សឿន សំណាង - La Reine Media

Tesla គឺជាម៉ាករថយន្តដែលត្រូវបានកំណត់តម្លៃខ្ពស់ជាងគេបង្អស់លើពិភពលោក

Tesla បានឈ្នះ Mercedes-Benz និង Toyota ហើយបានក្លាយជាម៉ាករថយន្តដែលមានតម្លៃបំផុតនៅទូទាំងសកលលោក។ ក្រុមហ៊ុនផលិតរថយន្តអគ្គិសនីរបស់អាម៉េរិក Tesla បានលោតឡើងពីរកាំនៅក្នុងបញ្ជីស្ដីពីបណ្ដាម៉ាកយីហោរថយន្តដែលមានតម្លៃខ្ពស់ជាងគេ ហើយបច្ចុប្បន្នត្រូវបានកំណត់តម្លៃ 66.2 ពាន់លានដុល្លារអាម៉េរិក។

Tesla បានឆ្លងកាត់ការលំបាកជាច្រើនដំណាក់កាលក្នុងប៉ុន្មានឆ្នាំចុងក្រោយនេះ។ ប៉ុន្តែ មកដល់ឆ្នាំ 2023 ក្រុមហ៊ុននេះត្រូវបានវាយតម្លៃថា «វិជ្ជមាន»។ ថ្វីបើតម្លៃភាគហ៊ុនរបស់ Tesla នៅតែមិនកើនឡើងខ្លាំងដូចការរំពឹងទុករបស់អ្នកវិនិយោគមួយចំនួន តម្លៃរបស់យីហោ Tesla ក៏កំពុងតែកើនឡើង ខណៈដែលបណ្ដាម៉ាករថយន្តដទៃកំពុងធ្លាក់ចុះ។

តម្លៃរបស់ក្រុមហ៊ុន Tesla បានកើនប្រហែល 44% ហើយក៏នាំមុខគេក្នុងបញ្ជីចំណាត់ថ្នាក់ នេះបើតាមលទ្ធផលនៃការសិក្សាស្រាវជ្រាវរបស់ក្រុមហ៊ុន Brand Finance ។ របាយការណ៍របស់ Brand Finance ឱ្យដឹងថា នេះគឺជាលើកដំបូងដែល Tesla ឈរលើកំពូលតារាងស្ដីពីបណ្ដាម៉ាករថយន្តដែលមានតម្លៃខ្ពស់បំផុត ហើយក៏ជាលើកទីមួយដែលបានក្លាយជាក្រុមហ៊ុនផលិតរថយន្តនាំមុខគេក្នុងចំណោមក្រុមហ៊ុនផលិតរថយន្តអគ្គិសនីសុទ្ធ។

Brand Finance ក៏បានបញ្ជាក់ថា តម្លៃបច្ចុប្បន្នរបស់ក្រុមហ៊ុន Tesla គឺខ្ពស់ជាងប្រាំដងធៀបនឹងតម្លៃនៅមុនវិបត្តិកូវីដ-19។ ម៉ាករថយន្ត Mercedes-Benz ដែលឈរលើកំពូលតារាងចំណាត់ថ្នាក់កាលពីឆ្នាំមុន បច្ចុប្បន្នថយចុះ 3% មកនៅត្រឹម 58.8 ពាន់លានដុល្លារអាម៉េរិក។

តារាងចំណាត់ថ្នាក់ស្ដីពីបណ្ដាម៉ាករថយន្តដែលមានតម្លៃខ្ពស់ជាងគេលើពិភពលោក

ចំណែក Toyota វិញ ឆ្នាំនេះនៅតែរក្សាបាននូវកម្រិតដូចទៅនឹងចំណាត់ថ្នាក់លេខពីររបស់ខ្លួនកាលពីឆ្នាំ 2022 តែតម្លៃម៉ាករបស់វាបានធ្លាក់ថ្លៃអស់ 18% មកនៅត្រឹម 52.5 ពាន់លានដុល្លារអាម៉េរិក៕

April 11, 2023

ភូមិស៊ីហ្គេមលើកទី 32 អាចឆ្លើយតបនឹងតម្រូវការស្នាក់នៅ 32% នៃសមាជិកសរុប

ភូមិស៊ីហ្គេមលើកទី 32 អាចដាក់មនុស្សបាន 3,500 នាក់ ស្មើនឹង 32% នៃចំនួនសមាជិកសរុបមកពី 11 ក្រុមប្រតិភូដែលចូលរួមព្រឹត្តិការណ៍ប្រកួតកីឡាអាស៊ីអាគ្នេយ៍នៅរាជធានីភ្នំពេញ។

