សឿន សំណាង - La Reine Media

បណ្ដាញស្ថានីយប្រេងក្នុងទីអវកាសនឹងបង្ហាញខ្លួនក្នុងពេលអនាគត

ក្រុមហ៊ុន Orbit Fab កំណត់គោលដៅសាងសង់ស្ថានីយឥន្ធនៈអវកាសជាច្រើនកន្លែង ដោយសង្ឃឹមថា បច្ចេកវិទ្យាចាក់សាំងក្នុងទីអវកាសនឹងជួយជំរុញវិស័យផ្កាយរណបឱ្យរីកចម្រើនជាងមុន។

ផ្ទាំងសូឡាដែលបំពាក់លើផ្កាយរណបអាចបង្កើតអគ្គិសនីសម្រាប់កាមេរ៉ា ឬវិទ្យុ ប៉ុន្តែមិនអាចជួយផ្កាយរណប កែប្រែគន្លងគោចរ នេះបើតាម Daniel Faber សហស្ថាបនិកដែលបានបង្កើតក្រុមហ៊ុន Orbit Fab កាលពីឆ្នាំ 2018។ ដើម្បីឱ្យផ្កាយរណបហោះហើរចំគន្លងគោចរ ក្រុមអ្នកជំនាញត្រូវប្រើប្រាស់ឥន្ធនៈដើម្បីកែប្រែទីតាំងរបស់ពួកវា។ ដូច្នេះ អាយុកាលរបស់ផ្កាយរណបក៏ត្រូវបានកំណត់ដោយបរិមាណឥន្ធនៈដែលអ្នកវិទ្យាសាស្ត្របានបំពាក់ឱ្យពួកវានៅមុនពេលបាញ់បង្ហោះ។

យោងតាម AFP ចុះផ្សាយកាលពីថ្ងៃទី 27 មេសា ក្រុមហ៊ុន Orbit Fab មានផែនការបាញ់បង្ហោះអាងធំៗឡើងទៅកាន់គន្លងតារាវិថី ក្នុងនោះ អាងនីមួយៗមានឥន្ធនៈរាប់តោន។ ក្រោយមក យានតូចៗ និងងាយស្រួលបញ្ជានឹងផ្លាស់ទីទៅមករវាងអាងផ្ទុកឥន្ធនៈ និងផ្កាយរណបដើម្បីចាក់ប្រេង។

ដូចទៅនឹងរថយន្ត ផ្កាយរណបដែលចង់ចាក់ប្រេងបន្ថែមពី Orbit Fab គឺត្រូវតែមានប្រព័ន្ធចាក់ប្រេងសមស្រប។ Faber បានឱ្យដឹងថា ផ្កាយរណបប្រហែលពី 200 ទៅ 250 គ្រឿង ត្រូវបានរចនាដើម្បីអាចប្រើប្រាស់បណ្ដាញស្ថានីយប្រេងអវកាសរបស់ Orbit Fab ។ នេះគឺជាទីផ្សារដ៏មានសក្ដានុពល ព្រោះថា មានផ្កាយរណបរហូតដល់ 24,500 គ្រឿងគ្រោងនឹងត្រូវបាញ់បង្ហោះចន្លោះពីឆ្នាំ 2022 ដល់ 2030។

Orbit Fab បានបាញ់បង្ហោះអាងផ្ទុកឥន្ធនៈមួយឡើងទៅកាន់គន្លងគោចរ ហើយគ្រោងនឹងធ្វើតេស្តលើការចាក់ប្រេងនាពេលខាងមុខ។

ផលប្រយោជន៍នៃការចាក់ប្រេងក្នុងទីអវកាសគឺការកាត់បន្ថយទម្ងន់របស់ផ្កាយរណបនៅពេលបាញ់បង្ហោះដោយសារតែការកាត់បន្ថយឥន្ធនៈ និងជួយបង្កើនអាយុកាលរបស់ផ្កាយរណប់។

ក្រៅពីផ្កាយរណប Orbit Fab ក៏ឆ្ពោះទៅរកការផ្ដល់សេវាកម្មដល់បណ្ដាស្ថានីយអវកាសឯកជនផងដែរ។ ក្រុមហ៊ុនក៏យកចិត្តទុកដាក់លើទីផ្សារនៅលើផ្ទៃ និងនៅលើគន្លងតារាវិថីរបស់ព្រះចន្ទ ដោយការផ្ដោតលើការកែច្នៃវត្ថុធាតុដើមឱ្យទៅជាឥន្ធនៈ ហើយផ្គត់ផ្គង់ដល់អតិថិជន៕

April 28, 2023

ក្រោយពីរៀនចប់នៅវៀតណាម «នារីគុននិយម» ដ៏ស្រស់ស្អាតរបស់កម្ពុជា នឹងដណ្ដើមមេដាយនៅស៊ីហ្គេម

