សឿន សំណាង - La Reine Media

ព្រឹត្តិការណ៍បាល់ទាត់ធំៗដែលគួរឱ្យចាប់អារម្មណ៍បំផុតក្នុងឆ្នាំ 2023

សម្រាប់អ្នកស្នេហាវិស័យបាល់ទាត់ ឆ្នាំ 2022 គឺជាឆ្នាំដែលទាក់ទាញបំផុត ដោយមានព្រឹត្តិការណ៍បាល់ទាត់ពិភពលោក World Cup។ ឆ្នាំ 2023 ពុំមានព្រឹត្តិការណ៍ធំបំផុតលើពិភពលោក ឬ នៅអឺរ៉ុប ប៉ុន្តែ ឆ្នាំនេះនឹងមានព្រឹត្តិការណ៍អស្ចារ្យ និងគួរចាប់អារម្មណ៍ដទៃទៀត។ ខាងក្រោមនេះគឺជាព្រឹត្តិការណ៍គួរឱ្យទន្ទឹងរង់ចាំទាំង 6 ក្នុងវិស័យបាល់ទាត់របស់ពិភពលោក។

1-FIFA Club World Cup

តាមធម្មតា ពានរង្វាន់ជើងឯកបាល់ទាត់របស់ម្ចាស់ជើងឯកមកពីបណ្ដាទ្វីបនៅលើពិភពលោកនឹងត្រូវធ្វើឡើងនៅចុងខែធ្នូ។ ប៉ុន្តែ ដោយសារតែវត្តមានរបស់វគ្គផ្ដាច់ព្រ័ត្រ World Cup 2022 ទើប Club World Cup ត្រូវបានកំណត់ឱ្យប្រព្រឹត្តទៅនៅដើមឆ្នាំ 2023 វិញ។ FIFA Club World Cup ឆ្នាំ 2023 នឹងត្រូវធ្វើឡើងចាប់ពីថ្ងៃទី 01 ដល់ 11 កុម្ភៈនៅម៉ារ៉ុក ដោយមានការចូលរួមប្រកួតរបស់ក្រុមបាល់ទាត់ចំនួន 7 មកពីសហព័ន្ធបាល់ទាត់ចំនួន 6 លើពិភពលោក។

ឈ្មោះក្រុមម្ចាស់ជើងឯកដែលត្រូវចូលរួមប្រកួតនៅ FIFA Club World Cup ឆ្នាំ 2023 រួមមាន Real Madrid (អេស្ប៉ាញ), Flamengo (ប្រេស៊ីល), Seattle Sounders (សហរដ្ឋអាម៉េរិក), Auckland City (នូវែលសេឡង់), Al Hilal (អារ៉ាប៊ីសាអូឌីត), Wydad Casablanca (ម៉ារ៉ុក) និង Al Ahly (អេហ្ស៊ីប)។

2-វគ្គផ្ដាច់ព្រ័ត្រ Europa League

តាមធម្មតា ព្រឹត្តិការណ៍បាល់ទាត់នេះហាក់មិនសូវត្រូវបានចាប់អារម្មណ៍ខ្លាំង ព្រោះថា វាគ្រាន់តែជាពានរង្វាន់លំដាប់ទីពីររបស់ទ្វីបអឺរ៉ុប។ ក៏ប៉ុន្តែ Europa League 2022/2023 មានចំណុចពិសេសជាងគេនៅពេលមានវត្តមានរបស់ក្រុមបាល់ទាត់លំដាប់កំពូលៗនៅអឺរ៉ុប មានដូចជា Man United, Barcelona, Juventus និង Ajax ជាដើម។

នៅចំពោះមុខ ក្នុងខែកុម្ភៈខាងមុខនឹងមាន «ការប្រកួតផ្ដាច់ព្រ័ត្រសាកល្បង» រវាង Barcelona និង Manchester United។ ការប្រកួតផ្ដាច់ព្រ័ត្រផ្លូវការនឹងត្រូវធ្វើឡើងក្នុងថ្ងៃទី 31 ឧសភា នៅកីឡដ្ឋាន Puska ប្រទេសហុងគ្រី។

3-វគ្គផ្ដាច់ព្រ័ត្ររបស់ Champions League

វគ្គផ្ដាច់ព្រ័ត្រនេះតែងតែជាព្រឹត្តិការណ៍មួយដែលត្រូវបានទន្ទឹងរង់ចាំបំផុតជារៀងរាល់ឆ្នាំ។ នៅខែកុម្ភៈខាងមុខ Champions League ដែលជាពានរង្វាន់បាល់ទាត់លំដាប់លេខមួយនៅអឺរ៉ុប នឹងមានការប្រកួតវគ្គ 1/8។ វគ្គផ្ដាច់ព្រ័ត្ររបស់ពានរង្វាន់ Champions League នឹងត្រូវធ្វើឡើងនៅថ្ងៃទី 10 មិថុនានៅ Olympic Ataturk ប្រទេសតួកគី។

4-UEFA Nations League

ឆ្នាំនេះ Nations League ដែលជាពានរង្វាន់បាល់ទាត់អន្តរជាតិរបស់សហភាពសហព័ន្ធបាល់ទាត់អឺរ៉ុប (Union of European Football Associations-UEFA) ប្រាកដជានឹងមានវត្តមានរបស់ម្ចាស់ជើងឯកថ្មីសន្លាង បន្ទាប់ពីអតីតម្ចាស់ជើងឯកព័រទុយហ្កាល់ និងបារាំងសុទ្ធតែត្រូវបានជម្រុះ។ តំណាង 4 ក្រុមដែលនឹងមានវត្តមាននៅក្នុងវគ្គពាក់កណ្ដាលផ្ដាច់ព្រ័ត្រចាប់ពីថ្ងៃទី 14 ដល់ 15 មិថុនា នឹងរួមមាន ក្រុមអេស្ប៉ាញ ក្រូអាត អ៊ីតាលី និងហូឡង់។ វគ្គផ្ដាច់ព្រ័ត្រនឹងត្រូវធ្វើឡើងនៅថ្ងៃទី 18 មិថុនា 2023។

