សឿន សំណាង - La Reine Media

ក្រុមហ៊ុនអាម៉េរិកធ្វើតេស្តឡានហោះអគ្គិសនី ល្បឿន 225 គីឡូម៉ែត្រ/ម៉ោង

ក្រុមហ៊ុនអាកាសចរណ៍ Doroni Aerospace ដែលមានទីស្នាក់ការនៅ Miami បានធ្វើការសាកល្បងលើការហោះឡើង និងចុះចតដោយជោគជ័យលើកដំបូងចំពោះឡានហោះគំរូ Doroni H1។

បន្ទាប់ពីត្រូវបានបង្ហាញជាលើកដំបូងក្នុងទម្រង់ concept កាលពីឆ្នាំ 2019 និងចាប់ផ្ដើមអភិវឌ្ឍជាទម្រង់គំរូតាំងពីដើមឆ្នាំ 2022 ឡានហោះ Doroni H1 អាចហោះឡើង និងចុះចតដោយត្រង់ និងប្រើប្រាស់អគ្គិសនី (eVTOL)។ ដោយសារមានរូបរាងតូចល្មម ឡានហោះនេះអាចចតក្នុងកន្លែងដាក់ឡានរបស់គ្រួសារ។ Doroni H1 មានបណ្ដោយ 7 ម៉ែត្រ, ទទឹង 4.5 ម៉ែត្រ, កម្ពស់ 1.7 ម៉ែត្រ និងអាចហោះក្នុងល្បឿន 225 គីឡូម៉ែត្រ/ម៉ោង។

ថ្មីៗនេះ ក្រុមហ៊ុនខាងលើបានធ្វើការសាកល្បងហោះឡើង និងចុះចតចំពោះ Doroni H1 និងបានទទួលជោគជ័យ នេះបើតាម TMZ ចុះផ្សាយកាលពីថ្ងៃទី 14 មីនា។ នេះគឺជាជំហានដំបូងដើម្បីឱ្យក្រុមហ៊ុនបន្តធ្វើតេស្តទ្រង់ទ្រាយធំនាប៉ុន្មានខែខាងមុខ។

Doroni H1 ត្រូវបានអភិវឌ្ឍឡើងដើម្បីអាចហោះហើរជាបន្តបន្ទាប់បានជិត 100 គីឡូម៉ែត្រ។ ដោយប្រើប្រាស់មុខងារបញ្ចូលអគ្គិសនីរហ័ស ឡានហោះនេះស៊ីពេលប្រហែលតែជាង 20 នាទីប៉ុណ្ណោះគឺមានថាមពល 80%។ ក្រោយពីបានចុះចត អ្នកប្រើប្រាស់អាចបើកបរឡានហោះនេះចូលទៅក្នុងហ្ការ៉ាសធម្មតាដើម្បីបញ្ចូលអគ្គិសនី។

អាជ្ញាធរគ្រប់គ្រងអាកាសចរណ៍អាម៉េរិកបានទទួលស្គាល់ថា Doroni H1 គឺជាឡានហោះគំរូបែបកីឡាធុនស្រាល។ Doroni H1 មានកៅអីចំនួនពីរ និងអាចផ្ទុកទម្ងន់បាន 227 គីឡូក្រាម។ គ្រប់គ្នាដែលមានប័ណ្ណបើកបរសមស្រប និងបានបញ្ចប់វគ្គហ្វឹកហ្វឺន 20 ម៉ោងរបស់ Doroni Aerospace សុទ្ធតែអាចបើកបរឡានហោះនេះបាន។

ដើមឡើយ តម្លៃលក់រាយរបស់ Doroni H1 គឺត្រឹមតែ 195,000 ដុល្លារអាម៉េរិក ប៉ុន្តែតម្លៃនេះបច្ចុប្បន្នបានឡើងដល់ 350,000 ដុល្លារ ដោយសារវត្ថុធាតុដើមឡើងថ្លៃខ្ពស់។

Doroni Aerospace ឱ្យដឹងថា ទទួលបានការបញ្ជាទិញជាង 230 គ្រឿង និងបានបញ្ជាក់ថា Doroni H1 នឹងមានវត្តមានក្នុងទីផ្សារចាប់ពីឆ្នាំ 2025៕

March 16, 2023

គម្រោងបង្កើតរោងចក្រផលិតអំពូលភ្លើងលំអថ្មីមួយនៅកម្ពុជា គ្រោងនឹងបង្កើតការងារបានជាង 300 កន្លែង

ក្រុមហ៊ុន «Won Star Enterprise Co., Ltd.» ត្រូវបានគណៈកម្មាធិការតំបន់សេដ្ឋកិច្ចពិសេសកម្ពុជា នៃក្រុមប្រឹក្សាអភិវឌ្ឍន៍កម្ពុជា សម្រេចចេញវិញ្ញាបនបត្រចុះបញ្ជីគម្រោងវិនិយោគរួចហើយ។ នេះបើតាមទំព័របណ្ដាញសង្គមរបស់ ក្រុមប្រឹក្សាអភិវឌ្ឍន៍កម្ពុជា ចុះផ្សាយនារសៀលថ្ងៃនេះ។

