សឿន សំណាង - La Reine Media

គម្រោងបង្កើតរោងចក្រថ្មីចំនួនបីនៅកម្ពុជា មានទុនសរុបជាង 17 លានដុល្លារ ទទួលបានការចុះបញ្ជី

គណៈកម្មាធិការវិនិយោគនៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីគម្រោងវិនិយោគ ជូនដល់ក្រុមហ៊ុនចំនួនបី ដែលមានទុនវិនិយោគសរុប ប្រមាណ 17.6 លានដុល្លារអាម៉េរិក និងអាចបង្កើតការងារបានជាង 4,400 កន្លែង។

ក្នុងការវិនិយោគថ្មីនេះ មានគម្រោងពីរស្ថិតនៅក្នុងខេត្តកំពង់ស្ពឺ និងមួយស្ថិតក្នុងខេត្តតាកែវ៖

គម្រោង PENGJIAO (CAMBODIA) INDUSTRIAL CO., LTD នឹងបង្កើតរោងចក្រកាត់ដេរសម្លៀកបំពាក់ដែលមានទីតាំងវិនិយោគស្ថិតនៅភូមិសំរោង ឃុំសូភី ស្រុកបាទី ខេត្តតាកែវ ក្នុងទុនវិនិយោគប្រមាណ 7 លានដុល្លារអាម៉េរិក និងអាចបង្កើតការងារបានចំនួន 3,258 កន្លែង។

គម្រោង ZHONG SHAN TENG FEI (CAMBODIA) PACKAGING MATERIAL CO., LTD គ្រោងនឹងបង្កើតរោងចក្រផលិតសម្ភារៈវេចខ្ចប់ ដែលមានទីតាំងវិនិយោគស្ថិតនៅភូមិទួលសំបូរ ឃុំដំណាក់រាំង ស្រុកឧដុង្គ ខេត្តកំពង់ស្ពឺ ក្នុងទុនវិនិយោគប្រមាណ 5.5 លានដុល្លារអាម៉េរិក និងអាចបង្កើតការងារបានចំនួន 1,076 កន្លែង។

គម្រោង SSH CB SUSTAINABLE FASHION CO., LTD គ្រោងនឹងបង្កើតរោងចក្រកាត់ដេរសម្លៀកបំពាក់ដែលមានទីតាំងវិនិយោគស្ថិតនៅភូមិព្រៃសាលា ឃុំរលាំងគ្រើល ស្រុកសំរោងទង ខេត្តកំពង់ស្ពឺ ក្នុងទុនវិនិយោគប្រមាណ 5.1 លានដុល្លារអាម៉េរិក និងអាចបង្កើតការងារបានចំនួន 2,148 កន្លែង។

February 23, 2023

ដើម្បីភរិយានិងកូន Messi មានការសម្រេចចិត្តសំខាន់ស្ដីពីក្លឹបអនាគត

នៅក្នុងស្ថានភាពដែលកិច្ចព្រមព្រៀងជាមួយក្លឹប PSG នឹងត្រូវអស់សុពលភាពនៅចុងរដូវកាលនេះ Lionel Messi នឹងត្រូវប្រញាប់សម្រេចចិត្តក្នុងការជ្រើសរើសក្រុមបាល់ទាត់អនាគត។

Messi កំពុងស្ថិតក្នុងដំណាក់កាលចុងក្រោយនៃកិច្ចសន្យាដែលបានចុះហត្ថលេខាជាមួយក្លឹបបារាំង PSG កាលពីឆ្នាំ 2021។ ដំណើរការនៃការពន្យារសុពលភាពបានឈានចូលដល់ដំណាក់កាលសំខាន់ ដែលបានចាប់ផ្ដើមការចរចាកាលពីដើមខែនេះ ប៉ុន្តែមិនទាន់បានជោគជ័យ។

នេះក៏ជាពេលដែល Messi អាចចរចាជាមួយក្លឹបដទៃដោយសេរី។ ចំណែកបណ្ដាក្លឹបក៏មានឱកាសច្រើនក្នុងការ «ចាប់យក» កំពូលតារាបាល់ទាត់ពិភពលោកនេះ។ យោងតាមប្រភពព័ត៌មាននៅអឺរ៉ុប មិនត្រឹមតែក្លឹបចាស់ Barca នោះទេ ក្លឹបជាច្រើនក្រៅអឺរ៉ុប មានដូចជា Inter Miami (សហរដ្ឋអាម៉េរិក) របស់ Beckham ឬ Al Hilal (អារ៉ាប៊ីសាអូឌីត) ជាដើម ក៏កំពុងចាប់អារម្មណ៍លើ Messi។

