អេបិល - La Reine Media

កុំឱ្យខកខាន!! មហោស្រពភាពយន្តអន្តរជាតិកម្ពុជាត្រឡប់មកវិញហើយ

ព្រឹត្តិការណ៍វប្បធម៌ជាលក្ខណៈអន្តរជាតិធំជាងគេបង្អស់នៅកម្ពុជាបានត្រឡប់មកជាថ្មីម្ដងទៀតហើយ! មហោស្រពភាពយន្តអន្តរជាតិកម្ពុជាលើកទី៩ នឹងធ្វើការបង្ហាញជូននូវខ្សែភាពយន្តរហូតដល់ទៅជាង 130 ចំណងជើង មកពី 37 ប្រទេសនៅទូទាំងពិភពលោក ក្នុងនោះរួមមានទាំងភាពយន្តខ្នាតខ្លី ភាពយន្តខ្នាតធំ ភាពយន្តឯកសារ ព្រមទាំងគំនូរជីវចល។

លោក ស៊ុន ខេមរ៉ា ជាអ្នកសម្របសម្រួលកម្មវិធីក្នុងមហោស្រពភាពយន្តអន្តរជាតិកម្ពុជា បានប្រាប់សារព័ត៌មានឡារ៉ែនឱ្យដឹងថា ជារៀងរាល់ឆ្នាំ មហោស្រពរបស់យើងតែងតែបង្ហាញជូននូវខ្សែភាពយន្តដែលផលិត និងនិយាយអំពីប្រទេសកម្ពុជា រួមមានខ្សែភាពយន្តប្រតិដ្ឋដែលនិយាយអំពីកម្ពុជា។ ក្នុងនោះក៏មានខ្សែភាពយន្តមួយចំនួននឹងត្រូវចាក់បញ្ចាំងជាលើកដំបូងបង្អស់លើទឹកដីប្រទេសកម្ពុជាផងដែរ ដូចជាខ្សែភាពយន្តរឿង «ហ៊្វូណន» (ភាពយន្តជាប់ពានរង្វាន់ក្នុងមហោស្រពភាពយន្តគំនូរជីវចលទីក្រុងអានស៊ី ឆ្នាំ 2018) រឿង «ផ្នូរគ្មានឈ្មោះ» (មហោស្រពភាពយន្តទីក្រុងវេនីស, បេក្ខភាពពានរង្វាន់អូស្ការ ឆ្នាំ 2019 តំណាងឲ្យកម្ពុជា) រឿង «តន្ត្រីជីវិត» (មហោស្រពភាពយន្តអន្តរជាតិទីក្រុងតូក្យូ) រឿង «The Prey» (មហោស្រពភាពយន្តអន្តរជាតិទីក្រុងប៊ូសាន ឆ្នាំ 2018) ។

លោកថា កម្មវិធីភាពយន្តពិសេសក្នុងមហោស្រពឆ្នាំនេះ គឺកម្មវិធី ប្រឈមមុខនឹងការប្រល័យពូជសាសន៍។ ៤ទសវត្សរ៍ក្រោយការដួលរលំនៃរបបខ្មែរក្រហម ដែលនឹងបង្ហាញជូននូវខ្សែភាពយន្តខ្នាតធំ ក៏ដូចជាខ្សែភាពយន្តឯកសារល្បីៗ ដែលនិយាយអំពីរបបប្រល័យពូជសាសន៍នៅកម្ពុជា។ កម្មវិធីដ៏ពិសេសនេះក៏រួមបញ្ចូលផងដែរនូវការតាំងពិព័រណ៍ស្នាដៃសិល្បៈ ព្រមទាំងកិច្ចពិភាក្សា ដែលនឹងប្រព្រឹត្តទៅនៅឯមជ្ឈមណ្ឌលបុប្ផាណា។

លោកបញ្ជាក់ថា កម្ពុជាមានរឿងដល់ទៅ 26 ចំណងជើង ដែលគិតជាភាគរយគឺមានចំនួនច្រើនបំផុតធៀបទៅនឹងមហោស្រពភាពយន្តអន្តរជាតិនៅបរទេស។ ចាប់ពីថ្ងៃទី 9 ដល់ថ្ងៃទី 14 ខែមីនានេះ មហោស្រពភាពយន្តរបស់យើងនឹងធ្វើការចាក់បញ្ចាំងខ្សែភាពយន្តចំនួន 150 លើក នៅតាមរោងភាពយន្តធំៗមួយចំនួនក្នុងរាជធានីភ្នំពេញ ក្នុងនោះរួមមាន រោងភាពយន្តលេជេន, រោងភាពយន្តម៉េជ័រស៊ីណេផ្លិច, រោងភាពយន្តប្រែមស៊ីណេផ្លិច, មជ្ឈមណ្ឌលបុប្ផាណា, សាលមហោស្រពចតុម្មុខ, និងសណ្ឋាគាររ៉ូសវូដ៕

រូបភាព៖ Neth Udom Princess Little

March 5, 2019

ណាំ ប៊ុណ្ណារ័ត្ន បោះសម្ដីទៅកាន់ លោក ផែន បូទី រឿងធ្វើបទភ្លេងចម្លងគេ

ថ្មីៗនេះតារាចម្រៀង និងនិពន្ធបទភ្លេងលោក ណាំ ប៊ុណ្ណារ័ត្ន ជាមួយលោក ផែន បូទី ដែលបង្កការភ្ញាក់ផ្អើលពេញបណ្តាញសង្គមហ្វេសប៊ុក។ ក្នុងនោះដែរក៏មានការឌឺឌងគ្នាទៅវិញទៅមក ក្រោយផ្ទុះការរិះគន់បទថ្មីរបស់ នាយ ចឺម ចំណងជើងថា «អូនជាអ្នកមាន សមនឹងអ្នកមានដូចគ្នា» ដែលជាបទយកតាមលំនាំបទរបស់កវីម្ចាស់ស្ទឹងសង្កែលោក គង្គ ប៊ុនឈឿន ចំណងជើងថា «ថ្ងៃដែលអូនចុកឈាម ឬ នឹកភូមិភ្នំធំ» មកកែទំនុកថែមទាំងមិនបានដាក់ប្រភពដើម និងដាក់ថាខ្លួនជានិពន្ធបទភ្លេងទៀតថែមទៀតផង។