ក្រោយពីបានបញ្ចប់ការសិក្សារយៈពេលប្រាំឆ្នាំនៅប្រទេសវៀតណាម កីឡាការិនីកម្ពុជា ឈឿង លីណា ក៏បានត្រលប់មកស្រុកកំណើតដើម្បីចូលរួមប្រកួតដណ្ដើមមេដាយផ្នែកក្បាច់គុនតៃក្វាន់ដូនៅព្រឹត្តិការណ៍ប្រកួតកីឡាអាស៊ីអាគ្នេយ៍ (ស៊ីហ្គេម) លើកទី 32។

ឈឿង លីណា អាយុ 28 ឆ្នាំ ធ្លាប់បានចូលរួមប្រកួតនៅស៊ីហ្គេមលើកទី 27 នៅមីយ៉ាន់ម៉ា កាលពីឆ្នាំ 2013 និងដណ្ដើមបានមេដាយសំរឹទ្ធមួយគ្រឿង។ ក្រោយពីបានចូលរួមប្រកួតនៅស៊ីហ្គេមលើកទី 29 ឈឿង លីណា

ក៏បានឈប់ប្រកួតដើម្បីផ្ដោតលើការសិក្សា។ ក្រៅពីស៊ីហ្គេម ស្រីស្អាត ឈឿង លីណា ក៏ធ្លាប់ចូលរួមការប្រកួតកម្រិតពិភពលោក នៅប្រទេសកូរ៉េផងដែរ។

នៅលើទំព័របណ្ដាញសង្គម កាលពីម្សិលមិញ ឈឿង លីណា បានសរសេរថា «ខ្ញុំត្រៀមខ្លួនរួចរាល់ហើយសំរាប់ការប្រកួតប្រជែង សង្ឃឹមថា ខ្ញុំនឹងធ្វើបានល្អសំរាប់ប្រទេសជាតិរបស់ខ្ញុំ»។

ឈឿង លីណា បានបញ្ចប់ការសិក្សាផ្នែកវេជ្ជសាស្ត្រនៅប្រទេសវៀតណាម។ នាងបានរស់នៅ និងសិក្សានៅទីក្រុងព្រៃនគរ (ហូជីមិញ) រយៈពេលប្រាំឆ្នាំ។ នាងបានត្រលប់មកហ្វឹកហាត់នៅក្នុងក្រុមជម្រើសជាតិ និងចូលរួមប្រកួតនៅស៊ីហ្គេមលើកទី 32 ដែលនៅទីនេះ ឈឿង លីណា បានចាត់ទុកថា ជាការប្រកួតចុងក្រោយរបស់ខ្លួនសម្រាប់កម្ពុជា។

April 27, 2023

ព្រះអគ្គិជ័យកីឡា នៃស៊ីហ្គេមលើកទី 32 បានធ្វើដំណើរមកដល់កម្ពុជាវិញហើយ

ព្រះអគ្គិជ័យកីឡា នៃស៊ីហ្គេម និងអាស៊ានប៉ារ៉ាហ្គេម ឆ្នាំ 2023 បានធ្វើដំណើរមកដល់កម្ពុជា នាព្រឹកថ្ងៃទី 27 ខែមេសា ឆ្នាំ2023។

បន្ទាប់ពីបានដង្ហែនៅតាមបណ្តាប្រទេសអាស៊ាន ប្រកបដោយជោគជ័យ ព្រះអគ្គិជ័យកីឡា នៃស៊ីហ្គេម និងអាស៊ានប៉ារ៉ាហ្គេម ឆ្នាំ 2023 បានធ្វើដំណើរមកដល់កម្ពុជាតាមច្រកព្រំដែនអន្ដរជាតិត្រពាំងគ្រៀល-ណងណុកឃៀន នៃខេត្តស្ទឹងត្រែង និងខេត្តចំប៉ាសាក់ នាព្រឹកថ្ងៃទី 27 ខែមេសា ឆ្នាំ2023។ នេះបើតាមទំព័របណ្ដាញសង្គមផ្លូវការរបស់ គណៈកម្មការធិការជាតិ CAMSOC។

ឯកឧត្តម ស៊ុន ចាន់ថុល ទេសរដ្ឋមន្ដ្រី រដ្ឋមន្ដ្រីក្រសួងសាធារណការ និងដឹកជញ្ជូន និងជាអនុប្រធានគណៈកម្មការធិការជាតិ CAMSOC រួមជាមួយអាជ្ញាធរខេត្តស្ទឹងត្រែង និងប្រជាពលរដ្ឋជាច្រើន បានអញ្ជើញទទួលស្វាគមន៍ការមកដល់ព្រះអគ្គិជ័យកីឡាដោយភាពសប្បាយរីករាយ។

April 27, 2023

ប្រព័ន្ធផ្សព្វផ្សាយវៀតណាមថា ម្ចាស់ផ្ទះកម្ពុជាធ្វើឱ្យការប្រកួតបើកឆាករបស់ U-22 វៀតណាម ច្របូកច្របល់