ទោះជាយ៉ាងណាក៏ដោយ ថ្មីៗនេះ ប្រភពព័ត៌មានដែលស្និទ្ធនឹង El Pulga (Messi) បានបញ្ជាក់អំពីបញ្ហានេះ។ ជាក់ស្ដែង អ្នកយកព័ត៌មាន Gaston Edul របស់ TyC Sport Argentina ជាអ្នកធ្លាប់សម្ភាសជាមួយ Messi ជាញឹកញាប់ បានឱ្យដឹងថា លទ្ធភាពដែលថា M10 នឹងចាកចេញពីអឺរ៉ុប គឺជាមានកម្រិតទាបណាស់។

Edul ជឿថា Messi នឹងជ្រើសរើសតែ PSG ឬ Barca ប៉ុណ្ណោះ។ ដោយសារកត្តាគ្រួសារ Messi នឹងមិនទៅទាត់ឱ្យក្លឹបនៅខាងក្រៅអឺរ៉ុបឡើយ។ ជាងនេះ អំឡុងពេលបច្ចុប្បន្ន ក្រុមអ្នកគ្រប់គ្រងរបស់ Messi ក៏ចរចាជាមួយតែក្លឹប PSG ប៉ុណ្ណោះ ខណៈដែល Barca មិនធ្លាប់មានសំណើចរចាជាផ្លូវការណាមួយឡើយ។

ថ្វីបើមានពាក្យចចាមអារ៉ាមស្ដីពីទំនោរចាកចេញពីប៉ារីសនៅចុងរដូវកាល ប៉ុន្តែបើគិតជារួម ការស្ថិតនៅ PSG ទំនងជាល្អបំផុតសម្រាប់ Messi។ ព្រោះថា PSG សន្យាថានឹងរក្សាប្រាក់បៀវត្សរ៍ 41 លានអឺរ៉ូ/រដូវ សម្រាប់កីឡាកររូបនេះ។ សំខាន់ជាងនេះ គឺថា គ្រួសាររបស់ M10 ក៏កំពុងមានសុភមង្គល និងរស់នៅយ៉ាងរីករាយជាមួយជីវភាពនៅប្រទេសបារាំង៕

February 23, 2023

អាម៉េរិក ជប៉ុន និងកូរ៉េខាងត្បូង ធ្វើសមយុទ្ធប្រឆាំងមីស៊ីលប្លោងរបស់កូរ៉េខាងជើង

នាវាចម្បាំងរបស់អាម៉េរិក ជប៉ុន និងកូរ៉េខាងត្បូងធ្វើសមយុទ្ធប្រឆាំងមីស៊ីលដើម្បីឆ្លើយតបនឹងករណីកូរ៉េខាងជើងបាញ់មីស៊ីល និងរ៉ុក្កែតកាលពីពេលថ្មីៗនេះ។

នាវាពិឃាត USS Barry របស់សហរដ្ឋអាម៉េរិក, Sejong របស់កូរ៉េខាងត្បូង និង JS Atago របស់ជប៉ុន កាលពីថ្ងៃទី 22 កុម្ភៈ បានចូលរួមសមយុទ្ធយោធានៅលើសមុទ្រជប៉ុន។ សមយុទ្ធនេះធ្វើឡើងដើម្បីឆ្លើយតបទៅកាន់កូរ៉េខាងជើងដែលបានបាញ់មីស៊ីលប្លោងអន្តរទ្វីប (ICBM) Hwasong-15 កាលពីថ្ងៃទី 18 កុម្ភៈ និងរ៉ុក្កែតប្រឆាំងនាវាពិឃាតកាលពីថ្ងៃទី 20 កុម្ភៈ។

ក្រោយការបាញ់មីស៊ីល Hwasong-15 របស់កូរ៉េខាងជើង សហរដ្ឋអាម៉េរិកក៏បានបញ្ជូនយន្តហោះទម្លាក់គ្រាប់បែក B-1B ចំនួន 2 គ្រឿងមកកាន់កូរ៉េខាងត្បូងកាលពីថ្ងៃទី 19 កុម្ភៈ។ យន្តហោះចម្បាំង F-35A និង F-15K របស់កូរ៉េខាងត្បូង រួមនឹង F-16 របស់អាម៉េរិក បានអមដំណើរយន្តហោះ B-1B នៅលើតំបន់កំណត់អត្តសញ្ញាណការពារដែនអាកាស (ADIZ) របស់កូរ៉េខាងត្បូង។ ចំណែកក្រសួងការពារជាតិជប៉ុន ក្រោយមកក៏បានប្រកាសថា យន្តហោះចម្បាំង F-15 ចំនួន 3 គ្រឿងរបស់ប្រទេសនេះ និង F-16 ចំនួន 4 គ្រឿងរបស់អាម៉េរិក ធ្វើសមយុទ្ធជាមួយនឹង B-1B នៅលើសមុទ្រ។