ណាំ ប៊ុណ្ណារ័ត្ន ត្រូវបានអ្នកនិពន្ធភ្លេង បូទី ប្រមាថថា ខ្លួនគ្មានបទថ្មីច្រៀង ច្រៀងតែបទចម្លងពីបរទេស ដែលការប្រមាថនេះ ធ្វើឱ្យលោកក្ដីស្លឹកត្រចៀកខ្លាំងណាស់។ ដោយសាររងការប្រមាថពីសិស្សប្អូនជំនាន់ក្រោយលោក ណាំ ប៊ុណ្ណារ័ត្ន បានបង្ហោះវីដេអូនិយាយបកស្រាយដែលលោក បូទី ដៀល ថារៀបរាប់ថា៖ «លោកមិនបានលួចយកនោះទេ ដោយលោកធ្វើតាមតែមេប្រាប់ប៉ុណ្ណោះ លោកក៏បានបញ្ជាក់ផងដែរថាខាងផលិតកម្ម អឹម ក៏មិនមែនមិនមានបទថ្មី ចាំតែចម្លងពីបរទេសដែរ បទល្បីៗជាច្រើនសុទ្ធតែជាទំនុកថ្មី ភ្លេងថ្មី ជាក់ស្តែងដូចជាបទ មួយនាទី ហត់នឿយ របស់កញ្ញា មាស សុខសោភា ជាដើម។ តែអ្វីដែលលោកធ្វើគឺតម្រូវតាមទីផ្សា ដោយសារសម័យកាលនោះគេមិនបានចាប់អារម្មណ៍ចង្វាក់ភ្លេងថ្មីនោះទេ ដូច្នេះហើយទើបបទនិពន្ធថ្មីមិនសូវល្បីល្បាញ និងមិនសូវមានលើទីផ្សារ»៕

ជាក់ច្បាស់សូមទស្សនាវីដេអូខាងក្រោមនេះ៖

March 5, 2019

ក្រុម TN Kandal “A” ដឹកដៃជើងខ្លាំង៣ក្រុមទៀត នៃទីលាន Tiger Street Football Festival 2019 ទៅវគ្គផ្តាច់ព្រ័ត្រនៅភ្នំពេញ

ខេត្តកណ្តាល ៖ ព្រឹត្តិការណ៍ការប្រកួតនៃក្របខណ្ឌពានរង្វាន់ Tiger Street Football Festival 2019 បានរកឃើញបេក្ខជន៤ក្រុមទៀត ខណៈក្រុម TN Kandal “A” រក្សាជើងឯកប្រចាំមណ្ឌលខេត្តកណ្តាល បន្ទាប់យកឈ្នះលើក្រុម SERV “A” ៣ ទល់ ២ នៅវគ្គផ្តាច់ព្រ័ត្រ នាយប់ថ្ងៃទី៣ ខែមីនា ឆ្នាំ២០១៩ នេះនៅមណ្ឌលទី៨ នាសួនច្បារច្រមុះជ្រូកមាត់ទន្លេ ក្រុងតាខ្មៅ ខេត្តកណ្តាល ដោយការប្រកួតមាន៤៦ក្រុម។

សម្រាប់ក្រុម TN Kandal “A” មុននឹងបានគ្រងតំណែងជើងឯកប្រចាំមណ្ឌលខេត្តកណ្តាលដោយយកឈ្នះក្រុម Blue Moon “A” លទ្ធផល ៥ទល់២ និងក្រុម SERV “A” យកឈ្នះក្រុមព្រែកប្រាកីឡា “A” លទ្ធផល ៤ទល់៣ នៅវគ្គពាក់កណ្តាលផ្តាច់ព្រ័ត្រ ។ ចំពោះផ្តាច់ព្រ័ត្រក្រុម TN Kandal “A” យកឈ្នះលើក្រុម SERV “A” ៣ទល់២ ហើយក្រុមព្រែកប្រាកីឡា “A” ដណ្តើមបានចំណាត់ថ្នាក់លេខ៣ ក្រោយឈ្នះក្រុមក្រុម Blue Moon “A” លទ្ធផល៣ទល់២ ។

ចំពោះរង្វាន់ក្រុមជើងឯកមណ្ឌលកណ្តាល គឺក្រុម TN Kandal “A” ទទួលបានប្រាក់រង្វាន់១,០០០ដុល្លារ ក្រុមជើងឯករងបានទៅលើក្រុម SERV “A” ប្រាក់រង្វាន់៧០០ដុល្លារ ក្រុមចំណាត់ថ្នាក់លេខ៣បានទៅ លើក្រុមព្រែកប្រាកីឡា “A”ប្រាក់រង្វាន់៣៥០ដុល្លារ ក្រុមចំណាត់ថ្នាក់លេខ៤ បានទៅលើក្រុម Blue Moon “A” ទទួលបានប្រាក់រង្វាន់១៥០ដុល្លារ ។ ដោយឡែកមណ្ឌលខេត្តកណ្តាលដែលជាមណ្ឌលទី៨នេះគណៈកម្មាធិការរៀបចំការប្រកួតយក៤ក្រុមដើម្បីទៅ ចូលរួមការប្រកួតវគ្គផ្តាច់ព្រ័ត្រទូទាំងប្រទេសនៅរាជធានីភ្នំពេញ ថ្ងៃទី១៦ និងទី១៧ មីនា ២០១៩ ខាងមុខនេះ ជាពិសេសមានឱកាសជួបផ្ទាល់ជាមួយកំពូលតារាបាល់ទាត់ពិភពលោកគឺកីឡាករបាល់ទាត់ Ronaldinho។