អ្នកគាំទ្រជាច្រើនរបស់ក្រុមបាល់ទាត់វៀតណាមជួបការលំបាកក្នុងការមកលើកទឹកចិត្តដល់កូនសិស្ស និងគ្រូបង្វឹករបស់ក្រុមបាល់ទាត់បុរសជម្រើសជាតិវៀតណាមនៅស៊ីហ្គេមលើកទី 32។ នេះបើតាមការចុះផ្សាយរបស់បណ្ដាញផ្សព្វផ្សាយមួយរបស់វៀតណាម។

គេហទំព័រកីឡាមួយរបស់វៀតណាម បានសរសេរថា ការលក់សំបុត្រដោយមិនយកថ្លៃរបស់ម្ចាស់ផ្ទះកម្ពុជាសម្រាប់ស៊ីហ្គេមលើកនេះ ធ្វើឱ្យការងារបោះពុម្ព និងការបែងចែកសំបុត្រចូលទស្សនាមានការយឺតយ៉ាវ។

«U-22 វៀតណាម និង U-22 ឡាវ នឹងត្រូវប្រកួតបើកឆាករបស់ខ្លួននៅវេលាម៉ោង 19 ថ្ងៃទី 30 មេសាខាងមុខ ប៉ុន្តែមកដល់បច្ចុប្បន្ន គម្រោងចែកសំបុត្រចូលទស្សនានៅតែមិនទាន់ត្រូវបានម្ចាស់ផ្ទះកម្ពុជាប្រកាសជាផ្លូវការ» សារព័ត៌មានវៀតណាមសរសេរដូច្នេះ។

តំណាងគណៈកម្មការអូឡាំពិកវៀតណាម ឱ្យដឹងថា បានសាកសួរភាគីកម្ពុជាអំពីផែនការបែងចែកសំបុត្រអញ្ជើញ ពិសេសសម្រាប់អ្នកគាំទ្របាល់ទាត់។ ចំណែកសហព័ន្ធបាល់ទាត់វៀតណាម (VFF) វិញ និយាយថា មិនទាន់ទទួលបានសេចក្ដីជូនដំណឹងជាក់លាក់ណាមួយស្ដីពីរឿងសំបុត្រចូលទស្សនាការប្រកួតនៅថ្ងៃទី 29 មេសា រវាងវៀតណាម និងឡាវនៅឡើយ។

កម្មវិធីទូរស័ព្ទបែងចែកសំបុត្រសម្រាប់ស៊ីហ្គេមលើកទី 32 ទើបតែបង្ហាញសំបុត្រសម្រាប់ការប្រកួតនៅពូល A របស់ U-22 ឥណ្ឌូណេស៊ី vs U-22 ហ្វ៊ីលីពីន និង U-22 កម្ពុជា vs U-22 ទីម័រខាងកើត

យោងតាមសារព័ត៌មានវៀតណាម ប្រការនេះធ្វើឱ្យអ្នកគាំទ្រវៀតណាមដែលមានផែនការមកកម្ពុជាលើកទឹកចិត្តដល់កីឡាកររបស់ពួកគេ ត្រូវជួបការលំបាក។ កម្មវិធីទូរស័ព្ទបែងចែកសំបុត្រសម្រាប់ស៊ីហ្គេមលើកទី 32 ក៏ទើបតែបង្ហាញសំបុត្រសម្រាប់ការប្រកួតចំនួនពីរនៅពូល A គឺ U-22 ឥណ្ឌូណេស៊ី vs U-22 ហ្វ៊ីលីពីន និង U-22 កម្ពុជា vs U-22 ទីម័រខាងកើត។

April 27, 2023

ស្ពានតភ្ជាប់ពីកោះពេជ្រទៅកោះនរា សម្រេចការសាងសង់បាន 70%

ស្ពានកោះនរា ដែលមានតម្លៃ 37 លានដុល្លារអាម៉េរិក បច្ចុប្បន្នសម្រេចការសាងសង់បាន 70% ហើយគ្រោងនឹងសាងសង់រួចរាល់នៅចុងខែវិច្ឆិកា 2023។

ស្ពានកោះនរា ដែលតភ្ជាប់ពីកោះពេជ្រទៅកាន់កោះនរា ស្ថិតក្នុងភូមិកោះនរា សង្កាត់និរោធ ខណៈច្បារអំពៅ រាជធានីភ្នំពេញ សម្រេចការសាងសង់បាន 70% ហើយ នេះបើយោងតាម លោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូនរាជធានីភ្នំពេញ ដែលបានប្រាប់ប្រព័ន្ធផ្សព្វផ្សាយក្នុងស្រុកកាលពីថ្ងៃអង្គារសប្ដាហ៍នេះ។