កូរ៉េខាងត្បូង កាលពីថ្ងៃទី 16 កុម្ភៈ 2023 បានបញ្ចេញសៀវភៅសការពារជាតិឆ្នាំ 2022។ ក្នុងសៀវភៅនេះ កូរ៉េខាងត្បូងបានហៅកូរ៉េខាងជើងថា «សត្រូវ» ជាលើកដំបូងក្រោយរយៈពេល 6 ឆ្នាំកន្លងមកនេះ។ នេះគឺជាសញ្ញាបង្ហាញថា ទីក្រុងសេអ៊ូលចាប់ផ្ដើមតឹងរឹងជាងមុនចំពោះទីក្រុងព្យុងយ៉ាង៕

February 23, 2023

រកឃើញដុំបាល់ដែកទំហំជាង 600 គីឡូម៉ែត្រនៅកណ្ដាលស្នូលផែនដី

ក្រុមអ្នកវិទ្យាសាស្ត្របានរកឃើញវត្តមានរបស់ដុំបាល់ដែក nickel មួយយ៉ាងធំនៅក្នុងផែនដី តាមរយៈការពិនិត្យលើទិន្នន័យដែលបានរកពីរលករញ្ជួយដី។

នៅខាងក្រោមសម្បកផែនដី គឺមានស្រទាប់កណ្ដាល ស្នូលខាងក្រៅដែលក្ដៅរលាយ ស្នូលខាងក្នុងដែលជាដែករឹងរបស់ផែនដី។ ក៏ប៉ុន្តែស្នូលខាងក្នុងដែលជាដែករឹងនេះនៅមានស្នូលខាងក្នុងបង្អស់មួយស្រទាប់ទៀត នេះបើតាមលទ្ធផលនៃការសិក្សាស្រាវជ្រាវថ្មីដែលបានប្រកាសកាលពីថ្ងៃទី 21 កុម្ភៈ លើទស្សនាវដ្ដី Nature Communications។

អ្នកវិទ្យាសាស្ត្រជាច្រើន កាលពីប្រហែល 20 ឆ្នាំមុន បានសង្ស័យថា ស្នូលផែនដីមានស្រទាប់មួយផ្សេងទៀតដែលពិបាករកឃើញ។ ពេលនេះ ដោយការប្រើប្រាស់ទិន្នន័យដែលប្រមូលបានពីរលកសញ្ញានៃហេតុការណ៍រញ្ជួយដី អ្នកវិទ្យាសាស្ត្រក៏បានរកឃើញស្រទាប់ក្នុងបង្អស់។

ការរកឃើញស្រទាប់ថ្មីនៅក្នុងជម្រៅជាង 1,600 គីឡូម៉ែត្រក្រោមដី និងទំហំប្រហែល 644 គីឡូម៉ែត្រនេះ គឺពិតជាមានសារសំខាន់។ វាបង្ហាញថា ផែនដីមាន 5 ស្រទាប់សំខាន់ៗ មិនមែន 4 នោះទេ។ របកគំហើញនេះក៏នឹងជួយដល់អ្នកវិទ្យាសស្ត្រស្វែងយល់បន្ថែមពីដែនម៉ាញេទិច និងការវិវត្តរបស់វា រួមនឹងអាថ៌កំបាំងនានារបស់ផែនដី ក៏ដូចជាការកកើត និងការវិវត្តរបស់ពិភពដទៃ៕

February 23, 2023

ក្រុមហ៊ុនថ្មីមួយចង់ធ្វើឱ្យឥណ្ឌាទៅជាកន្លែងផលិតរថយន្តអគ្គិសនីធំជាងគេលើលោក

ក្រុមហ៊ុនមួយដែលមានដើមកំណើតពីភ្នាក់ងារហៅរថយន្តតាក់ស៊ីកំពុងរៀបផែនការដើម្បីផលិតរថយន្តអគ្គិសនី និងម៉ូតូអគ្គិសនី ក្នុងទ្រង់ទ្រាយធំនៅឥណ្ឌា។

យោងតាម Bloomberg ក្រុមហ៊ុន Ola Electric Mobility មានគម្រោងសាងសង់ «មជ្ឈមណ្ឌលរថយន្តអគ្គិសនីធំបំផុតលើលោក» ដោយមានទុនវិនិយោគ 76.1 ពាន់លានរូពី (ប្រហែល 918.3 ពាន់លានដុល្លារអាម៉េរិក)។

ក្នុងប្រកាសកាលពីពេលថ្មីៗនេះ Ola ឱ្យដឹងថា មជ្ឈមណ្ឌលនេះនឹងមានទំហំប្រហែល 809 ហិកតា នៅក្នុងរដ្ឋ Tamil Nadu ភាគខាងត្បូងប្រទេសឥណ្ឌា។ នេះនឹងក្លាយជាកន្លែងផលិតម៉ូតូអគ្គិសនី រថយន្តអគ្គិសនី និងថ្មផ្ទុកថាមពលសម្រាប់យានយន្តអគ្គិសនី។ ក្រៅពីនេះ មជ្ឈមណ្ឌលខាងលើក៏នឹងមានឧទ្យាន និងផ្ទះសម្រាប់កម្មករស្នាក់នៅផងដែរ។ ក្រុមហ៊ុនឥណ្ឌានេះគ្រោងនឹងផលិតទ្រង់ទ្រាយធំនូវថ្មផ្ទុកថាមពលសម្រាប់រថយន្តអគ្គិសនីចាប់ពីចុងឆ្នាំនេះ។

