សឿន សំណាង - La Reine Media

តាក់ស៊ីហោះអគ្គិសនីអាល្លឺម៉ង់-ចិន បំបែកកំណត់ត្រាហោះបានឆ្ងាយជាងគេលើពិភពលោក

តាក់ស៊ីហោះគំរូ Prosperity I ហោះបានជាង 250 គីឡូម៉ែត្របន្ទាប់ពីបញ្ចូលអគ្គិសនីម្ដង ក្លាយជាយន្តហោះ-ឧទម្ភាគចក្រអគ្គិសនីដែលហោះបានឆ្ងាយបំផុតលើពិភពលោក។

Autoflight ដែលជាក្រុមហ៊ុនមានទីស្នាក់ការកណ្ដាលនៅប្រទេសចិន និងអាល្លឺម៉ង់ បានបង្ហាញតាក់ស៊ីហោះគំរូពេញលេញ Prosperity I ជំនាន់ទីបួនដោយព្រឹត្តិការណ៍ធំមួយ នោះគឺការហោះហើររយៈចម្ងាយឆ្ងាយបំផុតរបស់យន្តហោះកូនកាត់ឧទ្ធម្ភាគចក្រអគ្គិសនី (eVTOL) នេះ កាលពីចុងខែកុម្ភៈកន្លងទៅ។ យោងតាម New Atlas ចុះផ្សាយកាលពីថ្ងៃទី 02 មីនា កំណត់ត្រាថ្មីនេះត្រូវបានទទួលស្គាល់ដោយប្រព័ន្ធអេឡិចត្រូនិចអាកាសចរណ៍របស់ភាគីទីបី និងឧបករណ៍របស់ Prosperity I។

ជាក់ស្ដែង Prosperity I ហោះបាន 250.3 គីឡូម៉ែត្របន្ទាប់ពីបញ្ចូលអគ្គិសនីមួយលើក។ កំណត់ត្រានេះបានយកឈ្នះលើយន្តហោះរបស់ក្រុមហ៊ុនអាម៉េរិក Joby ដែលហោះបាន 249 គីឡូម៉ែត្រក្នុងរយៈពេល 77 នាទីកាលពីឆ្នាំ 2021។

យន្តហោះ-ឧទ្ធម្ភាគអគ្គិសនី Prosperity I ត្រូវបានរចនាដោយក្រុមហ៊ុន Frank Stephenson។ តាក់ស៊ីហោះនេះមានស្លាបវែងជាងកំណែចាស់ និងមានទម្រចំនួន 4 រួមនឹងស្លាបកង្ហារចំនួន 10 គ្រឿងនៅជុំវិញ និងស្លាបកង្ហាររុញច្រាននៅពីក្រោយ។ កាប៊ីនរបស់តាក់ស៊ីហោះនេះអាចដាក់មនុស្សបាន 5 នាក់៕

March 3, 2023

Messi ជូន iPhone ស្រោបមាស 35 គ្រឿងដល់ក្រុមជម្រើសជាតិអាហ្សង់ទីន

Lionel Messi បានចំណាយប្រាក់ 210,000 ដុល្លារអាម៉េរិក ដើម្បីទិញទូរស័ព្ទ iPhone ស្រោបមាសចំនួន 35 គ្រឿង ជូនដល់សមាជិកក្រុមបាល់ទាត់ជម្រើសជាតិអាហ្សង់ទីន ក្រោយពីដណ្ដើមបានជើងឯកនៅ World Cup 2022។

ទូរស័ព្ទ iPhone នីមួយៗត្រូវបាន Messi ស្នើឱ្យគេរចនាដោយឡែក ក្នុងនោះមានស្រោបមាសសុទ្ធ ខ្នងទូរស័ព្ទមានឡូហ្គោក្រុមបាល់ទាត់ជម្រើសជាតិអាហ្សង់ទីន និងឈ្មោះរបស់សមាជិកម្នាក់ៗរបស់ក្រុម។

«Messi ចង់ធ្វើអ្វីមួយដែលពិសេស និងរីករាយ ដើម្បីជាការរម្លឹកដល់ទិដ្ឋភាពដ៏គួរឱ្យមានមោទកភាពបំផុតក្នុងជីវិត» សារព័ត៌មាន Sun (អង់គ្លេស) ឱ្យដឹងដូច្នេះ។

Ben Lyons នាយកប្រតិបត្តិរបស់ក្រុមហ៊ុន iDesign Gold ដែលជាអ្នកទទួលរ៉ាប់រងការរចនា iPhone ស្រោបមាសខាងលើ បាននិយាយថា Messi គឺជាអតិថិជនយូរឆ្នាំរបស់ក្រុមហ៊ុននេះ និងបានទាក់ទងដើម្បីឱ្យធ្វើ iPhone ស្រោបមាសចំនួន 35 គ្រឿង បន្ទាប់ពីដណ្ដើមបានតំណែងជើងឯក World Cup 2022 បានមួយរយៈពេល។

