ Saudi Arabian 163 កាលពីថ្ងៃទី 19 សីហា 1980 បានឆាបឆេះនៅពេលហោះឡើង និងបានធ្លាក់ សម្លាប់មនុស្ស 301 នាក់។

7-យន្តហោះ MH17 របស់ Malaysia Airlines ត្រូវបានគេសង្ស័យថា ត្រូវរុស្ស៊ីបាញ់ទម្លាក់កាលពីថ្ងៃទី 17 កក្កដា 2014 ពេលហោះឆ្លងភាគខាងកើតប្រទេសអ៊ុយក្រែន បណ្ដាលឱ្យមនុស្ស 298 នាក់បាត់បង់ជីវិត។

8-យន្តហោះ Iran Air 655 របស់ Iran Air ត្រូវបាននាវាផ្ទុកយន្តហោះចម្បាំងអាម៉េរិក បាញ់ទម្លាក់កាលពីថ្ងៃទី 03 កក្កដា 1988 ក្នុងដែនអាកាសអ៊ីរ៉ង់ ក្នុងសម័យសង្គ្រាមអ៊ីរ៉ង់-អ៊ីរ៉ាក់ ដែលកាលណោះ អាម៉េរិកគឺជាអ្នកគាំទ្រអ៊ីរ៉ាក់៕

January 17, 2023

ទួរប៊ីនខ្យល់ផលិតអគ្គិសនីលើសមុទ្រកម្ពស់ស្មើនឹងអគារ 70 ជាន់របស់ក្រុមហ៊ុន MingYang

ក្រុមហ៊ុនចិន អភិវឌ្ឍទួរប៊ីនខ្យល់ដែលមានស្លាបកង្ហារវិលក្នុងផ្ទៃក្រឡាឡើងដល់ជាង 66,000 ម៉ែត្រក្រឡា និងអាចផលិតអគ្គិសនីបាន 80 GWh ជារៀងរាល់ឆ្នាំ។

កាលពីថ្ងៃទី 06 មករា ក្រុមហ៊ុនសាងសង់កប៉ាល់ចិន (CSSC) បានប្រកាសបង្ហាញទួរប៊ីនខ្យល់ (Wind turbine) H260 18MW យកឈ្នះលើ MySE 16.0-242 របស់ក្រុមហ៊ុន MingYang និងក្លាយជាទួរប៊ីនខ្យល់ធំជាងគេបង្អស់នៅលើពិភពលោក។ ក៏ប៉ុន្តែ ពេលនេះ MingYang បានវិលមករកការប្រកួត ដោយបង្ហើបឱ្យដឹងពីកំណែទួរប៊ីនខ្យល់ថ្មីដែលធំជាងឆ្ងាយ និងមានឈ្មោះថា MySE 18.X-28X ដោយមានកម្ពស់ប្រហាក់ប្រហែលនឹងអគារ 70 ជាន់ នេះបើតាម New Atlas ចុះផ្សាយកាលពីថ្ងៃទី 15 មករា 2023។

ក្នុងគ្រាដែល H260 18MW របស់ CSSC មានស្លាបកង្ហារប្រវែង 128 ម៉ែត្រ ទួរប៊ីនខ្យល់ MySE 18.X-28X របស់ MingYang នឹងមានកម្លាំងលើសពី 18 MW ដោយមានស្លាបកង្ហារប្រវែង 140 ម៉ែត្រ និងវិលក្នុងផ្ទៃក្រឡាឡើងដល់ 66,052 ម៉ែត្រការ៉េ។

ក្រុមហ៊ុន MinhYang ឱ្យដឹងថា ទួរប៊ីនខ្យល់ថ្មីនេះអាចទប់ទល់រាល់ស្ថានភាពអាកាសធាតុនៅលើសមុទ្រ រួមទាំងព្យុះធំដែលមានកម្លាំងខ្យល់លើសពី 202 គីឡូម៉ែត្រ/ម៉ោង។ ដោយមានខ្យល់លើសមុទ្រជាមធ្យម 30.6 គីឡូម៉ែត្រ/ម៉ោង ក្រុមហ៊ុននេះព្យាករថា ទួរប៊ីននេះនឹងផលិតអគ្គិសនីបាន 80 GWh ក្នុងមួយឆ្នាំៗ ដែលគ្រប់គ្រាន់សម្រាប់ផ្គត់ផ្គង់តាមតម្រូវការរបស់ប្រជាជន 96,000 នាក់។

