សឿន សំណាង - La Reine Media

ក្រោយ Ronaldo រងរបួស Mbappe ក៏ចូលទៅបង្ហាញសកម្មភាពដ៏កក់ក្ដៅក្នុងការប្រកួតមិត្តភាពកាលពីម្សិលមិញ

ទន្ទឹមនឹងភាពទាក់ទាញរបស់ Cristiano Ronaldo និង Lionel Messi ការប្រកួតមិត្តភាពរវាង PSG និង Al Nassr & Al Hilal (Saudi All Star XI) កាលពីយប់ម្សិលមិញក៏មានសកម្មភាពគួរឱ្យកក់ក្ដៅផងដែរពី Kylian Mbappe។

ការប្រកួតដែលមានកំពូលតារាបាល់ទាត់ច្រើនរូបរបស់ក្រុម PSG និង Saudi All Star XI កាលពីយប់ថ្ងៃទី 19 មករា នៅ អារ៉ាប៊ីសាអូឌីត ពិតជាពិសេស។ ភាពទាក់ទាញនៃការប្រកួតនេះត្រូវបានរុញដល់ចំណុចកំពូលនៅពេលមានវត្តមានរបស់កំពូលតារាបាល់ទាត់ Ronaldo និង Messi។

Ronaldo និង Messi ក្រោយមកក៏មិនបានធ្វើឱ្យទស្សនិកជនខកចិត្តដែរ។ Messi គឺជាអ្នករកបាន 1 គ្រាប់ដំបូងគេឱ្យ PSG ហើយ Ronaldo ក៏រកបាន 2 គ្រាប់ឱ្យ Al Nassr & Al Hilal ក្នុងតង់ទីមួយ។

ក្រៅពីកំពូលកីឡាករទាំងពីររូបខាងលើក៏នៅមានកំពូលថ្វីជើងមួយរូបទៀតដែលបានទាក់ទាញចំណាប់អារម្មណ៍ច្រើន នោះគឺ Mbappe។ កីឡាករបារាំងរូបនេះបានបញ្ចេញសកម្មភាពដ៏កក់ក្ដៅសម្រាប់ Ronaldo។ រូបភាពបានពីការប្រកួតខាងលើបង្ហាញថា Mbappe បោះជំហានទៅរក CR7 សួរនាំពីរបួសលើផ្ទៃមុខដែលបង្កឡើងដោយអចេតនាពីអ្នកចាំទី Keylor Navas របស់ PSG នៅនាទីទី 31។ នេះគឺជាកំហុសដែលជួយឱ្យ Ronaldo រកបាន 1 គ្រាប់ពីការទាត់បាល់ពិន័យ។

CR7 រងរបួសលើផ្ទៃមុខដែលបង្កឡើងដោយអចេតនាពីអ្នកចាំទី Keylor Navas របស់ PSG នៅនាទីទី 31

និយាយអំពី Mbappe វិញ កីឡាករបារាំងរូបនេះបានទទួលស្គាល់តាំងពីយូរមកហើយថា Cristiano Ronaldo គឺជាកីឡាករដែលគាត់ចូលចិត្តជាងគេតាំងពីនៅតូច ហើយក៏ជានិមិត្តរូបសម្រាប់គោលដៅក្នុងអាជីពជាកីឡាករបាល់ទាត់របស់ខ្លួនផងដែរ។

ក្នុងការប្រកួតកាលពីយប់ម្សិលមិញ Mbappe ក៏ទទួលបានការសាទរយ៉ាងខ្លាំងពីទស្សនិកជន នៅពេលរកបាន 1 គ្រាប់ ហើយក៏បង្កឱកាសស៊ុតបញ្ចូលទីបាន 2 គ្រាប់ និងទទួលបាន 9.0 ពិន្ទុ ដែលជាពិន្ទុខ្ពស់ជាងគេសម្រាប់ PSG ខណៈ Ronaldo ទទួលបាន 9.2 ពិន្ទុ។ ការប្រកួតនេះបានបញ្ចប់ដោយ PSG ឈ្នះ Saudi All-Star XI ក្នុងលទ្ធផល 5-4៕

January 20, 2023

អ្នកសម្ដែងរបស់ភាពយន្តរឿង «Mission Impossible» ជាប់ចោទពីបទសម្លាប់មនុស្សពេលកំពុងថតកុន

