សឿន សំណាង - La Reine Media

ចិននឹងបាញ់បង្ហោះផ្កាយរណបអ៊ីនធើណិតដើម្បីប្រជែងនឹង Starlink របស់អាម៉េរិក

គម្រោង GW របស់ចិននឹងបាញ់បង្ហោះផ្កាយរណបជាងមួយម៉ឺនគ្រឿង ឡើងទៅកាន់គន្លងគោចរកម្រិតទាបរបស់ផែនដីដើម្បីប្រកួតប្រជែងជាមួយនឹងប្រព័ន្ធផ្កាយរណបអ៊ីនធើណិត Starlink របស់អាម៉េរិក។

ចិនកំពុងរៀបគម្រោងស្ថាបនាប្រព័ន្ធផ្កាយរណបមួយដ៏ធំដើម្បីផ្គត់ផ្គង់អ៊ីនធើណិតដល់អ្នកប្រើប្រាស់នៅទូទាំងពិភពលោក និងដើម្បីប្រកួតប្រជែងជាមួយនឹងប្រព័ន្ធផ្កាយរណប Starlink របស់ SpaceX នៅសហរដ្ឋអាម៉េរិក។ គម្រោងថ្មីរបស់ក្រុមហ៊ុនចិននេះមានឈ្មោះថា GW នេះបើតាមក្រុមអ្នកស្រាវជ្រាវដែលដឹកនាំដោយសាស្ត្រាចារ្យ Xu Can មកពីសាកលវិទ្យាល័យបច្ចេកទេសអវកាសនៅប៉េកាំង។

ក្នុងអត្ថបទចុះផ្សាយលើទស្សនាវដ្ដី Command Control and Simulation របស់ចិន កាលពីថ្ងៃទី 15 កុម្ភៈ លោក Xu Can និងសហការីបានឱ្យដឹង GW ដែលនឹងមានផ្កាយរណបសរុប 12,992 គ្រឿង គឺជាគម្រោងរបស់ក្រុមហ៊ុនបណ្ដាញផ្កាយរណបចិនដែលទើបត្រូវបានបង្កើតឡើងនាពេលថ្មីៗនេះ។ ពួកគេមិនបានបង្ហើបឱ្យដឹងអំពីកាលបរិច្ឆេទនៃការបាញ់បង្ហោះផ្កាយរណបទាំងនេះ ប៉ុន្តែចំនួននេះនឹងគ្រប់គ្រាន់សម្រាប់ការប្រកួតប្រជែងជាមួយនឹងផ្កាយរណបជាង 12,000 គ្រឿងដែល SpaceX គ្រោងនឹងសម្រេចបាននៅឆ្នាំ 2027។

តាមការប៉ាន់ស្មាន ផ្កាយរណបរបស់គម្រោង GW អាចនឹងត្រូវបានបាញ់បង្ហោះជាបន្តបន្ទាប់ និងយ៉ាងឆាប់រហ័ស មុនពេល SpaceX ស្ថាបនា Starlink បានពេញលេញ។ GW ទំនងជានឹងត្រូវបានដាក់លើគន្លងគោចរដែល Starlink មិនអាចហោះទៅដល់ ដើម្បីមានប្រៀបជាងលើរយៈកម្ពស់។

យោងតាម SpaceX បណ្ដាញផ្កាយរណប Starlink បច្ចុប្បន្នមានជិត 3,000 គ្រឿង ដែលស្ថិតនៅលើគន្លងគោចរ ហើយគ្រោងនឹងកើនឡើងដល់ជាង 40,000 គ្រឿងនៅពេលពេញលេញ៕

February 27, 2023

Manchester United លើកពានជាលើកដំបូងក្រោយ «ដៃទទេ» ជាងពីរពាន់ថ្ងៃ

(អង់គ្លេស) – ខ្សែបម្រើ Harry Maguire និងខ្សែបម្រើ Bruno Fernandes រួមគ្នាលើកពាន League Cup នៅលើទីលានបាល់ទាត់ Wembley កាលពីព្រលប់ថ្ងៃទី 26 កុម្ភៈ បញ្ចប់ស្ថានភាពដែលក្លឹប Manchester United គ្មានពានក្នុងរយៈពេលជិត 6 ឆ្នាំ។

