សឿន សំណាង - La Reine Media

គ្រូបង្វឹកឥណ្ឌូណេស៊ី «ដេកមិនលក់ បក់មិនល្ហើយ» ពេល Ronaldo មិនទាន់ប្រាកដថា ទាត់នៅស៊ីហ្គេម

គ្រួបង្វឹក Indra Sjafri ទទួលស្គាល់ថា លោកមិនទាន់ទទួលបានចម្លើយពី Ronaldo Kwateh បន្ទាប់ពីបានកោះហៅកម្លាំងបន្ថែម 7 នាក់ទៀតពីក្រុម U-20 ឱ្យឡើងមកកាន់ U-22 ដើម្បីចូលរួមប្រកួតនៅស៊ីហ្គេមលើកទី 32 ដែលនឹងធ្វើឡើងនៅកម្ពុជានាពេលខាងមុខ។

ថ្មីៗនេះ ទំព័រ Bola Times របស់ឥណ្ឌូណេស៊ី បានធ្វើឱ្យមានការភ្ញាក់ផ្អើលនៅពេលសរសេរថា «Ronaldo Kwateh មិនទទួលយកការកោះហៅមកកាន់ក្រុម U-22 ឥណ្ឌូណេស៊ី តើគាត់មិនចាប់អារម្មណ៍ដល់ការប្រកួតនៅស៊ីហ្គេម 2023?»។

កន្លងទៅថ្មីៗនេះ ដើម្បីត្រៀមខ្លួនសម្រាប់ការដណ្ដើមមេដាយមាសនៅស៊ីហ្គេមលើកទី 32 គ្រូបង្វឹករបស់ U-22 ឥណ្ឌូណេស៊ីលោក Indra Sjafri បានពិភាក្សាជាមួយគ្រូបង្វឹក Shin Tae Yong ដើម្បីធ្វើការកោះហៅកីឡាករ 7 នាក់នៅ U-20 ឱ្យឡើងមកកាន់ U-22 របស់ប្រទេសនេះ ក្នុងនោះមាន Ronaldo Kwateh, Hokky Caraka, Daffa Fasya, Muhamamad Ferrari, Doni Tri Pamungkas, Ahmad Maulana និង Marselino Ferdinan។

ក៏ប៉ុន្តែ ទំព័រ Bola Times ដកស្រង់សម្ដីរបស់លោក Indra Sjafri ឱ្យដឹងថា រហូតមកដល់ពេលនេះ លោកមិនទាន់ទទួលបានការឆ្លើយតបណាមួយពី Ronaldo Kwateh នៅឡើយ ក្រោយពីបានកោះហៅឱ្យមកកាន់ U-22 ឥណ្ឌូណេស៊ី ដើម្បីត្រៀមធ្វើដំណើរមកកម្ពុជា។

Ronaldo Kwateh គឺជាកីឡាករវ័យក្មេងជាងគេដែលធ្លាប់បានចូលរួមប្រកួតនៅស៊ីហ្គេមលើកទី 31 នៅវៀតណាម។ Ronaldo Kwateh ធ្លាប់ចូលប្រកួតនៅពានរង្វាន់ជើងឯកថ្នាក់ជាតិឥណ្ឌូណេស៊ីពេលមានអាយុទើបតែ 16 ឆ្នាំ។ បច្ចុប្បន្ន កីឡាកររូបនេះកំពុងទាត់ឱ្យក្លឹប Bodrumspor នៅប្រទេសតួកគី។

ទន្ទឹមនឹង Ronaldo Kwateh កីឡាករបីរូបផ្សេងទៀតដែលកំពុងទាត់ឱ្យក្លឹបបរទេស និងត្រូវបានកោះហៅ ក៏មិនទាន់មានការឆ្លើយតបនៅឡើយដែរ ព្រោះកំពុងបំពេញការងាររបស់ពួកគេ។ ក៏ប៉ុន្តែ យោងតាមសហព័ន្ធបាល់ទាត់ឥណ្ឌូណេស៊ី (PSSI) បច្ចុប្បន្នមានកីឡាករបីនាក់ក្នុងចំណោម 7 នាក់នៅក្រុម U-20 ដែលត្រូវបានកោះហៅ បានមកដល់ប្រទេសកាលពីថ្ងៃទី 02 មេសា រួមមាន Hokky Caraka, Made Tito Wiratama និង Daffa Fasya៕