យោងតាម ក្រុមប្រឹក្សាអភិវឌ្ឍន៍កម្ពុជា គម្រោងវិនិយោគរបស់ក្រុមហ៊ុន Won Star Enterprise នឹងបង្កើតរោងចក្រផលិតអំពូលភ្លើងលំអ សម្ភារៈលំអធ្វើពីប្លាស្ទិក និងសម្ភារៈតាំងលំអផ្សេងៗ (String Light, LED, Sculpture, Ancient Tree Elf…)។

រោងចក្ររបស់ក្រុមហ៊ុន “Won Star Enterprise ដែលមានទីតាំងស្ថិតនៅក្នុងតំបន់សេដ្ឋកិច្ចពិសេសស្វាយរៀង ហ្គីហ្គា រីសស៍ នៅខេត្តស្វាយរៀងនេះ មានទុនវិនិយោគចំនួនពីរលានដុល្លារអាម៉េរិក និងអាចបង្កើតការងារបានចំនួនប្រមាណ 350 កន្លែង។

March 16, 2023

តំណាងរាស្ត្រអាម៉េរិក អំពាវនាវឱ្យ «បាញ់ទម្លាក់» យន្តហោះចម្បាំងរុស្ស៊ី ក្រោយករណីធ្លាក់ UAV

តំណាងរាស្ត្រនៅសភាជាន់ខ្ពស់អាម៉េរិក Lindsey Graham បានលើកសំណើឱ្យវ៉ាស៊ីងតោនបាញ់ទម្លាក់យន្តហោះចម្បាំងរុស្ស៊ីដែលហោះមកក្បែរយានយោធាអាម៉េរិក ដើម្បីឆ្លើយតបនឹងករណីធ្លាក់យន្តហោះគ្មានមនុស្សបើក (UAV) របស់អាម៉េរិកនៅលើសមុទ្រខ្មៅកាលពីប៉ុន្មានថ្ងៃមុន។

«បើជាប្រធានាធិបតី Ronald Reagan វិញ លោកនឹងធ្វើអ្វីនៅក្នុងស្ថានការណ៍នេះ? លោកនឹងបញ្ជាឱ្យបាញ់ទម្លាក់យន្តហោះរុស្ស៊ី បើពួកគេគំរាមដល់យានយោធារបស់យើង» លោក Lindsey Graham សមាជិកសភារបស់បក្សសាធារណរដ្ឋ បានថ្លែងលើកញ្ចក់ទូរទស្សន៍កាលពីថ្ងៃទី 15 មីនាដូច្នេះ។

លោក Graham យល់ថា រុស្ស៊ីត្រូវតែទទួលខុសត្រូវក្នុងករណីធ្លាក់ UAV MQ-9 Reaper របស់សហរដ្ឋអាម៉េរិកនៅសមុទ្រខ្មៅកាលពីមុននោះមួយថ្ងៃ ព្រមទាំងបានចេញការព្រមានដល់ក្រុមមេដឹកនាំរុស្ស៊ីផងដែរថា «បើសិនជាយន្តហោះរុស្ស៊ី នៅតែហោះក្បែរយានយោធាអាម៉េរិកដែលធ្វើសកម្មភាពនៅលើដែនអាកាសអន្តរជាតិ វានឹងត្រូវបានបាញ់ទម្លាក់»។

ប្រតិកម្មទៅនឹងប្រកាសរបស់លោក Graham ឯកអគ្គរដ្ឋទូតរុស្ស៊ីប្រចាំសហរដ្ឋអាម៉េរិក Anatoly Antonov ឱ្យដឹងថា ម៉ូស្គូមិនចង់ប្រឈមមុខដាក់គ្នាជាមួយវ៉ាស៊ីងតោន ប៉ុន្តែបានសង្កត់ធ្ងន់ថា រាល់ការវាយប្រហារដោយចេតនាមកលើយន្តហោះរុស្ស៊ីលើដែនអាកាសអន្តរជាតិនឹងជា «ការប្រកាសសង្គ្រាមសំដៅលើមហាអំណាចនុយក្លេអែរធំជាងគេលើលោក»។

បញ្ជាការដ្ឋានកងទ័ពប្រចាំអឺរ៉ុបរបស់អាម៉េរិក បានឱ្យដឹងថា យន្តហោះចម្បាំង Su-27 ពីរគ្រឿងរបស់រុស្ស៊ី បានហោះមកក្បែរ ហោះកាត់មុខ និងបាញ់ប្រេងសាំងទៅលើ UAV MQ-9 Reaper នៅលើតំបន់សមុទ្រអន្តរជាតិកាលពីថ្ងៃទី 14 មីនា មុនពេលយន្តហោះ Su-27 មួយគ្រឿងផ្សេងទៀតប៉ះទង្គិចលើស្លាបកង្ហាររបស់ UAV បង្ខំឱ្យទ័ពអាកាសអាម៉េរិកទម្លាក់ UAV ចូលក្នុងសមុទ្រ។