ស្ពានបេតុងខ្សែកាប់ដែលមានប្រវែង 824 ម៉ែត្រ និងទទឹង 24.50 ម៉ែត្រនេះ ត្រូវបានបើកការដ្ឋានសាងសង់កាលពីថ្ងៃតី 26 តុលា 2020។ ស្ពាននេះនឹងមានតួនាទីយ៉ាងសំខាន់សម្រាប់ការធ្វើដំណើររវាងតំបន់កោះនរា និងតំបន់កោះពេជ្រ ដោយវានឹងជួយកាត់បន្ថយការកកស្ទះចរាចរណ៍នៅតំបន់ផ្សារច្បារអំពៅបានមួយកម្រិត។

April 27, 2023

រូបថតជិតដំបូងស្ដីពីព្រះចន្ទ Deimos របស់ភពព្រះអង្គារ

យានអវកាស Hope របស់អេមីរ៉ាតអារ៉ាប់រួម (UAE) ផ្ដិតយករូបភាពរបស់ Deimos ដែលជាព្រះចន្ទមួយក្នុងចំណោមពីររបស់ភពព្រះអង្គារ បង្ហើបឱ្យដឹងខ្លះៗអំពីហេតុការណ៍ប៉ះទង្គិចគ្នាកាលពីយុគសម័យបុរាណ។

រូបភាពដែលថតបានក្នុងដំណើរហោះហើរក្បែរព្រះចន្ទ Deimos របស់យានអវកាស Hope កាលពីថ្ងៃទី 10 មីនា 2023 បង្ហាញថា ព្រះចន្ទនេះកកើតឡើងពីធាតុផ្សំដែលដូចទៅនឹងភពអង្គារ។ ប្រការនេះបញ្ជាក់ថា Deimos កកើតឡើងដំណាលគ្នានឹងភពអង្គារ ពុំមែនជាអាចម៍ផ្កាយដែលត្រូវបានស្រូបទាញដោយភពអង្គារដូចសម្មតិកម្មមួយចំនួនដែលបានលើកឡើងនាពេលកន្លង។ ការរកឃើញថ្មីនេះត្រូវបានអធិប្បាយនៅក្នុងកិច្ចប្រជុំរបស់សម្ព័ន្ធភូគព្ភសាស្ត្រអឺរ៉ុប (EGU) នៅប្រទេសអូទ្រីស ពីថ្ងៃទី 23 – 28 មេសា 2023។

រូបថតថ្មីនេះបង្ហាញឱ្យឃើញទិដ្ឋភាពភពអង្គារ និងព្រះចន្ទ Deimos ពីជ្រុងមួយដែលមិនធ្លាប់បានឃើញពីមុនមក។ មនុស្សបានបញ្ជូនយានទៅស្រាវជ្រាវភពអង្គារពេញមួយទសវត្សរ៍កន្លង ប៉ុន្តែយានទាំងអស់ភាគច្រើនធ្វើសកម្មភាពក្បែរផ្ទៃភពក្រហមនេះប៉ុណ្ណោះ។ មួយចំហៀងនៃព្រះចន្ទ Deimos តែងបែរទៅរកភពអង្គារដូចទៅនឹងព្រះចន្ទរបស់ផែនដី ដូច្នេះបណ្ដាយានក្បែរភពក្រហមនេះអាចមើលឃើញ Deimos តែមួយចំហៀងប៉ុណ្ណោះ។

Hope ត្រូវបានបាញ់បង្ហោះកាលពីពាក់កណ្ដាលឆ្នាំ 2020 និងហោះទៅដល់ភពអង្គារនៅដើមឆ្នាំ 2021។ នេះគឺជាយានអវកាសអន្តរភពដំបូងរបស់ប្រទេសមួយក្នុងពិភពអារ៉ាប់ និងផ្ដោតលើការស្រាវជ្រាវអំពីការប្រែប្រួលក្នុងបរិយាកាសភពនេះ។ ក្រោយពីសម្រេចភារកិច្ច Hope ក៏ត្រូវបានរុញច្រានឡើងទៅកាន់គន្លងគោចរខ្ពស់ជាងមុន នៅពីលើព្រះចន្ទ Deimos ដែលនេះជួយឱ្យអ្នកវិទ្យាសាស្ត្រថតបានទិដ្ឋភាពពីផ្នែកខាងលើរបស់ព្រះចន្ទនេះ។ នៅក្នុងរូបថតថ្មីនេះ ភពព្រះអង្គារនៅខាងក្រោយព្រះចន្ទ Deimos ។