April 7, 2023

ទ័ពអាកាសអាម៉េរិកចង់ទិញយន្តហោះចម្បាំងចំនួនច្រើនគ្រឿងមិនធ្លាប់មាន

ទ័ពអាកាសរបស់សហរដ្ឋអាម៉េរិក រៀបផែនការបញ្ជាទិញយន្តហោះចម្បាំងថ្មីចំនួន 72 គ្រឿងក្នុងឆ្នាំ 2024 ដើម្បីធ្វើទំនើបកម្មទ័ពអាកាស ដែលនេះគឺជាចំនួនដ៏ច្រើនមិនធ្លាប់មានក្នុងអំឡុងរាប់សិបឆ្នាំកន្លង។

សំណើនេះត្រូវបានឧត្តមសេនីយ៍ឯក Richard Moore មេបញ្ជាការរងទ័ពអាកាសអាម៉េរិក លើកឡើងនៅមុខសភាកាលពីថ្ងៃទី 06 មេសា ដើម្បីធ្វើការពិនិត្យសម្រេចចំពោះគម្រោងថវិកាសម្រាប់ឆ្នាំបន្ទាប់។ យោងតាមសំណើនេះ ទ័ពអាកាសអាម៉េរិកចង់បានយន្តហោះចម្បាំងបំបាំងកាយ F-35A ចំនួន 48 គ្រឿង និង F-15EX ចំនួន 24 បន្ថែមទៀត នៅក្នុងឆ្នាំសារពើពន្ធ 2024។

«នេះគឺជាលើកដំបូងហើយដែលទ័ពអាកាសអាម៉េរិកស្នើទិញយន្តចម្បាំងច្រើនបែបនេះ រាប់ចាប់តាំងពីខ្ញុំធ្វើការក្នុងជួរកងទ័ព» ឧត្តមសេនីយ៍ឯក Moore និយាយដូច្នេះ និងបន្តថា សំណើនេះនឹងមិនត្រូវធ្វើឡើងតែម្ដងឡើយ តែនឹងត្រូវធ្វើឡើងវិញនៅក្នុងបណ្ដាឆ្នាំខាងមុខ។

ក្រុមមេដឹកនាំ និងមេបញ្ជាការទ័ពអាកាសអាម៉េរិក ច្រើនឆ្នាំមកនេះបានបញ្ជាក់ថា ទ័ពអាកាសត្រូវការទិញយន្តហោះចម្បាំងថ្មីចំនួន 72 គ្រឿងជារៀងរាល់ឆ្នាំ ដើម្បីធ្វើទំនើបកម្មកងកម្លាំង ក៏ដូចជាកាត់បន្ថយអាយុកាលមធ្យមរបស់យន្តហោះ។ បើសិនមិនដូច្នោះទេ ពួកគេនឹងមិនមានយន្តហោះគ្រប់គ្រាន់ដើម្បីផ្លាស់ប្ដូរយន្តហោះចាស់ និងជិតត្រូវបានដាក់ឱ្យចូលនិវត្តន៍ ដូច F-15C ជាដើម។

ក៏ប៉ុន្តែ សភាអាម៉េរិក ច្រើនឆ្នាំកន្លងបានយល់ព្រមឱ្យទិញយន្តហោះចម្បាំងតិចជាងការចង់បានរបស់ទ័ពអាកាសប្រទេសនេះ។ ក្នុងឆ្នាំសារពើពន្ធ 2023 សភាអាម៉េរិកអនុម័តឱ្យទិញតែ 67 គ្រឿងប៉ុណ្ណោះ ដែលរួមមាន 43 គ្រឿងជា F-35A និង 24 គ្រឿងជា F-15EX៕

April 7, 2023

បុគ្គលិកផ្នែកលាងចានបង្កការភ្ញាក់ផ្អើល ព្រោះជិះឡានទំនើបទៅធ្វើការរាល់ថ្ងៃ

(ប្រទេសចិន) – ស្ត្រីម្នាក់ធ្វើឱ្យអ្នកលេងបណ្ដាញសង្គមត្រូវបើកភ្នែកធំៗ ព្រោះនៅតែទៅបំពេញការងារជាអ្នកលាងចានឱ្យភោជនីយដ្ឋានមួយនៅទីក្រុង Chengdu បើទោះគ្រួសារមានជីវភាពធូរធារ និងមានទាំងរថយន្តប្រណិត Bentley។

