សឿន សំណាង - La Reine Media

តួអង្គក្នុងរឿង «Avatar 2» មានរូបរាងប្រែប្រួលខ្លាំង សូម្បីតែម្ដាយបង្កើតក៏ពិបាកស្គាល់

ដោយសារតែប្រើប្រាស់បច្ចេកវិទ្យាទំនើបក្នុងការថតយកឥរិយាបថ ក្រុមតារាសម្ដែងល្បីឈ្មោះបានបង្ហាញទឹកមុខ និងកាយវិការគ្រប់ជ្រុងជ្រោយរបស់ពួកគេនៅលើកញ្ចក់ទូរទស្សន៍ ប៉ុន្តែ មុខមាត់របស់ពួកគេមានការប្រែប្រួលច្រើន សូម្បីតែម្ដាយបង្កើតក៏ពិបាកចំណាំបាន។

ខាងក្រោមនេះគឺជាការប្រៀបធៀបមុខមាត់រវាងតារាងសម្ដែងនៅក្រៅឆាក និងតួអង្គរបស់ពួកគេក្នុងខ្សែភាពយន្តរឿង Avatar: The Way of Water ៖

1-Sam Worthington ក្នុងតួអង្គ Jake Sully

2-Zoe Saldana ក្នុងតួអង្គ Neytiri ភរិយារបស់មេកុលសម្ព័ន្ធ Omaticaya

3- CC H Pounder ក្នុងតួអង្គ Mo’at មេដឹកនាំផ្នែកស្មារតីរបស់កុលសម្ព័ន្ធ Omaticaya

4- Sigourney Weaver ក្នុងតួអង្គ Kiri កូនស្រីចិញ្ចឹមរបស់ Jake និង Neytiri

5- Jamie Flutters ក្នុងតួអង្គ Neteyam កូនប្រុសរបស់ Jake និង Neytiri

6- Brithen Dalton ក្នុងតួអង្គ Lo’ak កូនប្រុសពៅរបស់ Jake និង Neytiri

7- Trinity Bliss ក្នុងតួអង្គ Tuktirey កូនស្រីរបស់ Jake និង Neytiri

8- Stephen Lang ក្នុងតួអង្គ វរសេនីយឯក Miles Quaritch

9- Jack Champion ក្នុងតួអង្គ Miles “Spider” Socorro មនុស្សពីផែនដីដែលកើតនៅលើភព Pandora

10- Duane Evans Jr. ក្នុងតួអង្គ Rothxo អ្នកប្រមាញ់វ័យក្មេងរបស់កុលសម្ព័ន្ធ Metkayina

11- Cliff Curtis ក្នុងតួអង្គ Tonowari មេកុលសម្ព័ន្ធ Metkayina Reef

12- Kate Winslet ក្នុងតួអង្គ Ronal ភរិយារបស់មេកុលសម្ព័ន្ធ Metkayina Reef

13- Bailey Bass ក្នុងតួអង្គ Cireya អ្នកមុជទឹករបស់កុលសម្ព័ន្ធ Metkayina កូនស្រីរបស់ Tonowari

14- Philip Geldzho ក្នុងតួអង្គ Aonung អ្នកប្រមាញ់វ័យក្មេងរបស់កុលសម្ព័ន្ធ Metkayina កូនប្រុសរបស់ Tonowari

January 30, 2023

ក្លឹបបាល់ទាត់ Chelsea ប្ដេជ្ញាចិត្តទិញ Enzo Fernandez មុនពេលបិទផ្សាររដូវរងា

ក្លឹបបាល់ទាត់ Chelsea ត្រូវបានគេជឿថា បាន «បើកឡើងវិញ» នូវការចរចាជាមួយក្លឹប Benfica ស្ដីពីកិច្ចព្រមព្រៀងប្រកបដោយសក្ដានុពលសម្រាប់កីឡាករអាហ្សង់ទីន Enzo Fernandez។

ម្ចាស់កម្មសិទ្ធិលើក្លឹប Chelsea លោក Todd Boehly បានចំណាយប្រាក់ជាង 500 លានផោនសម្រាប់ទិញកីឡាករថ្មី 16 រូប រាប់ចាប់តាំងពីរដូវកាលទិញដូរកីឡាករឆ្នាំកន្លង។

ខ្សែការពារ Malo Gusto អាយុ 19 ឆ្នាំ បានក្លាយជាកីឡាករបន្ថែមថ្មីបំផុតសម្រាប់ក្រុមរបស់គ្រូបង្វឹក Graham Potter នៅចុងសប្ដាហ៍នេះ បន្ទាប់ពីបានចុះកិច្ចព្រមព្រៀងដែលមានសុពលភាពរហូតដល់ឆ្នាំ 2030 ក្រោយពីករណីទិញដូរតម្លៃ 31 លានផោនពី Lyon។

កាលពីដើមសប្ដាហ៍នេះ មានព័ត៌មានថា Boehly មានផែនការចំណាយប្រាក់បន្ថែមដើម្បីដណ្ដើមយកខ្សែបម្រើជនជាតិអាហ្សង់ទីន វ័យ 21 ឆ្នាំ កីឡាករ Fernandez។ សំណើរបស់ Chelsea តម្លៃ 112 លានផោន (ច្រើនជាង 6 លានផោនធៀបនឹងសំណើ 105 លានផោនមុននោះ) ត្រូវបានបដិសេធក្នុងខែនេះ។ ប្រការនេះធ្វើឱ្យមនុស្សជាច្រើជឿថា Chelsea បានបោះបង់ការតាមចាប់យកកីឡាករ Fernandez យ៉ាងឆាប់ក៏ត្រឹមរដូវក្ដៅខាងមុខ។