197 ថ្ងៃ រាប់ចាប់ពីពេលចាញ់ Brentford 0-4 នៅលិគកំពូលអង់គ្លេសតាំងពីតង់ទីមួយ ក្រុម Man United ដណ្ដើមបានពានជាលើកដំបូងក្នុងរដូវកាល។ Fernandes និង Maguire រួមគ្នាលើកពាន ដូចទៅនឹង Steve Bruce និង Bryan Robson ធ្លាប់បានធ្វើជាមួយនឹងពានលិគកំពូលអង់គ្លេសក្នុងសម័យ Alex Ferguson កាលពីម្ភៃឆ្នាំមុន។

អ្នកលើកពានខាងលើចុងក្រោយគេគឺគ្រូបង្វឹក Erik Ten Hag។ ក្នុងរយៈពេលតែជាងកន្លះឆ្នាំប៉ុណ្ណោះ គ្រូបង្វឹករូបនេះបានជួយបញ្ចប់ស្ថានភាពគ្មានពានជិត 6 ឆ្នាំរបស់ក្លឹប Man Utd។ ក្រុមបីសាចក្រហមបានឈ្នះក្រុម Newcastle 2-0 ក្នុងវគ្គផ្ដាច់ព្រ័ត្រ។ ក្រោយពីរកបាន 2 គ្រាប់ក្នុងតង់ទីមួយ Man Utd ក៏បន្ត «ចងជើង» Newcastle នៅតង់ទីពីរ ធ្វើឱ្យគូប្រកួតគ្មានឱកាសបង្កគ្រោះថ្នាក់។

បន្ទាប់ពីឡើងទទួលពានជើងឯកនៅលើវេទិកា កូនសិស្ស និងគ្រូបង្វឹក Ten Hag ក៏ចុះទៅទីលានដើម្បីអបអរសាទរ។ Fernandes និង Maguire នៅតែជាអ្នកលើកពាន។ នេះគឺជាពាន League Cup ទី 6 ក្នុងប្រវត្តិសាស្ត្ររបស់ក្លឹប Manchester United នាំឱ្យពួកគេក្លាយជាក្រុមខ្លាំងលំដាប់ទីបី បន្ទាប់ពី Liverpool និង Man City នៅលើ «សមរភូមិ» នេះ។ លើកចុងក្រោយដែល Man Utd បានលើកពានគឺនៅ Europa League 2017 ក្នុងសម័យ Jose Mourinho៕

https://www.youtube.com/watch?v=xgLy_9M_kdY

https://www.youtube.com/watch?v=8xUUcgytUs8

February 27, 2023

សិង្ហបុរីនឹងមាននាវាមុជទឹកទំនើប បំបាំងកាយ នៅចុងឆ្នាំ 2023

ក្រសួងការពារជាតិសិង្ហបុរី ឱ្យដឹងថា នៅចុងទសវត្សរ៍នេះ នាវាមុជទឹកទាំង 4 គ្រឿងដែលខ្លួនបានបញ្ជាទិញពីអាល្លឺម៉ង់ នឹងធ្វើសកម្មភាពក្នុងតំបន់សមុទ្ររបស់ប្រទេសអាស៊ីអាគ្នេយ៍មួយនេះ។

រដ្ឋមន្ត្រីក្រសួងការពារជាតិសិង្ហបុរី លោក Ng Eng Hen បានឱ្យដឹងថា ចាប់ពីពេលនេះដល់ចុងឆ្នាំ 2023 ទ័ពជើងទឹកសិង្ហបុរី (RSN) នឹងទទួលបាននាវាមុជទឹកដំបូងក្នុងចំណោមនាវាថ្មីដែលត្រូវបានដាក់បណ្ដែតទឹកនៅទីក្រុង Kiel (អាល្លឺម៉ង់) កាលពីពេលថ្មីៗនេះ។