នៅក្នុងវីដេអូដែលត្រូវបានចែករំលែកតគ្នាលើបណ្ដាញសង្គមនៅប្រទេសចិន ស្ត្រីវ័យកណ្ដាលម្នាក់ មានសក់ស្កូវ ពាក់អៀម និងស្រោមដៃកៅស៊ូ ឈានជើងចេញពីរថយន្ត Bentley Mulsanne ពណ៌ខ្មៅដែលចតនៅខាងមុខហាងស៊ុបមួយក្នុងទីក្រុង Chengdu ខេត្ត Sichuan កាលពីថ្ងៃទី 01 មេសា។

«នៅផ្ទះធុញណាស់។ ខ្ញុំមានអារម្មណ៍មិនល្អបើសិនមិនបានលាងចានមួយថ្ងៃ» ស្ត្រីខាងលើបកស្រាយពីមូលហេតុដែលគាត់នៅតែធ្វើជាអ្នកលាងចាន។

ម្ចាស់ហាងស៊ុបនេះបានឱ្យដឹងថា គ្រួសារបុគ្គលិករូបនេះមានជីវភាពធូរធារ ហើយអ្នកស្រីចង់មកធ្វើការដើម្បីកំដរពេលវេលា។ អ្នកបើកបរដែលជាកូនស្រីរបស់ស្ត្រីខាងលើនិយាយថា មិនអាចឃាត់ម្ដាយធ្វើអ្វីដែលគាត់ចង់ ទើបជួយបើកឡានជូនគាត់ទៅធ្វើការ និងមកទទួលគាត់ជារៀងរាល់ថ្ងៃ។

អ្នកលេងបណ្ដាញសង្គមសម្ដែងការកោតសរសើរចំពោះភាពឧស្សាហ៍ «អ្នកមានលាងចាន» ខាងលើ ហើយអ្នកខ្លះចាត់ទុកថា អ្នកស្រីគឺជាគំរូល្អ ជាប្រភពកម្លាំងចិត្ត៕

April 7, 2023

យន្តហោះអវកាសបំពាក់ម៉ាស៊ីនរ៉ុក្កែតដំបូងគេលើលោក ទទួលបានជោគជ័យក្នុងការហោះហើរសាកល្បង

Dawn Aerospace ដែលជាក្រុមហ៊ុនអវកាសមានទីស្នាក់ការកណ្ដាលនៅនូវែលសេឡង់ សម្រេចបានជំហានសំខាន់មួយនៅពេលយន្តហោះគន្លងគោចរកម្រិតទាប Mk-II Aurora របស់ពួកគេ បានហោះឡើងដោយជោគជ័យជាមួយនឹងម៉ាស៊ីនរ៉ុក្កែត។

កាលពីថ្ងៃទី 05 មេសា ក្រុមហ៊ុន Dawn Aerospace ដែលមានការិយាល័យនៅនូវែលសេឡង់ ហូឡង់ និងសហរដ្ឋអាម៉េរិក ប្រកាសថា សម្រេចបានការហោះហើរសាកល្បងម៉ាស៊ីនរ៉ុក្កែតដំបូងរបស់យន្តហោះអវកាស Mk-II Aurora។ ជើងហោះហើរត្រូវបានធ្វើឡើងពីថ្ងៃទី 29 ដល់ 31 មីនា 2023 ដោយហោះចេញពីព្រលានយន្តហោះ Glentanner។ Dawn Aerospace គឺជាមួយក្នុងចំណោមក្រុមហ៊ុនអវកាសឯកជនដែលរីកចម្រើនឆាប់រហ័សជាងគេលើពិភពលោក ដោយមានផ្កាយរណប 11 គ្រឿងកំពុងធ្វើសកម្មភាពលើគន្លងតារាវិថី។

នៅមុនការធ្វើតេស្តនេះ Mk-II Aurora បានហោះហើរដោយប្រើប្រាស់ម៉ាស៊ីនយន្តហោះ។ ការសាកល្បងកាលពីសប្ដាហ៍កន្លងគឺជាការហោះហើរដំបូងដែលប្រើប្រាស់ម៉ាស៊ីនរ៉ុក្កែតផ្ទាល់ខ្លួនរបស់ Dawn Aerospace។ យោងតាម Dawn Aerospace ការធ្វើតេស្តនេះដំណើរការដោយរលូន។ ក្នុងជើងហោះហើរដំបូងៗ យន្តហោះនេះហោះឡើងដល់កម្ពស់ 1,829 ម៉ែត្រ និងល្បឿន 314 គីឡូម៉ែត្រ/ម៉ោង ប្រហាក់ប្រហែលនឹងលទ្ធផលនៃការធ្វើតេស្តមុននោះដែលប្រើម៉ាស៊ីនយន្តហោះប្រភេទប្រតិកម្មរហ័ស។