ក៏ប៉ុន្តែ ទំព័រ The Telegraph បានឱ្យដឹងថា ក្លឹបម្ចាស់កីឡដ្ឋាន Stamford Bridge បានចាប់ផ្ដើមការចរចាឡើងវិញជាមួយនឹង Benfica នៅពេលពួកគេប្ដេជ្ញាចិត្តទិញយកសមាជិកម្ចាស់ពានរង្វាន់ជើងឯក World Cup 2022 ឱ្យបានមុនវេលាផុតកំណត់ ត្រឹមម៉ោង 23 ថ្ងៃទី 31 មករា 2023។

https://www.youtube.com/watch?v=ZHO4XF_0RTY

អ្នកជំនាញខាងព័ត៌មានស្ដីពីការទិញដូរកីឡាករ Fabrizio Romano ក៏បានបង្ហោះសារលើ Twitter ថា «Chelsea បានវិលត្រលប់មកចរចាផ្ទាល់ជាមួយ Benfica សម្រាប់ការទិញដូរ Enzo Fernandez។ ពួកគេចង់បានកីឡាករនេះតាមគ្រប់មធ្យោបាយ-Chelsea នឹងឱ្យថ្លៃ 120 លានអឺរ៉ូ (105 ផោនអង់គ្លេស)»។

លោក Fabrizio បន្ថែមថា «ប្រធាន Benfica លោក Rui Costa នៅតែមិនទាន់មានបំណងទទួលយក ប៉ុន្តែ Chelsea នឹងប្ដេជ្ញាចិត្តបង្ហើយការទិញដូរឱ្យបាននៅពេលឥឡូវ»។

Fernandez ទើបតែចេញពី River Plate និងបានចូលទាត់ឱ្យ Benfica ចាប់ពីរដូវក្ដៅឆ្នាំកន្លង ហើយកិច្ចសន្យានៅមានសុពលភាពរហូតដល់ឆ្នាំ 2027។ Fernandez បានលេងពេញពីរតង់ក្នុងការប្រកួតដែល Benfica ឈ្នះ Pacos Ferreira 2-0 កាលពីថ្ងៃព្រហស្បតិ៍កន្លង៕

January 30, 2023

រថយន្តអគ្គិសនីកំពុងផ្ទុះការពេញនិយមខ្លាំងនៅទីផ្សារប្រទេសថៃ និងឥណ្ឌូណេស៊ី

ទីផ្សារអាស៊ីអាគ្នេយ៍ចំនួនពីរគឺ ប្រទេសថៃ និងឥណ្ឌូណេស៊ី កំពុងគាំទ្ររថយន្តអគ្គិសនីជាខ្លាំង ដោយបរិមាណរថយន្តអគ្គិសនីដែលបានលក់ចេញ មានកំណើនខ្ពស់នៅក្នុងឆ្នាំ 2022។

បរិមាណរថយន្តប្រើថាមពលអគ្គិសនីសុទ្ធដែលបានលក់ចេញនៅប្រទេសថៃ និងឥណ្ឌូណេស៊ី ក្នុងឆ្នាំ 2022 បានកើនឡើងលើសពីការរំពឹងទុកដំបូង នេះបើតាមទិន្នន័យដែលក្រុមហ៊ុនប្រឹក្សារថយន្ត LMC Automotive ប្រមូលបាន។ មួយផ្នែកធំនៃជោគជ័យនេះគឺបានមកពីបណ្ដាក្រុមហ៊ុនចិន និងកូរ៉េខាងត្បូង ខណៈដែលបណ្ដាក្រុមហ៊ុនរថយន្តជប៉ុន ហាក់បានអន់ថយទាំងស្រុងនៅចំពោះមុខគូប្រជែង។

យោងតាម LMC បរិមាណរថយន្តអគ្គិសនីដែលបានលក់ចេញនៅប្រទេសថៃ បានកើនឡើងលើសពី 5,200 គ្រឿងត្រឹមដំណាច់ខែសីហា 2022 និងកើនដល់ 13,000 គ្រឿងនៅដំណាច់ឆ្នាំ 2022 ដែលស្មើនឹងកំណើនប្រហែល 700% ធៀបនឹង 1,900 គ្រឿងក្នុងឆ្នាំ 2021។

ចំណែកបរិមាណរថយន្តអគ្គិសនីដែលបានលក់ចេញនៅឥណ្ឌូណេស៊ីវិញគឺទាបជាងថៃបន្តិច ប៉ុន្តែបានផ្ទុះការពេញនិយមខ្លាំងនៅចុងឆ្នាំ 2022។ ក្នុង 8 ខែដំបូងនៃឆ្នាំ 2022 រថយន្តអគ្គិសនីប្រហែល 1,600 គ្រឿងត្រូវបានលក់ចេញ ប៉ុន្តែ 4 ខែចុងក្រោយបានធ្វើឱ្យបរិមាណរថយន្តសរុបដែលបានលក់ចេញកើនដល់ 9,000 គ្រឿង ស្មើនឹងកំណើន 13.5 ដង ធៀបនឹង 667 គ្រឿងដែលបានលក់ចេញក្នុងប៉ុណ្ណោះឆ្នាំ 2021។