មូលហេតុដែលនាំឱ្យបណ្ដាក្រុមហ៊ុននេះគ្នាផលិតទួរប៊ីនខ្យល់ធំៗ គឺដោយសារចង់កាត់បន្ថយការចំណាយក្នុងការសាងសង់។ MingYang ឱ្យដឹងថា «ធៀបនឹងការដំឡើងបណ្ដាទួរប៊ីនខ្យល់ 13 MW កម្លាំងរបស់ MySE18.X-28X នឹងជួយកាត់បន្ថយឧបករណ៍បាន 18 គ្រឿងនៅពេលសាងសង់ស្ថានីយផលិតអគ្គិសនីដើរដោយកម្លាំងខ្យល់ 1 GW។ នេះមានន័យថា កាត់បន្ថយការចំណាយក្នុងការសាងសង់បានប្រហែលពី 120,000 ទៅ 150,000 ដុល្លារ/MW»។ ដូច្នេះ គម្រោងមួយដែលផលិតអគ្គិសនីបាន 1 GW នឹងសំច័យប្រាក់បានពី 120 លានទៅ 150 លានដុល្លារអាម៉េរិក៕

January 17, 2023

ម្ចាស់ជើងឯក AFF Cup 2022 ទទួលបានប្រាក់រង្វាន់ប៉ុន្មានរៀល?

ក្រុមជម្រើសជាតិថៃ បានទទួលប្រាក់រង្វាន់យ៉ាងច្រើន គឺឡើងដល់ជាង 35 លានបាត ប្រហែលនឹង 4,353,000,000 រៀល បន្ទាប់ពីដណ្ដើមបានតំណែងជើងឯកនៅ AFF Cup 2022។

ការប្រកួតជើងទីពីរនៃវគ្គផ្ដាច់ព្រ័ត្រកាលពីព្រលប់ថ្ងៃទី 16 មករា នៅកីឡដ្ឋាន Thammasat ថៃបានផ្ដួលវៀតណាមដោយលទ្ធផល 1-0។ លទ្ធផលដែលនាំឱ្យថៃឈ្នះសរុប 3-2 ក្នុងវគ្គចុងក្រោយបានជួយឱ្យថៃក្លាយជាជើងឯកលើកលើកទី 7 នៅ AFF Cup បន្ទាប់ពីឆ្នាំ 1996, 2000, 2002, 2014, 2016 និង 2021។

ក្រោយពីការការពារជើងឯក AFF Cup បានជោគជ័យ ក្រុមកីឡាករបាល់ទាត់ជម្រើសជាតិថៃ បានទទួលប្រាក់រង្វាន់ធំ។ ក្រៅពី 10 លានបាត (302,000 ដុល្លារ) ពីសហព័ន្ធបាល់ទាត់អាស៊ីអាគ្នេយ៍ (AFF) ក្រុមថៃក៏ទទួលបានប្រាក់បន្ថែម 20 លានបាត (605,000 ដុល្លារ) ពីប្រធានប្រតិភូក្រុមថៃ លោកស្រី Nualphan Lamsam និង 5 លានបាត (151,000 ដុល្លារ) ពីប្រធានសហព័ន្ធបាល់ទាត់ថៃ លោក Somyot Boompanmuang ផងដែរ។

ជាសរុប Teerasil Dangda និងក្រុមកីឡាករថៃ បានទទួល 35 លានបាត (1,059,000 ដុល្លារអាម៉េរិក) សម្រាប់តំណែងជើងឯក AFF Cup 2022។ ខ្ទង់ប្រាក់នេះអាចនឹងកើនឡើងបន្ថែមទៀត បើសិនមានម្ចាស់ឧបត្ថម្ភដែលចង់លើកតម្កើងក្រុមជម្រើសជាតិ។

ក្រៅពីតំណែង និងកិត្តិនាមរួម ខ្សែប្រយុទ្ធថៃ Teerasil Dangda ក៏ទទួលបានតំណែង «ស្ដេចកម្ទេចសំណាញ់ទី» ដូចទៅនឹង Nguyen Tien Linh របស់វៀតណាម ដោយរកបាន 6 គ្រាប់ដូចគ្នា។ ចំណែកខ្សែបម្រើរបស់ថៃ Theerathon Bunmathan ក៏ទទួលបានតំណែង «កីឡាករឆ្នើមបំផុតនៅ AFF Cup 2022»៕

