សឿន សំណាង - La Reine Media

យន្តហោះ Hybrid កូនកាត់ឧទ្ធម្ភាគចក្រ អាចហោះបានជិត 1,000 គីឡូម៉ែត្រ/ជើង

(អង់គ្លេស) – ក្រុមហ៊ុន Arc Aero Systems បានបង្ហាញយន្តហោះកូនកាត់ឧទ្ធម្ភាគចក្រ Linx P9 ដែលនឹងអាចយកឈ្នះលើបណ្ដាឧទ្ធម្ភាគចក្រដែលមានទំហំប្រហាក់ប្រហែលគ្នា ទាក់ទងនឹងល្បឿន រយៈចម្ងាយ និងការចំណាយនៅក្នុងការហោះហើរ។

គ្រោងឆ្អឹងរបស់ Linx P9 គឺជាការរួមផ្សំរវាងយន្តហោះធម្មតា ឧទ្ធម្ភាគចក្រធម្មតា និងឧទ្ធម្ភាគចក្រមានស្លាបហោះឡើងដោយសេរី។ រចនារូបរាងចម្រុះនេះមានទម្ងន់តែ 1,930 គីឡូក្រាមប៉ុណ្ណោះ។ Linx P9 មានកៅអីចំនួន 9, ស្លាបប្រវែង 12.6 ម៉ែត្រ, ស្លាបកង្ហាររុញច្រានមួយគូនៅផ្នែកខាងក្រៅ និងកន្ទុយខ្នាតធំ នេះបើតាម New Atlas ចុះផ្សាយកាលពីថ្ងៃទី 23 មករា។

ម៉ាស៊ីនរ៉ូទ័រ (rotor) 13 ម៉ែត្ររបស់យន្តហោះនេះ អាចកែប្រែទិសរបស់រង្វិល។ យន្តហោះ Linx P9 នេះប្រើប្រាស់ម៉ូទ័រអគ្គិសនីមួយគ្រឿង ជួយឱ្យរ៉ូទ័រខាងលើវិលបានលឿនដើម្បីឱ្យយន្តហោះអាចហោះឡើង និងចុះចតដោយត្រង់។ ក្រោយពីបានហោះឡើងទៅលើ ស្លាបកង្ហាររុញច្រាននឹងដំណើរការ និងផ្ដល់កម្លាំងលើកជាង 90% អនុញ្ញាតឱ្យរ៉ូទ័រដំណើរការយឺតមកវិញបាន។ រូបរាងរបស់ Linx P9 រួមចំណែកកាត់បន្ថយកម្លាំងកកិត និងកម្លាំងលើកមិនមានសមប្បមាណ (កម្លាំងមិនស្មើគ្នា)។ ជាលទ្ធផល យន្តហោះនេះអាចហោះក្នុងល្បឿនធ្វើដំណើរផ្លូវឆ្ងាយ 370 គីឡូម៉ែត្រ/ម៉ោង។

ស្លាបកង្ហាររុញច្រានរបស់ Linx P9 ដំណើរការដោយម៉ាស៊ីនទួរប៊ីន (turbomachinery) កម្លាំង 496 សេះ។ យោងតាមក្រុមហ៊ុន Arc Aero Systems ម៉ាស៊ីនទាំងនេះដំណើរការដោយឥន្ធនៈអាកាសចរណ៍និរន្តរភាព អាចជំនួសដោយថ្មផ្ទុកថាមពលអ៊ីដ្រូសែន។ ទំហំ និងល្បឿនរបស់ Linx P9 សមស្របនឹងការហោះហើររយៈចម្ងាយឆ្ងាយ។ Arc Aero Systems ឱ្យដឹងថា យន្តហោះនេះអាចហោះបាន 950 គីឡូម៉ែត្រ ដោយប្រើប្រាស់ឥន្ធនៈ 600 គីឡូក្រាម ឬ 1,300 គីឡូម៉ែត្រនៅពេលបំពាក់ឥន្ធនៈមួយធុងទៀត។ Linx P9 ស៊ីឥន្ធនៈប្រហែល 505 ដុល្លារ/ម៉ោង ទាបជាង 40% ធៀបនឹងការចំណាយទៅលើឧទ្ធម្ភាគចក្រធម្មតាដែលមានទំហំប៉ុនគ្នា។

