(ភ្នំពេញ) ៖ «យើងនឹងមាន គម្រោងព្រែកជីកហ្វូណនតេជោ ជាគម្រោងព្រែកជីកជាប្រវត្តិសាស្ត្រនៅកម្ពុជា ដែលគ្រោងរៀបចំពិធីបើកការដ្ឋានសាងសង់ក្នុងអំឡុងត្រីមាសទី 4 ឆ្នាំ 2024 ខាងមុខនេះ» ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន បានឱ្យដឹងដូច្នេះ។
ប្រសាសន៍ស្ដីពីព្រែកជីកជាប្រវត្តិសាស្ត្រដែលជាគម្រោងធ្លាប់ត្រូវបានវៀតណាមសម្ដែងការព្រួយបារម្ភនាពេលកន្លង ត្រូវបានលើកឡើងនាព្រឹកថ្ងៃទី 17 មករា 2024 នេះ តាមរយៈបណ្ដាញសង្គមហ្វេសប៊ុកផ្លូវការ របស់ក្រសួងសាធារណការ និងដឹកជញ្ជូន។
យោងតាមសារព័ត៌មានក្នុងស្រុក ព្រែកជីកហ្វូណនតេជោ ដែលនឹងលាតសន្ធឹងលើខេត្តចំនួន 4 គឺ ខេត្តកណ្ដាល តាកែវ កំពត និងខេត្តកែប នេះ ត្រូវបានបញ្ចប់ការសិក្សាសមិទ្ធលទ្ធផលរួចរាល់ និងគ្រោងចំណាយទុនវិនិយោគ 1.7 ពាន់លានដុល្លារអាម៉េរិក។ ព្រែកជីកនេះ នឹងមានប្រវែង 180 គីឡូម៉ែត្រ លាតសន្ធឹងចាប់ពីព្រែកតាកែវ នៃទន្លេមេគង្គ ឆ្លងកាត់តាមព្រែកតាឯក នៃទន្លេបាសាក់ រួចចូលតាមព្រែកតាហ៊ីង នៃទន្លេបាសាក់ ក្នុងស្រុកកោះធំ ហើយបញ្ចប់នៅត្រង់ដៃសមុទ្រខេត្តកែប៕
