សឿន សំណាង - La Reine Media

ក្រុមបាល់ទាត់ជម្រើសជាតិកម្ពុជានឹងមានគ្រូបង្វឹកជាជនជាតិអាហ្សង់ទីន នៅក្រោយស៊ីហ្គេមលើកទី 32

កាលពីថ្ងៃទី 02 មេសា សហព័ន្ធកីឡាបាល់ទាត់កម្ពុជា (FFC) បានប្រកាសជាផ្លូវការនូវកិច្ចព្រមព្រៀងបួនឆ្នាំ ចាប់ពីឆ្នាំ 2023 ជាមួយនឹងគ្រូបង្វឹកជនជាតិអាហ្សង់ទីន លោក Felix Dalmas។

នេះមិនមែនជាលើកដំបូងឡើយដែលលោក Felix Dalmas ដឹកនាំក្រុមបាល់ទាត់ជម្រើសជាតិកម្ពុជា ហើយគោលដៅលើកនេះរបស់លោក Felix Dalmas និង FFC គឺវគ្គជម្រុះ FIFA World Cup 2026។

«ខ្ញុំរីករាយណាស់នៅពេលមានឱកាសត្រលប់មកកម្ពុជាដើម្បីធ្វើការ ហើយសង្ឃឹមថា គ្រប់គ្នាក៏មានអារម្មណ៍បែបនេះ។ យើងនឹងធ្វើការជាមួយគ្នា ដើម្បីអភិវឌ្ឍវិស័យបាល់ទាត់របស់កម្ពុជា…។ សង្ឃឹមថា គ្រប់គ្នានឹងគាំទ្រដល់ U-22 កម្ពុជានៅរដូវស៊ីហ្គេមខាងមុខ» លោក Felix Dalmas ថ្លែងដូច្នេះនៅក្នុងពិធីប្រកាសរបស់ FFC។

លោក Felix Dalmas ធ្លាប់ដឹកនាំក្រុមបាល់ទាត់កម្ពុជាកាលពីឆ្នាំ 2018 ដែលពេលនោះលោកដឹកនាំក្រុម U-23 កម្ពុជា ទៅចូលរួមស៊ីហ្គេម ក្រោមការប្រឹក្សាយោបល់ពីចម្ងាយរបស់ប្រធានបច្ចេកទេសដែលកាលណោះគឺអតីតកីឡាករជម្រើសជាតិជប៉ុន Keisuke Honda។

លោក Felix Dalmas ដែលជាអតីតខ្សែប្រយុទ្ធកើតឆ្នាំ 1988 មកពីអាហ្សង់ទីន បានធ្វើការជាមួយសហព័ន្ធកីឡាបាល់ទាត់កម្ពុជារហូតដល់ខែមីនា 2021។ លោកធ្លាប់ដឹកនាំក្រុមកម្ពុជាឡើងដល់វគ្គពាក់កណ្ដាលផ្ដាច់ព្រ័ត្រនៅស៊ីហ្គេមលើកទី 30 នៅហ្វ៊ីលីពីន។ ក្រោយមក លោក Felix Dalmas ក៏មិនបានដឹកនាំក្រុមជម្រើសជាតិណាទាំងអស់រហូតដល់មានកិច្ចព្រមព្រៀងថ្មីនេះ។

លោក Felix Dalmas (ស្ដាំ) និងលោក Keisuke Honda កាលពីឆ្នាំ 2019

ក្នុងពេលដ៏ខ្លីខាងមុខ គ្រូបង្វឹក Keisuke Honda នឹងដឹកនាំក្រុមបាល់ទាត់ជម្រើសជាតិកម្ពុជា ចូលប្រកួតនៅស៊ីហ្គេមលើកទី 32 ដែលកម្ពុជាធ្វើជាម្ចាស់ផ្ទះ។ នេះគឺជាឱកាសល្អបំផុតដើម្បីឱ្យអ្នកយុទ្ធសាស្ត្រជនជាតិជប៉ុនរូបនេះ និយាយពាក្យថា «លា» ក្នុងក្ដីរីករាយជាមួយអ្នកគាំទ្រនៅកម្ពុជា៕

April 3, 2023

ក្រុមបាល់ទះបុរសកម្ពុជា «ខូចចិត្ត» មុនស៊ីហ្គេម តែដាក់គោលដៅយកមេដាយមាសទីពីររាប់ពីឆ្នាំ 1965

បរាជ័យនៅចំពោះមុខក្រុមម្ចាស់ផ្ទះម៉ាឡេស៊ីក្នុងការប្រកួតដំបូងនៅពានរង្វាន់បាល់ទះ Tri Nation Cup 2023 គឺជារឿងដ៏គួរឱ្យសោកស្ដាយសម្រាប់ក្រុមជម្រើសជាតិកម្ពុជា ប៉ុន្តែការសោកស្ដាយជាងនេះគឺការចាញ់នៅក្នុងវគ្គផ្ដាច់ព្រ័ត្រ។