(សហរដ្ឋអាម៉េរិក) – តារាសម្ដែងអាម៉េរិក Alec Baldwin ត្រូវបានតុលាការចោទប្រកាន់ពីបទសម្លាប់មនុស្សដោយអចេតនា ប្រឈមនឹងការជាប់ពន្ធនាគារ 5 ឆ្នាំ ក្រោយពីគាត់បានកេះកៃកាំភ្លើងបណ្ដាលឱ្យមិត្តរួមអាជីពម្នាក់ស្លាប់នៅកន្លែងថតកុន។

យោងតាម TMZ កាលពីថ្ងៃទី 19 មករា រដ្ឋអាជ្ញានៅស្រុក Santa Fe រដ្ឋ New Mexico បានប្រកាសថា Alec Baldwin ត្រូវបានចោទប្រកាន់ពីបទមនុស្សឃាតដោយអចេតនា ក្នុងនាមជាផលិតករ និងអ្នកសម្ដែងភាពយន្ត ហើយត្រូវប្រឈមនឹងការជាប់ពន្ធនាគារ 5 ឆ្នាំ។

មេធាវីរបស់ Alec Baldwin ប្រកាសថា ការចោទប្រកាន់របស់តុលាការខាងលើគឺជាការ «មួលបង្កាច់ការស្លាប់របស់អ្នកស្រី Halyan Hutchins» ហើយថា នឹងតស៊ូមតិផ្លូវច្បាប់ដល់ទីបញ្ចប់។

ក្រៅពីលោក Alec Baldwin តុលាការក៏បានចោទប្រកាន់ពីបទសម្លាប់មនុស្សដោយអចេតនាចំពោះ Hannah Gutierrez-Reed ដែលជាប្រធានគម្រោងភាពយន្តរឿង «Rust» នេះដែរ។

កាលពីខែតុលា 2021 Alec Baldwin ថតឈុតហិង្សារបស់ភាពយន្តរឿង Rust នៅក្នុងរដ្ឋ New Mexico។ ក្រោយត្រូវបានប្រាប់ថា កាំភ្លើងមិនមានគ្រាប់ អ្នកសម្ដែង Alec Baldwin ក៏បានកេះកៃកាំភ្លើង ប៉ុន្តែស្រាប់តែកាំភ្លើងនៅមានគ្រាប់។ អ្នកដឹកនាំរឿង និងជាអ្នកនិពន្ធ Joel Souza ត្រូវគ្រាប់កាំភ្លើង តែបានព្យាបាលជាសះស្បើយ។ ចំណែកអ្នកដឹកនាំផ្នែករូបភាព អ្នកស្រី Halyan Hutchins រងរបួសធ្ងន់ ហើយក៏បានបាត់បង់ជីវិត។

កាលពីខែកុម្ភៈ 2022 គ្រួសាររបស់ Hutchins បានដាក់ពាក្យប្ដឹងប្រឆាំង Alec Baldwin ប៉ុន្តែបានដកពាក្យបណ្ដឹងវិញកាលពីខែតុលា 2022។ ទោះជាយ៉ាងនេះក៏ដោយ រដ្ឋអាជ្ញាមួយរូប ពេលនោះបាននិយាយថា Alec Baldwin នៅតែអាចត្រូវប្រឈមនឹងការចោទប្រកាន់ ព្រោះបាននាំឱ្យអ្នកដឹកនាំផ្នែករូបភាព Halyna Hutchins អាយុ 42 ឆ្នាំ ត្រូវបាត់បង់ជីវិត។ ដំណើរការរឿងក្ដីនៅតុលាការបានស៊ីពេលអស់ជាងមួយឆ្នាំ ដោយសារតែរដ្ឋអាជ្ញាត្រូវរង់ចាំការបញ្ជាក់ពី FBI។

លោក Alec Baldwin អាយុ 63 ឆ្នាំ គឺជាតារាសម្ដែងជនជាតិអាម៉េរិកមួយរូបដែលធ្លាប់ទទួលបានពាន់រង្វាន់ Emmy និងពានរង្វាន់ផែនដីមាស (Golden Globes) ជាច្រើនលើក។ តារាសម្ដែងរូបនេះត្រូវបានគេស្គាល់តាមរយៈភាពយន្តរឿង The Hunt for Red October (1990), The Aviator (2004) និង Mission Impossible ជាដើម។ លោក Alec Baldwin មានភរិយាឈ្មោះ Hilaria និងមានកូន 7 នាក់៕