យន្តហោះ Linx P9 មានពីរចំណុចដែលមានប្រៀបជាងគេ ធៀបនឹងតាក់ស៊ីហោះឡើង និងចុះចតដោយត្រង់នាបច្ចុប្បន្ន។ ទីមួយគឺ រ៉ូទ័រធំរបស់វានឹងត្រូវបានប្រើជាមុខងារដូចឆត្រយោង ក្នុងករណីម៉ាស៊ីនដទៃជួបបញ្ហា។ ទីពីរគឺវាងាយស្រួលក្នុងការសុំលិខិតអនុញ្ញាតទៅតាមច្បាប់បច្ចុប្បន្ន ដោយសារមិនចាំបាច់ឱ្យក្រុមអ្នកតាក់តែងច្បាប់កែប្រែ ឬបង្កើតច្បាប់អនុញ្ញាតថ្មី៕

January 28, 2023

ការងារបន្ទាប់បន្សំអាចធ្វើនៅផ្ទះ រកបាន 100,000 ដុល្លារអាម៉េរិក/ឆ្នាំ

ការរចនាកាត់តរូបភាព (design) គឺជាការងារមួយក្នុងចំណោមមុខរបរដែលអាចធ្វើក្រៅម៉ោង និងអាចរកបានប្រាក់ចំណូលខ្ពស់ នេះបើតាមការស្រង់ទិន្នន័យរបស់ទំព័រ Freelancer។

លទ្ធផលនេះត្រូវបាន Freelancer លើកឡើងដោយយោងទៅលើតារាងផ្ដល់ឱកាសការងារក្រៅម៉ោងជាង 300,000 ដែលត្រូវបានបង្ហោះលើគេហទំព័រនេះ ចាប់ពីខែតុលារហូតដល់ខែធ្នូ 2022។

ការពេញនិយមរបស់រូបមន្តធ្វើការពីចម្ងាយបានផ្ដល់ឱកាសច្រើនដល់អ្នកចង់ធ្វើការងារបន្ទាប់បន្សំ ការងារក្រៅម៉ោង ការងារដែលអាចធ្វើពីចម្ងាយ នេះបើតាម CNBC។

យោងតាមការស្ទង់មតិកាលពីខែធ្នូ 2022 របស់ LendingTree ទៅលើមនុស្សពេញវ័យប្រមាណ 2,100 នាក់នៅសហរដ្ឋអាម៉េរិក មានប្រហែល 44% ក្នុងចំណោមនោះកំពុងមានការងារបន្ទាប់បន្សំ។ តួលេខនេះកើនឡើងខ្ពស់ បើធៀបនឹងអត្រា 12% កាលពីឆ្នាំ 2020។

Sebastian Sisele អនុប្រធានអន្តរជាតិរបស់ Freelancer.com បានឱ្យដឹងថា ទីផ្សារការងារអនឡាញសម្រាប់អ្នកជំនាញផ្នែកបច្ចេកវិទ្យាសេរីបានផ្ទុះឡើងពេញមួយឆ្នាំកន្លង បើទោះស្ថានភាពកាត់បន្ថយបុគ្គលិកនៅតែបង្កការលំបាកដល់វិស័យបច្ចេកវិទ្យា។

ក្រុមអ្នកជំនាញយល់ថា បើចាប់អារម្មណ៍លើការងារក្នុងវិស័យបច្ចេកវិទ្យា អ្នកស្វែងរកការងារគួរតែកសាងចំណេះជំនាញឯកទេសតាមរយៈការបង្កើតវគ្គសិក្សាតាមអនឡាញ និងបង្កើតប្រវត្តិរូបផ្ទាល់ខ្លួនដើម្បីតាមចាប់គោលដៅអតិថិជនដែលមានសក្ដានុពល។

ក្រៅពីនេះ បើសិនមិនមានជំនាញខាងបច្ចេកវិទ្យា អ្នកស្វែងរកការងារក៏នៅតែមានឱកាសធ្វើការក្រៅម៉ោង មានដូចជា ការងារបង្រៀនក្រៅម៉ោង សរសេរប្លក់ និងប្រឹក្សាផ្នែកធុរកិច្ចជាដើម។ យោងតាម Siseles ការងារទាំងនេះកំពុងតែមានតម្រូវការខ្ពស់ឡើងៗ ហើយប្រាក់ចំណូលក៏អាចឡើងដល់ 100 ដុល្លារ/ម៉ោង៕