ដើម្បីត្រៀមខ្លួនឱ្យបានល្អសម្រាប់ចូលរួមព្រឹត្តិការណ៍កីឡាអាស៊ីអាគ្នេយ៍លើកទី 32 (ស៊ីហ្គេម 32 ឬ 32nd SEA Games ឬ 32nd Southeast Asian Games) ដែលនឹងធ្វើឡើងក្នុងខែឧសភា 2023 នៅកម្ពុជា ភាគីខាងម៉ាឡេស៊ីបានប្រារព្ធព្រឹត្តិការណ៍ប្រកួតបាត់ទះមិត្តភាពអន្តរជាតិដែលមានឈ្មោះថា Malaysia Tri Nation Invitational Friendly 2023។

ក្រោយការប្រកួតបានបួនថ្ងៃ ក្រុមម្ចាស់ផ្ទះម៉ាឡេស៊ីក្រុម A បានលើកពានជើងឯក ខណៈក្រុមកម្ពុជាជាប់លេខពីរ បន្ទាប់មកគឺក្រុមសិង្ហបុរី និងម៉ាឡេស៊ីក្រុម B។

ក្រុមបាល់ទះកម្ពុជាចាញ់ក្រុមម៉ាឡេស៊ី (ដែលជាក្រុមឈរបាតតារាងចំណាត់ថ្នាក់នៅស៊ីហ្គេម 31) នៅក្នុងវគ្គសន្សំពិន្ទុ និងវគ្គផ្ដាច់ព្រ័ត្រ។

ក៏ប៉ុន្តែ ក្រុមកម្ពុជាខាងលើគ្រាន់តែជាក្រុមដែលគ្រូបង្វឹកជនជាតិចិន Jun Li និងជំនួយការរបស់លោកមកពីគុយបា យកមកធ្វើការសាកល្បងកម្លាំងប៉ុណ្ណោះ។ ចំណែកសមាសភាពរបស់ក្រុមផ្លូវការនៅតែត្រូវបានរក្សាការណ៍សម្ងាត់ដើម្បីត្រៀមសម្រាប់ស៊ីហ្គេម 32។

នៅស៊ីហ្គេមដែលកម្ពុជាធ្វើជាម្ចាស់ផ្ទះនេះ កម្ពុជាដាក់គោលដៅខ្ពស់បំផុតគឺមេដាយមាសប្រវត្តិសាស្ត្រ។ កម្ពុជាធ្លាប់ដណ្ដើមបានមេដាយមាសកាលពីឆ្នាំ 1965 មុនពេលឈ្មោះស៊ីហ្គេមបង្ហាញវត្តមានចាប់ពីឆ្នាំ 1977។ ក្នុងព្រឹត្តិការណ៍កីឡានៅអាស៊ីអាគ្នេយ៍កាលណោះដែលត្រូវបានហៅថា ព្រឹត្តិការណ៍កីឡាឧបទ្វីបអាស៊ីអាគ្នេយ៍ (Southeast Asian Peninsular – SEAP Games) ក្រុមបាល់ទះជម្រើសជាតិកម្ពុជា បានឈ្នះក្រុមថៃ 3-0 នៅវគ្គផ្ដាច់ព្រ័ត្រ៕

April 3, 2023

ផ្ទុះនៅ St Petersburg ធ្វើឱ្យអ្នកសរសេរប្លក់យោធារុស្ស៊ី បាត់បង់ជីវិត

ករណីផ្ទុះកើតឡើងនៅឯហាងកាហ្វេមួយក្នុងទីក្រុង St Petersburg របស់ប្រទេសរុស្ស៊ី បានបណ្ដលឱ្យ blogger យោធាជនជាតិរុស្ស៊ីដ៏ល្បីឈ្មោះមួយរូបបាត់បង់ជីវិត និង 25 នាក់ផ្សេងទៀតរងរបួស។

«មនុស្សម្នាក់បានស្លាប់។ គាត់គឺជាអ្នករាយការណ៍ព័ត៌មានយោធា Vladlen Tatarsky» ក្រសួងមហាផ្ទៃរុស្ស៊ីប្រកាសកាលពីថ្ងៃទី 02 មេសា ស្ដីពីហេតុការណ៍ផ្ទុះនៅឯហាងកាហ្វេមួយកន្លែងក្នុងទីក្រុង St Petersburg ប្រទេសរុស្ស៊ី។