January 20, 2023

ម្ដាយជនជាតិចិនម្នាក់បារម្ភខ្លាចកូនស្រីជាបណ្ឌិត «មិនអាចរកបានប្ដី» នឹងគេ

ស្ដ្រីជាម្ដាយមួយរូបនៅខេត្ត Zhejiang ប្រទេសចិន បានបង្ហោះវីដេអូបង្ហាញពីកូនស្រីជាបណ្ឌិតរបស់គាត់កំពុងអង្គុយអានសៀវភៅ និងរអ៊ូដាក់នាងថា គិតតែពីរៀន ដោយបារម្ភខ្លាចកូនស្រីមិនអាចរកបានប្ដីនឹងគេ។

ក្នុងវីដេអូមួយដែលត្រូវបានបង្ហោះលើបណ្ដាញសង្គមក្នុងសប្ដាហ៍នេះ ម្ដាយរបស់នារីជាបណ្ឌិតមួយរូបនៅខេត្ត Zhejiang ភាគខាងកើតប្រទេសចិន និយាយថា គាត់បារម្ភថា កូនស្រីគាត់នឹងមិនអាចបានជួបបុរសដែលអាចរៀបការជាមួយគ្នាបាន ក្នុងពេលកូនស្រីគាត់កំពុងអានសៀវភៅនៅក្បែរតុធ្វើការ។

«ដល់ម៉ោងចូលគេងហើយ។ ឈប់រៀនទៀតទៅ ហើយទៅគេងភ្លាមទៅ» ស្ត្រីជាម្ដាយនិយាយនៅក្នុងវីដេអូដូច្នេះ។ កូនស្រីគាត់ងើបមុខឡើង និងសើច ប៉ុន្តែមិនឆ្លើយតប។

ស្ត្រីជាម្ដាយរូបនេះបានឱ្យដឹងថា កូនស្រីរបស់គាត់គឺជាសាស្ត្រាចារ្យនៅមហាវិទ្យាល័យក្នុងតំបន់ បន្ទាប់ពីបានបញ្ចប់ការសិក្សាថ្នាក់បណ្ឌិតនៅកាណាដា។ អ្នកស្រីគិតថា កូនស្រីគាត់ល្អខ្លាំងណាស់ និងមានមោទកភាពចំពោះសមិទ្ធផលរបស់នាង។

ក៏ប៉ុន្តែ អ្នកស្រីក៏បារម្ភខ្លាំងដែរនៅពេលឃើញកូនស្រីមិនចំណាយពេលខ្លះសម្រាប់មិត្តភក្ដិ ឬរកមិត្តភក្ដិថ្មី ហើយគិតតែពីនៅផ្ទះ និងអានសៀវភៅ។

វីដេអូស្ដីពីរឿងរ៉ាវនេះបានទាក់ទាញអ្នកចូលមើលជិត 9 លានលើក និងបញ្ចេញមតិជិត 3,700 លើក ក្រោយពីបានបង្ហោះលើបណ្ដាញសង្គម។ ក្នុងនោះ អ្នកខ្លះបញ្ចេញយោបល់គាំនារីជាកូន ហើយអ្នកខ្លះយល់ស្របនឹងការបារម្ភរបស់ស្ត្រីជាម្ដាយ។

អ្នកចូលមើលបានលើកហេតុផលជាច្រើនមកអះអាង មានដូចជាថា «មិនរាប់អានមិត្តថ្មីៗគឺមិនអាចជួបមនុស្សក្នុងក្ដីស្រមៃ», «ប្រុសៗមិនសូវហ៊ានស្រលាញ់នារីដែលមានចំណេះដឹងខ្ពស់ជាងខ្លួននោះទេ» ឬថា «ការអានសៀវភៅ ការទទួលយកចំណេះដឹងថ្មីៗគឺជាសេចក្ដីសុខរបស់នាង» ជាដើម។ល។

January 20, 2023

ប្រព័ន្ធរុញច្រានទម្រង់ថ្មី ជួយឱ្យយានអវកាសហោះដល់ភពអង្គារក្នុងរយៈពេល 45 ថ្ងៃ

(សហរដ្ឋអាម៉េរិក) -ណាសា (NASA) ផ្ដល់ថវិកាសម្រាប់ការអភិវឌ្ឍបច្ចេកវិទ្យាតាមគំនិតស្ដីពីការប្រើប្រាស់ប្រព័ន្ធរុញច្រាននុយក្លេអែរដើម្បីដឹកមនុស្សទៅកាន់ពិភពព្រះអង្គារដោយប្រើពេលតែ 45 ថ្ងៃ ជំនួសឱ្យពី 6 ខែដល់ 9 ខែដូចបច្ចុប្បន្ន។