ខ្សែប្រយុទ្ធថៃ Teerasil Dangda ក៏ទទួលបានតំណែង «ស្ដេចកម្ទេចសំណាញ់ទី» ដូចទៅនឹង Nguyen Tien Linh របស់វៀតណាម ដោយរកបាន 6 គ្រាប់ដូចគ្នា

ខ្សែបម្រើរបស់ថៃ Theerathon Bunmathan ក៏ទទួលបានតំណែង «កីឡាករឆ្នើមបំផុតនៅ AFF Cup 2022»

ក្រុមជម្រើសជាតិថៃ បានទទួលប្រាក់រង្វាន់យ៉ាងច្រើន គឺឡើងដល់ជាង 35 លានបាត ប្រហែលនឹង 4,353,000,000 រៀល បន្ទាប់ពីដណ្ដើមបានតំណែងជើងឯកនៅ AFF Cup 2022

January 17, 2023

ប្រធានក្រុមកីឡាករវៀតណាមថា «ថៃក្លាយជាជើងឯក AFF Cup 2022 គឺស័ក្ដិសម»

(ប្រទេសថៃ) – ប្រធានក្រុមកីឡាករវៀតណាម Do Hung Dung ទទួលស្គាល់ថា ក្រុមជម្រើសជាតិថៃលេងបានល្អជាងនៅវគ្គផ្ដាច់ព្រ័ត្រជើងទីពីរ និងស័ក្ដិសមជាជើងឯក AFF Cup 2022។

ការប្រកួតនៅកីឡដ្ឋាន Thammasat កាលពីព្រលប់ថ្ងៃទី 16 មករា បានបញ្ចប់ដោយថៃឈ្នះវៀតណាម 1-0 នៅនាទីទី 24 នាំឱ្យវៀតណាមចាញ់សរុប 2-3 ក្នុងវគ្គផ្ដាច់ព្រ័ត្រ និងជួយឱ្យថៃក្លាយជាជើងឯក AFF Cup លើកទី 7។

ប្រធានក្រុមកីឡាករវៀតណាម Do Hung Dung និយាយថា «យើងចាញ់ ប៉ុន្តែត្រូវតែទទួលស្គាល់ថា ថៃគឺជាក្រុមខ្លាំង។ ពួកគេឈ្នះ និងដណ្ដើមបានពានរង្វាន់ជើងឯកគឺស័ក្ដិសម។ យើងបានលេងមួយប្រកួតដោយការខំប្រឹង និងមិនមានអ្វីត្រូវស្ដាយក្រោយឡើយនៅថ្ងៃនេះ»។

ប្រធានក្រុមកីឡាករវៀតណាម Do Hung Dung (លេខ 8)

ខុសពីការប្រកួតជើងទីមួយ នៅជើងទីពីរនេះ វៀតណាមមិនអាចបង្កឱកាសច្បាស់ៗណាមួយឡើង។ ចំណែកខាងថៃវិញ ក្រុមកីឡាករសហការគ្នាបានល្អនៅខ្សែកណ្ដាល។ នេះគឺជាបរាជ័យទីពីររបស់វៀតណាម ក្រោមសម័យគ្រូបង្វឹក Park Hang-seo នៅចំពោះមុខក្រុមជម្រើសជាតិថៃនៅ AFF Cup។ មុននោះ វៀតណាមបានចាញ់ 0-2 ក្នុងវគ្គពាក់កណ្ដាលផ្ដាច់ព្រ័ត្រជើងទីមួយកាលពីឆ្នាំ 2021។

ការប្រកួតវគ្គផ្ដច់ព្រ័ត្រជើងទីមួយរវាងថៃ និងវៀតណាម នៅ AFF Cup 2022

ការប្រកួតវគ្គផ្ដច់ព្រ័ត្រជើងទីពីររវាងថៃ និងវៀតណាម នៅ AFF Cup 2022

ជើងចុងក្រោយនៃវគ្គផ្ដាច់ព្រ័ត្រកាលពីម្សិលមិញក៏ជាការប្រកួតបិទបញ្ចប់វត្តមាន 5 ឆ្នាំរបស់គ្រូបង្វឹកជនជាតិកូរ៉េខាងត្បូង លោក Park Hang-seo នៅក្នុងក្រុមជម្រើសជាតិវៀតណាម។ កិច្ចសន្យារវាងលោក Park និងក្រុមវៀតណាម នឹងត្រូវអស់សុពលភាពចាប់ពីថ្ងៃទី 31 មករា 2023៕