ក្នុងប្រកាសកាលមួយដែលត្រូវបានចុះផ្សាយលើគេហទំព័ររបស់ក្រសួងការពារជាតិ លោក Ng Eng Hen ឱ្យដឹងថា «ចំពោះទ័ពជើងទឹក យើងបានដាក់បណ្ដែតទឹកនាវាមុជទឹក Invincible ទីពីរ និងទីបីកាលពីប៉ុន្មានខែមុននៅ Kiel។ ចុងឆ្នាំនេះ យើងរំពឹងថា នាវាមុជទឹកដំបូងនឹងមកកាន់មូលដ្ឋាន។ នៅចុងទសវត្សរ៍នេះ នាវាមុជទឹកទាំង 4 គ្រឿងដែលបានបញ្ជាទិញពីអាល្លឺម៉ង់ នឹងធ្វើសកម្មភាពក្នុងតំបន់សមុទ្ររបស់ប្រទេសសិង្ហបុរី»។

យោងតាមលោក Ng Eng Hen នាវាមុជទឹកប៉ុន្មានគ្រឿងខាងលើត្រូវបានបំពាក់មុខងារមួយចំនួនដែលជួយឱ្យពួកវាបំបាំងកាយបានល្អ រហ័សរហួន និងមុជទឹកបានយូរជាងមុន។

កាលពីចុងឆ្នាំ 2022 សិង្ហបុរីបានដាក់បណ្ដែតទឹកនាវាមុជទឹកចំនួន 2 គ្រឿងនៅ Kiel។ នាវាទាំងនេះគឺជាប្រភេទអគ្គិសនី-ម៉ាស៊ូត ថ្នាក់ 218SG និងមានឈ្មោះថា RSN Impeccable និង RSN Illustrious។

កិច្ចសន្យាទិញដូររវាងអាល្លឺម៉ង់ និងសិង្ហបុរី រួមមាននាវាមុជទឹកចំនួន 4 គ្រឿងដែលអាចធ្វើសកម្មភាពបានយ៉ាងសមស្របនៅតំបន់សមុទ្ររបស់សិង្ហបុរី។ ក្រុមហ៊ុនឧស្សហកម្មអាល្លឺម៉ង់ ThyssenKrupp Marine Systems (tkMS) គឺជាអ្នកទទួលខុសត្រូវក្នុងការសាងសង់នាវាមុជទឹកនៅក្នុងកិច្ចសន្យាជាមួយសិង្ហបុរី៕

February 27, 2023

បទចម្រៀង «Cheri Cheri Lady» ក្នុងទសវត្សរ៍ឆ្នាំ 1980 កក្រើកឡើងជាថ្មី

បទចម្រៀង «Cheri Cheri Lady» របស់ក្រុមចម្រៀង Modern Talking បាន និងកំពុងតែពេញនិយមនៅលើបណ្ដាញសង្គម បន្ទាប់ពីតារាចម្រៀសស្រីវ័យ 16 ឆ្នាំ Malena យកមកច្រៀងឡើងវិញ។

បទចម្រៀងនេះត្រូវបានផលិតកម្ម Tokionine រីម៉ិចជាមួយនឹងសំឡេងបែបទំនើប ប៉ុន្តែនៅតែរក្សាបានស្មារតីរបស់ចង្វាក់ dance-pop ដែលបានបង្ហាញវត្តមានតាំងពី 4 ទសវត្សរ៍មុន។ «ខ្ញុំ cover ចង្វាក់ដែលពិសេសនៅអឺរ៉ុបកាលពីទសវត្សរ៍ឆ្នាំ 1980 នេះ ក៏ព្រោះគិតថា បទនេះនឹងរម្លឹកអនុស្សាវរីយ៍របស់មនុស្សជាច្រើន» Malena សរសេរលើ Instagram ដូច្នេះ។