5-AFC Asian Cup 2023

តាមផែនការដំបូង ព្រឹត្តិការណ៍ប្រកួតបាល់ទាត់ដណ្ដើមពានរង្វាន់ជើងឯកអាស៊ី នឹងត្រូវធ្វើឡើងចាប់ពីថ្ងៃទី 16 មិថុនា រហូតដល់ 17 កក្កដា នៅប្រទេសចិន។ ក៏ប៉ុន្តែ ប្រទេសនេះបានដកខ្លួនវិញដោយសារកូវីដ-19 ហើយកាតាត្រូវបានប្រកាសថា នឹងធ្វើជាម្ចាស់ផ្ទះ AFC Asian Cup 2023។

AFC Asian Cup 2023 ប្រហែលជានឹងត្រូវយកទៅប្រារព្ធនៅចុងឆ្នាំនេះ ដោយសារតែអាកាសធាតុក្នុងរដូវក្ដៅនៅកាតា មានសភាពក្ដៅខ្លាំង។

6- FIFA Women’s World Cup 2023

ឆ្នាំនេះ ការប្រកួតបាល់ទាត់ពានរង្វាន់ជើងឯកនារីពិភពលោកនឹងត្រូវធ្វើឡើងនៅប្រទេសអូស្ត្រាលី និងនូវែលសេឡង់ ចាប់ពីថ្ងៃទី 20 កក្កដា ដល់ 20 សីហា 2023៕

January 26, 2023

ណាសារកឃើញ «ពពកយក្សបង្កបង្កើតជីវិត» ត្រជាក់បំផុតក្នុងចក្រវាល

តេឡេស្កុបអវកាស James Webb របស់ណាសា រកឃើញដុំពពកយក្សផ្ទុកសមាសធាតុមួយចំនួនដែលបង្កើតបានជាលំហមួយមានសីតុណ្ហភាព -263 អង្សាសេ។

នៅក្នុងលទ្ធផលនៃការសិក្សាស្រាវជ្រាវដែលត្រូវបានចុះផ្សាយលើទស្សនាវដ្ដី Nature Astronomy កាលពីថ្ងៃទី 23 មករា ក្រុមតារាវិទូបានប្រើប្រាស់ Webb ដើម្បីសង្កេតមើលផ្នែកខាងក្នុងរបស់ដុំពពកយក្សដែលមានឈ្មោះថា Chameleon I មានចម្ងាយពីផែនដីប្រហែល 500 ឆ្នាំពន្លឺ និងបានរកឃើញស្រទាប់ទឹកកកមួយដែលមានផ្ទុកសមាសធាតុសំខាន់ក្នុងការកកើតជីវិត រួមមាន កាបូន អុកស៊ីសែន អ៊ីដ្រូសែន នីដ្រូសែន និងស្ពាន់ធ័រ ដែលត្រូវបានហៅជារួមថា COHNS។ ពួកវាគឺជាបណ្ដុំនៃសមាសធាតុដែលបង្កើតពិភពដែលអាចរស់នៅបាន។

បណ្ដាដុំពពកដូច Chameleon I នេះ ក៏ត្រូវបានហៅថា ថ្នាលបណ្ដុះផ្កាយ ព្រោះថា ការ «ដួលរលំ» របស់ពួកវា បន្តិចម្ដងៗនឹងបង្កើតបានជាផ្កាយ និងភព។ សមាសធាតុគីមីខាងលើត្រូវបានកំណត់ដោយបណ្ដាស្រទាប់ទឹកកកនៅជ្រៅខាងក្នុងពពក Chameleon I។

ក្រៅពី COHNS សាមញ្ញ ក្រុមតារាវិទូខាងលើក៏បានរកឃើញភស្ដុតាងស្ដីពីទឹកដែលបានកក រួមនឹងម៉ូលេគុលសរីរាង្គស្មុគស្មាញជាងនេះ មានដូចជា មេតាណុល មេតាន អាម៉ូនិក និងកាបូនអ៊ីលស៊ុលហ្វីត (methanol, methane, ammoniac, carbonyl sulfide) ទៀតផង។

យោងតាម Space/CNN នាពេលខាងមុខ ក្រុមអ្នកវិទ្យាសាស្ត្រនេះគ្រោងនឹងប្រើប្រាស់ទិន្នន័យរបស់ James Webb ដើម្បីគណនារកទំហំរបស់គ្រាប់ធូលី និងទម្រង់រូបរាងរបស់ទឹកកក។ ការសង្កេតទាំងនេះនឹងបើកផ្លូវឱ្យមានការយល់ដឹងច្បាស់អំពីដំណើរការកកើតរបស់បណ្ដាម៉ូលេគុលសាមញ្ញ និងស្មុគស្មាញចាំបាច់ដើម្បីបង្កើតបានជាបណ្ដុំបង្កបង្កើតជីវិត៕

January 26, 2023

ភាពយន្តស្ដីពី Marilyn Monroe ក្លាយជាម្ចាស់បេក្ខភាពចំនួន 8 នៅពានរង្វាន់ Golden Raspberry