ក្រៅពី Ola នៅមានក្រុមហ៊ុន Reliance Industries របស់មហាសេដ្ឋី Mukesh Ambani និងក្រុមហ៊ុន Rajesh Exports ជាដើមក៏នឹងទទួលបានអត្ថប្រយោជន៍ទៅតាមកម្មវិធីដែលមានតម្លៃ 2.3 ពាន់លានដុល្លារអាម៉េរិករបស់រដ្ឋាភិបាលឥណ្ឌា ដើម្បីអភិវឌ្ឍថ្មផ្ទុកថាមពលទំនើប។

កាលពីឆ្នាំមុន Ola បានឱ្យដឹងថា ថ្មប្រភេទលីចូម (Lithium-ion) ដំបូងត្រូវបានអភិវឌ្ឍនៅក្នុងមជ្ឈមណ្ឌលផលិតថ្មរបស់ខ្លួននៅ Bengaluru ជាទីដែលក្រុមហ៊ុននេះបានវិនិយោគ 500 លានដុល្លារ។

លោក Bhavish Aggarwal ដែលជាស្ថាបនិកក្រុមហ៊ុន Ola បានបង្ហើបឱ្យដឹងពីគម្រោងចូលរួមក្នុងទីផ្សាររថយន្តអគ្គិសនីកាលពីដើមសប្ដាហ៍នេះ ដើម្បីប្រកួតប្រជែងជាមួយ Tata Group និង Hyundai Motor ឬ Tesla ជាដើម។

អ្នកជំនួញវ័យ 36 ឆ្នាំខាងលើថ្លែងថា Ola កំណត់គោលដៅបញ្ចេញរថយន្តអគ្គិសនីដំបូងនៅរដូវក្ដៅឆ្នាំក្រោយ និងមានតម្លៃក្រោម 50,000 ដុល្លារអាម៉េរិក/គ្រឿង៕

February 23, 2023

អាម៉េរិកព្រមានអំពី «គ្រឿងញៀនប្រភេទថ្មី» ដែលធ្វើឱ្យ «ស្បែករលួយស្អុយ»

មន្ត្រីអាម៉េរិកព្រមានថា បច្ចុប្បន្នមានប្រភេទម៉ាថ្មីដ៏គួរឱ្យបារម្ភ និងមានឈ្មោះថា xylazine ដែលអាចធ្វើឱ្យស្បែកអ្នកប្រើប្រាស់មានក្លិនអាក្រក់។

ក្នុងប៉ុន្មានសប្ដាហ៍ប៉ុណ្ណោះ Tracey McCann រស់នៅក្នុងរដ្ឋ Philadelphia ត្រូវរន្ធត់ខ្លាំងនៅពេលឃើញស្លាមចាក់គ្រឿងញៀនឡើងរឹង បង្កើតបានជាស្រទាប់ពណ៌ខ្មៅ ដាច់រលាត់ និងមានអាការឈឺចាប់។ «ខ្ញុំក្រោកពីព្រលឹម និងយំ ព្រោះតែឃើញដៃដូចជិតស្លាប់» ស្ត្រីវ័យ 39 ឆ្នាំ រៀបរាប់កាលពីថ្ងៃទី 20 កុម្ភៈដូច្នេះ។

ដៃដែលរងរបួសរបស់ McCann ភាយក្លិនអាក្រក់ ចេញទឹករងៃ រមាស់ និងក្ដៅក្រហាយ។ ចុងក្រោយ នាងត្រូវទៅពេទ្យដើម្បីឱ្យវេជ្ជបណ្ឌិតកាត់សាច់រលាកនោះចោល។ ប៉ុន្មានខែក្រោយមក McCann បានស្រកទម្ងន់ពី 68 មកនៅ 40 គីឡូក្រាម។

នេះគឺជាផលវិបាកនៃការចាក់គ្រឿងញៀន xylazine ក្នុងរយៈពេលយូរ។ ក្នុងតំបន់ដែល McCann រស់នៅ គេឃើញមានគ្រឿងញៀនប្រភេទ xylazine នេះស្ទើរគ្រប់កន្លែង។

Xylazine ដើមឡើយគឺជាថ្នាំងងុយដេក ជួយកាត់បន្ថយការឈឺចាប់ និងតែងត្រូវបានបសុពេទ្យប្រើប្រាស់សម្រាប់សត្វចិញ្ចឹម មានជាអាទិ៍ គោ ក្របី និងសេះជាដើម ដោយស្របច្បាប់ នៅសហរដ្ឋអាម៉េរិក ប៉ុន្តែមិនទាន់ត្រូវបានអនុញ្ញាតឱ្យប្រើប្រាស់សម្រាប់មនុស្ស ដូច្នេះវាក៏មានវត្តមាននៅក្នុងសង្គមងងឹត។