តំណាងរាស្ត្រនៅសភាជាន់ខ្ពស់អាម៉េរិក Lindsey Graham

មន្ទីរបញ្ចកោណនិយាយថា MQ-9 ពេលនោះកំពុងឈ្លបយកការណ៍ដូចធម្មតា។ អាម៉េរិកប្រើប្រាស់ MQ-9 សម្រាប់សកម្មភាពឈ្លបយកការណ៍ និងវាយប្រហារគោលដៅលើដី។ យន្តហោះគ្មានមនុស្សបើកនេះតែងហោះលើសមុទ្រខ្មៅដើម្បីតាមដានកងទ័ពរុស្ស៊ី។

ក្រុមមន្ត្រីរុស្ស៊ីបានច្រានចោលការចោទប្រកាន់ពីអាម៉េរិក និងយល់ថា UAV របស់អាម៉េរិកផ្លាស់ប្ដូរទិសដៅរហ័ស និងធ្លាក់ដោយឯកឯងនៅពេលបាត់បង់ការគ្រប់គ្រង។ ឯកអគ្គរដ្ឋទូតរុស្ស៊ីប្រចាំអាម៉េរិក Anatoly Antonov អះអាងថា MQ-9 កំពុងប្រមូលទិន្នន័យដើម្បីបញ្ជូនទៅឱ្យអ៊ុយក្រែន មុនពេលត្រូវធ្លាក់។

នេះគឺជាការប៉ះទង្គិចផ្ទាល់ជាលើកដំបូងរវាងកងកម្លាំងរុស្ស៊ី និងអាម៉េរិក រាប់ចាប់តាំងពីសង្គ្រាមនៅអ៊ុយក្រែនបានផ្ទុះឡើងកាលពីខែកុម្ភៈឆ្នាំកន្លង។ ហេតុការណ៍នេះមិនបានធ្វើឱ្យមានការប្រឈមមុខដាក់គ្នានៅកន្លែងជាក់ស្ដែងបន្ទាប់ទៀតនោះទេ ប៉ុន្តែវាធ្វើឱ្យទ័ពអាកាសអាម៉េរិកខាតបង់អស់យ៉ាងតិច 30 លានដុល្លារអាម៉េរិក នៅពេល MQ-9 Reaper បានបាត់ខ្លួនទាំងស្រុងពីអាកាស៕

March 16, 2023

ណាសា (NASA) បង្ហាញឈុតសម្លៀកបំពាក់អវកាសសម្រាប់បេសកកម្មព្រះចន្ទ Artemis III

នៅឯមជ្ឈមណ្ឌលអវកាស Johnson ក្នុងទីក្រុង Houston រដ្ឋ Texas សហរដ្ឋអាម៉េរិក កាលពីថ្ងៃទី 15 មីនា ទីភ្នាក់ងារអវកាសអាម៉េរិក (ណាសា-NASA) រួមនឹងដៃគូសហការ Axiom Space បានបង្ហាញឈុតសម្លៀកបំពាក់អវកាសជំនាន់ថ្មីដែលផលិតឡើងសម្រាប់អ្នកអវកាសនៅក្នុងបេសកកម្មត្រលប់ទៅកាន់ឋានព្រះចន្ទ Artemis III។

ឈុតថ្មីដែលមានឈ្មោះថា ឧបករណ៍ផ្លាស់ទីស្រាវជ្រាវភពក្រៅ (Axiom Extravehicular Mobility Unit – AxEMU) នេះ ត្រូវបានរចនា និងផលិតដោយក្រុមហ៊ុន Axiom Space ទៅតាមកិច្ចព្រមព្រៀងតម្លៃ 225.5 លានដុល្លារអាម៉េរិកជាមួយនឹងណាសា។

ឈុតសម្លៀកបំពាក់នេះមានមុខងារការពារមនុស្ស និងឧបករណ៍បច្ចេកវិទ្យាទំនើប លេចធ្លោជាងឆ្ងាយ បើធៀបនឹងឈុតអវកាសដែលបានប្រើប្រាស់ក្នុងបេសកកម្ម Apollo កាលពីជាង 50 ឆ្នាំមុន។

ឈុតនេះមានពណ៌ខ្មៅ រំលេចដោយពណ៌ទឹកក្រូច ពណ៌ផ្ទៃមេឃដើម្បីបង្ហាញពីរូបរាងដ៏លេចធ្លោ និងប្លែកភ្នែក។ ក៏ប៉ុន្តែ កំណែចុងក្រោយនឹងមានពណ៌សដូចសម័យ Apollo ដើម្បីអាចទប់ទល់នឹងវិទ្យុសកម្មពីព្រះអាទិត្យ និងការពារអ្នកអវកាសពីអាកាសធាតុដ៏អាក្រក់នៅលើឋានព្រះចន្ទ។

សម្លៀកបំពាក់អវកាសថ្មីរបស់ Axiom Space មានច្រើនស្រទាប់ ក្នុងនោះមាន ស្រទាប់សម្រាប់រក្សាខ្យល់, ស្រទាប់សម្រាប់រក្សារូបរាងរបស់ឈុតសម្លៀកបំពាក់, ស្រទាប់សម្រាប់រារាំងកម្ដៅ ហើយស្រទាប់ខាងក្រៅគឺសម្រាប់ទប់ទល់នឹងធូលី និងការពារបញ្ហាដាច់រហែក។

