សឿន សំណាង - La Reine Media

ស៊ីហ្គេមលើកទី 32 ៖ U-22 ថៃ ត្រូវទាត់ «វគ្គផ្ដាច់ព្រ័ត្រមុនគេ» ជាមួយវៀតណាម

យោងតាមកាលបរិច្ឆេទប្រកួតរបស់វិញ្ញាសាបាល់ទាត់នៅស៊ីហ្គេមលើកទី 32 (32^nd SEA Games) ក្រុមជម្រើសជាតិ U-22 របស់ប្រទេសថៃ នឹងប៉ះក្រុមបាល់ទាត់អាយុក្រោម 22 ឆ្នាំរបស់វៀតណាម នៅក្នុងការប្រកួតចុងក្រោយរបស់ពូល B។

U-22 ថៃ ដែលជាក្រុមជើងខ្លាំងមួយនៅអាស៊ីអាគ្នេយ៍ និងវៀតណាមដែលជាជើងឯកស៊ីហ្គេមលើកទី 30 និង 31 សុទ្ធតែត្រូវបានដាក់ចូលទៅក្នុងពូលដែលសម្បូរជើងខ្លាំង រួមមាន ថៃ វៀតណាម ម៉ាឡេស៊ី សិង្ហបុរី និងឡាវ។ រឿងដែល U-22 ថៃត្រូវប្រកួតជាមួយវៀតណាមនៅក្នុងវគ្គចែកពូល គឺជាករណីដែលមានការចាប់អារម្មណ៍ច្រើន។

យោងតាមកាលបរិច្ឆេទនៃការប្រកួត U-22 ថៃ នឹងត្រូវឆ្លងកាត់ឧបសគ្គធំនៅវគ្គចែកពូលនៅពេលត្រូវប្រកួតជាមួយក្រុមខ្លាំងដូចវៀតណាម។ U-22 ថៃនឹងត្រូវប៉ះវៀតណាមនៅជើងចុងក្រោយ នាថ្ងៃទី 11 ឧសភា 2023។ បើសិនជាលទ្ធផលនៃការប្រកួតក្នុងពូល A ប្រហាក់ប្រហែលនឹងសមត្ថភាពដែលក្រុមនីមួយៗមានដូចមុន នោះគេអាចដឹងបានថា ជើងចុងក្រោយនឹងក្លាយជាការប្រកួតផ្ដាច់ព្រ័ត្ររបស់ពូល រវាងថៃ និងវៀតណាម។ ក្រុមដែលដណ្ដើមបានតំណែងម្ចាស់ពូល B នឹងអាចគេចផុតពីការប្រកួតជាមួយក្រុមនាំមុខពូល A (អាចជាឥណ្ឌូណេស៊ី) នៅវគ្គពាក់កណ្ដាលផ្ដាច់ព្រ័ត្រ។

នៅស៊ីហ្គេមលើកទី 30 ក្រុមជម្រើសជាតិថៃក៏ធ្លាប់បានប៉ះនឹងក្រុមវៀតណាម នៅជើងចុងក្រោយនៃវគ្គចែកពូល។ កាលណោះ វៀតណាមបានធ្វើឱ្យថៃត្រូវ «ឆាប់ហាលអាវ» ដោយលទ្ធផល 2-2។ វៀតណាម បន្ទាប់មកក៏ដណ្ដើមបានជ័យជម្នះនៅវគ្គពាក់កណ្ដាលផ្ដាច់ព្រ័ត្រ និងវគ្គផ្ដាច់ព្រ័ត្រ ហើយក៏ទទួលបានមេដាយមាសជាលើកដំបូងនៅស៊ីហ្គេម មុនពេលក្លាយជាជើងឯកជាលើកទីពីរនៅស៊ីហ្គេមលើកទី 31។

April 6, 2023

មកមើល «រ៉ូបូតសុនកលេងបាល់ទាត់» បានយ៉ាងស្ទាត់ជំនាញ

DribbleBot ដែលត្រូវបានអភិវឌ្ឍដោយវិទ្យាស្ថានបច្ចេកវិទ្យា Massachusetts (MIT) អាចលេងបាល់ទាត់នៅលើដីដែលមានសណ្ឋានច្រើនប្រភេទ។