Hyundai បានចាប់ផ្ដើមដំឡើងរថយន្តអគ្គិសនី IONIQ 5 នៅឥណ្ឌូណេស៊ី

កំណើនខាងលើនៅប្រទេសថៃ គឺដោយសារគោលនយោបាយជំរុញការប្រើប្រាស់រថយន្តអគ្គិសនី និងទាក់ទាញការវិនិយោគរបស់ក្រុមហ៊ុនផលិតរថយន្តអគ្គិសនីបរទេស។ នៅប្រទេសថៃ រថយន្តអគ្គិសនីចិនក្ដោបក្ដាប់ចំណែកទីផ្សារបាន 87% ក្នុងចំណោមរថយន្តអគ្គិសនីសរុបដែលបានលក់ចេញ។

ឥណ្ឌូណេស៊ីក៏កំពុងត្រៀមអនុវត្តកញ្ចប់ជំនួយនានាទាក់ទងនឹងរថយន្តអគ្គិសនី។ ទីផ្សារនេះក៏ជាកន្លែងដែល Hyundai បានចាប់ផ្ដើមដំឡើងរថយន្តអគ្គិសនី IONIQ 5 ហើយរថយន្តម៉ូដែលនេះក៏ជារថយន្តដែលលក់ដាច់ជាង Honda CR-V ទៅទៀតនៅក្នុងខែឧសភា 2022៕

January 30, 2023

«នំដង្ហើមនាគ» ធ្វើឱ្យក្មេងច្រើននាក់នៅឥណ្ឌូណេស៊ីរលាកក្រពះ

កុមារប្រមាណ 25 នាក់នៅឥណ្ឌូណេស៊ី ត្រូវបានរាយការណ៍ថា មានបញ្ហារលាកក្រពះបន្ទាប់ពីញ៉ាំចំណីមួយប្រភេទដែលមានផ្សែងដ៏ទាក់ទាញ និងមានឈ្មោះថា «នំដង្ហើមនាគ» chiki ngebul។

Chiki ngebul ឬហៅថា «ដង្ហើមនាគ» (dragons breath) គឺជានំមានផ្សែងដែលត្រូវបានគេច្នៃដោយយកនំបំពងស្រួយ ស្ករគ្រាប់ស្រួយ ឬនំធ្វើពីគ្រាប់ធញ្ញជាតិនានា ជ្រលក់ចូលក្នុងនីដ្រូសែនរាវ។ អ្នកញ៉ាំនំនេះនឹងដកដង្ហើមចេញចូលមានផ្សែងដូចទៅនឹងដង្ហើមរបស់សត្វនាគ។ បើទោះជាបង្ហាញវត្តមានច្រើនឆ្នាំមកហើយ ប៉ុន្តែ «នំដង្ហើមនាគ» នេះ កំពុងមានការពេញនិយមខ្លាំង ពិសេសគឺក្មេងតូចៗ។

ថ្មីៗនេះ លោក Maxi Rein Rondonuwu រដ្ឋមន្ត្រីក្រសួងសុខាភិបាលឥណ្ឌូណេស៊ី បានឱ្យដឹងថា ចាប់ពីខែមិថុនា ដល់ខែធ្នូ 2022 មានក្មេងប្រហែល 25 នាក់បានរលាកក្រពះ និងពីរករណីត្រូវចូលពេទ្យទទួលការព្យាបាល បន្ទាប់ពីញ៉ាំស្ករគ្រាប់ ឬនំស្រួយដង្ហើមនាគ។ លោក Maxi បញ្ជាក់ថា ក្មេងដែលពុលនឹងចំណីនេះមានអាការឈឺពោះខ្លាំង។ សារព័ត៌មានក្នុងស្រុករបស់ឥណ្ឌូណេស៊ីក៏បានរាយការណ៍ថា មានក្មេងម្នាក់ត្រូវចូលពេទ្យវះកាត់ ដោយសារតែដាច់រលាត់ក្រពះបន្ទាប់ពីបានញ៉ាំស្ករគ្រាប់ប្រភេទនេះ។ ប៉ុន្តែមិនទាន់មានករណីស្លាប់នៅឡើយទាក់ទងនឹងនំដង្ហើមនាគ។

ការប្រើប្រាស់នីដ្រូសែនរាវក្នុងការច្នៃអាហារមិនមែនជារឿងខុសច្បាប់។ ពួកមេចុងភៅតែងតែប្រើប្រាស់ចំហាយនីដ្រូសែនដើម្បីបង្កើតជាបាតុភូតផ្សែងដ៏ស្រស់ស្អាតនៅក្នុងអាហារ ប៉ុន្តែបើសិនមិនបានចាត់ការត្រឹមត្រូវទេ វាអាចនឹងក្លាយជារឿងគ្រោះថ្នាក់។