បច្ចុប្បន្ន អាជ្ញាធរគ្រប់គ្រងអាហារ និងឱសថអាម៉េរិក (FDA) កំពុងស្រាវជ្រាវរកប្រភពរបស់ xylazine នៅក្នុងករណីអ្នកជំងឺត្រូវចូលពេទ្យ ក្នុងបំណងឱ្យដឹងច្បាស់ថា វាត្រូវបានយកពីប្រភពថ្នាំបសុពេទ្យ ឬផលិតដោយខុសច្បាប់។

តាំងពីឆ្នាំ 2012 ថ្នាំញៀន xylazine បានក្លាយជាផលិតផលជំនួសឱ្យ heroin និងត្រូវបានរកឃើញនៅក្នុង fentanyl និង cocaine។ Fentanyl ដែលប្រើជាមួយ xylazine អាចជួយអូសបន្លាយប្រសិទ្ធភាពរបស់ថ្នាំញៀន។ អ្នកប្រើប្រាស់គ្រឿងញៀនប្រភេទនេះនឹងមានអារម្មណ៍ដូចពាក់កណ្ដាលរលឹក ពាក់កណ្ដាលសន្លប់។ ប៉ុន្តែ នៅពេលចាក់ថ្នាំញៀននេះចូលទៅក្នុងស្បែក វានឹងធ្វើឱ្យមានស្នាមរបួសស្ងួតរឹងនៅលើស្បែក ហើយរបួសនេះនឹងរីកទៅតាមពេលវេលា។ បើសិនមិនបានព្យាបាលទាន់ពេល វានឹងទៅជាស្អុយរលួយ និងត្រូវកាត់សាច់នោះចោល។

ការបន្សាបអាការញៀនថ្នាំ xylazine មិនមែនជារឿងងាយស្រួលសោះឡើយ។ អ្នកជំងឺត្រូវឈឺចាប់មួយចំហៀងក្បាល ភ្នែកប្រែជាស្រវាំង ក្អួតចង្អោរ ស្ពឹកម្រាមដៃជើង បែកញើស និងថប់អារម្មណ៍៕

February 22, 2023

ពេលចាកចេញពីក្លឹបបារាំង ម្ចាស់ជើងឯក World Cup 2022 នឹងជ្រើសរើសគោលដៅថ្មីសម្រាប់ការចូលនិវត្តន៍

ពេលចាកចេញពី PSG កីឡាករកំពូលរបស់ពិភពលោក Messi ចង់ទៅទាត់ឱ្យ Inter Miami ហើយចូលនិវត្តន៍នៅទីនេះ។

ក្លឹបបារាំង PSG បច្ចុប្បន្នកំពុងប្រឹងប្រែងបញ្ចុះបញ្ចូល Messi ឱ្យចុះកិច្ចព្រមព្រៀងថ្មី ប៉ុន្តែ យោងតាមទំព័រ L’Equipe ម្ចាស់ជើងឯក World Cup 2022 ពីមួយថ្ងៃទៅមួយថ្ងៃ កាន់តែទោរទន់ទៅរកការចាកចេញពីកីឡដ្ឋាន Le Parc des Princes តាមទម្រង់ដោះដូរដោយសេរីនៅរដូវក្ដៅឆ្នាំ 2023 នេះ។

បច្ចុប្បន្ន ក្រៅពី PSG ក្លឹប Man City, Chelsea និងក្រុមបាល់ទាត់ធំៗមួយចំនួនទៀតនៅអឺរ៉ុប ក៏មានបំណងទិញយកកំពូលតារាបាល់ទាត់ជនជាតិអាហ្សង់ទីនរូបនេះផងដែរ។ ក៏ប៉ុន្តែ ប្រភពព័ត៌មានខាងលើបានអះអាងថា Lionel Messi ចង់ទៅទាត់ឱ្យ Inter Miami ហើយចូលនិវត្តន៍នៅទីនេះ ជាជាងការបន្តទាត់ឱ្យ PGS ឬក្លឹបដទៃទៀត៕

February 22, 2023

មតិចម្រូងចម្រាសស្ដីពីការស្លាប់របស់តួអង្គ Jack ក្នុងរឿង «Titanic» នៅតែបន្តកើតមាន

អ្នកដឹកនាំរឿងរបស់ «Titanic» បានទទួលស្គាល់ថា តួអង្គ Jack អាចនៅមានជីវិត បន្ទាប់ពីបានបង្កើតឡើងវិញនូវស្ថានការណ៍ដូចទៅនឹងឈុតឆាកក្នុងខ្សែភាពយន្ត។