យោងតាមណាសា គំនិតស្ដីពីប្រព័ន្ធរុញច្រានដោយប្រើថាមពលអគ្គិសនីបានពីនុយក្លេអែរ និងកម្ដៅនុយក្លេអែរ (NTP/NEP) គឺជាប្រភេទប្រព័ន្ធរុញច្រានដោយកម្លាំងនុយក្លេអែរថ្មីដែលប្រើប្រាស់វដ្ដនៃរ៉ូទ័រទម្រង់រលក។ សាស្ត្រាចារ្យ Ryan Gosses មកពីសាកលវិទ្យាល័យ Florida ដែលជាអ្នកវិទ្យាសាស្ត្រនៅពីក្រោយសំណើខាងលើ បានឱ្យដឹងថា ប្រព័ន្ធនេះអាចកាត់បន្ថយការពេលហោះទៅកាន់ពិភពអង្គារចុះមកនៅត្រឹម 45 ថ្ងៃ។ បើសិនជាបច្ចេកវិទ្យានេះដំណើរការដូចបានគ្រោងទុក វានឹងជួយឱ្យការធ្វើដំណើរពីភពមួយទៅភពមួយបានឆាប់រហ័ស និងសុវត្ថិភាព។

ខាងលើនេះគឺជាសំណើមួយក្នុងចំណោម 14 ដែលត្រូវបានកម្មវិធី Innovative Advanced Concepts (NIAC) របស់ណាសា ជ្រើសរើសសម្រាប់ការអភិវឌ្ឍដំណាក់កាលទីមួយ និងទទួលបានថវិកា 12,500 ដុល្លារអាម៉េរិក ដើម្បីស្រាវជ្រាវ និងអភិវឌ្ឍ។

ឧបករណ៍រុញច្រានដោយកម្ដៅនុយក្លេអែរ (NTP) របស់ សាស្ត្រាចារ្យ Ryan Gosses ប្រើប្រាស់ម៉ាស៊ីនប្រតិកម្មនុយក្លេអែរដើម្បីដុតកម្ដៅឥន្ធនៈអ៊ីដ្រូសែនរាវ ធ្វើឱ្យវាក្លាយជាផ្លាស្មា និងត្រូវបានបញ្ចេញមកក្រៅដើម្បីបង្កើតជាកម្លាំងរុញច្រាន។ ចំណែកឧបករណ៍រុញច្រានដោយអគ្គិសនីនុយក្លេអែរ (NEP) វិញ ប្រើប្រាស់ម៉ាស៊ីនប្រតិកម្មនុយក្លេអែរដើម្បីផ្ដល់កម្លាំងរុញច្រានដោយថាមពលអគ្គិសនី។

លោក Ryan Gosses ក៏ស្នើឱ្យប្រើប្រាស់រ៉ូទ័រទម្រង់រលក (WR) ដើម្បីបង្ហាប់បរិមាណនៃប្រតិកម្មក្រោមសម្ពាធដែលផលិតពីកម្ដៅរបស់ឥន្ធនៈអ៊ីដ្រូសែនរាវនៅក្នុងម៉ាស៊ីនប្រតិកម្មផងដែរ។ ការរួមផ្សំជាមួយនឹងវដ្ដ NEP នឹងបង្កើតបានកម្លាំងរុញច្រានកាន់តែខ្លាំងជាងមុន។

ការប្រើប្រាស់បច្ចេកវិទ្យាដូចបច្ចុប្បន្ន ជើងហោះហើរដឹកមនុស្សទៅកាន់ពិភពអង្គារអាចអូសបន្លាយពេលពី 6 ដល់ 9 ខែ។ ដូច្នេះ ការប្រើប្រាស់បច្ចេកវិទ្យាទំនើបដែលជួយកាត់បន្ថយពេលវេលានៃការធ្វើដំណើរខាងលើមកនៅត្រឹម 45 ថ្ងៃគឺជារឿងដ៏អស្ចារ្យ៕

January 20, 2023

បង្គាមានផ្ទុកសារធាតុចាហួយជិត 200 គីឡូក្រាម ត្រូវអាជ្ញាធររកឃើញនៅភ្នំពេញ

ផលិតផលសមុទ្រស្រស់រាប់រយគីឡូក្រាមនៅម្តុំត្រឡោកបែក ត្រូវបានមន្ត្រីអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (CCF) រកឃើញថា មានផ្ទុកចាហួយ។