«នីដ្រូសែនរាវមិនត្រឹមតែគ្រោះថ្នាក់នៅពេលញ៉ាំនោះទេ តែបើសិនស្រូបផ្សែងនីដ្រូសែនក្នុងរយៈពេលយូរ អាចនឹងបង្កឱ្យមានអាការពិបាកដកដង្ហើមធ្ងន់ធ្ងរ» រដ្ឋមន្ត្រីក្រសួងសុខាភិបាលឥណ្ឌូណេស៊ីនិយាយដូច្នេះ ព្រមទាំងបានស្នើឱ្យបង្កើនការគ្រប់គ្រងសកម្មភាពទិញលក់នំ chiki ngebul នៅប្រទេសនេះ។

កាលពីឆ្នាំ 2018 អាជ្ញាធរគ្រប់គ្រងអាហារ និងឱសថរបស់សហរដ្ឋអាម៉េរិក (FDA) បានព្រមានអំពីបញ្ហាសុវត្ថិភាពដែលទាក់ទិននឹងអាហារ «ដង្ហើមនាគ» ដែលច្នៃពីនីដ្រូសែនរាវនេះផងដែរ៕

January 30, 2023

គ្រូបង្វឹកនៅក្លឹប Al Nassr និយាយថា «Cristiano Ronaldo នឹងត្រលប់ទៅកាន់អឺរ៉ុប»

(អារ៉ាប៊ីសាអូឌីត) – គ្រូបង្វឹក Rudi Garcia បានឱ្យដឹងថា ខ្សែប្រយុទ្ធ Cristiano Ronaldo នឹងត្រលប់ទៅកាន់អឺរ៉ុបដើម្បីប្រកួត និងមិនចូលនិវត្តន៍ត្រឹមក្លឹប Al Nassr របស់អារ៉ាប៊ីសាអូឌីតឡើយ។

បន្ទាប់ពីបានបញ្ចប់កិច្ចសន្យាមុនកាលកំណត់ 6 ខែជាមួយ Manchester United កំពូលតារាបាល់ទាត់ Ronaldo បានបិទទំព័រ 20 ឆ្នាំដែលបានលេងបាល់នៅទ្វីបអឺរ៉ុប ហើយមកកាន់ក្លឹប Al Nassr។ Ronaldo ទទួលបានប្រាក់បៀវត្សរ៍ 200 លានដុល្លារអាម៉េរិកដែលជាកំណត់ត្រាពិភពលោកក្នុងប្រវត្តិសាស្ត្របាល់ទាត់ ទៅតាមកិច្ចព្រមព្រៀងដែលមានសុពលភាពរហូតដល់ខែមិថុនា 2025។

យោងតាមការអះអាងរបស់ Ronaldo ក្រោយពីដណ្ដើមបានគ្រប់តំណែងធំៗនៅអឺរ៉ុប គាត់ចង់ចែករំលែកបទពិសោធន៍នៅទ្វីបអាស៊ី។

ក៏ប៉ុន្តែ គ្រូបង្វឹក Rudi Garcia យល់ថា ក្លឹប Al Nassr អាចមិនមែនជាចំណតចុងក្រោយក្នុងអាជីពរបស់ Ronaldo។ គ្រូបង្វឹកជនជាតិបារាំងរូបនេះប្រាប់ Sport កាលពីថ្ងៃទី 29 មករាថា «គាត់ (Ronaldo) គឺជាម្នាក់ក្នុងចំណោមកីឡាករឆ្នើមបំផុតលើពិភពលោក។ Ronaldo នឹងមិនបញ្ចប់អាជីពនៅត្រឹមក្លឹប Al Nassr ឡើយ ប៉ុន្តែនឹងត្រលប់ទៅកាន់អឺរ៉ុប»។

បច្ចុប្បន្ន Ronaldo និងមិត្តរួមក្រុមនៅ Al Nassr កំពុងនាំមុខគេនៅក្នុងការប្រកួតដណ្ដើមពានរង្វាន់ Saudi Pro League របស់អារ៉ាប៊ីសាអូឌីត ដោយមាន 33 ពិន្ទុ ក្រោយការទាត់បាន 14 ប្រកួត ហើយនឹងត្រូវប៉ះក្រុម Al Fateh នៅក្នុងការប្រកួតបន្ទាប់នៅថ្ងៃទី 03 កុម្ភៈ 2023៕

January 30, 2023

នាំគ្នាលេងបិទពួនក្នុងកុងតឺន័រ ក្មេងម្នាក់ត្រូវវង្វេងទៅដល់ប្រទេសផ្សេង

ក្មេងប្រុសជនជាតិបង់ក្លាដែសម្នាក់អាយុ 15 ឆ្នាំ បានជាប់ដោយមិនដឹងខ្លួននៅក្នុងកុងតឺន័រមួយពេលកំពុងលេងល្បែងបិទពួន ហើយមួយសប្ដាហ៍ក្រោយមកទើបត្រូវបានប្រទះឃើញនៅប្រទេសម៉ាឡេស៊ី។

កាលពីថ្ងៃទី 17 មករា ក្រុមបុគ្គលិកលើកដាក់កុងតឺន័រពីកប៉ាល់បង់ក្លាដែសនៅឯកំពង់ផែ Klang ប្រទេសម៉ាឡេស៊ី មានការភ្ញាក់ផ្អើលខ្លាំងនៅពេលបានឃើញ Fahim ដែលជាក្មេងប្រុសបរទេស ឈានជើងចេញពីកុងតឺន័រក្នុងសភាពអស់កម្លាំងខ្លាំង។