អាហ្សង់ទីនដណ្ដើមបានពានរង្វាន់ជើងឯកបាល់ទាត់ពិភពលោកកាលពីខែធ្នូ 2022 ក្រោយពីបានឈ្នះបារាំងនៅក្នុងការប្រកួតស៊ុតប៉េណាំងទីក្នុងវគ្គផ្ដាច់ព្រ័ត្រ។ Messi ទទួលបានគ្រាប់បាល់មាស World Cup ពី FIFA ដែលជាពានរង្វាន់សម្រាប់កីឡាករឆ្នើមបំផុត។ Messi ក៏ជាកីឡាករដំបូងគេដែលទទួលបានពានរង្វាន់គ្រាប់បាល់មាសចំនួនពីរនៅ World Cup ក្នុងនោះ មួយគ្រាប់នៅឆ្នាំ 2014 និងមួយគ្រាប់នៅឆ្នាំ 2022៕

March 3, 2023

គន្លងតារាវិថីផែនដីកំពុងប្រែជា «ខ្វះសុវត្ថិភាព» ដោយសារសំរាម

សុវត្ថិភាពនៃគន្លងគោចររបស់ផែនដីកំពុងប្រែទៅជាអន់ថយដោយសារតែមានផ្កាយរណបច្រើនពេកកំពុងធ្វើសកម្មភាព ប្រៀបបានទៅនឹងផ្លូវល្បឿននៅពេលមានចរាចរណ៍មមាញឹក ហើយរថយន្តទាំងអស់សុទ្ធតែធ្វើដំណើរក្នុងល្បឿនលឿន។

កាលពី 10 ឆ្នាំមុន នៅលើគន្លងគោចរជុំវិញផែនដី មានផ្កាយរណបប្រហែល 1,000 គ្រឿងប៉ុណ្ណោះ ប៉ុន្តែ 10 ឆ្នាំបន្ទាប់ទៀត តួលេខនេះអាចឡើងដល់រាប់សែនគ្រឿង។ កាលពីច្រើនឆ្នាំកន្លង ក្រុមអ្នកជំនាញបានព្រមានថា គន្លងតារាវិថិផែនដីកំពុងប្រែទៅជាមមាញឹក។ ដូច្នេះតើមនុស្សលោកអាចបាញ់បង្ហោះផ្កាយរណបប៉ុន្មានគ្រឿង មុនពេលគន្លងគោចរជុំវិញផែនដីបាត់បង់សុវត្ថិភាព?

«ស្ថានភាពនឹងដូចទៅនឹងផ្លូវល្បឿនលឿនក្នុងម៉ោងមមញឹក ក្រោមព្យុះព្រឹល ហើយគ្រប់គ្នាសុទ្ធតែបើកបររថយន្តក្នុងល្បៀនលឿនជ្រុល។ ប៉ុន្តែចំណុចខុសគ្នាគឺថា នឹងមានផ្លូវល្បឿនលឿនច្រើនដែលឆ្លងកាត់គ្នាដោយមិនមានភ្លើងចរាចរណ៍» Jonathan McDowell អ្នកវិទ្យាសាស្ត្រប្រចាំមជ្ឈមណ្ឌលរូបវិទ្យាតារាសាស្ត្រ Harvard-Smithsonian និយាយពីស្ថានភាពនៃគន្លងគោចរផែនដី បើសិនគម្រោងប្រព័ន្ធផ្កាយរណបរបស់ SpaceX, OneWeb និង Amazon ក្លាយជាការពិត។

យោងតាម SpaceX ផ្កាយរណប Starlink នីមួយៗក្នុងចំណោម 4,000 គ្រឿងដែល SpaceX បានបាញ់បង្ហោះ រហូតមកដល់ពេលនេះ បានធ្វើការបញ្ចៀសការប៉ះគ្នាដោយស្វ័យប្រវត្ត ជាមធ្យម 12 លើករួចទៅហើយ។

ក៏ប៉ុន្តែ ចំនួន Starlink បច្ចុប្បន្ន មិនទាន់ស្មើនឹង 10% នៅឡើយ បើធៀបនឹងចំនួនដែល SpaceX គ្រោងនឹងដាក់ពង្រាយលើគន្លងគោចរផែនដី។ ក្នុង 10 ឆ្នាំទៅមុខ ចំនួនផ្កាយរណប Starlink នៅលើគន្លងតារាវិថីរបស់ផែនដីអាចកើនដល់ 42,000 គ្រឿង។ ក្រៅពីនេះ គន្លងគោចរផែនដីក៏នឹងមានផ្កាយរណប 4,000 គ្រឿងរបស់ OneWeb, 3.200 គ្រឿងរបស់ Amazon និង 13,000 គ្រឿងក្នុងប្រព័ន្ធ Guowang របស់ចិនបន្ថែមទៀត។ នេះមិនទាន់និយាយដល់ផ្កាយរណបនានារបស់បណ្ដាប្រទេសលើពិភពលោក។