«Blonde» ដែលជាភាពយន្តប្រឌិតស្ដីពី Marilyn Monroe កំពុងនាំមុខគេនៅពានរង្វាន់ Golden Raspberry ដោយកាន់កាប់បេក្ខភាពដល់ទៅ 8 ឯណោះ។

ភាពយន្ត «Blonde» ដែលជាស្នាដៃរបស់អ្នកដឹកនាំរឿង Andrew Dominik ទទួលបានការជ្រើសរើសជាបេក្ខភាពសម្រាប់តំណែង «អ្នកដឹកនាំរឿងអន់បំផុត», «សាច់រឿងអន់បំផុត», «កំណែថតឡើងវិញអន់បំផុត», «តួរងប្រុសអន់បំផុត (ពីរនាក់)» និងបេក្ខភាព «តារាសម្ដែងមួយគូអន់បំផុតក្នុងភាពយន្ត»។

«Blonde» ត្រូវបានចាក់បញ្ចាំងតាំងពីថ្ងៃទី 28 កញ្ញា 2022។ តារាសម្ដែងដើមកំណើតគុយបា Ana de Armas ដើរតួជាកំពូលតារា «និមិត្តរូបស៊ិច» ដ៏ល្បីឈ្មោះនៅ Hollywood គឺ Marilyn Monroe។ សាច់រឿងរបស់ Blonde គឺយោងទៅតាមប្រលោមលោក Blonde របស់អ្នកនិពន្ធ Joyce Carol Oates ដែលចេញផ្សាយដំបូងកាលពីឆ្នាំ 2000។

ខ្លឹមសាររបស់ប្រលោមលោក និងភាពយន្តខាងលើយកលំនាំតាមដំណឹងចចាមអារ៉ាមជុំវិញជីវភាពរបស់ Marilyn Monroe ជំនួសឱ្យការយកលំនាំតាមជីវប្រវត្តិសង្ខេប។ អ្នកតាមដាន និងអ្នកវិភាគជាច្រើនយល់ថា ភាពយន្ត Blonde នេះមានលក្ខណៈបង្ខូចកេរ្តិ៍ឈ្មោះរបស់ Marilyn Monroe។

អ្នកតាមដាន និងអ្នកវិភាគជាច្រើនយល់ថា ភាពយន្ត Blonde នេះមានលក្ខណៈបង្ខូចកេរ្តិ៍ឈ្មោះរបស់ Marilyn Monroe

ភាពយន្តមួយចំនួនផ្សេងទៀតក៏ត្រូវបានជ្រើសរើសជាបេក្ខភាពសម្រាប់តំណែងភាពយន្តអន់បំផុត ក្នុងនោះមានដូចជា Pinocchio របស់ Disney, Morbius និង The King’s Daughter។

Golden Raspberry គឺជាពានរង្វាន់ប្រចាំឆ្នាំ ដែលត្រូវបានបង្កើតឡើងកាលពីឆ្នាំ 1981 ដើម្បីជាការចំអកឱ្យបណ្ដាភាពយន្ត អ្នកដឹកនាំរឿង និងតារាសម្ដែងដែលបានបរាជ័យ។ ឆ្នាំនេះ ព្រឹត្តិការណ៍របស់ Golden Raspberry នឹងត្រូវធ្វើឡើងក្នុងថ្ងៃទី 12 មីនា មុនព្រឹត្តិការណ៍ Oscar មួយថ្ងៃ៕

January 25, 2023

អាជ្ញាកណ្ដាល «បញ្ចេញកាតស» នៅព័រទុយហ្កាល់ ក្នុងការប្រកួតបាល់ទាត់នារី

ជាលើកដំបូងហើយនៅក្នុងប្រវត្តិសាស្ត្របាល់ទាត់ ដែលអាជ្ញាកណ្ដាលបញ្ចេញកាតសនៅក្នុងការប្រកួតបាល់ទាត់អាជីពមួយនៅប្រទេសព័រទុយហ្កាល់កាលពីចុងសប្ដាហ៍កន្លង។

កាត់ក្រហម និងកាត់លឿងដែលសម្រាប់ការពិន័យចំពោះកីឡាករដែលបានបង្កកំហុស គឺជាផ្នែកមួយមិនអាចខ្វះបាននៅក្នុងកីឡាបាល់ទាត់ក្នុងរយៈពេលច្រើនទសវត្សរ៍កន្លងមកនេះ។ ក៏ប៉ុន្តែ កាលពីចុងសប្ដាហ៍កន្លង ប្រទេសព័រទុយហ្កាល់បាន «បង្ហាញ» កាត់សជាលើកដំបូង ដើម្បីឆ្លើយតបនឹងគំនិតផ្ដួចផ្ដើមមួយចំនួននៅប្រទេសនេះ។

កាតសត្រូវបានប្រើប្រាស់ដើម្បីទទួលស្គាល់ លើកទឹកចិត្តឱ្យកីឡាករលេងដោយយុត្តិធម៌ និងលើកតម្កើងតម្លៃសីលធម៌ក្នុងកីឡា។ ឥរិយាបថនេះគឺជាផ្នែកមួយក្នុងគំនិតផ្ដួចផ្ដើមថ្មីនៅព័រទុយហ្កាល់ ក្នុងបំណងលើកទឹកចិត្តគ្រប់ភាគីប្រកួតដោយស្មារតីកីឡា ហើយក៏ទទួលបានការគាំទ្រពីសាធារណជន។