ក្នុងគោលបំណងដើម្បីការពារសុខុមាលភាព និងផលប្រយោជន៍របស់អ្នកប្រើប្រាស់ ក្នុងឱកាសចូលឆ្នាំថ្មីប្រពៃណីចិនខាងមុខ ឯកឧត្តម ផាន អូន ប្រតិភូរាជរដ្ឋាភិបាល ទទួលបន្ទុកជាអគ្គនាយកនៃអគ្គនាយកដ្ឋានក.ប.ប. បានណែនាំមន្ត្រីក្រោមឱវាទ ឱ្យបង្កើនសកម្មភាពចុះត្រួតពិនិត្យបណ្តាទីផ្សារនៅទូទាំងប្រទេស ដើម្បីទប់ស្កាត់ការចរាចរទំនិញមិនមានអនុលោមភាព ពិសេសម្ហូបអាហារ។

ជាក់ស្តែង កាលពីថ្ងៃទី 19 មករា 2023 ក្រុមមន្ត្រីអគ្គនាយកដ្ឋានក.ប.ប. ប្រចាំរាជធានីភ្នំពេញ បានចុះត្រួតពិនិត្យស្តង់លក់ផលិតផលសមុទ្រស្រស់នៅម្តុំត្រឡោកបែក ដើម្បីយកគំរូមកវិភាគរកវត្តមានសារធាតុគីមីហាមឃាត់ ដោយប្រើប្រាស់រថយន្តពិសោធន៍ចល័តផ្នែកម្ហូបអាហារ។

យោងលទ្ធផលវិភាគខាងលើបានរកឃើញថា បង្គាចំនួន 180 គីឡូក្រាម មានចាក់បញ្ចូលសារធាតុ CMC (ចាហួយ)។ មន្ត្រីជំនាញបានអនុវត្តនីតិវិធីពិន័យអន្តរការណ៍ រឹបអូសទំនិញទាំងនោះមកកម្ទេចចោល នេះបើតាម អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ CCF។

យោងតាមអគ្គនាយកដ្ឋានក.ប.ប. សារធាតុ CMC (ចាហួយ) ជាសារធាតុដែលឈ្មួញ ខិលខូចមួយចំនួន តែងយកមកប្រើប្រាស់សម្រាប់ចាក់បញ្ចូលក្នុងផលិតផលបង្គាស្រស់ ដើម្បីបង្កើនទម្ងន់ ក្នុងគោលបំណងកឹបកេងផលប្រយោជន៍របស់អ្នកប្រើប្រាស់៕

January 20, 2023

ប្រជ្រៀតជាន់គ្នាក្នុងព្រឹត្តិការណ៍បាល់ទាត់ Arabian Gulf Cup បណ្ដាលឱ្យមនុស្សស្លាប់ និងរងរបួសច្រើនសិបនាក់

ហេតុការណ៍ប្រជ្រៀតជាន់គ្នាក្នុងព្រឹត្តិការណ៍បាល់ទាត់ Arabian Gulf Cup កើតឡើងក្បែរច្រកចេញ-ចូលរបស់កីឡដ្ឋានមួយនៅទីក្រុង Basra ប្រទេសអ៊ីរ៉ាក់ បណ្ដាលមនុស្សរាប់សិបនាក់រងរបួស និងស្លាប់។

កាលពីថ្ងៃទី 19 មករា ហេតុការណ៍ប្រជ្រៀតជាន់គ្នាមួយបានកើតឡើងខាងក្រៅកីឡដ្ឋានមួយនៅអ៊ីរ៉ាក់ នៅប៉ុន្មានម៉ោងមុនការប្រកួតផ្ដាច់ព្រ័ត្រដណ្ដើមពានរង្វាន់ជើងឯកបាល់ទាត់ឈូងសមុទ្រអារ៉ាប់ (Arabian Gulf Cup) រវាងអ៊ីរ៉ាក់ និងអូម៉ង់ បណ្ដាលឱ្យមនុស្សម្នាក់ស្លាប់ និង 83 នាក់រងរបួស។

ហេតុការណ៍នេះកើតឡើងក្បែរច្រកចេញ-ចូលរបស់កីឡដ្ឋាននៅទីក្រុង Basra ភាគខាងត្បូងប្រទេសអ៊ីរ៉ាក់ នៅពេលអ្នកគាំទ្ររាប់ពាន់នាក់ព្យាយាមចូលទៅខាងក្នុងកីឡដ្ឋាន។

ក្នុងការប្រកួតវគ្គផ្ដាច់ព្រ័ត្រខាងលើ អ៊ីរ៉ាក់បានឈ្នះអូម៉ង់ 3-2 និងបានក្លាយជាជើងឯក Arabian Gulf Cup ជាលើកដំបូងរាប់ចាប់ពីឆ្នាំ 1988។