ភូមិស៊ីហ្គេមលើកទី 32 ស្ថិតនៅលើតំបន់ដែលមានទំហំ 8 ហិកតា ក្បែរពហុកីឡដ្ឋានជាតិមរតកតេជោ ដែលមានទីតាំងនៅភ្នំពេញ។ ឯកឧត្តម វ៉ាត់ ចំរើន អគ្គលេខាធិការនៃគណៈកម្មការរៀបចំការប្រកួតស៊ីហ្គេមលើកទី 32 (CAMSOC) ឱ្យដឹងថា ភូមិស៊ីហ្គេមត្រូវបានរៀបចំរួចរាល់ និងអាចទទួលអត្តពលិកចាប់ពីថ្ងៃទី 17 មេសា។

យោងតាម CAMSOC ចំនួនសមាជិកសរុបរបស់បណ្ដាក្រុមប្រតិភូកីឡាដែលនឹងចូលរួមព្រឹត្តិការណ៍ស៊ីហ្គេមលើកទី 32 មាន 12,404 នាក់។ ក្នុងនោះ ប្រទេសថៃមានច្រើនជាងគេ ពោលគឺ 1,985 នាក់, បន្ទាប់មកគឺ ឥណ្ឌូណេស៊ី (1,802 នាក់), វៀតណាម (1,663 នាក់), ម៉ាឡេស៊ី (1,532 នាក់), ហ្វ៊ីលីពីន (1,342 នាក់), សិង្ហបុរី (1,228 នាក់), កម្ពុជា (1,158 នាក់), មីយ៉ាន់ម៉ា (694 នាក់), ឡាវ (656 នាក់), ទីម័រខាងកើត (171 នាក់) និងប្រុយណេ (113 នាក់)។

ព្រឹត្តិការណ៍ស៊ីហ្គេមលើកនេះមាន 37 វិញ្ញាសា ក្នុងនោះមាន 32 វិញ្ញាសាត្រូវប្រកួតនៅភ្នំពេញ។ ភូមិស៊ីហ្គេមលើកទី 32 អាចដាក់មនុស្សបាន 3,500 នាក់ ស្មើនឹង 32% នៃចំនួនសមាជិកសរុបប្រមាណ 11,000 នាក់ដែលចូលរួមព្រឹត្តិការណ៍ប្រកួតកីឡាអាស៊ីអាគ្នេយ៍នៅរាជធានីភ្នំពេញ។ ក្រៅពីនេះនឹងត្រូវប្រកួត និងស្នាក់នៅក្នុងខេត្តចំនួនបួនទៀត រួមមាន ខេត្តកែប កំពត សៀមរាប និងខេត្តព្រះសីហនុ។

សមាជិកប្រមាណ 68% ដែលមិនស្នាក់នៅក្នុងភូមិស៊ីហ្គេម នឹងត្រូវបានរៀបចំឱ្យស្នាក់នៅក្នុងបណ្ដាសណ្ឋាគារចាប់ពីផ្កាយបួនឡើងទៅដែលនៅក្បែរទីតាំងប្រកួត។

យោងតាមការកំណត់របស់សហព័ន្ធកីឡាអាស៊ីអាគ្នេយ៍ ថ្លៃស្នាក់នៅហូបចុករបស់អត្តពលិកគឺ 50 ដុល្លារអាម៉េរិក/ម្នាក់/ថ្ងៃ។ បណ្ដាក្រុមដែលចូលរួមគឺជាអ្នករ៉ាប់រងថ្លៃហូបចុកស្នាក់នៅឱ្យប្រទេសម្ចាស់ផ្ទះ។

ថ្មីៗនេះ សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធាន CAMSOC បានបញ្ជាក់ថា កម្ពុជារៀបចំហេដ្ឋារចនាសម្ព័ន្ធសម្រាប់ស៊ីហ្កេមលើកទី 32 បាន 90% ហើយ។ ចំណែក 10% ទៀតគឺជាការងារតុបតែងលំអ៕

April 11, 2023

យន្តហោះ និងនាវាយោធាចិនជាង 100 គ្រឿង បង្ហាញខ្លួននៅជុំវិញកោះតៃវ៉ាន់

ស្ថាប័នការពារកោះតៃវ៉ាន់ បានរកឃើញយន្តហោះយោធាចំនួន 91 គ្រឿង និងនាវាយោធា 12 គ្រឿងរបស់ចិនដីគោក ធ្វើសកម្មភាពនៅបណ្ដាតំបន់ជុំវិញកោះនេះនៅក្នុងមួយថ្ងៃ។