នៅលើ Youtube ទស្សនិកជនភាគច្រើនកោតសរសើរសំឡេងដ៏ផ្អែមល្ហែម និងសមស្របរបស់ Malena។ បទចម្រៀង «Cheri Cheri Lady» ដែល Malena បានច្រៀងឡើងវិញនេះកំពុងក្លាយជាបទ background សម្រាប់វីដេអូ TikTok ជាច្រើន ដែលមានអ្នកមើលរាប់លាននាក់។ ចំណែកបទចម្រៀង «Cheri Cheri Lady» របស់ម្ចាស់ដើម ក៏ត្រូវបានស្វែងរកច្រើនផងដែរនៅក្នុងបណ្ដាញសង្គម។

បទចម្រៀង «Cheri Cheri Lady» ដែល Malena បានច្រៀងឡើងវិញ

«Cheri Cheri Lady» គឺជាផលិតផលដំបូងរបស់ក្មេងស្រីវ័យ 16 ឆ្នាំ ជនជាតិអាមេនី នាង Malena បន្ទាប់ពីដណ្ដើមបានពានរង្វាន់លេខមួយ Junior Eurovision Song Contest កាលពីចុងឆ្នាំកន្លង។

បទចម្រៀង «Cheri Cheri Lady» របស់ម្ចាស់ដើម គឺជាបទក្នុងអាល់ប៊ូមទីពីរ «Let’s Talk About Love» របស់ ក្រុម Modern Talking ដែលត្រូវបានបញ្ចេញលើទីផ្សារកាលពីឆ្នាំ 1985 និងបានក្លាយជាបទចម្រៀងលេចធ្លោជាងគេនៅអឺរ៉ុបកាលពីសម័យនោះ។

បទចម្រៀង «Cheri Cheri Lady» របស់ម្ចាស់ដើម

ក្រុមតន្ត្រីប៉ុបអាល្លឺម៉ង់ Modern Talking មានសមាជិក 2 នាក់ រួមមាន អ្នកដឹកនាំសម្ដែង និងជាអ្នកនិពន្ធ ផលិតករ Dieter Bohlen និងតារាចម្រៀង Thomas Anders៕

February 25, 2023

អ៊ុយក្រែនប្រកាសថា កំពុងត្រៀមខ្លួន «រំដោះ» ឧបទ្វីបគ្រីមៀ (Crimea)

ប្រធានាធិបតី ហ្សេឡែនស្គី បានឱ្យដឹងថា អ៊ុយក្រែនកំពុងត្រៀមអាវុធ បង្កើតកងពលតូចមួយចំនួនដើម្បីរំដោះគ្រីមៀ ជាឧបទ្វីបដែលត្រូវបានរុស្ស៊ីរឹបអូសកាលពីឆ្នាំ 2014។

«យើងកំពុងត្រៀមសម្រាប់ជំហាននានាក្នុងផ្នែកកងទ័ព ក៏ដូចជាបានត្រៀមស្មារតីរួចហើយ។ អំពីបច្ចេកទេស យើងកំពុងត្រៀមអាវុធ ស្ដារកម្លាំងទ័ព បង្កើតកងពលតូចវាយប្រហារសម្រាប់គោលដៅផ្សេងៗគ្នា» ប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡែនស្គី ថ្លែងនៅក្នុងកិច្ចប្រជុំកាលពីថ្ងៃទី 24 កុម្ភៈ 2023 នៅពេលត្រូវបានសួរអំពី «ការរំដោះគ្រីមៀក្នុងឆ្នាំនេះ»។

លោកក៏បានឱ្យដឹងថា អ៊ុយក្រែនបានបញ្ជូនទាហានទៅចូលរួមវគ្គបណ្ដុះបណ្ដាលនៅបរទេស។ លោកបន្តថា «ក្រោយមកនឹងមានជំហានសមស្របដើម្បីដណ្ដើមទឹកដីមកវិញ»។