Arabian Gulf Cup ដែលជាពានរង្វាន់បាល់ទាត់សម្រាប់ 8 ប្រទេសនៅតំបន់ឈូងសមុទ្រអារ៉ាប់ តែងតែធ្វើឡើង 2 ឆ្នាំម្ដង។ Arabian Gulf Cup លើកចុងក្រោយនេះត្រូវបានសម្ពោធបើកការប្រកួតកាលពីថ្ងៃទី 6 មករា 2023 ដោយមានការចូលរួមពីប្រធាន FIFA លោក Gianni Infantino ផងដែរ៕

January 20, 2023

ក្មេងអាយុ 10 ឆ្នាំដែលជាប់ 21 ថ្ងៃ ក្នុងសសរបេតុងក្រោមដីជម្រៅ 35 ម៉ែត្រនៅវៀតណាម ត្រូវបានយកឡើងមកលើហើយ

(វៀតណាម) – ក្រោយរយៈពេល 21 ថ្ងៃដែលបានធ្លាក់ចូលជាប់ក្នុងប្រហោងសសរបេតុងក្រោមដីជម្រៅ 35 ម៉ែត្រ នៅក្នុងការដ្ឋានសាងសង់ស្ពានមួយកន្លែងនៅខេត្ត Dong Thap ចុក្រោយ សាកសពរបស់ក្មេងប្រុសរងគ្រោះ Thai Ly Hao Nam ក៏ត្រូវបានយកឡើងមកលើកាលពីវេលាទៀបភ្លឺថ្ងៃទី 20 មករា 2023។

នៅវេលាម៉ោង 01 និង 20 នាទី ក្រុមសង្គ្រោះបានចុះដល់ជម្រៅ 25 ម៉ែត្រខាងក្នុងបំពង់ដែកព័ទ្ធជុំវិញសសរបេតុងប្រហោងក្នុង ជាទីដែលសពរបស់ក្មេងប្រុសវ័យ 10 ឆ្នាំ ឹកំពុងជាប់ខាងក្នុង។ ជិត 2 ម៉ោងក្រោយមក ក្រុមសង្គ្រោះក៏យកសាកសពឡើងមកលើបានសម្រេច។

មឈូស និងសាកសពរបស់ក្មេងរងគ្រោះនេះត្រូវដឹកទៅកាន់ផ្ទះដែលនៅឆ្ងាយពីកន្លែងកើតហេតុប្រហែល 1 គីឡូម៉ែត្រ ដើម្បីធ្វើបុណ្យបញ្ចុះសព។

អាជ្ញាធរវៀតណាមបានឱ្យដឹងថា លទ្ធផលនៃការធ្វើកោសល្យវិច្ច័យបង្ហាញថា ក្មេងរងគ្រោះបានស្លាប់ដោយសាររបួសច្រើនកន្លែងពេលធ្លាក់ប៉ះនឹងជញ្ជាំងសសរ និងស្ថិតក្នុងទឹក។ បន្ទាប់ពីបានធ្វើបុណ្យបញ្ចុះសពរួចរាល់ សមត្ថកិច្ចនឹងចាប់ផ្ដើមស៊ើបអង្កេតរកមូលហេតុនៃគ្រោះថ្នាក់នេះ ហើយនឹងមានចំណាត់ការចំពោះបុគ្គល ឬអង្គភាពដែលបានបង្កឱ្យមានកំហុសឆ្គង។

ករណីធ្លាក់ក្មេងចូលបំពង់សសរបេតុងខាងលើនេះបានកើតឡើងកាលពីម៉ោងប្រហែល 11 និង 30 នាទី ថ្ងៃទី 31 ធ្នូ 2022។ មុនពេលកើតហេតុ ក្មេងរងគ្រោះមានឈ្មោះថា Thai Ly Hao Nam (អាយុ 10 ឆ្នាំ) និងក្មេង 3 នាក់ទៀត បានចូលក្នុងការដ្ឋានសាងសង់ស្ពានមួយកន្លែងដើម្បីរើសអេតចាយ។ ប៉ុន្តែ Hao Nam ក៏បានធ្លាក់ទៅក្នុងបំពង់សសរបេតុងប្រហែលដែលត្រូវបានដាំទៅក្នុងដីជម្រៅប្រហែល 35 ម៉ែត្រ។ ប្រហែលកន្លះម៉ោងក្រោយពីកុមារនេះបានជួបគ្រោះថ្នាក់ កម្លាំងសង្គ្រោះក៏បានទៅដល់កន្លែងកើតហេតុ និងចាប់ផ្ដើមដំណើរការជួយសង្គ្រោះ៕