ដំបូងឡើយ បុគ្គលិកនៅកំពង់ផែខាងលើស្មានថា ក្មេងនេះជាជនរងគ្រោះក្នុងអំពើជួញដូរមនុស្ស ទើបរាយការណ៍ប្រាប់សមត្ថកិច្ច។ រដ្ឋមន្ត្រីក្រសួងមហាផ្ទៃម៉ាឡេស៊ី បានឱ្យដឹងថា ក្រោយពីបានស៊ើបអង្កេត សមត្ថកិច្ចមិនបានរកឃើញសញ្ញាណាមួយបង្ហាញថានេះគឺជាអំពើជួញដូរមនុស្សឡើយ។ យោងតាមអាជ្ញាធរម៉ាឡេស៊ី ក្មេងនេះដេកភ្លេចខ្លួនក្នុងកុងតឺន័រ និងត្រូវបានរកឃើញនៅម៉ាឡេស៊ី។

India Times ផ្សាយថា កាលពីថ្ងៃទី 11 មករា Fahim កំពុងលេងបិទពួនជាមួយមិត្តភក្ដិនៅទីក្រុង Chittagong ប្រទេសបង់ក្លាដែស និងបានចូលទៅពួនក្នុងកុងតឺន័រ ហើយក៏បានដេកលក់។ កុងតឺន័រនេះ ក្រោយមកក៏ត្រូវបានលើកដាក់ទៅលើកប៉ាល់មួយគ្រឿង ធ្វើដំណើរទៅកាន់កំពង់ផែ Klang នៅប្រទេសម៉ាឡេស៊ី ដែលមានចម្ងាយពី Chittagong ប្រហែល 3,700 គីឡូម៉ែត្រ។

https://www.youtube.com/watch?v=dxWyvqE5qs8

ក្នុងរយៈពេល 6 ថ្ងៃដែលជាប់ក្នុងកុងតឺន័រ Fahim បានស្រែកឱ្យជួយ ប៉ុន្តែមិនមានអ្នកណាឮសោះ។ ក្រុមមន្ត្រីម៉ាឡេស៊ី កំពុងតែធ្វើលិខិតស្នាមដើម្បីនាំ Fahim ត្រលប់ទៅបង់ក្លាដែសវិញ ក្រោយពីត្រូវបានព្យាបាលអាការអស់កម្លាំង។

កាលពីខែតុលា 2022 ប៉ូលិសម៉ាឡេស៊ីក៏ធ្លាប់បានប្រទះឃើញសាកសពក្មេងប្រុសអាយុ 15 ឆ្នាំម្នាក់កំពុងរលួយនៅក្នុងកុងតឺន័រដែលត្រូវបានដឹកពី Chittagong ទៅកាន់កំពង់ផែ Penang៕

January 30, 2023

រកបានប្រាក់ចំណូលជិត 40,000 ដុល្លាររៀងរាល់ខែ បើទោះធ្វើការកន្លះម៉ោង/ថ្ងៃ

JP Mancini II បោះបង់អាជីពជាអ្នកលក់រថយន្ត រួចខ្ចីប្រាក់ធនាគារទិញកូននាវាដើម្បីទុកជួលឱ្យគេ និងរកបានប្រាក់ចំណូលអកម្មជិត 40,000 ដុល្លារអាម៉េរិករៀងរាល់ខែ។

JP Mancini II គឺជាបុគ្គលិកផ្នែកលក់មួយរូបមានអាយុ 32 ឆ្នាំ រស់នៅ Virginia សហរដ្ឋអាម៉េរិក។ គាត់ចូលចិត្តរបស់ថ្លៃៗ ប៉ុន្តែមិនមានលទ្ធភាពទិញ ដូច្នេះក៏សម្រេចចិត្តខ្ចីប្រាក់ធនាគារដើម្បីទិញ និងដាក់ឱ្យជួល។

កាលពីខែមករា 2021 គាត់ឱ្យគេជួលកូននាវាតម្លៃ 400,000 ដុល្លាររបស់គាត់ដែលស្ថិតនៅក្នុងរដ្ឋ Florida។ បន្ទាប់ពីបង្ហោះពពាយនាយជួលនៅលើទំព័រ Boatsetter លោក Mancini ក៏ទទួលបានសំណើជួលចំនួន 11 ក្នុងរយៈពេលមួយខែ។ តួលេខនេះបានកើនទ្វេដងក្នុងខែបន្ទាប់។

ដោយមើលឃើញឱកាស គាត់ក៏ចាប់ផ្ដើមផ្សព្វផ្សាយលើទំព័រជួលសម្ភារៈដទៃទៀតមានដូចជា Get My Boat ជាដើម ហើយទិញកូននាវាតូចជាងមុនមួយគ្រឿងទៀតដើម្បីដាក់ឱ្យជួលនៅ Hampton, Virginia ជាកន្លែងដែលគាត់កំពុងរស់នៅ។

បច្ចុប្បន្ន កូននាវាទាំងពីរគ្រឿងរបស់គាត់ រកប្រាក់ចំណូលឱ្យគាត់ជាមធ្យមបាន 38,800 ដុល្លារអាម៉េរិកក្នុងមួយខែៗ ក្នុងគ្រាដែលគាត់ធ្វើការតែកន្លះម៉ោងប៉ុណ្ណោះក្នុងមួយថ្ងៃ។