ទីភ្នាក់ងារអវកាសអឺរ៉ុប (ESA) បានឱ្យដឹងថា តំបន់អវកាសក្បែរផែនដីមានសំរាមអវកាសប្រហែល 36,000 ដុំដែលមានទំហំធំជាង 10 សង់ទីម៉ែត្រ, ប្រហែលមួយលានដុំមានទំហំចាប់ពី 1 ដល់ 10 សង់ទីម៉ែត្រ និង 130 លានដុំតូចជាងមួយសង់ទីម៉ែត្រ។ ជាងនេះទៀត សំរាមអវកាសតូចៗនឹងបន្តកើនឡើងនៅពេលសំរាមធំហោះបុកគ្នាក្នុងល្បឿនលឿន។

កម្រិតនៃគ្រោះថ្នាក់ដោយសារសំរាមអវកាសគឺអាស្រ័យលើកម្ពស់របស់ពួកវា។ លោក McDowell និយាយថា «ពី 5 ទៅ 10 ឆ្នាំទៀត មនុស្សយើងនឹងមានផ្កាយរណបប្រហែលពី 20,000 ទៅ 100,000 គ្រឿង។ ខ្ញុំសង្ស័យថា គ្រប់យ៉ាងនឹងអាចត្រូវបានដំណើរការដោយមិនមានសុវត្ថិភាព»៕

March 2, 2023

រថភ្លើងប្រភេទអេឡិចត្រូម៉ាញ៉េទិច ល្បឿន 600 គីឡូម៉ែត្រ/ម៉ោង «ហោះលើផ្លូវដែក»

តាមរយៈសេនសឺរ (អង្គញាណ) រថភ្លើងប្រភេទ Maglev គ្រប់គ្រងដែនអេឡិចត្រូម៉ាញ៉េទិចនៅតាមបណ្ដោយរថភ្លើងក្នុងពេលវេលាជាក់ស្ដែង ជួយរក្សាគម្លាតពី 8 ទៅ 10 មិល្លីម៉ែត្ររវាងរថភ្លើង និងផ្លូវដែក។

កាលពី 100 ឆ្នាំមុន គំនិតស្ដីពីរថភ្លើងធ្វើដំណើរដោយអណ្ដែតលើផ្លូវដែកគឺជារឿងស្រមើស្រមៃ។ ក៏ប៉ុន្តែ សម័យទំនើបបច្ចុប្បន្ន បានឱ្យយើងដឹងថា ពុំមានអ្វីដែលមិនអាចទៅរួច។

ភ្នែករបស់អ្នកនឹងហាក់មិនអាចមើលដឹងថារថភ្លើងមួយខ្សែកំពុងធ្វើដំណើរ នៅពេលវាមានល្បឿន 600 គីឡូម៉ែត្រ/ម៉ោង។ ដើម្បីរត់បាន 1,000 គីឡូម៉ែត្រ រថយន្ត F1 ត្រូវការពេល 3.3 ម៉ោង ខណៈដែលរថភ្លើង Fuxing ត្រូវការ 2.8 ម៉ោង ចំណែករថភ្លើង EMS ប្រភេទ Maglev ត្រូវការតែ 1.7 ម៉ោងប៉ុណ្ណោះ ដោយវាយឺតជាង 20 នាទីធៀបនឹងយន្តហោះដឹកអ្នកដំណើរ។ នៅក្នុងល្បឿនដូចរថភ្លើង EMS ជាមូលដ្ឋាន អ្នកកំពុងតែហោះហើរ។

ក្រុមវិស្វករបញ្ចូលថាមពលដល់មេដែកអគ្គិសនីនៅខាងក្រោមរថភ្លើងប្រភេទ Maglev ដើម្បីលើករថភ្លើងផុតពីផ្លូវដែក ដោយយោងទៅតាមរូបមន្តម៉ាញេទិច។ នៅពេលរត់ រថភ្លើងប្រភេទ Maglev ត្រូវការឆ្លងកាត់កម្លាំងឥទ្ធិពលពីទម្ងន់របស់វា ដើម្បីអណ្ដែត ប៉ុន្តែនៅតែអាចគ្រប់គ្រងដែនម៉ាញេទិចបានយ៉ាងសុក្រឹត មិនឱ្យរថភ្លើងចាកចេញផុតពីផ្លូវដែក។ ក្នុងពេលធ្វើដំណើរ រថភ្លើងនេះនឹងបណ្ដែតខ្លួន ធ្វើឱ្យភាពកកិតសម្រេចបានដល់កម្រិតសូន្យ។