យោងតាម Space ការរកឃើញថ្មីស្ដីពីព្រះចន្ទ Deimos ដែលមានទំហំប្រហែលតែ 12.4 (15 x 12 x 11) គីឡូម៉ែត្រនេះ ធ្វើឱ្យអ្នកវិទ្យាសាស្ត្រជាច្រើនភ្ញាក់ផ្អើល ព្រោះកន្លងមក ពួកគេតែងគិតថា Deimos គឺជាអាចម៍ផ្កាយដែលត្រូវបានភពអង្គារ «ចាប់ឃាត់ខ្លួន»។ លទ្ធផលនៃការសង្កេតថ្មីបង្ហាញថា ព្រះចន្ទមួយនេះទំនងជាផ្នែកមួយរបស់ភពអង្គារ ដែលបានខ្ទាតចេញទៅកាន់ទីអវកាសនៅក្នុងហេតុការណ៍ប៉ះទង្គិចមួយកាលពីអតីតកាល។ ព្រះចន្ទរបស់ផែនដីក៏ត្រូវបានគេជឿថា កើតឡើងពីហេតុការណ៍ប៉ះទង្គិចដូចគ្នានេះកាលពីរាប់ពាន់លានឆ្នាំមុន៕

April 27, 2023

ម៉ាសនៃកាឡាក់ស៊ីរបស់មនុស្សជាតិ (Milky Way) ធ្ងន់ស្មើនឹងព្រះអាទិត្យជាង 800 ពាន់លានដួង

ទិន្នន័យបានពីស្ថានីយសង្កេតតារា GAIA បានជួយឱ្យក្រុមអ្នកវិទ្យាសាស្ត្រចិនគណនាឃើញថា ម៉ាសរបស់កាឡាក់ស៊ីមីលគីវ៉េគឺស្មើនឹងព្រះអាទិត្យចំនួន 805 ពាន់លានដួង។

តួលេខ 805 ពាន់លានដួងស្ដាប់ទៅដូចធំសម្បើមខ្លាំងណាស់ ប៉ុន្តែតាមពិតវាតូចជាងឆ្ងាយបើធៀបនឹងការគណនារបស់អ្នកវិទ្យាសាស្ត្រអាម៉េរិកមួយក្រុមកាលពីឆ្នាំ 2019។ ដោយសារតែការវាស់ថ្លឹងម៉ាសរបស់មីលគីវ៉េគឺជារឿងមិនអាចទៅរួចសម្រាប់បច្ចេកវិទ្យានាបច្ចុប្បន្ន ដូច្នេះក្រុមអ្នកស្រាវជ្រាវមានតែគណនាតាមការប៉ាន់ប្រមាណ ហើយភាពសុក្រឹតនៃការគណនានេះបានកើនឡើងជាបន្តបន្ទាប់ក្នុងរយៈពេលប៉ុន្មានឆ្នាំចុងក្រោយនេះ។

លទ្ធផលនៃការស្រាវជ្រាវរបស់ក្រុមអ្នកវិទ្យាសាស្ត្រមកពីស្ថានីយជាតិសង្កេតតារានៃបណ្ឌិត្យសភាវិទ្យាសាស្ត្រ និងបច្ចេកវិទ្យាចិន ត្រូវបានប្រកាសលើទស្សនាវដ្ដី Astrophysical Journal ។ នេះបើតាម Interesting Engineering ចុះផ្សាយកាលពីថ្ងៃទី 24 មេសា 2023។

ការស្រាវជ្រាវរបស់ក្រុមអ្នកវិទ្យាសាស្ត្រខាងលើ គឺយោងទៅតាមទិន្នន័យធំជាងមុន ក្នុងនោះមានផ្កាយចំនួន 260,000 ដួង។ ទិន្នន័យភាគច្រើនបានមកពីស្ថានីយសង្កេតតារា GAIA ដែលបានបាញ់បង្ហោះពីប្រទេសបារាំង កាលពីឆ្នាំ 2013។

រូបភាពកាឡាក់ស៊ីមីលគីវ៉េទាំងមូលដែលត្រូវបានបង្កើតឡើងដោយការសិក្សាស្រាវជ្រាវរបស់ក្រុមអ្នកវិទ្យាសាស្ត្រ

យោងតាមទិន្នន័យនានា ក្រុមអ្នកស្រាវជ្រាវបានធ្វើការសង្កេតទៅលើកាឡាក់ស៊ីមីលគីវ៉េ និងវាស់រង្វង់កោងវិលរបស់វា។ រង្វង់កោងនេះបង្ហាញពីល្បឿននៃគន្លងគោចររបស់វត្ថុអវកាសមួយធៀបនឹងគម្លាតអង្កត់ផ្ចិតពីចំណុចកណ្ដាលរបស់កាឡាក់ស៊ីមីលគីវ៉េ។ ក្នុងអត្ថបទចុះផ្សាយនោះ ពួកគេឱ្យដឹងថា ការគណនាថ្មីនេះអនុញ្ញាតឱ្យវាស់វែងបានសុក្រឹតជាងមុនស្ដីពីកម្រិតនៃភាពកោងរបស់មីលគីវ៉េ។ ក៏ប៉ុន្តែ ទិន្នន័យដែលមានផ្កាយតែ 260,000 ដួងនេះនៅតែតូច ព្រោះថា មីលគីវ៉េត្រូវបានគេជឿថា មានផ្ទុកផ្កាយយ៉ាងតិច 100 ពាន់លានដួង។