Mk-II Aurora គឺជាយន្តហោះអវកាសបញ្ជាពីចម្ងាយ និងអាចបំពេញបេសកកម្មហោះហើរទៅកាន់ទីអវកាសក្បែរគន្លងតារាវិថី ហើយចុះចតលើផ្លូវរត់នៅព្រលានយន្តហោះ ដូចទៅនឹងយន្តហោះប្រតិកម្មរហ័សធម្មតា។

យន្តហោះអវកាស Mk-II Aurora របស់ក្រុមហ៊ុន Dawn Aerospace

ក្នុងអនាគត យន្តហោះអវកាសនេះនឹងអាចដឹកទំនិញឡើងទៅកាន់គន្លងគោចរកម្រិតទាបរបស់ផែនដីជាច្រើនជើងក្នុងមួយថ្ងៃ។ បន្ទាប់ពីបានជោគជ័យក្នុងកម្មវិធី Mk-II Aurora ក្រុមហ៊ុន Dawn Aerospace មានផែនការផលិត Mk-III ដែលមានពីរជាន់ ក្នុងនោះជាន់ទីពីរអាចផ្ដាច់ខ្លួន អាចដឹកទំនិញទម្ងន់មួយតោន ឬដឹកផ្កាយរណបទម្ងន់ 250 គីឡូក្រាមឡើងទៅកាន់គន្លងគោចរកម្រិតទាបរបស់ផែនដី។ យោងតាម CEO Stefan Powell Mk-III នឹងត្រូវបានផលិតឡើងដើម្បីអាចប្រើប្រាស់ឡើងវិញបាន 96%។

ការធ្វើតេស្តលើកក្រោយ Mk-II Aurora នឹងហោះហើរខ្ពស់ជាងការសាកល្បងលើកនេះ។ ក្នុងសកម្មភាពពាណិជ្ជកម្មនាពេលអនាគត យន្តហោះអវកាសនេះនឹងហោះដល់កម្ពស់ 100 គីឡូម៉ែត្រ ហើយនឹងអាចក្លាយជាយានដំបូងគេដែលហោះហើរបានពីរជើងក្នុងមួយថ្ងៃ៕

April 7, 2023

អតីតគ្រូបង្វឹកបាល់ទាត់ U-22 ថៃ «ខ្លាច» ម៉ាឡេស៊ី គ្រាដែលឥណ្ឌូណេស៊ី «ខ្លាច» កម្ពុជា

អតីតគ្រូបង្វឹករបស់ក្រុមបាល់ទាត់ជម្រើសជាតិថៃ Wittaya Laohakul បានបង្ហើបឱ្យដឹងអំពីក្រុមដែលអាចជាបេក្ខភាពលំដាប់កំពូលសម្រាប់មេដាយមាសនៅស៊ីហ្គេមលើកទី 32 ក្នុងពេលដែល គ្រូបង្វឹករបស់ឥណ្ឌូណេស៊ី បែរជាខ្លាចចាញ់កម្ពុជាទៅវិញ។

យោងតាមទំព័រ Siam Sport នៅប្រទេសថៃ អតីតគ្រូបង្វឹក Wittaya Laohakul អះអាងថា ខ្លួនលោកមិនបារម្ភទេនៅពេល U-22 ថៃ ត្រូវប៉ះ U-22 វៀតណាមយ៉ាងឆាប់នៅវគ្គចែកពូល។ ប៉ុន្តែ លោកយល់ថា U-22 ម៉ាឡេស៊ី ទើបជាគ្រោះថ្នាក់ដែលក្រុមថៃត្រូវតែប្រុងប្រយ័ត្នជាងគេ។