តាមរយៈសេនសឺរ (អង្គញាណ) រថភ្លើងប្រភេទ Maglev គ្រប់គ្រងបណ្ដាញអេឡិចត្រូម៉ាញ៉េទិចនៅតាមបណ្ដោយរថភ្លើងក្នុងពេលវេលាជាក់ស្ដែង ជួយរក្សាគម្លាតពី 8 ទៅ 10 មិល្លីម៉ែត្រ រវាងរថភ្លើង និងផ្លូវដែក។ នេះពិតជាបច្ចេកវិទ្យាដែលកើតចេញពីភាពយន្តប្រឌិតបែបវិទ្យាសាស្ត្រ។

នៅប្រទេសចិន រថភ្លើងប្រភេទ Maglev នឹងមានភាពលេចធ្លោ ដោយសារផ្ទៃដីធំទូលាយ អាចប្រើប្រាស់រថភ្លើងម៉ាញេទិចបានល្អ ព្រោះវាលឿនជាងការធ្វើដំណើរតាមរថយន្តលើផ្លូវល្បឿនលឿន និងងាយស្រួលជាងយន្តហោះ៕

March 2, 2023

ព្រះចន្ទជិតមានតំបន់សម្គាល់ពេលវេលា (Time Zone) ផ្ទាល់ខ្លួន

ទីភ្នាក់ងារអវកាសអឺរ៉ុប (ESA) បានលើកសំណើបង្កើតតំបន់សម្គាល់ពេលវេលាស្ដង់ដា ដើម្បីបង្កើនភាពស៊ីចង្វាក់គ្នា និងងាយស្រួលសម្រាប់បេសកកម្មអវកាសនាពេលអនាគត។

បេសកកម្មឡើងទៅកាន់ឋានព្រះចន្ទនៅជុំវិញពិភពលោកក្នុងទសវត្សរ៍ខាងមុខ មានរាប់សិបគម្រោង ដូច្នេះ ទីភ្នាក់ងារអវកាសអឺរ៉ុប បានលើកសំណើបង្កើតតំបន់សម្គាល់ពេលវេលាថ្មីនៅលើឋានព្រះចន្ទ ដើម្បីជួយឱ្យការផ្លាស់ប្ដូរព័ត៌មានមានភាពងាយស្រួលជាងបច្ចុប្បន្ន។ នេះបើតាម Smithsonian ចេញផ្សាយកាលពីថ្ងៃទី 28 កុម្ភៈ 2023។

បច្ចុប្បន្ន បេសកកម្មព្រះចន្ទប្រើប្រាស់តំបន់សម្គាល់ម៉ោងទៅតាមប្រទេសម្ចាស់បេសកកម្ម។ ក៏ប៉ុន្តែ វិធីនេះមិនមានភាពសុក្រឹត និងបណ្ដាលឱ្យយានអវកាសរបស់បណ្ដាប្រទេសខ្វះភាពស៊ីចង្វាក់គ្នា។ ESA បានប្រកាសអំពីសំណើនេះកាលពីថ្ងៃទី 27 កុម្ភៈ 2023 ប៉ុន្តែគំនិតនេះត្រូវបានលើកឡើងដំបូងក្នុងកិច្ចប្រជុំមួយនៅហូឡង់កាលពីចុងឆ្នាំ 2022។

ការបង្កើតតំបន់សម្គាល់ពេលវេលាដោយឡែកនៅលើឋានព្រះចន្ទ មិនត្រឹមតែជួយឱ្យមានភាពងាយស្រួលក្នុងការផ្លាស់ប្ដូរព័ត៌មាននោះទេ តែក៏នឹងជួយឱ្យអវកាសចរងាយស្រួលកំណត់ទិសផងដែរ។

ទោះជាយ៉ាងនេះក្ដី ក្រុមអ្នកជំនាញមិនទាន់កំណត់បានថា ម៉ោងនៅលើឋានព្រះចន្ទគួរគណនាបែបណានៅឡើយ។ លើឋានព្រះចន្ទ នាឡិកាដើរលឿនជាងលើផែនដី ដោយសារតែកម្លាំងទំនាញដែលអាចកាច់កោងពេលវេលា។ ជាក់ស្ដែង នាឡិកានៅលើឋានព្រះចន្ទនឹងកើនប្រហែល 56 មីក្រូវិនាទី ក្រោយរយៈពេល 24 ម៉ោង។ យោងតាម ESA កម្រិតនេះក៏ផ្លាស់ប្ដូរទៅតាមទីតាំងរបស់នាឡិកា៕