ប្រភពព័ត៌មានបានឱ្យដឹងថា ករណីផ្ទុះនេះក៏បានបង្ករបួសដល់មនុស្ស 25 នាក់ផ្សេងទៀត ក្នុងនោះមាន 6 នាក់ស្ថិតក្នុងសភាពធ្ងន់ធ្ងរ។ យោងតាមសមត្ថកិច្ចរុស្ស៊ី គ្រឿងផ្ទុះត្រូវបានលាក់ក្នុងហាងកាហ្វេ និងថា កំពុងស្រាវជ្រាវរកការពិត។

TASS ដកស្រង់ប្រភពព័ត៌មានពីសមត្ថកិច្ចឱ្យដឹងថា គ្រឿងផ្ទុះនេះត្រូវបានលាក់ក្នុងរូបសំណាកមួយដែលធ្វើឡើងសម្រាប់ជូនដល់អ្នកសរសេរប្លក់ Tatarsky។ ចំណែក Ria Novosti រាយការណ៍ថា នារីម្នាក់បានជូន Tatarsky កញ្ចប់ទំនិញដែលមានរូបសំណាកនៅខាងក្នុង។

Alissa Smotrova ជាស្ត្រីម្នាក់ដែលមានវត្តមាននៅកន្លែងកើតហេតុបានឱ្យដឹងថា បន្ទាប់ពីនារីនោះប្រគល់កញ្ចប់ទំនិញដល់ដៃ Tatarsky សំឡេងផ្ទុះក៏លាន់កក្រើកហាង និងមានឈាម និងបំណែកនានាខ្ទាតពាសពេញដី។

Tatarsky អាយុ 40 ឆ្នាំ មានឈ្មោះពិតថា Maxim Fomin មានអ្នកតាមដានជាង 500,000 នាក់នៅលើទំព័រ Telegram និងតែងរាយការណ៍ព័ត៌មានស្ដីពីយុទ្ធនាការយោធារបស់រុស្ស៊ីនៅអ៊ុយក្រែន។ Tatarsky តែងបង្ហោះវីដេអូវិភាគស្ថានការណ៍នៅសមរភូមិ និងផ្ដល់យោបល់ដល់ទាហានរុស្ស៊ី។

ប្រតិកម្មទៅនឹងករណីខាងលើ ជំនួយការប្រធានាធិបតីអ៊ុយក្រែន Mykhaylo Podolyak បានសរសេរលើ Twitter ថា «ការណ៍ដែលលទ្ធិភេរវកម្មក្នុងប្រទេសរុស្ស៊ីដែលក្លាយជាឧបករណ៍តតាំងក្នុងរឿងនយោបាយគឺគ្រាន់តែជាបញ្ហាពេលវេលាប៉ុណ្ណោះ»។

កាលពីខែសីហា 2022 អង្គភាពសន្តិសុខសហព័ន្ធរុស្ស៊ី (FSB) បានចោទថា អ៊ុយក្រែននៅពីក្រោយហេតុការណ៍បំផ្ទុះគ្រាប់បែកលើរថយន្តរបស់អ្នកស្រាវជ្រាវរុស្ស៊ី Alexander Dugin នៅជាយក្រុងមូស្គូ បណ្ដាលឱ្យកូនស្រីរបស់លោកបាត់បង់ជីវិត ប៉ុន្តែទីក្រុងកៀវបានបដិសេធ៕

April 3, 2023

កំពូលថ្វីជើងរបស់ Man City ទទួលបានកិច្ចព្រមព្រៀងថ្មី ជួយរកចំណូលបានច្រើនបន្ថែមទៀត

ខ្សែប្រយុទ្ធរបស់ Man City កំពូលថ្វីជើង Erling Haaland បានចុះកិច្ចព្រមព្រៀងជាផ្លូវការជាមួយក្រុមហ៊ុនខ្នាតយក្សមួយ ដែលនេះនឹងជួយឱ្យគាត់រកចំណូលបានរាប់សិបលានដុល្លារក្នុងមួយរដូវកាល។

យោងតាម L’Équipe ខ្សែប្រយុទ្ធជនជាតិន័រវែស Erling Haaland កំពុងទទួលបានប្រាក់បៀវត្សរ៍ប្រហែល 20 លានផោន/ឆ្នាំ ដោយមិនទាន់គិតដល់ប្រាក់រង្វាន់ ក្រោយពីបានចូលទាត់ឱ្យ Man City។ ខ្ទង់ប្រាក់នេះជួយឱ្យ Haaland ជាប់ចំណាត់ថ្នាក់លេខពីរ បន្ទាប់ពី Kevin De Bruyne (21 លានផោន/ឆ្នាំ)។

ក៏ប៉ុន្តែ ក្នុងអនាគត Haaland អាចនឹងរកបានប្រាក់ច្រើនជាងនេះទ្វេដង តាមរយៈការចុះហត្ថលេខាលើកិច្ចព្រមព្រៀងជាមួយម្ចាស់ឧបត្ថម្ភ Nike។ ក្រុមហ៊ុនផលិតសម្លៀកបំពាក់ និងសម្ភារកីឡាអាម៉េរិក Nike បានប្រកាសបង្ហាញកិច្ចព្រមព្រៀងឧបត្ថម្ភជាមួយ Erling Haaland។