January 28, 2023

ហែកឃើរ បញ្ចូលសេចក្ដីថ្លែងការណ៍របស់ប្រធានាធិបតីអ៊ុយក្រែនទៅលើទូរទស្សន៍នៅគ្រីមៀ

ក្រុមមន្ត្រីរុស្ស៊ីនៅឧបទ្វីបគ្រីមៀ (Crimea) និយាយថា ហែកឃើរ (Hacker) បានធ្វើឱ្យមានភាពរអាក់រអួល និងបញ្ចូលសេចក្ដីថ្លែងការណ៍របស់ប្រធានាធិបតីអ៊ុយក្រែន ទៅក្នុងរលកទូរទស្សន៍ដែលផ្សាយក្នុងតំបន់នេះ។

ទូរទស្សនិកជនដែលបានតាមដានទូរទស្សន៍នៅឧបទ្វីបគ្រីមៀ កាលពីថ្ងៃទី 25 មករា បានរាយការណ៍ថា កម្មវិធីដែលពួកគេកំពុងមើល ស្រាប់តែត្រូវដាច់ និងជំនួសដោយសេចក្ដីថ្លែងការណ៍របស់ប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡែនស្គី ក្នុងរយៈពេលប្រហែល 1 នាទី មុនពេលបញ្ហាត្រូវបានដោះស្រាយ។

ក្រុមមន្ត្រីនៅឧបទ្វីបគ្រីមៀ ចោទថា ហែកឃើរបានវាយប្រហារលើរលកទូរទស្សន៍ក្នុងតំបន់នេះ និងទម្លាក់កំហុសទៅលើស្ថាប័នចារកម្មរបស់អ៊ុយក្រែន។

រុស្ស៊ីបានរឹបអូសយកឧបទ្វីបគ្រីមៀពីអ៊ុយក្រែន ក្រោយការធ្វើប្រជាមតិក្នុងឆ្នាំ 2014។ សហរដ្ឋអាម៉េរិក អឺរ៉ុប និងអ៊ុយក្រែនបានហៅសកម្មភាពរបស់រុស្ស៊ីថាជាអំពើរំលោភច្បាប់។ ទីក្រុងកៀវបានប្រកាសជាច្រើនដងថា នឹងរំដោះឧបទ្វីបគ្រីមៀឱ្យបាន។

ក្រៅពីគ្រីមៀ ហេតុការណ៍ហែកឃើរវាយប្រហារទូរទស្សន៍ក៏បានកើតឡើងនៅក្នុងខេត្ត Belgorod នៅភាគខាងលិចប្រទេសរុស្ស៊ី ជាប់ព្រំដែននឹងអ៊ុយក្រែន។ អាជ្ញាធរខេត្តនេះមិនទាន់ចោទប្រកាន់លើភាគីណាមួយ ប៉ុន្តែឱ្យដឹង កំពុងស្រាវជ្រាវ។

ទាក់ទិននឹងហេតុការណ៍ហែកឃើរវាយប្រហារលើរលកទូរទស្សន៍ក្នុងតំបន់គ្រីមៀ ភាគីខាងអ៊ុយក្រែន មិនទាន់បញ្ចេញប្រតិកម្មអ្វីនៅឡើយ។

វិមានក្រឹមឡាំង កាលពីថ្ងៃទី 19 មករា បានព្រមានអ៊ុយក្រែនថា ការវាយប្រហារលើគ្រីមៀគឺជាសកម្មភាពគ្រោះថ្នាក់ បន្ទាប់ពីអ្នកនាំពាក្យក្រសួងការបរទេសអាម៉េរិក Ned Price កាលពីថ្ងៃទី 18 មករា បានប្រកាសថា ឧបទ្វីបគ្រីមៀគឺជាផ្នែកមួយរបស់អ៊ុយក្រែន ហើយវ៉ាស៊ីងតោនកំពុងផ្គត់ផ្គង់អាវុធដើម្បីជួយឱ្យទីក្រុងកៀវការពារទឹកដីរបស់ខ្លួន៕

January 28, 2023

សម្រស់របស់ភរិយាកីឡាករ Luiz Gustavo ខ្សែបម្រើនៅក្នុងក្រុមថ្មីរបស់ Ronaldo

អ្នកនាង Milene Marques Silva គឺជាភរិយារបស់តារាបាល់ទាត់នៃក្រុមជម្រើសជាតិប្រេស៊ីល Luiz Gustavo។

Luiz Gustavo ជាកីឡាករខ្សែបម្រើដ៏ល្បីល្បាញនៅពានរង្វាន់ជើងឯកថ្នាក់ជាតិ Saudi Pro League របស់អារ៉ាប៊ីសាអូឌីត ដោយលេងឱ្យ Al-Nassr និងធ្លាប់ទាត់ឱ្យក្រុមជម្រើសជាតិប្រេស៊ីលចំនួន 41 លើក ហើយក៏ធ្លាប់លេងឱ្យ Bayern Munich ផងដែរ។