បន្ទាប់ពីការប្រកួតបានបញ្ចប់ក៏មានការប្រគំតន្ត្រីដ៏អស្ចារ្យ នាពេលរាត្រីដោយមានការចូលរួមពីសំណាក់ កំពូលតារាចម្រៀងល្បីៗជាច្រើនរូបក្នុងប្រទេសកម្ពុជារួមមាន លោក ព្រាប សុវត្ថិ កញ្ញា ពេជ្រ សោភា លោក នី រតនា កញ្ញា ឈិន ម៉ានិច កញ្ញា រ៉េត ស៊ូហ្សាណា និងឌីជេ Maily ។ ហើយតារាចម្រៀងទាំងអស់បាន លើកយកសុទ្ធសឹង ជាបទញ៉ាក់កន្ត្រាក់អារម្មណ៍ ជាហេតុធ្វើឲ្យ អ្នកគាំទ្រ នៅក្រុងតាខ្មៅសប្បាយរីករាយ និងរាំកម្សាន្តទៅតាមចង្វាក់ភ្លេង យ៉ាងសប្បាយរីករាយ គ្រប់គ្នាពេញខាងមុខឆាកតន្រ្តី។

ស្រាបៀរថៃហ្គ័រជាស្រាបៀរដែលមានគុណភាពខ្ពស់លំដាប់ថ្នាក់អន្តរជាតិមានដើមកំណើតតាំងពីឆ្នាំ១៩៣២នៅប្រទេសសិង្ហបុរី និងមានលក់នៅច្រើនជាង៧០ប្រទេសនៅទូទាំងពិភពលោក ហើយស្រាបៀរថៃហ្គ័រឈ្នះ ពានរង្វាន់លំដាប់ថ្នាក់អន្តរជាតិច្រើនជាង៤០មេដាយផ្នែករសជាតិ និងគុណភាព។

សូមចូលទៅកាន់ទំព័រហ្វេសប៊ុកផ្លូវការ របស់ស្រាបៀរថៃហ្គ័រ៖ www.facebook.com/TigerBeerKH
ពិសាដោយការទទួលខុសត្រូវ៕

March 5, 2019

ក្រុមហ៊ុន ឃាង ហួត អ៊ិនធើណេសិនណល ខូអិលធីឌី ប្រារព្វពិធីសម្ពោធការិយាល័យកណ្តាលប្រចាំកម្ពុជា

ផ្សារភ្ជាប់ជាមួយនឹងភាពរីកចម្រើន និងជោគជ័យជាបន្តបន្ទាប់អស់រយៈពេលប្រមាណជាង១០ឆ្នាំទៅលើដំណើរប្រតិបត្តិការអាជីវកម្មផ្តាច់មុខទៅលើបណ្តាផលិតផលល្បីៗមួយចំនួនដូចជា ភេសជ្ជៈប៉ូវកម្លាំង ខារ៉ាបាវ, តែបៃតង អ៊ីឈីតាន់, ថ្នាំដុសធ្មេញសញ្ញាផ្កាឈូក២, ប្រេងកូឡារូបតាប៉ិ, ត្រីខកំប៉ុងត្រាមកុដ, ទឹកត្រចៀកកាំដបមាស រួមជាមួយនឹងបណ្តាផលិតផលផ្សេងៗមួយចំនួនទៀតនោះ នៅត្រឹមល្ងាចថ្ងៃទី០៣ ខែមីនា ឆ្នាំ២០១៩ ម្សិលមិញនេះ ក្រុមហ៊ុន ឃាង ហួត អ៊ិនធើណេសិនណល ខូអែលធីឌី បានប្រារព្វពិធីបើកសម្ពោធដាក់ឱ្យដំណើរការជាផ្លូវការនូវអាគារការិយាល័យកណ្តាលដែលមានកម្ពស់ចំនួន ០៩ជាន់ ស្ថិតនៅខាងលិចផ្សារអូឡាំពិក រាជធានីភ្នំពេញ។

នៅក្នុងពិធីនៃការកាត់ខ្សែបូរណ៍ប្រកាសបើកសម្ពោធដាក់ឱ្យដំណើរការជាផ្លូវការអាគារដ៏ប្រណីតដែលមានទីតាំងស្ថិតនៅអាសយដ្ឋានដូចបានបង្ហាញជូនខាងលើនេះ គេសង្កេតឃើញមានវត្តមានរបស់បណ្តាអ្នកជំនួញដែលជាដៃគូចែកចាយ និងវិនិយោគជាមួយក្រុមហ៊ុន ឃាង ហួត ជាច្រើន ជាពិសេស វត្តមានរបស់ម្ចាស់ក្រុមហុនល្បីៗមកពីប្រទេសថៃផងដែរ ដែលក្នុងនោះរួមមានដូចជាលោក Sathien Setthasit អគ្គនាយកក្រុមហ៊ុន CARABAO Group , លោក Tan Passakornatee អគ្គនាយកក្រុមហ៊ុន ISHITAN Group PLC , លោក Sophon Sariwatta អគ្គនាយកក្រុមហ៊ុន A & H International Co., Ltd , លោក ប៊ុន តាំង អគ្គនាយកក្រុមហ៊ុន T.T.S BERVERAGE Co.,Ltd , លោក Bundid Leelertpan អគ្គនាយកក្រុមហ៊ុន TWIN LOTUS Co.,Ltd ផងដែរ។