យោងតាមទំព័រ Complex ការជជែកគ្នាអំពីការស្លាប់របស់ Jack បានអូសបន្លាយពេលពេញ 25 ឆ្នាំ ធ្វើឱ្យអ្នកដឹករឿង James Cameron ត្រូវចេញមុខបកស្រាយជាច្រើនលើក។ កាលពីឆ្នាំ 2019 លោក James បានប្រាប់ទំព័រ The Toronto Sun ថា ការស្លាប់របស់ Jack (សម្ដែងដោយ Leonardo DiCaprio) គឺជា «ជម្រើសសិល្បៈ» មិនទាន់ទងនឹងកត្តារូបវិទ្យាឡើយ។ «គាត់ត្រូវតែស្លាប់។ ដូចទៅនឹង Romeo និង Juliet។ នេះគឺជាភាពយន្តស្ដីពីស្នេហា ការលះបង់ និងការស្លាប់។ ស្នេហាត្រូវបានគណនាដោយការលះបង់» លោក James Cameron ថ្លែងដូច្នេះ។

ក្នុងឱកាសខួប 25 ឆ្នាំនៃការបង្ហាញវត្តមានរបស់ភាពយន្ត Titanic លោក James Cameron បានយល់ព្រមចូលរួមក្នុងការពិសោធអំពីឱកាសនៃការរស់រានមានជីវិតរបស់តួអង្គ Jack។ ដោយមានការចូលរួមរបស់ក្រុមអ្នកស្រាវជ្រាវអំពីឥទ្ធិពលនៃភាពត្រជាក់ទៅលើរាងកាយមនុស្ស ក្រុមផលិតភាពយន្តបានបង្កើតបន្ទះក្ដារអណ្ដែតដូចក្នុងរឿង Titanic និងជួលអ្នកសម្ដែងពីរនាក់ដែលមានអាយុ កម្ពស់ ទម្ងន់ និងស្លៀកពូកដូចទៅនឹង Jack និង Rose ហើយធ្វើត្រាប់តាមសកម្មភាព និងសម្ដីដូចក្នុងភាពយន្តនេះ។

បន្ទាប់ពីបានធ្វើការពិសោធ អ្នកដឹករឿង Titanic លោក James Cameron ទទួលស្គាល់ថា Jack អាចនៅមានជីវិត

ក្នុងការពិសោធដំបូង Jack និង Rose សុទ្ធតែនឹងត្រូវលិចក្នុងទឹក បើសិនឡើងលើបន្ទះក្ដារជាមួយគ្នា។ ក្នុងការពិសោធទីពីរ អ្នកទាំងពីរតោងបន្ទះក្ដារ និងបណ្ដែតខ្លួនមួយកំណាត់នៅលើផ្ទៃទឹក។ James Cameron យល់ថា វិធីនេះមិនអាចទៅរួច ព្រោះពួកគេអស់កម្លាំងទៅហើយក្រោយពីកប៉ាល់បានលិច។ ក្នុងការពិសោធទីបី Rose យកអាវពោងឱ្យ Jack ចំណែកនាងឡើងទៅលើបន្ទះក្ដារ ជួយឱ្យកំលោះនេះរស់បានច្រើនម៉ោងបន្ថែមទៀត។

«ស្ថានភាពរបស់កំលោះនេះនៅល្អ អាចរង់ចាំរហូតដល់ទូកសង្គ្រោះមកដល់។ Jack អាចរស់រានមានជីវិត។ ប៉ុន្តែនឹងនៅមានបញ្ហាជាច្រើនទៀតដែលអាចនឹងកើតឡើង» លោក James Cameron និយាយដូច្នេះ និងបន្តថា Jack អាចនឹងមិនព្រមទទួលយកអាវពោងពី Rose ព្រោះគិតថា «ខ្ញុំនឹងមិនធ្វើអ្វីដែលនាំឱ្យនាងជួបគ្រោះថ្នាក់»។ ក្រោយពីបានទទួលស្គាល់ថា Jack មានលទ្ធភាពអាចរស់រាន លោក James Cameron បញ្ជាក់ថា «ខ្ញុំគួរណាស់តែធ្វើបន្ទះក្ដារតូចជាងនេះ»។

ទិដ្ឋភាព Jack បានស្លាប់ ខណៈ Rose អស់សង្ឃឹម

ក្នុងកម្មវិធី podcast Happy Sad Confused កាលពីចុងឆ្នាំកន្លង ពិធីករ Josh Horowitz បាននិយាយដល់ស្ថានការណ៍ខាងលើជាមួយនឹងតារាសម្ដែង Kate Winslet ដែលបានសម្ដែងជាតួអង្គឯក Rose។ ដោយមានបទពិសោធន៍ច្រើនទាក់ទងនឹងកីឡាមុជទឹកសមុទ្រ ជិះស្គីលើរលកសមុទ្រ អ្នកស្រី Kate Winslet និយាយថា «បើសិនអ្នកដាក់មនុស្សពីរនាក់ឡើងលើបន្ទះក្ដារ វានឹងបាត់បង់តុល្យភាពភ្លាម។ … ខ្ញុំពិតជាមិនជឿថា អ្នកទាំងពីរនឹងនៅមានជីវិត បើសិនឡើងលើបន្ទះក្ដារនោះ។