March 2, 2023

«អាម៉ាប់» ត្រូវបានលើកតម្កើងក្នុងព្រឹត្តិការណ៍ប្រគល់ពានរង្វាន់ភាពយន្តអាស៊ី 2023

Sammo Hung (Sammo Hung Kam-bo) ដែលទស្សនិកជននៅកម្ពុជាហៅថា «អាម៉ាប់» នឹងទទួលពានរង្វាន់សមិទ្ធផលពេញមួយជីវិតនៅឯព្រឹត្តិការណ៍ Asian Film Awards 2023 ដែលគ្រោងនឹងធ្វើឡើងនៅថ្ងៃទី 12 មីនា 2023 នៅហុងកុង។

កាលពីថ្ងៃទី 01 មីនា គណៈកម្មការគ្រប់គ្រងព្រឹត្តិការណ៍ផ្ដល់ពានរង្វាន់ភាពយន្តអាស៊ីឆ្នាំ 2023 (Asian Film Awards 2023) បានប្រកាសថា កំពូលតារាសម្ដែងផ្នែកក្បាច់គុន Sammo Hung ទទួលបានពានរង្វាន់នេះក៏ព្រោះតែការរួមចំណែកនៅក្នុងវិស័យភាពយន្ត។ តាមរយៈលិខិតផ្ញើទៅកាន់អ្នកសារព័ត៌មាន លោក Sammo Hung សរសេរថា «ខ្ញុំពិតជារីករាយ និងភ្ញាក់ផ្អើលនៅពេលឈ្នះពានរង្វាន់នានានៅក្នុងវ័យនេះ។ ពានរង្វាន់នេះថែមទាំងមានអត្ថន័យពិសេស បញ្ជាក់ពីអាជីពសម្ដែងទាំងមូលរបស់ខ្ញុំ»។

អាម៉ាប់កើតឆ្នាំ 1952 និងបានចូលរៀននៅសាលាល្ខោនចិន Yu Jim Yuen ពេលមានអាយុ 10 ឆ្នាំ។ ក្នុងដំណាក់កាលនោះ អាម៉ាប់ ក៏មានឱកាសសម្ដែងក្នុងខ្សែភាពយន្តមួយចំនួន។ ចាប់ពីអាយុ 18 ឆ្នាំ អាម៉ាប់ ចាប់ផ្ដើមមានអាជីពជាអ្នកសម្ដែងជំនួសនៅក្នុងឈុតឆាកគ្រោះថ្នាក់ និងក្បាច់គុន។

ក្នុងអំឡុងប្រហែល 60 ឆ្នាំនៅក្នុងវិស័យភាពយន្ត លោក Sammo Hung បានកាន់តួនាទីជាច្រើន ចាប់ពីអ្នកសម្ដែង អ្នកដឹកនាំសម្ដែងក្នុងឈុតឆាកសកម្ម អ្នកដឹកនាំរឿង និងផលិតករភាពយន្ត។ អាម៉ាប់ ទទួលបានការគាំទ្រច្រើន និងមានភាពល្បីល្បាញបន្ទាប់ពីមានវត្តមាននៅក្នុងខ្សែភាពយន្តមួយចំនួន មានជាអាទិ៍ រឿង Iron Fisted Monk, Winners and Sinners, Eastern Condors (បេសកកម្មឥន្ទ្រីបូព៌ា) ឬ Kill Zone ។ល។

March 2, 2023

គ្រោះថ្នាក់រថភ្លើងបុកគ្នានៅប្រទេសក្រិកអាចបណ្ដាលមកពីកំហុសរបស់មនុស្ស

នាយករដ្ឋមន្ត្រីក្រិក Mitsotakis ថ្លែងថា «កំហុសរបស់មនុស្ស» អាចជាមូលហេតុដែលនាំឱ្យមានឧបទ្ទវហេតុរថភ្លើងពីរគ្រឿងបុកគ្នាបណ្ដាលឱ្យមនុស្ស 38 នាក់បាត់បង់ជីវិត។

«ពិតជាគួរឱ្យសោកស្ដាយ គ្រប់យ៉ាងបង្ហាញថា សោកនាដកម្មភាគច្រើនគឺដោយសារកំហុសឆ្គងដ៏គ្រោះថ្នាក់របស់មនុស្ស» នាយករដ្ឋមន្ត្រីក្រិក Kyriakos Mitsotakis ថ្លែងលើកញ្ចក់ទូរទស្សន៍កាលពីថ្ងៃទី 01 មីនា។ លោកបន្ថែមថា «នេះគឺជាករណីគ្រោះថ្នាក់រថភ្លើងដ៏សាហាវមិនធ្លាប់មានមុននេះនៅប្រទេសក្រិក ហើយវានឹងត្រូវបានស៊ើបអង្កេតយ៉ាងពេញលេញ»។