បេសកកម្ម Artemis III នឹងធ្វើឡើងនៅចុងឆ្នាំ 2025 បន្ទាប់ពី Artemis II ដែលនាំអ្នកអវកាសទៅហោះជុំវិញឋានព្រះចន្ទបានបញ្ចប់។ ណាសានឹងប្រកាសឈ្មោះក្រុមអវកាសចរនៅក្នុងបេសកម្មលើកនេះនៅថ្ងៃទី 03 មេសា។ Artemis III នឹងជាបេសកកម្មដំបូងដែលអ្នកអវកាសត្រូវចុះចតលើតំបន់ប៉ូលខាងត្បូងរបស់ព្រះចន្ទ៕

March 16, 2023

អំពើហិង្សាដ៏ធំកើតឡើងនៅវគ្គ 1/8 នៃការប្រកួតដណ្ដើមពានរង្វាន់បាល់ទាត់ Champions League 2022/2023

(អ៊ីតាលី) – ករណីប្រើអំពើហិង្សាធំដែលមួយបានកើតឡើងនៅមុនការប្រកួតជើងទីពីរនៃវគ្គ 1/8 UEFA Champions League 2022/2023 រវាងក្រុម Napoli និង Frankfurt។

វេលាទៀបភ្លឺថ្ងៃទី 15 មីនា (ម៉ោងនៅកម្ពុជា) មានហេតុការណ៍វឹកវរដ៏ធំមួយបានកើតឡើងនៅក្នុងទីក្រុង Naples កៀកនឹងម៉ោងប្រកួតរវាងក្លឹប Napoli និង Frankfurt ក្នុងវគ្គ 1/8 នៃពានរង្វាន់បាល់ទាត់ Champions League 2022/2023។

អ្នកយកព័ត៌មានជនជាតិអ៊ីតាលី Tancredi Palmeri បានឱ្យដឹងថា ក្រុមអ្នកគាំទ្រមកពីប្រទេសអាល្លឺម៉ង់ និងក្រុមអ្នកគាំទ្រជ្រុលនិយមរបស់ក្លឹប Atlanta បានចូលរួមក្នុងហេតុការណ៍នេះ។

ហេតុការណ៍វឹកវរដ៏ធំមួយបានកើតឡើងនៅក្នុងទីក្រុង Naples វេលាទៀបភ្លឺថ្ងៃទី 15 មីនា (ម៉ោងនៅកម្ពុជា) កៀកនឹងម៉ោងប្រកួតរវាងក្លឹប Napoli និង Frankfurt ក្នុងវគ្គ 1/8 នៃពានរង្វាន់បាល់ទាត់ Champions League 2022/2023

វីដអូដែលថតបានសកម្មភាពបង្ហាញថា អ្នកគាំទ្រពីរក្រុមខាងលើបានវាយប្រហារលើប៉ូលិស។ ជាការឆ្លើយតប សមត្ថកិច្ចអ៊ីតាលីប្រហែល 800 នាក់ត្រូវបានបញ្ជូនទៅកាន់ដងផ្លូវដើម្បីទប់ទល់នឹងក្រុមមនុស្សជាង 300 នាក់ដែលកំពុងបង្កភាពវឹកវរ។ ចំណែករថយន្តក្រុងរបស់ក្លឹប Frankfurt ក៏ត្រូវភ្លើងឆាបឆេះ។

ប៉ូលិសរាប់រយនាក់ត្រូវបានបញ្ជូនមកកាន់កន្លែងកើតហេតុ

ចុងក្រោយ ពុំមានរបាយការណ៍ណាមួយនិយាយពីការបាត់បង់ជីវិមនុស្សនៅក្នុងហេតុការណ៍ហិង្សាខាងលើ ហើយក្លឹប Napoli របស់អ៊ីតាលី ក៏បានយកឈ្នះ Frankfurt របស់អាល្លឺម៉ង់ 3-0៕

March 16, 2023

កូរ៉េខាងត្បូងសម្រេចចំណាយជិតបីពាន់លានដុល្លារទៀតដើម្បីទិញយន្តហោះចម្បាំងអាម៉េរិក

រដ្ឋាភិបាលកូរ៉េខាងត្បូងអនុម័តគម្រោងចំណាយជិតបីពាន់លានដុល្លារអាម៉េរិកដើម្បីទិញយន្តហោះចម្បាំងអាម៉េរិក F-35A ក្នុងគ្រាដែលភាពតានតឹងកំពុងកើនឡើងនៅឧបទ្វីបកូរ៉េ។