ប្រធានាធិបតីអ៊ុយក្រែនមិនបាននិយាយច្បាស់អំពីជំហាននីមួយៗ ក៏ដូចជាពេលវេលានៃការបើកយុទ្ធនាការរំដោះគ្រីមៀនោះទេ។ លោកថា «បើសិនគ្រាន់តែសម្ដែងពីអារម្មណ៍ ការចង់បាន និងសម្ដី គឺមិនគ្រប់គ្រាន់ យើងត្រូវតែធ្វើសកម្មភាព។ គ្រប់យ៉ាងស្ថិតនៅលើយើង»។

លោក ហ្សេឡែនស្គី ថ្លែងថា បើសិនមិនមានអាវុធគ្រប់គ្រាន់ អ៊ុយក្រែនអាចនឹងចាញ់ ប៉ុន្តែសាមគ្គីភាពនៅតែជា «កត្តាសំខាន់បំផុតដើម្បីដណ្ដើមបានជ័យជម្នះ»។

រុស្ស៊ីបានដាក់បញ្ចូលឧបទ្វីបគ្រីមៀរបស់អ៊ុយក្រែន ទៅក្នុងទឹកដីខ្លួនកាលពីឆ្នាំ 2014។ រុស្ស៊ីបាននិយាយថា លទ្ធផលនៃការធ្វើប្រជាមតិបង្ហាញថា ពលរដ្ឋស្ទើរតែទាំងអស់នៅគ្រីមៀ មានបំណងក្លាយជាផ្នែកមួយរបស់រុស្ស៊ី ប៉ុន្តែ អ៊ុយក្រែន និងបណ្ដាប្រទេសបស្ចិមលោកចាត់ទុកថា នេះគឺជាទង្វើខុសច្បាប់៕

February 25, 2023

អង្គការអវកាសអឺរ៉ុបមានគម្រោង «ដាំដំណាំលើទឹកនៅឋានព្រះចន្ទ»

អង្គការអវកាសអឺរ៉ុប (ESA) កំពុងសហការជាមួយក្រុមហ៊ុន Solsys Mining របស់ប្រទេសន័រវែសដើម្បីអភិវឌ្ឍវិធីសាស្ត្រកែច្នៃដីរបស់ព្រះចន្ទឱ្យទៅជាជីសម្រាប់ដំណាំលើទឹកនៅលើភពរណបនេះ។

ការដាំរុក្ខជាតិលើឋានព្រះចន្ទពិតជាចាំបាច់សម្រាប់មហិច្ឆតាបង្ហាញវត្តមានយូរអង្វែងរបស់មនុស្សជាតិនៅលើដីរបស់លោកខែ។ ប៉ុន្តែនេះនឹងជាការងារដ៏លំបាក ព្រោះថាដីនៅលើឋានព្រះចន្ទខ្វះសារធាតុអាសូត ដែលដើរតួនាទីយ៉ាងសំខាន់សម្រាប់ការរីកលូតលាស់របស់រុក្ខជាតិ។

ទីភ្នាក់ងារអវកាសអឺរ៉ុប (ESA) កំពុងសហការជាមួយក្រុមហ៊ុនកសិកម្ម Solsys Mining វិទ្យាស្ថានបច្ចេកទេសន័រវែស និងមជ្ឈមណ្ឌលស្រាវជ្រាវអន្តរវិជ្ជាក្នុងវិស័យអវកាស ដើម្បីស្រាវជ្រាវលើការប្រើប្រាស់ដីបែបថ្មីលើឋានព្រះចន្ទសម្រាប់គម្រោង «ដាំដំណាំលើទឹក» ដោយមិនបាច់មានដី។

គម្រោងដែលនាំមុខដោយ ESA គឺផ្ដោតទៅលើការស្វែងរកវិធីសាស្ត្រថ្មីដើម្បីចម្រាញ់សារធាតុបំប៉នពីដីព្រះចន្ទ ដើម្បីធ្វើជាជីសម្រាប់ដំណាំលើទឹក។ ដំណើរការស្រាវជ្រាវគ្រោងនឹងអូសបន្លាយពេលដល់ចុងឆ្នាំ 2023 ដោយមានថវិកាប្រមាណ 100,000 អឺរ៉ូប (ប្រហែល 106,000 ដុល្លារអាម៉េរិក)។