ឈុតឆាកនៃការស្លាប់របស់តួអង្គ Jack បន្ទាប់ពីកប៉ាល់ Titanic បានលិច

នៅលើបណ្ដាញសង្គម Quora ប្រធានបទស្ដីពី «រឿងរ៉ាវអ្វីខ្លះនឹងកើតឡើងបើសិន Jack មិនស្លាប់ក្នុងហេតុការណ៍លិចកប៉ាល់ Titanic» បានទាក់ទាញមតិរាប់ពាន់លើក។ ទស្សនិកជនជាច្រើនស្រមៃថា គូស្នេហ៍នេះអាចបែកគ្នា ដោយសារ Rose រងសម្ពាធពីគ្រួសារ វណ្ណៈរបស់ពួកគេខុសគ្នាឆ្ងាយ ពិសេសគឺនៅពេល Jack ជាអ្នកក្រ មិនមានប្រាក់មួយសេននៅក្នុងថង់។ ចំណែកទស្សនិកជនខ្លះទៀតជឿថា Rose មិនគប់ខ្សែកដែលមានតម្លៃខ្ពស់ចូលទៅក្នុងសមុទ្រ ប៉ុន្តែពួកគេនឹងលក់វា ហើយអាចរស់នៅជាមួយគ្នា។ ទស្សនិកជនភាគច្រើនយល់ថា បើសិន Jack មិនស្លាប់ ខ្សែភាពយន្តនេះនឹងបាត់បង់អត្ថន័យមួយចំនួន៕

February 22, 2023

អតីតរដ្ឋមន្ត្រីប្រឆាំងគ្រឿងញៀនម៉ិកស៊ិក ត្រូវបានកាត់ទោសពីបទជួញដូរគ្រឿងញៀន

អតីតរដ្ឋមន្ត្រីសន្តិសុខសាធារណៈ Luna ជាអ្នកដែលធ្លាប់ទទួលបន្ទុកប្រឆាំងគ្រឿងញៀនរបស់ម៉ិកស៊ិក ត្រូវបានកាត់ទោសនៅតុលាការអាម៉េរិក ពីបទគប់គិតជាមួយក្រុមជួញដូរគ្រឿងញៀន។

ចៅក្រមតុលាការនៅខណ្ឌ New York ខាងកើតរបស់សហរដ្ឋអាម៉េរិក កាលពីថ្ងៃទី 21 កុម្ភៈ 2023 បានឱ្យដឹងថា គណៈវិនិច្ឆ័យបានកាត់ទោសអតីតរដ្ឋមន្ត្រីសន្តិសុខសាធារណៈម៉ិកស៊ិក លោក Genaro Garcia Luna ដោយសារអំពើរួមគំនិតគ្នា និងទទួលសំណូកពីបណ្ដាក្រុមជួញដូរគ្រឿងញៀនក្នុងពេលកាន់អំណាច។

លោក Luna អាយុ 54 ឆ្នាំ បានកាន់តំណែងរដ្ឋមន្ត្រីក្រសួងសន្តិសុខសាធារណៈម៉ិកស៊ិកក្នុងអាណត្តិពីឆ្នាំ 2006 ដល់ 2012 និងធ្លាប់ទទួលបន្ទុកបង្ក្រាបគ្រឿងញៀននៅប្រទេសនេះ។ គណៈវិនិច្ឆ័យបានរកឃើញថា លោក Luna បានចូលរួមធ្វើសកម្មភាពនាំចូល រក្សាទុក ចែកចាយកូកាអ៊ីនទូទាំងពិភពលោក និងភូតកុហកតុលាការ។ Luna គឺជាមេដឹកនាំជាន់ខ្ពស់បំផុតក្នុងរដ្ឋាភិបាលម៉ិកស៊ិក ដែលត្រូវបានកាត់ទោសនៅសហរដ្ឋអាម៉េរិក។

ចៅក្រមតុលាការអាម៉េរិកគ្រោងនឹងប្រកាសសាលក្រមជំនុំជម្រះលើលោក Luna នៅថ្ងៃទី 27 មិថុនាខាងមុខ ក្រោយការកាត់ទោសរយៈពេល 4 សប្ដាហ៍។ ជននេះកំពុងប្រឈមមុខនឹងការជាប់ពន្ធនាគារយ៉ាងតិច 20 ឆ្នាំ និងយ៉ាងយូរអស់មួយជីវិត។