January 20, 2023

ជិតកើតមានបាតុភូត «ព្រះចន្ទថ្មី – New Moon» លើកដំបូងក្នុងអំឡុងជិត 1,000 ឆ្នាំកន្លង

នៅវេលាម៉ោងប្រហែល 03 និង 53 នាទី ថ្ងៃទី 22 មករា 2023 (ម៉ោងនៅកម្ពុជា) ព្រះចន្ទថ្មី (New Moon) នឹងមានគម្លាតពីផែនដីប្រហែល 356,568 គីឡូម៉ែត្រ ដែលជារយៈចម្ងាយជិតបំផុតរាប់ចាប់ពីមជ្ឈិមសម័យ។

ដោយសារតែស្ថិតនៅក្បែរផែនដីពេក ព្រះចន្ទនៅថ្ងៃទី 22 មករាខាងមុខ នឹងជាព្រឹត្តិការណ៍ព្រះចន្ទថ្មីធំជាងគេបង្អស់ដែលបង្ហាញខ្លួនលើមេឃ រាប់ចាប់ពីថ្ងៃទី 03 ធ្នូ 1030 នេះបើតាមទិន្នន័យនៅលើគេហទំព័រ Timeanddate។ ព្រឹត្តិការណ៍ព្រះចន្ទថ្មីនេះនឹងកើតឡើងជាថ្មីម្ដងទៀតនៅថ្ងៃទី 20 មករា 2368។

គន្លងគោចររបស់ព្រះចន្ទជុំវិញផែនដីមិនមែនមូលល្អឥតខ្ចោះនោះទេ ប៉ុន្តែវាមានរាងប្រហាក់ប្រហែលនឹងពងក្រពើ ដែលនេះមានន័យថា គម្លាតរវាងព្រះចន្ទ និងផែនដីគឺមិនដូចគ្នាគ្រប់ពេលឡើយ ក្នុងនោះចំណុចឆ្ងាយបំផុតត្រូវបានហៅថា Apogee និងចំណុចជិតបំផុតហៅថា Perigee។

ក្នុងព្រឹត្តិការណ៍ព្រះចន្ទថ្មី ព្រះចន្ទស្ថិតនៅចន្លោះរវាងព្រះអាទិត្យ និងផែនដី។ ពេលនោះ មនុស្សលើផែនដីមិនអាចមើលឃើញព្រះចន្ទឡើយ ដោយសារចំហៀងដែលងងឹតរបស់ព្រះចន្ទបែរមកកាន់ផែនដី ហើយវាក៏កើតឡើងនៅពេលថ្ងៃ និងចំថ្ងៃ 15 រោច។ ក្នុងព្រឹត្តិការណ៍នេះ ព្រះចន្ទរះ និងលិចជិតស្ទើរតែដូចទៅនឹងព្រះអាទិត្យ ធ្វើឱ្យភ្នែកធម្មតាមិនអាចមើលឃើញព្រះចន្ទ៕

January 20, 2023

Ronaldo ឱប Messi ក្នុងការប្រកួតមិត្តភាពនៅអារ៉ាប៊ីសាអូឌីតកាលពីម្សិលមិញ

(អារ៉ាប៊ីសាអូឌីត) – កាលពីព្រលប់ថ្ងៃទី 19 មករា 2023 កំពូលតារាបាល់ទាត់ Lionel Messi និង Cristiano Ronaldo ឱប និងកៀក ក គ្នានៅក្នុងការប្រកួតបាល់ទាត់មួយនៅអារ៉ាប៊ីសាអូឌីត ដែលអាចជាការប៉ះគ្នាចុងក្រោយរបស់ពួកគេ។

ប៉ុន្មានវិនាទីមុនពេលគ្រាប់បាល់រមៀលក្នុងការប្រកួតមិត្តភាពរវាង PSG និង Saudi All-Star XI កីឡាករ Ronaldo ដើរទៅចាប់ដៃ និងកៀកស្មា Messi។ ម្ចាស់ជើងឯក World Cup 2022 ក៏ចាប់ដៃ និងយកដៃម្ខាងឱបចង្កេះរបស់ខ្សែប្រយុទ្ធជនជាតិព័រទុយហ្កាល។ Ronaldo និយាយមួយឃ្លា ហើយ Messi ក៏ងក់ក្បាលយល់ព្រម។