ការដាំដំណាំលើទឹកនៅលើឋានព្រះចន្ទ ទាមទារឱ្យមានរោងចក្រកែច្នៃនៅលើភពរណបមួយនេះដើម្បីចម្រាញ់យកបណ្ដាសារធាតុបំប៉នពីដីព្រះចន្ទ មុនពេលបញ្ចូលវាទៅក្នុងផ្ទះកញ្ចក់សម្រាប់ផ្គត់ផ្គង់ដល់ដំណាំលើទឹក។

«ដើម្បីបង្កើតឱ្យមានវត្តមានយូរអង្វែងលើឋានព្រះចន្ទ មនុស្សត្រូវការប្រើប្រាស់ប្រភពធនធានដែលមានស្រាប់ និងទាញយកសារធាតុបំប៉ននានាដែលនៅក្នុងស្រទាប់ដីរបស់ព្រះចន្ទសម្រាប់ការដាំដុះ» វិស្វករ Malgorzata Holynska របស់អង្គការ ESA សង្កត់ធ្ងន់ដូច្នេះ។

យោងតាម Interesting Engineering ការស្រាវជ្រាវខាងលើនេះនឹងរួមចំណែកក្នុងការបើកផ្លូវសម្រាប់បេសកកម្មព្រះចន្ទនាពេលអនាគត ដែលដូចទៅនឹងកម្មវិធី Artemis របស់ទីភ្នាក់ងារអវកាសអាម៉េរិក (NASA) ជាដើម៕

February 25, 2023

សារព័ត៌មានអាម៉េរិកថា «ចិនមានបំណងផ្គត់ផ្គង់កាំភ្លើងធំ និង UAV ដល់រុស្ស៊ី»

មន្ត្រីសហរដ្ឋអាម៉េរិកបានឱ្យដឹងថា ចិនកំពុងពិចារណាលើការបញ្ជូនកាំភ្លើងធំ និងយន្តហោះគ្មានមនុស្សបើក (UAV) ទៅឱ្យរុស្ស៊ី បើទោះជាបានអំពាវនាវឱ្យមានដំណោះស្រាយសន្តិវិធីសម្រាប់អ៊ុយក្រែន នេះបើតាម Wall Street Journal (WSJ)។

សារព័ត៌មាន WSJ កាលពីថ្ងៃទី 24 កុម្ភៈ បានដកស្រង់សម្ដីរបស់មន្ត្រីអាម៉េរិកសុំមិនបញ្ចេញឈ្មោះ ឱ្យដឹងថា បើចិនសម្រេចចិត្តផ្គត់ផ្គង់អាវុធទៅឱ្យរុស្ស៊ី ក្នុងចំណោមអាវុធទាំងនោះនឹងមានទាំងកាំភ្លើងធំ និងយន្តហោះ UAV ដើម្បីជួយដល់ទីក្រុងមូស្គូ ទប់ស្កាត់ការវាយបករបស់ទីក្រុងកៀវ ដែលគ្រោងនឹងធ្វើឡើងនៅរដូវក្ដៅនេះ។

មន្ត្រីអាម៉េរិកខាងលើនិយាយថា ប្រទេសចិន បច្ចុប្បន្នមិនទាន់មានការបញ្ជូនអាវុធទៅឱ្យរុស្ស៊ីនៅឡើយ ប៉ុន្តែបើសិនទីក្រុងប៉េកាំងផ្ដល់អាវុធទៅឱ្យមូស្គូ នោះអាចរុញច្រានទំនាក់ទំនងរវាងចិន និងលោកខាងលិចកាន់តែតានតឹងថែមមួយកម្រិតទៀត និងក្នុងរយៈពេលច្រើនឆ្នាំ ក៏ដូចជាធ្វើឱ្យសង្គ្រាមនៅអ៊ុយក្រែនរងផលវិបាកធ្ងន់ធ្ងរកាន់តែខ្លាំង។