កាតសត្រូវបានប្រើប្រាស់ជាលើកដំបូងក្នុងការប្រកួតវគ្គ 8 ក្រុមចុងក្រោយនៅពានរង្វាន់ជាតិព័រទុយហ្កាល់ រវាងក្រុមនារី Benfica និង Sporting Lisbon។ អាជ្ញាកណ្ដាល Catarina Campos បានហូតកាត់សជូនបុគ្គលិកសុខាភិបាលដែលចូលមកកាន់ទីលានទាន់ពេលដើម្បីជួយដល់កីឡាករដែលរងរបួស។

https://www.youtube.com/watch?v=Cf9_fjbhzjQ

អាជ្ញាកណ្ដាល Catarina Campos បានហូតកាត់សជូនបុគ្គលិកសុខាភិបាល

កាតសនឹងត្រូវបានប្រើប្រាស់នៅក្នុងការប្រកួតបាល់ទាត់នារីអាជីពនៅព័រទុយហ្កាល់ ដែលមានពានរង្វាន់ថ្នាក់ជាតិ និងពានរង្វាន់ជើងឯកជាតិ។

ប្រធានរបស់ UEFA (ពានរង្វាន់ជើងឯកបាល់ទាត់នារីអឺរ៉ុប) ធ្លាប់បានស្នើឱ្យប្រើប្រាស់កាតសសម្រាប់ការពិន័យលើកំហុសផ្នែកប្រតិកម្ម ធ្វើឱ្យកីឡាករមិនបានទាត់ក្នុងរយៈពេល 10 នាទី និងដើម្បីប្រឆាំងនឹង «វិវាទអាជ្ញាកណ្ដាល»។ ក៏ប៉ុន្តែ សំណើនេះមិនទទួលបានការអនុម័ត៕

January 25, 2023

វឌ្ឍនភាពបច្ចុប្បន្ននៃការស្ថាបនាមហាគម្រោង NEOM របស់អារ៉ាប៊ីសាអូឌីត

Nadhmi Al-Nasr នាយកប្រតិបត្តិនៃគម្រោង NEOM បានឱ្យដឹងថា ការស្ថាបនាហេដ្ឋារចនាសម្ព័ន្ធរបស់មហាទីក្រុងនេះសម្រេចបាន 20% ហើយ។

យោងតាម Al-Nasr ដំណើរការសាងសង់មហាទីក្រុងអនាគត NEOM កំពុងប្រព្រឹត្តទៅត្រូវតាមគម្រោងការ។ វីដេអូថ្មីបំផុតដែលត្រូវបានចែករំលែកដោយគណៈគ្រប់គ្រងគម្រោងបានបង្ហាញនូវទិដ្ឋភាពជាក់ស្ដែងនៃគម្រោងធំៗចំនួន 4 របស់មហាគម្រោង NEOM រួមមាន កោះ Sindalah, The Line, Trojena និង Oxagon នេះបើតាម Menafn ចុះផ្សាយកាលពីថ្ងៃទី 22 មករា 2023។

គម្រោងធំៗចំនួន 4 របស់មហាគម្រោង NEOM រួមមាន កោះ Sindalah, The Line, Trojena និង Oxagon

Sindalah គឺជាគម្រោងស្ថាបនាកោះប្រណិតនៅចំតំបន់ប្រសពគ្នារវាងសមុទ្រមេឌីទែរ៉ាណេ និងសមុទ្រក្រហម អនុញ្ញាតឱ្យកប៉ាល់ និងនាវាប្រណិតរបស់ពិភពលោកទៅមកបាន។ តំបន់លំហែកាយនេះនឹងរួមមានក្លឹបលើឆ្នេរសមុទ្រ ក្លឹបនាវាទេសចរណ៍ មជ្ឈមណ្ឌលហាត់ប្រាណ ស្ប៉ា ហាងទំនិញប្រណិតរាប់សិប និងទីលានវាយកូនគោល សណ្ឋាគារ និងកំពង់ផែធំមួយ។ Sindalah នឹងមានផ្ទៃដីឡើងដល់ជាង 840,000 ម៉ែត្រក្រឡា។

The Line គឺជាទីក្រុងឆ្លាតវៃអាចដាក់មនុស្សបាន 9 លាននាក់ ដោយមានទំហំ 34 គីឡូម៉ែត្រក្រឡា។ អាកាសធាតុនៅទីនេះនឹងត្រជាក់ល្មមដោយសារមានរុក្ខជាតិធម្មជាតិនៅជុំវិញ។ ប្រជាជននៅទីនេះអាចទៅទទួលរាល់សេវាកម្មផាសុកភាពដោយដើរតែ 5 នាទីប៉ុណ្ណោះ ហើយអាចធ្វើដំណើរពីដើមក្រុងទៅចុងក្រុងដោយជិះរថភ្លើងល្បឿនលឿនតែ 20 នាទី។ The Line មិនមានរថយន្ត និងមិនមានការបំភាយឧស្ម័នពុល ដោយសារដំណើរការដោយថាមពលកកើតឡើងវិញ 100%។ ទីក្រុងនេះមានទទឹង 200 ម៉ែត្រ, បណ្ដោយ 170 គីឡូម៉ែត្រ និងកម្ពស់ 500 ម៉ែត្រ ធៀបនឹងផ្ទៃទឹកសមុទ្រ។