គូស្នេហ៍ខាងលើនេះបានរស់នៅជាមួយគ្នាអស់រយៈពេលជាយូរមកហើយ និងបានភ្ជាប់ពាក្យកាលពីឆ្នាំ 2010។ ស្ត្រីដែលមានកូន 2 រួចហើយនេះតែងតែបង្ហាញរូបរាងស៊ិចស៊ីនៅលើបណ្ដាញសង្គម។ Milene Marques Silva ចូលចិត្តបង្ហោះរូបថតដែលនាងស្លៀកពាក់ឈុតរឹបរាង និងរូបដែលនាងថតជាមួយ Gustavo។

អតីតតារាបាល់ទាត់របស់ក្លឹប Fenerbahce ហាក់បានទុកគ្រួសារនៅឯអ៊ីស្តង់ប៊ុល ព្រោះថា រូបថតដែល Milene បង្ហោះលើ Instagram ថ្មីៗនេះគឺជារូបថតដែលនាងថតជាមួយ Gustavo អមជាមួយនឹងសារ «អូននឹកបង»។

January 27, 2023

មហាសេដ្ឋីចំណាយ 2 លានដុល្លារអាម៉េរិក/ឆ្នាំ ដើម្បីបានរូបរាងដូចអាយុ 18 ឆ្នាំ

(សហរដ្ឋអាម៉េរិក) – មហាសេដ្ឋី Bryan Johnson អាយុ 45 ឆ្នាំ ចំណាយប្រាក់ប្រហែល 2 លានដុល្លារអាម៉េរិកជារៀងរាល់ឆ្នាំ ដើម្បីមានរូបរាង និងកម្លាំងកាយដូចកំលោះវ័យ 18 ឆ្នាំ។

មហាសេដ្ឋី Johnson បានឱ្យដឹងថា គាត់មាន «បេះដូងរបស់មនុស្សវ័យ 37 ឆ្នាំ, ស្បែករបស់មនុស្សវ័យ 28 ឆ្នាំ, សួត និងកម្លាំងកាយរបស់កំលោះវ័យ 18 ឆ្នាំ»។ ដើម្បីធ្វើបានដូច្នេះ Johnson បង្កើតក្រុមពិសេសមួយដែលមានវេជ្ជបណ្ឌិត និងអ្នកជំនាញចំនួន 30 នាក់ សម្រាប់តាមដានរបបអាហារ ការរស់នៅ និងការហាត់ប្រាណរបស់ខ្លួន។ គោលដៅចុងក្រោយរបស់មហាសេដ្ឋីរូបនេះគឺធានាឱ្យខួរក្បាល ថ្លើម តម្រងនោម ធ្មេញ ស្បែក សក់ ប្រដាប់ភេទ និងពោះវៀនដំណើរការល្អដូចមនុស្សវ័យកំលោះ។

លោក Johnson បានបង្កើតកម្មវិធីមួយដែលមានឈ្មោះថា Project Blueprint ដែលតម្រូវឱ្យគាត់គោរពតាមរបបអាហារសម្បូរបន្លែស្រស់ បញ្ចូល 1,977 កាឡូរី និងហាត់ប្រាណមួយម៉ោងជារៀងរាល់ថ្ងៃ។ គាត់ក៏ហាត់ប្រាណធ្ងន់ 3 ដង/សប្ដាហ៍ និងចូលទទួលទានដំណេកក្នុងពេលវេលាជាក់លាក់តាមការកំណត់។

«អ្វីដែលខ្ញុំធ្វើ ស្ដាប់ទៅដូចជ្រុលពេក ប៉ុន្តែខ្ញុំកំពុងព្យាយាមបញ្ជាក់ថា អ្នកអាចទប់ស្កាត់ភាពចាស់ និងឥទ្ធិពលអាក្រក់ដល់ខ្លួនឯង» មហាសេដ្ឋី Johnson ថ្លែងដូច្នេះ។ Oliver Zolman ដែលជាវេជ្ជបណ្ឌិតវ័យ 29 ឆ្នាំ និងបច្ចុប្បន្នជាប្រធានក្រុមសុខាភិបាលរបស់មហាសេដ្ឋី Johnson ឱ្យដឹងថា គោលដៅរបស់លោក Johnson គឺចង់បញ្ជាក់ថា មនុស្សអាចពន្យារការវិវត្តទៅរកភាពចាស់របស់អវយវៈនានារបស់រាងកាយបាន 25%។