ភាគីទាំងពីរធ្លាប់មានទំនាក់ទំនងពាណិជ្ជកម្មតាំងពី Haaland មានអាយុ 14 ឆ្នាំ ប៉ុន្តែបានអស់សុពលភាពកាលពីខែមករា 2022។ យោងតាម Athletic កិច្ចព្រមព្រៀងថ្មីជាមួយ Nike នឹងជួយឱ្យ Haaland រកប្រាក់ចំណូលបន្ថែម 20 លានផោនជារៀងរាល់ឆ្នាំ ប្រហាក់ប្រហែលនឹងប្រាក់បៀវត្សរ៍ដែលកីឡាករនេះទទួលបានពីក្លឹប Man City។

ដូច្នេះ ខ្សែប្រយុទ្ធជនជាតិន័រវែស បានចូលរួមជាមួយក្រុមទូតរបស់ Nike ដែលមានសុទ្ធតែកំពូលតារាបាល់ទាត់ រួមមានជាអាទិ៍ Kylian Mbappe, Kevin De Bruyne និងCristiano Ronaldo ផងដែរ។

Haaland ទាត់បញ្ចូលទីបាន 42 គ្រាប់ ក្នុង 37 ប្រកួតដែលលេងឱ្យ Man City នៅក្នុងរដូវកាលនេះ ក្នុងនោះមាន 28 គ្រាប់នៅឯពានរង្វាន់លីគកំពូលអង់គ្លេស។ ក្រៅពីនេះ Haaland ក៏បានក្លាយជាកីឡាករក្មេងជាងគេក្នុងប្រវត្តិសាស្ត្រ Champions League ដែលរកបាន 30 គ្រាប់៕

April 1, 2023

ក្រុមហ៊ុន Toyota ដាក់បង្ហាញ Lexus RZ អគ្គិសនីនៅទីផ្សារជប៉ុន

Toyota Motor Corp កាលពីថ្ងៃទី 31 មីនា បានបង្ហាញរថយន្តអគ្គិសនី Lexus RZ EV នៅទីផ្សារជប៉ុន ជាផ្នែកមួយក្នុងការប្រឹងប្រែងផលិតរាល់ម៉ូដែលរថយន្តអគ្គិសនីលំដាប់ប្រណិតដែលបានកំណត់គោលដៅត្រឹមឆ្នាំ 2035។

ក្រុមហ៊ុន Toyota ឱ្យដឹងថា ម៉ូដែល SUV អគ្គិសនីនេះមានតម្លៃចាប់ពី 66,000 ដល់ 70,700 ដុល្លារអាម៉េរិក ហើយគ្រោងនឹងដាក់លក់ក្នុងប្រទេសប្រហែល 50 ជាមួយនឹងគោលដៅលក់ឱ្យបានប្រហែល 2,700 គ្រឿងជារៀងរាល់ខែ។

RZ គឺជាម៉ូដែលរថយន្តដំបូងគេរបស់ Lexus ដែលមានតែកំណែអគ្គិសនី។ Toyota បានបញ្ចេញ UX300e ដែលជាកំណែអគ្គិសនីរបស់ម៉ូដែល Lexus មួយដែលដំណើរការដោយម៉ាស៊ីនសាំង កាលពីឆ្នាំ 2020។

Lexus RZ EV មានថ្មដែលអាចផ្ទុកអគ្គិសនីបាន 71.4 គីឡូវ៉ាត់ម៉ោង ជួយឱ្យរថយន្តអាចបរបានប្រហែល 490 គីឡូម៉ែត្របន្ទាប់ពីបញ្ចូលថាមពលមួយពេញ។

Toyota មានគម្រោងដំឡើងស្ថានីយបញ្ចូលថាមពលចំនួន 100 កន្លែង សម្រាប់រថយន្តអគ្គិសនីនៅប្រទេសជប៉ុន ទន្ទឹមនឹងការផ្ដល់សេវាកម្មថ្មីសម្រាប់ម្ចាស់រថយន្តអគ្គិសនីដើម្បីកក់កន្លែងសាក់ថ្មរថយន្តរបស់ពួកគេតាមរយៈកម្មវិធីទូរស័ព្ទឆ្លាតវៃ៕

April 1, 2023

ដីដែនដែលអាចជំនួសក្រុមបាល់ទាត់ជម្រើសជាតិឥណ្ឌូណេស៊ី ចូលប្រកួតវគ្គជម្រុះ World Cup 2026