Trojena គឺជាតំបន់លំហែកាយសម្រាប់អ្នកជិះស្គីលើទឹកកក ស្ថិតនៅចម្ងាយ 50 គីឡូម៉ែត្រពីតំបន់ឆ្នេរនៃឈូងសមុទ្រ Aqaba និងមានកម្ពស់ចាប់ពី 1,500 ម៉ែត្រ ដល់ 2,600 ម៉ែត្រ ហើយមានទំហំជិត 60 គីឡូម៉ែត្រក្រឡា។ ដោយមានអាកាសធាតុខុសគ្នានៅក្នុងតំបន់ ជាទីដែលសីតុណ្ហភាពក្នុងរដូវរងាចុះដល់ក្រោម 0 អង្សាសេ និងអាកាសធាតុពេញមួយឆ្នាំតែងតែត្រជាក់ជាង 10 អង្សាសេ ធៀបនឹងតំបន់ដទៃ គម្រោង Trojena នឹងមានសេវាកម្មកីឡាជិះស្គីលើទឹកកកនៅខាងក្រៅអគារ និងកីឡាផ្សងព្រេងជាច្រើនផ្សេងទៀត ដែលគ្រោងនឹងស្ថាបនារួចរាល់នៅឆ្នាំ 2026។

Oxagon គឺជាទីក្រុងដែលមានរូបរាងជា 8 ជ្រុង (អដ្ឋកោន) ស្ថិតនៅជាយម្ខាងរបស់មហាគម្រោង NEOM។ Oxagon នឹងអនុវត្តគោលការណ៍រស់នៅប្រកបដោយភាពសុខដុមជាមួយធម្មជាតិ និងជាមជ្ឈមណ្ឌលដឹកជញ្ជូនដែលមានបច្ចេកវិទ្យាទំនើបបំផុតលើពិភពលោក ដោយមានកំពង់ផែសមុទ្រ និងព្រលានយន្តហោះទំនើបបំផុត។ គម្រោងនេះនឹងបម្រើដល់វិស័យចំនួន 7 រួមមាន ថាមពលប្រកបដោយនិរន្តរភាព ការដឹកជញ្ជូនដោយស្វ័យប្រវត្ត ការផលិតទឹកស្អាត ការផលិតអាហារប្រកបដោយនិរន្តរភាព ថែទាំសុខភាព បច្ចេកវិទ្យា និងការផលិតឧបករណ៍បច្ចេកវិទ្យាឌីជីថល (រួមមាន ទូរគមនាគមន៍ បច្ចេកវិទ្យាអវកាស រ៉ូបូត) រួមនឹងមធ្យោបាយសាងសង់ទំនើបបំផុត នេះបើតាម Interesting Engineering។

វីដេអូស្ដីពីមហាគម្រោង NEOM របស់អារ៉ាប៊ីសាអូឌីត

January 25, 2023

លិចកប៉ាល់ដឹកទំនិញនៅលើសមុទ្រជប៉ុន នាំឱ្យមនុស្ស 18 នាក់បាត់ខ្លួន

កម្លាំងការពារឆ្នេរសមុទ្រជប៉ុនប្រកាសថា កប៉ាល់ដឹកទំនិញ Jintan បានលិចនៅលើលំហសមុទ្រ Nagasaki នៅពេលយប់ ហើយសមត្ថកិច្ចសង្គ្រោះបាន 4 នាក់ ចំណែក 18 នាក់ទៀតកំពុងបាត់ខ្លួន។

ប៉ូលិសសមុទ្រជប៉ុន (JCG) បានឱ្យដឹងថា កប៉ាល់ Jintan បានបញ្ចេញសញ្ញាសុំជួយសង្គ្រោះនៅវេលាម៉ោងប្រហែល 23 និង 15 នាទី (ម៉ោង 21 និង 15 នាទីនៅកម្ពុជា) ថ្ងៃទី 24 មករា ចេញពីតំបន់សមុទ្ររបស់ខេត្ត Nagasaki និងមានចម្ងាយពីកោះ Danjo ប្រហែល 110 គីឡូម៉ែត្រទៅទិសខាងលិច។

ក្រុមនាវិកពេលនោះបានប្រាប់ថា «កប៉ាល់ផ្អៀង និងចូលទឹក» ហើយថាបានឡើងទូកសង្គ្រោះបន្ទាន់មុនពេលកប៉ាល់នេះលិច។ នៅលើកប៉ាល់ Jintan នេះមានមនុស្ស 14 នាក់ជាជនជាតិចិន និង 8 នាក់ជាជនជាតិមីយ៉ានម៉ា។

JCG បញ្ជាក់ថា កប៉ាល់ Jintan មានទម្ងន់ 6,600 តោន ចុះឈ្មោះនៅហុងកុង។ ការិយាល័យនាយករដ្ឋមន្ត្រីជប៉ុន ឱ្យដឹងថា បានបង្កើតក្រុមទំនាក់ទំនងមួយរួចហើយដើម្បីសម្រួលដល់ករណីលិចកប៉ាល់នេះ។

ឧបទ្ទវហេតុនេះបានកើតឡើងនៅពេលប្រទេសជប៉ុនកំពុងរងអាកាសធាតុត្រជាក់ខ្លាំង ក្នុងនោះ សីតុណ្ហភាពនៅលើកោះមួយចំនួននៅក្បែរកន្លែងកើតហេតុបំផុត ចុះត្រជាក់ដល់ 3 អង្សាសេ នៅពេលថ្ងៃ៕

January 25, 2023

«នាឡិកាប្រាប់ថ្ងៃវិនាសនៃផែនដី» រំកិលទៅមុខថែម 10 វិនាទីទៀតហើយ!