តាមធម្មតា លោក Johnson ក្រោកពីគេងនៅម៉ោង 05 ព្រឹក, លេបអាហារបំប៉ន 20 ប្រភេទ, ហាត់ប្រាណ 1 ម៉ោង, ផឹកទឹកផ្លែឈើដែលមានផ្ទុក creatine និង collagen peptide, ដុសធ្មេញដោយថ្នាំផលិតពីប្រេងដើមតែ និងជែលប្រឆាំងអុកស៊ីតកម្ម។

មុនពេលចូលទទួលទានដំណេក មហាសេដ្ឋីរូបនេះពាក់វ៉ែនតាទប់ស្កាត់ពន្លឺខៀវក្នុងរយៈពេលច្រើនម៉ោង។ គាត់ក៏ត្រូវតាមដានសុខភាពតាមកាលកំណត់របស់ក្រុមវេជ្ជបណ្ឌិត ក្នុងនោះមានដូចជាពិនិត្យឈាម អេកូមើលគ្រឿងក្នុង ថតកាំរស្មីអ៊ិចជាដើម។ល។

ដើម្បីព្យាបាលស្បែកដែលរងរបួសដោយសារកម្ដៅថ្ងៃ Johnson ត្រូវលាបឡេ 7 ប្រភេទរាល់ថ្ងៃ ហើយខាត់ស្បែកដោយអាស៊ីត និងព្យាបាលដោយរស្មីឡាស៊ែររាល់សប្ដាហ៍។ គាត់ក៏ថ្លឹងទម្ងន់ វាស់វែង និងគណនាសន្ទស្សន៍ម៉ាសរាងកាយ (BMI), ពិនិត្យជាតិខ្លាញ់ ស្ករក្នុងឈាម និងវាស់ចង្វាក់បេះដូងជារៀងរាល់ថ្ងៃផងដែរ៕

January 27, 2023

អាជ្ញាធរកម្ពុជា ធ្វើពិធីទទួលស្វាគមន៍ទេសចរចិនជើងទីមួយនៅខេត្តព្រះសីហនុ

ទេសចរជនជាតិចិនជាង 100 នាក់ មកពីទីក្រុង Kunming តាមយន្តហោះជើងទីមួយ បានចុះចតនៅអាកាសយានដ្ឋានអន្តរជាតិខេត្តព្រះសីហនុ នៅព្រឹកថ្ងៃ 27 មករានេះ ក្រោយពីជើងហោះហើរត្រង់មកខេត្តព្រះសីហនុ បានខកខានក្នុងរយៈពេលជាយូរ ដោយសារវិបត្តិសុខភាពសកល។

ក្រសួងទេសចរណ៍ តំណាងដោយ ឯកឧត្តម ហោ សារុន រដ្ឋលេខាធិការក្រសួងទេសចរណ៍ បានធ្វើពិធីទទួលស្វាគមន៍ទេសចរទាំងអស់ដែលមកពីទីក្រុង Kunming នៃខេត្ត Yunnan ភាគនិរតីប្រទេសចិន នៅពេលយន្តហោះបានចុះចតនៅឯអាកាសយានដ្ឋានអន្តរជាតិខេត្តព្រះសីហនុ ដោយមានការសហការពីអាជ្ញាធរអាកាសចរណ៍កម្ពុជា និងអាជ្ញាធរខេត្តព្រះសីហនុ។

យោងតាមក្រសួងទេសចរណ៍ ការមកដល់របស់ភ្ញៀវខាងលើនេះ គឺជាការចុះចតជើងទីមួយសម្រាប់ទេសចរចិននៅខេត្តព្រះសីហនុ។ ក្រសួងសង្ឃឹមថា នឹងមានជើងហោះហើរត្រង់ពីប្រទេសចិនមកកាន់ ខេត្តព្រះសីហនុ ជាបន្តបន្ទាប់ទៀតនាពេលខាងមុខ៕

January 27, 2023

ជនសង្ស័យបាញ់សម្លាប់មនុស្ស 7 នាក់នៅ California និយាយថា ត្រូវគេសម្លុតគំរាម

(សហរដ្ឋអាម៉េរិក) – ជនសង្ស័យ Chunli Zhao ដែលបានបាញ់សម្លាប់មនុស្ស 7 នាក់នៅក្នុងកសិដ្ឋានចំនួន 2 នៅ California បានសារភាពថា ខ្លួនធ្លាប់ត្រូវគេសម្លុតគំរាមនៅកន្លែងធ្វើការ ទើបនាំឱ្យមានអំពើឃាតកម្មនេះកើតឡើង។