January 17, 2023

ប្ដីប្រពន្ធជាពីឡុតមួយគូ «ស្លាប់ឃ្លាតពីគ្នា 16 ឆ្នាំក្នុងករណីធ្លាក់យន្តហោះនៅនេប៉ាល់»

Khatiwada ដែលជាអ្នកបើកបរយន្តហោះដឹកមនុស្ស 72 នាក់ និងបានជួបគ្រោះថ្នាក់ធ្លាក់យន្តហោះកាលពីថ្ងៃទី 15 មករា 2023 ក៏មានស្វាមីឈ្មោះ Pokhrel ជាពីឡុតម្នាក់ដែលបានស្លាប់ក្នុងហេតុការណ៍ធ្លាក់យន្តហោះកាលពីឆ្នាំ 2006។

ពីឡុតរង Anju Khatiwada កាលពីឆ្នាំ 2010 បានចូលធ្វើការឱ្យក្រុមហ៊ុនអាកាសចរណ៍ Yeti Airlines របស់នេប៉ាល់ ដើម្បីបន្តអាជីពជាអ្នកបើកបរយន្តហោះរបស់ស្វាមី Dipak Pokhrel ជាពីឡុតដែលបានស្លាប់ក្នុងគ្រោះថ្នាក់យន្តហោះកាលពីមុននោះ 4 ឆ្នាំ។

«ស្វាមីរបស់អ្នកស្រីបានស្លាប់កាលពីឆ្នាំ 2006 ក្នុងគ្រោះថ្នាក់យន្តហោះធុនតូច Twin Otter របស់ Yeti Airlines នៅ Jumla (ឃុំមួយរបស់ប្រទេសនេប៉ាល់)។ អ្នកស្រីបានចូលរួមកម្មវិធីបណ្ដុះបណ្ដាលពីឡុតដោយប្រើប្រាស់ប្រាក់ធានារ៉ាប់រងជីវិតរបស់ស្វាមី ក្រោយពីគាត់បានស្លាប់» Sudarshan Bartaula អ្នកនាំពាក្យរបស់ក្រុមហ៊ុន Yeti Airlines កាលពីថ្ងៃទី 16 មករា បានឱ្យដឹងដូច្នេះ។

យោងតាមសារព័ត៌មានរបស់នេប៉ា់ល់ Dipak Pokhrel គឺជាម្នាក់ក្នុងចំណោមមនុស្ស 10 នាក់ដែលបានស្លាប់នៅពេលយន្តហោះ Twin Otter បានធ្លាក់ក្នុងពេលកំពុងហោះហើរពី Nepalganj ទៅកាន់ Jumla កាលពីថ្ងៃទី 21 មិថុនា 2006។ Pokhrel ពេលនោះគឺជាពីឡុតរងនៅលើយន្តហោះដែលបានជួបគ្រោះថ្នាក់នោះ។

អ្នកស្រី Khatiwada ដែលជាភរិយារបស់សពអតីតអ្នកបើកបរយន្តហោះ Pokhrel កាលពីថ្ងៃទី 15 មករា គឺជាពីឡុតរងនៅលើយន្តហោះដឹកមនុស្ស 72 នាក់ របស់ក្រុមហ៊ុន Yeti Airlines ដូចគ្នា ដែលហោះពីរដ្ឋធានីកដ្ឋមណ្ឌូ ទៅកាន់ទីក្រុង Pokhara។ យន្តហោះនេះបានធ្លាក់មុនការចុះចតតែ 10 វិនាទីប៉ុណ្ណោះ។ ហេតុការណ៍ធ្លាក់យន្តហោះនេះបានសម្លាប់មនុស្សយ៉ាងតិច 68 នាក់ ខណៈជនរងគ្រោះក្រៅពីនេះក៏មិនមានសង្ឃឹមថានៅមានជីវិត។