ដោយសារតែការគំរាមកំហែងពីសង្គ្រាមរវាងរុស្ស៊ី និងអ៊ុយក្រែន ឆ្នាំនេះទ្រនិចនាឡិកាប្រាប់ថ្ងៃវិនាសរបស់ផែនដីត្រូវបានរំកិលទៅមុខ 10 វិនាទីបន្ថែមទៀត ដោយស្ថិតនៅឆ្ងាយពីចំណុចកណ្ដាអធ្រាត្រត្រឹមតែ 90 វិនាទីប៉ុណ្ណោះ។

កាលពីម៉ោង 22 ថ្ងៃទី 24 មករា ម៉ោងនៅកម្ពុជា ព័ត៌មានរបស់ក្រុមអ្នកវិទ្យាសាស្ត្រអាតូមិច (BAS) បានប្រកាសពីការរំកិលទ្រនិចនាទីរបស់នាឡិកាប្រាប់ថ្ងៃវិនាសនៃផែនដីទៅកាន់តែជិតដល់ចំណុចពាក់កណ្ដាលយប់ ដែលនេះគឺជាការប្រែប្រួលដំបូងនៅក្នុងរយៈពេល 3 ឆ្នាំកន្លង។ បច្ចុប្បន្ន ទ្រនិចនាឡិកានេះត្រូវបានដាក់ត្រង់ចំណុច 90 វិនាទីមុនពាក់កណ្ដាលយប់។ ក្នុងប្រវត្តិសាស្ត្រ 76 ឆ្នាំរបស់នាឡិកាប្រាប់ថ្ងៃវិនាសនៃផែនដី មនុស្សជាតិមិនធ្លាប់ដើរដល់ក្បែរចំណុចមហន្តរាយសកលដល់កម្រិតនេះឡើយ។

នាឡិកាប្រាប់ថ្ងៃវិនាសនៃផែនដីត្រូវបានបង្ហាញជាលើកដំបូងនៅពេលសង្គ្រាមត្រជាក់បានចាប់ផ្ដើមនៅឆ្នាំ 1947 និងស្ថិតនៅត្រង់ចំណុច 7 នាទីមុនពាក់កណ្ដាលយប់។ ជារៀងរាល់ឆ្នាំ សមាជិកទាំងឡាយរបស់ក្រុមប្រឹក្សាវិទ្យាសាស្ត្រ និងសន្តិសុខរបស់ BAS នឹងកែប្រែទ្រនិចនាឡិកាដើម្បីបង្ហាញអំពីស្ថានភាពដែលបង្កើតឡើងដោយព្រឹត្តិការណ៍នានាក្នុងឆ្នាំចាស់ ដែលបានរុញច្រានមនុស្សជាតិទៅជិត ឬឆ្ងាយពីហានិភ័យនៃការបំផ្លាញខ្លួនឯង។ បច្ចុប្បន្ន នាឡិកាថ្ងៃវិនាសនៃផែនដីត្រូវបានប្រើប្រាស់ដើម្បីព្រមានអំពីការគំរាមកំហែងដែលមានប្រភពពីគ្រប់អាវុធប្រល័យលោក ការបំផ្លិចបំផ្លាញបរិស្ថាន និងបម្រែបម្រួលអាកាសធាតុជាដើម ចំពោះពិភពលោក។

ឆ្នាំ 2020 ទ្រនិចនាឡិកាប្រាប់ថ្ងៃវិនាសនៃផែនដី ស្ថិតនៅត្រង់ចំណុច 100 វិនាទីមុនពាក់កណ្ដាលយប់។ ក្នុងរយៈពេល 2 ឆ្នាំកន្លង ទ្រនិចនាឡិកានេះស្ថិតនៅត្រង់ចំណុចនេះដដែល។

ឆ្នាំនេះ BAS រំកិលទ្រនិចនាទីរបស់នាឡិកាប្រាប់ថ្ងៃវិនាសនៃផែនដីទៅមុខ ដោយសារតែការគំរាមកំហែងពីសង្គ្រាមនៅអ៊ុយក្រែន។ បច្ចុប្បន្ន នាឡិកានេះកំពុងស្ថិតនៅត្រង់ចំណុច 90 វិនាទីមុនពាក់កណ្ដាលយប់ ដែលនេះបង្ហាញថា ពិភពលោកទាំងមូលកំពុងស្ថិតនៅក្បែរមាត់ជ្រោះមហន្តរាយបំផុតមិនធ្លាប់មានពីមុនមក» BAS បញ្ជាក់ដូច្នេះ៕

January 25, 2023

ពាក្យចចាមអារ៉ាមដែលថា Messi នឹងចាកចេញពី PSG «ជិតបានក្លាយជាអតីតកាល»

អនាគតរបស់ Lionel Messi ត្រូវបានបញ្ជាក់យ៉ាងច្បាស់នៅចំពោះមុខពាក្យចចាមអារ៉ាមដែលថា ម្ចាស់ជើងឯក World Cup 2022 នឹងចាកចេញពីក្លឹប PSG នៅរដូវក្ដៅឆ្នាំនេះ។

ថ្មីៗនេះមានអ្នកសារព័ត៌មានល្បីៗជាច្រើនបានបង្ហើបព័ត៌មានមួយចំនួនទាក់ទិននឹង Messi ធ្វើឱ្យច្របូកច្របល់ក្នុងវិស័យបាល់ទាត់។ ក្នុងនោះមានអ្នកខ្លះថា Messi បានផ្លាស់ប្ដូរគំនិត មិនចង់បន្តកិច្ចសន្យាជាមួយ PSG នៅរដូវក្ដៅឆ្នាំនេះ ខណៈដែលអ្នកខ្លះក៏ថា ទំនាក់ទំនងរវាង Messi និងក្លឹប PSG ក៏ដូចជាអ្នកគាំទ្រនៅបារាំងមានបញ្ហាធំ ក្រោយពីខ្សែប្រយុទ្ធរូបនេះ និងក្រុមជម្រើសជាតិអាហ្សង់ទីនដណ្ដើមបានពានរង្វាន់ជើងឯក World Cup 2022។ ចំណែកអ្នកខ្លះទៀតក៏យល់ថា Messi មិនអើពើដល់រឿងប្រាក់កាស ដែលនេះមានន័យថា គាត់បន្តកិច្ចសន្យាជាមួយ PSG ក៏បាន មិនបន្តក៏ «មិនខ្ចីខ្វល់»។