ការិយាល័យគ្រប់គ្រងកម្មវិធីទិញដូរកូរ៉េខាងត្បូង (DAPA) កាលពីថ្ងៃទី 15 មីនា ប្រកាសថា រដ្ឋាភិបាលកូរ៉េខាងត្បូងបានអនុម័តផែនការតម្លៃ 2.85 ពាន់លានដុល្លារអាម៉េរិកដើម្បីទិញយន្តហោះចម្បាំងអាម៉េរិក F-35A បន្ថែមទៀត និងគ្រោងទទួលបាននៅឆ្នាំ 2028។

មកដល់ពេលនេះមិនទាន់ដឹងច្បាស់ថា គម្រោងទិញយន្តហោះចម្បាំងខាងលើនឹងមានចំនួនប៉ុន្មានគ្រឿងនៅឡើយ។ ទ័ពអាកាសកូរ៉េខាងត្បូងកំពុងគ្រប់គ្រងយន្តហោះ F-35A ចំនួន 40 គ្រឿង និងគ្រោងទិញ 20 គ្រឿងថែមទៀត។ ចំណែកទ័ពជើងទឹកកូរ៉េខាងត្បូងក៏មានគម្រោងទិញ F-35B ចំនួន 20 គ្រឿង ប៉ុន្តែសភាមិនទាន់អនុញ្ញាត។

រដ្ឋាភិបាលកូរ៉េខាងត្បូងក៏បានអនុម័តគម្រោងទិញមីសស៊ីលការពារដែនអាកាស SM-6 តម្លៃ 582.8 លានដុល្លារអាម៉េរិក ដែលគ្រោងនឹងធ្វើឡើងជាពីរដំណាក់កាល។ មីស៊ីលទាំងនេះនឹងត្រូវបានបំពាក់ឱ្យនាវាពិឃាតថ្នាក់ Sejong ជំនាន់ទីពីរ។

ការហោះឡើង និងចុះចតរបស់យន្តហោះចម្បាំង F-35

ក្រសួងការពារជាតិកូរ៉េខាងត្បូង កាលពីថ្ងៃទី 15 មីនា ក៏បានអះអាងថា ពួកគេចង់អភិវឌ្ឍនាវាផ្ទុកយន្តហោះសម្រាប់ F-35B ផងដែរ។

គម្រោងទាំងឡាយខាងលើនេះត្រូវបានលើកឡើងក្នុងគ្រាដែលភាពតានតឹងនៅឧបទ្វីបកូរ៉កំពុងកើនឡើង។ កាលពីថ្ងៃទី 16 កុម្ភៈ កូរ៉េខាងត្បូងបានប្រកាសបង្ហាញសៀវភៅសការពារជាតិឆ្នាំ 2022 ក្នុងនោះ ទីក្រុងសេអ៊ូលបានហៅកូរ៉េខាងជើងថា «សត្រូវ» ជាលើកដំបូងក្រោយរយៈពេល 6 ឆ្នាំ និងបានបង្ហាញពីគោលជំហរម៉ឺងម៉ាត់ជាងមុនចំពោះទីក្រុងព្យុងយ៉ាង។

បងប្អូនគូសត្រូវនៅឧបទ្វីបកូរ៉េ ប៉ុន្មានខែចុងក្រោយនេះបានដំឡើងសាច់ដុំដាក់គ្នាជាបន្តបន្ទាប់។ ទីក្រុងព្យុងយ៉ាងបាញ់សាកល្បងមីស៊ីលជាហូរហែ ខណៈដែលទីក្រុងសេអ៊ូលក៏បង្កើនការធ្វើសមយុទ្ធយោធាជាមួយសម្ព័ន្ធមិត្ត៕

March 16, 2023

រថយន្តអគ្គិសនី MG កំពុងវាយលុកទីផ្សារពិភពលោក

ក្រុមហ៊ុនផលិតរថយន្តចិន MG បានបង្ហើបឱ្យដឹងពីតម្លៃសម្រាប់កំណែរត់បានឆ្ងាយ Long Range របស់រថយន្តអគ្គិសនី ZS EV ហើយថា ម៉ូដែលរថយន្តអគ្គិសនីខ្នាតតូច MG4 ថ្មីនឹងបង្ហាញខ្លួននៅពាក់កណ្ដាលចុងក្រោយឆ្នាំនេះ។

CEO របស់ MG អូស្ត្រាលី លោក Peter Ciao បាននិយាយថា អតិថិជនចង់បានកំណែ ZS EV Long Range។ «ក្រោយពីការទទួលបានជោគជ័យពីរថយន្ត ZS EV កាលពីខែកញ្ញាឆ្នាំមុន យើងបានទទួលយកមតិប្រតិកម្មតបពីអតិថិជន ហើយក៏ជំរុញការបង្ហាញម៉ូដែល ZS EV ដែលបើកបរបានឆ្ងាយជាងមុន»។

កំណែ MG ZS EV Long Range មានតម្លៃចាប់ពីប្រហែល 57,000 ដុល្លារអាម៉េរិក ថ្លៃជាងប្រហែល 11,000 ដុល្លារ បើធៀបនឹងកំណែស្ដង់ដា។ អតិថិជនអាចបញ្ជាទិញជាមុនរថយន្តនេះនៅចុងខែមីនា ហើយគ្រោងនឹងទទួលបានទំនិញចាប់ពីខែមេសា។