Chunli Zhao អាយុ 66 ឆ្នាំ កាលពីថ្ងៃទី 26 មករា បានប្រាប់ NBC Bay Area ថា ខ្លួនគាត់ធ្លាប់ត្រូវបានគេសម្លុតគំរាម ត្រូវបង្ខំឱ្យធ្វើការច្រើនម៉ោងជាបន្តបន្ទាប់នៅក្នុងកសិដ្ឋាន និងត្រូវគេមិនអើពើនៅពេលមានការតវ៉ា។ Zhao បន្ថែមថា គាត់មករស់នៅលើទឹកដីអាម៉េរិកបាន 11 ឆ្នាំហើយ និងមានលិខិតស្នាក់នៅ និងរស់នៅជាមួយភរិយានៅក្នុងទីក្រុង Half Moon Bay។

អ្នកតំណាងរបស់កសិដ្ឋាន Terra Garden ជាកន្លែងកើតហេតុបានបញ្ជាក់ថា Zhao រស់នៅក្នុងកសិដ្ឋានជាមួយភរិយា ប៉ុន្តែថា ពួកគេមិនបានដឹងពីការតវ៉ាណាមួយស្ដីពីករណីសម្លុតគំរាមទៅលើ Zhao នោះទេ។

ជនសង្ស័យ Zhao បានរៀបរាប់អំពីករណីបាញ់ប្រហារពីរលើកកាលពីថ្ងៃទី 23 មករា ថា ដំបូងគាត់បានសម្រុកចូលក្នុងកសិដ្ឋាន Terra Garden និងបានបាញ់សម្លាប់មនុស្ស 4 នាក់ និងរបួសធ្ងន់ម្នាក់។ ក្រោយមក Zhao ក៏បានបើកឡានទៅកាន់កសិដ្ឋាន Concord ដែលនៅក្បែរនោះ ជាទីដែលគាត់ធ្លាប់បានធ្វើការ និងបានបាញ់សម្លាប់មនុស្ស 3 នាក់ថែមទៀត។ Zhao និយាយថា កាំភ្លើងដែលប្រើប្រាស់ក្នុងករណីខាងលើ គឺគាត់ទិញបានយ៉ាងងាយកាលពីឆ្នាំ 2021។

តុលាការស្រុក San Mateo បានចោទប្រកាន់ពីបទមនុស្សឃាត 7 ករណី និងបទប៉ុនប៉ងសម្លាប់មនុស្សចំនួន 1 ករណី ប្រឆាំងនឹង Zhao ដែលទាំងនេះអាចនាំឱ្យជនសង្ស័យត្រូវប្រឈមនឹងទោសប្រហារជីវិត ឬជាប់ពន្ធនាគារអស់មួយជីវិតដោយមិនមានការបន្ធូរបន្ថយ។

ករណីសម្លាប់មនុស្ស 7 នាក់របស់ជនសង្ស័យឈ្មោះ Zhao នេះ កើតឡើងក្រោយពីករណីបាញ់សម្លាប់មនុស្ស 11 នាក់នៅ Monterey Park រដ្ឋ California កាលពីប្រហែល 48 ម៉ោងមុន។ ជនសង្ស័យត្រូវបានគេដឹងថា ឈ្មោះ Huu Can Tran អាយុ 72 ឆ្នាំ ប៉ុន្តែមិនទាន់ដឹងច្បាស់ពីមូលហេតុនៃអំពើឃាតកម្មនេះនៅឡើយ៕

January 27, 2023

«នាវាទេសចរណ៍ហោះ» របស់ក្រុមហ៊ុន Lazzarini ដំណើរការដោយថាមពលអ៊ីដ្រូសែន

ក្រុមហ៊ុនរចនា Lazzarini របស់អ៊ីតាលី បានបង្ហើបឱ្យដឹងពីគំរូនាវាទេសចរណ៍លំដាប់ប្រណិត អាចហោះក្បែរផ្ទៃទឹកក្នុងល្បឿន 140 គីឡូម៉ែត្រ/ម៉ោង។