ទូរថភ្លើងចំនួនពីរត្រូវខូចខ្ទេចខ្ទីគ្មានសល់ និងទូមួយផ្សេងទៀតត្រូវភ្លើងឆាបឆេះ នៅពេលរថភ្លើងដឹកអ្នកដំណើរបុកពេញទំហឹងជាមួយនឹងរថភ្លើងដឹកទំនិញនៅក្បែរទីក្រុង Larissa ភាគខាងកើតប្រទេសក្រិកកាលពីថ្ងៃទី 28 កុម្ភៈ 2023។ អាជ្ញាធរក្រិកឱ្យដឹងថា មនុស្ស 38 នាក់បានស្លាប់ និង 57 នាក់កំពុងត្រូវបានព្យាបាលនៅមន្ទីរពេទ្យ ក្នុងនោះមាន 6 នាក់ត្រូវសង្គ្រោះបន្ទាន់។ យោងតាមក្រុមមន្ត្រីក្រិក ចំនួនអ្នកស្លាប់អាចនឹងកើនឡើងបន្តទៀត ដោយសារមនុស្សមួយចំនួននៅតែបាត់ខ្លួន។

ខ្សែរថភ្លើងដឹកអ្នកដំណើរជាង 350 នាក់ បានជួបគ្រោះថ្នាក់នៅពេលកំពុងធ្វើដំណើរពីរដ្ឋធានីអាថែន ទៅកាន់ទីក្រុង Thessaloniki នៅភាគខាងជើងប្រទេសក្រិក។

សហរដ្ឋអាម៉េរិក រុស្ស៊ី ចិន បារាំង អាល្លឺម៉ង់ អ៊ុយក្រែន ក៏ដូចជាបណ្ដាប្រទេសនានា និងបណ្ដាប្រទេសក្បែរខាង បានចូលរួមរំលែកទុក្ខជាមួយប្រជាជនក្រិក បន្ទាប់ពីសោកនាដកម្មបានកើតឡើង។ ក្រុមមន្ត្រីក្រិកប្រកាសកាន់ទុក្ខ 3 ថ្ងៃដើម្បីគោរព និងរម្លឹកដល់វិញ្ញាណក្ខន្ធជនរងគ្រោះ៕

March 2, 2023

កីឡាករបាល់ទាត់ដែលស៊ុតបញ្ចូលទីបានច្រើនគ្រាប់ជាងគេនៅមួយរដូវ World Cup បានទទួលមរណភាព

(បារាំង) – អតីតកំពូលថ្វីជើងដែលស៊ុតបញ្ចូលទីបាន 13 គ្រាប់នៅក្នុងការប្រកួតបាល់ទាត់ World Cup 1958 លោក Just Fontaine បានទទួលមរណភាពកាលពីថ្ងៃទី 01 មីនា 2023 ក្នុងវ័យ 89 ឆ្នាំ។

យោងតាមព័ត៌មានពីក្រុមគ្រួសារ អតីតកីឡាករ Fontaine បានទទួលមរណភាពកាលពីល្ងាចថ្ងៃទី 01 មីនា នៅទីក្រុង Toulouse ប្រទេសបារាំង។ ក្លឹបចាស់ចំនួនពីររបស់លោក គឺ Stade de Reims និង PSG សុទ្ធតែបានផ្ញើលិខិតចូលរួមរំលែកទុក្ខ។

លោក Fontaine បានចាប់កំណើតនៅម៉ារ៉ុក កាលពីឆ្នាំ 1933 នៅក្នុងគ្រួសារដែលមានឪពុកជាជនជាតិបារាំង និងម្ដាយជាជនជាតិអេស្ប៉ាញ។ នៅ World Cup 1958 ដែលធ្វើឡើងនៅប្រទេសស៊ុយអែត លោក Fontaine ស៊ុតបញ្ចូលទីបាន 13 គ្រាប់។ រហូតមកដល់បច្ចុប្បន្ន នេះនៅតែជាសមិទ្ធផលល្អបំផុតរបស់កីឡាករមួយរូបនៅក្នុងមួយរដូវកាលរបស់ World Cup។

លោក Fontaine ស៊ុតបញ្ចូលទីបាន 13 គ្រាប់នៅក្នុងការប្រកួតបាល់ទាត់ World Cup 1958

ក្នុង World Cup 1958 លោក Fontaine រកបាន 6 គ្រាប់នៅក្នុង 3 ប្រកួតដែលប៉ះនឹង ប៉ារ៉ាហ្កាយ, អតីតប្រទេសយូហ្គោស្លាវី និងស្កុតឡែន នៅវគ្គជម្រុះ។ លោករកបាន 2 គ្រាប់ក្នុងការប្រកួតនៅវគ្គ ¼ ដែលឈ្នះអៀរឡង់ខាងជើង 4-0 និង 1 គ្រាប់ទៀតក្នុងវគ្គពាក់កណ្ដាលផ្ដាច់ព្រ័ត្រដែលត្រូវចាញ់ប្រេស៊ីល 2-5។ ក្នុងការប្រកួតដណ្ដើមពានរង្វាន់មេដាយសំរឹទ្ធដែលបានឈ្នះអាល្លឺម៉ង់ខាងលិច 6-3 លោក Fontaine រកបាន 4 គ្រាប់ជូនក្រុមជម្រើសជាតិបារាំង។