«គិតត្រឹមម៉ោង 18 ថ្ងៃទី 10 មេសា យើងបានរកឃើញយន្តហោះយោធា 91 គ្រឿង និងនាវាយោធា 12 គ្រឿងនៅជុំវិញកោះតៃវ៉ាន់។ យន្តហោះ 54 គ្រឿងក្នុងចំណោមនោះ បានឆ្លងបន្ទាត់កណ្ដាលនៅច្រកសមុទ្រ ឬធ្វើដំណើរចូលក្នុងតំបន់កំណត់អត្តសញ្ញាណការពារដែនអាកាស។ កងកម្លាំងការពារបានតាមដានស្ថានការណ៍ និងដាក់ពង្រាយកម្លាំងដើម្បីជាប្រតិកម្ម» ស្ថាប័នការពារកោះតៃវ៉ាន់ឱ្យដឹងដូច្នេះ។

របាយការណ៍ខាងលើត្រូវបានលើកឡើងបន្ទាប់ពីកងទ័ពចិនប្រកាសថា បានបញ្ចប់ព្រឹត្តិការណ៍សមយុទ្ធបីថ្ងៃនៅក្នុងតំបន់ច្រកសមុទ្រតៃវ៉ាន់ និងបណ្ដាតំបន់សមុទ្រនៅជុំវិញកោះនេះ។

ថ្វីបើចិនដីគោកបានប្រកាសថាបានបញ្ចប់សមយុទ្ធដែលប្រើប្រាស់សេណារីយោ «ឡោមព័ទ្ធកោះ» ហើយក្ដី ភាគីចិនដីកោះតៃវ៉ាន់នៅតែបញ្ជាក់ថា នឹងបន្តការតាមដានស្ថានការណ៍ និងបង្កើនសមត្ថភាពត្រៀមប្រយុទ្ធ។

នាវាផ្ទុកយន្តហោះចម្បាំង និងយន្តហោះរបស់ប្រទេសចិន នៅលើមហាសមុទ្រប៉ាស៊ីហ្វ៊ិក ភាគខាងលិចកោះតៃវ៉ាន់

សមយុទ្ធរបស់ចិនដីគោកត្រូវបានធ្វើឡើងក្រោយពីមេដឹកនាំតៃវ៉ាន់ លោកស្រី Tsai Ing-wen ជួបពិភាក្សាការងារជាមួយប្រធានសភាជាន់ទាបអាម៉េរិក Kevin McCarthy នៅ California កាលពីថ្ងៃតី 05 មេសា ដែលជាជំនួបដំបូងរវាងមេដឹកនាំសភាជាន់ទាបអាម៉េរិក និងមេដឹកនាំកោះតៃវ៉ាន់ នៅលើទឹកដីអាម៉េរិក។

ប្រទេសចិនប្រកាសថា តៃវ៉ាន់គឺជាខេត្តមួយរបស់ខ្លួនដែលរង់ចាំតែការបង្រួបបង្រួមប៉ុណ្ណោះ និងមិនរំលងចោលការប្រើប្រាស់កម្លាំងបាយ បើសិនចាំបាច់។ ចំណែកតៃវ៉ាន់វិញក៏បានអះអាងថា មានតែប្រជាជនរបស់ពួកគេប៉ុណ្ណោះដែលអាចសម្រេចវាសនាអនាគតរបស់កោះនេះ៕

April 11, 2023

មហាសេដ្ឋី Elon Musk ប្ដូរឈ្មោះយីហោ Twitter ទៅជា Titter

មហាសេដ្ឋី Elon Musk ឱ្យកម្មករលាបថ្នាំពណ៌លើអក្សរ «w» នៅលើឈ្មោះយីហោ Twitter នៅឯទីស្នាក់ការកណ្ដាលក្នុងទីក្រុង San Francisco បើទោះអាចប្រឈមនឹងបញ្ហាផ្លូវច្បាប់។

យោងតាម Business Insider លោក Musk ទំនងជាចង់ប្ដូរឈ្មោះ Twitter ហើយការលាបថ្នាំពណ៌លើផ្លាកយីហោនេះបង្ហាញថា មហាសេដ្ឋីដើមកំណើតអាហ្វ្រិកខាងត្បូងរូបនេះ អាចនឹងធ្វើរឿងគួរឱ្យភ្ញាក់ផ្អើលបន្ទាប់នៅក្នុងការគ្រប់គ្រងបណ្ដាញសង្គម។ នៅក្នុងភាសាអង់គ្លេស «titter» មានន័យថា «សើចក្អាកក្អាយ»។