ក្រុមបាល់ទាត់ជម្រើសជាតិឥណ្ឌូណេស៊ីទំនងជានឹងត្រូវទទួលទណ្ឌកម្មពីសហព័ន្ធបាល់ទាត់ពិភពលោក (FIFA) និងមិនត្រូវបានអនុញ្ញាតឱ្យចូលរួមប្រកួតវគ្គជម្រុះ World Cup 2026។

ប៉ុន្មានថ្ងៃកន្លងទៅនេះ បាល់ទាត់ឥណ្ឌូណេស៊ីត្រូវប្រឈមនឹងព័ត៌មានដែលមិនអាចអាក្រក់ជាងនេះពី FIFA។ បញ្ហាកើតឡើងបន្ទាប់ពីអភិបាលខេត្ត Bali បានជំទាស់ការចូលរួមប្រកួតវគ្គផ្ដាច់ព្រ័ត្រ U-20 World Cup 2023 (ដែលគ្រោងនឹងធ្វើឡើងនៅកោះ Bali) ធ្វើឱ្យ FIFA សម្រេចចិត្តលុបចោលពិធីចាប់លេខចែកពូលសម្រាប់ការប្រកួតដណ្ដើមពានរង្វាន់នេះ។

ថ្មីៗនេះ FIFA បានសម្រេចចិត្តលុបចោលសិទ្ធិក្នុងការប្រារព្ធវគ្គផ្ដាច់ព្រ័ត្រ U20 World Cup 2023 របស់ឥណ្ឌូណេស៊ី។ ប្រការនេះមានន័យថា កូនសិស្ស និងគ្រូបង្វឹក Shin Tae-yong ក្នុងនាមជាក្រុមជម្រើសជាតិឥណ្ឌូណេស៊ី មិនបានចូលរួមព្រឹត្តិការណ៍ World Cup 2023 សម្រាប់វ័យក្រោម 20 ឆ្នាំ។

ប្រធានសហព័ន្ធបាល់ទាត់ឥណ្ឌូណេស៊ី (PSSI) លោក Erick Thohir ទទួលស្គាល់ថា «ឥណ្ឌូណេស៊ីនឹងត្រូវប្រឈមជាមួយនឹងទណ្ឌកម្មធ្ងន់ធ្ងរបំផុតពី FIFA» លោកបន្ថែមថា ក្រុមបាល់ទាត់ជម្រើសជាតិ និងថ្នាក់ក្លឹបរបស់ឥណ្ឌូណេស៊ី ក៏ប្រឈមនឹងហានិភ័យបាត់បង់សិទ្ធិចូលរួមប្រកួតនៅពានរង្វាន់អន្តរជាតិនានា។

«បញ្ហានេះធ្វើឱ្យបាល់ទាត់ឥណ្ឌូណេស៊ីមានការភ័យខ្លាច ព្រោះយើងធ្លាប់បានឆ្លងកាត់វាកាលពីឆ្នាំ 2015 រហូតដល់ឆ្នាំ 2016 ទើបទណ្ឌកម្មត្រូវបានលុបចោល។ ឥណ្ឌូណេស៊ីនឹងត្រូវធ្វើគ្រប់យ៉ាងតែម្នាក់ឯង»។

បើសិនជាការបារម្ភរបស់ប្រធាន PSSI បានកើតឡើងពិតមែន ឥណ្ឌូណេស៊ីនឹងត្រូវប្រឈមនឹងការបាត់បង់សិទ្ធិចូលរួមវគ្គផ្ដាច់ព្រ័ត្រ Asian Cup 2023 ក៏ដូចជាវគ្គជម្រុះ World Cup 2026។

បាល់ទាត់ឥណ្ឌូណេស៊ី និងស្រីលង្កាគឺជាស្ថាប័នដែលទទួលទណ្ឌកម្មពី FIFA ព្រោះតែបានបណ្ដោយឱ្យរដ្ឋាភិបាលជះឥទ្ធិពលមិនល្អ។

ក្រោយពីឥណ្ឌូណេស៊ីត្រូវបានដកហូតសិទ្ធិចូលរួមវគ្គជម្រុះនៅ World Cup 2026 ដែនដីដែលអាចចូលមកជំនួយគឺប្រជុំកោះ Mariana។ ប្រជុំកោះនេះបានចូលជាសមាជិក AFC តាំងពីឆ្នាំ 2020 និងមានលក្ខខណ្ឌគ្រប់គ្រាន់ក្នុងការចូលរួមរាល់ការប្រកួតរបស់តំបន់អាស៊ី។ ប្រជុំកោះ Mariana រួមមានដែនដី Guam របស់សហរដ្ឋអាម៉េរិក និងប្រជុំកោះ Mariana ខាងជើងដែលជាដែនដីសម្ព័ន្ធរបស់សហរដ្ឋអាម៉េរិក នៅមហាសមុទ្រប៉ាស៊ីហ្វ៊ិក៕