កាលពីឆ្នាំ 2019 អ្នកវិទ្យាសាស្ត្រអាម៉េរិកមួយក្រុមបានគណនាឃើញថា កាឡាក់ស៊ីមីលគីវ៉េ មានម៉ាសស្មើនឹងព្រះអាទិត្យ 1.5 ពាន់លានដួង។

April 27, 2023

ក្រុមបាល់ទាត់ជម្រើសជាតិ U-22 ថៃ ប្រកាសបញ្ជីឈ្មោះកីឡាករដែលនឹងប្រកួតក្នុងស៊ីហ្គេមនៅកម្ពុជា

នៅក្នុងបញ្ជីឈ្មោះស្ដីពីកីឡាករ 20 រូបរបស់ក្រុម U-22 ថៃ ដែលនឹងចូលរួមប្រកួតនៅស៊ីហ្គេមលើកទី 32 ក៏មានកីឡាករសំខាន់បីរួប រួមមាន Jonathan Khemdee, Teerasak Poeiphimai និង Airafan Doloh ។

សហព័ន្ធបាល់ទាត់ថៃ បានប្រកាសជាផ្លូវការនូវបញ្ជីឈ្មោះកីឡាករ 20 រូបដែលនឹងត្រូវចូលរួមព្រឹត្តិការណ៍ប្រកួតកីឡាអាស៊ីអាគ្នេយ៍ (ស៊ីហ្គេម) លើកទី 32 នៅកម្ពុជា។ នៅក្នុងបញ្ជីឈ្មោះនេះ ខ្សែការពារ Jonathan Khemdee, ខ្សែប្រយុទ្ធ Teerasak Poeiphimai និងខ្សែបម្រើ Airafan Doloh សុទ្ធតែមានវត្តមាន។

ក្រៅពីនេះ កីឡាករពីររូបដែលទាត់នៅអឺរ៉ុប គឺ Chayapipat និង Achitpol Keereerom ក៏មានឈ្មោះនៅក្នុងបញ្ជី U-22 ថៃផងដែរ។ គ្រូបង្វឹក Issataro របស់ថៃ នាំយកអ្នកចាំទីមកកាន់ស៊ីហ្គេមតែពីររូបប៉ុណ្ណោះ រួមមាន Thirawoot Sraunson និង Soponwit Rakyart ។

ខ្សែការពាររបស់ U-22 ថៃ នៅស៊ីហ្គេមលើកនេះមាន 7 នាក់ រួមមាន Khemdee, Apisit Saenseekammuan, Chatmongkol Rueangthanarot, Songchai Thongcham, Bukkoree Lemdee, Jakkapong Sanmahung និង Pongsakorn Trisat។ ខ្សែបម្រើរួមមាន Airfan Doloh, Chayapipat Supunpasuch, Purachet Thodsanit, Settasit Suvannaseat, Channarong Promsrikaew, Thirasak Prueangna, Anan Yodsangwal និង Leon James ។ ចំណែកខ្សែប្រយុទ្ធមានបីនាក់ គឺ Teerasak Poeiphimai, Yotsakorn Burapha និង Achitpol Keereerom ។

Teerasak Poeiphimai ក៏មានឈ្មោះក្នុងបញ្ជីផ្លូវការស្ដីពីកីឡាករដែលត្រូវចូលរួមប្រកួតនៅស៊ីហ្គេមកម្ពុជា

យោងតាមផែនការ ថ្ងៃទី 27 មេសានេះ ក្រុម U-22 ថៃ នឹងធ្វើដំណើរមកកម្ពុជា ដើម្បីត្រៀមខ្លួនចូលប្រកួតនៅស៊ីហ្គេម។ គោលដៅរបស់ពួកគេគឺមេដាយមាសកីឡាបាល់ទាត់ ដែលបច្ចុប្បន្នក្រុមវៀតណាមគឺជាអ្នកការពារ។

កាលវិភាគនៃការប្រកួតបង្ហាញថា U-22 ថៃ នឹងចាប់ផ្ដើមដំណើរការឆ្ពោះទៅរកមេដាយដោយការប៉ះនឹងក្រុម U-22 សិង្ហបុរី នៅថ្ងៃទី 30 មេសាខាងមុខ។ បន្ទាប់មក U-22 ថៃ នឹងត្រូវប្រកួតជាមួយ U-22 ម៉ាឡេស៊ីនៅថ្ងៃទី 06 ឧសភា និង ឡាវនៅថ្ងៃទី 08 ឧសភា។ ចំណែកការប្រកួតចុងក្រោយរបស់ថៃនៅវគ្គចែកពូល នឹងធ្វើឡើងនៅថ្ងៃទី 11 ឧសភា ដោយត្រូវប៉ះក្រុមវៀតណាម៕