ក្នុង tweet កាលពីថ្ងៃទី 10 មេសា CEO របស់ Twitter ក៏បានបង្ហោះរូបភាពអធិប្បាយអំពីផ្លាកយីហោដែលមានអក្សរ «w» ត្រូវបានលាបពណ៌ស ធ្វើឱ្យអ្នកមើលឃើញតែ «Titter»។

លោក Musk សរសេរថា «ម្ចាស់ផ្ទះជួលទីស្នាក់នៅ San Francisco និយាយថា ក្រុមហ៊ុនត្រូវបានស្នើដោយស្របច្បាប់ដើម្បីរក្សាផ្លាកយីហោ Twitter និងមិនត្រូវបានអនុញ្ញាតឱ្យលុបអក្សរ «w»។ ដូច្នេះ យើងបានលាបថ្នាំពណ៌ស (ដូចទៅនឹងពណ៌ background របស់យីហោ) ទៅលើវា ហើយបញ្ហាត្រូវបានដោះស្រាយ»។

ម្ចាស់អគារជួល SRI Nine Market Square មិនបានបញ្ចេញមតិអ្វីឡើយនៅពេលត្រូវបានសួរអំពីបញ្ហាផ្លូវច្បាប់ទាក់ទិននឹងសកម្មភាពលាបពណ៌ខាងលើ។

ទំព័រ Insider បានឱ្យដឹងថា ភាពចម្រូងចម្រាសអំពីផ្លាកយីហោ Twitter គឺជាបញ្ហាថ្មីបំផុតរវាងលោក Musk និង SRI Nine Market Square។ កាលពីខែមករា Twitter ត្រូវបានម្ចាស់កម្មសិទ្ធិរបស់អគារជួលនេះប្ដឹងម្ដងរួចហើយ ដោយសារមិនបានបង់ថ្លៃជួល 3.4 លានដុល្លារអាម៉េរិក/ខែ សម្រាប់ខែធ្នូ 2022 និងខែមករា 2023។

កាលពីដើមខែនេះ CEO របស់ Tesla ក៏បានប្ដូរនិម្មិតសញ្ញាបក្សីពណ៌ខៀវរបស់ Twitter ទៅជារូបសុនក Shiba របស់ Dogecoin ធ្វើឱ្យប្រាក់ឌីជីថលគ្រីបតូនេះឡើងថ្លៃ 25%៕

April 11, 2023

តារាភាពយន្តកំប្លែងល្បីឈ្មោះនៅហុងកុង Richard Ng បានទទួលមរណភាព

លោក Richard Ng Yiu-hon ដែលជាតារាសម្ដែងប្រភេទកំប្លែងដ៏ល្បីឈ្មោះនៅហុងកុងអំឡុងទសវត្សរ៍ឆ្នាំ 1980, 1990 បានទទួលមរណភាពកាលពីថ្ងៃទី 09 មេសា ដោយរោគាពាធ។

យោងតាមទំព័រ HK01 តារាភាពយន្តរូបនេះបានស្លាប់នៅក្នុងមន្ទីរពេទ្យក្នុងវ័យ 84 ឆ្នាំ ក្រោយពីបានធ្លាក់ខ្លួនឈឺធ្ងន់ ត្រូវលាងឈាមដើម្បីព្យាបាលជំងឺខ្សោយតម្រងនោម។ គាត់ក៏ធ្លាប់ទទួលការវះកាត់ ព្រោះតែស្ទះសរសៃឈាមបេះដូង។

លោក Richard Ng Yiu-hon (ឬ Richard Woo) គឺជាតារាសម្ដែងបែបកំប្លែងល្បីឈ្មោះមួយរូបនៅហុងកុង និងបានសម្ដែងក្នុងខ្សែភាពចំនួនជាង 100 រឿងនៅក្នុងអាជីព។

ទំព័រ On បានឱ្យដឹងថា ដោយសារតែសម្ដែងបានច្រើនរឿង ទសវត្សរ៍ឆ្នាំ 1980 ទ្រព្យសម្បត្តិរបស់លោក Richard Ng ក៏បានកើនឡើងលើសពី 100 លានដុល្លារហុងកុង (12.7 លានដុល្លារអាម៉េរិក)។ ប៉ុន្តែ ចាប់ពីឆ្នាំ 2019 លោកក៏បានឈប់សម្ដែង ព្រោះតែកម្លាំងខ្សោយ។

