មនុស្សសម័យបុរាណ បានមកដល់ដែនដីមួយដែលបច្ចុប្បន្នជាប្រទេសចិន ឆាប់ជាងច្រើន បើធៀបនឹងការរកឃើញកន្លងមក និងមានបច្ចេកវិទ្យាជឿលឿនខ្លាំង។
ការសិក្សាស្រាវជ្រាវមួយដែលដឹកនាំដោយសាស្ត្រាចារ្យ PEI Shuwen មកពីសភាវិទ្យាសាស្ត្រចិន និងសាស្ត្រាចារ្យ Ignacio de la Torre មកពីវិទ្យាស្ថានប្រវត្តិសាស្ត្រ នៃក្រុមប្រឹក្សាស្រាវជ្រាវអេស្ប៉ាញ បានធ្វើឱ្យមានការប្រែប្រួលនូវពេលវេលានៃការវិវឌ្ឍរបស់មនុស្សជាតិ ដែលបានចារនាពេលកន្លង។
យោងតាមអត្ថបទនៅលើទស្សនាវដ្ដីវិទ្យាសាស្ត្រ PNAS ពួកគេបានវិភាគទៅលើឃ្លាំងវត្ថុបុរាណមួយដ៏មានតម្លៃ ដែលត្រូវបានរកឃើញនៅតំបន់ Nihewan ស្ថិតក្នុងខេត្ត Hunan ប្រទេសចិន និងរកឃើញថា ពួកវាមានអាយុកាល 1.1 លានឆ្នាំទៅហើយ។
![](https://i0.wp.com/lareine.com.kh/wp-content/uploads/2024/03/lareine.com.kh-2024-03-18_15-45-44_736885.png?resize=696%2C670&ssl=1)
អ្វីដែលគួរឱ្យភ្ញាក់ផ្អើលជាងនេះ គឺថា បច្ចេកវិទ្យាដែលបានប្រើប្រាស់សម្រាប់ច្នៃឧបករណ៍នានាក្នុងយុគថ្ម (Stone Age) គឺ Mode 2 ជាវិធីសាស្ត្រច្នៃឧបករណ៍ដែលទំនើបជាងយុគដំបូងដែលហៅថា Mode 1។
Mode 2 មានចំណុចពិសេស ព្រោះបច្ចេកទេសឆ្លាក់នៅលើដុំថ្មប្រកបដោយការយកចិត្តទុកដាក់ ហើយដំណាក់កាលនៃការផលិតត្រូវបានធ្វើឱ្យមានស្តង់ដា។ ក្រៅពីនេះ ឧបករណ៍មួយចំនួនថែមទាំងមានរន្ធខួងផងដែរ។
យោងតាម SciTech Daily បុរាណវិទូក៏បានរកឃើញបំណែកថ្មដែលបែកចេញពីឧបករណ៍ ជាមួយនឹងភាពស៊ីគ្នា ដែលបញ្ជាក់អំពីស្តង់ដានេះ។
![](https://i0.wp.com/lareine.com.kh/wp-content/uploads/2024/03/lareine.com.kh-2024-03-18_15-45-35_193392.png?resize=696%2C443&ssl=1)
Mode 2 គឺជាជំហានដ៏លេចធ្លោនៅក្នុងបច្ចេកវិទ្យារបស់មនុស្សសម័យដំបូង ដោយមានភាពស្មុគស្មាញ និងមានប្រសិទ្ធភាពក្នុងការប្រើប្រាស់ជាងឆ្ងាយ បើធៀបនឹង Mode 1។
កន្លងមក គេជឿថា ក្នុងមួយរយៈពេលវែង បច្ចេកវិទ្យានៅតំបន់អាស៊ីខាងកើត នៅតែប្រើប្រាស់វិធីសាស្ត្រច្នៃឧបករណ៍បែប Mode 1។
ការរកឃើញខាងលើ នាំមកនូវទិន្នន័យថ្មីសំខាន់ចំនួនពីរ៖
*ទីមួយ មនុស្សបុរាណច្រើនអំបូរបានបង្ហាញវត្តមាននៅអាស៊ីខាងកើត ដែលបច្ចុប្បន្នគឺជាប្រទេសចិន ឆាប់ជាងឆ្ងាយ បើធៀបនឹងការយល់ដឹងកន្លងមក។
*ទីពីរ ពួកមានបច្ចេកវិទ្យាជឿលឿនខ្លាំង ដែលអាចអភិវឌ្ឍសមត្ថភាពច្នៃឧបករណ៍ Mode 2 ឆាប់ជាងយ៉ាងតិចបំផុត 300,000 ឆ្នាំ បើធៀបនឹងទិន្នន័យនៃការសិក្សាស្រាវជ្រាវចាស់។
ដូច្នេះ អាស៊ីខាងកើតអាចមិនមែនជាតំបន់ដំបូងគេលើផែនដី ដែល Mode 2 បង្ហាញវត្តមាន ប៉ុន្តែគឺជាមួយក្នុងចំណោមតំបន់ដែលមនុស្សបាននាំបច្ចេកវិទ្យានេះមករស់នៅឆាប់ជាងគេ។ មូលហេតុនេះហើយ ប្រវត្តិសាស្ត្ររបស់មនុស្សជាតិ អាចត្រូវសរសេរឡើងវិញម្ដងទៀត៕