April 1, 2023

ស្ថានីយផលិតអគ្គិសនីពីខ្យល់ និងព្រះអាទិត្យធំជាងគេលើលោកស្ថិតនៅកណ្ដាលសមុទ្រខ្សាច់

(ប្រទេសចិន) – ស្ថានីយផលិតអគ្គិសនីពីកម្លាំងខ្យល់ និងកម្ដៅព្រះអាទិត្យ Kubuqi ផ្គត់ផ្គង់អគ្គិសនី 40 ពានលានគីឡូវ៉ាត់ម៉ោង (kWh) ជារៀងរាល់ឆ្នាំ ស្មើនឹង 1/10 នៃការប្រើប្រាស់អគ្គិសនីនៅខេត្ត Hebei ដែលមានប្រជាជន 75 លាននាក់។

ស្ថានីយផលិតអគ្គិសនីពីកម្លាំងខ្យល់ និងកម្ដៅព្រះអាទិត្យធំជាងគេលើលោក Kubuqi កំពុងត្រូវបានស្ថាបនាលើសមុទ្រខ្សាច់ Kubuqi ប្រទេសចិន ក្នុងនោះ គ្រឿងចក្ររាប់រយកំពុងឈូសឆាយពង្រាបដី។ នៅពេលរួចរាល់ជាស្ថាពរ ជាមួយនឹងសមត្ថភាពដែលបានដំឡើង 16 លានគីឡូវ៉ាត់ (kW) ស្ថានីយ Kubuqi អាចផ្គត់ផ្គង់អគ្គិសនី 40 ពាន់លាន kWh ជារៀងរាល់ឆ្នាំ ដល់តំបន់ Beijing, Tianjin និង Hebei ជំនួសឱ្យការដុតធ្យូងថ្មប្រហែល 6 លានតោន និងកាត់បន្ថយឧស្ម័នកាបូនប្រហែល 16 លានតោន។

អគ្គិសនី 40 ពានលាន kWh នេះ ប្រហាក់ប្រហែលនឹង 1/10 នៃបរិមាណអគ្គិសនីដែលបានប្រើប្រាស់ប្រចាំឆ្នាំនៅក្នុងខេត្ត Hebei ជាខេត្តដែលមានប្រជាជនប្រហែល 75 លាននាក់។ គម្រោង Kubuqi បានចាប់ផ្ដើមស្ថាបនាតាំងពីខែធ្នូ 2022។

នៅឯសមុទ្រខ្សាច់ Tengger របស់ខេត្ត Ningxia គម្រោងស្ថានីយអគ្គិសនីព្រះអាទិត្យធំជាងគេនៅប្រទេសចិន ក៏កំពុងត្រូវបានស្ថាបនា។ ពេលរួចរាល់ ស្ថានីយនេះនឹងផលិតអគ្គិសនីបានប្រហែល 5.78 ពាន់លាន kWh ជារៀងរាល់ឆ្នាំ ដែលស្មើនឹង 1/7 នៃស្ថានីយ Kubuqi។

គម្រោង Kubuqi បានចាប់ផ្ដើមស្ថាបនាតាំងពីខែធ្នូ 2022

ចំណែកនៅក្នុងតំបន់ Xinjiang បណ្ដាញអគ្គិសនីចរន្តជាប់ (DC) តង់ស្យុងខ្ពស់ កំពុងនាំយកថាមពលស្អាតទៅកាន់តំបន់ជាច្រើននៅភាគខាងកើតប្រទេសចិន។

ជាសរុប បណ្ដាស្ថានីយផលិតអគ្គិសនីដើរដោយកម្លាំងខ្សល់ និងកម្ដៅថ្ងៃលើសមុទ្រខ្សាច់នៅប្រទេសចិន នឹងមានសមត្ថភាពដែលបានដំឡើង ស្មើនឹង 450 លានគីឡូវ៉ាត់៕

April 1, 2023

Rotwild RX275 ជាកង់អគ្គិសនីឡើងភ្នំមហាស្រាល ប៉ុន្តែតម្លៃវិញក៏ «មិនធម្មតា»

កង់អគ្គិសនីឡើងភ្នំមហាស្រាល Rotwild RX275 មានទម្ងន់មិនដល់ 16 គីឡូក្រាម គឺជាផលិតផលរបស់ក្រុមហ៊ុន Rotwild នៅប្រទេសអាល្លឺម៉ង់។

Rotwild RX275 មានទម្ងន់ត្រឹមតែ 15.86 គីឡូក្រាម ជាទម្ងន់ដែលធ្វើឱ្យកង់ឡើងភ្នំស្ទើរតែទាំងអស់នៅក្នុងបច្ចុប្បន្នត្រូវ «សុំខ្មាស»។ កង់អគ្គិសនីឡើងភ្នំនេះបំពាក់ប្រព័ន្ធផលិតកម្លាំង TQ HPR50 ដែលមានទម្ងន់តែ 1,850 ក្រាម។ កង់អគ្គិសនី Rotwild RX275 មានថាមពល 250 វ៉ាត់ អាចបង្កើនល្បឿនក្នុងរយៈពេល 30 វិនាទី។