លោក Richard Ng ធ្លាប់ឆ្លងកាត់អាពាហ៍ពិពាហ៍ពីរលើក ក្នុងនោះភរិយាដំបូងគឺជនជាតិអង់គ្លេស តែបានលែងលះក្រោយពីរស់នៅជាមួយគ្នាបានកន្លះឆ្នាំ។ ឆ្នាំ 1965 គាត់ក៏បានរៀបការជាមួយអ្នកស្រី Susan និងមានកូនបូននាក់ ក្នុងនោះមានស្រីបីនាក់ និងប្រុសម្នាក់។

April 10, 2023

ការត្រៀមសម្រាប់កីឡាបីប្រភេទរបស់ស៊ីហ្គេម 2023 នៅខេត្តព្រះសីហនុ បានធ្វើឡើងរួចរាល់

ខេត្តព្រះសីហនុ បានត្រៀមខ្លួនរួចរាល់ហើយសម្រាប់ទទួលធ្វើម្ចាស់ផ្ទះការប្រកួតកីឡាអាស៊ីអាគ្នេយ៍លើកទី32 ឆ្នាំ 2023។ នេះបើតាម Cambodia2023 ដកស្រង់សម្ដីរបស់ ឯកឧត្តម គួច ចំរើន អភិបាលនៃគណៈអភិបាលខេត្តព្រះសីហនុ។

ខេត្តព្រះសីហនុ នឹងត្រូវទទួលរៀបចំការប្រកួតកីឡាបីប្រភេទនៅក្នុងព្រឹត្តិការណ៍ស៊ីហ្គេមលើកទី 32 ក្នុងនោះមានកីឡាទូកក្ដោង កីឡាបាល់ទះលើឆ្នេរខ្សាច់ និងកីឡាប្រណាំងម៉ូតូទឹក។

យោងតាម CAMSOC (គណៈកម្មាធិការរៀបចំការប្រកួតកីឡាស៊ីហ្គេមនៅកម្ពុជា) ឯកឧត្តម គួច ចំរើន អភិបាលនៃគណៈអភិបាលខេត្តព្រះសីហនុ បានមានប្រសាសន៍ថា គ្រប់ការរៀបចំគឺបានត្រៀមរួចរាល់អស់ហើយ ទាំងហេដ្ឋារចនាសម្ព័ន្ធ សន្តិសុខ សណ្ដាប់ធ្នាប់។ លោកបន្ថែមថា ប្រភេទកីឡាទាំងបីខាងលើនេះ ពាក់ព័ន្ធនឹងសក្ដានុពលខេត្តព្រះសីហនុ ដោយមានឆ្នេរសមុទ្រ មានខ្សាច់ ដែលជាអំណោយផលដល់ក្រុមអត្តពលិកក្នុងការប្រកួត។

យោងតាមកាលវិភាគប្រកួតនៅក្នុងខេត្តព្រះសីហនុ កីឡាទូកក្ដោង នឹងចាប់ផ្ដើមប្រកួតមុនគេពោលគឺនៅថ្ងៃទី01 ដល់ថ្ងៃទី 08 ឧសភា ក្រោយមកមកទៀត កីឡាបាល់ទះលើឆ្នេរខ្សាច់នឹងចាប់ផ្ដើមពីថ្ងៃទី 11 ដល់ 16 ឧសភា និងកីឡាម៉ូតូទឹក ពីថ្ងៃទី 13 ដល់ថ្ងៃទី 16 ឧសភា ឆ្នាំ 2023៕

April 10, 2023

បណ្ដាញកាប៊ីនខ្សែកាបផ្លាស់ទីជួយបញ្ចៀសបញ្ហាកកស្ទះចរាចរណ៍

(ប៊ុលហ្ការី) – Studio Half Company រចនាប្រព័ន្ធខ្សែកាបដែលមានកាប៊ីនដឹកមនុស្ស និងទំនិញនៅខាងលើផ្លូវថ្នល់ក្នុងទីក្រុង បញ្ជាដោយបញ្ញានិម្មិត (AI)។

ប្រព័ន្ធកាប៊ីនខ្សែកាបដែលមានឈ្មោះថា Halfgrid នេះ អាចបញ្ជាកាប៊ីនដឹកអ្នកដំណើរ និងទំនិញទៅមកនៅក្នុងទីក្រុង។ ថ្វីបើមិនទាន់ដំណើរការ ប៉ុន្តែ ក្រុមហ៊ុន Studio Half Company កំពុងស្វែងរកទីក្រុងដើម្បីធ្វើតេស្តប្រព័ន្ធគំរូ។