ត្រូវបានអភវិឌ្ឍដោយបន្ទប់ពិសោធន៍ Improbable AI Lab របស់ MIT រ៉ូបូត DribbleBot គឺជាសុនកយន្តជើងបួនអាចបណ្ដើរបាល់ឆ្លងកាត់សណ្ឋានដីច្រើនប្រភេទ មានដូចជា ខ្សាច់ ក្រួស ល្បាប់ និងព្រឹល។ បើសិនដួល រ៉ូបូតនេះអាចក្រឡាប់ខ្លួនក្រោកឈរ និងបន្តបណ្ដើរបាល់។

«បើទោះសមត្ថភាពរបស់ DribbleBot មិនបានដូច Lionel Messi ប៉ុន្តែវានៅតែអាចបណ្ដើរបាល់បានល្អនៅលើដីច្រើនសណ្ឋានដែលមិនរាបស្មើ» សាស្ត្រាចារ្យ Pulkit Agrawal ប្រធានបន្ទប់ពិសោធន៍ Improbable AI Lab បានប្រាប់ Business Insider ដូច្នេះ។

រ៉ូបូតនេះប្រើប្រាស់កញ្ចុំកាមេរ៉ា និងប្រព័ន្ធអង្គញាណនៅខាងមុខ រួមនឹងកាមេរ៉ានៅលើក្បាលដើម្បីមើលទីតាំងបាល់ ខណៈដែលជើងត្រូវប្រើដើម្បីគ្រប់គ្រងបាល់។ DribbleBot អាចលេងបាល់បានតាមរយៈការសរសេរកម្មវិធីលើកុំព្យូទ័រជាមុន ឬត្រូវបានបញ្ជាដោយដៃ។

DribbleBot របស់វិទ្យាស្ថានបច្ចេកវិទ្យា Massachusetts (MIT) អាចលេងបាល់ទាត់នៅលើដីដែលមានសណ្ឋានច្រើនប្រភេទ

យោងតាម Agrawal គោលដៅនៃការផលិតសុនករ៉ូបូតនេះគឺដើម្បីជួយមនុស្សក្នុងការស្វែងរកជនរងគ្រោះនៅលើភូមិសាស្ត្រលំបាកក្នុងការធ្វើដំណើរ។

MIT និងក្រុមហ៊ុនបច្ចេកវិទ្យាមួយចំនួនដូចជា Boston Dynamics, Ghost Robotics ឬ Anybotics ជាដើម បាន និងកំពុងផលិតបណ្ដារ៉ូបូតជើងបួនដើម្បីបម្រើដល់គោលដៅខុសៗគ្នា។ ក្នុងនោះ រ៉ូបូតដែលល្បីឈ្មោះជាងគេគឺរ៉ូបូតរបស់ Boston Dynamics ដែលមាន Spot អាចរត់ លោត ឡើងទួល ឆ្លងកាត់ឧបសគ្គ ចាប់កាន់វត្ថុនានា និងអាចបំពេញការងារប្រចាំថ្ងៃ ចាប់ពីការបើកទ្វារជាដើម។ វាក៏ត្រូវបានប្រើប្រាស់ក្នុងបេសកកម្មល្បាត ជញ្ជូនទំនិញ និងកម្សាន្តផងដែរ៕

April 6, 2023

កប៉ាល់ទេសចរណ៍ខ្នាតយក្ស ប្រៀបដូចទីក្រុងអណ្ដែតលើសមុទ្រ (វីដេអូ)

Disney Wish ដែលជាកប៉ាល់ទេសចរណ៍ថ្មីបំផុត ធំបំផុត និងជាកម្មសិទ្ធិរបស់ក្រុមហ៊ុន Disney Cruise Line អាចដឹកមនុស្ស 5,555 នាក់។