កាលពីឆ្នាំកន្លង JP Mancini II ឱ្យដឹងថា រកបានប្រាក់ចំណេញ 190,000 ដុល្លារ ក្រោយពីបានទូទាត់ការចំណាយនានាសម្រាប់នាវារបស់គាត់។ តួលេខនេះតិចជាង 100,000 ដុល្លារ បើធៀបជាមួយនឹងប្រាក់ចំណូលអតិបរមារបស់គាត់កាលនៅធ្វើការឱ្យគេ ប៉ុន្តែពេលវេលាធ្វើការបច្ចុប្បន្ន ខ្លីជាងឆ្ងាយណាស់។

ជំនួសឱ្យការយកប្រាក់ខាងលើទៅសងបំណុល 550,000 ដុល្លារដែលគាត់បានខ្ចីយកមកទិញកូននាវាទាំងពីរគ្រឿងនេះភ្លាមៗ JP Mancini II ប្រាប់ថា នឹងទិញកូននាវាសម្រាប់ជួលបន្ថែមទៀត ហើយប្រើប្រាស់រាល់ឱកាសដទៃទៀតដែលបានពីអចលនទ្រព្យដើម្បីពង្រីកមុខរបរ៕

January 30, 2023

ខ្សែប្រយុទ្ធជប៉ុន ធ្វើឱ្យ Liverpool ក្លាយជាអតីតជើងឯកនៅ Cup FA

(អង់គ្លេស) – Kaoru Mitoma រកបានគ្រាប់បាល់ក្នុងនាទីបន្ថែមម៉ោងទីពីរ ជួយឱ្យ Brighton ឈ្នះ Liverpool 2-1 នៅវគ្គ 4 នៅ FA Cup (The Football Association Challenge Cup) ដែលជាពានរង្វាន់បាល់ទាត់ជម្រុះផ្ទាល់ប្រចាំឆ្នាំសម្រាប់បុរសនៅប្រទេសអង់គ្លេស កាលពីព្រលប់ថ្ងៃទី 29 មករា 2023។

ពីការទាត់ពិន័យ បាល់ត្រូវរុញទៅកាន់ជ្រុងឆ្វេងរបស់តំបន់ 16.5 ម៉ែត្រ ដើម្បីឱ្យ Pervis Estupinan នាំបាល់ទៅខាងមុខទីរបស់ Liverpool។ Mitoma ទទួលបានបាល់ និងបញ្ឆោតខ្សែបម្រើ Joe Gomez បានមួយជើង រួចស៊ុតសំដៅជ្រុងទី ផ្ដួល Alisson Becker បានសម្រេច។

កាលពីរដូវក្ដៅ 2021 Mitoma ចូលទាត់ឱ្យ Brighton ក្នុងតម្លៃខ្លួនជាង 3 លានដុល្លារអាម៉េរិក បន្ទាប់ពីចាកចេញពីក្លឹបជប៉ុន Kawasaki Frontale ហើយទាត់ឱ្យក្លឹបបែលហ្ស៊ិក Union SG ក្រោមរូបភាពឱ្យខ្ចីកាលពីរដូវកាលមុន។ ត្រលប់មក Brighton ខ្សែប្រយុទ្ធជនជាតិជប៉ុនរូបនេះក៏មានភាពលេចធ្លោខ្លាំង និងត្រូវបាន Transfermarkt កំណត់តម្លៃឡើងដល់ 9.2 លានដុល្លារអាម៉េរិក។

គ្រាប់បាល់របស់ Mitoma ធ្វើឱ្យ Liverpool ក្លាយជាអតីតម្ចាស់ជើងឯកនៅ AF Cup។ កាលពីរដូវកាលមុន កូនសិស្ស និងគ្រូបង្វឹក Jurgen Klopp របស់ Liverpool បានបានផ្ដួល Chelsea 6-5 នៅក្នុងការប្រកួតទាត់ប៉េណាំងទីនៅវគ្គផ្ដាច់ព្រ័ត្រ ហើយក៏ដណ្ដើមបានពានរង្វាន់ជើងឯកនៅឯកីឡដ្ឋាន Wembley។ កាលពីចុងឆ្នាំកន្លង Liverpool ក៏ត្រូវបាន Man City ដណ្ដើមបានតំណែងនៅ EFL Cup (League Cup) ដោយបានចាញ់ 2-3 នៅឯកីឡដ្ឋាន Etihad ក្នុងវគ្គ 1/8។

នៅលិគកំពូលអង់គ្លេស (English Premier League) Liverpool កំពុងឈរលំដាប់ទី 9 ដោយមាន 29 ពិន្ទុ តិចជាងក្រុមលេខ 4 ចំនួន 10 ពិន្ទុ។ ចំណែកនៅ Champions League វិញ ពួកគេនឹងប្រកួតជាមួយម្ចាស់ជើងឯក Real ពីរលើកក្នុងវគ្គ 1/8 នៅ Anfield នាថ្ងៃទី 21 កុម្ភៈ និងនៅ Bernabeu ថ្ងៃទី 15 មីនា។