អ្នកដំណើរ ឬអតិថិជនត្រូវកក់កាប៊ីនរបស់ប្រព័ន្ធនេះតាមរយៈកម្មវិធីទូរស័ព្ទ។ ប្រព័ន្ធ AI នឹងរៀបចំកាលបរិច្ឆេទនៃការធ្វើដំណើរ និងស្វែងរកកាប៊ីនដែលសបស្របបំផុត។

ប្រព័ន្ធខ្សែកាប់ស្ដង់ដា ប្រើប្រាស់កងចក្រខ្នាតធំដើម្បីអូសកាប៊ីនទៅតាមបណ្ដោយខ្សែកាប ខណៈដែលកាប៊ីនតោងជាប់ទៅនឹងខ្សែកាបដែលកំពុងផ្លាស់ទី។ ចំណែកប្រព័ន្ធ Halfgrid វិញ កាប៊ីនផ្លាស់ទីជំនួសខ្សែកាប។ ប្រការនេះអនុញ្ញាតឱ្យកាប៊ីនធ្វើដំណើរទៅកាន់ខ្សែកាប់មួយណាក៏បាន។ Halfgrid ក៏កាត់បន្ថយបានច្រើននូវបរិមាណគ្រឿងបង្គុំចាំបាច់។

ប្រព័ន្ធកាប៊ីនខ្សែកាប Halfgrid របស់ក្រុមហ៊ុនប៊ុលហ្ការី Half Company

Halfgrid គឺជាគំនិតរបស់ក្រុមហ៊ុន Half Company នៅប្រទេសប៊ុលហ្ការី។ ពួកគេបង្កើតប្រព័ន្ធនេះឡើងក្នុងបំណងកាត់បន្ថយការកកស្ទះចរាចរណ៍នៅតាមដងផ្លូវក្នុងទីក្រុង។ កាប៊ីនរបស់ Halfgrid អាចដឹកមនុស្ស និងទំនិញ ដែលនេះនឹងជួយកាត់បន្ថយចំនួនរថយន្តដឹកទំនិញនៅកណ្ដាលទីក្រុង។ វាក៏ជួយកាត់បន្ថយសំឡេងរំខាន និងផ្ដល់សុវត្ថិភាពដល់ស្ត្រី និងជនពិការ ក៏ដូចជាអ្នកមានចំណូលទាប៕

April 10, 2023

កសិដ្ឋានរាងមូលខ្នាតយក្សលើសមុទ្រខ្សាច់របស់អេមីរ៉ាត់អារ៉ាប់រួម

កសិដ្ឋានស្ថិតនៅក្នុងរដ្ឋ Sharjah រួមមានតំបន់ដាំដុះចំនួន 8 ដែលមានរាងមូល ប្រើប្រាស់បញ្ញានិមិត្ត (IA) និងប្រព័ន្ធស្កេនកម្ដៅដើម្បីគ្រប់គ្រងទឹកស្រោចស្រព និងតាមដានដំណាំ។

កសិដ្ឋានទំនើបនេះជួយបង្កើនសន្តិសុខស្បៀងនៅក្នុងដែនដីនៃប្រទេសអេមីរ៉ាតអារ៉ាប់រួម (UAE)។ វាស្ថិតនៅ Sharjah ដែលជារាជាណាចក្រធំជាងគេលំដាប់ទីបីនៅ UAE។ កសិដ្ឋាននេះមានតំបន់ដាំដុះចំនួន 8 ដែលមានរាងមូល និងខ្នាតយក្ស។ កសិដ្ឋាននេះត្រូវបានស្រោចស្រពទឹកដែលបានបន្សាបជាតិប្រៃ ប្រមាណ 18 លានលីត្រជារៀងរាល់ថ្ងៃ។

កសិដ្ឋាននេះដាំស្រូវសាលីចំនួន 35 ប្រភេទដែលយកមកពីជុំវិញពិភពលោក ដើម្បីស្វែងរកប្រភេទដែលសមស្របបំផុតសម្រាប់បណ្ដាប្រទេសនៅតំបន់ឈូងសមុទ្រពែក្ស។ កសិដ្ឋាននេះមិនប្រើប្រាស់ថ្នាំសម្លាប់សត្វល្អិត គីមី ឬដំណាំដែលបានកែប្រែហ្សែន។