លោក Luna ត្រូវបានចាប់ខ្លួននៅរដ្ឋ Texas សហរដ្ឋអាម៉េរិក កាលពីខែធ្នូ 2019

ក៏ប៉ុន្តែ មេធាវីរបស់លោក Luna បានឱ្យដឹងថា នឹងពិចារណាលើការដាក់ពាក្យប្ដឹងសាទុក្ខទៅកាន់សាលាឧទ្ធរណ៍នៅថ្ងៃតុលាការប្រកាសសាលក្រម។

Jesus Ramirez Cuevas ដែលជាអ្នកនាំពាក្យរបស់ប្រធានាធិបតីម៉ិកស៊ិក Andres Manuel Lopez Obrador បានសរសើរចំពោះការសម្រេចរបស់តុលាការអាម៉េរិក និងថ្លែងថា «អំពើឧក្រិដ្ឋប្រឆាំងនឹងប្រជាជននឹងមិនត្រូវបានគេបំភ្លេចចោលឡើយ»។

លោក Luna ត្រូវបានចាប់ខ្លួននៅរដ្ឋ Texas សហរដ្ឋអាម៉េរិក កាលពីខែធ្នូ 2019 ក្រោមបទចោទ «ទទួលសំណូកច្រើនដើម្បីឱ្យក្រុមសង្គមងងឹត «El Chapo» Guzman ដឹកជញ្ជូនគ្រឿងញៀនចូលទឹកដីអាម៉េរិក»៕

February 22, 2023

វត្ថុបុរាណអាយុកាលពីរពាន់ឆ្នាំត្រូវគេសង្ស័យថាជាឧបករណ៍បម្រើផ្លូវភេទ

(អង់គ្លេស) – វត្ថុបុរាណមួយដែលមានអាយុកាលជិត 2,000 ឆ្នាំ មានប្រវែងប្រហែល 16 សង់ទីម៉ែត្រ អាចដើរតួនាទីជាឧបករណ៍បម្រើផ្លូវភេទរបស់ជនជាតិរ៉ូមម៉ាំងបុរាណនៅចក្រភពអង់គ្លេស។

វត្ថុបុរាណនេះត្រូវបានក្រុមបុរាណវិទូរកឃើញកាលពីឆ្នាំ 1992 នៅក្នុងប្រឡាយមួយនៅឯបន្ទាយរ៉ូម៉ាំង Vindolanda ក្បែររូបសំណាក Hadrian នៅប្រទេសអង់គ្លេស ដែលជាសំណង់បញ្ជាក់ពីព្រំដែនភាគពាយព្យរបស់ចក្រភពរ៉ូម។

វត្ថុបុរាណអាយុកាលជិត 2,000 ឆ្នាំនេះ ដំបូងឡើយត្រូវបានគេយល់ថាជាឧបករណ៍ដេរប៉ាក់។ ក៏ប៉ុន្តែ ក្រោយពីបានពិនិត្យមើលយ៉ាងលំអិត ក្រុមបុរាណវិទូសន្និដ្ឋានថា នេះគឺជាលិង្គសិប្បនិម្មិត។ វត្ថុចម្លាក់ដែលមានប្រវែង 160 មិល្លីម៉ែត្រនេះអាចត្រូវបានប្រើប្រាស់ជាឧបករណ៍ផ្លូវភេទ។ បើសិនពិតជាបែបនេះមែន នោះវាគឺជាភស្ដុតាងតែមួយគត់ស្ដីពីលិង្គនៅក្នុងយុគសម័យរ៉ូម៉ាំង នេះបើតាមបុរាណវិទូ Rob Collins សាស្ត្រាចារ្យនៅសាកលវិទ្យាល័យ Newcastle អង់គ្លេស។

យោងតាមក្រុមស្រាវជ្រាវខាងលើ វត្ថុនេះអាចត្រូវបានប្រើប្រាស់ដោយម្ចាស់ទាសករដើម្បីដាក់ទណ្ឌកម្ម ឬប្រើប្រាស់សិទ្ធិគ្រប់គ្រង និងស្ដារអំណាច។ ក្រៅពីនេះ បុរាណវិទូបានសន្និដ្ឋានថា វត្ថុនេះក៏អាចត្រូវបានដាក់នៅលើរូបសំណាកអ្វីមួយនៅក្បែរផ្លូវ ហើយអ្នកធ្វើដំណើរឆ្លងកាត់អាចស្ទាបដើម្បីសុំសេចក្ដីសុខ។ ជាងនេះវាក៏អាចត្រូវបានប្រើប្រាស់ជាអង្រែសម្រាប់បុកឱសថបុរាណផងដែរ។ បច្ចុប្បន្ន វត្ថុបរាណនេះត្រូវបានដាក់តាំងនៅក្នុងសារមន្ទីរ Vindolanda នៅចក្រភពអង់គ្លេស៕

February 22, 2023

Author: សឿន សំណាង