Disney Wish ជាកប៉ាល់ទេសចរណ៍ធំបំផុតនៅក្នុងក្រុមកប៉ាល់ទេសចរណ៍របស់ Disney Cruise Line ដែលជាក្រុមហ៊ុនបុត្រសម្ព័ន្ធរបស់ Walt Disney។ កប៉ាល់នេះត្រូវបានចាប់ផ្ដើមសាងសង់ក្នុងរោងចក្រ Meyer Werft នៅអាល្លឺម៉ង់ កាលពីខែមីនា 2020 និងទើបតែត្រូវបានដាក់ឱ្យដំណើរការកាលពីខែកក្កដា 2022។

កប៉ាល់ទេសចរណ៍ Disney Wish មិនដូចទៅនឹងកប៉ាល់ណាៗទាំងអស់ នៅក្នុងចំណោមកប៉ាល់ដែល Disney Cruise Line ធ្លាប់មាននាពេលកន្លង។ Disney Cruise Line និង Meyer Werft បានចំណាយពេលអស់មួយឆ្នាំកន្លះ ដើម្បីបង្ហើយការងាររចនា និងបច្ចេកទេស មុនពេលចាប់ផ្ដើមការសាងសង់។

កប៉ាល់ទេសចរណ៍ថ្មីនេះត្រូវបានផ្គុំឡើងពីផ្នែកនានាចំនួនជាង 100។ ក្នុងនោះ ផ្នែកនីមួយៗត្រូវបានចែកជាច្រើនចំណែក ហើយមួយចំណែកៗគឺជាខុសគ្នាទាំងស្រុង។ ផ្នែកនីមួយៗតែងតែលាតសន្ធឹងទទឹងកប៉ាល់ និងមានកម្ពស់ពី 3 ទៅ 4 ជាន់។ ជាសរុប ពួកវាមានទម្ងន់ជាង 60 លានគីឡូក្រាម ស្មើនឹងយានអវកាសអាម៉េរិក Shuttle ចំនួន 30 គ្រឿង។

Disney Wish ជាកប៉ាល់ទេសចរណ៍ធំបំផុតនៅក្នុងក្រុមកប៉ាល់ទេសចរណ៍របស់ Disney Cruise Line

Disney Wish មានបណ្ដោយ 341 ម៉ែត្រ ទទឹង 39 ម៉ែត្រ និងកម្ពស់ 67 ម៉ែត្រ។ កប៉ាល់នេះមានបន្ទប់ដេកចំនួន 1,254 រួមនឹងភោជនីយដ្ឋាន តំបន់លេងកម្សាន្តជាច្រើនសម្រាប់មនុស្សគ្រប់វ័យ។ Disney Wish អាចដឹកភ្ញៀវបានរហូតដល់ 4,000 នាក់ និងបុគ្គលិក 1,555 នាក់។

April 6, 2023

ក្រុមបាល់ទះកម្ពុជា «មានប្រវត្តិល្អ» នៅមុនការប្រកួតនៅស៊ីហ្គេមលើកទី 32

បន្ទាប់ពីទទួលបរាជ័យនៅក្នុងការសាកល្បងកម្លាំងនៅលើទឹកដីម៉ាឡេស៊ី គ្រូបង្វឹក Jun Li បានឱ្យក្រុមដែលមានសមាសភាពហាក់ខ្លាំងបំផុតចូលប្រកួត ហើយក៏ដណ្ដើមបានជ័យជម្នះលើក្រុមបាល់ទះចំណាត់ថ្នាក់លេខបួនរបស់ប្រទេសចិន។

នៅចុងខែមីនាកន្លងទៅ ក្រុមបាល់ទះបុរសជម្រើសជាតិកម្ពុជា បានទៅប្រកួតរយៈពេល 6 ថ្ងៃនៅម៉ាឡេស៊ី និងដណ្ដើមបានមេដាយប្រាក់ពីពានរង្វាន់មិត្តភាព Malaysia Tri Nation Invitational Friendly 2023។ នៅទីនេះ ក្រុមប្រយុទ្ធអង្គរបានចាញ់ក្រុមម្ចាស់ផ្ទះម៉ាឡេស៊ីពីរប្រកួតនៅវគ្គដំបូង និងវគ្គផ្ដាច់ព្រ័ត្រ ក្នុងលទ្ធផល 0-3 និង 1-3។