នាវាទេសចរណ៍លំដាប់ប្រណិតនេះត្រូវបានហៅថា Plectrum យកលំនាំតាមនាវាប្រណាំង Luna Rossa របស់ក្លឹប American Magic ដោយប្រើប្រាស់ស្លាបក្រោមទឹកជំនាន់ថ្មី។ នាវានេះនឹងមានប្រវែង 74 ម៉ែត្រ និងត្រូវបានផលិតពីវត្ថុធាតុកាបូនស្រាល នេះបើតាមការចុះផ្សាយកាលពីថ្ងៃទី 25 មករា របស់ Interesting Engineering។

Plectrum មាន 4 ជាន់, បន្ទប់ទទួលភ្ញៀវចំនួន 6, បន្ទប់មួយជួរសម្រាប់ម្ចាស់នាវា, អាងហែលទឹកខាងក្រៅបន្ទប់, កន្លែងដាក់ឧទ្ធម្ភាគចក្រ, កន្លែងដាក់រថយន្ត និងកន្លែងដាក់ទូក។

ជំនួសឱ្យការរត់ដោយកម្លាំងខ្យល់ដូច Luna Rossa គំរូ concept នៃនាវាទេសចរណ៍ប្រណិត Plectrum ប្រើប្រាស់ម៉ូទ័រចំនួន 3 គ្រឿងដែលដំណើរការដោយថ្មផ្ទុកថាមពលអ៊ីដ្រូសែន ហើយក្នុងមួយគ្រឿងៗមានកម្លាំង 5,000 សេះ។ Plectrum មានប្រព័ន្ធស្លាបក្រោមទឹកដែលជួយលើកដងខ្លួនរបស់វាឡើងផុតពីផ្ទៃទឹកពេលកំពុងបើកបរ ដែលដូចទៅនឹងការហោះហើរក្នុងល្បឿនឡើងដល់ 139 គីឡូម៉ែត្រ/ម៉ោង។

បើទោះជាកំពុងស្ថិតនៅក្នុងដំណាក់កាលជាគំនិតនៅឡើយ ប៉ុន្តែ ក្រុមហ៊ុន Lazzarini បានឱ្យដឹងថា Plectrum អាចត្រូវបានសាងសង់ទៅតាមសំណើក្នុងតម្លៃ 80 លានអឺរ៉ូ និងអាចដាក់ចុះទឹកនៅឆ្នាំ 2025។

ថ្មីៗនេះ ក្រុមហ៊ុនខាងលើក៏បានបង្កចំណាប់អារម្មណ៍ទាក់ទងនឹងនាវាទេសចរណ៍ Pangeos ខ្នាតយក្ស។ នាវានេះមានរូបរាងដូចទៅនឹងសត្វអណ្ដើកបណ្ដោយ 550 ម៉ែត្រ និងមានសណ្ឋាគារ មជ្ឈមណ្ឌលពាណិជ្ជកម្ម ឧទ្យាន កំពង់ផែ ព្រលានយន្តហោះ និងហេដ្ឋារចនាសម្ព័ន្ធដទៃទៀតដែលអាចជួយឱ្យអតិថិជន 60,000 នាក់រស់នៅលើសមុទ្របានយ៉ាងមានផាសុកភាព៕

January 27, 2023

Messi, Neymar, Mbappe និងក្រុម PSG ទៅមើលមជ្ឈមណ្ឌលហ្វឹកហាត់ថ្មី (វីដេអូ)

ថ្មីៗនេះ ក្រុមកីឡាករបាល់ទាត់របស់ក្លឹប PSG ដែលមាន Messi, Neymar, Mbappe ជាដើម បានជួបជុំគ្នា និងធ្វើដំណើរទៅមើលមជ្ឈមណ្ឌលហ្វឹកហាត់ថ្មីរបស់ពួកគេ ដែលនឹងសង់រួចរាល់នៅឆ្នាំក្រោយ។

កាលពីថ្ងៃទី 26 មករា Messi បានត្រលប់មកកាន់ក្លឹប PSG ក្រោយការសម្រាកលំហែកាយរយៈពេលខ្លីជាមួយគ្រួសារនៅប្រទេសស្វ៊ីស។ Messi គ្រោងនឹងត្រលប់ទៅចូលរួមការប្រកួតរវាង PSG និង Reims នៅ Ligue 1 ក្នុងថ្ងៃទី 30 មករាខាងមុខ។

មុននោះ Lionel Messi រួមនឹងប្រធាន Al-Khelaifi និងសមាជិកទាំងអស់របស់ PSG បានរួមដំណើរទៅធ្វើទស្សនកិច្ចនៅមជ្ឈមណ្ឌលហ្វឹកហាត់ថ្មីរបស់ក្លឹប ដែលនឹងត្រូវប្រគល់ឱ្យពួកគេចាប់ពីរដូវកាល 2023-2024។

