ក្រសួងសាធារណការ និងដឹកជញ្ជូន ថ្មីៗនេះបានឱ្យដឹងថា គម្រោងស្ពានឆ្លងទន្លេមេគង្គខេត្តក្រចេះ កំពុងមានវឌ្ឍនភាពក្នុងទិសដៅវិជ្ជមាន ដោយការសាងសង់តួស្ពានសម្រេចបាន 45%។
ឯកឧត្តម លឹម ស៊ីដេនីន រដ្ឋលេខាធិការក្រសួងសាធារណការ និងដឹកជញ្ជូន និងជានាយកគម្រោង នារសៀលថ្ងៃទី 14 ខែមីនានេះ បានអញ្ជើញដឹកនាំក្រុមការងារបច្ចេកទេស ចុះត្រួតពិនិត្យលក្ខណៈបច្ចេកទេស និងតាមដានវឌ្ឍនភាពការងារ គម្រោងសាងសង់ស្ពានឆ្លងកាត់ទន្លេមេគង្គខេត្តក្រចេះ និងផ្លូវតភ្ជាប់។
ក្នុងឱកាសនោះ នៅចំពោះមុខក្រុមមន្ត្រី និងតំណាងក្រុមហ៊ុនពាក់ព័ន្ធ ឯកឧត្តមរដ្ឋលេខាធិការនាយកគម្រោង បានជំរុញឱ្យក្រុមហ៊ុនសាងសង់ដាក់បន្ថែមគ្រឿងចក្រ និងអនុវត្តតាមប្រតិទិនការងារ ក៏ដូចជាស្ដង់ដាសំណង់ឱ្យបានច្បាស់លាស់។
យោងតាមក្រសួងសាធារណការ និងដឹកជញ្ជូន គិតមកដល់បច្ចុប្បន្ន ការងារសាងសង់តួស្ពាននេះ សម្រេចបាន 45% ហើយគ្រោងនឹងបញ្ចប់នៅកំឡុងខែកញ្ញា ឆ្នាំ 2025 ខាងមុខ គ្រាដែលការងារសាងសង់ផ្លូវតភ្ជាប់សម្រេចបាន 15%។
ជារួម វឌ្ឍនភាពគម្រោងទាំងមូលសម្រេចបានប្រមាណជិត 30%។ យោងតាមក្រសួខាងលើ តួលេខនេះបង្ហាញឱ្យឃើញថា គម្រោងកំពុងមានវឌ្ឍនភាពក្នុងទិសដៅវិជ្ជមានទៅតាមការរំពឹងទុក។
គម្រោងស្ពាននេះ ត្រូវបានផ្តល់ហិរញ្ញប្បទានសម្បទានពីរដ្ឋាភិបាលចិន ក្នុងទំហំទឹកប្រាក់ចំនួនជិត 112លានដុល្លារអាមេរិក ដើម្បីសាងសង់ស្ពានឆ្លងកាត់ទន្លេរនេះ រួមនឹងការស្តារឡើងវិញនូវផ្លូវជាតិលេខ 7។
គម្រោងសាងសង់ស្ពានឆ្លងកាត់ទន្លេមេគង្គ និងផ្លូវតភ្ជាប់នេះ មានប្រវែងសរុបជាង 33 គីឡូម៉ែត្រ តភ្ជាប់ពីផ្លូវជាតិលេខ 7 (រង្វង់មូលខ្លាស្ទុះ) ទៅផ្លូវជាតិលេខ 60B ក្នុងនោះការសាងសង់ស្ពានឆ្លងកាត់ទន្លេមេគង្គ មានប្រវែងជាង 1,700 ម៉ែត្រ ទទឹងជាង 13 ម៉ែត្រ តភ្ជាប់ពីត្រើយខាងកើតស្ថិតត្រង់ ភូមិបុស្សលាវលើ ឃុំបុសលាវ ស្រុកចិត្របុរី ទៅត្រើយខាងលិច ត្រង់ភូមិព្រែកព្រលូង ឃុំសោប ស្រុកព្រែកប្រសព្វ ខេត្តក្រចេះ។
គម្រោងនេះនឹងចាយពេលសាងសង់ប្រមាណ 42 ខែ និងអនុវត្តគម្រោងដោយក្រុមហ៊ុនសំណង់សៀងហៃ (SCG) និងត្រួតពិនិត្យគុណភាព ដោយក្រុមហ៊ុនទីប្រឹក្សាបច្ចេកទេសក្វាងចូវវ៉ានអាន របស់ចិន៕
![](https://i0.wp.com/lareine.com.kh/wp-content/uploads/2024/03/lareine.com.kh-2024-03-14_23-02-42_112397.jpg?resize=696%2C522&ssl=1)
![](https://i0.wp.com/lareine.com.kh/wp-content/uploads/2024/03/lareine.com.kh-2024-03-14_23-02-10_111877.jpg?resize=696%2C522&ssl=1)
![](https://i0.wp.com/lareine.com.kh/wp-content/uploads/2024/03/lareine.com.kh-2024-03-14_23-01-40_388611.jpg?resize=696%2C522&ssl=1)
![](https://i0.wp.com/lareine.com.kh/wp-content/uploads/2024/03/lareine.com.kh-2024-03-14_23-03-20_212966.jpg?resize=696%2C522&ssl=1)