ក៏ប៉ុន្តែ នោះគ្រាន់តែជាការបរាជ័យក្នុងការពិសោធសមាសភាពរបស់ក្រុមកម្ពុជា។ ចំណែកការប្រកួតកាលពីព្រលប់ម្សិលមិញគឺជារឿងដោយឡែក។ នៅចំពោះមុខក្រុមលំដាប់ទីបួននៅ Chinese Volleyball Super League 2022-2023 និងជាជើងឯករង 2014-2015 ក្រុមកម្ពុជាបានបង្ហាញសមត្ថភាពដ៏ខ្លាំងក្លា តាមរយៈការឈ្នះ 4-1 (21-25, 25-15, 25-17, 25-18)។

នៅស៊ីហ្គេមលើកទី 32 ដែលត្រូវប្រកួតលើទីលានម្ចាស់ផ្ទះ កម្ពុជានឹងប្រកួតនៅក្នុងពូល A ជាមួយនឹងម្ចាស់ជើងឯកឥណ្ឌូណេស៊ី និងសិង្ហបុរី។ ក្រុមកម្ពុជាត្រូវការឈ្នះសិង្ហបុរីមួយប្រកួតប៉ុណ្ណោះ នឹងបានឡើងដល់វគ្គពាក់កណ្ដាលផ្ដាច់ព្រ័ត្រ។ ក្នុងការប្រកួតពីរលើកកន្លងទៅថ្មីៗនេះ កម្ពុជាតែងតែឈ្នះសិង្ហបុរី។

ក្រុមបាល់ទះឆ្នេរខ្សាច់កម្ពុជា ឈុត Aនិង B ឈ្នះក្លិបបាល់ទះខេត្តសានតុង ក្នុងការប្រកួតមិត្តភាពអន្តរជាតិ

ចំណែកគូប្រកួតរបស់ក្រុមកម្ពុជានៅវគ្គពាក់កណ្ដាលផ្ដាច់ព្រ័ត្រនឹងជាក្រុមលេខមួយនៅពូល B ដែលរួមមាន ថៃ វៀតណាម មីយ៉ាន់ម៉ា និងម៉ាឡេស៊ី។ ក្រុមដែលត្រូវបានវាយតម្លៃខ្ពស់ជាងគេនៅពូល B គឺវៀតណាម ដែលជាម្ចាស់មេដាយប្រាក់នៅស៊ីហ្គេមលើកទី 31ប៉ុន្តែ នេះគ្រាន់តែជាការវាយតម្លៃមុនការប្រកួតតែប៉ុណ្ណោះ។

កាលពីឆ្នាំ 2017 ក្រុមបាល់ទះជ្រើសជាតិកម្ពុជា បានឈ្នះវៀតណាម 3-0 នៅលើទឹកដីសិង្ហបុរី។ នៅស៊ីហ្គេមលើកទី 31 កម្ពុជាបានឈ្នះថៃនៅក្នុងការប្រកួតដណ្ដើមមេដាយសំរឹទ្ធ ក្នុងលទ្ធផល 3-2។

April 6, 2023

«ជ្រូកព្រៃយក្ស» កំពុងដណ្ដើមកាន់កាប់ទឹកដីនៅកាណាដា

ចំនួនសត្វជ្រូកយក្សនៅក្នុងតំបន់មួយចំនួនរបស់ប្រទេសកាណាដា មានដូចជា Manitoba និង Saskatchewan ជាដើម បានកើនឡើងរហូតដល់ថ្នាក់ធ្វើឱ្យការកម្ចាត់លែងមានប្រសិទ្ធភាព។