មជ្ឈមណ្ឌលហ្វឹកហាត់ថ្មីរបស់ PSG ត្រូវបានហៅថា Campus PSG ដែលមានចម្ងាយពីមជ្ឈមណ្ឌលចាស់ Camp des Loges ប្រហែល 8 គីឡូម៉ែត្រ។ ទីនេះមានទំហំធំជាង 74 ហិកតា ក្នុងនោះមានអគារទំហំ 10,000 ម៉ែត្រក្រឡា សម្រាប់ក្រុមកីឡាករ។ ក្រោយពីនេះ Campus PSG ក៏មានទីលានហ្វឹកហាត់ចំនួន 17 និងបន្ទប់ប្រណិតចំនួន 43 សម្រាប់កិច្ចប្រជុំមុនការប្រកួត។

យោងតាម PSG នេះគឺជាទីតាំងដែលមិនមានកន្លែងណាល្អជាង សម្រាប់បម្រើដល់ការបណ្ដុះបណ្ដាល និងលើកកម្ពស់ប្រសិទ្ធភាពក្រុម និងបុគ្គល។ ខាងក្នុងបន្ទប់ទាំងឡាយនឹងត្រូវបានបំពាក់បច្ចេកវិទ្យាទំនើបបំផុតដើម្បីជួយឱ្យកីឡាករយកកម្លាំងមកវិញ និងលើកកម្ពស់សុខភាពរាងកាយក្រោយការប្រកួតម្ដងៗ។

ដោយមានមជ្ឈមណ្ឌលហ្វឹកហាត់ថ្មីនេះ Paris Saint-Germain សង្ឃឹមថា គុណភាពនៃការហ្វឹកហាត់របស់ពួកគេនឹងបានប្រសើរឡើង។

Campus PSG ត្រូវបានរៀបគម្រោងសាងសង់តាំងតែពីក្លឹប PSG បានធ្លាក់ទៅលើដៃ Qatar Sport Investment។ ម្ចាស់ក្លឹបនៅប្រទេសកាតា បានចំណាយប្រាក់អស់ 300 លានអឺរ៉ូ និងចំណាយពេលជិត 4 ឆ្នាំដើម្បីសាងសង់មជ្ឈមណ្ឌលហ្វឹកហាត់ Campus PSG ដែលគ្រោងនឹងស្ថាបនារួចរាល់ជាស្ថាពរនៅក្នុងឆ្នាំ 2024៕

January 27, 2023

Manchester City ត្រៀមរួចរាល់សម្រាប់ការទិញប្រធានក្រុមជម្រើសជាតិអាហ្សង់ទីន

នៅចំពោះមុខព័ត៌មានចរចាមអារ៉ាមដែលថា Lionel Messi បច្ចុប្បន្នបានផ្លាស់ប្ដូរការសម្រេចចិត្ត ដោយនឹងមិនពន្យារសុពលភាពនៃកិច្ចព្រមព្រៀងជាមួយ PSG ក្រោយដណ្ដើមបានជើងឯក World Cup 2022 ក្លឹប Manchester City ក៏បានសម្ដែងការចាប់អារម្មណ៍ខ្លាំងលើប្រធានក្រុមជម្រើសជាតិអាហ្សង់ទីន។

យោងតាម Daily Mail ប្រធានក្លឹប Man City លោក Sheikh Mansour នៅតែចិញ្ចឹមចិត្តក្នុងការទិញយកកំពូលកីឡាករ Messi ដែលជាម្ចាស់គ្រាប់បាល់មាសចំនួន 7 និងត្រៀមរួចរាល់សម្រាប់ការអូសទាញយកកីឡាករនេះ បើទោះបានខកខានច្រើនលើកកាលពីអតីតកាល។

បច្ចុប្បន្ន Messi កំពុងលេងឱ្យក្លឹបបារាំង Paris Saint-Germain (PSG)។ Messi ត្រូវបានចាត់ទុកថាជាកីឡាករឆ្នើមជាងគេមួយរូបនៅគ្រប់សម័យកាល និងត្រូវបានប្រៀបធៀបជាមួយនឹង Pele និង Diego Maradona នៅក្នុងការប្រជែងដណ្ដើមតំណែងជាកីឡាករអស្ចារ្យជាងគេបង្អស់នៅគ្រប់សម័យកាល៕

January 27, 2023

Author: សឿន សំណាង