លោក ហ៊ឹម ទ្រី អគ្គនាយក ក្រុមហ៊ុន ឃាង ហួត បានមានប្រសាសន៍ថា វាគឺជាមោទនភាពបំផុត សម្រាប់ភាពរីកចម្រើនរបស់ក្រុមហ៊ុន ឃាង ហួត យើងខ្ញុំ ក្រោមការចូលរួមសហការវិនិយោគរួមគ្នារវាងបណ្តាក្រុមហ៊ុនល្បីៗជាច្រើនដូចដែលមានរៀបរាប់ជូនខាងលើនេះស្រាប់។ ជាមួយនឹងលទ្ធផលដ៏ល្អប្រសើរនាពេលនេះ ក្នុងនាមខ្ញុំជាអគ្គនាយក និងជាអ្នកគ្រប់គ្រងក្រុមហ៊ុន ឃាង ហួត នឹងប្តេជ្ញារបន្តដំណើរនៃមុខជំនួញជាដៃគូយ៉ាងជិតស្និទ្ធទៅមុខទៀត រួមនឹងការទទួលយកជោគជ័យទាំងអស់គ្នាបន្តទៀត។

សូមបញ្ជាក់ផងដែរថា នៅក្នុងឱកាសនៃការប្រារព្វពិធីសម្ពោធដាក់ឱ្យដំណើរការនូវអាគារដ៏ប្រណីតនៃទីស្នាក់ការ ការិយាល័យកណ្តាលរបស់ក្រុមហ៊ុន ឃាង ហួត ខាងលើនេះ គ្រប់បណ្តាភ្ញៀវកិត្តិយសទាំងអស់ដែលបានចូលរួម ក៏ដូចជាបុគ្គលិករបស់ក្រុមហ៊ុនផងដែរ សុទ្ធតែបានរីករាយជាមួយនឹងកម្មវិធីសប្បាយៗ ដូចជាការទទួលទានអាហារជុំគ្នា ជាមួយនឹងការស្តាប់ការប្រគំតន្ត្រីយ៉ាងពិរោះប្រកបដោយភាពរីករាយ៕

March 5, 2019

លោក Klopp នៅតែជឿជាក់លើ Liverpool ទោះបីបាត់បង់ការនាំមុខលើតារាង

ក្រុម Liverpool បានជួបការសោកស្តាយយ៉ាងខ្លាំងចំពោះការខ្ជះខ្ជាយឱកាសដ៏ល្អចំនួន 2លើក ពីសំណាក់ខ្សែប្រយុទ្ធ Mohamed Salah ខណៈដែលក្រុម Everton បានធ្វើឱ្យពួកគេទទួលបានត្រឹមលទ្ធផលស្មើ ០-០ ក្នុងការប្រកួតរវាងក្រុមស្ថិតក្នុងទីក្រុង Merseyside កាលពីថ្ងៃអាទិត្យ។

បច្ចុប្បន្នក្រុមរបស់លោក Jurgen Klopp ដេញតាមពីក្រោយក្រុមម្ចាស់ការពារតំណែងជើងឯក Manchester City ចំនួន 1ពិន្ទុ នៅលើកំពូលតារាងនៃក្របខ័ណ្ឌ Premier League ខណៈដែលនៅសល់ការប្រកួតត្រឹមតែ 9លើកទៀតប៉ុណ្ណោះ។

ការស៊ុតបាល់របស់ Salah ត្រូវបានជួយសង្គ្រោះដោយអ្នកចាំទី Jordan Pickford របស់ Everton ខណៈដែលក្រុម Liverpool បានបាត់បង់ពិន្ទុជាលើកទី4 ក្នុងចំណោមការប្រកួតលីក 4លើកចុងក្រោយរបស់ពួកគេ។

លោក Klopp បានឱ្យដឹងថា៖ «ខ្ញុំមិនចាំបាច់ត្រូវផ្តល់ដំបូន្មានដល់កីឡាកររបស់ខ្ញុំទេ ព្រោះពួកគេដឹងរួចទៅហើយ។ ពួកគេមិនមែននៅក្មេងទៀតទេ»។ គ្រូបង្វឹករូបនេះបានបន្ថែមទៀតថា៖ «ខ្ញុំជឿជាក់ 100ភាគរយទៅលើឱកាសរបស់យើង។ ខ្ញុំដឹងថា ពីការប្រកួត 1លើកទៅការប្រកួត 1លើកទៀត អារម្មណ៍របស់ខ្ញុំកាន់តែល្អប្រសើរចំពោះកីឡាករ ពីព្រោះពួកគេហាក់ដូចជាត្រៀមខ្លួនរួចរាល់ហើយ»។

ដោយឡែក ការមិនស្គាល់ឈ្នះរបស់ក្រុម Everton ក្នុងការប្រកួតរវាងក្រុមស្ថិតក្នុងតំបន់តែមួយ បានបន្តរហូតដល់ 19ប្រកួត បើគិតចាប់តាំងពីឆ្នាំ2010 មក។ ប៉ុន្តែ ទោះបីជាយ៉ាងណា ការអបអរផ្សេងៗពីសំណាក់អ្នកគាំទ្រនៃក្រុមម្ចាស់ផ្ទះក្នុងពេលបញ្ចប់ការប្រកួតបានបង្ហាញថា ពួកគេជឿជាក់ថា ពួកគេបានកម្ទេចក្តីសង្ឃឹមរបស់ Liverpool ក្នុងការឈ្នះពានលីកជាលើកទី1 ក្នុងរយៈពេល 29ឆ្នាំ៕