បច្ចុប្បន្ន ជ្រូកព្រៃយក្សកំពុងគំរាមកំហែងដល់ទឹកដីភាគខាងជើងរបស់សហរដ្ឋអាម៉េរិក ជាប់ព្រំដែនកាណាដា នេះបើតាម Interesting Engineering ចុះផ្សាយកាលពីថ្ងៃទី 04 មេសា។ ជ្រូកយក្សពុំមែនជាអម្បូរសត្វថ្មី ឬទាក់ទងនឹងការកែសម្រួលហ្សែននៅក្នុងបន្ទប់ពិសោធន៍។ មូលហេតុដែលត្រូវបានគេហៅថា ជ្រូកយក្ស ក៏ព្រោះតែទំហំដងខ្លួន និងសមត្ថភាពរក្សាជីវិតរបស់ពួកវានៅក្នុងអាកាសធាតុត្រជាក់ខ្លាំងនៅកាណាដា។ ជ្រូកយក្សមួយក្បាលអាចមានទម្ងន់រហូតដល់ 300 គីឡូក្រាម និងអាចរស់នៅជាមួយអាកាសធាតុត្រជាក់ -50 អង្សាសេ ដោយការកាយរូងជម្រៅពីរម៉ែត្រខាងក្រោមព្រឹល។ បច្ចុប្បន្ន ពួកវារស់នៅលើទឹកដីទំហំជិត 1.7 លានគីឡូម៉ែត្រការ៉េ។

ជ្រូកយក្សគឺជាលទ្ធផលនៃការពិសោធបង្កាត់ពូជរវាងជ្រូកព្រៃពីអឺរ៉ុប និងជ្រូកស្រុកនៅកាណាដា។ ក្រុមអ្នកបង្កាត់ពូជមានបំណងធ្វើពិពិធកម្មវិស័យឧស្សាហកម្មចិញ្ចឹមសត្វ និងបង្កើតប្រភេទជ្រូកដែលអាចរស់នៅក្នុងរដូវត្រជាក់ខ្លាំង។ មុននេះប្រហែលពីរទសវត្សរ៍ ប្រជាកសិករនាំគ្នាលែងជ្រូកយក្សរបស់ពួកគេចូលទៅក្នុងព្រៃ ដោយសារតែតម្រូវការសាច់ជ្រូកបានធ្លាក់ចុះខ្លាំង។ ច្រើនឆ្នាំក្រោយមក ពួកវាក៏មានចំនួនកាន់តែច្រើន និងក្លាយជាជ្រូកព្រៃយក្ស ដែលកំពុងគំរាមកំហែងដល់ទីក្រុងធំៗនៅកាណាដា។

ដើម្បីរកវិធីសមស្របសម្រាប់ការកាត់បន្ថយកំណើននៃចំនួនជ្រូកព្រៃយក្ស ដំបូងអ្នកស្រាវជ្រាវត្រូវដឹងថា ពួកវាកំពុងរាលដាលដល់ទីណា និងដោយវិធីណា។ ដូច្នេះ Brook និងសហការីក៏បានបង្កើតផែនទីដែលបង្ហាញពីវត្តមានរបស់ជ្រូកព្រៃយក្ស ក្នុងរយៈពេលច្រើនឆ្នាំកន្លង។ ថ្មីៗនេះ លោក Brook បានចែករំលែករូបថតនៅលើបណ្ដាញសង្គម បង្ហាញថា ជ្រូកព្រៃយក្សបង្ហាញខ្លួនជាង 54,000 លើក។ Brook សង្កត់ធ្ងន់ថា ចំនួនសត្វជ្រូកព្រៃយក្សកើនឡើងច្រើនជាងគេនៅតំបន់ក្បែរ Edmonton ធ្វើឱ្យមានការបារម្ភថា ពួកវានឹងចូលឈ្លានពានទីក្រុង។

ជ្រូកព្រៃយក្សតែងធ្វើដំណើរជាហ្វូង អាចឡើងដល់រាប់សិបក្បាល ធ្វើឱ្យហានិភ័យគ្រោះថ្នាក់ចរាចរណ៍ ក៏ដូចជាការខាតបងដំណាំកើនឡើងខ្ពស់។