នៅក្នុងផ្លូវក្រោមដី ពេលត្រៀមចេញមកកាន់ទីលានប្រកួត Ronaldo ក៏បានចាប់ដៃ និងឱបកីឡាករនានារបស់ PSG ក្នុងនោះមានទាំង Neymar, Kylian Mbappe និង Messi ផងដែរ។ ខ្សែប្រយុទ្ធវ័យ 37 ឆ្នាំ Ronaldo ធ្វើជាប្រធានក្រុមកីឡាករម្ចាស់ផ្ទះ នៅក្នុងការប្រកួតដំបូងរបស់ខ្លួនបន្ទាប់ពីក្រុមជម្រើសជាតិព័រទុយហ្កាលត្រូវបានម៉ារ៉ុកជម្រុះចេញពី World Cup 2022 ត្រឹមវគ្គ 8 ក្រុមចុងក្រោយ។

ក្នុងការប្រកួតដែលមានវត្តមានរបស់កីឡាករកំពូលៗ មានជាអាទិ៍ Ronaldo, Messi, Neymar និង Mbappe នេះ Ronaldo រកបាន 2 គ្រាប់ ខណៈ Messi ក៏រកបាន 1 គ្រាប់ មុនពេល PSG ឈ្នះ Saudi All-Star XI ក្នុងលទ្ធផល 5-4។

https://www.youtube.com/watch?v=bmazFxCXtF0

…

January 20, 2023

សហរដ្ឋអាម៉េរិកប្រកាសអំពីកញ្ចប់ជំនួយយោធាថ្មីតម្លៃ 2.5 ពាន់លានដុល្លារសម្រាប់អ៊ុយក្រែន

ក្រសួងការពារជាតិអាម៉េរិក ប្រកាសឱ្យដឹងអំពីកញ្ចប់ជំនួយយោធាថ្មីតម្លៃ 2.5 ពាន់លានដុល្លារសម្រាប់អ៊ុយក្រែន ក្នុងនោះមានទាំងរថពាសដែក រួមនឹងអាវុធធំតូចជាច្រើនផ្សេងទៀត។

យោងតាមប្រកាសមួយកាលពីថ្ងៃទី 19 មករា របស់មន្ទីរបញ្ចកោណ កញ្ចប់ជំនួយថ្មីបំផុតនេះរួមមាន រថពាសដែក Bradley 59 គ្រឿង, រថពាសដែក Stryker 90 គ្រឿង, ប្រព័ន្ធការពារដែនអាកាស Avenger និងអាវុធតូចធំច្រើនប្រភេទទៀត ប៉ុន្តែមិនមានរថក្រោះដូចការស្នើរបស់អ៊ុយក្រែននោះទេ។

កញ្ចប់ជំនួយថ្មីបំផុតនេះបានធ្វើឱ្យជំនួយយោធាសរុបរបស់សហរដ្ឋអាម៉េរិក សម្រាប់អ៊ុយក្រែន ឡើងដល់ជាង 26.7 ពាន់លានដុល្លារ រាប់ចាប់តាំងពីសង្គ្រាមនៅអ៊ុយក្រែនបានផ្ទុះឡើង។

រថពាសដែក Stryker មិនក្រាស់ដូចរថក្រោះ ប៉ុន្តែវាធ្វើសកម្មភាពបានល្អនៅក្នុងភូមិសាស្ត្រដែលមានព្រឹល ខ្សាច់ និងល្បាប់។ រថពាសដែក Stryker អាចដឹកទាហាន 9 នាក់ ខណៈដែលរថពាសដែក Bradley អាចដឹកបាន 6 នាក់។

អាម៉េរិកប្រើប្រាស់រថពាសដែក Stryker តាំងពីឆ្នាំ 2002 រហូតដល់បច្ចុប្បន្ន ក្នុងនោះ Stryker មួយគ្រឿងមានតម្លៃប្រហែល 4.9 លានដុល្លារ។ Stryker ត្រូវបានបំពាក់កាំភ្លើងធំប្រភេទ 30 មម, 40 មម ឬ 105 មម អាស្រ័យលើកំណែនីមួយៗ និងមានកាំភ្លើងយន្ត 12.7 មម និង 7.62 មម។ រថពាសដែកនេះអាចរត់ក្នុងល្បឿន 97 គីឡូម៉ែត្រ/ម៉ោង និងមានរង្វង់ប្រតិបត្តិការប្រហែល 500 គីឡូម៉ែត្រ។

ចំណែករថពាសដែក Bradley វិញ បំពាក់កាំភ្លើងធំ 25 មម, មីស៊ីលប្រឆាំងរថក្រោះ និងអាចធ្វើសកម្មភាពក្នុងរង្វង់ 480 គីឡូម៉ែត្រ៕

January 20, 2023

Author: សឿន សំណាង