ពេលស្ថិតក្នុងការបង្កើនល្បឿន ថាមពលរបស់កង់នេះក៏នឹងកើនដល់ 300 វ៉ាត់ ជួយឱ្យអ្នកជិះឆ្លងផុតកំណាត់ផ្លូវទួលដោយមិនត្រូវលើសកម្លាំង។

Rotwild ផលិតកង់អគ្គិសនី RX275 ជាពីរកំណែ និងមានតម្លៃថ្លៃ។ កំណែស្ដង់ដា Rotwild RX275 Pro មានតម្លៃប្រហែល 10,275 ដុល្លារអាម៉េរិក។ បើសិនចំណាយបន្ថែមប្រហែល 3,000 ដុល្លារទៀត អ្នកនឹងទិញបានកំណែ Rotwild RX275 Ultra ដែលមានតម្លៃ 13,520 ដុល្លារ៕

March 31, 2023

ក្រុមហ៊ុនស្វ៊ីសអភិវឌ្ឍយន្តហោះអ៊ីដ្រូសែនដឹកអ្នកដំណើរ «លឿនជាងសំឡេងប្រាំដង»

ក្រុមហ៊ុន Destinus ទទួលការឧបត្ថម្ភពីក្រសួងវិទ្យាសាស្ត្រអេស្ប៉ាញដើម្បីអភិវឌ្ឍយន្តហោះអ៊ីដ្រូសែនមួយប្រភេទដែលមានល្បឿនលឿនជាងសំឡេងប្រាំដង។

ក្រុមហ៊ុនរបស់ស្វ៊ីស Destinus បានប្រកាសថា ពួកគេកំពុងចូលរួមកម្មវិធីមួយដែលដឹកនាំដោយក្រសួងវិទ្យាសាស្ត្រអេស្ប៉ាញ ដើម្បីអភិវឌ្ឍយន្តហោះល្បឿនលឿនជាងសំឡេងប្រាំដង (hypersonic aircraft) ដែលប្រើប្រាស់ឥន្ធនៈអ៊ីដ្រូសែន។ ក្រៅពី Destinus សាកលវិទ្យាល័យនានានៅអេស្ប៉ាញ ក៏ដូចជាបណ្ដាក្រុមហ៊ុន និងមជ្ឈមណ្ឌលបច្ចេកវិទ្យាក៏ចូលរួមអនុវត្តគម្រោងនេះ។

គម្រោងខាងលើទទួលបានប្រាក់ឧបត្ថម្ភដំបូងពីរដ្ឋាភិបាលអេស្ប៉ាញចំនួន 12 លានអឺរ៉ូ។ ខ្ទង់ប្រាក់នេះនឹងត្រូវប្រើប្រាស់សម្រាប់ការសាងសង់មូលដ្ឋានធ្វើតេស្តម៉ាស៊ីនអ៊ីដ្រូសែននៅក្បែរទីក្រុងម៉ាឌ្រីដ។

ក្រុមហ៊ុនរបស់ស្វ៊ីស Destinus បានធ្វើតេស្តយន្តហោះច្រើនម៉ូដែលនៅក្នុងអំឡុងពីរឆ្នាំកន្លង។ យន្តហោះគំរូដំបូងគឺយន្តហោះមានល្បឿនជិតស្មើនឹងល្បឿនរបស់សំឡេង មានទំហំតូច បញ្ជាពីចម្ងាយ និងមានឈ្មោះថា Jungfrau ដែលធ្វើតេស្តកាលពីឆ្នាំ 2021។ យន្តហោះគំរូដើមទីពីរមានឈ្មោះថា Eiger មានទំហំធំជាងយន្តហោះគំរូទីមួយ និងបានហោះហើរសាកល្បងកាលពីឆ្នាំ 2022។

គោលដៅរបស់ Destinus គឺការផលិតយន្តហោះដែលមានល្បឿនលឿនជាងសំឡេងប្រាំដង (Mach 5) ឬលឿនជាងនេះ។ ល្បឿននេះគឺលឿនជាងឆ្ងាយបើធៀបនឹងយន្តហោះ Concorde ដែលមានល្បឿនលឿនជាងសំឡេងក្រោម ៥ ដង និងបានឈប់ដំណើរការកាលពីឆ្នាំ 2003។ យន្តហោះ Concorde ធ្លាប់ហោះហើរក្នុងល្បឿន Mach 2.04 ដែលលឿនជាងសំឡេងលើសពីពីរដង)។ ល្បឿនរបស់សំឡេងគឺប្រហែល 1,200 គីឡូម៉ែត្រ/ម៉ោង។