ទោះជាយ៉ាងណាក៏ដោយ បុគ្គលមួយចំនួនដែលគួរជាទីទុកចិត្តបានច្រានចោលរាល់ព័ត៌មានខាងលើ។ លោកFabrizio Romano ដែលជាអ្នកជំនាញខាងព័ត៌មានទិញដូរកីឡាករបាល់ទាត់ មកពី Sky Sport Italy របស់អ៊ីតាលី បានអះអាងថា «ទោះជាមានពាក្យចចាមអារ៉ាមកន្លងមក Lionel Messi ជិតបន្តកិច្ចព្រមព្រៀងជាមួយ PSG។ គាត់កំពុងមានសុភមង្គល»។

អ្នកខ្លះថា ទំនាក់ទំនងរវាង Messi និងក្លឹប PSG ក៏ដូចជាអ្នកគាំទ្រនៅបារាំងមានបញ្ហាធំ ក្រោយពីខ្សែប្រយុទ្ធរូបនេះ និងក្រុមជម្រើសជាតិអាហ្សង់ទីនដណ្ដើមបានពានរង្វាន់ជើងឯក World Cup 2022

ក្រៅពីនេះ អ្នកសារព័ត៌មាន Gaston Edul របស់ប៉ុស្តិ៍ TyC Sports (អាហ្សង់ទីន) ដែលស្និទ្ធខ្លាំងជាមួយនឹង Messi ទើបតែបញ្ជាក់ថា កំពូលតារាបាល់ទាត់របស់អាហ្សង់ទីនរូបនេះ មិនមានបំណងចាកចេញពី PSG ឡើយ ក្រោយរដូវកាលបច្ចុប្បន្ន។ «ការណ៍ដែលថា Messi នឹងចាកចេញពី PSG គឺជារឿងមិនមានមូលដ្ឋាន។ គាត់កំពុងចរចាជាមួយក្លឹបបាល់ទាត់បារីសតែមួយគត់។ ភាគីទាំងពីរកំពុងត្រៀម «ដាស់» មាត្រាដែលនិយាយអំពីការបន្តកិច្ចព្រមព្រៀងដោយស្វ័យប្រវត្តមួយរដូវកាល (រហូតដល់ខែមិថុនា 2024) និងចុះហត្ថលេខាបន្ថែមមួយរដូវកាលទៀត»។

បច្ចុប្បន្ន Lionel Messi មិនទាន់មានប្រតិកម្មអ្វីនៅឡើយទាក់ទងនឹងអនាគត ហើយគាត់ហាក់បានស៊ាំនឹងជីវភាពនៅបារីស បន្ទាប់ពីមួយរដូវកាលដំបូងប្រកបដោយការលំបាក។ មនុស្សមួយចំនួនយល់ថា គោលដៅបន្ទាប់របស់ Messi នឹងត្រូវបានកំណត់ច្បាស់ នៅពេលរដូវកាលឆ្នាំនេះបានបញ្ចប់៖ «បើជួយឱ្យ PSG ដណ្ដើមបានពានរង្វាន់ Champions League Messi ប្រាកដជានឹងបន្តនៅបារីស ប៉ុន្តែ បើមិនដូច្នេះទេ គាត់ទំនងជានឹងត្រូវចែកផ្លូវគ្នាដើរជាមួយនឹង PSG៕

January 25, 2023

អគ្គិសនីអង់គ្លេសផ្ដល់ប្រាក់ឱ្យអតិថិជនដើម្បីកាត់បន្ថយការប្រើប្រាស់ភ្លើង

ក្រុមហ៊ុនអគ្គិសនី National Grid ប្រកាសអនុវត្តកម្មវិធីផ្ដល់ជំនួយជាទឹកប្រាក់ដើម្បីឱ្យអតិថិជននៅអង់គ្លេសប្រើប្រាស់អគ្គិសនីតិចជាងមុននៅក្នុងម៉ោងមមាញឹក។

ក្រុមហ៊ុនអគ្គិសនី និងឧស្ម័នពហុជាតិ National Grid ដែលមានទីស្នាក់ការកណ្ដាលនៅប្រទេសអង់គ្លេស កាលពីថ្ងៃទី 22 មករា បានឱ្យដឹងថា នឹងចំណាយប្រាក់ដើម្បីឱ្យអតិថិជនក្នុងប្រទេសនេះប្រើប្រាស់អគ្គិសនីតិចជាងមុននៅក្នុង 2 ថ្ងៃដើមសប្ដាហ៍។ នេះគឺជាករណីដំបូងដែល National Grid អនុវត្តកម្មវិធីនេះដើម្បីទប់ស្កាត់បញ្ហាខ្វះអគ្គិសនី។

គ្រួសារ និងក្រុមហ៊ុនជាង 1 លានដែលបានចុះឈ្មោះប្រើប្រាស់សេវាតម្រូវការបត់បែន (DFS) នឹងត្រូវបានដកថ្លៃប្រើប្រាស់អគ្គិសនីប្រហែល 3 ផោនសម្រាប់រៀងរាល់ 1 គីឡូវ៉ាតដែលពួកគេសំច័យបាននៅក្នុងអំឡុងពេលពីម៉ោង 17-18 ចាប់ពីថ្ងៃទី 23 ដល់ 24 មករា។ តាមការគណនា ការដកថ្លៃអគ្គិសនីនេះមានតម្លៃចន្លោះពី 6 ទៅ 20 ផោន។