«…បេក្ខភាពទីមួយសម្រាប់មេដាយមាសរបស់វិញ្ញាសាបាល់ទាត់បុរសគឺ ក្រុមជម្រើសជាតិម៉ាឡេស៊ី។ ព្រោះថា ក្រុមបាល់ទាត់វ័យក្មេងនេះបានត្រៀមខ្លួនយ៉ាងហ្មត់ចត់ក្នុងរយៈពេលវែងមុននោះ» លោក Laohakul វាយតម្លៃខ្ពស់ទៅលើក្រុម U-22 ម៉ាឡេស៊ី។

អតីតគ្រូបង្វឹកថៃ Wittaya Laohakul បញ្ជាក់ថា វៀតណាមក៏ជាគូប្រកួតដែលគួរឱ្យញញើត ហើយ «ហ្វូងដំរីចម្បាំង» ត្រូវតែប្រយ័ត្នប្រយែងតាំងពីវគ្គចែកពូល។

ដោយឡែក គ្រូបង្វឹក Indra Sjafri របស់ U-22 ឥណ្ឌូណេស៊ីវិញ ក៏បានព្រមានដល់ក្រុមកូនសិស្សរបស់លោកអំពី U-22 កម្ពុជា បើទោះស្ថិតក្នុងពូលដែលភាគច្រើនជាក្រុមខ្សោយៗ រួមមាន ឥណ្ឌូណេស៊ី កម្ពុជា មីយ៉ាន់ម៉ា ហ្វ៊ីលីពីន និងទីម័រខាងកើត ក៏ដូចជា ឥណ្ឌូណេស៊ីត្រូវបានរំពឹងថា នឹងអាចឡើងដល់វគ្គពាក់កណ្ដាលផ្ដាច់ព្រ័ត្រ នៅពេលនាំមុខគេនៅក្នុងពូល។

ក្នុងចំណោមបណ្ដាក្រុមជម្រើសជាតិដែល U-22 ឥណ្ឌូណេស៊ី ត្រូវប្រកួត U-22 កម្ពុជាគឺជាក្រុមដែលគ្រូបង្វឹក Indra Sjafri មានការប្រុងប្រយ័ត្នជាងគេ។ «នៅវគ្គចែកពូលរបស់យើងមានក្រុមម្ចាស់ផ្ទះ។ ប៉ុន្មានឆ្នាំមកនេះ កម្ពុជាមានការរីកចម្រើនខ្លាំង ក្នុងនោះកីឡាករមានគុណភាពខ្ពស់ជាងមុនឆ្ងាយ»។

ទោះជាយ៉ាងណាក៏ដោយ គ្រូបង្វឹក Indra Sjafri នៅតែដាក់គោលដៅឡើងឱ្យដល់វគ្គផ្ដាច់ព្រ័ត្រនៅស៊ីហ្គេមលើកទី 32 ដែលកម្ពុជាធ្វើជាម្ចាស់ផ្ទះ។

គ្រូបង្វឹក Indra Sjafri របស់ U-22 ឥណ្ឌូណេស៊ី

ពូល A នៃវិញ្ញាសាបាល់ទាត់បុរសនៅស៊ីហ្គេមលើកនេះនឹងត្រូវប្រកួតនៅឯកីឡដ្ឋានជាតិមរតកតេជោ ក្នុងខណ្ឌជ្រោយចង្វារ រាជធានីភ្នំពេញ ខណៈដែលពូល B នឹងត្រូវប្រកួតនៅកីឡដ្ឋានព្រីនស៍ក្នុងខណ្ឌសែនសុខ រាជធានីភ្នំពេញ ដោយចាប់ផ្ដើមពីថ្ងៃទី 29 មេសា៕

April 7, 2023

ចិនធ្វើតេស្តរ៉ុក្កែតចុះចតបញ្ឈរត្រង់លើសមុទ្រដោយជោគជ័យ

ប្រទេសចិន ថ្មីៗនេះបានទទួលជោគជ័យក្នុងការសាកល្បងរ៉ុក្កែតចុះចតឈរត្រង់នៅលើសមុទ្រ ដូចទៅនឹងរ៉ុក្កែតរបស់ក្រុមហ៊ុនអាម៉េរិក SpaceX។

វិទ្យាស្ថានវិទ្យាសាស្ត្រចិន (CAS) កាលពីថ្ងៃទី 06 មេសា ឱ្យដឹងថា បច្ចេកវិទ្យានេះនឹងជាគ្រឹះសម្រាប់ការអនុវត្តនាពេលអនាគត រួមទាំងគ្រឹះសម្រាប់ការសាកល្បងក្នុងអវកាសជាន់ទាបដែលអាចកកែច្នៃឡើងវិញ ក៏ដូចជាការអភិវឌ្ឍវិស័យទេសចរណ៍អវកាស។