ជើងហោះហើរកាលពីថ្ងៃទី 15 មករា 2023 គួរណាស់តែជាជើងហោះហើរចុងក្រោយរបស់ Khatiwada ក្នុងឋានៈជាពីឡុតរង មុនពេលអ្នកស្រីត្រូវបានដំឡើងឋានៈជាប្រធានពីឡុត។

ប្រអប់ខ្មៅចំនួនពីរត្រូវបានរកឃើញកាលពីថ្ងៃទី 16 មករា នឹងជួយឱ្យសមត្ថកិច្ចអាចរកឃើញមូលហេតុដែលនាំឱ្យកើតមានឧបទ្ទវហេតុធ្លាក់យន្តហោះនេះ។

នៅប្រទេសនេប៉ាល់ ចំនួនមនុស្សដែលបានស្លាប់ក្នុងករណីធ្លាក់យន្តហោះ និងឧទ្ធម្ភាគចក្រ បានកើនជិតដល់ 350 នាក់ រាប់ចាប់ពីឆ្នាំ 2000។ ឧបទ្ទវហេតុធ្លាក់យន្តហោះដែលរន្ធត់បំផុតនៅនេប៉ាល់ គឺករណីឆ្នាំ 1992 ដែលកាលណោះ មនុស្សទាំង 167 នាក់លើជើងហោះហើររបស់ក្រុមហ៊ុនអាកាសចរណ៍អន្តរជាតិប៉ាគីស្ថាន បានស្លាប់ពេលយន្តហោះធ្លាក់ក្នុងគ្រាត្រៀមចុះចតនៅកដ្ឋមណ្ឌូ៕

January 17, 2023

ក្រោយឈ្នះវៀតណាម 1-0 គ្រូបង្វឹក Polking ថា «ថៃតែងតែលេខមួយនៅអាស៊ីអាគ្នេយ៍»

(ប្រទេសថៃ) – គ្រូបង្វឹក Mono Polking អះអាងថា ថៃបានបញ្ជាក់អំពីឋានៈលេខមួយនៅអាស៊ីអាគ្នេយ៍ បន្ទាប់ពីបានផ្ដួលវៀតណាម និងក្លាយជាជើងឯក AFF Cup 2022។

«…យើងតែងតែលេខមួយ និងតែងតែឈានផុតពីអាស៊ីអាគ្នេយ៍។ ថៃត្រូវការបញ្ជាក់នៅក្នុងបណ្ដាពានធំជាងនេះ មានដូចជា Asian Cup ជាដើម ដែលមានគូប្រជែងខ្លាំងៗ មានជាអាទិ៍ ជប៉ុន កូរ៉េខាងត្បូង ឬ UAE» គ្រូបង្វឹកជនជាតិប្រេស៊ីលរបស់ក្រុមជម្រើសជាតិថៃ លោក Polking ថ្លែងដូច្នេះបន្ទាប់ពីបានយកឈ្នះវៀតណាម 1-0 ក្នុងការប្រកួតជើងចុងក្រោយនៃវគ្គផ្ដាច់ព្រ័ត្រ និងឈ្នះសរុប 3-2 នៅវគ្គផ្ដាច់ព្រ័ត្រនៅ AFF Cup 2022 កាលពីព្រលប់ម្សិលមិញ។

គ្រូបង្វឹករបស់ថៃនិយាយថា លោកមានកីឡាករឆ្នើមៗ និងលើកសរសើរចំពោះស្មារតីរបស់ក្រុមទាំងមូល។ ក្នុងការប្រកួតជើងចុងក្រោយនៃវគ្គផ្ដាច់ព្រ័ត្រ គ្រូបង្វឹក Polking រក្សាវត្តមានកីឡាករជម្រើសដំបូងទាំង 11 នាក់។ ថៃរកបាន 1 គ្រាប់ដំបូងក្នុងនាទីទី 24 ពេល Adisak Kraisorn បញ្ជូនបាល់ឱ្យ Theerathon Bunmathan ស៊ុតពីចម្ងាយ ផ្ដួលអ្នកចាំទីវៀតណាម Dang Van Lam នាំឱ្យពួកគេឈ្នះវៀតណាម 3-2 នៅវគ្គផ្ដាច់ព្រ័ត្រ។