March 4, 2019

បួនថ្ងៃប៉ុនណោះ ទារុណកម្មខ្មោច ធ្វើឱ្យយុវវ័យផ្អើលលោះព្រលឹង

ថ្មីៗនេះភាពយន្តខ្មែររឿងទារុណកម្មខ្មោចបានដាក់បញ្ចាំងពេញរោងកុនទីក្រុងភ្នំពេញនិងសៀមរាប ចាប់ពីថ្ងៃ28 រហូតមកដល់ថ្ងៃនេះ4ថ្ងៃពេញ រោងភាពយន្តពេញលក់សំបុត្រគ្មានសល់ ពិសេសយុវវ័យផ្អើលទះដៃអបអរសាទរស្នាដៃដ៏អស្ចារ្យមួយនេះដែលដឹកនាំដោយកូនខ្មែរលោក ហ៊ុយ យ៉ាឡេង(មាតុចក្រ) ដែលយុវវ័យតែងសម្គាល់ឃើញថាភាពយន្តអ្នកដឹកនាំម្នាក់នេះតែងនាំភាពយន្តខ្មែរទៅក្រៅប្រទេស ពិសេសថ្មីៗនេះលោកទើបតែនាំភាពយន្តខ្មែរទៅដាក់បញ្ចាំងនៅប្រទេសបារាំងនិងសហរដ្ឋអាមេរិកហើយដែរ។

ហើយភាពយន្តក្រោយរបស់លោករឿងទារុណកម្មខ្មោចដែលកំពុងបញ្ចាំងបាន4ថ្ងៃនេះ កំពុងតែកក្រើកទស្សនិកជនយ៉ាងខ្លាំងហើយអ្នកទស្សនាក្រោយទស្សនាចប់ទះដៃនិងកោតសរសើរគាំទ្រពេញទំហឹងតែម្តង កូនខ្មែរភាពយន្តខ្មែរកំពុងទៅមុខហើយ ដូចនេះអ្នកដែលមិនទាន់ទស្សនាសូមទៅទស្សនាដើម្បីគាំទ្រភាពយន្តខ្មែរមួយនេះ ដែលកំពុងគ្រងធ្វើដំណើរទៅក្រៅប្រទេសផងដែរ ក្នុងនោះលោកហ៊ុយយ៉ាឡេងបានប្រាប់ថា ថ្ងៃទី17 ខែមីនា លោកនិងនាំយករឿងទារុណកម្មខ្មោចទៅចូលទីផ្សារលក់ភាពយន្តពិភពលោកនៅទីក្រុងហុងលោក បន្ទាប់មកទៀតចូលទៅមហោស្រពភាពយន្តនៅម៉ាឡេ បន្ទាប់មកទៀតចូលទៅសាកល្បងទីផ្សារថ្មីនៅប្រទេសភូមានិងវៀតណាមផងដែរ៕

March 4, 2019

អ៊ឹម ជីវ៉ា បកស្រាយក្រោយផ្ទុះមតិរិះគន់រឿងស្លៀកសារ៉ុងរាំនៅត្រពាំងឈូក

ក្រោយមានការរិះគន់ខ្លាំងរហូតដល់ថាលោកកើតជម្ងឺ Depression លើបទចម្រៀងមួយបទរបស់លោក អ៊ឹម ជីវ៉ា ចំណងជើង «ពាក់ពណ៌ដិត ៗៗៗ» នោះ ពេលនេះលោកអ៊ឹម ជីវ៉ា បានបកស្រាយទៅមហាជនវិញថា « សិល្បៈត្រូវរកគំនិតអ្វីដែលថ្មីហើយទាក់ទាញ បើនិយាយអោយចំប្លែកខុសពីគេក៏មិនមែនបានន័យថាថតរហូតអោយចេញក្បាលដោះនោះទេ ធៀបទៅនឹងបច្ចឹមប្រទេសវិញគេរាំនៅមាត់សមុទ្រពាក់វាលជាងហ្នឹងផងម៉េចនៅគាំទ្រគេម្លេះ ??? គេថតបទចំរៀងគឺគេយកចង្វាក់មករាំ មិនមែនថតមកអោយចងពង់រាំតាមទេកុំច្រលំ ..!! ចុះបទត្រពាំងពាយអើយ ថតចងពង់អោយរិតគ្នាក្នុងទឹក ដែលជាចង្វាក់រាំក្បាច់ម៉េចមិនចង់ពង់រាំក្នុងទឹកដែរទៅ ដូចនេះគឺគេមិនមែនយកការសំដែងមករាំទេគឺគេយកចង្វាក់មករាំ , ការស្លៀកខោខ្លី ចងពង់សារ៉ុងរាំកម្សាន្តបែបលេបខាយ គឺជាចរិកពិតបងប្អូនប្រជាពលរដ្ឋមួយចំនួនគឺគាត់សប្បាយរីការាយច្រៀងរាំលេងនៅមាង់បឹង ត្រពាំងឬកំពង់ទឹក ..! អ្នកខ្លះរាំច្រៀងលេងលេងនៅក្រោមដើមឈើ លើភ្លឺស្រែ ក្នុងវាលស្រែ ..ល.។

អ្វីដែលសំខាន់កុំអោយតែខ្ញុំយកយកការមេរ៉ាទៅថតដើមទ្រូងឬZoomដើមទ្រូងតួស្រីឬបញ្ចេញវិដេអូស្រើបស្រាលទៅបានហើយ..! ថតចង់ពង់រាំខុស ចុះគេថតកុនឈុតបឺតមាត់ ឈុតចាប់រំលោភ និងឈុតស្រើបស្រាលដាក់តាមរោងកុនឬទូរទស្សន៍ម៉េចមិនមើលផង …, វប្បធម៌រលាយមិនមែនដោយសារមនុស្ស4 ,10នាក់ទៅរាំចង់ពង់នោះទេ អស់លោក !! ម្នាក់ៗថាស្រលាញ់វប្បធម៌ណាស់តែមិនសូវឃើញអ្នកណា ហើយយកបទចំរៀងខ្មែរមកចាក់ស្តាប់ផង យកបទគេមកស្តាប់ហើយចាក់ផ្សាយទៀត ជាពិសេខ្សែភាពយន្តខ្មែរ សួថាមានមនុសកសប៉ុន្មាននាក់ដែលគាំទ្រ???។