ក្រុមហ៊ុនពាណិជ្ជកម្ម CAS Space ដែលជាកម្មសិទ្ធិរបស់ CAS បង្ហើបឱ្យដឹងថា ស្ថាប័ននេះបានទទួលជោគជ័យក្នុងការបាញ់បង្ហោះរ៉ុក្កែតពីដីគោក ហើយចុះចតលើសមុទ្រ Haiyang នៃខេត្ត Shandong។

រ៉ុក្កែតនេះហោះឡើងដល់កម្ពស់ជាង 1,000 ម៉ែត្រ ហើយទម្លាក់ខ្លួនបន្តិចម្ដងៗដោយប្រើប្រាស់ម៉ាស៊ីនរុញច្រានបញ្ច្រាស។ ក្នុងដំណាក់កាលចុងក្រោយ ល្បឿនរបស់រ៉ុក្កែតថយចុះមកនៅត្រឹមជិត 2 ម៉ែត្រ/វិនាទី។ CAS និយាយថា ការសាកល្បងនេះត្រូវបានធ្វើឡើងក្នុងរយៈពេល 10 នាទី។

រ៉ុក្កែតត្រូវបានបាញ់បង្ហោះពីដីគោក ហើយចុះចតបញ្ឈរត្រង់លើសមុទ្រ Haiyang នៃខេត្ត Shandong

យោងតាមវិស្វករនៅ CAS Space រ៉ុក្កែតដែលមានបណ្ដោយ 2.1 ម៉ែត្រនេះ មានអង្កត់ផ្ចិត 0.5 ម៉ែត្រ ទម្ងន់ 93 គីឡូក្រាម និងបំពាក់ម៉ាស៊ីនរុញច្រានចំនួនពីរគ្រឿងដែលមានកម្លាំង 550 newton៕

April 7, 2023

ក្រុមបាល់ទាត់ U-22 ឥណ្ឌូណេស៊ី អាចត្រូវ FIFA ហាមប្រកួតនៅស៊ីហ្គេមលើកនេះ?

ប្រធានសហព័ន្ទកីឡាបាល់ទាត់ឥណ្ឌូណេស៊ី នៅតែបារម្ភចំពោះទណ្ឌកម្មបន្ថែមដែលសហព័ន្ធកីឡាបាល់ទាត់ពិភពលោក (FIFA) អាចនឹងដាក់មកលើក្រុមជម្រើសជាតិឥណ្ឌូណេស៊ី។

យោងតាមលទ្ធផលនៃការចាប់ឆ្នោតចែកពូល U-22 ឥណ្ឌូណេស៊ីហាក់មានសំណាងល្អនៅពេលអាចគេចពីការប្រឈមនឹងវៀតណាម និងថៃ។ ក៏ប៉ុន្តែ បច្ចុប្បន្ន ឥណ្ឌូណេស៊ីកំពុងបារម្ភចំពោះទណ្ឌកម្មពី FIFA។

ប្រធានសហព័ន្ធកីឡាបាល់ទាត់ឥណ្ឌូណេស៊ី (PSSI) លោក Erick Thohir ថ្លែងថា «PSSI នៅតែរក្សាទំនាក់ទំនងជាមួយ FIFA។ យើងសង្ឃឹមថា ឥណ្ឌូណេស៊ីនៅតែអាចចូលរួមប្រកួតនៅស៊ីហ្គេមដើម្បីសម្រេចគោលដៅដណ្ដើមមេដាយមាស»។

ក្រោយពីត្រូវបាន FIFA ដកហូតសិទ្ធិធ្វើជាម្ចាស់ផ្ទះនៃវគ្គផ្ដាច់ព្រ័ត្រ U-20 World Cup 2023 ព្រោះតែបញ្ហានយោបាយទាក់ទងនឹងអ៊ីស្រាអែល ឥណ្ឌូណេស៊ីកំពុងមានហានិភ័យត្រូវទទួលទណ្ឌកម្មបន្ថែម។ ក៏ប៉ុន្តែ នៅសល់ពេលមិនដល់មួយខែទៀតប៉ុណ្ណោះ ស៊ីហ្គេមលើកទី 32 ដែលធ្វើឡើងនៅកម្ពុជា នឹងត្រូវចាប់ផ្ដើម ដូច្នេះ ទណ្ឌកម្មថ្មីមកលើឥណ្ឌូណេស៊ី ទំនងជាពិបាកលេចជារូបរាង៕