ថៃឈ្នះវៀតណាម 3-2 នៅវគ្គផ្ដាច់ព្រ័ត្ររបស់ AFF Cup 2022

ជ័យជម្នះខាងលើ បានជួយឱ្យថៃក្លាយជាម្ចាស់ជើងឯក AFF Cup លើកទី 7 ក្រោយពីឆ្នាំ 1996, 2000, 2002, 2014, 2016 និង 2020។ នេះក៏ជាជើងឯកអាស៊ីអាគ្នេយ៍លើកទីពីររបស់គ្រូបង្វឹក Polking ផងដែរ។ គ្រូបង្វឹករូបនេះបានចូលដឹកនាំក្រុមជម្រើសជាតិថៃមុន AFF Cup 2020 មកដល់ និងបានជួយឱ្យថៃដណ្ដើមបានជើងឯក ក្រោយពីផ្ដួលវៀតណាមនៅវគ្គពាក់កណ្ដាលផ្ដាច់ព្រ័ត្រ និងឈ្នះឥណ្ឌូណេស៊ីនៅវគ្គផ្ដាច់ព្រ័ត្រ៕

January 17, 2023

AFF Cup 2022 – ដំណឹងសំខាន់ៗនៅមុនការប្រកួតវគ្គផ្ដាច់ព្រ័ត្រជើងចុងក្រោយរវាងថៃ និងវៀតណាម

ការប្រកួតរវាងថៃ និងវៀតណាម នៅវគ្គផ្ដាច់ព្រ័ត្រជើងដំបូងកាលពីថ្ងៃទី 13 មករា 2023 លើទីលានរបស់កីឡដ្ឋាន My Dinh នៅវៀតណាម ទទួលបានលទ្ធផលស្មើគ្នា 2-2 ដូច្នេះនៅលើទីលានរបស់កីឡដ្ឋាន Thammasat នៅប្រទេសថៃ វៀតណាមនឹងត្រូវតែប្រឹងជាងមុនទ្វេដង បើសិនចង់ក្លាយជាជើងឯក។

នៅមុនការប្រកួតវគ្គផ្ដាច់ព្រ័ត្រជើងទីពីរដែលនឹងធ្វើឡើងនៅព្រលប់ថ្ងៃនេះ ក្រុមជម្រើសជាតិថៃមិនធ្លាប់បាន ឈ្នះវៀតណាមម្ដងណាទេ នៅក្នុងវគ្គផ្ដាច់ព្រ័ត្ររបស់ពានរង្វាន់ AFF Cup ប៉ុន្តែ ថៃបានឈ្នះ 8 ប្រកួតក្នុងចំណោម 10 ប្រកួតដែលក្រុមទាំងពីរធ្លាប់បានប៉ះគ្នានៅវគ្គជម្រុះផ្ទាល់ (knock-out)។
ខ្សែប្រយុទ្ធលំដាប់លេខមួយរបស់ថៃ Teerasil Dangda មិនទាន់ជាពីរបួសត្រង់កំភួនជើង ខណៈខ្សែបម្រើជើងខ្លាំង Bui Tien Dung របស់វៀតណាម ក៏មានរបួសត្រង់ភ្នែកគោរ ហើយពួកគេទំនងជាមិនអាចចូលរួមប្រកួតនៅព្រលប់ថ្ងៃទី 16 មករានេះ។
ការប្រកួតជើងទីពីរនៃវគ្គផ្ដាច់ព្រ័ត្រនៅ AFF Cup 2022 គឺជាការប្រកួតចុងក្រោយរបស់គ្រូបង្វឹក Park Hang-seo នៃក្រុមវៀតណាម។ គ្រូបង្វឹករូបនេះមិនធ្លាប់បានបណ្ដោយឱ្យចាញ់ម្ដងណាឡើយនៅលើទឹកដីថៃ។
នៅឯកីឡដ្ឋាន Thammasat ថ្ងៃនេះ ថៃលក់សំបុត្រចូលទស្សនាប្រហែល 20,000 សំបុត្រ ក្នុងនោះអ្នកគាំទ្រវៀតណាមអាចទិញប្រហែល 8% ស្មើនឹង 1,600 សំបុត្រ។
ថ្លែងនៅមុនការប្រកួតជើងចុងក្រោយនៃវគ្គផ្ដាច់ព្រ័ត្ររបស់ AFF Cup 2022 គ្រូបង្វឹក Polking អះអាងថា ថៃនឹងនៅតែរក្សាបែបផែនវាយលុកដដែល៕