បទចំរៀងមិនទាន់ចេញផងវាយតម្លៃគេបាត់ហើយ នេះហើយគេហៅថារិះគន់ជាន់ពន្លិច បើរិះគន់ដើម្បីស្ថាបនាគេមិនមែនប្រើភាសាបែបនេះឡើយ … អស់លោកអើយ ប្រទេសគេដើដល់ណាហើយ… ឆាប់ភ្ញាក់ពីដំណេកឡើង..! កុំយប់យន់សុបិន្តច្រើនពេក … បើមិនដែលទៅបច្ចឹមប្រទេសគួមើលប្រទេសជិតខាងផងថា វិស័យសិល្បៈបទចំរៀង និងភាពយន្តគេដើរដល់ណា រីកចំរើនបែបណាហើយ …, !! សូមជំរាបមួយផង ខ្ញុំមិនមែនផលិតMV ដើម្បីប្រកួតប្រជែងជាមួយផលិតកម្មណាឬប្រកួតជាមួយតារាណានោះទេគឺធ្វើអ្វីតាមចំនង់ចូលចិត្តរបស់ខ្ញុំដែលខ្ញុំស្រលាញ់ ហើយខ្ញុំធ្វើMV នេះក៏មិនបានទៅផ្គាប់ចិត្តអ្នកណាទេ គឺធ្វើសំរាប់ខ្លួនឯងនិងសំរាន់មនុស្សមួយចំនួនដែលគាត់ចូលចិត្តខ្ញុំ មិនមែនធ្វើមកអោយពួកលោកឯងមើលនោះទេ … អ្នកមើលបានមើលទៅ..អ្នកមើលមិនបានអូសំលងទៅចប់ហើយ …ហើយខ្ញុំក៏មិនបានវៃខ្នោះយកអស់លោកមកគាំទ្រខ្ញុំឯណា… សំខាន់កុំអោយតែខ្ញុំចេញវិដេអូអាសអាភាសស្រើបស្រាលទៅបានហើយ ។

ត្រូវចាំផងកុំមើលរូបភាព ប្រៀបធៀបនិងវិដេអូវាមិនដូចគ្នាទេ.. កុំអានតែចំនងជើងដោយមិនមើលអត្ថបទណា…!! ដោយក្តីគោរពអំពីខ្ញុំបាទៈអ៊ឹម ជីវ៉ា » ៕

March 4, 2019

កញ្ញាឯកភពផែនដីទាំង 5 រូប សន្យានាំយកប្រពៃណី វប្បធម៌ និងជួយផ្សាយពីអង្ករកម្ពុជាទៅដល់ពិភពលោក

កញ្ញាឯកភពផែនដីដែលបានជាប់លំដាប់ថ្នាក់ទាំង5 បានបង្ហាញខ្លួនជាថ្មីម្ដង ក្នុងជំនួបជាមួយអ្នកសារព័ត៌មាន ដែលក្នុងនោះរួមមាន កញ្ញា Monique Best មកពីប្រទេសអាហ្វ្រិកខាងត្បូង ជាម្ចាស់ជ័យលាភីលេខ1 កញ្ញា Marisa Phon Thirat មកពីប្រទេសថៃ ជាប់ជ័យលាភីលេខ2 កញ្ញា Viviana Lin Ak Winfton មកពីប្រទេសម៉ាឡេស៊ី ជាប់ចំណាត់ថ្នាក់លេខ3 កញ្ញា Nicole Cano មកពីប្រទេសប៉ារ៉ាហ្គាយ ចំណាត់ថ្នាក់លេខ4 និងកញ្ញា Nicole Vargas មកពីប្រទេសហ្វីលីពីន ចំណាត់ថ្នាក់លេខ5 សុទ្ធតែបានកោតសរសើរពីការរៀបចំការប្រកួត Miss Planet International ក្រោមការចាត់ចែងរបស់កម្ពុជា ខណៈដែលព្រឹត្តិការណ៍នេះជាការប្រកួតកម្រិតអន្តរជាតិ ប៉ុន្តែកម្ពុជានៅតែរៀបចំបានល្អ។

ជាមួយគ្នានេះដែរ កញ្ញាឯកទាំង5បានទាំងប្រកាសថា នឹងនាំយកប្រពៃណី វប្បធម៌ និងរបៀបរបបរស់នៅរបស់ពលរដ្ឋកម្ពុជា ទៅផ្សព្វផ្សាយដល់ជាតិសាសន៍របស់ខ្លួន និងពិភពលោកឱ្យកាន់តែទូលំទូលាយនោះផង។ ក្រោយជាប់លេខ១ខាងបវរកញ្ញាអាហ្វ្រិកខាងត្បូង និងបន្តបេសកកម្មមួយចំនួនទៀតក្នុងការងាររបស់ខ្លួនដូចជា ជួបសំណេះសំណាលជាមួយមណ្ឌលកុមារកំព្រាជាដើម។