MG ZS EV Long Range អាចបរបានចម្ងាយ 440 គីឡូម៉ែត្រក្រោយពីបញ្ចូលអគ្គិសនីមួយពេញ ឆ្ងាយជាង 120 គីឡូម៉ែត្រធៀបនឹង 320 គីឡូម៉ែត្ររបស់កំណែស្ដង់ដា។

MG អូស្ត្រាលី នៅតែរក្សាការសម្ងាត់របស់រថយន្តអគ្គិសនី MG4 ដែលជិតបង្ហាញខ្លួន ប៉ុន្តែកំណែដែលកំពុងត្រូវបានដាក់លក់នៅប្រទេសអង់គ្លេសបានផ្ដល់ព័ត៌មានគ្រប់គ្រាន់ដែលអ្នកប្រើប្រាស់ត្រូវការ។ សម្រាប់កំណែអន្តរជាតិរបស់ MG4 អតិថិជនអាចជ្រើសរើសរវាងថ្ម និងម៉ូទ័រអគ្គិសនីពីរកំណែ។ ទីមួយគឺមានថ្ម 50.8 kWh អាចបើកបរបាន 350 គីឡូម៉ែត្រ និងមានម៉ូទ័រអគ្គិសនី 125kW/250Nm។ ទីពីរគឺកំណែសម្រាប់ផ្លូវឆ្ងាយ ដែលមានថ្មកម្លាំង 61kWh អាចរត់បាន 450 គីឡូម៉ែត្រ អមជាមួយនឹងម៉ូទ័រអគ្គិសនី 150kW/250Nm។

ចំណែកតម្លៃរបស់រថយន្តអគ្គិសនី MG4 នេះវិញ គឺត្រូវបានលក់ចាប់ពី 49,000 ដល់ 59,200 ដុល្លារអាម៉េរិក៕

March 16, 2023

អតិផរណានៅប្រទេសម្ចាស់ជើងឯក World Cup 2022 កើនឡើងលើសពី 100%

ជាលើកដំបូងក្នុងរយៈពេលជាង 30 ឆ្នាំមកនេះ អតិផរណានៅប្រទេសអាហ្សង់ទីនបានកើនឡើងលើសពី 100% ដែលនេះបង្ហាញថា ក្រុមមន្ត្រីប្រទេសនេះនៅតែជួបបញ្ហាក្នុងការគ្រប់គ្រងតម្លៃទំនិញ។

ការិយាល័យជាតិស្ថិតិអាហ្សង់ទីន (INDEC) កាលពីថ្ងៃទី 14 មីនា បានឱ្យដឹងថា សន្ទស្សន៍ថ្លៃទំនិញប្រើប្រាស់ (CPI) របស់ប្រទេសនេះក្នុងខែកុម្ភៈ កើន 102.5% ធៀបនឹងឆ្នាំកន្លង។ ល្បឿននេះស្ថិតក្នុងក្រុមប្រទេសដែលមានអតិផរណាខ្ពស់បំផុតលើពិភពលោក។

កាលពីខែមករា 2023 អតិផរណារបស់អាហ្សង់ទីគឺ 6.6%។ អាហារ និងភេសជ្ជស្ថិតក្នុងក្រុមទំនិញដែលឡើងថ្លៃខ្ពស់ជាងគេ ដោយអតិផរណាកើន 9.8% នៅក្នុងខែកុម្ភៈ បើធៀបនឹងខែមករា។ ទំនិញដែលបានឡើងថ្លៃខ្ពស់បន្ទាប់គឺទំនិញជាឧបករណ៍ព័ត៌មានវិទ្យា ភោជនីយដ្ឋាន និងសណ្ឋាគារ។

សេដ្ឋកិច្ចធំជាងគេលំដាប់ទីបីនៅអាម៉េរិកឡាទីន កំពុងវិលវល់ក្នុងវិបត្តិហិរញ្ញវត្ថុ និងសង្គមដែលបានកើតឡើងក្នុងរយៈពេលច្រើនឆ្នាំចុងក្រោយនេះ។ ថ្មីៗនេះ សេដ្ឋកិច្ចរបស់អាហ្សង់ទីនកាន់តែដុនដាបទៅៗ ដោយសារតែសង្គ្រាមរុស្ស៊ី-អ៊ុយក្រែន។

ដើម្បីទប់ទល់នឹងបញ្ហាអតិផរណា និងទប់ស្កាត់ការធ្លាក់ថ្លៃរបស់រូបិយប័ណ្ណប៉េសូ រដ្ឋាភិបាលរបស់ប្រធានាធិបតី Alberto Fernandez បានអនុវត្តគោលនយោបាយគាំទ្រអត្រាប្តូរប្រាក់ចំពោះវិស័យមួយចំនួន។ គោលនយោបាយនេះជួយឱ្យបណ្ដាក្រុមហ៊ុនអាចទិញរូបិយប័ណ្ណដុល្លារអាម៉េរិកបានថោកជាងទីផ្សារ។