January 16, 2023

វៀតណាម និងថៃសុទ្ធតែបាត់បង់កម្លាំងពិសេសនៅវគ្គផ្ដាច់ព្រ័ត្រជើងទីពីរ

ក្រុមបាល់ទាត់ជម្រើសជាតិថៃ និងវៀតណាម សុទ្ធតែទទួលបានព័ត៌មានមិនល្អនៅមុនការប្រកួតលើកចុងក្រោយបង្អស់នៅ AFF Cup 2022 ដោយសារថៃទំនងជាបាត់បង់ខ្សែប្រយុទ្ធ Teerasil Dangda គ្រាដែលវៀតណាមត្រូវបាត់បង់ខ្សែបម្រើ Bui Tien Dung។

យោងតាមសារព័ត៌មានវៀតណាម ក្នុងការហាត់កាលពីម្សិលមិញ Bui Tien Dung មិនបានចូលរួមនោះទេ។ គាត់មានរបួស និងហើមត្រង់ភ្នែកគោរ ដូច្នេះកីឡាកររូបនេះប្រាកដជាមិនត្រូវបានអនុញ្ញាតឱ្យចូលប្រកួតនៅព្រលប់នេះ។ របួសរបស់ Tien Dung កើតឡើងដោយសារការប្រកួតជាបន្តបន្ទាប់ក្នុងសម្ពាធខ្ពស់។

Tien Dung និង Que Ngoc Hai របស់វៀតណាម ត្រូវបានវាយតម្លៃថា ជាកីឡាករដែលប្រកួតមានស្ថិរភាពជាងគេនៅឯខ្សែបម្រើ។ សារព័ត៌មានវៀតណាមឱ្យដឹងថា ការស្វែងរកកីឡាករមកជំនួយកន្លែងរបស់ Tien Dung គឺជារឿងលំបាកខ្លាំងសម្រាប់ក្រុមជម្រើសជាតិវៀតណាម។

ដោយឡែក ក្រុមជម្រើសជាតិថៃវិញ ក៏ប្រហែលមិនសប្បាយចិត្តប៉ុន្មាននៅពេលទទួលដំណឹងថា របួសត្រង់កំភួន ជើងរបស់ខ្សែប្រយុទ្ធលេខមួយ Teerasil Dangda មិនទាន់ជា។ Dangda រងរបួសក្នុងការប្រកួតវគ្គពាក់កណ្ដាលផ្ដាច់ព្រ័ត្រពេលប៉ះនឹងក្រុមម៉ាឡេស៊ី។ ការប្រកួតជើងទីមួយនៃវគ្គផ្ដាច់ព្រ័ត្រ Dangda មិនបានចូលទីលាននោះទេ ហើយគាត់ទំនងជាពិបាកបន្តការប្រកួតនៅជើងចុងក្រោយបង្អស់របស់ AFF Cup 2022។

ការប្រកួតជើងទីពីរនៃវគ្គផ្ដាច់ព្រ័ត្ររវាងថៃ និងវៀតណាម នឹងត្រូវធ្វើឡើងចាប់ពីម៉ោង 19 និង 30 នាទីថ្ងៃទី 16 មករា 2023 លើទីលានរបស់កីឡដ្ឋាន Thammasat ក្នុងរាជធានីបាងកក ប្រទេសថៃ៕

January 16, 2023

ការរស់នៅនៃប្រជាជនក្នុងទីក្រុងដែលត្រជាក់ជាងគេលើពិភពលោក

Nurgusun Starostina ជាអ្នកស្រុក Yakutsk ដែលជាទីក្រុងរបស់ស៊ីបេរី នៅតំបន់ចុងបូព៌ានៃប្រទេសរុស្ស៊ី ឱ្យដឹងថា ដើម្បីទប់ទល់នឹងអាកាសធាតុត្រជាក់ -50 អង្សាសេ នាងត្រូវស្លៀកពាក់ «ដូចទៅនឹងស្ពៃក្ដោប»។