បើតាមការអះអាងរបស់ម្ចាស់មកុដបានបញ្ជាក់នាកម្មវិធីសន្និសីទសារព័ត៌មាននាព្រឹកថ្ងៃទី3 មិនា ឆ្នាំ2019មុននេះ នាងបានប្រាប់ថានាងបានមកដល់កម្ពុជាក្រៅមានភាពអស្ចារ្យ លើប្រាសាទអង្គរវត្ត និងតំបន់ផ្សេងទៀតនាងពិតជាសរសើរពីរបៀបធ្វើស្រូវអង្ករកម្ពុជាផលិតចេញមកគឺមានភាពស្អាតអនាម័យល្អ។ បេសកកម្មរបស់នាងដើម្បីកម្ពុជាជួយផ្សាយពីអង្ករកម្ពុជាព្រមទាំងអាហារនៅលើពិភពលោក។ នាងនឹងបន្តឱ្យគេដឹងគេស្គាល់ប្រទេសកម្ពុជា និងប្រទេសនាងក៏ដូចជាពិភពលោកទាំងមូល ហើយចង់និយាយនាងពិតជាចូលចិត្តរបៀបធ្វើស្រូវអង្ករកម្ពុជាមើលទៅអនាម័យល្អ។

សូមជម្រាបបន្ថែមថា កញ្ញា Marisa Phon Thirat មកពីប្រទេសថៃ ជាប់ជ័យលាភីលេខ2 ក៏បានប្រាប់អ្នកសារព័ត៌មានថា អ្វីដែលនាងបានសង្កេត និងសិក្សាអំពីប្រទេសកម្ពុជា ក្នុងអំឡុងពេលមកប្រកួតនេះ គឺចាប់អារម្មណ៍ពាក់ព័ន្ធជាមួយ វប្បធម៌របស់ខ្មែរយើង។ នាងថា បើទោះបីជាមានភាពស្រដៀងគ្នាបន្ដិចមែន តែនាងស្រឡាញ់វប្បធម៌ខ្មែរដ៏ផូផង់។ នាងថា នាងក៏ជាម្នាក់ដែលជួយផ្សាយវប្បធម៌ខ្មែរទៅកាន់ពិភពលោកផងដែរ ព្រោះថា នាងរស់នៅក្នុងតំបន់ភូមិភាគឥសាន ដែលមានទំនៀមទំលាប់មួយចំនួនដូចប្រទេសកម្ពុជាដែរ។ ការធ្វើដំណើរមកកាន់កម្ពុជានេះ នាងបានទុកប្រទេសកម្ពុជា ជាផ្ទះទី2 របស់នាង ដែលមានភាពកក់ក្ដៅបំផុត៕

March 4, 2019

Tiger Street Football Festival 2019 នៅមណ្ឌលខេត្តកណ្តាលរើសជើងខ្លាំង៤ក្រុមឡើងទៅភ្នំពេញ

ខេត្តកណ្តាល ៖ នារសៀលថ្ងៃទី២ ខែ មីនា ឆ្នាំ២០១៩ ក្រុមការងារ Tiger Street Football Festival 2019 បានធ្វើ សន្និសីទសារព័ត៌មានប្រកាសជាផ្លូវការនៃការប្រកួត Tiger Street Football Festival 2019 នៅសណ្ឋាគារ តាខ្មៅហ្គូដហ៊ែល ចំពោះការប្រកួតផ្លូវការប្រព្រឹត្តនាព្រឹកថ្ងៃទី៣ ខែកុម្ភៈ ឆ្នាំ២០១៩ នៅសួនច្បារមាត់ទន្លេ ច្រមុះជ្រូក ក្រុងតាខ្មៅ ខេត្តកណ្តាល។

លោកស្រី ថោង បវរលក្ខិណា តំណាងឲ្យក្រមហ៊ុនស្រាបៀរ Tiger (CBL) បានមានប្រសាសន៍ថា ក្រុមហ៊ុន ស្រាបៀរថៃហ្គ័របានសហការជាមួយសហព័ន្ធបាល់ទាត់កម្ពុជាក្នុងការបង្កើតព្រឹត្តិការណ៍ប្រកួតបាល់ទាត់ Tiger Street Football Festival ២០១៩ ដើម្បីឲ្យបងៗប្អូនៗជាកីឡាករចេះធ្វើការជាក្រុម ចេះសាមគ្គីភាពគ្នាក្នុងការប្រកួត ឲ្យទទួលជ័យជម្នះលើកគូប្រកួត។ហើយអ្វីដែលកាន់តែពិសេសក្នុងឆ្នាំនេះយើងបានបង្កើនមណ្ឌលប្រកួតដល់៩ទីតាំង និងប្រាក់រង្វាន់សរុបទូទាំងប្រទេសកាន់តែធំអស្ចារ្យរហូតដល់៥០,០០០ដុល្លារ។

លោកស្រីបាននិយាយលើកទឹកចិត្តដល់ក្រុមកីឡាករទាំងអស់ត្រូវខិតខំលេងឲ្យអស់ពីកម្លាំងកាយចិត្តតែត្រូវចេះអត់ឱនអធ្យាស្រ័យឲ្យគ្នាទៅវិញទៅមកជាពិសេសត្រូវខិតខំដើម្បីដណ្តើមយកពានទូទាំងប្រទេសយកមកទឹក ដីខេត្តកណ្តាល។ការប្រកួតមណ្ឌលខេត្តកណ្តាលដោយមានការចូលរួមក្រុម ៤៦ ខណៈមណ្ឌលនេះយក៤ក្រុម ដើម្បីឡើងទៅវគ្គផ្តាច់ព្រ័ត្រ នៅរាជធានីភ្នំពេញថ្ងៃទី១៦ និងទី១៧ មីនា ២០១៩ ខាងមុខនេះជាពិសេស មានឱកាសជួបផ្ទាល់ជាមួយកំពូលតារាបាល់ទាត់ពិភពលោក គឺកីឡាករបាល់ទាត់ Ronaldinho។