April 6, 2023

ក្រុមហ៊ុនផលិតរថយន្ត Genesis ធ្វើតេស្តប្រព័ន្ធបញ្ចូលអគ្គិសនីគ្មានខ្សែ

ក្រុមហ៊ុនផលិតរថយន្តប្រណិត Genesis បានសាកល្បងប្រព័ន្ធបញ្ចូលថាមពលអគ្គិសនីមិនមានខ្សែដើម្បីជួយឱ្យម្ចាស់រថយន្តមិនចាំបាច់ចាប់កាន់ឌុយឆ្នាំសាកនៅពេលបញ្ចូលថាមពលគ្គិសនីឱ្យរថយន្តរបស់ពួកគេ ក៏ដូចជាការទុកដាក់ខ្សែកាបឆ្នាំងសាក។

ការធ្វើតេស្តខាងលើនេះនឹងអូសបន្លាយពេលរហូតដល់ខែមិថុនា 2023 និងត្រូវបានធ្វើឡើងនៅប្រទេសកូរ៉េខាងត្បូង។ ការសាកល្បងបច្ចេកវិទ្យានេះ ធ្វើឡើងចំពោះរថយន្តអគ្គិសនី Genesis GV60 និង Genesis GV70។

ការធ្វើតេស្តរបស់ Genesis ត្រូវបានចាត់ទុកថាជាគម្រោងស្វែងរកឱកាសកែលំអបទពិសោធន៍ប្រើប្រាស់សម្រាប់អតិថិជន ដោយប្រើប្រព័ន្ធផ្គត់ផ្គង់ថាមពលតាមរយៈកម្លាំងម៉ាញេទិច។ នេះគឺជាកិច្ចប្រឹងប្រែងថ្មីបំផុតរបស់ក្រុមហ៊ុនផលិតរថយន្ត ក្នុងបំណងជួយឱ្យការបញ្ចូលថាមពលដល់រថយន្តអគ្គិសនីកាន់តែងាយស្រួល។

បើសិនជោគជ័យ Genesis នឹងមានប្រៀបជាងគូប្រជែងមួយចំនួនធំនៅលើទីផ្សាររថយន្តអគ្គិសនី។ ប្រព័ន្ធបញ្ចូលថាមពលអគ្គិសនីដោយមិនបាច់មានខ្សែនេះអាចត្រូវបានដំឡើងជាស្ថានីយសាកថ្មនៅតាមដងផ្លូវ ក៏ដូចជាអាចដំឡើងនៅតាមផ្ទះរបស់អតិថិជន។

April 6, 2023

កីឡាបាល់ទាត់លើតុដែលប្រកួតនៅបុរេស៊ីហ្គេមលើកទី 32 មានបួនប្រទេសចូលរួម

ព្រឹត្តិការណ៍បុរេការប្រកួតកីឡាបាល់ទាត់លើតុ នឹងត្រូវបានរៀបចំប្រកួតឡើងនៅទីលានសហភាពសហព័ន្ធយុវជនកម្ពុជា រាជធានីភ្នំពេញ ដើម្បីត្រៀមសម្រាប់ចូលរួមដណ្ដើមមេដាយនៅស៊ីហ្គេមលើកទី 32 នាខែឧសភា 2023 ដែលកម្ពុជាធ្វើជាម្ចាស់ផ្ទះ។

យោងតាមទំព័រ Cambodia2023 ព្រឹត្តិការណ៍បុរេការប្រកួតកីឡាបាល់ទាត់លើតុ ធ្វើឡើងរយៈពេលពីរថ្ងៃគឺ ថ្ងៃទី 06 និងទី 07 មេសា។ ប្រភេទកីឡានេះ នឹងត្រូវដាក់ឱ្យប្រកួតក្នុងស៊ីហ្គេមលើកទី 32 នាខែឧសភា 2023 ដោយមានមេដាយដូចប្រភេទកីឡាផ្សេងៗដែរ ប៉ុន្តែមិនត្រូវបានរាប់បញ្ជូលក្នុងបញ្ជីមេដាយផ្លូវការ។