បញ្ញានិម្មិត និងប្រព័ន្ធស្កេនកម្ដៅ វិភាគទិន្នន័យស្ដីពីអាកាសធាតុ និងដី។ វិធីនេះជួយឱ្យកសិដ្ឋានទទួលបានការស្រោចស្រពទឹកប្រកបដោយប្រសិទ្ធភាព ទន្ទឹមនឹងការតាមដានការលូតលាស់របស់ដំណាំ។ តាមការរំពឹងទុក កសិដ្ឋាននេះអាចផ្ដល់ទិន្នផលស្រូវសាលីប្រមាណ 1,600 តោនជារៀងរាល់ឆ្នាំ។ ប៉ុន្តែតួលេខនេះនឹងកើនឡើងខ្ពស់នាពេលដ៏ខ្លីខាងមុខ ព្រោះ UAE មានគម្រោងបង្កើនទំហំផ្ទៃដីនៃកសិដ្ឋាននេះឱ្យបានដល់ 1,400 ហិកតានៅឆ្នាំ 2025 ហើយចុងក្រោយគឺ 1,900 ហិកតា។

នៅពេលមានទំហំផ្ទៃដីដាំដុះដូចខាងលើ រដ្ឋាភិបាល UAE សង្ឃឹមថា កសិដ្ឋានរបស់ពួកគេអាចប្រកួតប្រជែងតម្លៃជាមួយនឹងស្រូវសាលីដែលនាំចូលពីបរទេស។ UAE នាំចូលស្រូវសាលី 1.7 លានតោនក្នុងឆ្នាំ 2022។

អេមីរ៉ាតអារ៉ាប់រួមកំពុងតែប្រឹងប្រែងក្នុងការផលិតស្បៀងក្នុងស្រុក បន្ទាប់ពីបានទទួលផលប៉ះពាល់ពីវិបត្តិសុខភាព និងសង្គ្រាមរវាងរុស្ស៊ី និងអ៊ុយក្រែន។ ព្រឹត្តិការណ៍ទាំងពីរនេះសុទ្ធតែជះឥទ្ធិពលអវិជ្ជមានដល់សន្តិសុខស្បៀងរបស់ពិភពលោក៕

April 10, 2023

Foxconn ចំណាយ 820 លានដុល្លារអាម៉េរិកដើម្បីផលិតរថយន្តអគ្គិសនី និងថ្មនៅតៃវ៉ាន់

ក្នុងបីឆ្នាំទៀត Foxconn នឹងវិនិយោគសរុបជិតមួយពាន់លានដុល្លារអាម៉េរិកដើម្បីពង្រីកការផលិតរថយន្តអគ្គិសនី និងថ្មផ្ទុកអគ្គិសនីនៅតៃវ៉ាន់ នេះបើយោងតាម Reuters។

ក្រោយពីមានកិច្ចព្រមព្រៀងជាមួយ Lordstown Motors ក្រុមហ៊ុនតៃវ៉ាន់ Foxconn ក៏ចាប់ផ្ដើមពង្រីកកិច្ចសន្យាផលិតរថយន្តអគ្គិសនីនៅរដ្ឋ Ohio (សហរដ្ឋអាម៉េរិក) ហើយថ្មីៗនេះ ពួកគេក៏ពង្រីកវិសាលភាពនៃផលិតផលរបស់ខ្លួនទៅលើត្រាក់ទ័រអគ្គិសនី ប៉ុន្តែ ប្រការនេះមិនមែនមានន័យថា Foxconn ភ្លេចស្រុកកំណើតឡើយ។

យោងតាម Reuters ក្នុងបីឆ្នាំទៀត Foxconn នឹងវិនិយោគសរុប 820 លានដុល្លារអាម៉េរិកដើម្បីពង្រីកការផលិតរថយន្តអគ្គិសនី និងថ្មផ្ទុកអគ្គិសនីនៅតៃវ៉ាន់ ដែលជាស្រុកកំណើតរបស់ក្រុមហ៊ុននេះ។

Foxconn គឺជាអ្នកផលិតគ្រឿងបន្លាស់អេឡិចត្រូនិកធំជាងគេលើពិភពលោក និងជាអ្នកដំឡើងទូរស័ព្ទ iPhone ប្រមាណ 70% នៅទូទាំងសកលោក។ បច្ចុប្បន្ន ក្រុមហ៊ុនតៃវ៉ាន់មួយនេះកំពុងមានមហិច្ឆតាធំនៅក្នុងទីផ្សាររថយន្តអគ្គិសនី ក្នុងពេលកំពុងប្រឹងប្រែងរកវិធីធ្វើពិពិធកម្មផលិតផល និងប្រភពចំណូលរបស់ខ្លួន។