ចំនួនជ្រូកព្រៃយក្សនៅបណ្ដាតំបន់ដូចជា Manitoba និង Saskatchewan ជាដើមរបស់កាណាដា បានកើនឡើងដល់កម្រិតខ្ពស់ខ្លាំង ធ្វើឱ្យការកម្ចាត់លែងមានប្រសិទ្ធភាព។ បច្ចុប្បន្ន ការចូលកាន់កាប់របស់ហ្វូងជ្រូកព្រៃយក្សនៅតំបន់ព្រំដែនជាប់នឹងទឹកដីអាម៉េរិក គឺគ្រាន់តែជាបញ្ហាពេលវេលាប៉ុណ្ណោះ៕

April 6, 2023

ការបើកបរសាកល្បងដ៏ធំអស្ចារ្យជាមួយរថយន្ត Ford Ranger ស៊េរីថ្មីឆ្នាំ 2023 បានត្រលប់មកវិញហើយ !

កុំភ្លេចជួបគ្នានៅថ្ងៃទី 08-09 មេសា 2023 ម៉ោង 09 ព្រឹក – 04 ល្ងាច នៅបរិវេណសណ្ឋាគារ ហ្គាឌិនស៊ីធី (ផ្លូវ លី យ៉ុងផាត់)។ ចូលរួមទាំងអស់គ្នា ដើម្បីទទួលយកបទពិសោធន៍ដ៏អស្ចារ្យក្នុងការបើកបរឆ្លងកាត់ឧបសគ្គគ្រប់ស្ថានភាពផ្លូវ ជាមួយការប្រើប្រាស់បច្ចេកវិទ្យាទំនើបៗនៃរថយន្ត Next-Generation Ford Ranger ស៊េរីថ្មីឆ្នាំ 2023 ។

អ្នកបើកបរសាកល្បង នឹងទទួលបានសំបុត្រចូលទស្សនាសួនសត្វភ្នំពេញសាហ្វារី ឬ សួនទឹកហ្គាឌិនស៊ីធី ដោយឥតគិតថ្លៃ !

ទំនាក់ទំនងចុះឈ្មោះចូលរួម៖ 078 333 748 | 016 333 785 ; លក្ខខណ្ឌផ្សេងៗត្រូវបានអនុវត្ត។

សម្រាប់ទីតាំង សូមចុចលើតំណភ្ជាប់មួយនេះ https://goo.gl/maps/ur 4 gDXQagDHaYCuF 8

April 5, 2023

កម្ពុជាអាចមានឱកាសក្លាយជា «ជើងឯករង» នៅស៊ីហ្គេមលើកទី 32

អ្នកគាំទ្ររបស់កម្ពុជាមួយចំនួនបានបង្ហាញសុឆន្ទៈបន្ទាប់ពីលទ្ធផលនៃការចាប់ឆ្នោតចែកពូលសម្រាប់បាល់ទាត់បុរសនៅស៊ីហ្គេមលើកទី 32 (32^nd SEA Games) ត្រូវបានបង្ហាញ។

ល្ងាចថ្ងៃទី 05 មេសានេះ ពិធីចាប់ឆ្នោតចែកពូលសម្រាប់វិញ្ញាសាបាល់ទាត់បុរសរបស់ស៊ីហ្គេមលើកទី 32 ត្រូវបានធ្វើឡើង។ ក្នុងនោះ ក្រុមម្ចាស់ផ្ទះកម្ពុជាត្រូវស្ថិតនៅក្នុងពូល A ដែលមាន U-22 ឥណ្ឌូណេស៊ី មីយ៉ាន់ម៉ា ហ្វ៊ីលីពីន និងទីម័រខាងកើត ក្នុងនោះ ឥណ្ឌូណេស៊ីគឺជាក្រុមខ្លាំង។ ចំណែកពូល B វិញ មាន វៀតណាម ថៃ ម៉ាឡេស៊ី សិង្ហបុរី និងឡាវ ក្នុងនោះ ក្រុមវៀតណាម និងថៃត្រូវបានវាយតម្លៃខ្ពស់ជាងគេ។