ទន្ទឹមនឹងនេះ រដ្ឋាភិបាលក៏ចាត់វិធានការជាច្រើនផ្សេងទៀតដើម្បីទប់ទល់នឹងអតិផរណា មានជាអាទិ៍ ការដំឡើងការប្រាក់របស់ធនាគារជាតិ ការផ្អាកសកម្មភាពបោះពុម្ពក្រដាសប្រាក់។ល។

យោងតាម CNN និង Reuters នៅលើពិភពលោកបច្ចុប្បន្ន មិនមែនមានតែអាហ្សង់ទីនមួយទេដែលកំពុងឈឺក្បាលនឹងបញ្ហាទំនិញឡើងថ្លៃ។ ទិន្នន័យផ្លូវការថ្មីបំផុតដែលប្រទេសវ៉េណេស៊ុយអេឡាប្រកាសកាលពីខែតុលាឆ្នាំកន្លងបង្ហាញថា អតិផរណានៅប្រទេសនេះបានឡើងដល់ 155%។ ចំណែកនៅប្រទេសលីបង់វិញ តម្លៃទំនិញប្រើប្រាស់ក្នុងខែមករា 2023 បានកើនដល់ 124% គ្រាដែលអតិផរណានៅប្រទេសស៊ីមបាវ៉េក្នុងខែមករាក៏កើនដល់ 101.5%៕

March 16, 2023

រដ្ឋាភិបាលអាម៉េរិកឧបត្ថម្ភប្រាក់រាប់ពាន់លានដុល្លារបន្ថែមទៀតសម្រាប់ឆ្នាំងសាកថ្មរថយន្តអគ្គិសនី

កាលពីថ្ងៃទី 15 មីនា 2023 រដ្ឋាភិបាលរបស់លោក ចូ បៃដិន បានប្រកាសពីកញ្ចប់ថវិកាឧបត្ថម្ភថ្មីតម្លៃ 2.5 ពាន់លានដុល្លារ សម្រាប់ការសាងសង់ស្ថានីយបញ្ចូលថាមពលថ្មរថយន្តអគ្គិសនី និងហេដ្ឋារចនាសម្ព័ន្ធផ្គត់ផ្គង់ឥន្ធនៈបៃតង។

ការផ្ដល់ប្រាក់ឧបត្ថម្ភនេះគឺជាផ្នែកមួយនៅក្នុងគោលដៅបង្កើនការប្រើប្រាស់រថយន្តអគ្គិសនីនៅតាមតំបន់ដែលមិនទាន់ទទួលបានការយកចិត្តទុកដាក់ច្រើនពីរដ្ឋាភិបាល។ កញ្ចប់ថវិកាឧបត្ថម្ភខាងលើក៏ផ្ដោតទៅលើការដំឡើងឆ្នាំងសាកថ្មរថយន្តអគ្គិសនីនៅលើផ្លូវល្បឿនលឿនផងដែរ។

យោងតាមកម្មវិធីឧបត្ថម្ភសម្រាប់ហេដ្ឋារចនាសម្ព័ន្ធឆ្នាំងសាក និងផ្គត់ផ្គង់ឥន្ធនៈបៃតង កញ្ចប់ថវិកា 2.5 ពាន់លានដុល្លារនេះនឹងត្រូវបានប្រើប្រាស់ក្នុងរយៈពេលប្រាំឆ្នាំ។

ក្រសួងចរាចរណ៍ និងដឹកជញ្ជូនសហរដ្ឋអាម៉េរិកបានឱ្យដឹងថា នេះគឺជាជំហានសំខាន់ឆ្ពោះទៅកាន់គោលដៅនានារបស់ប្រធានាធិបតី បៃដិន ដែលគ្រោងសាងសង់បណ្ដាញស្ថានីយសាកថ្មរថយន្តអគ្គិសនីឱ្យបាន 5,00,000 កន្លែង និងកាត់បន្ថយការបំភាយឧស្ម័នផ្ទះកញ្ចក់ក្នុងប្រទេសនេះពី 50% ទៅ 52% នៅឆ្នាំ 2030៕

March 16, 2023

ក្លឹបបាល់ទាត់អារ៉ាប៊ីសាអូឌីត ស្នើឱ្យ Messi ចុះកិច្ចព្រមព្រៀងតម្លៃស្មើនឹង Ronaldo

(អារ៉ាប៊ីសាអូឌីត) – ក្លឹប Al Hilal អញ្ជើញ Lionel Messi ចុះកិច្ចព្រមព្រៀងតម្លៃ 240 លានដុល្លារអាម៉េរិក ដូចទៅនឹងប្រាក់បៀវត្សរ៍សម្រាប់ Cristiano Ronaldo ពេលមកទាត់ឱ្យ Al Nassr។