Brighton ឈ្នះ Liverpool 2-1 នៅវគ្គ 4 នៅ FA Cup (The Football Association Challenge Cup) ដែលជាពានរង្វាន់បាល់ទាត់ជម្រុះផ្ទាល់ប្រចាំឆ្នាំសម្រាប់បុរសនៅប្រទេសអង់គ្លេស កាលពីព្រលប់ថ្ងៃទី 29 មករា 2023

បញ្ជីឈ្មោះកីឡាករដែលបានចូលរួមប្រកួតរវាង Brighton និង Liverpool ៖

Brighton ៖ Steele, Lamptey (Van Hecke 90), Dunk, Webster (Veltman 46), Estupinan, Mac Allister, Gross, March, Welbeck (Gilmour 67), Mitoma, Ferguson (Undav 89)។

Liverpool ៖ Alisson, Trent Alexander-Arnold (Milner 59), Gomez, Konate, Robertson, Bajcetic (Fabinho 84), Thiago (Jones 79), Keita (Henderson 59), Elliott (Nunez 59), Salah, Gakpo។

January 30, 2023

របបតាលីបង់នៅអាហ្វហ្កានីស្ថាន ហាមសិស្សស្រីប្រលងចូលមហាវិទ្យាល័យ

ក្រសួងអប់រំរបស់អាជ្ញាធរតាលីបង់ ស្នើឱ្យសាកលវិទ្យាល័យឯកជននានានៅប្រទេសអាហ្វហ្គានីស្ថាន ហាមសិស្សស្រីប្រលងចូលមហាវិទ្យាល័យក្នុងឆ្នាំសិក្សាខាងមុខ។

កាលពីចុងសប្ដាហ៍កន្លង ក្រសួងអប់រំរបស់អាជ្ញាធរតាលីបង់ បានផ្ញើលិខិតទៅកាន់សាកលវិទ្យាល័យឯកជននៅក្នុងបណ្ដាខេត្តក្រុងភាគខាងជើងប្រទេសអាហ្វហ្គានីស្ថាន ក្នុងនោះមានទាំងរដ្ឋធានីកាប៊ុលផងដែរ ដើម្បីស្នើឱ្យមានការហាមសិស្សស្រីប្រលងចូលមហាវិទ្យាល័យដែលនឹងធ្វើឡើងចាប់ពីចុងខែកុម្ភៈខាងមុខ។ លិខិតរបស់តាលីបង់ថែមទាំងបានព្រមានថា ស្ថាប័នណាដែលមិនអនុវត្តតាមសំណើនេះនឹងត្រូវប្រឈមនឹងចំណាត់ការតាមផ្លូវច្បាប់។

មុននោះ របបតាលីបង់ បានស្នើឱ្យសាកលវិទ្យាល័យទាំងអស់នៅអាហ្វហ្កានីស្ថាន «ហាមសិស្សស្រីទៅសាលារៀនរហូតដល់មានប្រកាសថ្មី»។ រដ្ឋមន្ត្រីក្រសួងអប់រំរបស់តាលីបង់ ក្រោយមកបានបកស្រាយថា មូលហេតុដែលសិស្សស្រីនៅអាហ្វហ្កានីស្ថានត្រូវបានហាមមិនឱ្យចូលរៀននៅមហាវិទ្យាល័យគឺដោយសារពួកគេមិនបានគោរពតាមការណែនាំ ក្នុងនោះមានការកំណត់ស្ដីពីសម្លៀកបំពាក់សមស្របជាដើម។

បណ្ដាមេដឹកនាំពិភពលោកបានសម្ដែងការបារម្ភអំពីបទបញ្ជាខាងលើរបស់តាលីបង់ និងរិះគន់ថា ប្រការនេះនឹងបំផ្លាញអនាគត និងប្រមាថចំពោះសិទ្ធិសេរីភាពមូលដ្ឋានរបស់ស្ត្រីនៅអាហ្វហ្កានីស្ថាន។

កន្លងមក តាលីបង់បានប្រកាសថា បានផ្លាស់ប្ដូរច្រើនធៀបនឹងអំឡុងពេលកាន់អំណាចកាលពីជាង 20 ឆ្នាំមុន ព្រមទាំងបានអះអាងថា កំពុងអនុញ្ញាតឱ្យស្ត្រីទទួលបានសិទ្ធិទៅតាមច្បាប់សាសនាអ៊ីស្លាម និងវប្បធម៌របស់អាហ្វហ្កានីស្ថាន។ ក៏ប៉ុន្តែ ការកំណត់ ឬបទបញ្ជាដ៏តឹងរឹងរបស់ពួកគេក្នុងប៉ុន្មានខែកន្លងទៅនេះ បានធ្វើឱ្យពិភពលោកមន្ទិលសង្ស័យ និងមានការរិះគន់ច្រើនផងដែរ៕

January 30, 2023

កាយវិការចំអករបស់អ្នកចាំទីអាហ្សង់ទីន ធ្វើឱ្យ FIFA សម្រេចចិត្តកែប្រែច្បាប់ពិន័យ

ស្ថាប័នគ្រប់គ្រងវិស័យបាល់ទាត់ពិភពលោក FIFA នឹងបញ្ចេញគោលការណ៍ថ្មីដើម្បីទប់ស្កាត់អ្នកចាំទីប្រើក្បាច់ «ចំអក» ធ្វើឱ្យគូប្រជែងបែកអារម្មណ៍ ក្រោយពីមានភាពចម្រូងចម្រាសបន្ទាប់ពីកីឡាករ Emiliano Martinez បានបង្កឡើងនៅក្នុងវគ្គផ្ដាច់ព្រ័ត្រ World Cup 2022 រវាងអាហ្សង់ទីន និងបារាំង។