ឯកឧត្តម ញ៉ាន សុខវិសាល ទីប្រឹក្សាក្រសួងទេសចរណ៍ និងជាប្រធាននាយកដ្ឋានទំនាក់ទំនងអន្តរជាតិ នៃគណៈកម្មាធិការជាតិអូឡាំពិកកម្ពុជា (NOCC) សង្ឃឹមថា កីឡាបាល់ទាត់លើតុនេះ នឹងត្រូវបានដាក់បញ្ចូលឱ្យប្រកួតជាផ្លូវការនៅស៊ីហ្គេមលើកក្រោយ និងរីកចម្រើនជាបន្តបន្ទាប់។

ការប្រកួតបាល់ទាត់លើតុបុរេស៊ីហ្គេម រយៈពេលពីរថ្ងៃនេះ មានបួនប្រទេសចូលរួម ដោយមានប្រាំក្រុម ក្នុងនោះម្ចាស់ផ្ទះកម្ពុជាមានពីរក្រុម។ នេះបើតាម លោក អន ចន្ត្រាសំរិត អគ្គលេខាធិការរង សហព័ន្ធកីឡាបាល់ទាត់លើតុកម្ពុជា៕

April 6, 2023

នេះជារូបភាពច្បាស់ និងរស់រវើកបំផុតស្ដីពីផ្ទៃព្រះអាទិត្យ ដែលបង្កើតឡើងពីរូបថត 9 ម៉ឺនសន្លឹក

ក្រុមអ្នកថតរូបតារាសាស្ត្របានធ្វើឱ្យមានការភ្ញាក់ផ្អើលខ្លាំងនៅពេលបញ្ចេញរូបភាពស្ដីពីផ្ទៃព្រះអាទិត្យលឿងឆ្អៅ ដោយការផ្គុំរូបថតប្រមាណ 90,000 សន្លឹក។

ដើម្បីបង្កើតបានជារូបភាពនេះ Andrew McCarthy និង Jason Guenzel បានប្រើប្រាស់រូបថតមួយចំនួនរបស់ពួកគេ និងរូបថតបានពីស្ថានីយសង្កេតព្រះអាទិត្យ និងបរិយាកាសព្រះអាទិត្យ រួមទាំងរូបថតពីយានអវកាសរបស់ណាសា ដើម្បីផ្គុំចូលគ្នា។ នេះបើតាម Live Science ចុះផ្សាយកាលពីថ្ងៃទី 05 មេសា។

អ្នកថតរូបខាងលើបានផ្គុំរូបថតស្ដីពីព្រះអាទិត្យប្រហែល 90,000 សន្លឹកចូលគ្នា ដើម្បីបង្កើតបានជារូបភាពមួយសន្លឹកចុងក្រោយដែលពួកគេហៅថា «ការរួបរួមរបស់ Helios» បង្ហាញពីផ្ទៃដែលពេញដោយអណ្ដាតភ្លើងលឿងឆ្អៅរបស់ព្រះអាទិត្យ អមនឹងកាំរស្មីប្លាស្មាវិលវល់ដូចទៅនឹងស្រទាប់រោមជុំវិញលើកូនបាល់តេនីស។

ចំណុះដែលលេចធ្លោជាងគេនៅលើរូបភាពនេះគឺ «កំណួចខ្យល់ប្លាស្មា» ដែលខ្ពស់បំផុតនៅលើព្រះអាទិត្យ។ កំណួចខ្យល់ប្លាស្មានេះមានកម្ពស់រហូតដល់ 178,000 គីឡូម៉ែត្រ ស្មើនឹងផែនដីចំនួនបួនរៀបជាជួរ។ ព្រឹត្តិការណ៍នេះកើតឡើងរយៈពេលបីថ្ងៃ មុនពេលក្លាយជាពពកប្លាស្មា និងត្រូវបានរុញច្រានចេញឆ្ងាយពីព្រះអាទិត្យ។

Guenzel និយាយថា ស្នាដៃ «ការរួបរួមរបស់ Helios» នេះ គឺជារូបភាពស្ដីពីព្រះអាទិត្យដែលច្បាស់ និងរស់រវើកបំផុត ដែលគាត់ និង McCarthy ធ្លាប់បានបង្កើតឡើង។

April 6, 2023

Author: សឿន សំណាង