កាលពីថ្ងៃទី 14 មីនា ឪពុក និងជាតំណាងរបស់ Messi លោក Jorge Messi បានទៅដល់សណ្ឋាគារទំនើបមួយនៅរាជធានីរីយ៉ាដ ប្រទេសអារ៉ាប៊ីសាអូឌីត រួមនឹងមនុស្សពីរនាក់ទៀតដែលត្រូវបានគេជឿថាជាសមាជិករាជវាំងអារ៉ាប៊ីសាអូឌីត។ យោងតាមទស្សនាវដ្ដី Forbes ឥរិយាបថនេះធ្វើឱ្យមានដំណឹងចចាមអារ៉ាមទាក់ទងនឹងរឿង Messi រើមកកាន់អារ៉ាប៊ីសាអូឌីត បើទោះជាដំណើររបស់ឪពុកកីឡាករ Messi មានគោលដៅពាណិជ្ជកម្ម។ កំពូលតារាបាល់ទាត់របស់ក្លឹបបារាំង PSG បានចុះកិច្ចព្រមព្រៀងធ្វើជាឯកអគ្គរាជទូតទេសចរណ៍របស់ប្រទេសអារ៉ាប៊ីសាអូឌីត និងត្រូវមកធ្វើទស្សនកិច្ចអាស៊ីនៅក្នុងពេលខាងមុខ។

កាលពីខែមករា 2023 ទីភ្នាក់ងារសារព័ត៌មានអេស្ប៉ាញ Mundo Deportivo បានរាយការណ៍ថា ក្លឹបមួយរបស់អារ៉ាប៊ីសាអូឌីត កំពុងត្រៀមផ្ញើសំណើដែលមានតម្លៃ 350 លានដុល្លារអាម៉េរិកទៅឱ្យ Messi។ មន្ត្រីជំនិតរបស់មហាក្បត្រកាតា Nasser Al-Attiyah ថែមទាំងបានអះអាងថា ខ្សែប្រយុទ្ធវ័យ 35 ឆ្នាំ នឹងមកកាន់ អារ៉ាប៊ីសាអូឌីត លេងឱ្យក្លឹប Al Hilal ចាប់ពីរដូវក្ដៅឆ្នាំ 2023។

មកដល់ថ្ងៃទី 15 មីនា ទំព័រ Marca បានឱ្យដឹងថា ក្លឹប Al Hilal បានត្រៀមរួចរាល់ក្នុង «ការពិនិត្យមើលការសម្រេចចិត្តរបស់ Messi» ដោយការអញ្ជើញ M10 ចុះកិច្ចព្រមព្រៀងដូចទៅនឹងអ្វីដែល Ronaldo បានធ្វើជាមួយក្លឹប Al Nassr។ ប្រការនេះមានន័យថា Messi នឹងមានប្រាក់បៀវត្សរ៍ 240 លានដុល្លារអាម៉េរិក/រដូវកាល ដែលរួមមាន ប្រាក់បៀវត្សរ៍គោល ប្រាក់រង្វាន់នានា និងក្លាយជានិមិត្តរូបតំណាងឱ្យមហិច្ឆតាក្នុងវិស័យបាល់ទាត់របស់អារ៉ាប៊ីសាអូឌីត។

ក្លឹប Al Hilal ឈ្នះពានរង្វាន់ជើងឯកអាស៊ី 2021 (2021 Asian Champions League) បន្ទាប់ពីបានយកឈ្នះ Pohang Steelers របស់កូរ៉េខាងត្បូង 2-0 នៅក្នុងវគ្គផ្ដាច់ព្រ័ត្រដែលធ្វើឡើងនៅរាជធានីរីយ៉ាដ

Al Hilal គឺជាក្លឹបបាល់ទាត់ដែលមានសមិទ្ធផលច្រើនជាងគេនៅអារ៉ាប៊ីសាអូឌីត ដោយដណ្ដើមបានពានសរុប 65 ពាន ក្នុងនោះមានពានជើងឯក 18 លើកនៅ Saudi League និងជើងឯក AFC Champions League ចំនួនបួនលើក។

ការមានទាំង Messi មានទាំង Ronaldo នឹងធ្វើឱ្យអារ៉ាប៊ីសាអូឌីតកាន់តែមានឥទ្ធិពលទៅលើមហិច្ឆតាក្លាយជាម្ចាស់ផ្ទះសម្រាប់ World Cup 2030។ ក៏ប៉ុន្តែ អាហ្សង់ទីនក៏កំពុងប្រឹងប្រែងដើម្បីដណ្ដើមសិទ្ធិធ្វើជាម្ចាស់ផ្ទះរួមគ្នាជាមួយអ៊ុយរូហ្កាយ ប៉ារ៉ាហ្កាយ និងស៊ីលីផងដែរ។

កិច្ចសន្យារវាងក្លឹប PSG និង Messi នឹងអស់សុពលភាពត្រឹមខែមិថុនា 2023 ក្នុងនោះ Messi មានសិទ្ធិក្នុងការសម្រេចចិត្តថាតើគួរពន្យារសុពលភាពមួយឆ្នាំថែមទៀត ឬអត់។

ទំព័រ Marca បានរាយការណ៍ថា Messi ចង់ពន្យារសុពលភាព ប៉ុន្តែការចរចាជាមួយក្លឹប PSG «មិនងាយដូចកាលពីមុន World Cup 2022»៕

March 16, 2023

Author: សឿន សំណាង