(សហរដ្ឋអាម៉េរិក) – យានជំនិះ Switchblade អាចធ្វើដំណើរក្នុងល្បឿន 200 គីឡូម៉ែត្រ/ម៉ោងពេលបត់ជាត្រីចក្រយានយន្តបរលើដងផ្លូវលើដី និង 322 គីឡូម៉ែត្រ/ម៉ោង ពេលហោះលើអាកាស។
យាន Switchblade របស់ក្រុមហ៊ុន Samson Sky បានហោះហើរជាផ្លូវការលើកដំបូង បន្ទាប់ពីទទួលបានការអនុញ្ញាតកាលពីមួយឆ្នាំមុន ពីអគ្គនាយករដ្ឋានអាកាសចរណ៍អាម៉េរិក (FAA) និង 14 ឆ្នាំក្រោយពីបង្ហាញខ្លួនជាលើកទីមួយ។ នេះបើតាមសារព័ត៌មាន Sun ចុះផ្សាយកាលពីថ្ងៃទី 11 វិច្ឆិកា។
យានជំនិះនេះអាចប្រែពីត្រីចក្រយានយន្តមកជាយន្តហោះ ដោយគ្រាន់តែចុចលើគ្រាប់ចុចមួយគ្រាប់។ យាន Switchblade អាចបើកបរក្នុងល្បឿន 200 គីឡូម៉ែត្រ/ម៉ោងពេលស្ថិតក្នុងរូបរាងជាត្រីចក្រយានយន្តបរលើដងផ្លូវលើដី និង 322 គីឡូម៉ែត្រ/ម៉ោង ពេលប្រែខ្លួនជាយន្តហោះ ហោះលើអាកាស។
![](https://i0.wp.com/lareine.com.kh/wp-content/uploads/2023/11/lareine.com.kh-2023-11-13_14-47-27_599309.jpg?resize=696%2C392&ssl=1)
នៅឯព្រលានយន្តហោះអន្តរជាតិក្នុងខណ្ឌ Grant របស់ទីក្រុង Moses Lake នៃរដ្ឋ Washington យាន Switchblade បានហោះឡើងនៅក្នុងជើងហោះហើរដំបូង កម្ពស់ 150 ម៉ែត្រ និងហោះជុំវិញគោលដៅចំនួន 6 នាទី មុននឹងចុះចតលើដី។
ក្រុមហ៊ុន Samson Sky ឱ្យដឹងថា បានទទួលការបញ្ជាទិញសម្រាប់ Switchblade ពី 57 ប្រទេសរួចហើយ នៅក្នុងតម្លៃ 170,000 ដុល្លារអាម៉េរិក/គ្រឿង។ យានដែលមានកៅអីពីរនេះអាចហោះដល់កម្ពស់ 400 ម៉ែត្រ។ ដោយប្រើប្រព័ន្ធអគ្គិសនីកូនកាត់ Switchblade អាចធ្វើដំណើរបាន 805 គីឡូម៉ែត្រ ពេលចាក់ឥន្ធនៈមួយពេញ 125 លីត្រ។
![](https://i0.wp.com/lareine.com.kh/wp-content/uploads/2023/11/lareine.com.kh-2023-11-13_14-50-02_841105.jpg?resize=696%2C392&ssl=1)
យោងតាម New Atlas យន្តហោះកូនកាត់យានជំនិះកង់បី Switchblade នេះ មិនមែនជាយានជំនិះដែលអាចហោះឡើង និងចុះចតដោយឈរត្រង់នោះទេ ប៉ុន្តែវាត្រូវការផ្លូវរត់ដែលមានប្រវែង 335 ម៉ែត្រ។
Samson Sky ឱ្យដឹងថា ទិន្នន័យដែលបានពីជើងហោះហើរនេះនឹងត្រូវបានប្រើប្រាស់ដើម្បីកំណត់យកបច្ចេកទេសក្នុងការផលិត និងអភិវឌ្ឍគំរូដំបូងមួយចំនួន៕