ចំណែកមណ្ឌលខេត្តព្រះសីហនុ ជ្រើសរើសក្រុមខ្លាំងចំនួន៦ក្រុម មណ្ឌលខេត្តតាកែវយក៤ក្រុម មណ្ឌលខេត្ត កំពង់ស្ពឺយក៤ក្រុម មណ្ឌលបាត់ដំបងយក៩ក្រុម មណ្ឌលក្រុងប៉ោយប៉ែត យក៦ក្រុម មណ្ឌលខេត្តសៀមរាប យក១២ក្រុម ខេត្តកំពង់ចាមយក៧ក្រុម មណ្ឌលខេត្តកណ្តាល៤ក្រុម និងមណ្ឌលរាជធានីភ្នំពេញ ១២ក្រុមរួចហើយ ក្រុមខ្លាំងទាំង៩មណ្ឌល ដែលមាន៦៤ក្រុម និងធ្វើការប្រកួតផ្តាច់ព្រ័ត្រ នៅថ្ងៃទី១៦ដល់១៧ ខែមករា ឆ្នាំ២០១៩ ស្វែងរកជើងឯកតែម្តង។

ស្រាបៀរថៃហ្គ័រជាស្រាបៀរដែលមានគុណភាពខ្ពស់លំដាប់ថ្នាក់អន្តរជាតិមានដើមកំណើតតាំងពីឆ្នាំ១៩៣២នៅប្រទេសសិង្ហបុរី និងមានលក់នៅច្រើនជាង៧០ប្រទេសនៅទូទាំងពិភពលោក ហើយស្រាបៀរថៃហ្គ័រឈ្នះ ពានរង្វាន់លំដាប់ថ្នាក់អន្តរជាតិច្រើនជាង៤០មេដាយផ្នែករសជាតិ និងគុណភាព។ សូមចូលទៅកាន់ទំព័រហ្វេសប៊ុកផ្លូវការរបស់ស្រាបៀរថៃហ្គ័រ៖ www.facebook.com/TigerBeerKH
ពិសាដោយការទទួលខុសត្រូវ៕

March 4, 2019

Tiger Street Football Festival 2019 ធ្វើដំណើរមកដល់មណ្ឌលទី៨ ខេត្តកណ្តាលហើយ

ខេត្តកណ្តាល៖ក្រុមការងារ Tiger Street Football Festival 2019 បានធ្វើដំណើរមកដល់មណ្ឌលខេត្តកណ្តាល ក្រោយពីបញ្ចប់ការប្រកួតនៅមណ្ឌលខេត្តកំពង់ចាមរកឃើញជើងខ្លាំង៧ក្រុមដើម្បីចូលរួមប្រកួតវគ្គផ្តាច់ព្រ័តនៅរាជធានីភ្នំពេញ ថ្ងៃទី១៦ និងទី១៧ មីនា ២០១៩ ខាងមុខនេះ និងមានឱកាសជួបផ្ទាល់ជាមួយ កំពូលតារាបាល់ទាត់ពិភពលោក គឺកីឡាករបាល់ទាត់ Ronaldinho។

នាថ្ងៃទី២ ខែមីនា ឆ្នាំ២០១៩ក្រុមការងារ Tiger Street Football Festival 2019 នឹងធ្វើសន្និសីទសារព័ត៌មានប្រកាសជាផ្លូវការនៃ Tiger Street Football Festival 2019 នៅសណ្ឋាគារតាខ្មៅហ្គូដហ៊ែល។ នាព្រឹកថ្ងៃទី៣ កុម្ភៈ នៅមណ្ឌលខេត្តកណ្តាលនឹងមានធ្វើការ ប្រកួតជ្រើសរើសជើងខ្លាំង៤ក្រុមប្រចាំមណ្ឌល។

សម្រាប់មណ្ឌលទំាង៦ដែលបញ្ចប់ការប្រកួតរួមមាន៖ មណ្ឌលខេត្តព្រះសីហនុ មណ្ឌលខេត្តតាកែវ មណ្ឌលខេត្តកំពង់ស្ពឺ មណ្ឌលបាត់ដំបង មណ្ឌលក្រុងប៉ោយប៉ែត សៀមរាប និងខេត្តកំពង់ចាម ។ ការប្រកួត Tiger Street Football Festivalនេះ ត្រូវបានបង្កើតឡើង ក្នុងគោលបំណងជួយបង្កើនប្រសិទ្ធភាព នៃវិស័យកីឡាបាល់ទាត់នៅកម្ពុជាឲ្យមានការរីកចម្រើនដើម្បីឲ្យយុវជនបានសម្តែងទេព្យកោសល សមត្ថភាពយ៉ាងសកម្មនៅលើទីលានបាល់ទាត់ថៃហ្គរ័។

ចំណែកមណ្ឌលខេត្តព្រះសីហនុ ជ្រើសរើសក្រុមខ្លាំងចំនួន៦ក្រុម មណ្ឌលខេត្តតាកែវយក៤ក្រុម មណ្ឌលខេត្តកំពង់ស្ពឺយក៤ក្រុម មណ្ឌលបាត់ដំបងយក៩ក្រុម មណ្ឌលក្រុងប៉ោយប៉ែត យក៦ក្រុម មណ្ឌលខេត្តសៀមរាបយក១២ក្រុម ខេត្តកំពង់ចាមយក៧ក្រុម មណ្ឌលខេត្តកណ្តាល៤ក្រុម និងមណ្ឌលរាជធានីភ្នំពេញ ១២ក្រុម រួចហើយក្រុមខ្លាំងទាំង៨មណ្ឌល ដែលមាន៦៤ក្រុម និងធ្វើការប្រកួតផ្តាច់ព្រាត់ នៅថ្ងៃទី១៦ដល់១៧ ខែមករា ឆ្នាំ២០១៩ ស្វែងរកជើងឯកតែម្តង ៕

March 2, 2019

Author: អេបិល