ទាក់ទងនឹងការអះអាងរបស់មន្ត្រីអាម៉េរិកដែលត្រូវបានសារព័ត៌មាន WSJ លើកឡើងខាងលើ ទីក្រុងប៉េកាំង និងទីក្រុងមូស្គូមិនទាន់បញ្ចេញប្រតិកម្មអ្វីនៅឡើយ។

February 25, 2023

វីដេអូស្ដីពីហេតុការណ៍បាក់អណ្ដូងរ៉ែនៅប្រទេសចិនដែលបណ្ដាលឱ្យមនុស្ស 47 បាត់ខ្លួន

ករណីបាក់អណ្ដូងរ៉ែនៅម៉ុងហ្គោលីខាងក្នុង (Inner Mongolia) របស់ប្រទេសចិន បានបណ្ដាលឱ្យមានមនុស្សស្លាប់យ៉ាងតិច 6 នាក់ ខណៈ 6 នាក់ទៀតរងរបួស និង 47 នាក់បានបាត់ខ្លួន។

អណ្ដូងរ៉ែនៅតំបន់ Alxa ជាទឹកដីស្វយ័តម៉ុងហ្គោលីខាងក្នុង បានបាក់ស្រុតកាលពីល្ងាចថ្ងៃទី 22 កុម្ភៈ 2023។ វីដេអូដែលត្រូវបានផ្សាយដោយសារព័ត៌មានក្នុងស្រុកបង្ហាញថា ជញ្ជាំងដី និងថ្មដ៏ធំមួយបាក់ស្រុតចុះតាមជម្រាល ជាទីដែលយានយន្តទាញយករ៉ែកំពុងផ្លាស់ទី។

ក្រុមមន្ត្រីក្នុងតំបន់ កាលពីថ្ងៃទី 23 កុម្ភៈបានប្រកាសថា បានរកឃើញសាកសពជនរងគ្រោះចំនួន 6 នាក់ និងអ្នករងរបួសចំនួន 6 នាក់បន្ទាប់ពីមានហេតុការណ៍បាក់អណ្ដូងរ៉ែ។ បុគ្គលិកសង្គ្រោះប្រហែល 1,600 នាក់កំពុងស្វែងរកអ្នកដែលកំពុងបាត់ខ្លួន។

មូលហេតុនៃការបាក់អណ្ដូងរ៉ែនេះត្រូវបានគេជឿថា អាចបណ្ដាលមកពីកង្វះនៃការបណ្ដុះបណ្ដាលស្ដីពីសុវត្ថិភាពក្នុងការដ្ឋាន។ ក្រុមហ៊ុនគ្រប់គ្រងអណ្ដូងរ៉ែខាងលើ កាលពីឆ្នាំកន្លងក៏ត្រូវបានអាជ្ញាធរចិនពិន័យជាច្រើនករណី ក្នុងនោះមានទាំងបញ្ហាគ្រប់គ្រងផ្លូវគ្រោះថ្នាក់ ឃ្លាំងផ្ទុកវត្ថុធាតុងាយបង្កគ្រោះថ្នាក់ ការមិនធានា និងខ្វះការបណ្ដុះបណ្ដាលអំពីសុវត្ថិភាពការងារជាដើម។

តំបន់ស្វយ័តម៉ុងហ្គោលីខាងក្នុងគឺជាដែនដីរុករករ៉ែសំខាន់ ក្នុងនោះមានធ្យូងថ្ម ដីកម្រ និងរ៉ែផ្សេងៗជាច្រើនទៀតរបស់ប្រទេសចិន។ ប្រទេសនេះកំពុងតែប្រឹងប្រែងដើម្បីកាត់បន្ថយចំនួនករណីគ្រោះថ្នាក់ស្លាប់មនុស្សនៅតាមការដ្ឋានអណ្ដូងរ៉ែ ដោយការយកចិត្តទុកដាក់ទៅលើការធានាសុវត្ថិភាពការងារ ក៏ដូចជាបញ្ឈប់ ឬផ្អាកសកម្មភាពរបស់បណ្ដាអណ្ដូងរ៉ែដែលមានទំហំតូច និងខ្វះឧបករណ៍ចាំបាច់៕