April 27, 2023

វត្ថុធាតុចម្លងកម្រិតខ្ពស់ជួយរុញច្រានរថយន្តឱ្យបរក្នុងល្បឿនជាង 600 គីឡូម៉ែត្រ/ម៉ោង

ក្រុមអ្នកវិទ្យាសាស្ត្រនៅសាកលវិទ្យាល័យ Houston សហរដ្ឋអាម៉េរិក ស្នើឱ្យប្រើប្រាស់វត្ថុធាតុចម្លងកម្រិតខ្ពស់ដើម្បីរុញច្រានរថយន្តដឹកអ្នកដំណើរ និងទំនិញ ឱ្យរត់ក្នុងល្បឿនយ៉ាងលឿនតាមបណ្ដោយហេដ្ឋារចនាសម្ព័ន្ធដែលបំពាក់ក្នុងផ្លូវល្បឿនលឿននាបច្ចុប្បន្ន។

គំនិតដែលលើកឡើងដោយក្រុមអ្នកស្រាវជ្រាវខាងលើ មិនត្រឹមតែមានសក្ដានុពលក្នុងការកាត់បន្ថយការចំណាយលើដំណើរការរបស់ប្រព័ន្ធនីមួយៗនោះតែ តែថែមទាំងផ្លាស់ប្ដូរវិធីរក្សាទុក និងការដឹកជញ្ជូនអ៊ីដ្រូសែនរាវដែលត្រូវបានចាត់ទុកថាជាប្រភពថាមពលស្អាតសំខាន់មួយក្នុងអនាគត។ អ៊ីដ្រូសែននឹងត្រូវបានប្រើប្រាស់ដើម្បីបញ្ចុះកម្ដៅបណ្ដាញដែលស្ថាបនាពីវត្ថុធាតុចម្លងកម្រិតខ្ពស់ កាត់បន្ថយតម្រូវការស្ថាបនាបណ្ដាញលូពិសេសសម្រាប់បញ្ចុះកម្ដៅវត្ថុធាតុចម្លងបានរហូតដល់ -253.3 អង្សាសេ។ សំណើខាងលើនេះត្រូវបានចុះផ្សាយលើទស្សនាវដ្ដី APL Energy និងត្រូវបានទំព័រ Interesting Engineering ផ្សាយបន្តកាលពីថ្ងៃទី 25 មេសា 2023។

ការភ្ជាប់វត្ថុធាតុចម្លងកម្រិតខ្ពស់ (superconductor) ទៅក្នុងផ្លូវល្បឿនលឿននាបច្ចុប្បន្ន និងការបន្ថែមមេដែកទៅក្នុងរថយន្ត នឹងជួយលុបបំបាត់តម្រូវការបញ្ចុះកម្ដៅវត្ថុធាតុចម្លងកម្រិតខ្ពស់នៅលើរថយន្ត។ រូបមន្តនេះគឺយោងទៅលើអ៊ីដ្រូសែនដើម្បីបញ្ចុះកម្ដៅវត្ថុធាតុចម្លងកម្រិតខ្ពស់ នៅពេលរថយន្តផ្លាស់ទីតាមបណ្ដោយប្រព័ន្ធនេះ។

បច្ចេកវិទ្យាវត្ថុធាតុចម្លងកម្រិតខ្ពស់ (Superconductivity) កំពុងត្រូវបានយកមកប្រើប្រាស់ ព្រោះវាជួយឱ្យវត្ថុមួយអាចអណ្ដែតខ្លួនក្នុងបរិយាកាស

យោងតាមក្រុមអ្នកស្រាវជ្រាវ នៅពេលមធ្យោបាយដឹកជញ្ជូនដែលមានគ្រោងឆ្អឹងបំពាក់ម៉ាញ៉េទិច ចូលដល់បណ្ដាញផ្លូវទំនើបនេះ វានឹងអណ្ដែត និងផ្លាស់ទីក្នុងល្បឿនលឿន ឆ្ពោះទៅកាន់គោលដៅ។ បន្ទាប់ពីមធ្យោបាយដឹកជញ្ជូនបានចាកចេញពីផ្លូវទំនើបនេះ វានឹងធ្វើដំណើរតាមបែបធម្មតា ដូចទៅនឹងរថយន្តបច្ចុប្បន្ន។