April 10, 2023

ក្រុមបាល់ទាត់ U-22 កម្ពុជា ប្រកួតជាមួយក្រុមថៃ នៅមុនព្រឹត្តិការណ៍ស៊ីហ្គេមមកដល់

ក្រុមបាល់ទាត់បុរសជម្រើសជាតិកម្ពុជាអាយុក្រោម 22 ឆ្នាំ ថ្មីៗនេះបានទៅប្រកួតមិត្តភាពជាមួយនឹង U-22 ថៃ ដើម្បីត្រៀមខ្លួនសម្រាប់ចូលរួមព្រឹត្តិការណ៍ស៊ីហ្គេមលើកទី 32 ដែលកម្ពុជាធ្វើជាម្ចាស់ផ្ទះ។

នៅមិនដល់មួយខែទៀត ស៊ីហ្គេមលើកទី 32 នឹងចាប់ផ្ដើមការប្រកួតជាផ្លូវការ។ បាល់ទាត់បុរសគឺជាវិញ្ញាសាដែលនឹងត្រូវចាប់ផ្ដើមការប្រកួតមុនគេ គឺចាប់ពីថ្ងៃទី 29 មេសាខាងមុខ។ ម្ចាស់ផ្ទះកម្ពុជាស្ថិតក្នុងពូល A ជាមួយនឹងក្រុមឥណ្ឌូណេស៊ី មីយ៉ាន់ម៉ា ហ្វ៊ីលីពីន និងទីម័រខាងកើត។ នេះគឺជាពូលដែលត្រូវបានវាយតម្លៃថា ស្រួលសម្រាប់ក្រុមម្ចាស់ផ្ទះស៊ីហ្គេមលើកនេះ។

ថ្មីៗនេះ ដើម្បីត្រៀមសម្រាប់មហាព្រឹត្តិការណ៍កីឡានៅអាស៊ីអាគ្នេយ៍ ក្រុម U-22 កម្ពុជា ដឹកនាំដោយគ្រូបង្វឹក Keisuke Honda មានដំណើរហ្វឹកហាត់នៅប្រទេសថៃ ចាប់ពីថ្ងៃទី 08 ដល់ 18 មេសា។ ក្រោយស៊ីហ្គេមលើកទី 32 នេះ កិច្ចព្រមព្រៀងរវាងគ្រូបង្វឹកជនជាតិជប៉ុន Honda និងក្រុមបាល់ទាត់ជម្រើសជាតិកម្ពុជានឹងអស់សុពលភាព។ ចំណែកកីឡាករទាំង 23 រូបរបស់ក្រុម U-22 កម្ពុជា ត្រូវបានជ្រើសរើសពីពានរង្វាន់លីគកំពូលកម្ពុជា (Cambodian Premier League) និងលីគលំដាប់ទីពីរកម្ពុជា (Cambodian League 2) ដើម្បីចូលរួមប្រកួតនៅស៊ីហ្គេម។

លោក កែវ សារ៉េត អគ្គលេខាធិការសហព័ន្ធកីឡាបាល់ទាត់កម្ពុជា បានឱ្យដឹងថា នេះគឺជារដូវហ្វឹកហាត់ចុងក្រោយ ដែលផ្ដោតសំខាន់លើយុទ្ធសាស្ត្រប្រកួត និងជួយឱ្យកីឡាករស្គាល់ច្បាស់ពីក្រុមបាល់ទាត់ជាគូប្រកួត។

ដំណើរហ្វឹកហាត់លើកនេះក៏នឹងមានការប្រកួតមិត្តភាពរវាង U-22 កម្ពុជា ជាមួយនឹងក្លឹបបាល់ទាត់មួយចំនួននៅប្រទេសថៃ។ នេះគឺជាការពិសោធកម្លាំងរបស់ក្រុមម្ចាស់ផ្ទះកម្ពុជានៅមុនព្រឹត្តិការណ៍ស៊ីហ្គេមលើកទី 32។

នេះក៏ជាដំណើរហ្វឹកហាត់លើកទីពីររបស់ U-22 កម្ពុជា។ មុននោះ ក្រុមកម្ពុជាក៏បានហ្វឹកហាត់ និងប្រកួតចាប់ពីថ្ងៃទី 27 កុម្ភៈ ដល់ 15 មីនា ក្នុងនោះ កម្ពុជាបានឈ្នះសិង្ហបុរី ក្នុងលទ្ធផល 2-1 និងចាញ់ម៉ាឡេស៊ី 2-4 នៅពានរង្វាន់មិត្តភាព Merlion Cup។

April 10, 2023

Author: សឿន សំណាង