លទ្ធផលនៃការចាប់ឆ្នោតដែលបង្ហាញថា ជើងខ្លាំងវៀតណាម និងថៃនៅក្នុងពូលជាមួយគ្នា។ ប្រការនេះធ្វើឱ្យអ្នកគាំទ្រកម្ពុជាមួយចំនួនជឿថា U-22 កម្ពុជាអាចមានឱកាសឡើងដល់វគ្គផ្ដាច់ព្រ័ត្រ បើទោះជាអាចត្រូវប៉ះ ថៃ ឬវៀតណាមនៅវគ្គពាក់កណ្ដាលផ្ដាច់ព្រ័ត្រ។

សូមបញ្ជាក់ថា វិញ្ញាសាបាល់ទាត់បុរសនៅស៊ីហ្គេមលើកទី 32 (32^nd SEA Games) នឹងត្រូវចាប់ផ្ដើមការប្រកួតពីថ្ងៃទី 29 មេសា 2023។

April 5, 2023

លទ្ធផលនៃការចាប់ឆ្នោតចែកពូល «វិញ្ញាសាបាល់ទាត់នារី» សម្រាប់ស៊ីហ្គេមលើកទី 32 នៅកម្ពុជា

វិញ្ញាសាបាល់ទាត់នារីសម្រាប់ស៊ីហ្គេមលើកទី 32 (32^nd SEA Games) នឹងត្រូវចាប់ផ្ដើមការប្រកួតពីថ្ងៃទី 29 មេសា ដល់ 16 ឧសភា 2023។

ស៊ីហ្គេមលើកនេះ មានក្រុមបាល់ទាត់នារីជម្រើសជាតិចំនួន 9 ក្រុមចូលរួម ច្រើនជាងពីរក្រុមធៀបនឹងស៊ីហ្គេមលើកទី 31 ដែលមានតែ 7 ក្រុម។ ប៉ុន្តែ លើកនេះក៏មិនមានក្រុមរបស់ព្រុយណេ និងទីម័រខាងកើត។

លទ្ធផលនៃការចាប់ឆ្នោតចែកពូលវិញ្ញាសាបាល់ទាត់នារីសម្រាប់ស៊ីហ្គេមលើកទី 32 បង្ហាញថា កម្ពុជាស្ថិតក្នុងពូល B ជាមួយ ថៃ សិង្ហបុរី ឡាវ។ ចំណែកពូល A មាន វៀតណាម ហ្វ៊ីលីពីន មីយ៉ាន់ម៉ា ម៉ាឡេស៊ី ឥណ្ឌូណេស៊ី។

April 5, 2023

ស៊ីហ្គេមទី 32៖ លទ្ធផលនៃការចាប់ឆ្នោតចែកពូលសម្រាប់វិញ្ញាសាបាល់ទាត់បុរស

លទ្ធផលនៃការចាប់ឆ្នោតចែកពូលសម្រាប់វិញ្ញាសាបាល់ទាត់បុរសនៃព្រឹត្តិការណ៍ប្រកួតកីឡាអាស៊ីអាគ្នេយ៍លើកទី 32 នៅកម្ពុជា បង្ហាញថា កម្ពុជាស្ថិតក្នុងពូល A ជាមួយ ឥណ្ឌូណេស៊ី មីយ៉ាន់ម៉ា ហ្វ៊ីលីពីន និងទីម័រខាងកើត។

ដោយឡែកសម្រាប់ពូល B វិញ រួមមាន វៀតណាម ថៃ ម៉ាឡេស៊ី សិង្ហបុរី និងឡាវ។ ចំណែកព្រុយណេដែលជាសមាជិកអាស៊ាន បានដកខ្លួនពីស៊ីហ្គេមលើកទី 32 នេះ។

ស៊ីហ្គេមលើកទី 32 នឹងប្រារព្ធឡើងចាប់ពីថ្ងៃទី 05 ដល់ 17 ឧសភា 2023 នៅកម្ពុជា។ បាល់ទាត់បុរសនឹងជាវិញ្ញាសាដែលត្រូវចាប់ផ្ដើមការប្រកួតមុនគេ ពោលគឺពីថ្ងៃទី 29 មេសា។