ក្នុងយុទ្ធនាការដណ្ដើមពានរង្វាន់ជើងឯក World Cup 2022 អ្នកចាំទី Emiliano Martinez គឺជាកីឡាករលេចធ្លោនៅក្បែរ Lionel Messi។ អ្នកចាំទីរបស់ក្លឹប Aston Villa នេះបានបង្ហាញសមត្ថភាពរបស់ខ្លួនក្នុងសំណាញ់ទី ពិសេសនៅក្នុងការស៊ុត 11 ម៉ែត្រ ដែលបានជួយឱ្យអាហ្សង់ទីនក្លាយជាជើងឯក ក្រោយការរង់ចាំអស់ 36 ឆ្នាំ។

អ្នកចាំទី Emiliano Martinez គឺជាវីរបុរសរបស់ប្រជាជនអាហ្សង់ទីន ប៉ុន្តែក៏ជា «បន្លា» ក្នុងភ្នែករបស់អ្នកគាំទ្រជាច្រើន ក្នុងនោះក៏មានបារាំងផងដែរ។ ក្រោយពីដណ្ដើមបានពាន World Cup 2022 អ្នកចាំទីរូបនេះបានបញ្ចេញកាយវិការចំអកឱ្យ Mbappe នាំឱ្យមានការរិះគន់ច្រើននៅពេលនោះ។

ជាងនេះ អ្នកចាំទី Emiliano Martinez ថែមទាំងបានអបអរជ័យជម្នះនៅពេលខ្លួនទទួលបានពានស្រោមដៃមាសសម្រាប់អ្នកចាំទីឆ្នើមបំផុតនៅ World Cup 2022 ដោយការយកស្រោមដៃមាសនេះដាក់ពីមុខ «របស់ពិសេស» នៅចំពោះមុខទស្សនិកជនរាប់ម៉ឺននាក់។

ទោះជាយ៉ាងនេះក៏ដោយ គេនៅតែមិនអាចបដិសេធសមត្ថមភាពចាប់បាល់ពិន័យ 11 ម៉ែត្ររបស់អ្នកចាំទី Emiliano Martinez រូបនេះ។ គាត់បានជួយសង្គ្រោះអាហ្សង់ទីន។ ក្រោយការស៊ុតរបស់កីឡាករបារាំង អ្នកចាំទី Martinez ចេះតែទាត់បាល់ឱ្យចេញឆ្ងាយពីចំណុច 11 ម៉ែត្រ ដើម្បីដាក់សម្ពាធលើកីឡាករជាគូប្រជែង។ អ្នកចាំទីរូបនេះក៏ត្រូវបានអាជ្ញាកណ្ដាលពិន័យកាតលឿងបន្ទាប់ពីបាល់ពិន័យគ្រាប់ទីបីរបស់បារាំង ដោយសារតែបង្កភាពតានតឹងដាក់ Tchouameni ជាបន្តបន្ទាប់។

យោងតាម The Sun ឥរិយាបថដូចករណីអ្នកចាំទី Emiliano Martinez ទំនងជានឹងត្រូវ FIFA ពិនិត្យឡើងវិញ។ FIFA កំពុងត្រៀមបញ្ចេញគោលការណ៍ថ្មីដើម្បីហាមអ្នកចាំទីបញ្ចេញឥរិយាបថបង្កហេតុដាក់គូប្រជែងនៅពេលទាត់បាល់ពិន័យ។ កន្លងមក អ្នកចាំទី Emiliano Martinez បានប្រើប្រាស់ចំណុចនេះបានយ៉ាងល្អ នៅមុនការត្រៀមចាប់បាល់ពិន័យម្ដងៗ ក្នុងពេលលេងឱ្យក្លឹប Aston Villa និងក្រុមជម្រើសជាតិអាហ្សង់ទីន។

FIFA នឹងអនុម័តគោលការណ៍ថ្មីនៅក្នុងកិច្ចប្រជុំប្រចាំឆ្នាំរបស់ពួកគេដែលនឹងធ្វើឡើងក្នុងខែមីនាខាងមុខ មុនពេលមាត្រាថ្មីនេះត្រូវបានដាក់ឱ្យអនុវត្តជាផ្លូវការក្នុងច្បាប់បាល់ទាត់។ គោលការណ៍ថ្មីទាំងនេះក៏អាចទប់ស្កាត់អ្នកចាំទីរាំរែក ឬបញ្ចេញកាយវិការនានាដែលអាចជាសម្ពាធសម្រាប់គូប្រកួត ព្រោះថា ប្រការនោះក៏ត្រូវបានចាត់ទុកថាជាសកម្មភាពបំបែកអារម្មណ៍៕

អ្នកចាំទី Emiliano Martinez គឺជាវីរបុរសរបស់ប្រជាជនអាហ្សង់ទីន

January 28, 2023

Author: សឿន សំណាង