កំណត់របស់លោក Fontaine ច្រើនជាង 2 គ្រាប់ បើធៀបនឹងសមិទ្ធផលរបស់កំពូលថ្វីជើងលំដាប់ទីពីរ Sandor Kocsis ដែលរកបាន 11 គ្រាប់នៅ World Cup 1954។ បណ្ដាកំពូលថ្វីជើងដែលជាប់ចំណាត់ថ្នាក់បន្ទាប់រួមមាន Gerd Muller រកបាន 10 គ្រាប់នៅ World Cup 1970, Eusebio 9 គ្រាប់នៅ World Cup 1966, Ademir 9 គ្រាប់នៅ World Cup 1950, Guillermo Stabile 8 គ្រាប់នៅ World Cup 1930, Ronaldo Nazario 8 គ្រាប់នៅ World Cup 2002 និង Kylian Mbappe 8 គ្រាប់នៅ World Cup 2022។

លោក Fontaine និងពានរង្វាន់ស្បែកជើងមាសនៅ World Cup 1958

លោក Fontaine ត្រូវបោះបង់អាជីពជាកីឡាករបាល់ទាត់នៅក្នុងវ័យ 28 ឆ្នាំ ដោយសារតែរបួស។ លោករកបានគ្រាប់បាល់សរុប 30 គ្រាប់នៅក្នុង 21 ប្រកួតដែលលេងឱ្យក្រុមជម្រើសជាតិបារាំង៕

March 2, 2023

សភាជាន់ទាបអាម៉េរិកបានអនុម័តសេចក្ដីព្រាងច្បាប់ «ហាមឃាត់ TikTok»

គណៈកម្មការកិច្ចការបរទេសរបស់សភាជាន់ទាបអាម៉េរិក បានអនុម័តសេចក្ដីព្រាងច្បាប់ដែលអនុញ្ញាតឱ្យរដ្ឋាភិបាលរបស់លោក ចូ បៃដិន ហាមឃាត់ TikTok និងកម្មវិធីបច្ចេកវិទ្យានានាដែលគំរាមកំហែងដល់សន្តិសុខជាតិ។

កាលពីថ្ងៃទី 01 មីនា 2023 គណៈកម្មការកិច្ចការបរទេសរបស់សភាជាន់ទាបអាម៉េរិកបានបោះឆ្នោតអនុម័ត ដោយមានសន្លឹកឆ្នោតគាំទ្រចំនួន 24 សំឡេង និងប្រឆាំង 16 សំឡេង លើសេចក្ដីព្រាងច្បាប់ហាមឃាត់បណ្ដាញសង្គម TikTok របស់ក្រុមហ៊ុនចិន ByteDance ដែលបច្ចុប្បន្នមានអ្នកប្រើប្រាស់ជាង 100 លាននាក់នៅសហរដ្ឋអាម៉េរិក។

ដោយមានច្បាប់ថ្មីនេះ ប្រធានាធិបតីអាម៉េរិក លោក បៃដិន អាចហាមឃាត់ការរកស៊ីជាមួយនឹង TikTok ដែលនេះមានន័យថា បុគ្គលនានានៅសហរដ្ឋអាម៉េរិក នឹងមិនអាចចូលលេង ឬទាញយកកម្មវិធីនេះនៅលើទូរស័ព្ទ។ សេចក្ដីព្រាងច្បាប់នេះក៏ស្នើឱ្យម្ចាស់សេតវិមានហាមឃាត់រាល់ស្ថាប័នដែលអាចបញ្ជូនទិន្នន័យសំខាន់ៗរបស់បុគ្គលនានាទៅកាន់អង្គភាពដែលទទួលឥទ្ធិពលរបស់ប្រទេសចិនផងដែរ។

«TikTok គឺជាការគំរាមកំហែងដល់សន្តិសុខជាតិ…។ ដល់ពេលដែលត្រូវធ្វើសកម្មភាពហើយ» ប្រធានគណៈកម្មការកិច្ចការបរទេសរបស់សភាជាន់ទាបអាម៉េរិក Michael McCaul នៃបក្សសាធារណរដ្ឋ ថ្លែងដូច្នេះ។

ក្រុមតំណាងរាស្ត្ររបស់បក្សកាន់អំណាចយល់ថា នេះគឺជាសកម្មភាព «ប្រញាប់ប្រញាល់» និងត្រូវការពិភាក្សាលំអិតជាមួយក្រុមអ្នកជំនាញ។ ដើម្បីក្លាយជាច្បាប់ សេចក្ដីព្រាងច្បាប់នេះនឹងត្រូវការការអនុម័តពីសភាជាន់ទាប និងសភាជាន់ខ្ពស់ មុនពេលបញ្ជូនទៅកាន់លោក បៃដិន ដើម្បីចុះហត្ថលេខាចុងក្រោយ។

