ធនាគារជាតិនៃកម្ពុជា និងធនាគារកណ្ដាលនៃសាធារណរដ្ឋកូរ៉េ បានរៀបចំសិក្ខាសាលារួមគ្នាមួយស្ដីពី«ភាពជាដៃគូផ្ដល់ចំណេះដឹង»ដើម្បីចូលរួមចែករំលែកបទពិសោធរវាងគ្នា និងរួមគ្នាស្រាវជ្រាវលើប្រធានបទ ការអភិវឌ្ឍន៍ទីផ្សារអន្ដរធនាគារនៅកម្ពុជា ដើម្បីត្រៀមបង្ការហានិភ័យនានាដែលនឹងកើតមានឡើង និងធ្វើការអភិវឌ្ឍប្រព័ន្ធប្រតិបត្តិការនៃអន្តរធនាគារឱ្យកាន់តែមានប្រសិទ្ធភាពបន្ថែមទៀត។
លោកជំទាវ នាវ ចាន់ថាណា ទេសាភិបាលរងធនាគារជាតិនៃកម្ពុជា បានសម្ដែងក្ដីអំណរគុណចំពោះធនាគារកណ្ដាលកូរ៉េ ដែលមានលោក Kee Sun Jang អគ្គនាយករងជាតំណាងក្នុងភាពជាដៃគូចែករំលែកចំណេះដឹង សម្រាប់ការផ្ដល់ជូននូវឱកាសដល់ធនាគារជាតិនៃកម្ពុជាក្នុងការចូលរួមចែករំលែកបទពិសោធន៍រវាងគ្នានេះ។
លោកជំទាវមានប្រសាសន៍ថា៖«កម្មវិធីនេះជាជំហានដ៏សំខាន់ក្នុងការឆ្ពោះទៅមុខ និងការស្រាវជ្រាវរបស់ធនាគារជាតិលើការអភិវឌ្ឍវិស័យធនាគារ និងហិរញ្ញវត្ថុរបស់កម្ពុជា។ ជាក់ស្ដែងប្រធានបទដែលនឹងស្រាវជ្រាវក្នុងឆ្នាំនេះស្តីពី ការអភិវឌ្ឍទីផ្សារអន្តរធនាគារ។ ការស្រាវជ្រាវនេះ មានគោលដៅវាយតម្លៃបច្ចុប្បន្នស្ថានភាពនៃទីផ្សារអន្តរធនាគារនៅកម្ពុជា និងព្យាយាមរកមធ្យោបាយបន្ថែមទៀតក្នុងការអភិវឌ្ឍ និងប្រើប្រាស់សាច់ប្រាក់ងាយស្រួលក្នុងប្រព័ន្ធធនាគារប្រកបដោយប្រសិទ្ធភាព»។ លោក ចាង គីស៊ុន Kee Sun Jang អគ្គនាយករងនៃធនាគារកូរ៉េ បានលើកឡើងថា កិច្ចសហការនៃការស្រាវជ្រាវនេះពិតជាមានសារៈសំខាន់ណាស់ក្នុងការជួយពង្រឹងសមត្ថភាពមន្ត្រីជំនាញលើផ្នែកជាច្រើនដូចជា ឈ្វេងយល់បន្ថែមពីដំណើរការប្រតិបត្តិការនៃទីផ្សារអន្តរធនាគារ ចេះវិភាគទិន្នន័យ និងការធ្វើគោលនយោបាយដែលទាក់ទងផ្សេងៗផងដែរ។
លោកជំទាវ ជា សិរី នាយិកាបច្ចេកទេសនៃធនាគារជាតិនៃកម្ពុជាក៏បានឱ្យដឹងដែរថា នេះជាឆ្នាំទី4ហើយដែលធនាគារជាតិ និងធនាគារកណ្ដាលកូរ៉េបានសហការគ្នា ហើយពីមួយឆ្នាំទៅមួយឆ្នាំធនាគារជាដៃគូទាំង2 នេះបានពិភាក្សាគ្នាដោយមានលើកយកប្រធានបទខុសៗគ្នាលើមកពិភាក្សា។ ធនាគារទាំង2 នឹងធ្វើការសិក្សាដើម្បីរកចំណុចល្អបន្ថែមក្នុងការធ្វើការអភិវឌ្ឍទីផ្សារអន្តរធនាគារកម្ពុជាឱ្យកាន់តែប្រសើរ និងមានប្រសិទ្ធភាពជាងមុន។
លោកជំទាវបានមានប្រសាសន៍ថា៖«កន្លងមកធនាគារជាតិនៃកម្ពុជាបានសិក្សា និងអភិវឌ្ឍទីផ្សារអន្តរធនាគារ ក៏ប៉ុន្តែវានូវមានភាពរអាក់រអួល ដូច្នេះយើងចង់ស្រាវជ្រាវបន្តែមទៀតថា តើនៅមានអ្វីខ្លះទៀតដែលយើងអាចធ្វើបានដើម្បីឱ្យការងារនេះនឹងដើរបានរលូន។ អ្វីដែលយើងគិតថាល្អនៅឆ្នាំមុន មិនប្រាកដថាធ្វើបានល្អនៅឆ្នាំនេះទេ»។
លោកជំទាវបន្តថា ការសិក្សានេះ គឺដើម្បីត្រៀមលក្ខណៈ ព្រោះស្ថានភាពហិរញ្ញវត្តុពិភពលោកមានការប្រែប្រួលជាលំដាប់។ ដូច្នេះធនាគារជាតិត្រូវតែសិក្សាលើឧបករណ៍ថ្មីៗ និងឈ្វេងយល់ពីកត្តាជំរុញផ្សេងៗក្នុងការធានាឱ្យមានការចូលរួមពីគ្រឹះស្ថាន និងធនាគារលើទីផ្សារអន្តរធនាគារឱ្យបានច្រើនជាងមុន។
លោកជំទាវបានបន្ដទៀតថា ជាទូទៅភាគីទាំង2 បានចុះសិក្សាដើម្បីស្វែងយល់ថា តើយើងគួរធ្វើដូចម្ដេចដើម្បីអភិវឌ្ឍទីផ្សារអន្ដរធនាគារនៅកម្ពុជាឱ្យមានប្រសិទ្ធភាពជាងមុខ មានដំណើរការរលូនជាងមុន។ ដូច្នេះខាងធនាគារជាតិចង់ស្រាវជ្រាវបន្ថែមទៀតដើម្បីដឹងថា តើត្រូវធ្វើអ្វីខ្លះទៀត ក្នុងគោលបំណងធ្វើឱ្យកិច្ចការងារមួយនេះ ដំណើរការទៅបានដោយរលូន។
លោកជំទាវបញ្ជាក់ថា គោលដៅក្នុងការស្រាវជ្រាវនេះមានច្រើន រួមមាន ចង់ស្វែងយល់ពីឧបករណ៍ថ្មីៗដែលគួរតែមានការស្វែងយល់ និងធ្វើយ៉ាងណាឱ្យគ្រឹះស្ថានធនាគារចូលក្នុងទីផ្សារអន្ដរធនាគារបានច្រើនជាងមុន ហើយសម្រាប់ការសិក្សាស្រាវជ្រាវវិញ មានរយៈពេល 4ខែ គិតចាប់ពីថ្ងៃនេះទៅ៕