February 25, 2023

គម្រោងរោងចក្រកាត់ដេររបស់ Hong Wang Li (Cambodia) នឹងបង្កើតការងារបាន 400 កន្លែង

គម្រោងបង្កើតរោងចក្រកាត់ដេរសម្លៀកបំពាក់ និងសម្ភារៈវេចខ្ចប់គ្រប់ប្រភេទរបស់ក្រុមហ៊ុន Hong Wang Li (Cambodia) Co., Ltd. ទើបតែទទួលបានការចុះបញ្ជីជាផ្លូវការនៅកម្ពុជា។

នាថ្ងៃទី 24 កុម្ភៈ 2023 នេះ ក្រុមប្រឹក្សាអភិវឌ្ឍន៍កម្ពុជា បានឱ្យដឹងថា គណៈកម្មាធិការតំបន់សេដ្ឋកិច្ចពិសេសកម្ពុជា បានសម្រេចចេញវិញ្ញាបនបត្រចុះបញ្ជីគម្រោងវិនិយោគ ជូនដល់ក្រុមហ៊ុន Hong Wang Li (Cambodia) ដែលគ្រោងនឹងបង្កើតរោងចក្រកាត់ដេរសម្លៀកបំពាក់ និងសម្ភារៈវេចខ្ចប់គ្រប់ប្រភេទ ដោយមានទុនសរុប 5 លានដុល្លារអាម៉េរិក។

គម្រោងដែលស្ថិតនៅក្នុងតំបន់សេដ្ឋកិច្ចពិសេស សានដុង សាន់សែល ស្វាយរៀង ខេត្តស្វាយរៀងនេះ នឹងបង្កើតការងារបានប្រមាណ 400 កន្លែង។

February 24, 2023

Manchester United កំពុងត្រៀមខ្លួនសម្រាប់ការទិញយក Mbappe ពី PGS

បីសាចក្រហមមិនរារែកក្នុងការចំណាយប្រាក់ច្រើនដើម្បីបាន Kylian Mbappe គឺជាដំណឹងដែលគួរឱ្យចាប់អារម្មណ៍នៅក្នុងវិស័យបាល់ទាត់នាថ្ងៃនេះ។

អនាគតរបស់កំពូលតារាបាល់ទាត់បារាំង Mbappe នៅ PSG នៅតែមិនទាន់មានស្ថិរភាព ពេលដែលមានព័ត៌មានជាច្រើនលេចចេញជាបន្តបន្ទាប់ទាក់ទងនឹងការស្វែងរកវិធីចាក់ចេញនៅរដូវក្ដៅឆ្នាំ 2024។

យោងតាមទំព័រ Daily Star បើទោះជា Real Madrid កំពុងនាំមុខគេក្នុងការទាក់ទាញ Mbappe ក្លឹប Man United ក៏មិនចង់ស្ថិតនៅ «ក្រៅឆាក»។ ក្រុមបាល់ទាប់ម្ចាស់កីឡដ្ឋាន Old Trafford ត្រូវបានគេជឿថា បានត្រៀមរួចរាល់សម្រាប់ការប្រជែងជាមួយនឹងគ្រប់គូប្រកួតដើម្បីមានឱកាសក្លាយជាម្ចាស់របស់ Kylian Mbappe។

Kylian Mbappé Lottin គឺជាកីឡាករកំពូលរបស់បារាំង និងល្បីឈ្មោះខ្លាំងដោយសារសមត្ថភាពគ្រប់គ្រងបាល់ ល្បឿនរត់ និងសមត្ថភាពស៊ុតផ្ដាច់ដ៏គួរឱ្យញញើត៕

February 24, 2023

Author: សឿន សំណាង