ប្រព័ន្ធបែបនេះអាចធ្វើឱ្យចរាចរណ៍ផ្លូវអាកាស និងការដឹកជញ្ជូនទំនិញដូចសព្វថ្ងៃ ក្លាយជារឿងហួសសម័យ ព្រោះថា វាអនុញ្ញាតឱ្យមធ្យោបាយធ្វើដំណើរផ្ទាល់ខ្លួន និងពាណិជ្ជកម្ម ផ្លាស់ទីក្នុងល្បឿន 645 គីឡូម៉ែត្រ/ម៉ោង ហើយអាចលឿនជាងនេះទ្វេដង។ នេះបើតាម Zhifeng Ren ប្រធានមជ្ឈមណ្ឌលវត្ថុធាតុចម្លងកម្រិតខ្ពស់នៅរដ្ឋ Texas សហរដ្ឋអាម៉េរិក។

រថភ្លើងល្បឿនលឿនទំនើបដែលបំពាក់បច្ចេកវិទ្យា Maglev នេះ ក៏ប្រើបច្ចេកវិទ្យា Superconductivity

ប្រព័ន្ធខាងលើក៏នឹងចូលរួមកាត់បន្ថយការប្រើប្រាស់ឥន្ធនៈ ឬអគ្គិសនីបានយ៉ាងច្រើនផងដែរ។ ទន្ទឹមនឹងនេះ រថយន្តដែលបរលើប្រព័ន្ធនេះក៏ជួយកាត់បន្ថយការចំណាយ និងការបំភាយឧស្ម័នពុលទៅក្នុងបរិស្ថាន៕

April 27, 2023

ឥណ្ឌូណេស៊ីបញ្ជាទិញយន្តហោះចម្បាំង 18 គ្រឿងទៀតពីបារាំង

ការបញ្ជាទិញយន្តហោះចម្បាំង 18 គ្រឿងបន្ថែមទៀតនេះ គឺស្ថិតក្នុងចំណោមយន្តហោះចម្បាំង Rafale 42 គ្រឿងដែលទីក្រុងហ្សាការ៉ាតាគ្រោងនឹងបញ្ជាទិញពីប្រទេសបារាំង ដើម្បីធ្វើទំនើបកម្មកម្លាំងទ័ពអាកាសរបស់ឥណ្ឌូណេស៊ី។

បណ្ដាញផ្សព្វផ្សាយឥណ្ឌូណេស៊ី កាលពីថ្ងៃទី 26 មេសា ដកស្រង់ប្រភពព័ត៌មានពីសារព័ត៌មាន La Tribune របស់បារាំង ឱ្យដឹងថា ប្រទេសឥណ្ឌូណេស៊ីនឹងបញ្ជាទិញយន្តហោះចម្បាំង Rafale ចំនួន 18 គ្រឿងបន្ថែមទៀត នៅក្នុងកិច្ចព្រមព្រៀងតម្លៃ 2.3 ពាន់លានដុល្លារអាម៉េរិក។

ប្រភពព័ត៌មានឱ្យដឹងថា ឥណ្ឌូណេស៊ីបានធានាចំពោះប្រភពហិរញ្ញវត្ថុសម្រាប់ការទិញយន្តហោះចម្បាំងទាំងនោះ ក៏ដូចជាបណ្ដាមីស៊ីលអាកាសប្រឆាំងអាកាស។

កិច្ចព្រមព្រៀងទិញយន្តហោះចម្បាំង Rafale 18 គ្រឿងបន្ថែមទៀតនេះអាចនឹងត្រូវបានចុះហត្ថលេខាជាផ្លូវការនៅក្នុងដំណើរទស្សនកិច្ចនៅប្រទេសបារាំងនាពេលខាងមុខរបស់រដ្ឋមន្ត្រីក្រសួងការពារជាតិឥណ្ឌូណេស៊ី Prabowo Subianto។

មុននោះ កាលពីខែកញ្ញា 2022 រដ្ឋមន្ត្រីក្រសួងការពារជាតិ Prabowo ក៏បានចុះហត្ថលេខាលើកិច្ចព្រមព្រៀងទិញយន្តហោះចម្បាំង Rafale ចំនួន 6 គ្រឿងដំបូងដែលមានតម្លៃសរុប 1.1 ពាន់លានដុល្លារអាម៉េរិក។

Rafale ដែលជាយន្តហោះចម្បាំងប្រតិកម្មរហ័សដ៏ទំនើប មានម៉ាស៊ីនពីរគ្រឿង ត្រូវបានផលិតដោយក្រុមហ៊ុន Dassault Aviation និងត្រូវបានដាក់ឱ្យប្រើប្រាស់នៅក្នុងជួរកងទ័ពបារាំង។ យន្តហោះនេះអាចតាមដានគោលដៅចំនួន 8 ក្នុងពេលតែមួយ និងបំពាក់មីស៊ីលបាញ់ក្នុងអាកាស ASRAAM, AMRAAM , មីស៊ីលកម្ទេចផ្លូវរត់ក្នុងព្រលានយន្តហោះ Apache រួមនឹងមីស៊ីលប្រឆាំងនាវាចម្បាំង Harpoon ជាដើម៕

April 27, 2023

Author: សឿន សំណាង