ស្ថិតនៅឆ្ងាយពីរដ្ឋធានីមូស្គូប្រហែល 5,000 គីឡូម៉ែត្រទៅទិសខាងកើត និងនៅលើតំបន់កកជារៀងរហូត Yakutsk តែងតែមានសីតុណ្ហភាព -40 អង្សាសេ និងជាទីក្រុងដែលត្រជាក់ជាងគេបង្អស់លើពិភពលោក។ កាលពីសប្ដាហ៍កន្លង រដូវត្រជាក់បានអូសបន្លាយពេលខុសពីធម្មតា ធ្វើឱ្យសីតុណ្ហភាពចុះដល់ -50 អង្សាសេ។

«មិនអាចប្រឆាំងនឹងអាកាសធាតុបែបនេះបានឡើយ។ អ្នកបានត្រឹមតែសម្របខ្លួន និងស្លៀកពាក់ឱ្យបានសមស្រប» Anastasia Gruzdeva ដែលបានស្ថិតនៅក្រៅផ្ទះកាលពីថ្ងៃទី 15 មករា ប្រាប់ដូច្នេះ។

បើទោះជាអាកាសធាតុត្រជាក់ខ្លាំង ទីក្រុងខាងលើនៅតែមានប្រជាជនរស់នៅប្រហែល 300,000 នាក់។ ទីក្រុងសម្បូររ៉ែ Yakutsk នេះ មានវឌ្ឍនភាពខ្លាំងក្នុងរយៈពេលច្រើនទសវត្សរ៍កន្លង និងទាក់ទាញបានយុវវ័យជាច្រើនមករស់នៅ។

«បានរស់នៅទីនេះ អ្នកមិនមានអារម្មណ៍ថាត្រជាក់ទៀតទេ។ ខួរក្បាលនឹងប្រាប់អ្នកថា គ្រប់យ៉ាងនៅតែធម្មតា» Gruzdeva រៀបរាប់បន្ថែមអំពីទីក្រុងដែលត្រូវគ្របដណ្ដប់ដោយព្រឹល អ័ព្ទ និងទឹកកក។

Nurgusun Starostina ដែលជាអ្នកលក់ត្រីបង្កកនៅផ្សារដោយមិនបាច់មានទូក្លាសេ បាននិយាយថា ពុំមានគន្លឹះអាថ៌កំបាំងណាមួយសម្រាប់ទប់ទល់នឹងធាតុត្រជាក់។ នាងថា «ត្រូវការតែសម្លៀកបំពាក់ក្រាស់។ ស្លៀកពាក់ច្រើនជាន់ ដូចទៅនឹងស្ពៃក្ដោបអីចឹង!»។ Starostina បន្ថែមថា «ផ្សាររបស់យើងគឺជាផ្សារដែលត្រជាក់បំផុតលើពិភពលោក»។

នៅក្នុងខែមករា សីតុណ្ហភាពនៅ Yakutia អាចចុះដល់ -70 អង្សាសេ។ ប្រជាជននៅទីនេះត្រូវបានណែនាំមិនឱ្យពាក់វ៉ែនតា ព្រោះថា ផ្នែកលោហធាតុរបស់វ៉ែនតានឹងកក ហើយជាប់ទៅនឹងស្បែក ព្រមទាំងអាចរលាត់ស្បែក បើប្រឹងបំបែកវាពីស្បែក។

នៅ Yakutia ប្រជាជន និងសិស្សានុសិស្សភាគច្រើនទៅធ្វើការ និងទៅសាលារៀនដោយជិះរថយន្តក្រុង។ ចំណែកអ្នកជិះរថយន្តផ្ទាល់ខ្លួន ត្រូវបំពាក់ប្រព័ន្ធកម្ដៅក្នុងរថយន្ត និងរុំភួយជុំវិញអាគុយ បើមិនដូច្នេះទេ រថយន្តនឹងពិបាកដំណើរការ។

«ត្រូវតែគ្របដណ្ដប់ក្បាល នេះគឺជារឿងសំខាន់។ ក្រៅពីនេះ អ្នកត្រូវតែស្លៀកខោក្រាស់ ព្រោះយើងតែងបាត់បង់កម្ដៅច្រើនត្រង់ជើង។ បើជើងអ្នកត្រជាក់ ដងខ្លួនទាំងមូលរបស់អ្នកក៏ត្រជាក់។ ដូច្នេះ ចូរស្លៀកពាក់ក្រាស់ៗ» Gruzdeva រៀបរាប់៕

January 16, 2023

Author: សឿន សំណាង