តាមផែនការ បច្ចេកវិទ្យារបស់ Destinus នឹងជួយឱ្យការហោះហើរពី Frankfurt (អាល្លឺម៉ង់) ទៅកាន់ Sydney (អូស្ត្រាលី) ចំណាយពេលតែបួនម៉ោងនិង 15 នាទី ជំនួសឱ្យ 20 ម៉ោងនាបច្ចុប្បន្ន។

ថាមពលអ៊ីដ្រូសែន បច្ចុប្បន្នគឺជាប្រធានបទសំខាន់របស់គម្រោងស្រាវជ្រាវ និងអភិវឌ្ឍបច្ចេកវិទ្យាជាច្រើនក្នុងពិភពលោក ដោយសារតែលក្ខណៈ «បៃតង» របស់វា ដោយបំភាយតែកម្ដៅ និងទឹកនៅក្នុងចំហេះរបស់អ៊ីដ្រូសែន៕

March 31, 2023

អតីតគ្រូបង្វឹកថៃ៖ «ការដណ្ដើមមាស SEA Games ចំពោះ U-22 ថៃ គឺមិនពិបាក»

អតីតប្រធានគ្រូបង្វឹកក្រុមបាល់ទាត់ជម្រើសជាតិអាយុក្រោម 23 ឆ្នាំរបស់ប្រទេសថៃ (U-23 ថៃ) វាយតម្លៃខ្ពស់ទៅលើឱកាសដណ្ដើមមេដាយមាសរបស់ U-22 ថៃ នៅក្នុងព្រឹត្តិការណ៍ប្រកួតកីឡាអាស៊ីអាគ្នេយ៍លើកទី 32 (SEA Games 32) ដែលនឹងធ្វើឡើងនៅកម្ពុជានាពេលខាងមុខ។

ទំព័រ Siam Sport របស់ថៃ បានរាយការណ៍ថា លោក Worawut Srimakha អតីតប្រធានគ្រូបង្វឹករបស់ក្រុម U-23 ថៃ ថ្មីៗនេះបានធ្វើការអះអាងដ៏គួរឱ្យចាប់អារម្មណ៍ស្ដីពីឱកាសក្នុងការដណ្ដើមមេដាយមាសនៅ SEA Games 32។

Siam Sport ឱ្យដឹងថា លោក Srimakha វាយតម្លៃខ្ពស់ទៅលើជំនាន់កីឡាករបច្ចុប្បន្នរបស់ថៃ រួមនឹងក្រុមគ្រូបង្វឹក ក្រោយពីការប្រកួតរបស់ «ក្រុមដំរីចម្បាំង» នៅ Doha Cup 2023។

«ខ្ញុំមានតែឱកាសតាមដានការប្រកួតពីរលើករបស់ U-23 ថៃ។ ទទួលស្គាល់ថា ខ្ញុំមានអារម្មណ៍ល្អចំពោះក្រុម U-23 ថៃបច្ចុប្បន្ន ដែលស្ថិតក្រោមការដឹកនាំរបស់គ្រូបង្វឹក Sritaro ជាអ្នកដែលទើបតែបានដឹកនាំក្រុមដណ្ដើមបានចំណាត់ថ្នាក់លេខបួននៅ Doha Cup 2023» លោក Srimakha បានប្រាប់ Siam Sports ដូច្នេះ។

https://www.youtube.com/watch?v=rLJgJdQ1XCE

ក្រុម U-23 ថៃ ប៉ះនឹងក្រុមកាតា នៅ Doha Cup 2023

លោក Srimakha បន្តថា «…ខ្ញុំជឿថា នៅ SEA Games 32 ក្រុម U-22 ថៃ នឹងមិនជួបការលំបាកឡើយ ក្នុងការដណ្ដើមមេដាយមាស»។

លោក Srimakha គឺជាអតីតគ្រូបង្វឹកបាល់ទាត់ដ៏ឆ្នើមរបស់ប្រទេសថៃ និងធ្លាប់បានដឹកនាំ U-23 ថៃ ដណ្ដើមបានតំណែងជើងឯកនៅ SEA Games លើកទី 29 ដែលបានធ្វើឡើងនៅម៉ាឡេស៊ីកាលពីឆ្នាំ 2017៕

យោងតាមម្ចាស់ផ្ទះកម្ពុជា ការចាប់លេខចែកពូលវិញ្ញាសាបាល់ទាត់នៅ SEA Games ទី 32 នឹងត្រូវបានធ្វើឡើងនៅថ្ងៃទី 05 មេសា ក្នុងនោះបាល់ទាត់បុរសនឹងចាប់ផ្ដើមការប្រកួតពីថ្ងៃទី 29 មេសា ឆ្នាំ 2023៕

March 31, 2023

Author: សឿន សំណាង