TikTok កំពុងប្រឈមនឹងការតាមដាន និងរឹតបន្តឹងកាន់តែខ្លាំងឡើងៗពីបណ្ដាប្រទេសលោកខាងលិចនៅក្នុងប៉ុន្មានខែចុងក្រោយនេះ ព្រោះតែមានការបារម្ភថា ទីក្រុងប៉េកាំងអាចប្រមូលយកទិន្នន័យអ្នកប្រើប្រាស់។

TikTok និងគណៈកម្មការវិនិយោគបរទេសនៅសហរដ្ឋអាម៉េរិក (CFIUS) បានចរចាជាមួយគ្នាអស់ជាងពីរឆ្នាំមកហើយ ទាក់ទងនឹងសំណើស្ដីពីការធានាសុវត្ថិភាពរបស់ទិន្នន័យ។ TikTok ឱ្យដឹងថា ខ្លួនបានចំណាយប្រាក់អស់ជាង 1.5 ពាន់លានដុល្លារសម្រាប់កិច្ចការធានាសុវត្ថិភាពទិន្នន័យ និងបានច្រានចោលការចោទប្រកាន់ពីអាជ្ញាធរអាម៉េរិក៕

March 2, 2023

រថភ្លើងពីរគ្រឿងបុកគ្នានៅប្រទេសក្រិក សម្លាប់មនុស្សយ៉ាងតិច 36 នាក់

រថភ្លើងដឹកអ្នកដំណើរបានបុកនឹងរថភ្លើងដឹកទំនិញនៅក្បែរទីក្រុង Larissa ភាគខាងកើតប្រទេសក្រិក បណ្ដាលឱ្យមនុស្សយ៉ាងតិច 36 នាក់បាត់បង់ជីវិត និង 85 នាក់រងរបួស។

ខ្សែរថភ្លើងដឹកអ្នកដំណើរ 350 នាក់ពី Athens ទៅកាន់ទីក្រុង Thessaloniki ភាគខាងជើងប្រទេសក្រិក កាលពីព្រលប់ថ្ងៃទី 28 កុម្ភៈ បានបុកគ្នានឹងរថភ្លើងដឹកទំនិញ នៅពេលទើបចេញផុតពីផ្លូវរូងក្រោមដីនៅ Larissa ភាគខាងកើតប្រទេសនេះ។

ការបុកគ្នាយ៉ាងពេញទំហឹងនេះបណ្ដាលឱ្យទូរថភ្លើងមួយចំនួនត្រូវខូចខាតទាំងស្រុង ក្នុងនោះមានខ្លះត្រូវឆាបឆេះ ខណៈអ្នកដំណើរត្រូវជាប់ខាងក្នុង។

បុគ្គលិកពន្លត់អគ្គិភ័យប្រហែល 150 នាក់ និងរថយន្តសង្គ្រោះប្រហែល 40 គ្រឿងត្រូវបានបញ្ជូនទៅកាន់កន្លែងកើតហេតុ។

បុគ្គលិកសង្គ្រោះម្នាក់និយាយថា យ៉ាងហោចណាស់មានមនុស្ស 36 នាក់បានស្លាប់ និង 85 នាក់រងរបួស ក្នុងនោះមាន 66 នាក់ត្រូវបញ្ជូនទៅកាន់មន្ទីរពេទ្យ។

បច្ចុប្បន្នមិនទាន់ដឹងច្បាស់ពីមូលហេតុនៃគ្រោះថ្នាក់នេះ ប៉ុន្តែ ប្រធានសមាគមអ្នកបើកបររថភ្លើង OSE លោក Kostas Genidounias និយាយថា រថភ្លើងទាំងពីរខ្សែនេះធ្វើដំណើរលើផ្លូវដែកតែមួយ និងបុកគ្នាដោយផ្ទាល់ ខណៈក្រុមមន្ត្រី និងប៉ូលិសកំពុងតែស្រាវជ្រាវរកមូលហេតុនៃ។

ប្រព័ន្ធផ្លូវដែកដ៏ចាស់របស់ក្រិកកំពុងត្រូវការការជួសជុលឡើងវិញ។ កាលពីឆ្នាំ 1972 មានគ្រោះថ្នាក់ស្រដៀងគ្នានេះកើតឡើងម្ដងរួចហើយ ដោយវាបានសម្លាប់មនុស្សចំនួន 19 នាក់ បន្ទាប់ពីរថភ្លើងពីរខ្សែបុកគ្នានៅក្បែរ Larissa៕

March 1, 2023

Author: សឿន សំណាង