នៅក្នុងព្រឹត្តិការណ៍ស៊ីហ្គេមលើកនេះ បាល់ទាត់បុរសនឹងតម្រូវឱ្យមានតែកីឡាករដែលមានអាយុក្រោម 22 ឆ្នាំ (U-22) មិនដូចទៅនឹងស៊ីហ្គេមលើកទី 31 នៅវៀតណាម ដែលអនុញ្ញាតឱ្យប្រើប្រាស់ U-23 និងបូកកីឡាករលើសអាយុបីរូប។

April 5, 2023

ឥណ្ឌូណេស៊ី «បញ្ចុះអត្រាពន្ធចំពោះការទិញរថយន្តអគ្គិសនី» មកនៅត្រឹម «មួយភាគរយ»

យោងតាមទំព័រ Reuters ឥណ្ឌូណេស៊ីបានបញ្ចុះអត្រាពន្ធលើតម្លៃបន្ថែម (VAT) ចំពោះរថយន្តអគ្គិសនីប្រើថ្មផ្ទុកថាមពល ពី 11% ចុះមកនៅត្រឹម 1% ដើម្បីលើកទឹកចិត្តឱ្យមានការប្រើប្រាស់រថយន្តអគ្គិសនី។

រដ្ឋាភិបាលឥណ្ឌូណេស៊ីបានប្រកាសពីការបញ្ចុះអត្រាពន្ធនេះកាលពីថ្ងៃទី 03 មេសា ក្នុងគ្រាដែលប្រទេសនេះកំពុងប្រឹងប្រែងទាក់ទាញការវិនិយោគសម្រាប់ការផលិតយានយន្តអគ្គិសនីក្នុងស្រុក។ ក្រសួងកិច្ចការសមុទ្រ និងវិនិយោគឥណ្ឌូណេស៊ីបានប្រកាសថា ការផ្ដល់ជូននេះមានសុពលភាពចាប់ពីខែនេះរហូតដល់ដំណាច់ឆ្នាំ 2023។

ការបញ្ចុះអត្រាពន្ធលើតម្លៃបន្ថែមនេះក៏ត្រូវបានអនុវត្តចំពោះរថយន្តក្រុងមួយចំនួនដែលដំណើរការដោយថាមពលអគ្គិសនីផងដែរ។

ឥណ្ឌូណេស៊ីកំពុងតែជំរុញការប្រឹងប្រែងក្នុងការស្រូបទាញទុនវិនិយោគទៅក្នុងវិស័យផលិតថ្មផ្ទុកថាមពលសម្រាប់យានយន្តអគ្គិសនីក្នុងប្រទេស ដើម្បីទាញយកប្រយោជន៍ពីភាពសម្បូររ៉ែនីកែល ដែលជាវត្ថុធាត់សំខាន់សម្រាប់ការផលិតថ្មផ្ទុកអគ្គិសនី របស់ប្រទេសនេះ។

ក្រុមមន្ត្រីពាក់ព័ន្ធនៅឥណ្ឌូណេស៊ី បាន និងកំពុងព្យាយាមអូសទាញការវិនិយោគពីក្រុមអ្នកផលិតរថយន្តអគ្គិសនីធំៗ មានជាអាទិ៍ Tesla របស់អាម៉េរិក និង BYD របស់ចិន។ ចំណែក LG និង Hyundai បានចាប់ផ្ដើមសាងសង់បណ្ដារោងចក្រផលិតថ្មផ្ទុកថាមពលនៅប្រទេសនេះរួចហើយ។

កាលពីខែមុន ឥណ្ឌូណេស៊ីបានឱ្យដឹងថា នឹងបែងចែកប្រាក់ 466.77 លានដុល្លារអាម៉េរិកនៅក្នុងមូលនិធិជាតិដើម្បីឧបត្ថម្ភដល់ការលក់ម៉ូតូអគ្គិសនីរហូតដល់ឆ្នាំ 2024៕

April 5, 2023

Author: សឿន សំណាង