ក្រុមហ៊ុន National Grid បញ្ជាក់ថា កម្មវិធីនេះមិនមែនមានន័យថា ប្រភពផ្គត់ផ្គង់អគ្គិសនីជួបហានិភ័យនោះទេ ដូច្នេះគ្រប់គ្នាមិនត្រូវបារម្ភឡើយ។

បណ្ដាប្រទេសនៅអឺរ៉ុប កំពុងប្រឈមនឹងវិបត្តិថាមពលក្នុងរដូវរងា នៅពេលតម្លៃឥន្ធនៈកើនឡើងខ្ពស់ដោយសារឥទ្ធិពលនៃសង្គ្រាមរុស្ស៊ី-អ៊ុយក្រែន។ ទីក្រុមមូស្គូបានកាត់បន្ថយការនាំចេញឧស្ម័នទៅកាន់អឺរ៉ុប ធ្វើឱ្យបណ្ដាប្រទេសនៅតំបន់នេះ ត្រូវទិញឧស្ម័នពីប្រភពផ្សេងក្នុងតម្លៃថ្លៃ នាំឱ្យការចំណាយរបស់ប្រជាជនទៅលើថាមពលមានការកើនឡើងខ្ពស់ខ្លាំង៕

January 25, 2023

ករណីបាញ់ប្រហារទីបីនៅ California បណ្ដាលឱ្យមនុស្សច្រើននាក់ស្លាប់ និងរងរបួស

(សហរដ្ឋអាម៉េរិក) – ប៉ូលិសនៅ Oakland ឱ្យដឹងថា មានហេតុការណ៍បាញ់ប្រហារមួយផ្សេងទៀតបានបណ្ដាលឱ្យមនុស្សម្នាក់ស្លាប់ និង 7 នាក់របួស ដែលនេះគឺជាករណីបាញ់ប្រហារទីបីក្នុងរង្វង់ 3 ថ្ងៃ នៅរដ្ឋ California។

យោងតាមក្រុមមន្ត្រីនៅ Oakland កម្លាំងប៉ូលិសត្រូវបានបញ្ជូនទៅកាន់ផ្ទះមួយចំនួននៅក្បែរមហាវិថី Macarthur នៅវេលាម៉ោង 18 ថ្ងៃទី 23 មករា (ម៉ោង 6 ថ្ងៃទី 24 មករានៅកម្ពុជា) បន្ទាប់ពីទទួលបានសញ្ញាជូនដំណឹងពីប្រព័ន្ធចាប់សំឡេងកាំភ្លើងស្វ័យប្រវត្ត។ សមត្ថកិច្ចបានរកឃើញសម្បកគ្រាប់កាំភ្លើងជាច្រើនគ្រាប់នៅឯស្ថានីយប្រេងឥន្ធនៈមួយក្បែរទីលានសាលារៀន Mills College ប៉ុន្តែមិនឃើញជនរងគ្រោះ។

សមត្ថកិច្ចនៅ Oakland ប្រកាសថា ករណីផ្ទុះអាវុធកើតឡើង «រវាងមនុស្សមួយចំនួន»។ បន្ទាប់មក មន្ទីរពេទ្យមួយចំនួនក៏បានទាក់ទងទៅកាន់ប៉ូលិស និងរាយការណ៍អំពីការទទួលជនរងគ្រោះដែលរងរបួសដោយសារគ្រាប់កាំភ្លើង។

សាក្សីនិយាយថា ស្នូរគ្រាប់កាំភ្លើងផ្ទុះឡើងក្នុងពេលកំពុងថតវីដេអូចម្រៀង។ មនុស្ស 7 នាក់រងរបួសស្រាល ខណៈដែលអត្តសញ្ញាណរបស់ជនរងគ្រោះដែលបានស្លាប់ មិនទាន់ត្រូវបានបង្ហើបឱ្យដឹងនៅឡើយ ប៉ុន្តែ សមាជិកគ្រួសារជនរងគ្រោះបានប្រាប់ថា មានឈ្មោះ Mario Navarro អាយុ 18 ឆ្នាំ។

ហេតុការណ៍ខាងលើគឺជាករណីបាញ់ប្រហារទីបីនៅក្នុងរដ្ឋ California ក្នុងអំឡុងពេល 3 ថ្ងៃកន្លង។ ករណីបាញ់ប្រហារមុននោះប៉ុន្មានម៉ោង បានកើតឡើងនៅក្នុងទីតាំងដាច់ដោយឡែកក្នុងទីក្រុង Half Moon Bay មានចម្ងាយប្រហែល 65 គីឡូម៉ែត្រពី Oakland និងបានបណ្ដាលឱ្យមនុស្ស 7 នាក់ស្លាប់។

ករណីបាញ់ប្រហារមួយផ្សេងទៀតនៅ Monterey Park ក្នុងរដ្ឋ California កាលពីថ្ងៃទី 21 មករា បណ្ដាលឱ្យមនុស្សយ៉ាងតិច 11 នាក់បាត់បង់ជីវិត។ ជនសង្ស័យត្រូវបានគេដឹងថា មានឈ្មោះ Huu Can Tran អាយុ 72 ឆ្នាំ ប៉ុន្តែមិនទាន់ដឹងច្បាស់ពីមូលហេតុ។

នៅក្នុង 3 សប្ដាហ៍ដំបូងនៃឆ្នាំ 2023 សហរដ្ឋអាម៉េរិកកើតមានករណីបាញ់ប្រហារសម្លាប់មនុស្សសរុបចំនួន 39 លើកមកហើយ៕

January 25, 2023

Author: សឿន សំណាង